Olmaliq shahrini kompleks rivojlantirish va qurishni rejalashtirish sifati va darajasini oshirish, shaharning me’moriy-rejalashtirish qiyofasini hamda infratuzilmasini yaxshilash maqsadida Vazirlar Mahkamasi qaror qiladi:

1. Toshkent viloyati hokimligi tomonidan ishlab chiqilgan va Vazirlar Mahkamasi huzuridagi Respublika arxitektura-shaharsozlik kengashi bilan kelishilgan 2035-yilgacha bo‘lgan davrga mo‘ljallangan Olmaliq shahrining bosh rejasi 1 va 2-ilovalarga* muvofiq asosiy yechimlari va texnik-iqtisodiy ko‘rsatkichlari bilan birgalikda tasdiqlansin.

2. Toshkent viloyati va Olmaliq shahri hokimliklari tasdiqlangan shahar bosh rejasiga muvofiq:

a) O‘zbekiston Respublikasi Iqtisodiyot va sanoat vazirligi, Moliya vazirligi, Qurilish vazirligi, Investitsiyalar va tashqi savdo vazirligi, boshqa manfaatdor vazirliklar va idoralar bilan birgalikda qisqa, o‘rta va uzoq muddatli istiqbollarga mo‘ljallangan qurilish va xorijiy investitsiyalarni jalb qilish istiqbollarini rejalashtirishni hisobga olgan holda 2035-yilgacha bo‘lgan davrga mo‘ljallangan Olmaliq shahrini kompleks qurish Dasturi loyihasini bir oy muddatda ishlab chiqsinlar va O‘zbekiston Respublikasi Vazirlar Mahkamasiga kiritsinlar;

b) manfaatdor vazirliklar, idoralar va xo‘jalik birlashmalari bilan birgalikda quyidagilarni ta’minlasinlar:

shahar yerlaridan maqsadsiz foydalanishga va noqonuniy qurilishlarni amalga oshirishga yo‘l qo‘ymaslik yuzasidan qat’iy nazorat o‘rnatish yo‘li bilan ulardan samarali foydalanish;

umumiy foydalanishdagi avtomobil yo‘llari va magistral ko‘chalar, yo‘l o‘tkazgichlar va avtobekatlarni qurish, rekonstruksiya qilish va kapital ta’mirlashni hisobga olgan holda yo‘l-transport infratuzilmasi tizimini takomillashtirish;

energiyani tejaydigan zamonaviy texnologiyalarni joriy etish yo‘li bilan suv ta’minoti, kanalizatsiya, irrigatsiya, elektr ta’minoti, gaz ta’minoti, issiqlik ta’minoti va telekommunikatsiyalar obyektlarini qurish va rekonstruksiya qilish yo‘li bilan muhandislik-kommunikatsiya tuzilmasini modernizatsiya qilish;

hududning shaharsozlik qiyofasini shakllantiruvchi mavjud maydonlar, obodonlashtirilgan xiyobonlar va bog‘larni rekonstruksiya qilish va yangilarini qurish yo‘li bilan arxitektura-rejalashtirishni yaxshilash ishlarini tashkil etish hamda arxitektura ansambllari yaratish;

uy-joy, ta’lim, sog‘liqni saqlash, sport, madaniyat, san’at va dam olish obyektlarini qurish, rekonstruksiya qilish va kapital ta’mirlash hisobiga infratuzilmani rivojlantirish;

ilmiy gidrogeologik tadqiqotlar asosida sizot suvlar sathini pasaytirish bo‘yicha shahar hududini muhandislik jihatidan tayyorlash tadbirlarini ishlab chiqish va amalga oshirish;

shaharning atrof-muhitini muhofaza qilish tizimini ishlab chiqish;

Ohangaron va Olmaliqsoy daryolari o‘zanlarini obodonlashtirish tadbirlarini amalga oshirish;

aholining fuqarolik muhofazasi bo‘yicha muhandislik-texnik tadbirlarni ishlab chiqish;

birinchi navbatda quriladigan massivlarning batafsil rejalashtirish loyihalarini ishlab chiqish;

uy-joylar qurilishini va boshqa obyektlarni ekologiya jihatidan noqulay hududdan boshqa joyga ko‘chirish tadbirlarini amalga oshirish;

o‘z funksiyalari bo‘yicha joylashishga muvofiq bo‘lmagan obyektlarni rekonstruksiya qilinadigan shahar markazi hududidan bosqichma-bosqich ko‘chirish;

shaharning tasdiqlangan bosh rejasiga muvofiq shaharning qurilish bazasini rivojlantirish tadbirlarini amalga oshirish.

3. Toshkent viloyati hokimligi Olmaliq shahrining tasdiqlangan bosh rejasi asosida Olmaliq shahri chizig‘i loyihasini 2019-yil 1-iyulgacha O‘zbekiston Respublikasi Vazirlar Mahkamasiga belgilangan tartibda taqdim etsin.

4. Toshkent viloyati va Olmaliq shahri hokimliklari, manfaatdor vazirliklar, idoralar va xo‘jalik birlashmalari, loyiha-qidiruv tashkilotlari rahbarlari zimmasiga 2035-yilgacha bo‘lgan davrga mo‘ljallangan Olmaliq shahri bosh rejasini o‘z vaqtida va sifatli amalga oshirish, shaharsozlik jihatidan ta’minlovchi obyektlarni kompleks va oqilona joylashtirish, shuningdek, ushbu maqsadlarga yo‘naltirilayotgan moliyaviy mablag‘lardan maqsadli foydalanish yuzasidan shaxsiy javobgarlik yuklansin.

5. O‘zbekiston Respublikasi Vazirlar Mahkamasi huzuridagi Respublika arxitektura-shaharsozlik kengashi har yili yarim yilliklar yakunlari bo‘yicha o‘z majlislarida 2035-yilgacha bo‘lgan davrga mo‘ljallangan Olmaliq shahri bosh rejasining amalga oshirilishini ko‘rib chiqsin.

6. Mazkur qarorning bajarilishini nazorat qilish O‘zbekiston Respublikasi Bosh vazirining birinchi o‘rinbosari — “O‘zbekiston temir yo‘llari” AJ boshqaruvi raisi A.J. Ramatov, Toshkent viloyati hokimi G‘.I. Ibragimov va O‘zbekiston Respublikasi qurilish vaziri A.X. To‘xtayev zimmasiga yuklansin.