Oʻzbekiston Respublikasi Prezidentining 2018-yil 5-sentabrdagi PQ-3930-son “Korporativ, loyiha boshqaruvi va davlat xaridlari sohasida kadrlarni tayyorlash, qayta tayyorlash va ularning malakasini oshirish tizimini takomillashtirish boʻyicha qoʻshimcha chora-tadbirlar toʻgʻrisida”gi qaroriga asosan buyuraman:

1. Oʻzbekiston Respublikasi Prezidenti huzuridagi Loyiha boshqaruvi milliy agentligi qoshidagi Abu Rayhon Beruniy nomidagi Biznes va boshqaruv respublika oliy maktabiga oʻqishga qabul qilish va oʻqitishni tashkil etish tartibi toʻgʻrisidagi nizom ilovaga muvofiq tasdiqlansin.

2. Mazkur buyruq rasmiy eʼlon qilingan kundan eʼtiboran kuchga kiradi.

Mazkur Nizom Oʻzbekiston Respublikasi Prezidentining 2018-yil 5-sentabrdagi PQ-3930-son “Korporativ, loyiha boshqaruvi va davlat xaridlari sohasida kadrlarni tayyorlash, qayta tayyorlash va ularning malakasini oshirish tizimini takomillashtirish boʻyicha qoʻshimcha chora-tadbirlar toʻgʻrisida”gi qaroriga muvofiq Oʻzbekiston Respublikasi Prezidenti huzuridagi Loyiha boshqaruvi milliy agentligi qoshidagi Abu Rayhon Beruniy nomidagi Biznes va boshqaruv respublika oliy maktabiga (bundan buyon matnda Oliy maktab deb yuritiladi) oʻqishga qabul qilish va oʻqitishni tashkil etish tartibini belgilaydi.

1. Oliy maktab magistraturasida boshqaruv kadrlarni tayyorlash toʻlov-kontrakt asosida, ishlab chiqarishdan ajralgan va ajralmagan holda, oliy taʼlimning davlat taʼlim standartlariga muvofiq meʼyoriy va qisqartirilgan muddatlarda, oʻqishni tamomlagandan keyin tegishli mutaxassislik boʻyicha magistr darajasini beruvchi davlat namunasidagi hujjat beriladigan tartibda amalga oshiriladi.

2. Oliy maktab magistraturasi dasturlari boʻyicha oʻqitish yetakchi xorijiy taʼlim muassasalarining oʻquv rejalari va dasturlari asosida “ikki diplom” (double degreye) modeli boʻyicha Oʻzbekiston Respublikasida tan olingan davlat namunasidagi diplomlar berilishi orqali amalga oshirilishi mumkin.

3. Oliy maktab “Loyiha boshqaruvi” (“Project management”) mutaxassisligi boʻyicha bir yillik magistratura, “Biznes boshqaruvi” (“Master of Business Administration — MBA”) mutaxassisligi boʻyicha ikki yillik magistraturada oʻqitishni amalga oshiradi.

Oʻqitish muddati va shakllari Oliy maktab tomonidan Oʻzbekiston Respublikasi Prezidenti huzuridagi Loyiha boshqaruvi milliy agentligi (bundan buyon matnda Agentlik deb yuritiladi) bilan kelishilgan holda tasdiqlanadi.

4. Oliy maktab magistraturasiga kirish test sinovlari va suhbat shaklida, nomzodlarning tanloviga koʻra oʻzbek, rus yoki ingliz tilida amalga oshiriladi.

5. Oliy maktab magistraturasiga oʻqishga barcha uchun teng huquqlilik, yagona qabul qoidalari va yagona tanlov prinsiplari asosida qabul qilinadi.

6. Oliy maktab magistraturasida ishlab chiqarishdan ajralgan holda taʼlim olayotgan tinglovchilarning asosiy ish joyi va oʻrtacha ish haqi miqdori oʻqish muddati mobaynida saqlanadi. Bunda ish beruvchi tasdiqlangan ish haqi fondi doirasida magistraturada taʼlim olayotgan tinglovchining oʻqishni tamomlash davri yakuniga qadar muddatga tuzilgan shartnoma asosida boshqa xodimlarni tegishli ish joyiga qabul qilishi mumkin.

7. Oliy maktabning magistraturasiga oʻqishga qabul qilishning yillik kvotasi Agentlik tomonidan qonun hujjatlarida belgilangan tartibda tasdiqlanadi.

8. Oliy maktab magistraturasiga oliy maʼlumotga, shu jumladan xorijiy mamlakatlarda olingan oliy maʼlumotga (diplomli mutaxassis, bakalavr) va oliy taʼlim muassasasini tamomlagandan keyin quyidagi zarur ish stajiga ega boʻlgan fuqarolar qabul qilinadi:

ishlab chiqarishdan ajralgan holda taʼlim uchun — uch yildan kam boʻlmagan;

ishlab chiqarishdan ajralmagan holda taʼlim uchun — besh yildan kam boʻlmagan.

9. Oliy maktab magistraturasiga qabul qilishni tashkil etish uchun qabul komissiyasi (bundan buyon matnda Komissiya deb yuritiladi) tashkil etiladi. Komissiya aʼzolarining soni va shaxsiy tarkibi, shuningdek ish reglamenti Oliy maktab direktori tomonidan Agentlik bilan kelishilgan holda tasdiqlanadi.

10. Oliy maktab magistraturasiga kirish istagini bildirgan nomzodlar Oliy maktabning rasmiy veb-sayti (bundan buyon matnda veb-sayt deb yuritiladi) orqali Oliy maktabning direktori nomiga quyidagi hujjatlarning nusxalarini ilova qilgan holda ariza bilan murojaat qilishadi:

oliy maʼlumoti toʻgʻrisidagi hujjatning nusxasi;

ish stajini tasdiqlaydigan belgilangan namunadagi hujjat;

4x6 oʻlchamdagi rangli fotosurat;

pasport (imtihon vaqtida asl nusxasi taqdim etiladi).

Oliy maktab magistraturasiga kirish imtihonlaridan muvaffaqiyatli oʻtgan tinglovchilar yuqorida koʻrsatilgan hujjatlarning aslini yoki ularning belgilangan tartibda tasdiqlangan nusxalarini Oliy maktabga taqdim etadi.

11. Shartnoma shartlari, tomonlarning huquqlari va majburiyatlari, toʻlovlarni amalga oshirish tartibi qonun hujjatlariga muvofiq belgilanadi va veb-saytda eʼlon qilinadi.

12. Oliy maktab magistraturasiga qabul qilish shartlari, hujjatlarni qabul qilish muddatlari, Oliy maktab magistraturasiga hujjatlarni qabul qilish muddati tugashidan kamida bir oy oldin veb-saytda ommaviy eʼlon qilinadi.

13. Nomzodlar mazkur Nizomda belgilangan talablarga muvofiq boʻlgan taqdirda magistraturaga qabul qilish uchun oʻtkaziladigan test sinovlarida ishtirok etishiga yoʻl qoʻyiladi.

14. Oliy maktab magistraturasiga qabul qilish uchun oʻtkaziladigan test sinovlarida ishtirok etishga yoʻl qoʻyilganlar roʻyxati veb-saytda eʼlon qilinadi.

15. Test oʻtkazish tartibi, test sinovlari amalga oshiriladigan fanlar roʻyxati Komissiya tomonidan belgilanadi.

Test sinovlarining savollari Komissiya tomonidan tuziladi.

Test sinovlari Oliy maktab tomonidan qonun hujjatlarida belgilangan tartibda oʻtkaziladi.

Test sinovlari natijalari Komissiya tomonidan tegishli bayonnoma rasmiylashtiriladi. Nomzodlarning testdan qayta oʻtkazilishiga yoʻl qoʻyilmaydi.

16. Test sinovlaridan muvaffaqiyatli oʻtgan nomzodlar suhbatga kirishiga ruxsat etiladi.

Nomzodlar bilan suhbat shaxsiy muloqot oʻtkazish orqali ularda boshqaruv qobiliyatlariga ega ekanlik darajasini baholash, tizimli va analitik fikrlash qobiliyatlarini, yetakchilik sifatlarini aniqlash yuzasidan amalga oshiriladi.

Suhbat oʻtkazish tartibi, nomzodning oʻqitilishi rejalashtirilayotgan yoʻnalish boʻyicha zarur bilim darajasi, shuningdek uning natijasi boʻyicha nomzodning bilimini baholash mezonlari Oliy maktab tomonidan belgilanadi.

Suhbat natijalariga koʻra Komissiya tomonidan tegishli bayonnoma rasmiylashtiriladi. Nomzodlarning suhbatdan qayta oʻtkazilishiga yoʻl qoʻyilmaydi.

17. Oliy maktab magistraturasiga kirish imtihonlarini muvaffaqiyatli topshirgan nomzodlar belgilangan kvotalar doirasida Komissiya tomonidan Oliy maktab magistraturasiga qabul qilish uchun tavsiya etiladi.

18. Oliy maktab magistraturasiga kirish imtihonlarini muvaffaqiyatli topshirgan nomzodlar roʻyxati veb-saytda eʼlon qilinadi.

19. Komissiyaning nomzodlarni Oliy maktab magistraturasiga qabul qilish haqidagi qarori asosida nomzod (tashkilot) bilan toʻlov-kontrakt asosida oʻqitish toʻgʻrisida tegishli shartnoma tuziladi.

20. Belgilangan namunadagi shartnoma blankalari Oliy Maktab tomonidan magistraturaga kirish imtihonlari natijalari eʼlon qilinganidan keyin beriladi.

21. Tinglovchilarni Oliy maktab magistraturasiga qabul qilish Komissiya qaroriga muvofiq Oliy maktab direktorining buyrugʻi bilan, shartnomada belgilangan muddatlarda tegishli taʼlim toʻlovi toʻlanganidan keyin amalga oshiriladi.

22. Nomzod tomonidan shartnomada koʻrsatilgan muddatda taʼlim toʻlovi toʻlanmagan taqdirda, uning oʻrniga toʻplangan ballar soni boʻyicha navbatdagi nomzod qabul qilinadi.

23. Tinglovchilar Oliy maktabning ichki tartib qoidalarini buzganligi yoki akademik qarzdorlik sababli tinglovchilar safidan chiqarilgan taqdirda, mazkur tinglovchi uchun amalga oshirilgan taʼlim toʻlovi qaytarilmaydi.

24. Oliy maktab magistraturasiga kirish imtihonlarini tashkil etish va oʻtkazish bilan bogʻliq xarajatlar Oliy maktab mablagʻlari hisobiga qoplanadi.

25. Oliy maktab magistraturasiga kirish imtihonlaridan oʻta olmagan nomzod imtihon natijalari eʼlon qilingan kundan boshlab uch kun ichida Oliy maktab orqali apellatsiya komissiyasiga apellatsiya berish huquqiga ega.

26. Apellatsiya komissiyasining tarkibi Agentlik direktorining buyrugʻi bilan qabul komissiyasi faoliyatida ishtirok etmagan shaxslar orasidan shakllantiriladi.

Apellatsiya komissiyasi apellatsiya shikoyatini uch ish kuni ichida koʻrib chiqadi va qabul qilingan qaror toʻgʻrisida nomzodga shu kunning oʻzida yozma ravishda xabar beradi.

27. Nomzodning apellatsiyasini koʻrib chiqishda nomzod ishtirok etish huquqiga ega.

28. Apellatsiya komissiyasi nomzodning shikoyatini koʻrib chiqib, uning natijasi boʻyicha tegishli qaror qabul qiladi. Qarorda nomzodning shikoyatini qanoatlantirish yoki qanoatlantirishni rad etish masalasi koʻrsatiladi.

29. Oliy maktabda oʻquv kurslari oʻqishni tamomlagandan keyin tegishli tasdiqlovchi hujjatlar beriladigan maxsus taʼlim dasturlari asosida oʻtkaziladi.

30. Oliy maktab maxsus taʼlim dasturlari asosida:

Biznesni boshqarish va korporativ boshqaruv yoʻnalishi boʻyicha xoʻjalik boshqaruvi organlari, aksionerlik jamiyatlari va boshqa tadbirkorlik subyektlarining oliy maʼlumotga ega boʻlgan (diplomli mutaxassis, bakalavr) yuqori va oʻrta boʻgʻin rahbarlarining malakasini oshirish va qayta tayyorlash;

loyiha boshqaruvi va davlat xaridlari yoʻnalishi boʻyicha, imtihonlarni muvaffaqiyatli topshirgan taqdirda, belgilangan namunadagi sertifikat beriladigan, davlat organlari va boshqa tashkilotlarning xodimlarini tayyorlash, qayta tayyorlash va malakasini oshirish;

belgilangan namunadagi malaka sertifikati berilgan holda baholovchilarni tayyorlash, qayta tayyorlash va ularning malakasini oshirish boʻyicha oʻquv kurslarini tashkil etadi.

31. Oʻquv kurslarida oʻqish istagini bildirgan nomzodlar direktor nomiga veb-sayt orqali ariza yozib, anketa toʻldiradilar hamda unga shaxsiy pasport va zarurat boʻlganda taʼlim olganligi toʻgʻrisidagi hujjat nusxalarini ilova qiladilar.

32. Oʻquv kurslarining qiymati Agentlik bilan kelishilgan holda direktor tomonidan tasdiqlanadi.

Oʻquv kurslarini oʻtkazish sanasi, davomiyligi, taʼlim shakli, ariza topshirishning tugallash muddatlari, shartnoma shartlari, taraflarning huquq va majburiyatlari, toʻlovlarni amalga oshirish tartibi va oʻquv kurslari boʻyicha boshqa maʼlumotlar direktor tomonidan tasdiqlanadi va veb-saytda eʼlon qilinadi.

33. Tinglovchilarni Oliy maktab oʻquv kurslariga qabul qilish direktorning buyrugʻi shartnomada belgilangan muddatlarda va shaklda, oʻqitish uchun tegishli miqdordagi toʻlov toʻlanganidan keyin amalga oshiriladi.

34. Mazkur Nizom talablari buzilishida aybdor boʻlgan shaxslar qonun hujjatlariga muvofiq javobgar boʻladilar.