Oʻzbekiston Respublikasi Prezidentining “Oʻzbekiston Respublikasi Madaniyat vazirligining tashkiliy tuzilmasini yanada takomillashtirish va uning faoliyatini yaxshilash tadbirlari toʻgʻrisida” 1992-yil 9-martdagi Farmoniga binoan Vazirlar Mahkamasi qaror qiladi:

1. Oʻzbekiston Respublikasi Madaniyat ishlari vazirligi markaziy apparatining tuzilmasi va xodimlari soni koʻpi bilan 58 kishi hisobida (binoni qoʻriqlovchi va xizmatchi xodimlardan tashqari) 1-ilovaga binoan tasdiqlansin.

Oʻzbekiston Respublikasi Madaniyat ishlari vazirligiga vazirning uch nafar oʻrinbosari, shu jumladan, bir nafar birinchi oʻrinbosari va shaxsiy tarkibi Oʻzbekiston Respublikasi Prezidenti huzuridagi Vazirlar Mahkamasi tomonidan tasdiqlanadigan 7 kishidan iborat hayʼati boʻlishiga ruxsat etilsin.

2. Oʻzbekiston Respublikasi Madaniyat ishlari vazirligiga bevosita boʻysunuvchi muassasa va tashkilotlar roʻyxati 2-ilovaga binoan tasdiqlansin.

3. Oʻzbekiston Respublikasi Madaniyat ishlari vazirligi Toshkent shahar va viloyatlar hokimliklari, shuningdek, Qoraqalpogʻiston Respublikasi Vazirlar Kengashi bilan kelishib, hokimliklar boshqarmalarining belgilangan soni doirasida madaniyat ishlari boʻyicha tegishli hududiy boshqarmalarni tuzsin.

4. Belgilab qoʻyilsinki, Oʻzbekiston Respublikasi Madaniyat ishlari vazirligining asosiy vazifalari quyidagilardan iborat:

Oʻzbekiston xalqlarining maʼnaviy madaniyatini har tomonlama rivojlantirish va boyitish sharoitlarini taʼminlash, ijodiy uyushmalar, milliy-madaniy markazlar bilan amaliy aloqalar va oʻzaro munosabatlarni mustahkamlash, davlatlararo (MDH doirasida) va xalqaro madaniy aloqalarni kengaytirish va chuqurlashtirish; badiiy-ijrochilik va madaniy-maʼrifiy kadrlarni tayyorlash sharoitlari va jarayonlarini muntazam ravishda takomillashtirib borish;

madaniyat sohasidagi xalq anʼanalarini qayta tiklash va boyitishni tashkiliy-ijodiy jihatdan taʼminlash;

teatr, musiqa, xoreografiya, estrada-sirk, tasviriy, xalq anʼanaviy va professional dekorativ-amaliy sanʼatini yanada rivojlantirish;

madaniy meros obyektlarining davlat muhofazasini taʼminlash;

madaniyat sohasi xodimlarini va ijodiy ziyolilarni ijtimoiy va professional himoya qilishni taʼminlash;

kadrlar tayyorlash jarayonini yaxshilash, madaniyat, sanʼat va sanʼatshunoslik fani oʻquv yurtlari tarmoqlari faoliyatini rivojlantirish va takomillashtirish uchun tegishli sharoitlar yaratish;

kishilarning madaniy va estetik talablarini yanada toʻlaroq qondirish, ularning professional va havaskorlik xalq ijodiyotida badiiy-ijodiy jihatdan oʻzlarini toʻla namoyon qila olishlari uchun sharoitlar yaratish;

sanʼatshunoslik sohasidagi madaniyat va fan yutuqlarini keng targʻibot qilish va ommalashtirish. Ommaviy axborot vositalari, professional va havaskor ijrochilar ishtirokida koʻriklar, tanlovlar, festivallar oʻtkazish yoʻli bilan respublika aholisini professional sanʼat sohasidagi yutuqlardan, xalq ijodiyotining eng yaxshi namunalaridan bahramand qilish;

boshqaruv va tarmoqqa rahbarlikning samarali tizimini yaratish, qaysi idoraga qarashliligidan va mulkiy shaklidan qatʼi nazar, barcha madaniyat muassasalarining faoliyatini muvofiqlashtirish, sanʼatni tijoratga aylantirib yuborishga yoʻl qoʻymaslik, tashabbusni rivojlantirish va ragʻbatlantirishga, madaniyat organlari va muassasalarining moddiy-texnika negizini mustahkamlashga qaratilgan ishlarning zamonaviy iqtisodiy shakllari va usullarini joriy qilish.

5. Oʻzbekiston Respublikasi Madaniyat ishlari vazirligiga oʻz zimmasiga yuklatilgan vazifalarga muvofiq quyidagi huquqlar berilsin:

aralash ijodiy jamoalar va birlashmalar tuzish, xorijiy sheriklar bilan tijorat asosida boshqa ixtisoslashtirilgan tadbirlar oʻtkazish yoʻli bilan milliy sanʼatni rivojlantirishga yordam beruvchi davlatlararo va xalqaro dasturlarni ishlab chiqish va amalga oshirish;

Qonunda belgilangan tartibda madaniy tadbirlarga chiptalar narxining cheklangan darajasini, respublikadan tashqariga ijodiy jamoalarni yuborishning badiiy va iqtisodiy jihatdan maqsadga muvofiqligini, ularning tayyorgarlik darajasini belgilash;

M. Toshmuhamedov nomidagi gramplastinkalar zavodining matbaachilik negizida, shuningdek, Oʻzbekiston Respublikasi Davlat matbuot qoʻmitasi tizimining nashriyotlari bilan shartlashuvlar boʻyicha reklama-noshirlik faoliyatini amalga oshirish;

vazirlik tizimining teatr-tomosha va madaniy-maʼrifiy muassasalar hamda boshqa boʻlinmalari uchun jihozlar sotib olish yuzasidan belgilangan tartibda eksport-import aʼmollarini amalga oshirish;

yangi dasturlar yaratish, asarlarning badiiy saviyasini oshirish, madaniyat xodimlarini ijtimoiy jihatdan himoya qilish va ularning mehnatini moddiy ragʻbatlantirishni kuchaytirish uchun tijorat faoliyati hamda budjetdan tashqari moliyaviy taʼminlashning boshqa manbalaridan tushgan daromadlardan foydalanish;

tarmoqning moddiy-texnika negizini rivojlantirish maqsadida kichik va qoʻshma korxonalar barpo etish, shuningdek, oʻz mablagʻlari hisobiga va uning doirasida birja aʼmollarida qatnashish;

respublika hududida va uning tashqarisida konsert-gastrol faoliyatining barcha turlarini amalga oshirish uchun belgilangan tartibda litsenziyalar berish.

6. Madaniy hamkorlik sohasida qulay shart-sharoitlar yaratish maqsadida Madaniyat ishlari vazirligiga 1992-1993-yillarda vazirlikning taklifiga koʻra Oʻzbekistonga keluvchi xorijiy fuqarolarning respublika hududida yashashi va transport xarajatlarini soʻm bilan toʻlash uchun ruxsat etilsin.

7. Oʻzbekiston Respublikasi Moliya vazirligi markaziy apparatning mehnat haqi fondini belgilasin, Avtomobil transporti vazirligi tomonidan ajratiladigan 4 ta xizmat avtomashinasini saqlashga zarur mablagʻlar va limitlarni nazarda tutsin, Oʻzbekiston Respublikasi Aloqa vazirligi esa zarur hukumat telefoni aloqasi bilan taʼminlasin.

8. Oʻzbekiston Respublikasi Madaniyat ishlari vazirligi bir oy muddat ichida mazkur qarordan kelib chiquvchi vazifalarni hisobga olgan holda vazirlik haqidagi Nizomni tasdiqlash uchun Vazirlar Mahkamasiga taqdim etsin.

9. Oʻzbekiston SSR Ministrlar Sovetining “OʻzSSR Madaniyat ministrligining faoliyatini qayta koʻrish va uning tashkiliy strukturasini takomillashtirish chora-tadbirlari haqida” 1988-yil 15-sentabrdagi 330-son qarori oʻz kuchini yoʻqotgan deb hisoblansin.

Rahbariyat

Sanʼat ishlari boshqarmasi

Madaniy-maʼrifiy ishlar va xalq ijodiyoti boshqarmasi

Fan, oʻquv yurtlari va kadrlarni tayyorlash va qayta tayyorlash boshqarmasi

Moddiy-texnika taʼminoti va ishlab chiqarish boshqarmasi

Kadrlar va ish yuritish boshqarmasi

Iqtisodiy prognozlash va moliyaviy ishlar boshqarmasi

Repertuar-tahrir hayʼati

Xalqaro aloqalar boʻlimi

Markaziy buxgalteriya

Madaniy meros obyektlarini muhofaza qilish va ulardan foydalanish ilmiy-ishlab chiqarish bosh boshqarmasi

Respublika teatrlari, kutubxonalari, muzeylari

M. Qoriyoqubov nomidagi Oʻzbekiston Davlat filarmoniyasi

Xalqlar Doʻstligi Saroyi

“Oʻzbekdavlatestrada” Respublika Gastrol-konsert birlashmasi

M. Turgʻunboyeva nomidagi xizmat koʻrsatgan Oʻzbek davlat “Bahor” xalq raqs ansambli

“Oʻzbekdavlatsirki” Respublika birlashmasi

Madaniyat va sanʼat oliy hamda oʻrta maxsus oʻquv yurtlari, respublika ixtisoslashtirilgan oʻrta maktab-internatlari, bolalar musiqa maktablari va sanʼat maktablari, estradatsirk sanʼati studiyasi

Oʻquv muassasalari boʻyicha Respublika oʻquv-metodika kabineti

Madaniyat xodimlari malakasini oshirish instituti

Respublika Xalq ijodiyoti va madaniy-maʼrifiy ishlar ilmiy-metodik markazi

Respublika bolalar ijodiyoti markazi

Hamza nomidagi sanʼatshunoslik instituti

“Oʻzmadaniyatqurilish” qurilish boshqarmasi

Avtobaza

Qurilish obyektlari direksiyasi

Loyiha-konstruktorlik texnologiya byurosi

Yotoqxonalardan va ijodkor yoshlar uyidan foydalanish boshqarmasi

Loyihalar va smetalarni ekspertiza qilish boʻyicha xoʻjalik hisobidagi boʻlinma

Oʻzbekiston madaniy mollar bazasi

“Isteʼdod” Respublika tashqi iqtisodiy firmasi

Toshkent ovoz yozish studiyasi

Toshkent gramplastinkalar uyi