O‘zbekiston Respublikasi Prezidentining “Yerdan foydalanish samaradorligini oshirish to‘g‘risida” 1994-yil 24-noyabrdagi Farmoniga muvofiq savdo va xizmat ko‘rsatish sohasi obyektlarini ular joylashgan yer maydonlari bilan birgalikda, shuningdek, yer maydonlarini yakka tartibda uy-joy qurish va shaxsiy yordamchi xo‘jalik yuritish uchun umrbod meros qilib qoldirish sharti bilan egalik qilish uchun xususiy mulk sifatida fuqarolarga sotish amaliyotini kengaytirish maqsadida Vazirlar Mahkamasi qaror qiladi:

1. O‘zbekiston Respublikasi Davlat arxitektura va qurilish qo‘mitasi hamda O‘zbekiston Respublikasi qishloq xo‘jaligi vazirligi tomonidan o‘tkazilgan O‘zbekiston Respublikasi shaharlari, shahar ko‘rinishidagi va qishloq aholi yashash joylari yerlarini (1991-yilgi bazis narxlarda) kompleks iqtisodiy baholash natijalari 1 va 2-ilovalarga* muvofiq ma’qullansin.

2. Quyidagilar:

Savdo va xizmat ko‘rsatish sohasi obyektlarini ular joylashgan yer maydonlari bilan birgalikda hamda yer maydonlarini meros qilib qoldirish sharti bilan umrbod egalik qilish uchun xususiy mulk sifatida sotish tartibi to‘g‘risidagi Nizom 3-ilovaga muvofiq;

fuqarolarga xususiy mulk sifatida berilmaydigan va kimoshdi savdolarida meros qilib qoldirish sharti bilan umrbod egalik qilish uchun sotilmaydigan yerlar ro‘yxati 4-ilovaga muvofiq tasdiqlansin.

3. Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklari savdo va xizmat ko‘rsatish obyektlarini ular joylashgan yer maydonlari bilan birgalikda xususiy mulk sifatida sotish, shuningdek, yakka tartibda uy-joy qurilishi va dehqon xo‘jalik yuritish uchun fuqarolarga meros qilib qoldirish sharti bilan umrbod egalik qilish uchun yer maydonlari ajratish ishlarini faollashtirsinlar.

4. Quyidagilar o‘z kuchini yo‘qotgan deb hisoblansin:

Vazirlar Mahkamasining “Savdo va xizmat ko‘rsatish sohasi obyektlarini ular joylashgan yer uchastkalari bilan birgalikda xususiy mulk qilib sotish tartibi to‘g‘risida” 1994-yil 4-iyuldagi 341-son qarori;

Vazirlar Mahkamasining “Yerdan foydalanish samaradorligini oshirish chora-tadbirlari to‘g‘risida” 1994-yil 29-noyabrdagi 575-son qarori 3-bandining ikkinchi xatboshi;

Vazirlar Mahkamasining 1992-yil 15-iyundagi 282-son qarori bilan tasdiqlangan “O‘zbekiston Respublikasida yerlarning qishloq va o‘rmon xo‘jaligini yuritish bilan bog‘liq bo‘lmagan ehtiyojlar uchun olinishi munosabati bilan qishloq xo‘jaligi va o‘rmon xo‘jaligi ishlab chiqarishi nobudgarchiligi hajmlarini aniqlash hamda ularning o‘rnini qoplash tartibi to‘g‘risida Nizom”ning 4-bandi.

5. Mazkur qarorning bajarilishini nazorat qilish O‘zbekiston Respublikasi Bosh vazirining o‘rinbosari V.A. Chjen zimmasiga yuklansin.

1. Mazkur Nizom O‘zbekiston Respublikasi Prezidentining “Iqtisodiy islohotlarni yanada chuqurlashtirish, xususiy mulk manfaatlarini himoya qilish va tadbirkorlikni rivojlantirish chora-tadbirlari to‘g‘risida” va “Yerdan foydalanish samaradorligini oshirish to‘g‘risida”gi farmonlarini bajarish maqsadida ishlab chiqilgan.

2. Yer maydonlarining boshlang‘ich narxi mahalliy davlat hokimiyati organlari tomonidan ushbu qarorning 1 va 2-ilovalariga muvofiq, yerlarni kompleks iqtisodiy baholash natijalari asosida aniqlanadi.

Boshlang‘ich narxni aniqlash uchun yer uchastkasining qiymati Makroiqtisodiyot va statistika vazirligi tomonidan “Davarxitektqurilish” va Yer resurslari davlat qo‘mitasi bilan birgalikda yilning har choragida aniqlanadigan narxlarning o‘zgarish koeffitsiyenti (indeksi)ga ko‘paytiriladi.

Boshlang‘ich narxni belgilashda aniq qaror topgan talab va takliflarga bog‘liq holda oshib boruvchi koeffitsiyentlar qo‘llanishi mumkin.

3. Yerlarni kompleks iqtisodiy baholashga hokimliklar tomonidan aholi yashaydigan joyni obodonlashtirish uchun mablag‘lar sarflanishiga qarab, yaqin davr uchun tegishli ravishda asoslab, muhandislik infrastrukturasini istiqbolni rivojlantirishni hisobga olgan holda tuzatishlar kiritilishi mumkin.

4. Yer maydonlarining ularning joylashgan o‘rni, muhandislik kommunikatsiyalari bilan ta’minlanganligi, arxitektura va boshqa xususiyatlaridan kelib chiqqan holda tabaqalashtirilgan boshlang‘ich narxlarini belgilash uchun mintaqalar hududlari tegishli shaharlar va tumanlar hokimliklari qarori bilan zonalarga bo‘linadi va zarur bo‘lgan hollarda ular bo‘yicha narxlar loyiha institutlari bilan birgalikda, yer kadastrlarini va yakka tartibda imorat qurishga obod qilish uchun zarur bo‘lgan bitta uchastkaga qilinadigan xarajatlarni hisobga olgan holda aniqlanadi.

5. Savdo va xizmat ko‘rsatish sohasi obyektlarini ular joylashgan yer maydonlari bilan birgalikda hamda yer maydonlarini meros qilib qoldirish sharti bilan umrbod egalik qilish uchun xususiy mulk sifatida sotish bitishuvlarini yoki shartlarini haqiqiy emas deb hisoblash to‘g‘risidagi nizolar tegishli sudda ko‘rib chiqiladi.

6. Savdo va xizmat ko‘rsatish sohasi obyektlarini ular joylashgan yer maydonlari bilan birgalikda jismoniy va yuridik shaxslarga, shu jumladan, xorijiy jismoniy va yuridik shaxslarga, xususiylashtiriladigan obyektlarni sotib olishda ular foydalanadigan mablag‘larning manbalari haqida deklaratsiya talab qilmagan holda, xususiy mulk sifatida sotish tanlov asosida yoki kimoshdi savdolarida O‘zbekiston Respublikasi davlat mulki obyektlarini davlat tasarrufidan chiqarish va xususiylashtirishning belgilangan tartibiga va mazkur Nizomga muvofiq amalga oshiriladi.

Sotish tegishli hokimliklar va fuqarolarning o‘zini o‘zi boshqarish organlari savdo va xizmat ko‘rsatish obyektlari joylashgan yer maydonlarini xususiy mulk sifatida sotish haqidagi qarorlarni taqdim etishgandan keyin Davlat mulki qo‘mitasi va uning hududiy boshqarmalari tomonidan amalga oshiriladi.

7. Davlat mulki qo‘mitasi yoki uning hududiy boshqarmasi bilan yangi mulkdor o‘rtasida obyektning faoliyat turi to‘g‘risida shartnoma tuzish tanlov yoki kimoshdi savdosining sharti hisoblanadi.

8. Viloyat, tuman va shahar yer tuzish xizmatlari tegishli hudud bo‘yicha qurilgan va chala qurilgan yer maydonlarining chegaralarini (konturlarini) natura tarzida belgilaydilar hamda sotuvchiga (Davlat mulki qo‘mitasiga yoki uning hududiy boshqarmasiga) ana shu maydonlarning hajmini tasdiqlovchi hujjatlarni beradilar. Bunda yer maydoni savdo va xizmat ko‘rsatish sohasining sotib olinayotgan obyektining sanitariya va texnologiya jihatidan faoliyat ko‘rsatishini ta’minlash uchun zarur bo‘lgan eng kam hajmdan oshmasligi kerak.

10. Tanlov yoki kimoshdi savdosi g‘olibiga Davlat mulki qo‘mitasi yoki uning hududiy boshqarmasi tomonidan uni keyinchalik tegishli hokimliklar va fuqarolarning o‘zini o‘zi boshqarish organlarida ro‘yxatdan o‘tkazish uchun obyektga u joylashgan yer maydoni bilan birgalikda egalik qilish huquqini beruvchi davlat dalolatnomasi belgilangan tartibda beriladi.

12. Savdo va xizmat ko‘rsatish sohasi obyektlari ular joylashgan yer maydonlari bilan birgalikda tanlov bo‘yicha va kimoshdi savdosida xususiy mulk sifatida sotilayotganda obyektning va yer maydonining narxini o‘z ichiga oluvchi yagona boshlang‘ich narx belgilanadi.

13. Yer maydonlari meros qilib qoldirish sharti bilan umrbod egalik qilish uchun fuqarolarga yakka tartibda uy-joy qurish uchun 0,04 gektar doirasida kimoshdi savdolarida sotiladi.

Qoraqalpog‘iston Respublikasida tajriba tariqasida, xalq xo‘jaligida foydalanilmayotgan yer maydonlari, shuningdek, zarar ko‘rib ishlayotgan va past rentabelli qishloq xo‘jaligi korxonalarining yerlari fuqarolarga meros qilib qoldirish sharti bilan umrbod egalik qilish uchun xususiy mulk sifatida kimoshdi savdolarida va tanlov asosida sug‘oriladigan yerlar 3 gektargacha va sug‘orilmaydigan yerlar 15 gektargacha doirada sotiladi.

Kimoshdi savdosida va tanlov asosida tajriba sifatida sotiladigan Qoraqalpog‘iston Respublikasidagi foydalanilmayotgan yer maydonlarining, shuningdek, zarar ko‘rib ishlaydigan va past rentabelli qishloq xo‘jaligi korxonalarining meros qilib qoldirish sharti bilan umrbod egalik qilish uchun sotiladigan yerlarining boshlang‘ich narxi, qaror topgan talab va taklifni hisobga olgan holda, yerlarni sifat jihatdan baholash natijalari asosida Qoraqalpog‘iston Respublikasi Vazirlar Kengashi belgilaydigan tartibda belgilanadi.

14. Kimoshdi savdolarini o‘tkazish tartibi Davlat mulki qo‘mitasi tomonidan O‘zbekiston Respublikasi Adliya vazirligi bilan kelishgan holda belgilanadi.

15. Yakka tartibda uy-joy qurish va dehqon xo‘jalik yuritish uchun yer maydonlarini meros qilib qoldirish sharti bilan umrbod egalik qilish uchun xususiy mulk sifatida sotish bo‘yicha kimoshdi savdolarida xorijiy yuridik va jismoniy shaxslar — diplomatik korpus xodimlari, O‘zbekiston Respublikasida ro‘yxatga olingan matbuot vakillari, doimiy vakolatxonalar, firmalar, kompaniyalar va xalqaro tashkilotlar xodimlari, qo‘shma korxonalarda doimiy asosda ishlovchi shaxslar, shuningdek, respublikada doimiy yashaydigan va yashash guvohnomasiga ega bo‘lgan shaxslar qatnashishlari mumkin.

Shahar va shaharchalardagi umumiy foydalanishdagi yerlar (maydonlar, ko‘chalar, tor ko‘chalar, yo‘llar, sohil bo‘ylari, istirohat bog‘lari, skverlar, xiyobonlar, suvni muhofaza qilish zonalari, cho‘milish joylari va boshqalar).

Tabiat yodgorliklari, botanika bog‘lari yerlari.

Sog‘lomlashtirish va tarixiy-madaniy maqsadlarga mo‘ljallangan yerlar.

Yer osti boyliklaridan foydalanish va ularni qo‘riqlash uchun berilgan yerlar.

Xavfli moddalar bilan zararlangan va biogen zaxarlanishga uchragan yerlar.

Shaharlarni rivojlantirish bosh rejalarida, mukammal rejalashtirish loyihalarida va obyektlarni (savdo va xizmat ko‘rsatish sohasi obyektlaridan tashqari) joylashtirish sxemalarida nazarda tutilgan yerlar.

Bosh yo‘llarga tutash yerlar.

Elektr quvvati uzatish liniyalari, kabel liniyalari va podstansiyalar, issiqlik, suv va kanalizatsiya trassalari hamda gaz quvurlari, umumdavlat aloqa liniyalari uchun ajratilgan yerlar va ulardagi inshootlar, suv xo‘jaligi inshootlari.