Keyingi oʻrinda Tomonlar deb ataluvchi ushbu Bitim ishtirokchi-davlatlar hukumatlari,

Mustaqil Davlatlar Hamdoʻstligi ishtirokchi-davlatlari iqtisodiyotlari global raqobatbardoshligini oshirishning muhimligini hisobga olib,

ushbu Bitim ishtirokchi-davlatlarida innovatsion faoliyat samaradorligini oshirish uchun qulay shart-sharoitlar yaratish maqsadida,

intellektual mulk obyektlaridan foydalanish samaradorligini oshirish boʻyicha masalalarni, shu jumladan ularni tijoratlashtirish yoʻli bilan, muvaffaqiyatli yechish uchun sharoitlarni taʼminlashni istab,

MDH ishtirokchi-davlatlar intellektual mulk bozori infratuzilmasini shakllantirish va rivojlantirish boʻyicha ushbu Bitim ishtirokchi-davlatlari harakatlarini muvofiqlashtirish zaruratini anglab,

ushbu Bitim ishtirokchi-davlatlarining xalqaro majburiyatlari va qonunchiligiga amal qilib,

intellektual mulkni huquqiy muhofazalash va himoya qilish sohasidagi hamkorlik toʻgʻrisidagi Bitim qoidalariga va 2010-yil 19-noyabrdagi intellektual mulkni huquqiy muhofazalash va himoya qilish masalalari boʻyicha Davlatlararo Kengash hamda 2016-yil 28-oktabrdagi MDH ishtirokchi-davlatlari intellektual mulk bozorini shakllantirish va rivojlantirish Konsepsiyasiga asoslanib,

quyidagilar toʻgʻrisida kelishib oldilar:

Ushbu Bitimning maqsadi MDH ishtirokchi-davlatlar intellektual mulk bozorini shakllantirish va rivojlantirishga qaratilgan shart-sharoitlarni yaratishdan iboratdir.

Ushbu Bitimni amalga oshirish maqsadida Tomonlar milliy qonunchilikni hisobga olib, hamkorlikni quyidagi yoʻnalishlarda rivojlantiradilar:

ushbu Bitim ishtirokchi-davlatlarining intellektual mulk sohasidagi qonunchiligini, xususan, uning intellektual mulk obyektlariga huquqlarni muhofazalash, himoya qilish, tijoratlashtirish, intellektual mulk obyektlaridan foydalanish darajasini oshirishga tegishli qismini takomillashtirish;

jahon tajribasidan foydalanib, zarurat boʻlganda, intellektual mulk obyektlariga huquqlar qiymatini baholash tizimini rivojlantirish;

intellektual mulk obyektlariga huquqlarni boshqarish tizimini takomillashtirish;

intellektual mulk obyektlariga huquqlarni tijoratlashtirish, intellektual mulk obyektlaridan foydalanishning huquqiy, moliyaviy, tashkiliy mexanizmlari davlatlararo tizimini qurish va bu sohadagi eng yaxshi amaliyotlarni tarqatish;

kadr taʼminoti tizimini, shu jumladan, intellektual mulk obyektlariga huquqlarni muhofazalash va himoya qilish, innovatsion menejment, texnologiyalarni tijoratlashtirish, intellektual mulkni baholash yoʻnalishlarida shakllantirish.

Ushbu bitimni amalga oshirish maqsadlarida intellektual mulk bozori rivojlanishining, shuningdek alohida tadbirlarning moliyaviy masalalari boʻyicha Tomonlar alohida bitimlar tuzishlari mumkin.

Tomonlar milliy ustivorliklarni hisobga olib, MDH ishtirokchi-davlatlar intellektual mulk bozorini shakllantirish boʻyicha choralarni ishlab chiqish va amalga oshirishni taʼminlaydilar, shu jumladan:

ushbu Bitim ishtirokchi-davlatlari iqtisodiyotlarining turli sektorlarida intellektual faoliyat natijalaridan foydalanish imkoniyatini taʼminlashni

intellektual mulk bozorini rivojlantirish boʻyicha faoliyatni kuchaytirishni;

intellektual mulk sohasida, shu jumladan, axborot kommunikatsiya texnologiyalaridan foydalanib, maxsus taʼlim dasturlarini tayyorlash va amalga oshirishni;

intellektual mulk sohasida xalqaro ilmiy-amaliy konferensiyalar, seminarlar, forumlar va boshqalarni, shu jumladan, intellektual mulk sohasida hamkorlikdagi tadbirlarni tashkil etish va oʻtkazishni.

Tomonlar ushbu Bitimni amalga oshirishda ushbu Bitim ishtirokchi-davlatlari qonunchiligiga muvofiq ilmiy, taʼlim, ilmiy-texnika va innovatsion faoliyat ishtirokchilarining oʻzaro teng huquqli aloqalarini taʼminlaydilar.

Tomonlar ushbu Bitim ishtirokchi-davlatlari qonunchiligiga muvofiq vakolatli organlar (vazirliklar, idoralar, tashkilotlar) vositasida ushbu bitim qoidalarini amalga oshirish boʻyicha hamkorlikni amalga oshiradilar.

Tomonlar ushbu Bitim ishtirokchi-davlatlari qonunchiligiga muvofiq intellektual mulk bozori ishtirokchilari oʻrtasida ochiq huquqiy, ilmiy-texnikaviy, patent va boshqa axborot bilan ayirboshlashni taʼminlaydilar.

Xalqaro intellektual mulkni huquqiy muhofazalash va himoya qilish boʻyicha kengash ushbu Bitim qoidalarini amalga oshirish boʻyicha Tomonlar oʻzaro faoliyatining koordinatori boʻlib hisoblanadi.

Ushbu Bitimni amalga oshirish boʻyicha Tomonlar oʻtkazadigan tadbirlarni moliyalashtirish ushbu Bitim ishtirokchi-davlatlari budjetlarida manfaatdor vazirliklar va idoralarga ular funksiyalarini bajarish uchun har yili koʻzda tutiladigan mablagʻlar doirasida, shuningdek, budjetdan tashqari, shu jumladan, xalqaro tashkilotlar mablagʻlari hisobiga ushbu Bitim ishtirokchi-davlatlari qonunchiligi bilan oʻrnatilgan tartibda amalga oshiriladi.

Ushbu Bitim har bir Tomonning uning davlati ishtirokchi boʻlgan boshqa xalqaro shartnomalardan uning uchun kelib chiqadigan huquqlar va majburiyatlarga daxl qilmaydi.

Tomonlar roziligi bilan ushbu Bitimga uning ajralmas qismi boʻlgan, tegishli bayonnoma bilan rasmiylashtiriladigan oʻzgartirishlar kiritilishi mumkin.

Ushbu Bitimni qoʻllashda yoki sharhlashda Tomonlar oʻrtasida vujudga keladigan bahsli masalalar manfaatdor Tomonlarning konsultatsiyalari va muzokaralari yoʻli bilan yoki Tomonlar bilan kelishilgan boshqa protsedura vositasida hal qilinadi.

Ushbu Bitim uni imzolagan Tomonlarning Bitim kuchga kirishi uchun zarur boʻlgan ichki davlat protseduralarini bajarganligi haqidagi uchinchi bildirishnomani depozitariy olgan sanadan 30 kundan keyin kuchga kiradi.

Ichki davlat protseduralarini kechroq bajargan Tomonlar uchun ushbu Bitim depozitariy tegishli hujjatlarni olgan sanadan 30 kundan keyin kuchga kiradi.

Ushbu Bitim har qanday MDH ishtirokchi-davlatining u kuchga kirgandan keyin qoʻshilish toʻgʻrisidagi hujjatni depozitariyga topshirish yoʻli bilan qoʻshilishi uchun ochiqdir.

Qoʻshilayotgan davlat uchun ushbu Bitim depozitariy qoʻshilish toʻgʻrisidagi hujjatni olish sanasidan 30 kun oʻtgandan keyin kuchga kiradi.

Ushbu Bitim nomuayyan muddatgacha tuziladi. Tomonlarning har biri depozitariyga chiqishdan 6 oy avval oʻzining bunday niyati toʻgʻrisidagi yozma bildirishnomani yuborib va ushbu Bitim amal qilish vaqtida vujudga kelgan holatlarni tartibga solib, ushbu Bitimdan chiqish huquqiga ega.

Dushanba shahrida 2018-yili 1-iyunda bir haqiqiy nusxada rus tilida tuzildi. Haqiqiy nusxa Mustaqil Davlatlar Hamdoʻstligi Ijroiya qoʻmitasida saqlanadi, u ushbu Bitimni imzolagan har bir davlatga uning tasdiqlangan nusxasini yuboradi.