Oʻzbekiston Respublikasi Prezidentining “Oʻzbekiston Respublikasida pasport tizimi toʻgʻrisidagi Nizom”ni amalga kiritish haqida” 1994-yil 23-dekabrdagi Farmonini hisobga olgan holda Oʻzbekiston Respublikasi fuqarolarining chet elga borishlari tartibini yanada soddalashtirish maqsadida Vazirlar Mahkamasi qaror qiladi:

1. Vazirlar Mahkamasining “Oʻzbekiston Respublikasi fuqarolarining chet elga borishlarining tartibi toʻgʻrisida” 1994-yil 17-martdagi 141-son qarori oʻz kuchini yoʻqotgan deb hisoblansin.

2. Quyidagilar tasdiqlansin:

Oʻzbekiston Respublikasi fuqarolarining chet elga chiqishi va Oʻzbekiston Respublikasi hududiga kirishi tartibi 1-ilovaga muvofiq;

Oʻzbekiston Respublikasining diplomatik pasporti toʻgʻrisidagi Nizom va diplomatik pasport beriladigan shaxslar roʻyxati 2, 3-ilovalarga muvofiq;

3. Oʻzbekiston Respublikasi Ichki ishlar vazirligi, Tashqi ishlar vazirligi va Milliy xavfsizlik xizmati oʻzlarining yoʻriqnoma hujjatlarini mazkur qarorga muvofiqlashtirsinlar.

1. Oʻzbekiston Respublikasi fuqarolari, Oʻzbekiston Respublikasining qonun hujjatlarida belgilangan cheklashlardan tashqari, chet elga erkin chiqish va ushbu Nizomda nazarda tutilgan tartibda Oʻzbekiston Respublikasiga kelish huquqiga egadirlar.

2. Ushbu Nizom Oʻzbekiston Respublikasi fuqarolarining xorijiy davlatlarga chiqishlariga tatbiq etiladi, Oʻzbekiston Respublikasining xalqaro shartnomalariga muvofiq ularga kirish uchun kirish vizalarini rasmiylashtirish talab etilmaydigan xorijiy davlatlar bundan mustasno.

3. Chet elga vaqtincha chiqayotganda fuqarolarga chet elga borish uchun 2 yil mobaynida amal qiladigan ruxsatnoma yozuvi stikeri (keyingi oʻrinlarda stiker deb yuritiladi) rasmiylashtiriladi. Fuqarolar koʻrsatilgan muddat mobaynida bir necha marta chet elga chiqishi mumkin. Stikerning amal qilish muddati pasportning amal qilish muddatidan oshmasligi kerak.

Doimiy yashash uchun chet elga chiqishda fuqarolarga amal qilish muddatisiz stiker rasmiylashtiriladi.

Oʻzbekiston Respublikasi Qurolli Kuchlari harbiy xizmatchilarining chet elga chiqishi Oʻzbekiston Respublikasining qonun hujjatlariga muvofiq rasmiylashtiriladi. Harbiy xizmatchilarga stiker harbiy qism (muassasa) joylashgan joy boʻyicha rasmiylashtiriladi.

4. Biometrik diplomatik pasportlar boʻyicha chet elga chiqish Oʻzbekiston Respublikasining biometrik diplomatik pasporti toʻgʻrisidagi nizomga muvofiq Oʻzbekiston Respublikasi Tashqi ishlar vazirligi tomonidan rasmiylashtiriladi.

5. Xodimni xorijiy xizmat safariga yuborish toʻgʻrisida taqdim etilgan hujjatlarning ishonchliligi yuzasidan javobgarlik, mulkchilik shakllaridan qatʼi nazar, xizmat safariga yuborish haqida qaror qabul qilgan tashkilotlar va muassasalar rahbarlari zimmasiga yuklanadi.

6. Chet elga chiqish uchun ruxsatnoma yozuvi stikeri fuqarolarning doimiy roʻyxatda turgan joylari (harbiy xizmatchilar uchun — harbiy qism (muassasa) joylashgan joy) boʻyicha Oʻzbekiston Respublikasi Ichki ishlar vazirligi, Qoraqalpogʻiston Respublikasi Ichki ishlar vazirligi, viloyatlar ichki ishlar boshqarmalari, Toshkent shahar ichki ishlar bosh boshqarmasining Kirish-chiqish va fuqarolikni rasmiylashtirish boshqarmasi, shuningdek Toshkent shahar ichki ishlar bosh boshqarmasining tuman boʻlinmalari (keyingi oʻrinlarda KChFR boʻlinmalari deb yuritiladi) tomonidan, shuningdek ushbu Tartibda nazarda tutilgan hollarda chet eldagi Oʻzbekiston Respublikasi konsullik muassasalari tomonidan kirish-chiqish va fuqarolikni rasmiylashtirish boʻlinmalari bilan kelishgan holda rasmiylashtiriladi.

7. Oʻzbekiston Respublikasidan yoxud Oʻzbekiston Respublikasining xalqaro shartnomalariga muvofiq ularga kirish uchun kirish vizalarini rasmiylashtirish talab etilmaydigan xorijiy davlatlardan boshqa xorijiy davlatlarga stiker rasmiylashtirmasdan chiqish qonun hujjatlarida belgilangan javobgarlikka olib keladi, Oʻzbekiston Respublikasining xalqaro shartnomalariga muvofiq ularga kirish uchun kirish vizalarini rasmiylashtirish talab etilmaydigan xorijiy davlatlar oʻrtasida safar qilish bundan mustasno.

Stikerning amal qilish muddati chet elda tamom boʻlishi Oʻzbekiston Respublikasiga kirishda, shuningdek bir xorijiy davlatdan boshqasiga safar qilishda javobgarlikka tortish uchun asos boʻlmaydi, Oʻzbekiston Respublikasining xalqaro shartnomalariga muvofiq kirish vizalarini rasmiylashtirish talab etilmaydigan xorijiy davlatlardan boshqa xorijiy davlatlarga safar qilish bundan mustasno.

1. Chet elga bormoqchi boʻlgan fuqarolar, Oʻzbekiston Respublikasining xalqaro shartnomalariga muvofiq ularga kirish uchun kirish vizalarini rasmiylashtirish talab etilmaydigan xorijiy davlatlar bundan mustasno, pasportini, belgilangan namunadagi anketa-arizani, davlat boji toʻlanganligi toʻgʻrisidagi kvitansiyani, 35 x 45 mm oʻlchamli 4 ta fotosuratni, harbiy guvohnomani (harbiy guvohnoma mavjud boʻlmagan taqdirda chaqiruv yoshidagi shaxslar uchun mudofaa ishlari boʻyicha boʻlimning belgilangan namunadagi maʼlumotnomasini) taqdim etgan holda doimiy roʻyxatda turgan joydagi kirish-chiqish va fuqarolikni rasmiylashtirish boʻlinmalariga (harbiy xizmatchilar uchun harbiy qism (muassasa) joylashgan joy boʻyicha) murojaat qiladilar.

2. Kirish-chiqish va fuqarolikni rasmiylashtirish boʻlinmalari fuqaroning murojaatini 15 ish kuni mobaynida koʻrib chiqadi va chet elga chiqish huquqiga cheklovlar uchun asos boʻlmagan taqdirda uning pasportiga stiker yopishtiradi.

Zarur tarzda rasmiylashtirilgan hujjatlar kirish-chiqish va fuqarolikni rasmiylashtirish boʻlinmalariga berilgan kun murojaat qilingan sana deb hisoblanadi.

Amal qiladigan stiker haqiqiy boʻlmagan pasportdan yangi pasportga koʻchirilgan hollarda, ushbu stikerni rasmiylashtirish muddati 7 ish kunidan oshmasligi kerak.

Chet elga xizmat safariga borayotgan fuqarolarga, ular ishlaydigan tashkilotlarning mulkchilik shakllaridan qatʼi nazar, chet elga chiqish huquqini cheklashlar uchun asos boʻlmagan taqdirda, stikerni rasmiylashtirish uchun hujjatlarni koʻrib chiqish muddati 10 ish kunidan oshmasligi kerak.

Oʻzbekiston Respublikasidan tashqariga chiqishni talab qiladigan shoshilinch davolanish zaruriyatini, ogʻir kasallik holatlarini yoki yaqin qarindoshi vafot etganligini tasdiqlovchi hujjatlar mavjud boʻlganda fuqaroga va unga hamrohlik qiluvchi shaxslarga stikerni rasmiylashtirish muddati, chet elga chiqish huquqini cheklash uchun asos boʻlmagan taqdirda, 5 ish kunidan oshmasligi kerak.

Chet elda doimiy yashash uchun chiqish hujjatlarini rasmiylashtirishda fuqarolarning doimiy roʻyxatda turgan joylaridagi kirish-chiqish va fuqarolikni rasmiylashtirish boʻlinmalari arizachilarning murojaatini 15 ish kuni mobaynida koʻrib chiqadi va fuqaroning chet elga chiqishiga toʻsqinlik qiluvchi holatlar boʻlmagan taqdirda, uning pasportiga doimiy yashash uchun stikerni yopishtiradi. Qoʻshimcha tekshirishlar oʻtkazish zarur boʻlganda hujjatlarni koʻrib chiqish muddati 30 kungacha uzaytirilishi mumkin.

Doimiy yashash uchun chet elga chiqishda fuqarolar Oʻzbekiston Respublikasi hududida doimiy yashaydigan oʻz ota-onasining va turmush oʻrtogʻining (birgalikda chiqish holatlari bundan mustasno), shuningdek agar birgalikdagi nikohdan bolalar boʻlsa, Oʻzbekiston Respublikasida doimiy yashaydigan sobiq turmush oʻrtogʻining notarial tasdiqlangan roziligini, ular vafot etgan yoki bedarak yoʻqolgan hollarda esa — vafot etganlik toʻgʻrisidagi guvohnomaning yoki sudning shaxsni bedarak yoʻqolgan deb eʼtirof etish haqidagi qarorining notarial tasdiqlangan nusxasini kirish-chiqish va fuqarolikni rasmiylashtirish boʻlinmalariga taqdim etadilar.

Oʻzbekiston Respublikasi fuqarolari xorijiy davlat hududiga kirish vizasini olish uchun tegishli xorijiy davlatlarning diplomatik vakolatxonalariga yoki konsullik muassasalariga murojaat qiladilar.

3. Xususiy kontraktlar boʻyicha mehnat faoliyati bilan shugʻullanish uchun chet elga chiqishni rasmiylashtirish belgilangan tartibda amalga oshiriladi.

4. Chet elga ketayotgan va davlat siri boʻlgan maʼlumotlardan xabardor boʻlgan shaxsga nisbatan ketayotgan shaxsning ish joyi boʻyicha tashkiloti tegishli organlarga davlat siri boʻlgan maʼlumotlardan xabardorlik darajasi toʻgʻrisidagi xulosani yuboradi.

5. Chet elga vaqtincha yashashga ketgan (xizmat safariga, oʻqishga, davolanishga, kontrakt boʻyicha ishlashga) va Oʻzbekiston Respublikasining diplomatik vakolatxonasida yoki konsullik muassasasida vaqtincha konsullik hisobida turgan Oʻzbekiston Respublikasi fuqarolari pasportning amal qilish muddati tamom boʻlganligi hamda pasportda belgilar va vizalar qoʻyish uchun varaqlar tugaganligi, pasport yaroqsiz holga kelganligi yoki yoʻqolganligi, shuningdek stikerni rasmiylashtirish munosabati bilan pasport almashtirilgan hollarda Oʻzbekiston Respublikasining chet eldagi diplomatik vakolatxonalariga va konsullik muassasalariga pasport berish va chet elga chiqish uchun stikerni rasmiylashtirish toʻgʻrisida belgilangan shaklda ariza bilan murojaat qiladilar.

Oʻzbekiston Respublikasining xalqaro shartnomalariga muvofiq ularga kirish uchun kirish vizalari mavjudligi talab etilmaydigan xorijiy davlatlardagi Oʻzbekiston Respublikasi fuqarolari stikerni rasmiylashtirish uchun Oʻzbekiston Respublikasining tegishli diplomatik vakolatxonalariga yoki konsullik muassasalariga belgilangan shakldagi ariza bilan murojaat qilishlari mumkin.

Fuqarolarning arizalari diplomatik vakolatxonalar yoki konsullik muassasalari tomonidan belgilangan tartibda rasmiylashtiriladi va Oʻzbekiston Respublikasi Tashqi ishlar vazirligi orqali pasportni rasmiylashtirish uchun Oʻzbekiston Respublikasi Vazirlar Mahkamasi huzuridagi Davlat personallashtirish markaziga va stikerni rasmiylashtirish uchun Oʻzbekiston Respublikasi Ichki ishlar vazirligiga qayta joʻnatiladi. Rasmiylashtirilgan hujjatlar egasiga topshirish uchun Tashqi ishlar vazirligi orqali Oʻzbekiston Respublikasining tegishli diplomatik vakolatxonasiga yoki konsullik muassasasiga yuboriladi. Pasportni rasmiylashtirishning toʻliq davriy muddati 30 ish kunidan oshmasligi kerak.

6. Vaqtincha yashash uchun chet elga ketgan, u yerga oshkora kelgan va chet elda doimiy yashashga qaror qilgan Oʻzbekiston Respublikasi fuqarolari doimiy yashashga ruxsatnomani rasmiylashtirish uchun belgilangan shakldagi hujjatlar bilan Oʻzbekiston Respublikasining tegishli konsullik muassasasiga murojaat qiladilar.

Konsullik muassasasi fuqarolarning chet elda doimiy yashash uchun qoldirish boʻyicha hujjatlarini rasmiylashtiradi va masalani belgilangan tartibda kelishish uchun hujjatlarni Tashqi ishlar vazirligi orqali Ichki ishlar vazirligiga yuboradi.

Quyidagi sabablar chet elga borish huquqini cheklash uchun asos boʻlib xizmat qilishi mumkin:

a) agar shaxs davlat siri hisoblangan maʼlumotlardan voqif boʻlsa yoki uning chet elga borishiga monelik qiluvchi boshqa shartnoma, kontrakt majburiyatlari amalda boʻlsa — bu holatlarning amal qilishi tugagunga qadar;

b) agar shaxsga nisbatan jinoiy ish qoʻzgʻatilgan boʻlsa — ish boʻyicha yakuniy qaror qabul qilingunga qadar;

v) agar shaxs sudning hukmi bilan alohida xavfli retsidivist deb tan olingan yoki ichki ishlar organlarining maʼmuriy nazorati ostida boʻlsa — sudlanganlik bekor qilinmagun (olib tashlanmagun)ga qadar yoki nazorat qilish toʻxtatilgungacha;

g) agar shaxsda sud tomonidan yuklangan ijro etilmagan majburiyatlar boʻlsa — majburiyatlar ijro etilgunga qadar;

d) agar shaxs oʻzi toʻgʻrisida qasddan soxta maʼlumotlarni bergan boʻlsa;

e) agar sudda shaxsga nisbatan fuqarolik daʼvosi qoʻzgʻatilgan boʻlsa — ish koʻrib chiqilgunga qadar;

j) agar shaxs chaqiriq uchastkasida roʻyxatga olingan va haqiqiy muddatli harbiy xizmatga chaqirilishi kerak boʻlsa — haqiqiy muddatli xizmatni yoki safarbarlik chaqiruvi zaxirasidagi xizmatni oʻtagunga qadar Oʻzbekiston Respublikasining qonun hujjatlariga muvofiq undan ozod qilingunga qadar;

z) agar shaxsga nisbatan Ichki ishlar vazirligida yoki Tashqi ishlar vazirligida vakolatli organlarning ushbu shaxsning chet elda boʻlgan vaqtda kelgan mamlakati qonunlarini buzganligi (qonun buzilishlari roʻyxati tegishli organlar tomonidan belgilanadi) toʻgʻrisidagi axboroti, shuningdek borishi maqsadga muvofiq emasligini koʻrsatadigan axboroti mavjud boʻlsa — axborot hisobga olingan kundan boshlab ikki yil oʻtgunga qadar.

Chet elga chiqish huquqini cheklash uchun asoslar roʻyxatiga kengaytirilgan izoh berilmaydi.

Ushbu Tartibning III boʻlimida nazarda tutilgan asoslar boʻyicha chet elga borishga ruxsat berishning rad etilishi, javob berishning belgilangan muddatdan ortiqcha kechiktirilishi ustidan fuqaro yuqori organga shikoyat qilishi mumkin, bu organ bir oydan koʻp boʻlmagan muddatda javob berishi kerak, fuqaro uning qaroridan norozi boʻlganda sudga shikoyat qilishi mumkin. Mazkur Tartibning III boʻlimning “a”, “b”, “j” va “z” kichik bandlarida koʻrsatilgan sabablar boʻyicha chet elga borish huquqini cheklash ustidan shikoyat qilinishi mumkin emas.

1. Chet elda vaqtincha yoki doimiy yashovchi Oʻzbekiston Respublikasi fuqarolari Oʻzbekiston Respublikasi fuqarosining amaldagi pasporti yoki Oʻzbekiston Respublikasiga qaytib kelishga sertifikat mavjud boʻlganda Oʻzbekiston Respublikasi hududiga erkin kirish huquqiga egadir.

2. Pasportning amal qilish muddati chet elda tugagan, u yaroqsizlangan yoki yoʻqolgan hollarda, shuningdek qonun hujjatlarida nazarda tutilgan boshqa hollarda (familiyasi, ismi va otasining ismi, tugʻilgan sanasi oʻzgargan, yozuvlarda noaniqliklar va xatolar aniqlangan, varaqlar ishlatib boʻlingan va boshqa hollarda) chet elda doimiy yashaydigan Oʻzbekiston Respublikasi fuqarosi yangi pasportni rasmiylashtirish uchun oʻzi turgan mamlakatdagi Oʻzbekiston Respublikasining konsullik muassasasiga murojaat qiladi.

Agar fuqaro turgan mamlakatda Oʻzbekiston Respublikasining konsullik muassasasi boʻlmasa, fuqaro oʻzi turgan mamlakat konsullik okrugiga kiradigan Oʻzbekiston Respublikasining konsullik muassasasiga murojaat qiladi.

3. Chet elda vaqtincha turgan va oʻzi turgan mamlakatdagi Oʻzbekiston Respublikasining konsullik muassasasida konsullik hisobida turmagan fuqaro, ushbu boʻlimning 2-bandida koʻrsatilgan hollarda, Oʻzbekiston Respublikasiga qaytishga sertifikat olish uchun Oʻzbekiston Respublikasining tegishli konsullik muassasasiga murojaat qiladi.

4. Chet elda doimiy yashaydigan va Oʻzbekiston Respublikasiga vaqtincha kelgan Oʻzbekiston Respublikasi fuqarolariga Oʻzbekiston Respublikasida boʻlgan vaqtda pasportning amal qilish muddati tugagan yoki u yoʻqolgan hollarda, shuningdek mazkur boʻlimning 2-bandida koʻrsatilgan boshqa hollarda pasport berish yoki almashtirish hamda ruxsatnoma yozuvi stikerini rasmiylashtirish Oʻzbekiston Respublikasi Tashqi ishlar vazirligi tomonidan amalga oshiriladi.

5. Chet elda doimiy yashaydigan va Oʻzbekiston Respublikasiga doimiy yashash uchun qaytishni niyat qilgan fuqarolar Oʻzbekiston Respublikasining chet eldagi konsullik muassasasidagi konsullik hisobidan chiqishlari lozim. Fuqarolar Oʻzbekiston Respublikasi hududida turgan taqdirda, ular konsullik hisobidan chiqarish uchun Tashqi ishlar vazirligiga murojaat qiladilar.

1. Oʻzbekiston Respublikasi fuqarosining diplomatik pasporti Oʻzbekiston Respublikasidan tashqariga chiqilganda, u yerda boʻlinganda va vaqtincha yashab turilganda Oʻzbekiston Respublikasi fuqarosiligini, uning egasining shaxsini va maqomini tasdiqlovchi hujjat boʻlib hisoblanadi.

2. Diplomatik pasport roʻyxati Oʻzbekiston Respublikasi Vazirlar Mahkamasi tomonidan tasdiqlanadigan mansabdor shaxslarga, shuningdek, chet elga doimiy ish joyiga ketayotgan diplomatik pasportga ega boʻlgan shaxslarning erlari (xotinlari)ga va ularning qaramogʻida boʻlgan bolalarga beriladi.

3. Oʻzbekiston Respublikasi fuqarosining diplomatik pasporti Oʻzbekiston Respublikasi Tashqi ishlar vazirligi tomonidan beriladi.

Diplomatik pasportni berish tartibi Oʻzbekiston Respublikasi Tashqi ishlar vazirligi tomonidan belgilanadi.

4. Oʻzbekiston Respublikasi Tashqi ishlar vazirligi Oʻzbekiston Respublikasi hukumati nomidan xorijiy davlatlarning barcha vakolatli organlaridan Oʻzbekiston Respublikasi fuqarosining diplomatik pasportini koʻrsatuvchilarni erkin va toʻsiqsiz oʻtkazib yuborishlari va zarur boʻlgan xollarda ularga har qanday yordamni berishlari va himoya qilishlari toʻgʻrisida iltimos qiladi.

5. Oʻzbekiston Respublikasi fuqarosining diplomatik pasporti Oʻzbekiston Respublikasining barcha fuqarosi uchun yagona boʻlgan namunadagi oʻzbek, rus va ingliz tillarida tayyorlanadi.

6. Oʻzbekiston Respublikasi fuqarosining diplomatik pasportiga quyidagi maʼlumotlar oʻzbek, rus va ingliz tillarida kiritiladi:

familiyasi, ismi, otasining ismi;

tugʻilgan yili, kuni, oyi;

tugʻilgan joyi;

millat/fuqaroligi;

jinsi;

pasport berilgan muddat va uning amalda boʻlish muddatining tugashi;

pasportni bergan organning nomi.

7. Oʻzbekiston Respublikasi fuqarosining diplomatik pasportidagi yozuvlar Oʻzbekiston Respublikasi Tashqi ishlar vazirligining Konsullik boshqarmasi tomonidan amalga oshiriladi.

8. Oʻzbekiston Respublikasi fuqarosining diplomatik pasporti besh yil muddatga beriladi.

9. Diplomatik pasport chet elda yoʻqotib qoʻyilgan taqdirda pasport egasi oʻzi turgan mamlakatdagi Oʻzbekiston Respublikasining diplomatik vakolatxonasiga yoki konsullik muassasasiga, pasport respublika hududida yoʻqotib qoʻyilganda esa — Oʻzbekiston Respublikasi Tashqi ishlar vazirligiga tezlik bilan bu haqda xabar berishga majburdir.

Yoʻqotib qoʻyilgan pasport oʻrniga yangi diplomatik pasport Oʻzbekiston Respublikasi Tashqi ishlar vazirligi tomonidan tasdiqlangan tartibda beriladi.

10. Oʻzbekiston Respublikasi fuqarosining diplomatik pasporti Oʻzbekiston Respublikasi Tashqi ishlar vazirligi tomonidan quyidagi hollarda almashtiriladi:

familiyasi, ismi, otasining ismi oʻzgarganda;

yozuvlarda noaniqliklar aniqlanganda;

vizalar uchun belgilangan varaqlar toʻlganda;

amalda boʻlish muddati tugaganda;

foydalanish uchun yaroqsiz holda boʻlib qolganda.

Oʻzbekiston Respublikasi fuqarosining diplomatik pasportini almashtirish tartibi Oʻzbekiston Respublikasi Tashqi ishlar vazirligi tomonidan tasdiqlanadi.

11. Oʻzbekiston Respublikasi fuqarosining diplomatik pasporti bepul beriladi.

12. Diplomatik pasport Oʻzbekiston Respublikasining mulki hisoblanadi.

13. Diplomatik pasportning blanklari qatʼiy hisobda turuvchi hujjat boʻlib hisoblanadi. Ular Oʻzbekiston Respublikasi Tashqi ishlar vazirining talabnomasiga koʻra tayyorlanadi.

Diplomatik pasportlarni hisobga olish, saqlash, yoʻq qilish Oʻzbekiston Respublikasi Tashqi ishlar vazirligi tomonidan amalga oshiriladi.

14. Diplomatik pasport respublikadan tashqariga chiqib ketish chogʻida Oʻzbekiston Respublikasi fuqarosi pasportining oʻrniga beriladi.

Fuqarolar chet el safarlaridan qaytib kelganlarida diplomatik pasportlar bir hafta muddatda pasportlarni saqlash va belgilangan tartibda foydalanish javobgarligi yuklanadigan Oʻzbekiston Respublikasi Tashqi ishlar vazirligida Oʻzbekiston Respublikasi fuqarosi pasportiga almashtirib berilishi kerak.

15. Mazkur Nizomning 2-bandida koʻrsatilgan roʻyxatga kiritilgan mansabdor shaxs ish joyini oʻzgartirgan va uning yangi lavozimi ushbu roʻyxatga kiritilmay qolgan hollarda, mazkur shaxs diplomatik pasportdan foydalanish huquqini yoʻqotadi.

16. Diplomatik pasportni garovga qabul qilish va berish taqiqlanadi.

17. Mazkur Nizom qoidalarini buzish Oʻzbekiston Respublikasi fuqarosining diplomatik pasportidan foydalanish huquqidan mahrum qiladi. Diplomatik pasportdan foydalanish huquqidan mahrum qilish toʻgʻrisidagi masala Oʻzbekiston Respublikasi Tashqi ishlar vazirligi tomonidan hal etiladi.

18. Oʻzbekiston Respublikasi Tashqi ishlar vazirligi Oʻzbekiston Respublikasi fuqarosi diplomatik pasportining namunalarini xalqaro hamjamiyatga taqdim etishni taʼminlaydi.

Oʻzbekiston Respublikasining Prezidenti va uning oila aʼzolari

Oʻzbekiston Respublikasi Prezidentining Davlat maslahatchilari va ularning oʻrinbosarlari

Oʻzbekiston Respublikasi Prezidenti huzuridagi Xavfsizlik kengashi kotibi va uning oʻrinbosarlari

Oʻzbekiston Respublikasi Prezidenti Devonining Ishlar boshqaruvchisi va uning oʻrinbosarlari

Oʻzbekiston Respublikasi Prezidenti Ijro etuvchi apparati rahbari va xodimlari

Oʻzbekiston Respublikasi Prezidenti boshchilik qiladigan rasmiy delegatsiyalarga hamrohlik qiladigan Oʻzbekiston Respublikasi Prezidenti devonining xodimlari

Oʻzbekiston Respublikasi Prezidentining Xavfsizlik xizmati boshligʻi va xodimlari

Oʻzbekiston Respublikasi Oliy Majlisining Qonunchilik palatasi Spikeri

Oʻzbekiston Respublikasi Oliy Majlisi Senati Raisi

Oʻzbekiston Respublikasi Oliy Majlisi Qonunchilik palatasi Spikerining oʻrinbosarlari

Oʻzbekiston Respublikasi Oliy Majlisi Senati raisining oʻrinbosarlari

Oʻzbekiston Respublikasi Oliy Majlisi palatasining qoʻmitalari va komissiyalari raislari, Oʻzbekiston Respublikasi Oliy Majlisining Inson huquqlari boʻyicha vakili (ombudsman);

Oʻzbekiston Respublikasi Oliy Majlisi Qonunchilik palatasining xalqaro aloqalar boʻlimi mudiri

Oʻzbekiston Respublikasi Oliy Majlisi Senatining xalqaro aloqalar boʻlimi mudiri

Oʻzbekiston Respublikasining Bosh vaziri

Oʻzbekiston Respublikasi Bosh vazirining Birinchi oʻrinbosari

Oʻzbekiston Respublikasi Bosh vazirining oʻrinbosarlari

Oʻzbekiston Respublikasi vazirlari, davlat qoʻmitalari, milliy korporatsiyalarining raislari, ularning birinchi oʻrinbosarlari hamda xizmat maqomiga koʻra ularga tenglashtirilgan mansabdor shaxslar

Oʻzbekiston Respublikasi Fanlar akademiyasining Prezidenti

Oʻzbekiston Respublikasi Markaziy banki Boshqaruvining raisi

Oʻzbekiston Respublikasi Tashqi iqtisodiy faoliyat milliy banki Boshqaruvining raisi

Oʻzbekiston Respublikasi Favqulodda vaziyatlar boʻyicha davlat komissiyasining raisi

Oʻzbekiston Kasaba uyushmalari Federatsiyasi Kengashining raisi

Markaziy bank huzuridagi Goznak davlat ishlab chiqarish birlashmasining bosh direktori

Oʻzbekiston Respublikasi Savdo-sanoat palatasi raisi

Oʻzbekiston Respublikasi Milliy xavfsizlik xizmatining raisi va uning birinchi oʻrinbosari

Oʻzbekiston Respublikasi Bosh prokurori va uning birinchi oʻrinbosari

Oʻzbekiston Respublikasi Konstitutsiyaviy Sudining raisi

Oʻzbekiston Respublikasi Oliy Sudining raisi va uning birinchi oʻrinbosari

Oʻzbekiston Respublikasi Oliy Xoʻjalik Sudining raisi va uning birinchi oʻrinbosari

Qoraqalpogʻiston Respublikasi Joʻqorgʻi Kengesining Raisi

Qoraqalpogʻiston Respublikasi Vazirlar Kengashining Raisi

Viloyatlar va Toshkent shahri hokimlari

Qoraqalpogʻiston Respublikasi Joʻqorgʻi Kengesi Raisining oʻrinbosarlari

Qoraqalpogʻiston Respublikasi Vazirlar Kengashi Raisining oʻrinbosarlari

Oʻzbekiston Respublikasi Tashqi ishlar vazirligining diplomatik xodimlari

Xalqaro tashkilotlardagi diplomatik lavozimga tenglashtiriladigan lavozimlarda ishlayotgan Oʻzbekiston Respublikasi vakolatxonalarining xodimlari

Oʻzbekiston Respublikasi Tashqi ishlar vazirligining diplomatik kurʼyerlari

Milliy xavfsizlik xizmati Raisining oʻrinbosarlari

Mudofaa vazirining oʻrinbosarlari

Ichki ishlar vazirining oʻrinbosarlari

Tashqi savdo vazirining oʻrinbosari

Investitsiyalar boʻyicha davlat qoʻmitasi raisining oʻrinbosarlari;

Harbiy attashe, harbiy-havo kuchlari attashesi va ularning yordamchilari

Oʻzbekiston Respublikasining savdo vakillari, Oʻzbekiston Respublikasi savdo vakolatxonalarining maslahatchilari va attashelari

Oʻzbekiston Respublikasining Prezidenti, Oliy Majlisining Qonunchilik palatasi Spikeri va Senati Raisi yoki Bosh vaziri boshchilik qiladigan rasmiy davlat va hukumat delegatsiyalarining aʼzolari

Oʻzbekiston Respublikasi davlat organlari liniyasi boʻyicha xalqaro tashkilotlarga diplomatik lavozimlarga tenglashtirilgan lavozimlarda ishlash uchun yuborilgan Oʻzbekiston Respublikasining fuqarolari — Oʻzbekiston Respublikasi Hukumatining qaroriga koʻra

Oʻzbekiston Respublikasi Savdo-sanoat palatasi raisining oʻrinbosarlari, shuningdek tijorat faoliyatini amalga oshirmaydigan xorijdagi uning vakolatxonasi boshligʻi