Qoraqalpogʻiston Respublikasi Orolboʻyi hududida ekologik muhitni barqarorlashtirish, atrof-muhitni muhofaza qilish sohasida yuzaga kelayotgan muammolarni hal etishga yangi yondashuvlarni joriy qilish boʻyicha kompleks chora-tadbirlar izchil amalga oshirilmoqda.

Orolboʻyi mintaqasida ekologik va ijtimoiy-iqtisodiy vaziyatni, aholining turmush sharoitlarini yaxshilashga va sifatini oshirishga yoʻnaltirilgan chora-tadbirlar dasturlarini shakllantirish hamda barqaror moliyalashtirish maqsadida Oʻzbekiston Respublikasi Moliya vazirligi huzuridagi Orolboʻyi mintaqasini rivojlantirish jamgʻarmasi tashkil etildi.

Shu bilan birga, Orolboʻyi hududida atrof-muhitni muhofaza qilish sohasidagi islohotlarni belgilangan surʼatlarda va samarali amalga oshirishda, ushbu hududni ijtimoiy-iqtisodiy rivojlantirish borasida davlat va mahalliy ijro hokimiyati organlarining xalqaro tashkilotlar bilan hamkorlik borasidagi faoliyati yetarli darajada taʼminlanmayapti.

Qoraqalpogʻiston Respublikasida ekologik vaziyatni yanada yaxshilash, Orolboʻyi hududini rivojlantirish, aholining turmush darajasini oshirish va ularga qulay shart-sharoitlar yaratish hamda tasdiqlangan chora-tadbirlar va dasturlarning joylardagi ijrosini tashkillashtirishda mahalliy ijro hokimiyati organlarining bevosita ishtirokini taʼminlash, roli va masʼuliyatini yanada oshirish maqsadida:

1. Qoraqalpogʻiston Respublikasi Joʻqorgʻi Kengesining Qoraqalpogʻiston Respublikasi Vazirlar Kengashi raisining hamda Moʻynoq, Qoʻngʻirot, Qoraoʻzak, Kegeyli va Taxtakoʻpir tumanlari hokimlarining ekologiya va Orolboʻyi hududini rivojlantirish masalalari boʻyicha birinchi oʻrinbosari lavozimlarini joriy etish toʻgʻrisidagi taklifi maʼqullansin.

2. Qoraqalpogʻiston Respublikasi Vazirlar Kengashi raisining hamda Moʻynoq, Qoʻngʻirot, Qoraoʻzak, Kegeyli va Taxtakoʻpir tumanlari hokimlarining ekologiya va Orolboʻyi hududini rivojlantirish masalalari boʻyicha birinchi oʻrinbosarlariga quyidagi vazifalar yuklanishi maʼlumot uchun qabul qilinsin:

Orolboʻyi hududida ekologik vaziyatni yaxshilash, atrof-muhitni muhofaza qilish, bioxilmaxillikni tiklash, hayvonot va oʻsimlik dunyosini saqlash, shu jumladan muhofaza etiladigan tabiiy hududlar tizimini rivojlantirish boʻyicha chora-tadbirlarni amalga oshirish;

Orol dengizining qurib qolgan qismidagi shoʻrlangan yerlarda innovatsion texnologiyalar va yondashuvlar asosida ekotizimlarni tiklash hamda munosib hayot faoliyatini taʼminlash, himoya oʻrmonzorlarini barpo qilish ishlarini tashkil qilish;

Orolboʻyi hududida yashovchi aholining genofondini tiklash va sogʻligʻini saqlash boʻyicha takliflar ishlab chiqish, ularni amalga oshirish boʻyicha zarur chora-tadbirlar va dasturlarni shakllantirish hamda oʻz vaqtida va sifatli amalga oshirilishini taʼminlash;

Orolboʻyi hududida qishloq xoʻjaligida foydalaniladigan yerlarning meliorativ holatini yaxshilash, irrigatsiya tizimlarini tiklash, suv resurslaridan tejamkor va samarali foydalanish boʻyicha zamonaviy texnologiyalarni tatbiq etish;

Orolboʻyi hududini ijtimoiy-iqtisodiy rivojlantirish, aholi turmush sharoitini yaxshilash, yangi ish oʻrinlari yaratish boʻyicha tadbirlarni amalga oshirish;

Orolboʻyi hududini rivojlantirish maqsadlari uchun xalqaro tashkilotlar va xorijiy davlatlar bilan samarali hamkorlikni tashkil etish hamda moliyaviy mablagʻlarni jalb etishda faol ishtirok etish;

tegishliligi boʻyicha Qoraqalpogʻiston Respublikasi Ekologiya va atrof-muhitni muhofaza qilish qoʻmitasi, ekologiya va atrof-muhitni muhofaza qilish sohasidagi nazorat boʻyicha tuman (shahar) inspeksiyalarining hamda Qoraqalpogʻiston Respublikasi Oʻrmon xoʻjaligi qoʻmitasining faoliyatini muvofiqlashtirish.

3. Qoraqalpogʻiston Respublikasi Joʻqorgʻi Kengesiga ushbu qarorda belgilangan vazifalardan kelib chiqib, Qoraqalpogʻiston Respublikasi Vazirlar Kengashi boshqaruv apparati tuzilmasini hamda yangi joriy etilayotgan oʻrinbosarning funksional vazifalari va uning kotibiyati toʻgʻrisidagi nizomni tasdiqlash tavsiya etilsin.

4. Oʻzbekiston Respublikasi Moliya vazirligi Qoraqalpogʻiston Respublikasi Joʻkorgʻi Kengesi bilan birgalikda oʻn kun muddatda Qoraqalpogʻiston Respublikasi Vazirlar Kengashi va tumanlar hokimliklari boshqaruv apparati xodimlarining shtatlar jadvallarini ushbu qarorga muvofiq qayta koʻrib chiqsin.

5. Oʻzbekiston Respublikasi Investitsiyalar boʻyicha davlat qoʻmitasi, Oʻzbekiston Respublikasi Ekologiya va atrof-muhitni muhofaza qilish davlat qoʻmitasi, Oʻzbekiston Respublikasi Oʻrmon xoʻjaligi davlat qoʻmitasi, Oʻzbekiston Respublikasi Turizmni rivojlantirish davlat qoʻmitasi Qoraqalpogʻiston Respublikasi Vazirlar Kengashi raisining hamda Moʻynoq, Qoʻngʻirot, Qoraoʻzak, Kegeyli va Taxtakoʻpir tumanlari hokimlarining ekologiya va Orolboʻyi hududini rivojlantirish masalalari boʻyicha birinchi oʻrinbosarlari bilan birgalikda xalqaro tashkilotlar va xorijiy davlatlar bilan samarali hamkorlikni tashkil etish hamda moliyaviy mablagʻlarni jalb etishga qaratilgan manzilli chora-tadbirlar dasturini ishlab chiqsin va uning amalga oshirilishini taʼminlasin.

6. Oʻzbekiston Respublikasi Prezidentining ayrim qarorlariga ilovaga muvofiq oʻzgartirish va qoʻshimchalar kiritilsin.

7. Oʻzbekiston Respublikasi Adliya vazirligi Qoraqalpogʻiston Respublikasi Vazirlar Kengashi, Oʻzbekiston Respublikasi Ekologiya va atrof-muhitni muhofaza qilish davlat qoʻmitasi hamda boshqa manfaatdor vazirliklar va idoralar bilan birgalikda bir oy muddatda qonun hujjatlariga ushbu qarordan kelib chiqadigan oʻzgartirish va qoʻshimchalar toʻgʻrisida Oʻzbekiston Respublikasi Vazirlar Mahkamasiga takliflar kiritsin.

8. Mazkur qarorning ijrosini nazorat qilish Oʻzbekiston Respublikasining Bosh vaziri A.N. Aripov va Oʻzbekiston Respublikasi Prezidenti Administratsiyasi rahbari Z.Sh. Nizomiddinov zimmasiga yuklansin.

1. Oʻzbekiston Respublikasi Prezidentining “Mahalliy ijroiya hokimiyati organlarining investitsiyalarni keng jalb qilish va innovatsiyalarni joriy etish borasidagi faoliyatini takomillashtirish toʻgʻrisida” 2017-yil 28-noyabrdagi PQ-3407-son qaroriga quyidagi qoʻshimcha va oʻzgartirishlar kiritilsin:

qaror ilovasining 1-bandi “k” kichik bandi “Qoraqalpogʻiston Respublikasi” boʻlimida:

“I toifa” kichik boʻlimining “Boshqaruv xodimlarining cheklangan soni” ustunida 1-pozitsiyadagi “25” raqami “28” raqami bilan;

“II toifa” kichik boʻlimining “Boshqaruv xodimlarining cheklangan soni” ustunida 3-pozitsiyadagi “22” raqami “25” raqami bilan, 4-pozitsiyadagi “22” raqami “25” raqami bilan, 5-pozitsiyadagi “21” raqami “24” raqami bilan, 6-pozitsiyadagi “22” raqami “25” raqami bilan almashtirilsin.

15-pozitsiya quyidagi tahrirda bayon etilsin:

2. Oʻzbekiston Respublikasi Prezidentining “Mahalliy ijroiya hokimiyati organlari faoliyatini yanada takomillashtirish toʻgʻrisida”gi 2016-yil 22-dekabrdagi PQ-2691-son qarorining 2b-ilovaning matni quyidagi tahrirda bayon etilsin:

3. Oʻzbekiston Respublikasi Prezidentining “Oʻzbekiston Respublikasi Prezidentining ayrim hujjatlariga oʻzgartirish va qoʻshimchalar kiritish, shuningdek, baʼzilarini oʻz kuchini yoʻqotgan deb hisoblash toʻgʻrisida”gi 2018-yil 1-avgustdagi PF-5497-son Farmonining 1-ilovasi 29-bandining “v” kichik bandi oʻz kuchini yoʻqotgan deb hisoblansin.