Vazirlar Mahkamasining “Yoqilgʻi-energetika resurslarining narx va tariflarini bosqichma-bosqich oʻzgartirish toʻgʻrisida” 2018-yil 1-noyabrdagi 897-son qaroriga muvofiq hamda isteʼmol qilingan elektr energiyasi va tabiiy gaz uchun oʻzaro hisob-kitoblar tizimini yanada takomillashtirish, elektr va gaz taʼminoti shartnomalarida belgilangan limitlardan ortiqcha isteʼmol qilingan elektr energiyasi va tabiiy gaz uchun tariflar keskin oʻsib ketishining oldini olish maqsadida Vazirlar Mahkamasi qaror qiladi:

1. Vazirlar Mahkamasining “Elektr energiyasi va tabiiy gazdan foydalanish tartibini takomillashtirishga doir qoʻshimcha chora-tadbirlar toʻgʻrisida” 2018-yil 12-yanvardagi 22-son qaroriga (Oʻzbekiston Respublikasi QT, 2018-y., 1-son, 10-modda) ilovaga muvofiq oʻzgartirishlar kiritilsin.

2. Belgilansinki, ushbu qaror kuchga kirishidan oldin toʻlov avans tariqasida amalga oshirilgan taqdirda elektr energiyasi (shu jumladan, aktiv va reaktiv energiya) va tabiiy gaz hajmi uchun isteʼmolchi toʻlov kunidan boshlab keyingi 12 oydan ortiq boʻlmagan muddatda tarif oʻzgarganda qoʻshimcha toʻlovlar toʻlashdan ozod qilinadi.

3. Oʻzbekiston Respublikasi Iqtisodiyot va sanoat vazirligi Moliya vazirligi, “Oʻzbekenergo” AJ va “Oʻzbekneftgaz” AJ bilan birgalikda 2019-yil 15-maygacha ushbu qarorda nazarda tutilgan elektr energiyasi va tabiiy gazdan foydalanganlik uchun haq toʻlash tartibi kelgusida saqlanib qolishining maqsadga muvofiqligi toʻgʻrisida Vazirlar Mahkamasiga takliflar kiritsin.

4. Oʻzbekiston Respublikasi Iqtisodiyot va sanoat vazirligi manfaatdor vazirliklar va idoralar bilan birgalikda ular qabul qilgan normativ-huquqiy hujjatlarni bir oy muddatda ushbu qarorga muvofiqlashtirsin.

5. Mazkur qarorning bajarilishini nazorat qilish Oʻzbekiston Respublikasi Bosh vazirining Yoqilgʻi-energetika sohasi va sanoatning bazaviy tarmoqlarini rivojlantirish masalalari boʻyicha maslahatchisi zimmasiga yuklansin.

1. 1-ilovada:

a) 67-banddagi “bir yarim baravari” soʻzlari “1,15 baravari” soʻzlari bilan almashtirilsin;

b) 70-bandning toʻrtinchi xatboshi quyidagi tahrirda bayon qilinsin:

“isteʼmolchilarga elektr energiyasi yetkazib berish, maishiy isteʼmolchilar bundan mustasno, 100 foiz oldindan haq toʻlash asosida amalga oshiriladi. Bunda, hisob-kitobni 50 foiz oldindan haq toʻlash asosida amalga oshirish xohishini bildirgan isteʼmolchilar hisob-kitob amalga oshiriladigan davrni koʻrsatib hisob-kitob davri boshlanishidan kamida 5 kun oldin bildirgi tartibida Byuroga murojaat qilganlari taqdirda elektr energiyasi isteʼmolchilarga, maishiy isteʼmolchilar bundan mustasno, 50 foiz oldindan haq toʻlash asosida yetkazib berilishiga yoʻl qoʻyiladi. Oldindan haq toʻlanmagan hamda 50 foiz oldindan haq toʻlayotgan isteʼmolchilar tomonidan oyning oxirigacha yakuniy hisob-kitob amalga oshirilmagan hollarda mazkur isteʼmolchilarga nisbatan elektr tarmoqlaridan toʻliq uzishgacha boʻlgan choralar koʻriladi.”;

v) 83-bandning uchinchi xatboshi quyidagi tahrirda bayon qilinsin:

“Tarif oʻzgargan taqdirda, maishiy isteʼmolchilardan tashqari, isteʼmolchilar elektr energiyasi (shu jumladan, aktiv va reaktiv energiya)ning avans tariqasida toʻlangan hajmi uchun toʻlov kunidan boshlab keyingi 2 oydan ortiq boʻlmagan muddatda, maishiy isteʼmolchilar esa — keyingi 6 oydan ortiq boʻlmagan muddatda qoʻshimcha toʻlov toʻlashdan ozod etiladi”;

g) 116-banddagi “12 oydan” soʻzlari “6 oydan” soʻzlari bilan almashtirilsin.

2. 2-ilovada:

a) 102-banddagi “oʻn ikki oydan” soʻzlari “olti oydan” soʻzlari bilan almashtirilsin;

b) 105-banddagi “2 koeffitsiyent” soʻzlari “1,4 koeffitsiyent” soʻzlari bilan almashtirilsin;

v) 111-band quyidagi tahrirda bayon qilinsin:

“111. Ushbu bandning ikkinchi xatboshida nazarda tutilgan holatlardan tashqari isteʼmolchilar hisob-kitob davri boshlanishidan kamida 5 kun oldin yetkazib berish yuzasidan tuzilgan shartnomada koʻrsatilgan oylik tabiiy gaz hajmi qiymati summasining 100 foizi miqdorida gaz taʼminoti tashkilotining hisob raqamiga toʻlovlarni oldindan amalga oshirishlari shart.

Hisob-kitob davri boshlanishidan kamida 5 kun oldin hisob-kitobni 50 foiz oldindan haq toʻlash asosida amalga oshirish xohishini bildirgan isteʼmolchilar hisob-kitob amalga oshiriladigan davrni koʻrsatib yetkazib berilgan tabiiy gaz uchun 50 foiz oldindan haq toʻlash asosida hisob-kitob qilish toʻgʻrisida Byuroga bildirgi tartibida murojaat qilishga haqlidir. Bunday holatlarda isteʼmolchilar hisob-kitob davri boshlanishidan kamida 5 kun oldin gaz taʼminoti tashkilotining hisob raqamiga tabiiy gaz yetkazib berishga tuzilgan shartnomada koʻrsatilgan oylik tabiiy gaz hajmi qiymati summasining 50 foizi miqdorida oldindan haq toʻlashlari shart. Amalda isteʼmol qilingan tabiiy gaz hajmi uchun yakuniy hisob-kitob hisobot oyining oxirigacha amalga oshiriladi.”;

g) 122¹-band quyidagi tahrirda bayon qilinsin:

“122¹. Tariflar oʻzgarganda isteʼmol qilingan tabiiy gaz uchun haq toʻlash ushbu Qoidalarning 100-101-bandlarida belgilangan qoidalarga muvofiq amalga oshiriladi. Bunda isteʼmolchi tabiiy gazning avans tariqasida toʻlangan hajmi uchun toʻlov kunidan boshlab koʻpi bilan keyingi 2 oy qoʻshimcha toʻlov toʻlashdan ozod qilinadi”.