O‘zbekiston Respublikasi bilan Turkiya Respublikasi o‘rtasidagi doimiy iqtisodiy aloqalarni rivojlantirish va mustahkamlash, bozor iqtisodiyoti sharoitida o‘zaro tajribalardan foydalanish, mutaxassislarni tayyorlash sohasida hamkorlik qilish maqsadida Vazirlar Mahkamasi qaror qiladi:

1. Vazirlar Mahkamasi huzurida O‘zbekiston Respublikasi bilan Turkiya Respublikasi o‘rtasidagi kadrlar tayyorlash sohasidagi bitimlarning bajarilishini nazorat qilishni amalga oshirish yuzasidan 1-ilovaga* muvofiq muvofiqlashtiruvchi guruh tuzilsin.

2. O‘zbekiston Respublikasi bilan Turkiya Respublikasi o‘rtasidagi bitimlarni bajarishning quyidagi grafiklari tasdiqlansin:

2-ilovaga* muvofiq kadrlarni tayyorlash sohasida;

3-ilovaga* muvofiq turk tili va adabiyoti bo‘yicha mutaxassislarni tayyorlash, qayta tayyorlash va ularning malakasini oshirish sohasida;

4-ilovaga* muvofiq umumta’lim maktablari va hunar-texnika bilim yurtlari o‘quvchilari bilan almashinish sohasida;

5-ilovaga* muvofiq matbaa mahsulotlarini chiqarish bo‘yicha.

3. Ko‘rsatib o‘tilgan bitimlarni amalga oshirish bo‘yicha sarf-xarajatlar smetasi 6-ilovaga* muvofiq tasdiqlansin.

Moliya vazirligi ushbu maqsadlar uchun zarur mablag‘larni ajratsin.

O‘zbekistonning taraqqiyot istiqbolini belgilash qo‘mitasi Turkiya Respublikasiga boruvchi talabalar va o‘quvchilarga hamrohlik qiluvchi shaxslarga xarajatlar uchun valyuta ajratish masalasini belgilangan tartibda hal qilsin.

4. O‘zbekiston Respublikasi Oliy va o‘rta maxsus ta’lim vazirligi, Xalq ta’limi vazirligi, Sog‘liqni saqlash vazirligi, Qishloq xo‘jaligi vazirligi, Melioratsiya va suv xo‘jaligi vazirligi, Aloqa vazirligi, Madaniyat ishlari vazirligi O‘zbekiston Respublikasi uchun eng zarur bo‘lgan mutaxassisliklar nomenklaturasiga muvofiq ravishda testlarda qatnashish uchun talabalarni o‘z vaqtida va sifatli tanlashni ta’minlasinlar, testlarni o‘tkazish uchun zarur shart-sharoitlar yaratsinlar.

5. O‘zbekiston Respublikasi Davlat matbuot qo‘mitasi Oliy va o‘rta maxsus ta’lim vazirligining buyurtmalari bo‘yicha hukumatlararo bitimlarni amalga oshirish uchun zarur adabiyotlarni birinchi navbatda nashr etilishini nazarda tutsin.

6. Oliy va o‘rta maxsus ta’lim vazirligi, Xalq ta’limi vazirligi respublika va viloyatlar til o‘rganish markazlarida qisqa muddatli kurslar tashkil etish va testdan o‘tgan talabalarga turk va ingliz tillarini samarali o‘qitish, shu maqsadlar uchun Turkiya Respublikasi vakillaridan foydalanish masalalarini hal etsinlar.

7. Oliy va o‘rta maxsus ta’lim vazirligi, Tashqi ishlar vazirligi talabalarning o‘qishi bilan bog‘liq muammolarni hal etish uchun Oliy va o‘rta maxsus ta’lim vazirligining Turkiya Respublikasidagi vakolatxonasi to‘g‘risida Turkiya tomoni bilan kelishib olsinlar va Vazirlar Mahkamasiga taklif kiritsinlar.

8. Tashqi ishlar vazirligi, “O‘zbekiston havo yo‘llari” milliy aviakompaniyasi o‘qishga yuborilayotganlarning ketish hujjatlarini o‘z vaqtida rasmiylashtirishni va ularni yuborishni ta’minlasinlar.

9. O‘zbekiston Respublikasi Davlat televideniye va radioeshittirish kompaniyasi, Milliy axborot agentligi hukumatlararo bitimlarning qanday bajarilayotganligini muntazam yoritib borsinlar.

10. Mazkur qarorning bajarilishini nazorat qilish O‘zbekiston Respublikasi Bosh vazirining o‘rinbosari o‘rtoq M.I. Qoraboyev zimmasiga yuklatilsin. O‘zbekiston Respublikasi bilan Turkiya Respublikasi o‘rtasidagi kadrlarni tayyorlash sohasidagi bitimlarning qanday amalga oshirilayotganligi 1992-yilning oktyabr oyida ko‘rib chiqilsin.