Oʻzbekiston Respublikasi Prezidentining “Mehnat organlari tuzilmasini takomillashtirish va fuqarolarning mehnat huquqlarini himoya qilish hamda mehnatini muhofaza qilish tizimini mustahkamlash chora-tadbirlari toʻgʻrisida” 2018-yil 20-avgustdagi PQ-3913-son qarorini ijro etish, Oʻzbekiston Respublikasi Bandlik va mehnat munosabatlari vazirligiga yuklangan vazifalar ijrosi samaradorligini oshirish, vazirlik faoliyatini takomillashtirish, shuningdek, mehnat, aholi bandligi va mehnatni muhofaza qilish toʻgʻrisidagi qonun hujjatlariga rioya etilishi yuzasidan nazoratni samarali amalga oshirish uchun qoʻshimcha shart-sharoitlar yaratish maqsadida Vazirlar Mahkamasi qaror qiladi:

1. Quyidagilar:

Oʻzbekiston Respublikasi Bandlik va mehnat munosabatlari vazirligi toʻgʻrisidagi nizom 1-ilovaga muvofiq;

Oʻzbekiston Respublikasi Bandlikka koʻmaklashish davlat jamgʻarmasi mablagʻlarini shakllantirish va ulardan foydalanish tartibi toʻgʻrisidagi nizom 2-ilovaga muvofiq;

Oʻzbekiston Respublikasi Bandlik va mehnat munosabatlari vazirligining Davlat mehnat inspeksiyasi toʻgʻrisidagi nizom 3-ilovaga muvofiq;

Oʻzbekiston Respublikasi Bandlik va mehnat munosabatlari vazirligi, Qoraqalpogʻiston Respublikasi Bandlik va mehnat munosabatlari vazirligining, viloyatlar va Toshkent shahar bandlik bosh boshqarmalarining Davlat mehnat inspeksiyasining tuzilmalari 4, 4a va 4b-ilovalarga muvofiq tasdiqlansin.

2. Belgilab qoʻyilsinki:

Oʻzbekiston Respublikasi Bandlik va mehnat munosabatlari vazirligi Davlat mehnat inspeksiyasining (keyingi oʻrinlarda Inspeksiya deb ataladi) mehnat, aholi bandligi, mehnat muhofazasi, ish beruvchining fuqarolik javobgarligini majburiy sugʻurtalash toʻgʻrisidagi qonun hujjatlariga va nogironlarni ijtimoiy himoya qilish, jumladan ularga ijtimoiy infratuzilma obyektlaridan toʻsqinliksiz foydalanish, shuningdek, barcha turdagi transportlardan, transport kommunikatsiyalaridan, umumiy foydalanishdagi aloqa va axborot vositalaridan foydalanish uchun mehnat shart-sharoitlarini yaratish toʻgʻrisidagi qonun hujjatlariga rioya etish masalalari boʻyicha oʻz vakolatlari doirasida qabul qilingan qarorlari davlat va xoʻjalik boshqaruvi organlari, mahalliy davlat hokimiyati organlari va boshqa tashkilotlar, shuningdek, ish beruvchilar boʻlgan jismoniy shaxslar tomonidan ijro etilishi shart;

Inspeksiya xodimlari tomonidan qisqa muddatli tekshiruvlar, shu jumladan Inspeksiya xodimlarini davlat organlari tomonidan oʻtkaziladigan tekshiruvlarga jalb qilish “Mehnat toʻgʻrisidagi qonun hujjatlarini tekshirishlar monitoringi” idoraviy elektron axborot tizimida roʻyxatga olinadigan tegishli mehnat organi rahbarining buyrugʻi asosida amalga oshiriladi;

davlat organlariga Inspeksiya xodimlari zimmasiga ular vakolatiga kirmaydigan ishlarni bajarishni yuklash taqiqlanadi.

3. Oʻzbekiston Respublikasi Bandlik va mehnat munosabatlari vazirligi:

ikki oy muddatda — “Mehnat toʻgʻrisidagi qonun hujjatlarini tekshirishlar monitoringi” idoraviy elektron axborot tizimini ishlab chiqsin va joriy etsin, uni ishlab chiqishni, joriy etishni va texnik qoʻllab-quvvatlashni moliyalashtirish manbai sifatida Oʻzbekiston Respublikasi Bandlikka koʻmaklashish davlat jamgʻarmasining mablagʻlarini jalb qilishni nazarda tutsin;

2019-yil 1-aprelgacha boʻlgan muddatda — Oʻzbekiston Respublikasi Bandlik va mehnat munosabatlari vazirligi tizimiga kiradigan mehnat organlari va tashkilotlar, tugatilayotgan Davlat mehnat huquq inspeksiyasi hamda Mehnatni muhofaza qilish va mehnat sharoitlari ekspertizasi boʻyicha davlat inspeksiyasi rahbarlari va xodimlarini egallab turgan lavozimga mosligini attestatsiyadan oʻtkazsin hamda Inspeksiya va uning hududiy boʻlinmalarini yuklangan vazifalarni yuksak va professional darajada bajara oladigan yuqori malakali kadrlar bilan toʻldirish choralarini koʻrsin;

4. Oʻzbekiston Respublikasi Bandlik va mehnat munosabatlari vaziriga mehnat bozoridagi real vaziyatdan va ehtiyojdan kelib chiqib, tuman (shahar) aholi bandligiga koʻmaklashish markazlarining ishga joylashtirish boʻyicha inspektorlarining shtatdagi soniga (ishlab chiqarish xodimlari), shuningdek, Inspeksiya tuzilmasiga xodimlarning tasdiqlangan cheklangan umumiy soni va mehnatga haq toʻlash fondi doirasida oʻzgartirishlar kiritish huquqi berilsin.

5. Oʻzbekiston Respublikasi Bandlik va mehnat munosabatlari vazirligiga Inspeksiyaning markaziy apparati va uning hududiy boʻlinmalariga 15 ta avtotransport vositasini xarid qilish va ularni saqlab turush uchun Oʻzbekiston Respublikasi Bandlikka koʻmaklashish davlat jamgʻarmasining tejalgan mablagʻlari hisobidan limit ajratilsin.

6. Toshkent shahrining Sergeli tumani, Lutfikor koʻchasi, 33-uyda joylashgan Sergeli yengil sanoat va servis kasb-hunar kollejining bino va inshootlari tutash hududlari bilan birga Oʻzbekiston Respublikasi Bandlik va mehnat munosabatlari vazirligiga Respublika mehnat organlari xodimlari malakasini oshirish kurslarini joylashtirish uchun operativ boshqarish huquqi asosida oʻtkazilsin.

7. Oʻzbekiston Respublikasi Oliy va oʻrta maxsus taʼlim vazirligi:

Oʻzbekiston Respublikasi Bandlik va mehnat munosabatlari vazirligiga berilayotgan Sergeli yengil sanoat va servis kasb-hunar kolleji 3-kurs talabalari 2019-yil 1-sentabrgacha oʻqishni tugatishini hamda yaqin atrofda joylashgan va bir xil taʼlim yoʻnalishlariga ega kasb-hunar kollejlari talabalari kontingentiga kiritilishini taʼminlasin;

Oʻzbekiston Respublikasi Oliy va oʻrta maxsus taʼlim vazirligining Kasb-hunar taʼlimi markazi bilan birgalikda bir oy muddatda yuqorida koʻrsatilgan bino va inshootlarning tutash hududlar bilan birga oʻtkazilishini, Bandlik va mehnat munosabatlari vazirligi esa ulardan maqsadli foydalanish asosida qabul qilib olinishini taʼminlasin.

8. Oʻzbekiston Respublikasi Bandlik va mehnat munosabatlari vazirligining vazirlik ixtiyorida boʻlgan 2-Toshkent yuridik kollejini Toshkent xodimlarni boshqarish va mehnatni muhofaza qilish kolleji etib qayta ixtisoslashtirish, 2020-yil 1-sentabrgacha tahsil oluvchilar kontingentini saqlash va ularga oʻqishni tugatgach, Toshkent xodimlarni boshqarish va mehnatni muhofaza qilish kolleji diplomlarini berish toʻgʻrisidagi taklifi qabul qilinsin.

Oʻzbekiston Respublikasi Bandlikka koʻmaklashish davlat jamgʻarmasining mablagʻlari Toshkent xodimlarni boshqarish va mehnatni muhofaza qilish kolleji faoliyatini moliyalashtirish manbai etib belgilansin.

9. Oʻzbekiston Respublikasi Bandlik va mehnat munosabatlari vazirligiga:

ikki oy muddatda — Oʻzbekiston Respublikasi Oliy va oʻrta maxsus taʼlim vazirligi bilan birgalikda Toshkent xodimlarni boshqarish va mehnatni muhofaza qilish kollejida yangi yoʻnalishlar va mutaxassisliklar boʻyicha yangi oʻquv dasturlari, shuningdek, kollej talabalari bilimini baholash, ularning yakuniy davlat attestatsiyasini va amaliyotini oʻtkazish toʻgʻrisidagi nizom ishlab chiqilishini taʼminlasin;

mehnat organlari xodimlari mehnatini ragʻbatlantirish va moddiy-texnik bazasini mustahkamlash jamgʻarmasi mablagʻlari hisobidan idoraviy tashkilotlar, shu jumladan budjetdan tashqari jamgʻarmalar xodimlariga mehnat organlari xodimlari uchun nazarda tutilgan tartibda har oylik ustamalar belgilash uchun ularni moliyaviy qoʻllab-quvvatlash huquqi berilsin.

10. Oʻzbekiston Respublikasi Bandlik va mehnat munosabatlari vazirligi tashkiliy-huquqiy shakllaridan qatʼi nazar tashkilotlarda mehnatni muhofaza qilish xizmatlarini muvofiqlashtirish va uslubiy taʼminlash boʻyicha vakolatli organ etib belgilansin.

11. Belgilab qoʻyilsinki:

hududiy bandlik boshqarmalari va tuman (shahar) aholi bandligiga koʻmaklashish markazlariga ishga qabul qilishga koʻrsatilgan nomzodlar majburiy tartibda bir haftalik kurslardan, mehnat organlari xodimlari esa muntazam ravishda Respublika mehnat organlari xodimlari malakasini oshirish kurslarida har uch yilda kamida bir marta malaka oshirish kurslaridan oʻtadilar;

Respublika mehnat organlari xodimlari malakasini oshirish kurslarining hamda Toshkent xodimlarni boshqarish va mehnatni muhofaza qilish kollejining xodimlari va oʻqituvchilari mehnatga haq toʻlash shartlari boʻyicha respublika oliy taʼlim muassasalarining xodimlariga va oʻqituvchilariga tenglashtiriladi;

Respublika bandlikka koʻmaklashish va mehnatni muhofaza qilish ilmiy markazining xodimlari mehnatga haq toʻlash shartlari boʻyicha fundamental, amaliy tadqiqotlar va innovatsiya ishlarining ilmiy-texnik dasturlarini amalga oshirishda ishtirok etuvchi ilmiy-tadqiqot muassasalarining ilmiy va rahbar xodimlariga tenglashtiriladi.

12. Tashkilotlarda mehnatni muhofaza qilish xizmatini yaratish va faoliyatini tashkil etish tartibi toʻgʻrisidagi nizom 5-ilovaga muvofiq tasdiqlansin.

13. Oʻzbekiston Respublikasi Bandlik va mehnat munosabatlari vazirligi ikki oy muddatda:

a) Respublika mehnat organlari xodimlari malakasini oshirish kurslarining faoliyatini tanqidiy qayta koʻrib chiqsin, shu jumladan:

mehnat organlari oʻz faoliyatida duch keladigan aniq muammolar yechimini izlashni muhokama qilishga qaratilgan “case-study”, “team-work presentation”, ishbilarmonlar oʻyinlari usullaridan foydalangan holda progressiv interaktiv oʻqitish usullarini keng joriy etishni nazarda tutuvchi yangilangan oʻquv rejalari va dasturlar ishlab chiqish;

Respublika mehnat organlari xodimlari malakasini oshirish kurslarini malakali xodimlar va oʻqituvchilar bilan toʻldirish;

Respublika mehnat organlari xodimlari malakasini oshirish kurslari tuzilmasini va uning toʻgʻrisidagi nizomni ishlab chiqish hamda tasdiqlash masalalarini tanqidiy qayta koʻrib chiqsin;

b) “Mehnat toʻgʻrisidagi qonun hujjatlarini tekshirishlar monitoringi” elektron axborot tizimi faoliyati tartibini ishlab chiqsin, tasdiqlasin va amaliyotga joriy etsin.

v) mehnat bozori tadqiqotlari, mehnatni muhofaza qilish va mehnat huquqlarini himoya qilish, ish bilan taʼminlash, kadrlar tayyorlash va kasbiy malakani baholash, mehnat standartlari va mehnatga haq toʻlash masalalari toʻgʻrisidagi kontentni oʻz ichiga olgan “Mehnat iqtisodiyoti” yangi ilmiy-ommabop jurnalini davlat-xususiy sheriklik asosida tashkil etish toʻgʻrisida Oʻzbekiston Respublikasi Vazirlar Mahkamasiga takliflar kiritsin.

14. Oʻzbekiston Respublikasi Xalq taʼlimi vazirligi Bandlik va mehnat munosabatlari vazirligi bilan birgalikda umumtaʼlim maktablarining 11-sinfiga oʻqitiladigan “Kasbga oʻqitish” fanining oʻquv dasturiga “Mehnat bozorida raqobatbardoshlikning shaxsiy koʻnikmalarini rivojlantirish” mavzusini kiritsin, unda umumiy oʻrta taʼlim bazaviy oʻquv rejasi doirasida kasbga yoʻnaltirish, mehnat toʻgʻrisidagi qonun hujjatlari asoslarini, mehnat bozorida mos vakansiyalar izlash koʻnikmalari, ishga kirish uchun rezyumeni tayyorlash va ish beruvchi bilan suhbatdan oʻtish, ishga kirish uchun hujjatlarni rasmiylashtirish oʻrgatilsin.

15. Oʻzbekiston Respublikasi Hukumatining 6-ilovaga muvofiq ayrim qarorlariga oʻzgartirish va qoʻshimchalar kiritilsin.

16. Oʻzbekiston Respublikasi Hukumatining 7-ilovaga muvofiq ayrim qarorlari oʻz kuchini yoʻqotgan deb hisoblansin.

17. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari — Moliya vaziri J.A. Qoʻchqorov hamda Oʻzbekiston Respublikasi Bandlik va mehnat munosabatlari vaziri Sh.D. Kudbiyev zimmasiga yuklansin.

1. Oʻzbekiston Respublikasi Bandlik va mehnat munosabatlari vazirligi (keyingi oʻrinlarda Vazirlik deb ataladi) aholi bandligi, mehnat migratsiyasi va mehnat munosabatlari sohasida yagona siyosat olib boruvchi davlat boshqaruvi organi hisoblanadi hamda oʻz faoliyatida Oʻzbekiston Respublikasi Vazirlar Mahkamasiga hisob beradi.

2. Vazirlik oʻz faoliyatida Oʻzbekiston Respublikasi Konstitutsiyasiga va qonunlariga, Oʻzbekiston Respublikasi Oliy Majlisi palatalari qarorlariga, Oʻzbekiston Respublikasi Prezidenti farmonlari, qarorlari va farmoyishlariga, Oʻzbekiston Respublikasi Vazirlar Mahkamasi qarorlari va farmoyishlariga, shuningdek, ushbu Nizomga va boshqa qonun hujjatlariga amal qiladi.

3. Vazirlikning oʻz vakolatlari doirasida qabul qilingan qarorlari davlat va xoʻjalik boshqaruvi organlari, mahalliy ijro etuvchi hokimiyat organlari, boshqa tashkilotlar va ularning mansabdor shaxslari, shuningdek, fuqarolar tomonidan ijro etilishi majburiydir.

4. Vazirlik, uning tashkiliy tuzilmasiga kiradigan hududiy va idora boʻysunuvidagi boʻlinmalar yuridik shaxslar hisoblanadi, Oʻzbekiston Respublikasi Davlat gerbi tasviri tushirilgan muhrga va blankalarga, oʻzining mustaqil balansiga, shaxsiy gʻazna hisobvaraqlariga, bank hisobvaraqlariga, shu jumladan xorijiy hisobvaraqlariga ega.

5. Vazirlikning rasmiy nomi:

a) davlat tilida:

toʻliq nomi — Oʻzbekiston Respublikasi Bandlik va mehnat munosabatlari vazirligi, qisqartirilgani — Mehnat vazirligi;

b) ingliz tilida:

toʻliq nomi — Ministry of Employment and Labour Relations of the Republic of Uzbekistan, qisqartirilgani — Ministry of Labour;

v) rus tilida:

toʻliq nomi — Ministerstvo zanyatosti i trudovix otnosheniy Respubliki Uzbekistan, qisqartirilgani — Ministerstvo truda ili Mintruda.

6. Vazirlikning joylashgan joyi (pochta manzili): 100031, Toshkent shahri, Mirobod koʻchasi, 15.

7. Quyidagilar Vazirlik tizimiga kiradi:

Vazirlikning markaziy apparati;

Qoraqalpogʻiston Respublikasi Bandlik va mehnat munosabatlari vazirligi, viloyatlar va Toshkent shahar, tuman (shahar) aholi bandligiga koʻmaklashish markazlari;

Tashqi mehnat migratsiyasi agentligi, unga boʻysunadigan fuqarolarni xorijda ishga joylashtirish boʻyicha hududiy filiallar, xorijga ketayotgan fuqarolarni joʻnab ketishdan oldin moslashtirish markazlari va Agentlikning xorijdagi vakolatxonalari;

Respublika bandlik va mehnatni muhofaza qilish ilmiy markazi;

Respublika mehnat organlari xodimlari malakasini oshirish kurslari;

Toshkent shahrida ishsiz fuqarolarni kasb-hunarga oʻqitish markazi;

ishsiz va band boʻlmagan aholini kasb-hunarga oʻqitish hududiy markazlari;

malakani baholash markazlari;

“Mehnat.uz” axborot-kompyuter markazi” MCHJ;

Toshkent va Fargʻona shaharlarida nogironligi boʻlgan shaxslar uchun respublika ixtisoslashtirilgan kasb-hunar kollejlari;

kasb-hunar kollejlari;

Oʻzbekiston Respublikasi Bandlik va mehnat munosabatlari vazirligi huzuridagi Jamoat ishlari jamgʻarmasi;

Xorijda mehnat faoliyatini amalga oshiruvchi shaxslarni qoʻllab-quvvatlash hamda ularning huquq va manfaatlarini himoya qilish jamgʻarmasi;

“Ishga marhamat” band boʻlmagan aholiga xizmat koʻrsatuvchi “Monomarkaz” MCHJ;

Oʻzbekiston-Malayziya kasb-hunar taʼlimi markazi;

chet ellarga ketayotgan fuqarolarni oldindan koʻniktirish markazlari;

oldindan koʻniktirish va kasbga tayyorlash markazlari.

Qoraqalpogʻiston Respublikasi Bandlik va mehnat munosabatlari vazirligi, viloyatlar va Toshkent shahar bandlik bosh boshqarmalari, tuman (shahar) aholi bandligiga koʻmaklashish markazlari Vazirlikka va tegishli ravishda Qoraqalpogʻiston Respublikasi Vazirlar Kengashiga, viloyatlar va Toshkent shahar, shuningdek, tumanlar (shaharlar) hokimliklariga boʻysunadi va hisob beradi.

8. Vazirlik oʻz vazifalari va funksiyalarini bajarishda boshqa davlat va xoʻjalik boshqaruvi organlari, mahalliy davlat hokimiyati organlari va boshqa tashkilotlar bilan hamkorlik qiladi.

9. Quyidagilar Vazirlik va uning hududiy boʻlinmalari faoliyatining asosiy vazifalari hisoblanadi:

mamlakat mehnat bozorining amaldagi holatini puxta tahlil qilish asosida hududlar boʻyicha aholi bandligini taʼminlashga doir hududiy va tarmoq dasturlarini ishlab chiqish hamda samarali muvofiqlashtirish, yangi ish oʻrinlari tashkil etish uchun davlat buyurtmasini va aholining ijtimoiy zaif qatlamlarini ishga joylashtirish uchun kvotalar belgilash orqali aholi bandligini taʼminlashga qaratilgan maqsadli kompleks chora-tadbirlarni amalga oshirish;

mehnat organlariga murojaat qilgan ishsizlarning ishga joylashtirilishini taʼminlash, aholini jamoat ishlarida ishtirok etishga jalb qilish, birinchi navbatda, yirik investitsiya loyihalarini amalga oshirish, yoʻl va uy-joy-kommunal infratuzilma obyektlarini qurish, taʼmirlash va rekonstruksiya qilish, shahar va tumanlarni obod qilish, mavsumiy qishloq xoʻjaligi ishlarini tashkil etish orqali jalb qilish;

ishga muhtoj shaxslarni, ayniqsa band boʻlmagan yoshlarni iqtisodiyot tarmoqlari va mehnat bozorining real ehtiyojlaridan kelib chiqib, kasbga tayyorlash, qayta tayyorlash va ularning malakasini oshirish tizimini tubdan takomillashtirish;

boshqa vazirliklar, idoralar va xoʻjalik boshqaruvi organlari bilan birgalikda umumtaʼlim maktablari, oliy va oʻrta maxsus taʼlim muassasalari bitiruvchilarini egallagan mutaxassisliklariga muvofiq ishga joylashtirish choralarini koʻrish;

mehnat bozorini tartibga solish, bandlik, mehnat munosabatlari, mehnatni muhofaza qilish, kasb va mehnat standartlari, gender boʻyicha tenglikka rioya etishni taʼminlash, band boʻlmagan aholini kasbga tayyorlash va qayta tayyorlash, ishsizlarni ijtimoiy himoya qilish sohasida bozor shart-sharoitlariga mos keladigan normativ-huquqiy hujjatlarni ishlab chiqish va amalga oshirish, shuningdek ular yuzasidan nazoratni amalga oshirish;

ishga joylashtirish jarayoniga ilgʻor axborot texnologiyalarini faol jalb qilish, shu jumladan “Yagona mehnat milliy tizimi” dasturiy kompleksini va vakansiyalar Milliy bazasini yaratish hamda muntazam rivojlantirish;

bandlikka koʻmaklashish boʻyicha xizmatlar bozorida zamonaviy infratuzilma va raqobat muhitini yaratish, davlat va xoʻjalik boshqaruvi organlari, mahalliy davlat hokimiyati organlari, taʼlim muassasalari, nodavlat notijorat tashkilotlari, tadbirkorlik subyektlari, fuqarolarning oʻzini oʻzi boshqarish organlari va jamoatchilikning aholi bandligini taʼminlash masalalari boʻyicha hamkorligining samarali mexanizmlarini shakllantirish;

mehnat va bandlik sohasidagi qonun hujjatlari talablariga rioya etishning nazorat qilinishini taʼminlash, mehnat sharoitlari ekspertizasini amalga oshirish, mehnat munosabatlarini, mehnatni moddiy ragʻbatlantirish mexanizmlarini yanada takomillashtirishga doir aniq chora-tadbirlar koʻrish;

mehnatni normalashtirish va unga haq toʻlash, mehnat standartlarini joriy etish va mehnat munosabatlarini takomillashtirish;

mehnat, bandlik, mehnatni muhofaza qilish va mehnat migratsiyasi sohasida xalqaro hamkorlikni yoʻlga qoʻyish va mustahkamlash;

mehnat huquqlari va mehnatni muhofaza qilish masalalari yuzasidan aholi va ish beruvchilar oʻrtasida keng axborot-tushuntirish ishlarini oʻtkazish;

kam taʼminlangan oilalarga oʻz vaqtida nafaqa toʻlash va moddiy yordam berish yuzasidan monitoring olib borish, ularni ish bilan taʼminlashda koʻmaklashish va mehnatga yaroqli oila aʼzolarining xususiy tadbirkorlik faoliyatini kuchaytirish orqali oilalarni kam taʼminlanganlikdan chiqarish boʻyicha yakka tartibdagi dasturlar ishlab chiqish;

tashkilotlarda mehnatni muhofaza qilish xizmatlari faoliyatini muvofiqlashtirish hamda uslubiy taʼminlash;

Oʻzbekiston Respublikasi fuqarolarini xorijda ishga joylashtirishda, ularni vataniga qaytarishda, xorijda mehnat faoliyatini amalga oshirish vaqtida huquqiy va ijtimoiy himoya qilish, shuningdek xorijiy ish kuchini jalb qilishga ruxsatnomalar va Oʻzbekiston Respublikasi hududida mehnat faoliyatini amalga oshirish huquqi uchun xorijiy fuqarolarga tasdiqnomalar berish.

10. Vazirlik oʻziga yuklangan vazifalarga muvofiq quyidagi funksiyalarni bajaradi:

Oʻzbekiston Respublikasi Iqtisodiyot vazirligi bilan birgalikda jamiyatda amalga oshiriladigan islohotlarning maqsadlari va ustuvorliklaridan kelib chiqib, zamonaviy bozor mexanizmlari va vositalari asosida aholi bandligini va mehnat bozori barqaror rivojlanishini taʼminlashga doir strategiyani ishlab chiqishda davlat va xoʻjalik boshqaruvi organlari, mahalliy davlat hokimiyati organlari, ilmiy-tadqiqot institutlari ishlarini tashkil etadi va muvofiqlashtiradi;

Oʻzbekiston Respublikasi Iqtisodiyot vazirligi va Davlat statistika qoʻmitasi bilan birgalikda respublika va hududlarni demografik va iqtisodiy rivojlantirish prognozlaridan kelib chiqib, mehnat resurslari balanslarining asoslantirilgan prognoz parametrlarini, shuningdek, aholi bandligini taʼminlashga doir samarali kompleks chora-tadbirlarni ishlab chiqadi;

ishsizlar va ishga joylashishga muhtoj aholi hisobga olinishini tashkil etadi;

manfaatdor davlat organlari va boshqa tashkilotlar bilan birgalikda oilaviy tadbirkorlik va hunarmandchilik faoliyati bilan shugʻullanayotgan, shaxsiy tomorqa va dehqon xoʻjaliklarida mehnat yoki fuqarolik-huquqiy shartnoma rasmiylashtirmay chorvachilik, oʻsimlikshunoslik, parrandachilik, baliqchilik hamda shaxsiy tomorqa va dehqon xoʻjaliklarida boshqa turdagi qishloq xoʻjaligi faoliyati bilan shugʻullanuvchi fuqarolarni hisobga olish va tartibga solish choralarini koʻradi fuqarolar hisobga olinishini tashkil etadi;

respublika va maʼmuriy-hududiy tuzilmalar mehnat resurslari soni va tarkibini tahlil qiladi, uni takomillashtirish yuzasidan takliflar ishlab chiqadi;

ilmiy-tadqiqot tashkilotlari bilan birgalikda yoshlar va band boʻlmagan aholi qaysi kasbni maʼqul koʻrishini va mehnat yoʻnalishini aniqlash uchun sotsiologik tadqiqotlar oʻtkazadi;

mehnat bozorida teng shartlar asosida raqobatlasha olmaydigan shaxslarni ishga joylashtirish uchun kvotalar (ish oʻrinlarining eng kam sonini) belgilash boʻyicha mahalliy davlat hokimiyati organlari faoliyatini muvofiqlashtiradi hamda ularni ishga joylashtirish uchun ish beruvchilar tomonidan belgilangan miqdorda ish oʻrinlari ajratilishini nazorat qiladi;

aholining ijtimoiy ehtiyojmand qatlamlariga mansub shaxslarni, shu jumladan, nogironligi boʻlgan shaxslarni zaxiralangan (kvotalangan) eng kam sondan ortiq miqdorda ishga qabul qilgan tashkilotlarga bir martalik subsidiyalar taqdim etadi. Bunda ishga qabul qilingan mazkur toifadagi shaxslarning bandligini eng kam son (kvota) oshgan sanadan boshlab kamida 12 oy davomida saqlash sharti nazarda tutiladi;

tashkilotlarda eng kam ish oʻrinlarini ajratish va ularga ish izlashda muayyan qiyinchiliklarga duch kelayotgan va teng shartlar asosida mehnat bozorida raqobatlasha olmaydigan ayrim toifadagi shaxslarni qabul qilish masalalarini oʻrganadi va tahlil qiladi, bunday shaxslarni ishga joylashtirish yuzasidan tashkilotlar uchun kvotalar belgilashga doir takliflar ishlab chiqadi;

aholi bandligi darajasini va tarkibini eng toʻliq va xolis baholash, mehnat bozoridagi tarkibiy mavjud nomutanosibliklarni va ular kelib chiqqan sabablarni aniqlash, ishga joylashtirilishi zarur shaxslarni aniqlash maqsadida mehnat bozori rivojini tahlil qiladi va shu asosda tarmoqlar va hududlar boʻyicha yangi ish oʻrinlari tashkil etish uchun yillik buyurtmalarni shakllantiradi;

ish kuchi va mehnat migratsiya jarayonlarini tahlil qiladi, tashqi mehnat migratsiyasi sabablari va omillarini aniqlaydi;

boʻsh ish oʻrinlari toʻgʻrisidagi maʼlumotlar toʻplanishini va tahlil qilinishini tashkil etadi, belgilangan tartibda taqdim etilayotgan vakansiyalar hisobini yuritadi va axborot-kommunikatsiya texnologiyalaridan foydalangan holda boʻsh ish oʻrinlari haqidagi axborotni yetkazadi;

ish oʻrinlari tashkil etish, aholini ishga joylashtirish jarayonlari va mehnat bozori holati ustidan muntazam monitoring oʻtkazadi hamda ularni tahlil qiladi va shu asosda aholi bandligini oshirish boʻyicha samara chora-tadbirlar ishlab chiqadi;

ishsizlik va norasmiy bandlik darajasini va tarkibini tahlil qiladi, shu jumladan aholi bandligini tekshirish va aholi oʻrtasida soʻrovlar oʻtkazish orqali tahlil qiladi;

aholi, shu jumladan yoshlar, xotin-qizlar, nogironligi boʻlgan shaxslar, ishdan boʻshatilgan shaxslar va boshqa toifadagi shaxslar bandligi va ularni ishga joylashtirish boʻyicha axborotni shakllantirishni va kompleks tahlil qilishni tashkil etadi;

manfaatdor vazirliklar va idoralar, shuningdek mahalliy ijro etuvchi hokimiyat organlari bilan birgalikda aholini ish bilan taʼminlash, bandlikning samarali shakllarini rivojlantirish hududiy va tarmoq dasturlarini ishlab chiqish va amalga oshirishning tizimli muvofiqlashtirib borilishini taʼminlaydi;

Oʻzbekiston Respublikasi Iqtisodiyot vazirligi bilan birgalikda ish oʻrinlari tashkil etish boʻyicha, davlat buyurtmalarini, iqtisodiyotni tuzilmaviy isloh va diversifikatsiya qilish boʻyicha dasturlar, hududlarni ijtimoiy-iqtisodiy rivojlantirish boʻyicha kompleks dasturlari bilan uzviy bogʻlagan holda, qisqa muddatli (bir yil), oʻrta muddatli (ikki, uch yil) va uzoq muddatli (uch yildan ortiq) davrlar uchun shakllantiradi;

mahalliy davlat hokimiyati organlari bilan birgalikda ixtisoslashtirilgan boʻsh ish oʻrinlari yarmarkalarini tashkil etish va oʻtkazish, mehnat organlari tomonidan aholiga va ish beruvchilarga koʻrsatilayotgan xizmatlar sifatini oshirish va ulardan qulay foydalanishni taʼminlash orqali ishsizlarni, yoshlarni, birinchi navbatda, kasb-hunar kollejlari va oliy taʼlim muassasalarining bitiruvchilarini hamda aholining boshqa ijtimoiy zaif toifalarini ishga joylashtirish boʻyicha dasturlar ishlab chiqadi va tasdiqlaydi;

Oʻzbekiston Respublikasi Iqtisodiyot vazirligi hamda Oliy va oʻrta maxsus taʼlimi vazirligi bilan birgalikda, mehnat resurslari balansining prognoz parametrlari asosida, hududlar va iqtisodiyot tarmoqlari boʻyicha oliy va kasb-hunar taʼlimi yoʻnalishlari uchun mutaxassislar tayyorlash yuzasidan davlat buyurtmalarini shakllantiradi;

mehnat bozorida vaziyat tang boʻlgan mintaqalarda ish oʻrinlari tashkil etish boʻyicha maqsadli dasturlar ishlab chiqishni muvofiqlashtiradi hamda manfaatdor vazirliklar, davlat qoʻmitalari, idoralar va mahalliy ijro etuvchi hokimiyat organlari bilan birgalikda ularni ishlab chiqishda ishtirok etadi;

iqtisodiyotni isloh qilish va tarkibiy qayta oʻzgartirish davomida, shuningdek tashkilotlar qayta tashkil etilganda, bankrot boʻlishi va tugatilishi natijasida ishdan boʻshatiladigan xodimlarni ish bilan taʼminlash va ijtimoiy muhofaza qilishga doir maqsadli mintaqaviy dasturlar ishlab chiqilishini muvofiqlashtiradi;

bandlik va ish oʻrinlarini tashkil etish hududiy dasturlarini ishlab chiqishda mahalliy ijro etuvchi hokimiyat organlariga metodik va amaliy yordam koʻrsatadi;

manfaatdor vazirlik va idoralar, mahalliy ijro etuvchi hokimiyat organlari, tijorat banklari bilan birgalikda oʻz biznesini boshlamoqchi boʻlgan fuqarolarni, shu jumladan oʻrta maxsus, kasb-hunar taʼlimi muassasalarining bitiruvchilarini iqtisodiy jihatdan qoʻllab-quvvatlash va ragʻbatlantirish boʻyicha maqsadli dasturlarni ishlab chiqadi va amalga oshiradi;

tuman (shahar) aholi bandligiga koʻmaklashish markazlariga ish izlab murojaat qilgan fuqarolarning ishga joylashtirilishini taʼminlaydi;

tuman (shahar) aholi bandligiga koʻmaklashish markazlarida roʻyxatga olingan va tadbirkorlik faoliyatini boshlamoqchi boʻlgan ishsiz shaxslarga yakka tartibdagi tadbirkor sifatida roʻyxatdan oʻtkazishga, kichik korxonalar va mikrofirmalarni davlat roʻyxatidan oʻtkazishga sarflanadigan xizmatlarni toʻlash uchun bir martalik subsidiyalar taqdim etadi;

keyinchalik banklar tomonidan respublika tumanlari va shaharlarida yangi ish oʻrinlari tashkil etishni nazarda tutuvchi kichik va mini-loyihalarni amalga oshirish uchun mikrokreditlar ajratish maqsadida tijorat banklarida kredit liniyalari ochish uchun Oʻzbekiston Respublikasi Bandlikka koʻmaklashish davlat jamgʻarmasi mablagʻlarini taqdim etadi;

Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari huzurida yangi ish oʻrinlari tashkil etishni ragʻbatlantiruvchi hududiy jamgʻarmalar, tadbirkorlik subyektlari bilan birgalikda, shu jumladan davlat-xususiy sheriklik shartlari asosida faoliyatni yangi ish oʻrinlarini tashkil etishga va aholini ish bilan taʼminlashga qaratilgan ijtimoiy yoʻnaltirilgan korxonalar tashkil etadi;

vaqtinchalik bir martalik ish bilan taʼminlash markazlari faoliyatini tashkil etadi;

Oʻzbekiston Respublikasi Bandlikka koʻmaklashish davlat jamgʻarmasi mablagʻlari hisobidan ishsizlarni va ularning oila aʼzolarini moddiy qoʻllab-quvvatlashni taʼminlashni belgilangan tartibda tashkil etadi;

mahalliy ijro etuvchi hokimiyat organlari bilan birgalikda jamoat ishlarining hajmlari va turlarini aniqlaydi hamda yirik investitsiya loyihalarini amalga oshirishdagi jamoat ishlarida, yoʻl va uy-joy-kommunal infratuzilma obyektlarini qurish, taʼmirlash va rekonstruksiya qilishda, shaharlar va tumanlarni obod qilishda, mavsumiy qishloq xoʻjaligi ishlarida vaqtincha band boʻlmagan fuqarolarning ishtirokini tashkillashtiradi;

ishlamaydigan fuqarolarning jamoat ishlarida ishtirok etishini moliyalashtirishni belgilangan tartibda taʼminlaydi;

kasanachilikni, oilaviy tadbirkorlikni, hunarmandchilik faoliyatini va aholining oʻzini oʻzi ish bilan taʼminlashining boshqa shakllarini ragʻbatlantirish va rivojlanishini qoʻllab-quvvatlash boʻyicha takliflar tayyorlaydi;

kasanachilikdan foydalanishni kengaytirish, shu jumladan yirik korxonalar va fuqarolar oʻrtasidagi hamkorlikni rivojlantirish, shuningdek oilaviy tadbirkorlik va hunarmandchilikni rivojlantirish asosida kengaytirish masalalarida davlat va xoʻjalik boshqaruvi organlariga, mahalliy davlat hokimiyati organlariga va boshqa tashkilotlarga koʻmaklashadi;

nogironligi boʻlgan shaxslar uchun ish oʻrinlari yaratishda va ularni ishga joylashtirishda nodavlat notijorat tashkilotlariga va boshqa tashkilotlarga koʻmaklashadi;

nogironligi boʻlgan shaxslar mehnatidan foydalanish, kasanachilik turlarini va nogironligi boʻlgan shaxslarni ish bilan taʼminlashning boshqa shakllarini rivojlantirish boʻyicha ixtisoslashtirilgan korxonalar tashkil etish va rivojlantirishga koʻmaklashadi;

Vazirlik huzuridagi Jamoat ishlari jamgʻarmasining, Oʻzbekiston Respublikasi Moliya vazirligining Gʻaznachiligida, Gʻaznachilikning Qoraqalpogʻiston Respublikasi, viloyatlar va Toshkent shahri boʻyicha boshqarmalarida ochiladigan gʻaznachilik shaxsiy hisob raqamlaridagi, jamoat ishlari moliyalashtiriladigan mablagʻlar jamlanishini taʼminlaydi;

Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari huzuridagi yangi ish oʻrinlari yaratilishini ragʻbatlantirish hududiy jamgʻarmalari, tadbirkorlik subyektlari bilan birgalikda, shu jumladan davlat-xususiy sheriklik shartlari asosida band boʻlmagan shaxslarni jamoat ishlariga jalb qiluvchi korxonalar tashkil etadi, ularni keyinchalik doimiy ish oʻrinlariga ishga joylashishga ragʻbatlantiradi;

oʻzini oʻzi band qilish tartibida mehnat faoliyatini amalga oshirishda fuqarolarga koʻmaklashadi, ularning roʻyxatga olinishini va ularga vaqtinchalik mehnat guvohnomalari berilishini belgilangan tartibda taʼminlaydi, oʻzini oʻzi band qilgan fuqarolarga ragʻbatlantiruvchi imtiyozlar berish choralarini koʻradi;

3) ishga muhtoj shaxslarni, ayniqsa band boʻlmagan yoshlarni, nogironligi boʻlgan shaxslarni va ishsizlarni iqtisodiyot tarmoqlari va mehnat bozorining real ehtiyojlaridan kelib chiqib, kasbga tayyorlash, qayta tayyorlash va ularning malakasini oshirish tizimini tubdan takomillashtirish masalalari boʻyicha:

malakani baholash Milliy tizimi faoliyatini tashkil etadi;

kasb malakalari va bilimlari boʻyicha Kengash tashkil etadi;

malakasi tasdiqlangan shaxslar Milliy reyestrini yuritadi;

kasb standartlari reyestrini yuritadi;

ishsiz fuqarolar va band boʻlmagan aholini kasbga oʻqitish markazlari reyestrini yuritadi;

malakani baholash markazlari reyestrini yuritadi;

mehnatga layoqatli aholi, ayniqsa band boʻlmagan yoshlar kasbiy bilim, malaka va koʻnikmalar olishi uchun shart-sharoit yaratadi;

kasbiy standartlar va malaka talablarini ekspertizadan va davlat roʻyxatidan oʻtkazadi;

kasbga oʻqitish markazlarida ishsiz fuqarolarni va band boʻlmagan aholini kasbga oʻqitadi hamda malakani baholash markazlarida ularning malakasini baholaydi;

Toshkent shahrida ishsiz fuqarolarni kasbga oʻqitish markazini, ishsiz fuqarolar va band boʻlmagan aholini kasbga oʻqitish markazlarini, malakani baholash markazlarini akkreditatsiyadan oʻtkazadi;

ishsiz fuqarolar va band boʻlmagan aholini kasbga oʻqitish markazlari, malakani baholash markazlaridagi oʻqitish sifatini va baholash xolisligini nazorat qiladi;

mehnat organlari tizimida ishsizlar va band boʻlmagan aholini kasb-hunarga oʻqitish mintaqaviy markazlarini tashkil etadi va ularning faoliyatini muvofiqlashtiradi;

ishsizlarni “Usta-shogird” usulida kasbga yakka tartibda qayta tayyorlashni tashkil etadi;

mehnat bozorida teng shartlar asosida raqobatlasha olmaydigan ishsiz fuqarolar, nogironligi boʻlgan shaxslar va aholining boshqa toifalarini kasbga oʻqitish va ularning malakasini oshirishning samarali tizimini tashkil etishda ishtirok etadi;

ishsizlarni va mehnat bozorida teng sharoitlar asosida raqobatlasha olmaydigan shaxslarni kasbga oʻqitishni tashkil etish masalalarida davlat-xususiy sheriklikning samarali mexanizmlarini shakllantirishda koʻmaklashadi;

tayanch kasb-hunar kollejlari (kasbga qisqa muddatli oʻqitish boʻyicha maxsus dasturlar orqali) va nodavlat taʼlim muassasalari negizida ishsizlar va band boʻlmagan aholining kasbga oʻqitilishini va malakasi oshirilishini tashkil etadi;

mehnat bozoriga endi qadam qoʻygan, oʻz biznesini tashkil etishni xohlayotgan yoshlarni ragʻbatlanirish va ularning tadbirkorlik tashabbuslarini qoʻllab-quvvatlash boʻyicha takliflar ishlab chiqish va kiritish, ishga muhtoj band boʻlmagan aholi manfaatlarini koʻzlab kasbga tayyorlash va qayta tayyorlash samarali tizimini yaratish, Oʻzbekiston Respublikasi Bandlikka koʻmaklashish davlat jamgʻarmasidan ushbu maqsadlarga ajratiladigan mablagʻlarni mutanosib tarzda oshirish;

tuman (shahar) aholi bandligiga koʻmaklashish markazlarida roʻyxatga olingan ishsiz shaxslarni, ayniqsa kam taʼminlangan oilalarga mansub xotin-qizlarni kasbga oʻqitishga sarflanadigan xarajatlarni moliyalashtirish uchun Oʻzbekiston Respublikasi Bandlikka koʻmaklashish davlat jamgʻarmasidan kasb-hunar taʼlimi muassasalariga grantlar ajratish;

Oʻzbekiston Respublikasi Oliy va oʻrta maxsus taʼlim vazirligining Kasb-hunar taʼlimi markazi bilan birgalikda mehnat bozorida talab boʻlgan ega kasblar va mutaxassisliklar boʻyicha ishsiz fuqarolar va band boʻlmagan aholini kasbga oʻqitish, qayta tayyorlash va ularning malakasini oshirish qisqa muddatli kurslari oʻquv dasturlarini ishlab chiqadi va tasdiqlaydi;

tuman (shahar) aholi bandligiga koʻmaklashish markazlari yoʻllanmasi boʻyicha ishga qabul qilingan aholining ijtimoiy zaif qatlamlariga mansub xodimlarni, shu jumladan nogironligi boʻlgan shaxslarni kasbga oʻqitish va ularning malakasini oshirish uchun sarflanadigan xarajatlarni moliyalashtirish uchun ish beruvchilarga bir martalik subsidiyalar beradi;

oliy va oʻrta maxsus, kasb-hunar taʼlimi muassasalari bitiruvchilarini keyinchalik ishga joylashtirish uchun muayyan ish beruvchilarga biriktirib qoʻyish boʻyicha tizimli chora-tadbirlar kompleksini amalga oshirishda ishtirok etadi;

manfaatdor vazirliklar va idoralar bilan birgalikda bitiruvchilarning bandligi taʼminlanishi yuzasidan tizimli monitoring olib boradi, ularni ishga joylashtirishga toʻsqinlik qilayotgan tizimli muammolarni aniqlaydi va shu asosda bitiruvchilar bandligini taʼminlash boʻyicha takliflar ishlab chiqadi;

manfaatdor vazirliklar, davlat qoʻmitalari va idoralari bilan birgalikda umumtaʼlim maktablari, oliy va oʻrta maxsus, kasb-hunar taʼlimi muassasalari bitiruvchilari bandligini oʻrganadi va oʻrganish natijalari asosida oliy va oʻrta maxsus, kasb-hunar taʼlim muassasalarida ishchi kadrlar va mutaxassislarni kasbga tayyorlash yoʻnalishlarini takomillashtirish yuzasidan takliflar ishlab chiqadi;

boʻlajak mehnat faoliyati yoʻnalishlarini tanlash hamda mehnat bozori va bandlikni rivojlantirish istiqbollariga mutanosib kasbiy rejalarni shakllantirish masalalari boʻyicha yoshlar oʻrtasida axborot ishlarini va kasbga yoʻnaltirish ishlarini muvofiqlashtiradi;

Oʻzbekiston Respublikasi Xalq taʼlimi vazirligi bilan birgalikda umumiy oʻrta taʼlim muassasalarida talabalar egallashni xohlagan kasblarning asosiy xususiyatlarini va kasbga doir standartlarini tavsiflovchi multimediaviy vositalar bilan jihozlangan xonalar tashkil etgan holda katta sinf oʻquvchilari uchun kasbga oʻqitish kurslarini oʻtkazishni nazarda tutuvchi kasbga yoʻnaltirish dasturini ishlab chiqadi va tasdiqlaydi;

bandlikning yangi shakllarini joriy etishga va anʼanaviy shakllarini kengaytirishga qaratilgan aholi bandligini kengaytirishning uslubiy va normativ-huquqiy asoslarini ishlab chiqadi;

tashqi mehnat migratsiyasini kompleks tahlil qilish, shu asosda tashqi mehnat migratsiyasi sohasidagi normativ-huquqiy bazani takomillashtirishga doir takliflar ishlab chiqish, mehnat migratsiyasidan qaytgan fuqarolarni ishga joylashtirishda koʻmaklashish;

mehnat munosabatlari va mehnatni muhofaza qilish sohasida davlat dasturlari, normativ-huquqiy hujjatlar va boshqa hujjatlar, shuningdek fuqarolarning munosib va xavfsiz mehnat sharoitlariga boʻlgan huquqlarini taʼminlash boʻyicha takliflar va chora-tadbirlarni ishlab chiqish va amalga oshirishda ishtirok etadi;

ijtimoiy siyosatni amalga oshirish mexanizmlarini takomillashtirishga doir normativ-huquqiy hujjatlar va takliflar loyihalarini tayyorlashda oʻz vakolatlari doirasida ishtirok etadi;

manfaatdor vazirliklar, davlat qoʻmitalari va idoralari bilan birgalikda mehnat va mehnatni muhofaza qilish toʻgʻrisidagi qonun hujjatlarini amalga oshirish maqsadida normativ-huquqiy hujjatlar va boshqa hujjatlar loyihalarini ishlab chiqadi;

mehnat va bandlik masalalarini tartibga soluvchi normativ-huquqiy bazani kompleks va tizimli tahlil qilish asosida aholi bandligi oshishini taʼminlash uchun mavjud toʻsiq va gʻovlarni aniqlaydi hamda ularni yengib oʻtish choralarini ishlab chiqadi;

majburiy mehnatning oldini olish va unga toʻliq barham berish, shu jumladan aybdor mansabdor shaxslarni qonun hujjatlariga muvofiq javobgarlikka tortish boʻyicha manfaatdor vazirliklar, idoralar va jamoat tashkilotlari bilan birgalikda choralar koʻrish;

manfaatdor vazirliklar va idoralar bilan birgalikda mehnat xavfsizligini taʼminlash va mehnat shart-sharoitlarini baholash uchun normativ baza yaratish maqsadida mehnatni muhofaza qilish masalalari yuzasidan texnik tartibga solish sohasida normativ hujjatlar ishlab chiqilishini, qayta koʻrilishini, kelishilishini va tasdiqlanishini tashkil etadi;

ijtimoiy sheriklik doirasida aholi bandligini taʼminlash chora-tadbirlarini ishlab chiqish va amalga oshirishga hamda mehnat va bandlik masalalari boʻyicha qabul qilingan meʼyoriy-huquqiy hujjatlarning amalda bajarilishi yuzasidan jamoat nazoratini takomillashtirishga ish beruvchilarni jalb etishga koʻmaklashadi;

oʻz vakolatlari doirasida yuridik va jismoniy shaxslarga mehnat va mehnat muhofazasi qonunchiligini qoʻllash masalalari boʻyicha tushuntirishlar beradi;

mehnat va bandlik sohasida yagona texnik siyosat olib borish, tarmoqning axborot tizimlarini yaratishda yagona usullar va vositalarni qoʻllash sohasida axborot tizimini shakllantirish va rivojlantirishni taʼminlaydi;

vakansiyalar Milliy bazasini shakllantiradi va muntazam yangilab boradi hamda aholining interaktiv rejimda undan foydalanishini taʼminlaydi;

mehnat va aholini ish bilan taʼminlash masalalari boʻyicha axborot-maʼlumotnoma tizimlari va interaktiv xizmatlarning yanada rivojlanishini taʼminlaydi;

7) bandlikka koʻmaklashish boʻyicha xizmatlar bozorida zamonaviy infratuzilma va raqobat muhitini yaratish, davlat va xoʻjalik boshqaruvi organlari, mahalliy davlat hokimiyati organlari, taʼlim muassasalari, nodavlat notijorat tashkilotlari, tadbirkorlik subyektlari, fuqarolarning oʻzini oʻzi boshqarish organlari va jamoatchilikning aholini ish bilan taʼminlash masalalari boʻyicha hamkorligining samarali mexanizmlarini shakllantirish masalalari boʻyicha:

ishga joylashtirish va aholini ish bilan taʼminlash sohasida aholiga xizmat koʻrsatishda nodavlat sektorini rivojlantirishga va uning rolini kuchaytirishga qaratilgan qonun hujjatlarini takomillashtirish va kompleks chora-tadbirlarni amalga oshirish boʻyicha takliflar ishlab chiqadi;

tuman (shahar) aholi bandligiga koʻmaklashish markazlari negizida ishga joylashtirish sohasida “bir darcha” prinsipi boʻyicha kompleks xizmatlar koʻrsatuvchi zamonaviy ofislar tashkil etilishini taʼminlaydi;

kasbiy malakani tasdiqlash boʻyicha faoliyat bilan shugʻullanuvchi yuridik shaxslarni akkreditatsiyadan oʻtkazadi;

Oʻzbekiston Respublikasi hududida ish izlayotgan shaxslarni, shu jumladan ularga uslubiy yordam koʻrsatish orqali ishga joylashtirishga va ularning kasbiy raqobatbardoshligini oshirishga koʻmaklashuvchi nodavlat tashkilotlariga pulli xizmatlar koʻrsatadi;

ishga joylashtirish va bandlikka koʻmaklashish boʻyicha xizmatlar sohasiga axborot-kommunikatsiya xizmatlari keng joriy etilishini, fuqarolarga ishga joylashish jarayonlarini yengillashtiruvchi hamma uchun ochiq maʼlumotlar bazalari tashkil etilishini taʼminlaydi;

xodimlar vakillik organlari aʼzolari uchun qoʻshimcha mehnat kafolatlari taqdim etishga, ish beruvchi tomonidan biror-bir tarzda taʼqib qilishdan himoya qilishga, intizomiy jazolar berishga, vakillik organlari tarkibiga saylangan va ishlab chiqarish ishlaridan ozod etilmagan xodimlar bilan ish beruvchining tashabbusiga koʻra mehnat shartnomasini tugatishga, shuningdek mahalliy mehnat organining oldindan roziligisiz oʻz saylov vakolatlari tugagandan keyin ikki yil ichida vakillik organlari tarkibiga saylangan xodimlar bilan ish beruvchining tashabbusiga koʻra mehnat munosabatlarini tugatishga rioya etilishini davlat tomonidan nazorat qiladi;

xoʻjalik faoliyatining tashkiliy-huquqiy shakllaridan va turlaridan qatʼi nazar tashkilotlar tomonidan mehnat toʻgʻrisidagi qonun hujjatlariga va mehnatni muhofaza qilish talablariga rioya etilishini, ish beruvchining fuqarolik javobgarligi majburiy sugʻurta qilinishini, shu jumladan noqulay va oʻziga xos mehnat sharoitlarida ishlaganlik uchun xodimlarga imtiyozlar va kompensatsiyalar toʻgʻri va oʻz vaqtida berilishini davlat tomonidan nazorat qiladi;

xodimlarning kafolatlangan mehnat huquqlarini taʼminlash, biror-bir shaklda majburiy mehnatdan foydalanish ehtimollarini oʻz vaqtida aniqlash va bartaraf etish boʻyicha Oʻzbekiston Respublikasi qonun hujjatlari normalari amalga oshirilishini nazorat qiladi;

ayniqsa faol qishloq xoʻjaligi ishlari vaqtida xodimlar huquqlari va manfaatlariga rioya etish boʻyicha davlat organlari, shu jumladan mahalliy davlat organlari faoliyatining tizimli monitoringini olib boradi;

monitoring yakunlari boʻyicha fuqarolik jamiyati institutlarini jalb qilgan holda ommaviy eshituvlarni, shu jumladan hududlarda oʻtkazadi, eshituvlarda majburiy mehnatdan foydalanilgan har bir holat bunday hollarga yoʻl qoʻymaslik maqsadida tanqidiy oʻrganib chiqiladi;

korxonalar, muassasalar, ishlar va kasblar, lavozimlar hamda imtiyozli shartlar asosida pensiya, qoʻshimcha taʼtil, qisqartirilgan ish kuni olish huquqini beruvchi koʻrsatkichlar roʻyxatlaridagi oʻzgarishlar toʻgʻrisida davlat va xoʻjalik boshqaruvi organlari takliflari boʻyicha xulosalar beradi;

korxonalar, muassasalar, ishlar va kasblar, lavozimlar hamda imtiyozli shartlar asosida pensiya, qoʻshimcha taʼtil, qisqartirilgan ish kuni olish huquqini beruvchi koʻrsatkichlarning amaldagi roʻyxatlariga oʻzgarishlar toʻgʻrisida Oʻzbekiston Respublikasi Vazirlar Mahkamasiga takliflar kiritadi;

belgilangan mezonlarga muvofiq mehnatni muhofaza qilish holatini baholash natijalari boʻyicha tashkilotlarni kasbga oid xavf sinfiga kiritadi;

nogironligi boʻlgan shaxslarni ijtimoiy himoya qilish toʻgʻrisidagi qonun hujjatlarining nogironligi boʻlgan shaxslarga ijtimoiy infratuzilma obyektlaridan toʻsqinliksiz foydalanishi, shuningdek barcha transport turlaridan, transport kommunikatsiyalaridan, umumiy aloqa va axborot vositalaridan foydalanishi uchun shart-sharoit yaratishga doir qismiga rioya etilishini davlat tomonidan nazorat qiladi;

mehnat, aholini ish bilan taʼminlash va mehnatni muhofaza qilish toʻgʻrisidagi qonun hujjatlarida nazarda tutilgan mehnat munosabatlari subyektlari huquqlari doimiy monitoringi va himoyasini amalga oshiradi;

mehnat toʻgʻrisidagi bitimlar va lokal hujjatlarni, ish beruvchilarning mehnat munosabatlari masalalariga doir buyruqlarining qonun hujjatlariga muvofiqligini tizimli tahlil qiladi;

dehqon va fermer xoʻjaliklarida band boʻlgan fuqarolarning, shuningdek tadbirkorlarning belgilangan mehnat kafolatlari roʻyobga chiqishini tashkil etadi;

jamoa shartnomalar va bitimlarda nazarda tutilgan majburiyatlarning bajarilishi yuzasidan davlat nazoratini olib boradi;

fuqarolarning munosib mehnat shart-sharoitlariga doir huquqlarini taʼminlash va xodimlarning huquqiy himoyalanganligini kuchaytirish boʻyicha takliflar va chora-tadbirlar ishlab chiqadi;

mehnatni muhofaza qilish sohasidagi davlat dasturlari va boshqa dasturlarni ishlab chiqish hamda amalga oshirishda ishtirok etadi;

ish joylarining mehnat shart-sharoitlariga mosligini attestatsiyadan oʻz vaqtida va sifatli oʻtkazish yuzasidan davlat nazoratini amalga oshiradi, ish joylarining mehnat shart-sharoitlariga mosligini attestatsiyadan oʻtkazishda uslubiy yordam beradi;

mehnat va mehnatni muhofaza qilish toʻgʻrisidagi qonun hujjatlarini qoʻllash va ularga rioya qilish masalalari boʻyicha xodimlar va ish beruvchilarga, shu jumladan tadbirkorlik subyektlariga konsultativ va metodologik yordam beradi, ishlab chiqarish jarayonida jarohat olish va baxtsiz hodisalarning oldini olish yuzasidan amaliy ishlar olib boradi;

davlat organlari va xoʻjalik boshqaruvi organlari, mahalliy ijro etuvchi hokimiyat organlari va boshqa tashkilotlar bilan mehnat muhofazasi masalalari boʻyicha hamkorlik qiladi va ularning bu boradagi faoliyatini muvofiqlashtiradi;

ishlab chiqarishdagi baxtsiz hodisalarni va xodimning mehnat majburiyatlarini bajarishi bilan bogʻliq ravishda uning sogʻligʻiga yetkazilgan zararni maxsus tekshirishni oʻtkazishni yoki oʻzining vakillarini bunday tekshirishlarda qatnashishini hamda ishlab chiqarishdagi baxtsiz hodisalarni hisobga olishni belgilangan tartibda amalga oshiradi;

mehnat sharoitlari, ish oʻrinlarini mehnat sharoitlari boʻyicha va asbob-uskunalarning jarohatlash xavfliligi yuzasidan attestatsiyadan oʻtkazish materiallarining davlat ekspertizasidan oʻtkazilishini va tegishli xulosa berilishini taʼminlaydi;

Mehnat muhofazasi sohasidagi xizmatlar bozori professional qatnashchilarining Yagona reyestrini yuritadi va ularga tegishli tartibda ularning Mehnat muhofazasi sohasidagi xizmatlar bozori professional qatnashchilarining Yagona reyestriga kiritilganligi toʻgʻrisida guvohnoma berishni amalga oshiradi;

ish oʻrinlarini mehnat sharoitlarining va asbob-uskunalarining jarohatlash xavfliligi yuzasidan attestatsiyadan oʻtkazish boʻyicha mutaxassisning malaka sertifikatini qonunchilikda belgilangan tartibda beradi va ularning reyestrini yuritadi;

mehnatni muhofaza qilish sohasida xizmatlar bozorining professional ishtirokchilari faoliyati yuzasidan qonun hujjatlarida belgilangan tartibda monitoring oʻtkazadi;

tashkilotlarda mehnat muhofazasi holati boʻyicha monitoring yuritadi;

ishlab chiqarishda jarohatlanish sabablarini tahlil qiladi va davlat organlari va xoʻjalik boshqaruvi organlariga, mahalliy ijro etuvchi hokimiyat organlariga, yuridik va jismoniy shaxslarga ularning oldini olish boʻyicha takliflar kiritadi;

ish beruvchilar tomonidan Oʻzbekiston Respublikasida xorijiy ishchi kuchidan foydalanishni tartibga soluvchi meʼyoriy-huquqiy hujjatlarga rioya etilishini nazorat qiladi;

davlat va xoʻjalik boshqaruvi organlari, mahalliy davlat hokimiyati organlarining mehnatni normalash va ishchi kasblarining hamda mutaxassislar va xizmatchilar lavozimlarining tarif-malaka tavsifnomalarini ishlab chiqish, shuningdek qonun hujjatlarida belgilangan tartibda ishchilarning asosiy kasblari boʻyicha ishchilarga malaka razryadlari berish masalalariga doir ishlarni muvofiqlashtiradi;

manfaatdor davlat va xoʻjalik boshqaruvi organlari bilan birgalikda eng muhim ijtimoiy-mehnat normalari va normativlarining roʻyxatini aniqlaydi va ularning ishlab chiqilishini muvofiqlashtiradi;

manfaatdor vazirliklar, davlat qoʻmitalari va idoralar ishtirokida mehnat va bandlik sohasiga oid normativ-huquqiy hujjatlar va boshqa hujjatlarning loyihalarini ishlab chiqadi, mehnat sohasida xodimlarning ijtimoiy himoyalanganligini kuchaytirish boʻyicha takliflar ishlab chiqadi;

xodimlarning mehnat sohasida ijtimoiy himoyasini kuchaytirish boʻyicha takliflar ishlab chiqadi;

belgilangan tartibda asosiy xizmatchilar lavozimlari va ishchi kasblarining klassifikatorini, tarmoqlararo xarakterga ega boʻlgan alohida lavozimlar va kasblar boʻyicha kasbiy-malakaviy tasniflarni ishlab chiqadi;

Xizmatchilar lavozimlari va ishchi kasblarining tasdiqlangan Klassifikatorida koʻrsatilgan ishchi kasblari va xizmatchilar lavozimlari nomlarining ilgari normativ-huquqiy va boshqa hujjatlarda ishlatilgan kasblar va lavozimlarga aynanligini va mutanosibligini belgilaydi;

davlat va xoʻjalik boshqaruvi organlariga va boshqa tashkilotlarga mehnatni normalash, zamonaviy mehnat standartlarini joriy etish, mehnatga haq toʻlashni tashkil etish, ishlar, kasblar va lavozimlarning tarif-malaka maʼlumotnomalarida aks ettirilmagan lavozimlar va ishlarni tarif setkasining tegishli razryadlariga kiritish masalalarida amaliy va uslubiy yordam beradi;

Oʻzbekiston Respublikasi Iqtisodiyot vazirligi, Moliya vazirligi va manfaatdor vazirliklar va idoralar bilan birgalikda iqtisodiyotning alohida tarmoqlari va sektorlari uchun xodimlar sonining va mehnatga haq toʻlash fondining minimal normativlarini ishlab chiqadi va tasdiqlaydi;

manfaatdor davlat va xoʻjalik boshqaruvi organlari bilan birgalikda davlat va xoʻjalik boshqaruv organlari uchun lavozimlar kiritish va boshqaruv xodimlari, xizmat koʻrsatuvchi va texnik xodimlar sonining normativlarini belgilash shartlarini ishlab chiqishda qatnashadi;

Oʻzbekiston Respublikasi Iqtisodiyot vazirligi, Moliya vazirligi va manfaatdor vazirliklar, davlat qoʻmitalari va idoralari bilan birgalikda ish haqi, pensiyalar, nafaqalar va stipendiyalarning eng kam miqdorini belgilash boʻyicha takliflar tayyorlaydi;

Oʻzbekiston Respublikasi Iqtisodiyot vazirligi, Moliya vazirligi va Davlat soliq qoʻmitasi bilan birgalikda aholi daromadlarini davlat tomonidan tartibga solish mexanizmini takomillashtirish yuzasidan takliflar tayyorlashda ishtirok etadi;

mehnatni moddiy ragʻbatlantirish mexanizmlarini va mehnatga haq toʻlashni tartibga solish usullarini takomillashtirish chora-tadbirlarini ishlab chiqishda ishtirok etadi;

mehnatga haq toʻlash tizimini, yagona tarif setkasini takomillashtirish, ish haqini tuman boʻyicha tartibga solish yuzasidan takliflar ishlab chiqadi;

mehnat shartnomalarini, shu jumladan elektron shaklda (masofaviy) tuziladigan mehnat shartnomalarini tuzishning yangi shakllarini ishlab chiqadi va joriy etadi;

ish vaqtini yarim yillik, choraklar va oylarga boʻlib chiqqan holda kalendar yilga moʻljallangan Ish vaqti normasi hisob-kitoblarini har yili ishlab chiqadi va tasdiqlaydi;

ish vaqtini hisobga olish masalalarida tashkilotlarga uslubiy yordam beradi;

xalqaro hamkorlik, xalqaro tashkilotlar va xorijiy mamlakatlar bilan mehnat va bandlik sohasida samarali hamkorlik mexanizmlarini rivojlantirish hamda takomillashtirish sohasida takliflar ishlab chiqishda ishtirok etadi;

mehnat va bandlik masalalari yuzasidan Xalqaro mehnat tashkiloti va boshqa xalqaro tashkilotlarda belgilangan tartibda hamkorlik qiladi va Oʻzbekiston Respublikasining manfaatlari boʻyicha ish koʻradi;

Xalqaro mehnat tashkilotining Oʻzbekiston Respublikasi tomonidan ratifikatsiya qilingan konvensiyalarining, mehnat va bandlik masalalari boʻyicha tuzilgan boshqa xalqaro shartnomalar bajarilishi monitoringi olib borilishini tashkil etadi, belgilangan tartibda tegishli hisobot va maʼruzalar tayyorlaydi va taqdim etadi;

manfaatdor vazirliklar, davlat qoʻmitalari va idoralari bilan birgalikda mehnat huquqlariga rioya etish masalalari boʻyicha xalqaro tashkilotlar missiyasi ishini tashkil etadi;

aholini ish bilan taʼminlash va mehnatni muhofaza qilishga koʻmaklashish maqsadlariga yoʻnaltiriladigan xorijiy donorlar va kredit tashkilotlarining mablagʻlari belgilangan tartibda jalb qilinishini va ulardan foydalanishni tashkil etadi;

bandlik va mehnat munosabatlari sohasida xalqaro shartnomalar tuzish toʻgʻrisida takliflar kiritadi;

Oʻzbekiston Respublikasi Hukumati, ish beruvchilar va xodimlar vakillik organlari oʻrtasidagi milliy uch tomonlama ijtimoiy muloqotda, shuningdek uch tomonlama maslahatlashuvlarda xalqaro mehnat standartlarini qoʻllashga koʻmaklashish maqsadida ishtirok etadi;

chet davlatlarning tuzilmalari va xalqaro tashkilotlar bilan Vazirlik vakolatiga kiradigan masalalar yuzasidan hamkorlik qiladi;

11) mehnat huquqlari va mehnatni muhofaza qilish masalalari boʻyicha aholi va ish beruvchilar oʻrtasida keng axborot-tushuntirish ishlarini olib borish masalalari boʻyicha:

fuqarolarning mehnat huquqlariga rioya qilish va xavfsiz mehnat shart-sharoitlarini yaratish va mehnatni muhofaza qilish zarurligi toʻgʻrisida jismoniy va yuridik shaxslar oʻrtasida keng axborot-tushuntirish ishlarini olib borish;

mehnat, bandlik, mehnatni muhofaza qilish va mehnat migratsiyasi sohasidagi qonun hujjatlarining mazmun-mohiyatini izohlovchi materiallar tayyorlaydi va aholi oʻrtasida, shu jumladan ommaviy axborot vositalari va internet tarmoqlari orqali tarqatadi;

kam taʼminlangan oilalarga ijtimoiy nafaqalar toʻlanishi yuzasidan tizimli monitoring olib boradi;

kam taʼminlangan oilalarni muhtojlikdan xalos qilish, ularni oilaviy tadbirkorlikka va hunarmandchilikka jalb qilish, shuningdek oʻzini oʻzi band qilishning turli shakllarini rivojlantirishni ragʻbatlantirish boʻyicha yakka tartibdagi dasturlarni mahalliy davlat hokimiyati organlari, fuqarolarining oʻzini oʻzi boshqarish organlari, tijorat banklari, aholini ijtimoiy himoya qiluvchi va unga yordam koʻrsatuvchi boshqa davlat organlari, shu jumladan nodavlat notijorat tashkilotlari bilan hamkorlikda ishlab chiqadi va amalga oshiradi;

13) tashkilotlarning mehnatni muhofaza qilish xizmatlari faoliyatini muvofiqlashtirish hamda uslubiy taʼminlash masalalari boʻyicha:

tashkilotlarning mehnatni muhofaza qilish xizmatlari faoliyatini muvofiqlashtiradi;

tashkilotlarning mehnatni muhofaza qilish xizmatlari faoliyatini va ular bajarayotgan ishlari holatini oʻrganadi;

tashkilotlarning mehnatni muhofaza qilish xizmatlari faoliyatini tartibga soluvchi qonun hujjatlari talablari buzilgan holatlarni bartaraf etish, shuningdek aybdor shaxslarni qonun hujjatlarida nazarda tutilgan javobgarlikka tortish choralarini koʻradi;

tashkilotlarning mehnatni muhofaza qilish xizmatlari xodimlarini lavozimga tayinlashda va lavozimidan ozod etishda ishtirok etadi;

tashkilotlarning mehnatni muhofaza qilish xizmatlariga mehnatni muhofaza qilish masalalari boʻyicha koʻrsatmalar beradi;

tashkilotlarning mehnatni muhofaza qilish xizmatlari xodimlarining malakasini oshirilishini tashkillashtiradi;

tashkilotlarning mehnatni muhofaza qilish xizmatlari xodimlarini attestatsiyadan oʻtkazish tartibini belgilaydi, attestatsiyadan oʻtganlik toʻgʻrisida guvohnoma beradi;

tashkilotlarning mehnatni muhofaza qilish xizmatlari xodimlari hisobini yuritadi;

tashkilotlarning mehnatni muhofaza qilish xizmatlari maʼlumotlar bazasini shakllantirish va yuritish tartibini, maʼlumotlar bazasiga kiritish uchun maʼlumotlar taqdim etish shakllari va muddatlarini belgilaydi;

tashkilotlarning mehnatni muhofaza qilish xizmatlari xodimlarini lavozimga tayinlash va lavozimidan ozod qilish masalasini mehnat organlari bilan kelishish tartibini belgilaydi;

tashkilotlarning mehnatni muhofaza qilish xizmatlari faoliyatini uslubiy jihatdan taʼminlaydi;

Tashqi mehnat migratsiyasi agentligi faoliyatini tashkil etadi;

Oʻzbekiston Respublikasi fuqarolarini xorijda ishga joylashtirish va ularning mehnat huquqlarini taʼminlash jarayonlarini tartibga solish masalalari boʻyicha chet davlatlarning vakolatli organlari bilan hamkorlik qiladi;

mehnat migratsiyasi sohasida xalqaro hamkorlik loyihalarini ishlab chiqish va amalga oshirishda ishtirok etadi, Oʻzbekiston Respublikasi fuqarolarini xorijda ishga joylashtirish jarayonlarini tartibga solish va ularning mehnat huquqlarini taʼminlash masalalari boʻyicha chet davlatlarning vakolati organlari bilan hamkorlik qiladi;

Oʻzbekiston Respublikasi fuqarolarini xorijda ishga joylashtirish orqali ularning mehnat faoliyatiga doir huquqlarini amalga oshirishda koʻmaklashadi;

xorijda ishga joylashishni xohlovchi jismoniy shaxslar maʼlumotlarining yagona bazasini yuritadi;

xususiy bandlik agentliklari va xorijiy ish beruvchilar reyestrlari yuritilishini tashkil etadi;

Xorijda mehnat faoliyatini amalga oshiruvchi fuqarolarning huquqlari va manfaatlarini qoʻllab-quvvatlash hamda himoya qilish jamgʻarmasi faoliyatini tashkil etadi;

Xorijda mehnat faoliyatini amalga oshiruvchi fuqarolarning huquqlari va manfaatlarini qoʻllab-quvvatlash hamda himoya qilish jamgʻarmasi mablagʻlari hisobidan xorijda mehnat faoliyatini amalga oshirish vaqtida tazyiqqa uchragan, majburiy mehnatga majbur qilingan va tahqirlangan, mehnat va boshqa huquqlari buzilgan, murakkab moliyaviy ahvolda qolgan va shaxsini tasdiqlovchi hujjatlarsiz, tirikchilik uchun mablagʻsiz qolgan fuqarolarni huquqiy va ijtimoiy himoya qiladi, shuningdek ularni Oʻzbekiston Respublikasiga qaytarishga koʻmaklashadi;

xorijda ishga joylashtirish uchun koʻrsatilgan nomzodlar bilan dastlabki moslashtirish tadbirlarini oʻtkazadi;

Oʻzbekiston Respublikasi fuqarolarini xorijda ishga joylashtirish boʻyicha yuridik shaxslar faoliyatini litsenziyalash jarayonini tashkil etadi, litsenziya talablari va shart-sharoitlariga rioya etilishini nazorat qiladi;

belgilangan tartibda xorijiy ishchi kuchini jalb qilishga ruxsatnomalar va Oʻzbekiston Respublikasi hududida mehnat faoliyatini amalga oshirish huquqi uchun xorijiy fuqarolarga tasdiqnomalar beradi, shuningdek Oʻzbekiston Respublikasi hududida joylashgan tashkilotlarda ishlovchi xorijiy fuqarolar hisobini yuritadi;

malakali mutaxassislarni jalb qilish sohasida xalqaro hamkorlikni tashkil etadi, Oʻzbekiston Respublikasi hududida mehnat faoliyati bilan shugʻullanishga doir huquqlarini amalga oshirishda ularga koʻmaklashadi;

jismoniy va yuridik shaxslar murojaatlarini koʻrib chiqadi, shuningdek Vazirlik vakolatiga kiradigan masalalar yuzasidan qonun hujjatlari buzilishini bartaraf etish yuzasidan zarur xatti-harakatlarni amalga oshiradi;

bandlik va ishga joylashtirish muammolarini hal qilish boʻyicha fuqarolarning va ish beruvchilarning fikrlari, takliflari va qonuniy talablarini oʻrganadi hamda tahlil qiladi va shu asosda ularni hal qilishga qaratilgan amaliy chora-tadbirlar yuzasidan takliflar ishlab chiqilishini taʼminlaydi;

manfaatdor vazirliklar va idoralar bilan birgalikda mehnat organlarining yuridik va jismoniy shaxslar murojaatlari bilan ishlashini takomillashtirish boʻyicha amaliy chora-tadbirlar va takliflar ishlab chiqadi;

vakolatli huquqni muhofaza qilish organlari bilan birgalikda odam savdosi jabrdiydalarini reabilitatsiya qilish va ularga yordam koʻrsatishda oʻz vakolatlari doirasida koʻmaklashadi, jabr koʻrgan fuqarolar huquqlarini izohlaydi;

hududiy bandlikka koʻmaklashish jamgʻarmalari faoliyatini, shu jumladan pul mablagʻlarini sarflash samaradorligi va natijadorligini nazorat qiladi;

kadrlarning qayta tayyorlanishini va malakasi oshirilishini tashkil etadi, Vazirlik va idora boʻysunuvidagi tashkilotlar rahbarlari hamda mutaxassislarini attestatsiyadan oʻtkazadi;

Oʻzbekiston Respublikasi Iqtisodiyot vazirligi, boshqa vazirliklar, idoralar va ilmiy-tadqiqot tashkilotlari bilan birgalikda aholi turmush darajasi va farovonligini oʻrganishda va uni yanada oshirish boʻyicha takliflar ishlab chiqishda ishtirok etadi.

11. Vazirlik toʻgʻridan-toʻgʻri, shuningdek hududiy boʻlinmalar va uning boʻysunuvidagi boshqa tashkilotlar orqali oʻziga yuklangan vazifa va funksiyalarni amalga oshiradi.

Vazirlik qonun hujjatlariga muvofiq boshqa funksiyalarni ham bajarishi mumkin.

12. Quyidagilar Vazirlik markaziy apparatining vazifalari hisoblanadi:

1) hududiy boʻlinmalar va idora boʻysunuvidagi tashkilotlar bilan birgalikda Vazirlikka yuklangan vazifalar va funksiyalarning samarali bajarilishini taʼminlash;

2) mamlakat mehnat bozorining amaldagi holatini puxta tahlil qilish asosida aholini ish bilan taʼminlashga doir hududiy va tarmoq dasturlarini amalga oshirishni muvofiqlashtirish;

3) ishga muhtoj shaxslarni kasbga tayyorlash, qayta tayyorlash va ularning malakasini oshirish tizimini takomillashtirish;

4) mehnat bozorini tartibga solish, bandlik, mehnat munosabatlari, mehnatni muhofaza qilish, kasb va mehnat standartlari sohasida normativ-huquqiy hujjatlarni ishlab chiqish va amalga oshirish, shuningdek ular yuzasidan nazoratni amalga oshirish;

5) ilgʻor axborot texnologiyalarini ishga joylashtirish jarayonlariga joriy etish;

6) mehnat, mehnatni muhofaza qilish va bandlik sohasidagi qonun hujjatlari talablariga rioya etilishini nazorat qilish, mehnat sharoitlari ekspertizasini amalga oshirish, mehnat munosabatlarini, mehnatni moddiy ragʻbatlantirish mexanizmlarini yanada takomillashtirish boʻyicha aniq chora-tadbirlarni amalga oshirish;

7) mehnatga haq toʻlashni normalash, mehnat standartlarini joriy etish va mehnat munosabatlarini takomillashtirish;

8) mehnat, mehnatni muhofaza qilish va mehnat migratsiyasi sohasida xalqaro hamkorlikni yoʻlga qoʻyish va mustahkamlash;

9) mehnat huquqlari va mehnatni muhofaza qilish masalalari boʻyicha aholi va ish beruvchilar oʻrtasida keng axborot-tushuntirish ishlarini olib borish;

10) tashkilotlarning mehnatni muhofaza qilish xizmatlari faoliyatini muvofiqlashtirish hamda uslubiy taʼminlash;

11) hududiy boʻlinmalar va idora boʻysunuvidagi tashkilotlarda kadrlar bilan taʼminlashni muvofiqlashtirish;

12) ishga joylashtirish, oʻqitish va malaka oshirish, malakani baholash boʻyicha xizmatlarga boʻlgan davlat buyurtmasini moliyalashtirish, keyinchalik tegishli ravishda xususiy bandlik agentliklariga, ishsizlarni va band boʻlmagan aholini oʻqitish markazlariga hamda malakani baholash markazlariga haq toʻlash;

13) kovorking-markazlarni tashkil etish va saqlab turish boʻyicha tadbirlarni moliyalashtirish uchun mablagʻlar ajratish;

14) ishga joylashtirish, oʻqitish va malaka oshirish, malakani baholash boʻyicha xizmatlarga boʻlgan davlat buyurtmasini bajarish boʻyicha Vazirlikning hududiy boʻlinmalari va idora boʻysunuvidagi tashkilotlar faoliyati nazorat va tahlil qilinishini taʼminlash;

15) idora boʻysunuvidagi tashkilotlar rivojlanishiga koʻmaklashish, ularni rivojlantirish konsepsiyalari va istiqbollarini belgilash.

13. Vazirlikning markaziy apparati oʻziga yuklangan asosiy vazifalarga muvofiq quyidagi funksiyalarni bajaradi:

1) Vazirlik va uning rahbariyati faoliyatini tashkiliy hamda axborot-tahliliy jihatdan taʼminlaydi;

2) hududiy boʻlinmalar va idora boʻysunuvidagi tashkilotlar tomonidan Oʻzbekiston Respublikasi qonunlari, Oʻzbekiston Respublikasi Prezidenti farmonlari, qarorlari va farmoyishlari, Hukumat qarorlari bajarilishi yuzasidan muntazam nazoratni taʼminlaydi;

3) bandlik va mehnat munosabatlari vazirining hamda oʻrinbosarlarining buyruqlari va farmoyishlari bajarilishini oʻz vakolatlari doirasida tashkil etadi;

4) Vazirlik tomonidan Vazirlar Mahkamasi va Oʻzbekiston Respublikasi Prezidenti Administratsiyasiga kiritiladigan hujjatlarning sifatli va oʻz vaqtida qayta ishlanishini tashkil etadi, ularning iqtisodiy, moliyaviy va huquqiy ekspertizasini oʻtkazadi;

5) hududiy boʻlinmalar va idora boʻysunuvidagi tashkilotlar faoliyati monitoringini tashkil etadi;

6) mehnat bozorini rivojlantirish maqsadida ilmiy-tadqiqot ishlarini oʻtkazishga koʻmaklashadi;

7) Vazirlik faoliyatini, shu jumladan norma ijodkorligi sohasidagi faoliyatini huquqiy jihatdan taʼminlashni tashkil etadi;

8) mehnat bozori rivojlanishi, aholini ish bilan taʼminlash darajasi va tuzilmasini, yangi ish oʻrinlari tashkil etilishi, mehnat migratsiyasi toʻgʻrisida Vazirlik rahbariyati uchun axborot toʻplaydi, umumlashtiradi va tahlil qiladi;

9) aholini ish bilan taʼminlash, mehnat munosabatlari, mehnatni muhofaza qilish va mehnat migratsiyasi, mehnatga haq toʻlash masalalari va markaziy apparat vakolatiga kiradigan boshqa masalalar boʻyicha tadbirkorlik subyektlarini axborot, uslubiy, tashkiliy va konsultativ qoʻllab-quvvatlaydi;

10) operativ, tashkiliy, kadrlar, moliyaviy, ishlab chiqarish-xoʻjalik va Vazirlik vakolatiga kiradigan boshqa masalalarni hal etilishi bilan shugʻullanadi;

11) Vazirlik hududiy boʻlinmalari va idora boʻysunuvidagi tashkilotlar faoliyatini nazorat qiladi va tahlil qiladi;

12) Vazirlikning hududiy boʻlinmalari va idora boʻysunuvidagi tashkilotlar bilan birgalikda oʻziga yuklangan vazifalarning samarali bajarilishini taʼminlaydi;

13) aholini ishga joylashtirish sohasida xizmatlar koʻrsatish bilan bogʻliq faoliyatni amalga oshiruvchi yuridik shaxslar bilan hamkorlik qiladi;

14) Vazirlik tizimi tashkilotlarida moliyaviy nazoratni tashkil etadi va amalga oshiradi;

15) ishga joylashtirish, oʻqitish va malaka oshirish, malakani baholashga doir xizmatlarga boʻlgan davlat buyurtmasini bajarish boʻyicha Vazirlik hududiy boʻlinmalari va idora boʻysunuvidagi tashkilotlar faoliyatini nazorat va tahlil qiladi;

16) kovorking-markazlarni tashkil etish va saqlab turish boʻyicha tadbirlarni moliyalashtirishga mablagʻlarni ajratadi;

17) jismoniy va yuridik shaxslar murojaatlari bilan ishlarni tashkil etadi;

18) xorijiy investitsiyalar jalb etilishini tashkil qiladi va xalqaro hamkorlikni amalga oshiradi;

19) qonun hujjatlarida nazarda tutilgan boshqa funksiyalarni amalga oshiradi.

14. Quyidagilar Qoraqalpogʻiston Respublikasi Bandlik va mehnat munosabatlari vazirligining, viloyatlar va Toshkent shahar bandlik bosh boshqarmalarining asosiy vazifalari hisoblanadi:

1) Vazirlikka yuklangan vazifalar va funksiyalarning samarali bajarilishini taʼminlashda ishtirok etish;

2) tegishli ravishda Qoraqalpogʻiston Respublikasi Joʻqorgʻi Kengesi raisi, viloyatlar va Toshkent shahar, tuman (shaharlar) hokimlari, hududiy prokuratura, ichki ishlar organlari va davlat soliq xizmati rahbarlari tomonidan rahbarlik qilinadigan kompleks ijtimoiy-iqtisodiy rivojlantirish sektorlari (keyingi oʻrinlarda ijtimoiy-iqtisodiy rivojlantirish sektorlari deb ataladi) bilan hamkorlikni amalga oshirish;

3) aholi bandligi, mehnatni muhofaza qilish va mehnat migratsiyasi sohasidagi va ular vakolatiga kiradigan boshqa masalalarga doir qonun hujjatlariga, normativ hujjatlarga rioya etish yuzasidan monitoring va nazorat olib borish;

4) tuman (shahar) aholi bandligiga koʻmaklashish markazlari va idora boʻysunuvidagi tashkilotlarda axborot-kommunikatsiya texnologiyalarini joriy etish;

5) ishga joylashtirish, oʻqitish va malaka oshirish, malakani baholash xizmatlari uchun davlat buyurtmasini shakllantirish boʻyicha tuman (shahar) aholi bandligiga koʻmaklashish markazlari faoliyatini muvofiqlashtirish hamda tahlil qilish;

6) kovorking-markazlar tashkil etish va ularni saqlab turish moliyalashtirilishini tashkil qilish boʻyicha tuman (shahar) aholi bandligiga koʻmaklashish markazlari faoliyatini muvofiqlashtirish;

7) tuman (shahar) aholi bandligiga koʻmaklashish markazlarida va idora boʻysunuvidagi tashkilotlarda moliya nazoratini tashkil etish va amalga oshirish.

15. Qoraqalpogʻiston Respublikasi Bandlik va mehnat munosabatlari vazirligi, viloyatlar va Toshkent shahar bandlik bosh boshqarmalari oʻziga yuklangan asosiy vazifalarga muvofiq quyidagi funksiyalarni bajaradi:

1) Qoraqalpogʻiston Respublikasi Bandlik va mehnat munosabatlari vazirligi, viloyatlar va Toshkent shahar bandlik bosh boshqarmalari faoliyatini tashkiliy va axborot-tahliliy jihatdan taʼminlaydi hamda unga rahbarlik qiladi;

2) Oʻzbekiston Respublikasi qonunlarining, Oʻzbekiston Respublikasi Oliy Majlisi palatalari qarorlarining, Oʻzbekiston Respublikasi Prezidenti farmonlari, qarorlari va farmoyishlarining, Oʻzbekiston Respublikasi Vazirlar Mahkamasi qarorlari va farmoyishlarining hamda Vazirlik buyruqlarining tuman (shahar) aholi bandligiga koʻmaklashish markazlari, idora boʻysunuvidagi tashkilotlar tomonidan bajarilishini tizimli nazorat qiladi;

3) tuman (shahar) aholi bandligiga koʻmaklashish markazlari, idora boʻysunuvidagi tashkilotlar tomonidan kiritiladigan hujjatlarning sifatli va oʻz vaqtida ishlab chiqilishini, ularning iqtisodiy, moliyaviy va huquqiy ekspertizasi oʻtkazilishini tashkil etadi;

4) tuman (shahar) aholi bandligiga koʻmaklashish markazlari, idora boʻysunuvidagi tashkilotlar faoliyatiga rahbarlik qiladi, ularni muvofiqlashtiradi va nazorat qiladi;

5) aholini ishga joylashtirish sohasida xizmatlar koʻrsatish yuzasidan faoliyat olib boruvchi yuridik shaxslar bilan hamkorlik qiladi;

6) tuman (shahar) aholi bandligiga koʻmaklashish markazlari va idora boʻysunuvidagi tashkilotlarda moliyaviy nazoratni tashkil etadi va amalga oshiradi;

7) aholini ish bilan taʼminlash hududiy dasturlari bajarilishi monitoringini olib borish, band boʻlmagan aholiga davlat xizmatlarini koʻrsatish, ijtimoiy himoya qilish, mehnat munosabatlari va mehnatni muhofaza qilish boʻyicha tuman (shahar) aholi bandligiga koʻmaklashish markazlari, idora boʻysunuvidagi tashkilotlar xatti-harakatlarini muvofiqlashtiradi;

8) ishga joylashtirish, oʻqitish va malakani baholash xizmatlariga boʻlgan davlat buyurtmasini shakllantirish, moliyalashtirish va amalga oshirish, keyinchalik tegishli ravishda xususiy bandlik agentliklari, ishsizlar va band boʻlmagan aholini oʻqitish markazlari hamda malakani baholash markazlariga haq toʻlash boʻyicha tuman (shahar) aholi bandligiga koʻmaklashish markazlari xatti-harakatlarini muvofiqlashtiradi;

9) kovorking-markazlarni tashkil etish boʻyicha tuman (shahar) aholi bandligiga koʻmaklashish markazlari takliflarini umumlashtiradi, shuningdek ularni saqlab turishning moliyalashtirilishini tashkil etadi;

10) tuman (shahar) aholi bandligiga koʻmaklashish markazlari va idora boʻysunuvidagi tashkilotlarning moddiy-texnik taʼminotini tashkil etadi;

11) tuman (shahar) aholi bandligiga koʻmaklashish markazlari va idora boʻysunuvidagi tashkilotlar binolari va inshootlaridan joriy foydalanish boʻyicha ishlar monitoringini oʻtkazadi va muvofiqlashtiradi;

12) jismoniy va yuridik shaxslar murojaatlari bilan ishlarni tashkil etadi;

13) operativ, tashkiliy, kadrlar, moliyaviy, ishlab chiqarish va oʻz vakolatiga kiradigan boshqa masalalar yuzasidan qarorlar qabul qiladi;

14) qonun hujjatlarida nazarda tutilgan boshqa funksiyalarni amalga oshiradi.

16. Quyidagilar tuman (shahar) aholi bandligiga koʻmaklashish markazlarining asosiy vazifalari hisoblanadi:

1) Vazirlikka yuklangan vazifalar va funksiyalarning samarali bajarilishini taʼminlashda ishtirok etish;

2) aholi, mehnat munosabatlari, mehnatni muhofaza qilish va mehnat migratsiyasi sohasidagi va oʻz vakolatiga kiradigan boshqa masalalarga doir tashkilotlar bilan hamkorlik qilish;

3) ishsizlarni ishga joylashtirish organlariga murojaat qilganlarning ishga joylashtirilishini taʼminlash, jamoat ishlarida, birinchi navbatda, yirik investitsiya loyihalarini amalga oshirish, yoʻl va uy-joy-kommunal infratuzilma obyektlarini qurish, taʼmirlash va rekonstruksiya qilish, shahar va tumanlarni obod qilish doirasidagi jamoat ishlarida, mavsumiy qishloq xoʻjaligi ishlarida aholini ishtirok etishga jalb qilish;

4) qonun hujjatlariga, normativ hujjatlarga rioya etilishi yuzasidan monitoring va nazorat olib borish;

5) ishga joylashtirish, oʻqitish va malaka oshirish, malakani baholash xizmatlariga boʻlgan davlat buyurtmasini moliyalashtirish;

6) kovorking-markazlarni tashkil etish va saqlab turishni moliyalashtirish boʻyicha takliflarni shakllantirish;

7) aholini ishga joylashtirish sohasida xizmatlar koʻrsatish boʻyicha faoliyatni amalga oshiruvchi yuridik shaxslarni qoʻllab-quvvatlash;

17. Tuman (shahar) aholi bandligiga koʻmaklashish markazlari oʻziga yuklangan asosiy vazifalarga muvofiq quyidagi funksiyalarni bajaradi:

1) tuman (shahar) aholi bandligiga koʻmaklashish markazlari faoliyatini tashkiliy va axborot-tahliliy jihatdan taʼminlaydi hamda ularga rahbarlik qiladi;

2) Oʻzbekiston Respublikasi qonunlari, Oʻzbekiston Respublikasi Oliy Majlisi palatalari qarorlari, Oʻzbekiston Respublikasi Prezidenti farmonlari, qarorlari va farmoyishlari, Oʻzbekiston Respublikasi Vazirlar Mahkamasi qarorlari va farmoyishlari hamda Vazirlik buyruqlari bajarilishini nazorat qiladi;

3) tuman (shahar) aholi bandligiga koʻmaklashish markazlari tomonidan tumanlar (shaharlar) hokimliklariga kiritiladigan hujjatlarning sifatli va oʻz vaqtida ishlab chiqilishini, ularning iqtisodiy, moliyaviy va huquqiy ekspertizasi oʻtkazilishini tashkil etadi;

4) mehnat organlariga murojaat qilgan ishsizlarning ishga joylashtirilishini taʼminlaydi;

5) mos ish tanlashda fuqarolarga, zarur xodimlarni tanlashda korxonalar, muassasalar, tashkilotlar va boshqa ish beruvchilarga koʻmaklashadi;

6) mehnat organlariga murojaat qilgan fuqarolar va ish beruvchilarni ish olish va ishchi kuchi bilan taʼminlash imkoniyatlari, xodimlarga qoʻyiladigan talablar toʻgʻrisida va bandlikni taʼminlash bilan bogʻliq boshqa masalalar yuzasidan maslahat beradi;

7) ishlamaydigan fuqarolarni kasbga oʻqitish, qayta oʻqitish va ularning malakasini oshirish toʻgʻrisida oʻquv muassasalari, korxonalar, muassasalar va tashkilotlar bilan shartnomalar tuzadi;

8) ishsizlarning roʻyxatdan oʻtkazilishini taʼminlaydi va ularga yordam beradi, shu jumladan nafaqalar tayinlaydi va toʻlaydi;

9) mehnat bozorining holatini va uni rivojlantirish istiqbollarini baholaydi, uning monitoringini tashkil etadi va oʻtkazadi hamda tegishli axborot tarqatilishini taʼminlaydi;

10) ish izlab murojaat qilgan fuqarolar, shuningdek tegishli hududdagi boʻsh ish oʻrinlari (vakant lavozimlar) hisobini yuritadi;

11) aholini ish bilan taʼminlash dasturlarini ishlab chiqish va amalga oshirishda ishtirok etadi;

12) ish oʻrinlari tashkil etish va aholi bandligini taʼminlash dasturlariga kiritilgan korxonalar, muassasalar va tashkilotlar tomonidan taqdim etiladigan axborot, shuningdek davlat statistika organlarining maʼlumotlar asosida mazkur dasturlar bajarilishi monitoringini olib boradi;

13) mehnat organlariga murojaat qilgan fuqarolarni oʻz kasbiy tayyorgarligi va malaka darajasiga koʻra ishga joylashtirish uchun korxonalarga, muassasalarga va tashkilotlarga, agar ularda boʻsh ish oʻrinlari (vakant lavozimlar) boʻlsa, yuboradi;

14) ijtimoiy himoyaga muhtoj shaxslarni qabul qilish uchun korxonalar, muassasalar va tashkilotlarga eng kam ish oʻrinlari sonini belgilash toʻgʻrisidagi takliflarni ishlab chiqadi va mahalliy davlat hokimiyati organlarining koʻrib chiqishi uchun kiritadi,shuningdek mazkur fuqarolarni ishga joylashtirish uchun korxonalar, muassasalar va tashkilotlarga yuboradi;

15) fuqarolar bilan ularni oldindan (zarur boʻlsa) kasbga tayyorlagan, qayta tayyorlagan va ularning malakasini oshirgan holda, yoʻlkira haqini, sutkalik xarajatlarini toʻlab, ishga joylashtirish toʻgʻrisida korxonalar, muassasalar va tashkilotlar nomidan ular kelishuvi boʻyicha shartnomalar tuzadi,shuningdek yangi yashash va ish joyiga joʻnab ketsa, tegishli korxonalar, muassasalar va tashkilotlar mablagʻlari hisobiga nafaqalar beradi;

16) ishsizlarni oʻz xohishiga koʻra haq toʻlanadigan jamoat ishlariga belgilangan tartibda yuboradi;

17) Oʻzbekiston Respublikasi Bandlikka koʻmaklashish davlat jamgʻarmasining mablagʻlarini belgilangan tartibda tasarruf etadi;

18) fuqarolarga ishsizlik nafaqasini belgilangan tartibda tayinlaydi;

19) mehnat, ish bilan taʼminlash sohasidagi qonun hujjatlari talablariga, mehnat munosabatlarini, moddiy ragʻbatlantirish va mehnatni muhofaza qilish mexanizmlarini takomillashtirishga doir chora-tadbirlarga rioya etilishini nazorat qiladi;

20) aholini ishga joylashtirish sohasida xizmatlar koʻrsatish boʻyicha faoliyat olib boruvchi yuridik shaxslar bilan hamkorlik qiladi;

21) ishga joylashtirish, oʻqitish va malaka oshirish, malakani baholash boʻyicha xizmatlarga boʻlgan davlat buyurtmasini moliyalashtiradi, keyinchalik tegishli ravishda xususiy bandlik agentliklariga, ishsizlarni va band boʻlmagan aholini oʻqitish markazlariga hamda malakani baholash markazlariga haq toʻlaydi;

22) kovorking-markazlarni tashkil etish va saqlab turishni moliyalashtirish yuzasidan takliflarni shakllantiradi;

23) ish bilan taʼminlash davlat dasturlari bajarilishi yuzasidan monitoring olib boradi;

24) jismoniy va yuridik shaxslar murojaatlari bilan ishlarni tashkil etadi;

25) operativ, tashkiliy, kadrlar, moliyaviy, ishlab chiqarish xoʻjalik tuman (shahar) aholi bandligiga koʻmaklashish markazlarining vakolatiga kiradigan boshqa masalalar yuzasidan qarorlar qabul qiladi;

26) qonun hujjatlarida nazarda tutilgan boshqa funksiyalarni amalga oshiradi.

18. Vazirlik oʻziga yuklangan vazifalar va funksiyalarni bajarish uchun quyidagi huquqlarga ega:

Vazirlikka yuklangan vazifalar va funksiyalarni bajarish bilan bogʻliq normativ-huquqiy hujjatlar loyihalarini, shuningdek boshqa hujjatlarni Oʻzbekiston Respublikasi Vazirlar Mahkamasiga yoki Oʻzbekiston Respublikasi Prezidenti Administratsiyasiga belgilangan tartibda kiritish;

mehnat, bandlik va mehnatni muhofaza qilish sohasida davlat siyosatini amalga oshirish masalalarida davlat boshqaruvi organlari va mahalliy davlat hokimiyati organlari faoliyatini belgilangan tartibda muvofiqlashtirish;

Vazirlik vakolatiga kiradigan masalalarni hal qilish uchun davlat va xoʻjalik boshqaruvi organlari hamda mahalliy davlat hokimiyati organlaridan belgilangan tartibda axborot soʻrash va olish;

davlat statistika organlaridan Vazirlik vakolatiga kiradigan masalalarga doir zarur statistik axborotni bepul olish;

tashkilotlarda mehnat, bandlik va mehnatni muhofaza qilish toʻgʻrisidagi qonun hujjatlariga, mehnat xavfsizligi standartlariga, shu jumladan Oʻzbekiston Respublikasi tomonidan ratifikatsiya qilingan konvensiyalarning qoidalari va talablariga rioya etilishini belgilangan tartibda oʻrganish va tekshirish;

ishlab chiqarishdagi baxtsiz hodisalarni va xodimlar, shuningdek fuqarolik-huquqiy shartnomalar boʻyicha ishlarni bajaruvchi (xizmatlar koʻrsatuvchi) shaxslar sogʻligʻiga mehnat vazifalarini bajarishi vaqtida yetkazilgan zararlarning boshqa omillarini qonun hujjatlarida belgilangan tartibda maxsus tekshirish yoki tekshirishda ishtirok etish;

mehnat, bandlik va mehnatni muhofaza qilish toʻgʻrisidagi qonun hujjatlarini buzganlik uchun mansabdor shaxslarga qonun hujjatlarida belgilangan tartibda maʼmuriy jazolar berish;

mehnatni muhofaza qilish talablariga javob bermaydigan va xodimlar sogʻligʻi yoki hayotiga xavf tugʻdiradigan tashkilotlar faoliyatini yoki korxonalar mablagʻlaridan foydalanishni oʻz vakolatlari doirasida va qonun hujjatlarida belgilangan tartibda toʻxtatish;

Vazirlik va uning idoraviy boʻysunuvidagi tuzilmalar davlat mulkini bir boʻlinmadan boshqa boʻlinmaga bepul foydalanish huquqlari asosida oʻz tashkiliy tuzilmasi doirasida belgilangan tartibda oʻtkazish;

Oʻzbekiston Respublikasi Bandlikka koʻmaklashish davlat jamgʻarmasi, Oʻzbekiston Respublikasi hududidan tashqarida mehnat faoliyatini amalga oshiruvchi fuqarolar huquqlari va manfaatlarini qoʻllab-quvvatlash jamgʻarmasi mablagʻlarini belgilangan tartibda tasarruf etish hamda ulardan maqsadli foydalanish yuzasidan nazoratni taʼminlash ishlarini tashkil etish;

Vazirlik va uning idora boʻysunuvidagi tuzilmalari davlat mol-mulkini begʻaraz foydalanish huquqi asosida bir boʻlinmadan boshqa boʻlinmaga, oʻz tashkiliy tuzilmasi doirasida balansdan balansga belgilangan tartibda oʻtkazish, shtat jadvallarini muvofiqlashtirish, idora boʻysunuvidagi tashkilotlar moliya-xoʻjalik faoliyati balanslari va hisobotlarini koʻrib chiqish;

idora boʻysunuvidagi tashkilotlarning moddiy-texnik bazasini mustahkamlash tadbirlarini amalga oshirish;

idora boʻysunuvidagi tashkilotlar tomonidan markazlashgan kapital mablagʻlardan samarali foydalanish yuzasidan nazoratni taʼminlash, Vazirlik tizimidagi obyektlarni qurish va rekonstruksiya qilish boʻyicha istiqbolli dasturlar ishlab chiqish tashabbusi bilan chiqish;

Oʻzbekiston Respublikasi Bandlik va mehnat munosabatlari vazirligining hududiy boʻlinmalariga biriktirilgan binolar, inshootlar va xonalarni realizatsiya qilish yoki buzish toʻgʻrisida qaror qabul qilish xususida Qoraqalpogʻiston Respublikasi Vazirlar Kengashi Raisiga, viloyatlar va Toshkent shahar hokimlariga belgilangan tartibda takliflar kiritish, shuningdek tuman (shahar) aholi bandligiga koʻmaklashish markazlarini joylashtirish uchun Oʻzbekiston Respublikasi Bandlikka koʻmaklashish davlat jamgʻarmasi hisobiga binolar, inshootlar va xonalar xarid qilish, rekonstruksiya qilish va qurish boʻyicha qarorlar qabul qilish;

idora boʻysunuvidagi xoʻjalik tashkilotlari tuzilmasini, shtatlar sonini, shu jumladan boshqaruv xodimlarini, mehnatga haq toʻlash fondini, xarajatlar smetasini, avtotransport vositalari limitini belgilash;

Oʻzbekiston Respublikasi Tashqi ishlar vazirligi bilan kelishilgan holda Vazirlik huzuridagi Tashqi mehnat migratsiyasi agentligining xorijiy vakolatxonalarini ochish toʻgʻrisida qarorlar qabul qilish;

Qoraqalpogʻiston Respublikasi Bandlik va mehnat munosabatlari vazirligi, viloyatlar va Toshkent shahar bandlik bosh boshqarmalari, tuman (shahar) aholi bandligiga koʻmaklashish markazlari va idoraviy tashkilotlar faoliyatining asosiy koʻrsatkichlari boʻyicha ular tomonidan parametrlar bajarilishini hisobga olgan holda ularning xodimlarini moddiy ragʻbatlantirish tartibi, hajmi va shartlarini belgilash;

idora boʻysunuvidagi tashkilotlarda toʻgʻridan-toʻgʻri shartnomalar boʻyicha tovarlar, ishlar va xizmatlar xarid qilish, shu jumladan: “Respublika bandlik va mehnatni muhofaza qilish ilmiy markazi” idora boʻysunuvidagi davlat muassasasida ilmiy ishlar bajarish, Vazirlik vakolatiga kiradigan masalalar boʻyicha tadqiqotlar va soʻrovlar oʻtkazish; “Mehnat.uz” axborot-kompyuter markazi” MCHJda axborot-kommunikatsiya texnologiyalarini ishlab chiqish, joriy etish va qoʻllab-quvvatlash; Toshkent shahrida ishsiz fuqarolarni kasbga oʻqitish markazida, “Ishga marhamat” band boʻlmagan aholiga xizmatlar koʻrsatish monomarkazi” MCHJda hamda ishsiz fuqarolar va band boʻlmagan aholini kasbga oʻqitish markazlarida oʻqitish, malaka oshirish va qayta oʻqitish; malaka oshirish markazlarida malakani baholash; Respublika mehnat organlari xodimlari malakasini oshirish kurslarida mehnat organlari xodimlari malakasini oshirish; Respublika mehnat organlari tizimi xodimlari malakasini oshirish kurslarida mehnat organlari xodimlarini tayyorlash, qayta tayyorlash va ularning malakasini oshirish.

Qoraqalpogʻiston Respublikasi Bandlik va mehnat munosabatlari vazirligi, viloyatlar va Toshkent shahar bandlik bosh boshqarmalari, tuman (shahar) aholi bandligiga koʻmaklashish markazlari va Vazirlikning idora boʻysunuvidagi tashkilotlar tomonidan uchinchi shaxslarga pulli xizmatlar koʻrsatganlik uchun tariflar va ularning hajmlarini belgilash tartibini Oʻzbekiston Respublikasi Moliya vazirligi bilan kelishilgan holda belgilash;

yangi ish oʻrinlari tashkil etgan ish beruvchilarga, shuningdek aholining ijtimoiy zaif qatlamlariga mansub shaxslarni, eng avvalo, kasb-hunar kollejlari bitiruvchilarini, imkoniyatlari cheklangan shaxslarni, harbiy xizmatdan boʻshatilgan shaxslarni ishga joylashtiruvchilarga ijtimoiy ragʻbatlantirish, ish beruvchilarni Vazirlikning faxriy nishonlari, yorliqlari va guvohnomalari bilan taqdirlash, shuningdek ommaviy axborot vositalarida eng yaxshi ish beruvchilar toʻgʻrisida materiallar joylashtirilishini tashkil etish choralarini koʻrish;

ish beruvchilar oʻrtasida ijtimoiy javobgarlikni oshirishga hamda yangi ish oʻrinlari tashkil etish va aholini ishga joylashtirish boʻyicha samarali faoliyatni kengaytirishga ragʻbatlantirishni kuchaytirishga qaratilgan tanlovlarni belgilangan tartibda oʻtkazish;

belgilangan tartibda noshirlik faoliyatini amalga oshirish, mehnat, aholini ish bilan taʼminlash, mehnatni muhofaza qilish va ish beruvchilar fuqarolik javobgarligini majburiy sugʻurta qilish sohasida belgilangan tartibda davriy nashrlar taʼsis etish;

mehnat, bandlik, ishga joylashtirish va mehnatni muhofaza qilish masalalari boʻyicha ijtimoiy reklama mahsulotlarini buyurtirish, shuningdek ularni davlat ommaviy axborot vositalarida, stendlarda, bannerlarda va aholi keng tanishishi mumkin boʻlgan boshqa usullarda bepul joylashtirish;

binolarga xizmat koʻrsatish, inventar va xoʻjalik asboblarini, avtotransportni, aloqa vositalarini, hisoblash, kompyuter va ofis texnikasini taʼminlab turish va ulardan foydalanish, dasturiy taʼminot xarid qilish, shu jumladan autsorsing shartlari asosida xarid qilish boʻyicha ishlarni bajarish uchun belgilangan tartibda shartnomalar tuzish;

Vazirlik vakolatiga kiradigan masalalarni hal qilishga ilmiy tashkilotlarni, olimlar va mutaxassislarni, shu jumladan xorijiy mutaxassislarni shartnoma asosida jalb qilish;

mehnat, bandlik va mehnatni muhofaza qilish toʻgʻrisidagi qonun hujjatlarini buzgan holda qabul qilingan davlat va xoʻjalik boshqaruvi organlarining hamda boshqa tashkilotlarning buyruqlari va boshqa hujjatlarini bekor qilish toʻgʻrisida belgilangan tartibda koʻrsatmalar kiritish;

Internet jahon axborot tarmogʻida va ijtimoiy tarmoqlarda belgilangan tartibda rasmiy veb-saytlar yaratish;

Hukumat topshirigʻiga binoan xalqaro tashkilotlarda Oʻzbekiston Respublikasi manfaatlarini ifodalash hamda qonun hujjatlarida belgilangan tartibda va xalqaro huquq normalariga muvofiq boshqa davlatlarning vakolatli tashkilotlari bilan mehnat, bandlik va mehnat migratsiyasi masalalari boʻyicha shartnomalar tuzish;

jismoniy va yuridik shaxslarning murojaatlari, davlat soliq xizmati organlarining yozma murojaatlari asosida maxsus vakolatli organlar bilan dastlabki kelishuvsiz tashkiliy-huquqiy shakllaridan qatʼi nazar tashkilotlarning bandlik, mehnat va mehnatni muhofaza qilish toʻgʻrisidagi qonun hujjatlari talablariga rioya etishini rejadan tashqari qisqa muddatli tekshiruvlar oʻtkazish;

davlat-xususiy sheriklik shartlari asosida, shu jumladan Oʻzbekiston Respublikasi Bandlikka koʻmaklashish davlat jamgʻarmasi mablagʻlari hisobiga faoliyati yangi ish oʻrinlari tashkil etishga va aholini ish bilan taʼminlashga qaratilgan korxonalarni tashkil etish;

korrupsiya va boshqa suiisteʼmolliklarning oldini olish va ularga yoʻl qoʻymaslik, xodimning shaxsiy va ishchanlik xususiyatlarini, uning faoliyati samaradorligini muntazam oʻrganish, shuningdek malakaga va Inspeksiya faoliyatining turli yoʻnalishlarida ishlash tajribasiga ega kadrlar zaxirasini shakllantirish maqsadida xodimlar rotatsiyasini amalga oshirish;

kam foydalanilayotgan yoki rekonstruksiya yoxud kapital taʼmirlashni (qayta jihozlashni) talab qiluvchi mavjud binolar, xonalarni ijaraga berish;

davlat mulkining boʻsh turgan obyektlarini, shu jumladan mehnat organlarining faoliyat koʻrsatmaydigan binolarini “nol” xarid qiymati boʻyicha qonun hujjatlarida belgilangan tartibda realizatsiya qilish toʻgʻrisida takliflar kiritish;

Vazirlik va uning hududiy boʻlinmalari hamda idora boʻysunuvidagi tashkilotlar boshqaruv xodimlari mutaxassislarining qoʻshimcha shtat birliklarini Oʻzbekiston Respublikasi Bandlikka koʻmaklashish davlat jamgʻarmasi mablagʻlari hisobiga joriy etish;

yuridik shaxslarni taʼsis etish va ularning ishtirokchisi boʻlish;

mehnat organlari reytingini tuzish maqsadida ular faoliyatining samaradorligini oshirish mezonlarini tasdiqlash;

oʻz vakolati doirasida konferensiyalar, seminarlar, simpoziumlar, koʻrgazmalar, yarmarkalar oʻtkazish, shuningdek boshqa tashkilotlar tomonidan tashkil etilgan shunga oʻxshash tadbirlarda ishtirok etish;

Vazirlik vakolatiga kiradigan masalalar yuzasidan uslubiy materiallar va tavsiyalar ishlab chiqish;

qonunlar, Oʻzbekiston Respublikasi Prezidenti hujjatlari, Oʻzbekiston Respublikasi Vazirlar Mahkamasi qarorlari va boshqa normativ-huquqiy hujjatlarni bajarish boʻyicha Vazirlik hududiy boʻlinmalari va uning idora boʻysunuvidagi tashkilotlari faoliyatini belgilangan tartibda oʻrganish va tekshirish;

Vazirlik hududiy boʻlinmalari va uning idora boʻysunuvidagi tashkilotlari rahbarlari va vakillari ishtirokida kengashlar oʻtkazish;

Vazirlikka yuklangan vazifalar va funksiyalarning bajarilishi bilan bogʻliq boʻlgan hamda tezkor hal etishni talab qiladigan masalalar yuzasidan Vazirlik hududiy boʻlinmalari va uning idora boʻysunuvidagi tashkilotlari rahbarlariga belgilangan tartibda topshiriqlar berish;

Vazirlikka yuklangan vazifalar va funksiyalar bilan bogʻliq masalalarga bagʻishlangan konferensiya, forum, seminar va treninglar oʻtkazish, shu jumladan Oʻzbekiston Respublikasi Bandlikka koʻmaklashish davlat jamgʻarmasi, Xorijda mehnat faoliyatini amalga oshiruvchi fuqarolarning huquqlari va manfaatlarini qoʻllab-quvvatlash hamda himoya qilish jamgʻarmasi mablagʻlari hisobiga oʻtkazish, xalqaro va xorijiy tashkilotlar, chet davlatlar hukumatlari, davlat organlari va hukumatga qarashli boʻlmagan tashkilotlar tomonidan tashkil etiladigan tadbirlarda ishtirok etish uchun mehnat organlari xodimlarini xorijga yuborish, shuningdek, Vazirlikka yuklangan vazifalar va funksiyalar bilan bogʻliq masalalar yuzasidan loyihalarni amalga oshirish uchun xorijiy va milliy ekspertlarni jalb qilish.

Vazirlik qonun hujjatlariga muvofiq boshqa huquqlarga ham ega boʻlishi mumkin.

19. Vazirlik davlat boshqaruvi organlari va mahalliy davlat hokimiyati organlari, boshqa tashkilotlar, mansabdor shaxslar va fuqarolar tomonidan ijro etilishi shart boʻlgan normativ-huquqiy hujjatlarni oʻz vakolatlari doirasida qabul qilishga haqli.

Vazirlik zarur hollarda boshqa davlat boshqaruvi organlari bilan birgalikda qoʻshma qarorlar va boshqa hujjatlarni belgilangan tartibda chop etishga haqli.

20. Vazirlikka yuklangan vazifalarning samarali bajarilishi uchun javob beradi.

21. Bandlik va mehnat munosabatlari vaziri (keyingi oʻrinlarda Vazir deb ataladi) Vazirlikka yuklangan vazifalar va funksiyalarning bajarilishi uchun shaxsan javob beradi.

22. Vazir oʻrinbosarlari:

Vazirlik nazoratidagi tarkibiy boʻlinmalarda Vazirlikka yuklangan vazifalar va funksiyalarning bajarilishi;

oʻz funksional majburiyatlarining sifatli bajarilishi uchun shaxsan javob beradilar.

23. Markaziy apparatning tarkibiy boʻlinmalari rahbarlari tegishli tarkibiy boʻlinmalarga yuklangan vazifalar va funksiyalar bajarilishi uchun;

oʻz funksional majburiyatlari sifatli bajarilishi uchun shaxsan javob beradi.

24. Vazirlikning Qoraqalpogʻiston Respublikasi, viloyatlar, Toshkent shahar va tumanlar (shaharlar)dagi hududiy boʻlinmalari rahbarlari:

boʻlinmalarga yuklangan vazifalar va funksiyalarning bajarilishi uchun;

oʻz funksional majburiyatlarining sifatli bajarilishi uchun shaxsan javob beradilar.

25. Vazirlikka Oʻzbekiston Respublikasining Bosh vaziri taqdimnomasiga binoan Oʻzbekiston Respublikasi Prezidenti tomonidan lavozimga tasdiqlanadigan va lavozimidan ozod etiladigan Vazir rahbarlik qiladi.

26. Vazir oʻz maqomiga koʻra Oʻzbekiston Respublikasi Vazirlar Mahkamasining aʼzosi hisoblanadi.

27. Vazirning Oʻzbekiston Respublikasi Prezidenti tomonidan lavozimga tayinlanadigan va lavozimidan ozod etiladigan uch nafar oʻrinbosari, shu jumladan bir nafar birinchi oʻrinbosari boʻladi.

28. Vazir boʻlmagan davrda uning vakolatlari vazirning birinchi oʻrinbosari, u boʻlmaganda esa — Vazirning buyrugʻiga binoan boshqa oʻrinbosar tomonidan amalga oshiriladi.

29. Vazir:

Vazirlik faoliyatiga yakka boshchilik asosida umumiy rahbarlik qiladi va Vazirlikka yuklangan vazifalar va funksiyalarning bajarilishi uchun shaxsan javob beradi;

Vazirlik faoliyatining alohida yoʻnalishlari va uchastkalariga rahbarlik qilish va idora boʻysunuvidagi tashkilotlar faoliyati uchun vazir oʻrinbosarlari va Vazirlik tizimining boshqa mansabdor shaxslari vakolatlarini va shaxsiy javobgarligi darajasini belgilaydi;

oʻz vakolati doirasida Vazirlik tizimi xodimlari tomonidan ijro etilishi shart boʻlgan buyruqlar chiqaradi va koʻrsatmalar beradi;

xodimlarning belgilangan umumiy soni doirasida markaziy apparat xarajatlar smetasini va shtat jadvalini tasdiqlaydi, Vazirlikning respublika budjetida turgan idoraviy mansub tashkilotlarining xarajatlar va daromadlar smetalarini roʻyxatdan oʻtkazadi;

Qoraqalpogʻiston Respublikasi Bandlik va mehnat munosabatlari vazirligi, viloyatlar va Toshkent shahar bandlik bosh boshqarmalari, tuman (shahar) aholi bandligiga koʻmaklashish markazlari, shuningdek Vazirlikning idoraviy mansub tashkilotlari markaziy apparati tuzilmasiga, zarur boʻlsa, xodimlarning umumiy soni va mehnatga haq toʻlash fondi doirasida oʻzgartirishlar kiritadi;

markaziy apparat boʻlinmalari, Qoraqalpogʻiston Respublikasi Bandlik va mehnat munosabatlari vazirligi, viloyatlar va Toshkent shahar bandlik bosh boshqarmalari toʻgʻrisidagi nizomlarni, tuman (shahar) aholi bandligiga koʻmaklashish markazlari toʻgʻrisidagi namunaviy nizomlarni, Vazirlik tizimiga kiradigan idoraviy mansub tashkilotlar ustavlarini belgilangan tartibda tasdiqlaydi;

xodimlar, shu jumladan boshqaruv xodimlari, xoʻjalik hisobida boʻlgan idora boʻysunuvidagi tashkilotlar xodimlari sonini mustaqil belgilaydi, idora boʻysunuvidagi xoʻjalik tashkilotlari tuzilmasini, shtatlar sonini, shu jumladan boshqaruv xodimlarini, mehnatga haq toʻlash fondini, xarajatlar smetasini, avtotransport vositalari limitini tasdiqlaydi, shuningdek ularning mol-mulkini tasarruf etadi;

Vazirlik tizimida belgilangan tartibda moliyaviy ishlarni tashkil etadi, idora boʻysunuvidagi tashkilotlar tomonidan oʻtkaziladigan tadbirlarni, shuningdek mazkur sohadagi ilmiy tadqiqotlarni moliyaviy jihatdan taʼminlaydi;

Vazirlik huzuridagi Tashqi mehnat migratsiyasi agentligining xorijdagi vakolatxonalarida attashe lavozimiga tayinlash toʻgʻrisida Oʻzbekiston Respublikasi Tashqi ishlar vazirligiga taqdimnomalar kiritadi;

qonun hujjatlariga muvofiq boshqa vakolatlarni amalga oshiradi.

30. Quyidagilar:

markaziy apparat xodimlari, Vazirlik tizimiga kiruvchi idoraviy mansub tashkilotlar va hududiy organlar rahbarlari va rahbar oʻrinbosarlari qonun hujjatlarida belgilangan tartibda Vazir tomonidan lavozimga tayinlanadi va lavozimidan ozod etiladi;

Qoraqalpogʻiston Respublikasi Bandlik va mehnat munosabatlari vaziri Qoraqalpogʻiston Respublikasi Joʻqorgʻi Kengesi tomonidan, Vazir bilan kelishilgan holda lavozimga tayinlanadi va lavozimidan ozod etiladi;

viloyatlar va Toshkent shahar bandlik bosh boshqarmalari boshliqlari Vazir tomonidan tegishli viloyatlar va Toshkent shahri hokimlari bilan kelishilgan holda lavozimga tayinlanadi va lavozimidan ozod etiladi;

tuman (shahar) aholi bandligiga koʻmaklashish markazlari direktorlari Qoraqalpogʻiston Respublikasi Bandlik va mehnat munosabatlari vaziri, viloyatlar va Toshkent shahar bandlik bosh boshqarmalari boshliqlari tomonidan, tegishli tumanlar (shaharlar) hokimlari hamda Vazir bilan kelishilgan holda lavozimga tayinlanadi va lavozimidan ozod etiladi;

Jamoat ishlari jamgʻarmasi ijro etuvchi direktori Oʻzbekiston Respublikasi Vazirlar Mahkamasi bilan kelishilgan holda Vazir tomonidan lavozimga tayinlanadi va lavozimidan ozod etiladi.

Viloyatlar va Toshkent shahar bandlik bosh boshqarmalari boshliqlarini lavozimga tayinlash va lavozimidan ozod qilish boʻyicha qonun hujjatlarida belgilangan tartib-taomil yakunlanguniga qadar Vazir mazkur tarkibiy boʻlinmalarning samarali va uzluksiz faoliyat koʻrsatishini taʼminlash maqsadida vaqtincha rahbar vazifalarini bajaruvchini tayinlaydi.

Vazir Vazirlikning markaziy apparati tuzilmasiga jamoatchilik asoslarida vazir maslahatchisi lavozimini kiritish va ushbu lavozimga yuqori malakali mutaxassisni, shu jumladan xorij fuqarosini tayinlash huquqiga ega.

Qoraqalpogʻiston Respublikasi Bandlik va mehnat munosabatlari vazirligi, viloyatlar va Toshkent shahar bandlik bosh boshqarmalari va tuman (shahar) aholi bandligiga koʻmaklashish markazlariga ishga qabul qilishga koʻrsatilgan nomzodlar majburiy tartibda bir haftalik kirish-moslashtirish kurslaridan, mehnat organlari xodimlari esa muntazam ravishda Respublika mehnat organlari xodimlari malakasini oshirish kurslarida har uch yilda kamida bir marta malaka oshirish kurslaridan oʻtadilar.

Oʻzbekiston Respublikasi Bandlik va mehnat munosabatlari vaziri “Mikrokreditbank” ATB Kuzatuv kengashining raisi, Kasbiy malaka va bilim kengashi raisi, shuningdek Vazirlik huzuridagi Xorijda mehnat faoliyatini amalga oshiruvchi fuqarolarning huquqlari va manfaatlarini qoʻllab-quvvatlash hamda himoya qilish jamgʻarmasi Kuzatuv kengashi raisi hisoblanadi.

31. Viloyatlar va Toshkent shahar bandlik bosh boshqarmalari toʻgʻrisidagi nizomlar tegishli viloyatlar va Toshkent shahri hokimlari bilan kelishilgan holda Vazirning buyruqlari bilan tasdiqlanadi.

Tuman (shahar) aholi bandligiga koʻmaklashish markazlari toʻgʻrisidagi nizomlar tegishli tumanlar (shaharlar) hokimlari bilan kelishilgan holda tegishli ravishda Qoraqalpogʻiston Respublikasi Bandlik va mehnat munosabatlari vazirligi, viloyatlar va Toshkent shahar bandlik bosh boshqarmalari buyruqlari bilan tasdiqlanadi.

32. Tashqi mehnat migratsiyasi agentligi (keyingi oʻrinlarda Agentlik deb yuritiladi) Oʻzbekiston Respublikasi fuqarolarining mehnat migratsiyasi jarayonlarini tartibga solish va ularni xorijda uyushgan holda ishga joylashtirish masalalari boʻyicha Vazirlikning vakolatli organi hisoblanadi, Agentlik respublika fuqarolarini mamlakat hududidan tashqarida ishga joylashtirish borasidagi oʻz faoliyatini xalqaro huquqiy normalar va qoidalarga asoslanib, respublika milliy manfaatlarini va Oʻzbekiston Respublikasidagi yuridik shaxs maqomiga ega xorijiy fuqarolar manfaatlarini inobatga olgan holda amalga oshiradi.

Agentlik davlat unitar korxonasi shaklida yuridik shaxs hisoblanadi.

Vazirlik Agentlikning taʼsischisi hisoblanadi.

Agentlikka Vazir tomonidan lavozimga tayinlanadigan va lavozimidan ozod etiladigan Agentlik boshligʻi rahbarlik qiladi.

Agentlik boshligʻining Vazir tomonidan lavozimga tayinlanadigan va lavozimidan ozod etiladigan uch nafar oʻrinbosari, shu jumladan bir nafar birinchi oʻrinbosari boʻladi.

Agentlikning xorijda vakolatxonalari boʻladi. Vakolatxona rahbari Vazir tomonidan tayinlanadi.

Agentlikning xorijdagi vakolatxonasi rahbarining bir oylik maoshi miqdori tegishli mamlakatdagi Oʻzbekiston Respublikasi Elchisi bir oylik maoshining 85 foizi miqdorida belgilanadi, vakolatxonaning boshqa xodimlari mehnatiga toʻlanadigan haq miqdori elchixona xodimlari mehnatiga toʻlanadigan tegishli haq miqdorining 85 foizi miqdorida belgilanadi.

33. Respublika aholi bandligi va mehnatni muhofaza qilish ilmiy markazi (keyingi oʻrinlarda Ilmiy markaz deb ataladi) davlat muassasasi shaklidagi tashkilot hisoblanadi.

Ilmiy markazga Vazir tomonidan lavozimga tayinlanadigan va lavozimidan ozod etiladigan Ilmiy markaz direktori rahbarlik qiladi.

Ilmiy markaz direktorining Vazir tomonidan lavozimga tayinlanadigan va lavozimidan ozod etiladigan uch nafar oʻrinbosari, shu jumladan bir nafar birinchi oʻrinbosari boʻladi.

34. Respublika mehnat organlari xodimlari malakasini oshirish kurslari (keyingi oʻrinlarda Respublika kurslari deb ataladi) davlat muassasasi shaklidagi tashkilot hisoblanadi.

Respublika kurslariga Vazir tomonidan lavozimga tayinlanadigan va lavozimidan ozod etiladigan direktor rahbarlik qiladi.

Respublika kurslari direktorining Vazir tomonidan lavozimga tayinlanadigan va lavozimidan ozod etiladigan ikki nafar oʻrinbosari, shu jumladan bir nafar birinchi oʻrinbosari boʻladi.

Toshkent shahar Sergeli tumani aholi bandligiga koʻmaklashish markazi Respublika kurslarining oʻquv-amaliy bazasi hisoblanadi.

Respublika kurslarida, shu jumladan Toshkent shahridagi Sergeli tumani aholi bandligiga koʻmaklashish markazidagi oʻquv-amaliy bazada mehnat organlari xodimlari malakasini oshirish Oʻzbekiston Respublikasi Bandlikka koʻmaklashish davlat jamgʻarmasi mablagʻlari hisobiga amalga oshiriladi.

Malaka oshirish oʻquv kurslarini moliyalashtirish yoʻnalishlari va hajmlari, shuningdek malaka oshirishga jalb qilingan mehnat organlari xodimlari soni Vazirlik tomonidan belgilanadi, bunda bir oʻquv guruhidagi tinglovchilar soni 20 kishidan oshishi mumkin emas.

35. Toshkent shahrida ishsiz fuqarolarni kasb-hunarga oʻqitish markaziga (keyingi oʻrinlarda Kasbga oʻqitish markazi deb ataladi) Vazir tomonidan lavozimga tayinlanadigan va lavozimidan ozod etiladigan direktor rahbarlik qiladi.

Kasbga oʻqitish markazi direktorining Vazir tomonidan lavozimga tayinlanadigan va lavozimidan ozod etiladigan uch nafar oʻrinbosari, shu jumladan bir nafar birinchi oʻrinbosari boʻladi.

Kasbga oʻqitish markazi davlat muassasasi shaklidagi tashkilot hisoblanadi.

36. Malakani baholash markaziga (keyingi oʻrinlarda MBM deb ataladi) Vazir tomonidan lavozimga tayinlanadigan va lavozimidan ozod etiladigan direktor rahbarlik qiladi.

MBM masʼuliyati cheklangan jamiyat shaklidagi tashkilot hisoblanadi. Vazirlik MBM taʼsischisi hisoblanadi.

MBM direktorining Vazir tomonidan lavozimga tayinlanadigan va lavozimidan ozod etiladigan ikki nafar oʻrinbosari, shu jumladan bir nafar birinchi oʻrinbosari boʻladi.

37. “Mehnat.uz” axborot-kompyuter markazi” MCHJ (keyingi oʻrinlarda Axborot-kompyuter markazi deb ataladi). Axborot-kompyuter markaziga Vazir bilan kelishilgan holda Ilmiy markaz direktori tomonidan lavozimga tayinlanadigan va lavozimidan ozod etiladigan direktor rahbarlik qiladi.

Axborot-kompyuter markazi direktorining Ilmiy markaz direktori tomonidan Vazir bilan kelishilgan holda lavozimga tayinlanadigan va lavozimidan ozod etiladigan ikki nafar oʻrinbosari, shu jumladan bir nafar birinchi oʻrinbosari boʻladi.

Axborot-kompyuter markazi masʼuliyati cheklangan jamiyat shaklidagi tashkilot hisoblanadi (taʼsischisi — Ilmiy markaz).

38. Toshkent va Fargʻona shaharlarida joylashgan nogironligi boʻlgan shaxslar uchun respublika ixtisoslashtirilgan kasb-hunar kollejlari (keyingi oʻrinlarda ixtisoslashtirilgan kollejlar deb ataladi) davlat muassasalari hisoblanadi.

Ixtisoslashtirilgan kollejlarga Vazir tomonidan lavozimga tayinlanadigan va lavozimidan ozod etiladigan direktor rahbarlik qiladi.

Ixtisoslashtirilgan kollej direktorining Vazir tomonidan lavozimga tayinlanadigan va lavozimidan ozod etiladigan uch nafar oʻrinbosari, shu jumladan bir nafar birinchi oʻrinbosari boʻladi.

39. Kasb-hunar kollejlari davlat muassasalari hisoblanadi.

Kasb-hunar kollejlariga Vazir tomonidan lavozimga tayinlanadigan va lavozimidan ozod etiladigan kollej direktori rahbarlik qiladi.

Kasb-hunar kollej direktorining Vazir tomonidan lavozimga tayinlanadigan va lavozimidan ozod etiladigan uch nafar oʻrinbosari, shu jumladan bir nafar birinchi oʻrinbosari boʻladi.

40. “Ishga marhamat” band boʻlmagan aholiga xizmat koʻrsatuvchi “Monomarkaz” MCHJ (keyingi oʻrinlarda “Ishga marhamat” monomarkazi deb ataladi) masʼuliyati cheklangan jamiyat shaklidagi tashkilot hisoblanadi.

Vazirlik “Ishga marhamat” monomarkazining taʼsischisi hisoblanadi.

“Ishga marhamat” monomarkaziga Vazir tomonidan lavozimga tayinlanadigan va lavozimidan ozod etiladigan Monomarkaz direktori rahbarlik qiladi.

“Ishga marhamat” monomarkazi direktorining Vazir tomonidan lavozimga tayinlanadigan va lavozimidan ozod etiladigan uch nafar oʻrinbosari, shu jumladan bir nafar birinchi oʻrinbosari boʻladi.

“Ishga marhamat” monomarkazi faoliyati Tashqi mehnat migratsiyasi agentligi tomonidan Vazirlik huzuridagi Xorijda mehnat faoliyatini amalga oshiruvchi shaxslarni qoʻllab-quvvatlash hamda ularning huquq va manfaatlarini himoya qilish jamgʻarmasi mablagʻlari hisobiga moliyalashtiriladi.

41. Oʻzbekiston-Malayziya kasb-hunar taʼlimi markazi (keyingi oʻrinlarda Oʻzbekiston-Malayziya markazi deb ataladi) masʼuliyati cheklangan jamiyat shaklidagi tashkilot hisoblanadi. Vazirlik va xorijiy hamkor Oʻzbekiston-Malayziya markazining taʼsischisi hisoblanadi.

Oʻzbekiston-Malayziya markaziga xorijiy hamkor bilan kelishilgan holda Vazir tomonidan lavozimga tayinlanadigan va lavozimidan ozod etiladigan direktor rahbarlik qiladi.

Oʻzbekiston-Malayziya markazi direktorining Vazir tomonidan lavozimga tayinlanadigan va lavozimidan ozod etiladigan ikki nafar oʻrinbosari, shu jumladan bir nafar birinchi oʻrinbosari boʻladi.

42. Oliy yuridik maʼlumotga ega Davlat mehnat Inspeksiyasining Davlat mehnat inspektorlari davlat organlari va tashkilotlari yuridik xizmati xodimlariga tenglashtiriladi, ularga adliya organlari xodimlariga beriladigan mansab darajalari tatbiq etiladi.

43. Vazirlikda Vazir (hayʼat raisi), Bandlik va mehnat munosabatlari vazirining oʻrinbosarlari, shuningdek, Vazirlik faoliyatining asosiy yoʻnalishlarini muvofiqlashtiruvchi tarkibiy boʻlinmalar rahbarlaridan iborat hayʼat tuziladi.

Hayʼatning soni va shaxsiy tarkibi Vazir taqdimnomasiga binoan Oʻzbekiston Respublikasi Vazirlar Mahkamasi tomonidan tasdiqlanadi.

Hayʼatga quyidagi vazifalar yuklanadi:

bandlik va mehnat munosabatlari, mehnatni muhofaza qilish sohasida davlat siyosatini amalga oshirishni yanada takomillashtirish boʻyicha aniq chora-tadbirlarni ishlab chiqqan holda Vazirlik faoliyatining qonunchilikda belgilangan asosiy yoʻnalishlarini tanqidiy koʻrib chiqish;

qonunchilik hujjatlarida, Oʻzbekiston Respublikasi Prezidentining qarorlarida va Hukumat qarorlarida belgilangan vazifalarning oʻz vaqtida va sifatli amalga oshirilishini taʼminlash boʻyicha Vazirlik va uning tuzilmaviy boʻlinmalari rahbarlarining shaxsiy masʼuliyatini oshirishga doir aniq choralar koʻrgan holda, quyi tashkilotlar rahbarlarining hisobotlarini tizimli ravishda eshitib borishni tashkil qilish;

aholini ish bilan taʼminlash hududiy va tarmoq dasturlari, shuningdek 2017 — 2021-yillarda Oʻzbekistonni rivojlantirishning beshta ustuvor yoʻnalishi boʻyicha Harakatlar strategiyasida nazarda tutilgan tadbirlarni amalga oshirishga oid Davlat dasturini, jumladan mehnat bozorini tartibga solish va ijtimoiy sohani rivojlantirishga doir tadbirlarning bajarilishi samaradorligini har chorakda va tizimli ravishda koʻrib chiqish;

ijro intizomi darajasini oshirish, jismoniy va yuridik shaxslar murojaatlarini, shu jumladan Oʻzbekiston Respublikasi Prezidentining virtual qabulxonasi va xalq qabulxonalaridan tushayotgan murojaatlarni oʻz vaqtida hamda sifatli koʻrib chiqish asosida Oʻzbekiston Respublikasi Prezidenti va Oʻzbekiston Respublikasi Vazirlar Mahkamasi topshiriqlari bajarilishi yuzasidan samarali nazoratni taʼminlash, bandlik va aholini ijtimoiy himoya qilish sohasidagi eng zarur muammolarni hal qilish boʻyicha aniq chora-tadbirlarni ishlab chiqish;

Hayʼatning kengaytirilgan koʻchma majlislari oʻtkazilishini tashkil etish, bandlik, mehnat bozori, mehnat munosabatlari va aholini ijtimoiy himoya qilish boʻyicha dolzarb masalalarning joylarda muhokama etilishini taʼminlash, shuningdek yuzaga kelgan muammolarni bartaraf etish boʻyicha tegishli qarorlar ishlab chiqish va qabul qilish;

Vazirlik nomenklaturasiga kiradigan lavozimlarga kadrlarni tanlash, joylashtirish, tayyorlash va qayta tayyorlash masalalarini koʻrib chiqish.

Hayʼat shuningdek Vazirlik vakolatiga kiradigan boshqa masalalarni ham koʻrib chiqishga haqli.

Hayʼat majlislariga Vazirlik vakolatiga kiradigan masalalar boʻyicha boshqa vazirliklar, davlat qoʻmitalari, idoralari, mahalliy davlat hokimiyati organlari, boshqa tashkilotlar rahbarlari taklif etilishi mumkin.

Hayʼat, agar uning majlisida hayʼat tarkibining yarmidan koʻpi qatnashgan taqdirda vakolatli hisoblanadi. Koʻrib chiqilayotgan masalalar yuzasidan qarorlar oddiy koʻpchilik ovoz bilan qabul qilinadi.

Hayʼat qarorlari Vazirning buyruqlari bilan amalga oshiriladi. Vazir va hayʼat aʼzolari oʻrtasida kelishmovchiliklar paydo boʻlgan taqdirda Vazir paydo boʻlgan kelishmovchiliklar toʻgʻrisida Oʻzbekiston Respublikasi Vazirlar Mahkamasiga axborot bergan holda mustaqil ravishda qaror qabul qiladi. Hayʼat aʼzolari ham oʻz fikr-mulohazalarini Oʻzbekiston Respublikasi Vazirlar Mahkamasiga xabar qilishlari mumkin.

Hayʼat faoliyati tartibi uning hayʼat tasdiqlaydigan reglamentida belgilanadi.

44. Vazirlik tizimi xodimlarini moddiy ragʻbatlantirish va mehnatiga haq toʻlash budjetdan ajratiladigan mablagʻlar doirasida Oʻzbekiston Respublikasi Davlat budjeti, Oʻzbekiston Respublikasi Bandlikka koʻmaklashish davlat jamgʻarmasi, Mehnat organlari xodimlari mehnatini ragʻbatlantirish va moddiy-texnik bazasini mustahkamlash jamgʻarmasi mablagʻlari hisobidan hamda qonunchilikda taqiqlanmagan boshqa manbalar hisobidan amalga oshiriladi.

Vazir budjetdan tashqari mablagʻlar hisobidan oʻz faoliyatida samaradorlikning eng yuqori koʻrsatkichlarini taʼminlayotgan mehnat organlari xodimlariga ularning lavozim maoshining ikki baravari miqdorida shaxsiy ustamalar belgilashga haqli. Shaxsiy ustamalar miqdorini belgilashda mehnatga haq toʻlashga oid Yagona tarif setkasi boʻyicha tarif koeffitsiyentlari bilan bir qatorda budjet muassasalari va tashkilotlari xodimlarini moddiy ragʻbatlantirish maxsus jamgʻarmasidan shaxsiy ustamalar, shuningdek budjetdan moliyalashtiriladigan davlat hokimiyati va boshqaruvi organlari davlat xizmatchilari lavozim maoshlariga 40 foizlik qoʻshimcha (mehnatni ragʻbatlantirish koeffitsiyenti) lavozim maoshi hisob-kitobiga kiritiladi.

Vazir Mehnat organlari xodimlari mehnatini ragʻbatlantirish va moddiy-texnik bazasini mustahkamlash jamgʻarmasi mablagʻlari hisobiga hududiy va idora boʻysunuvidagi tashkilotlarga, shu jumladan Vazirlik huzuridagi budjetdan tashqari jamgʻarmalarga ish haqiga ustamalarni moliyalashtirish uchun mablagʻlar ajratishga haqli.

45. Vazirlik tizimiga kiradigan mehnat organlari va tashkilotlar rahbarlari hamda xodimlari qonun hujjatlariga muvofiq moddiy ragʻbatlantiriladi.

Oʻz funksional majburiyatlarini samarali bajarayotgan, Vazirlik oldiga qoʻyilgan vazifalarga erishishga salmoqli hissa qoʻshgan Vazirlikning yuksak professional, tashabbuskor xodimlariga uy-joy va avtotransport vositalarini xarid qilish uchun kreditlarni rasmiylashtirishda dastlabki badalni toʻlash uchun Mehnat organlari xodimlari mehnatini ragʻbatlantirish va moddiy-texnik bazasini mustahkamlash jamgʻarmasi mablagʻlari hisobidan foizsiz qarzlar taqdim etilishi mumkin.

Foizsiz qarzlar Vazirlik va xodim oʻrtasidagi qarz bitimi tuzish va qarzni uzish jadvalini tasdiqlash orqali Vazirlik hayʼati qarori asosida beriladi. Uy-joy xarid qilish uchun kreditlar boʻyicha dastlabki badalni toʻlashga qarz 10 yilgacha, avtotransport vositalarini xarid qilish uchun kreditlar boʻyicha dastlabki badalni toʻlashga qarz 5 yilgacha beriladi.

Taqdim etiladigan qarz summasi kredit boʻyicha xarid qilinadigan uy-joy yoki avtotransport vositasi qiymatining 25 foizidan oshmasligi kerak. Qarz uchinchi shaxsning kafilligi asosida taqdim etiladi, kafillik shartnomasini notarial tasdiqlash talab etilmaydi. Tasdiqlangan jadvalga muvofiq qarz toʻlanmasa, toʻlov summasi belgilangan tartibda qarz bitimi shartlariga muvofiq undirib olinadi.

Mehnat organlarida xodimning mehnat faoliyatini ragʻbatlantirish tugatilsa, toʻlanmagan qarz qoldigʻi bir oy muddatda Vazirlikka toʻliq qaytarilishi kerak.

46. tuman (shahar) aholi bandligiga koʻmaklashish markazlari ishga joylashtirish boʻyicha inspektorlarining (ishlab chiqarish xodimining) shtatlari soni Vazirlik hayʼati tomonidan ishga joylashtirish boʻyicha 1 nafar inspektorga 15,2 ming nafar mehnat resursini hisoblab chiqqan holda belgilanadi. Inspektorlar tuman (shahar) aholi bandligiga koʻmaklashish markazlari tegishli sektorlarining xodimlari hisoblanadi.

47. Mehnat bozori va mehnat migratsiyasini tahlil qilish yigʻma axborot-tahlil departamenti boshligʻining hamda Vazirlik markaziy apparati Davlat mehnat inspeksiyasi boshligʻining mehnatiga haq toʻlash boʻyicha razryadi vazir oʻrinbosari razryadidan 5 foizga kamaytirilgan miqdorda belgilanadi.

48. Vazirlik xodimlarining ish haqi qonun hujjatlarida nazarda tutilgan lavozim maoshi, mukofotlar, qoʻshimcha haqlar, ustamalar, ragʻbatlantiruvchi toʻlovlardan iborat boʻladi.

49. Vazirlik markaziy apparati va hududiy organlari xodimlariga Oʻzbekiston Respublikasi Davlat budjeti hisobidan davlat boshqaruvi organlari va mehnat organlari tizimida koʻp yillik mehnati uchun quyidagi hajmlarda (ragʻbatlantirish koeffitsiyentini hisobga olgan holda lavozim maoshiga belgilangan koeffitsiyentlarda) har oyda mukofot puli toʻlanadi: 3 yildan 5 yilgacha — 0,1; 5 yildan 10 yilgacha — 0,2; 10 yildan 15 yilgacha — 0,3; 15 yildan yuqori — 0,4.

1. Ushbu Nizom Oʻzbekiston Respublikasi Bandlikka koʻmaklashish davlat jamgʻarmasi mablagʻlarini shakllantirish va ulardan foydalanish tartibini belgilaydi.

2. Oʻzbekiston Respublikasi Bandlikka koʻmaklashish davlat jamgʻarmasi (keyingi oʻrinlarda Bandlik jamgʻarmasi deb ataladi) mehnat, bandlik va mehnatni muhofaza qilish sohasidagi davlat siyosatini amalga oshirishga doir tadbirlarni moliyalashtirishni samarali tashkil etishni taʼminlash, shuningdek, Oʻzbekiston Respublikasi Bandlik va mehnat munosabatlari vazirligining, uning hududiy tashkilotlarining va idora boʻysunuvidagi tashkilotlari faoliyatining ustuvor yoʻnalishlarini va loyihalarini rivojlantirish maqsadida tashkil etilgan.

3. Bandlik jamgʻarmasining asosiy yoʻnalishlari quyidagilardan iborat:

mehnat bozorining barqaror va mutanosib ravishda rivojlanishini taʼminlash, aholi bandligi darajasini oshirish va mehnat resurslaridan oqilona foydalanish boʻyicha aniq maqsadli kompleks chora-tadbirlar amalga oshirilishini moliyalashtirish;

ishsizlarni, kasb-hunar kollejlari, akademik litseylar, oliy taʼlim muassasalari bitiruvchilarini, shuningdek, ish izlashda qiyinchiliklarga duch kelayotgan va mehnat bozorida teng shartlar asosida raqobatlasha olmaydigan shaxslarni ishga joylashtirish boʻyicha qonun hujjatlarida belgilangan kafolatlarni amalga oshirishni moliyalashtirishda ishtirok etish;

ishsizlarni kasbga tayyorlash, qayta tayyorlash va ularni ijtimoiy himoya qilishga hamda mehnat organlarining moddiy-texnik bazasini mustahkamlashga doir sifatli xizmatlarning ishsizlar va band boʻlmagan aholiga, birinchi navbatda, yoshlarga, xotin-qizlarga va nogironligi boʻlgan shaxslarga koʻrsatilishini tashkil etishga sarflanadigan xarajatlarni moliyalashtirish.

4. Bandlik jamgʻarmasi yuridik shaxs tashkil etmasdan respublika va mahalliy darajada tuziladigan davlat maqsadli jamgʻarmasi hisoblanadi.

Bandlik jamgʻarmasi mablagʻlari uning mustaqil balansida aks ettiriladi.

5. Respublika va mahalliy darajada tashkil etilgan Bandlik jamgʻarmasi mablagʻlari Oʻzbekiston Respublikasi Moliya vazirligi Gʻaznachiligi, Qoraqalpogʻiston Respublikasi, viloyatlar va Toshkent shahar Gʻaznachiligi boshqarmalari tomonidan ochiladigan shaxsiy gʻazna hisobvaraqlarida (keyingi oʻrinlarda Bandlik jamgʻarmasi shaxsiy gʻazna hisobvaraqlari deb ataladi) jamlanadi.

6. Quyidagilar Bandlik jamgʻarmasi mablagʻlarini shakllantirish manbalari hisoblanadi:

yagona ijtimoiy toʻlovdan qonun hujjatlarida belgilangan tartibda amalga oshiriladigan ajratmalar;

Oʻzbekiston Respublikasi respublika budjetidan har yili ajratiladigan mablagʻlar;

Oʻzbekiston Respublikasi Bandlik va mehnat munosabatlari vazirligining hududiy boʻlinmalariga biriktirilgan binolar, inshootlar va xonalarni realizatsiya qilishdan tushadigan, Oʻzbekiston Respublikasi Xususiylashtirilgan korxonalarga koʻmaklashish va raqobatni rivojlantirish davlat qoʻmitasi tomonidan toʻliq hajmda Bandlik jamgʻarmasiga yoʻnaltiriladigan mablagʻlar, bundan baholash va realizatsiya qilishga sarflanadigan amaldagi xarajatlar mustasno;

fuqarolarni xorijda ishga joylashtirish sohasida faoliyat koʻrsatuvchi nodavlat tashkilotlar tomonidan Bandlik jamgʻarmasiga har bir yuborilgan fuqaro uchun Oʻzbekiston Respublikasi Vazirlar Mahkamasi tomonidan belgilanadigan stavka boʻyicha belgilangan summa shaklida ajratiladigan ajratmalar;

barcha soliqlar va boshqa majburiy toʻlovlar Oʻzbekiston Respublikasi Davlat budjetiga hamda davlat maqsadli jamgʻarmalariga taʼsischi tomonidan belgilanadigan miqdorda toʻlangandan keyin Oʻzbekiston Respublikasi Bandlik va mehnat munosabatlari vazirligi boʻysunuvidagi davlat unitar korxonalarida qoladigan foydaning bir qismi;

qonun hujjatlarida belgilangan tartibda mehnat daftarchalari blankalarini realizatsiya qilishdan va oʻzini oʻzi band qilgan fuqarolarga vaqtinchalik mehnat guvohnomalari berishdan tushgan daromadlar;

Bandlik jamgʻarmasining boʻsh mablagʻlarini tijorat banklariga va boshqa moliyaviy vositalarga joylashtirishdan tushgan daromadlar;

jismoniy va yuridik shaxslarning xayriya mablagʻlari;

qonun hujjatlarida taqiqlanmagan boshqa manbalar.

Bandlik jamgʻarmasi mablagʻlari soliq solinadigan obyekt hisoblanmaydi.

7. Oʻzbekiston Respublikasi Bandlik va mehnat munosabatlari vazirligi, Qoraqalpogʻiston Respublikasi Bandlik va mehnat munosabatlari vazirligi, viloyatlar va Toshkent shahar bandlik bosh boshqarmalari tegishli ravishda, Bandlik jamgʻarmasi mablagʻlarini tasarruf etuvchilar hisoblanadi.

8. Bandlik jamgʻarmasining mablagʻlaridan quyidagi maqsadlar uchun foydalaniladi:

tuman (shahar) aholi bandligiga koʻmaklashish markazlarida (keyingi oʻrinlarda bandlikka koʻmaklashish markazi deb ataladi) ish qidirayotgan va ishsiz maqomiga ega shaxs sifatida roʻyxatdan oʻtgan shaxslarni kasbga tayyorlash, qayta tayyorlash va ularning malakasini oshirishga doir ishlarni moliyalashtirish;

bandlikka koʻmaklashish markazlarining taklifiga binoan ishlash uchun boshqa joyga ixtiyoriy ravishda koʻchib ketishi munosabati bilan ishsizlik boʻyicha nafaqalar, ishsizlarga kompensatsiyalar, moddiy yordam, shuningdek, kasbga tayyorlash, qayta tayyorlash va malakasini oshirish vaqtida fuqarolarga qonun hujjatlariga muvofiq bandlikka koʻmaklashish markazi tomonidan toʻlanadigan stipendiyalarni toʻlash;

ishsizlarga muddatidan oldin pensiyalar tayinlanishi munosabati bilan Oʻzbekiston Respublikasi Moliya vazirligi huzuridagi budjetdan tashqari Pensiya jamgʻarmasining xarajatlarini qoplash;

ishga joylashtirish, oʻqitish va malaka oshirish, malakani baholash boʻyicha xizmatlarga boʻlgan davlat buyurtmasini moliyalashtirish, keyinchalik tegishli ravishda xususiy bandlik agentliklariga, ishsizlarni va band boʻlmagan aholini oʻqitish markazlariga hamda malaka oshirish markazlariga haq toʻlash;

bandlikka koʻmaklashish markazlari, vaqtinchalik bir martalik ish bilan taʼminlash markazlari, ishsiz va band boʻlmagan aholini kasb-hunarga oʻqitish mintaqaviy markazlar, ishsizlarni kasbga tayyorlash, qayta tayyorlash va ularning malakasini oshirish oʻquv markazlarining ayrim boʻlinmalarini qonun hujjatlariga muvofiq moddiy-texnik taʼminlash va saqlab turish, shuningdek, mehnat organlarini joylashtirish uchun binolar, xonalar va inshootlarni xarid qilish, qurish, taʼmirlash va kapital taʼmirlashni moliyalashtirish;

nogironligi boʻlgan shaxslar va boshqa ijtimoiy zaif fuqarolar toifalari mehnatidan foydalanish uchun ixtisoslashtirilgan ish oʻrinlarini yaratishga doir tadbirlarni qisman moliyalashtirish;

axborot-maʼlumot va reklama-noshirlik ishlarini amalga oshirish;

bandlik, mehnatni muhofaza qilish, mehnat munosabatlarini tartibga solish, normalash va mehnatga haq toʻlash masalalari boʻyicha normativ-metodik va instruktiv materiallar ishlab chiqilishini moliyalashtirish;

respublika va hududiy darajalarda ijtimoiy oʻrganishlar oʻtkazish, aholining ayrim guruhlari oʻrtasida bandlik, mehnatni muhofaza qilish va mehnat migratsiyasi masalalari boʻyicha soʻrovnoma oʻtkazish;

band boʻlmagan aholiga ishga joylashtirish, shu jumladan maslahat berishda va kasbga yoʻnaltiradigan ishlarni, transport va boshqa xizmatlarni tashkil etishda, shu jumladan yoʻlda ovqatlanish, yordamini koʻrsatish bilan bogʻliq xarajatlarni qoplash;

kovorking-markazlarni tashkil etishni va saqlab turishni moliyalashtirish;

mehnat bozoridagi vaziyat keskin boʻlgan tumanlar va shaharlarda yashovchilar uchun bandlik va ish oʻrinlarini yaratish boʻyicha aniq maqsadga qaratilgan hududiy dasturlarni ishlab chiqishni, shu jumladan ayrim hududlarni ijtimoiy-iqtisodiy rivojlantirish konsepsiyalarini tayyorlashni, muhandislik-kommunikatsiya tarmoqlarini loyihalashtirishni va xizmatlar sohasi, sanoat va qishloq xoʻjaligi sohalarida obyektlar yaratish uchun arxitektura-rejalashtirish topshirigʻini ishlab chiqishni moliyalashtirish;

maslahatlashuvlar, seminarlar, davra suhbatlari oʻtkazish, maqolalar, risolalar, qoʻllanmalar va boshqa axborot materiallari tayyorlash, shu jumladan video va audioroliklar va filmlar, ilmiy-amaliy tadqiqotlar hamda bandlik va mehnatni muhofaza qilish masalalariga taalluqli boshqa tadbirlarni tashkil etish boʻyicha xizmatlarga haq toʻlash;

ishga joylashtirish, aholi bandligini taʼminlash va mehnatni muhofaza qilish, vakansiyalar va band boʻlmagan aholini hisobga olish sohasida axborot-kompyuter tizimlari va texnologiyalarini yaratish, rivojlantirish va texnik qoʻllab-quvvatlash, shu jumladan dasturiy taʼminot ishlab chiqish va texnik vositalarni xarid qilish;

ishsiz fuqarolarni va band boʻlmagan aholini kasbga oʻqitish hamda malakani baholash markazlarini tashkil etish, saqlash, qayta ixtisoslashtirish;

mehnat organlarining, shu jumladan Oʻzbekiston Respublikasi Bandlik va mehnat munosabatlari vazirligi markaziy apparatining moddiy-texnik bazasini rivojlantirishga qaratilgan chora-tadbirlarni moliyalashtirish;

Oʻzbekiston Respublikasi Bandlik va mehnat munosabatlari vazirligi, uning idora boʻysunuvidagi tashkilotlari va hududiy boʻlinmalari balansida turgan binolar va inshootlarni saqlab turish, ekspluatatsiya qilish, qurish va taʼmirlash, ularni zarur inventar, shu jumladan jihozlar, aloqa, kompyuter va boshqa vositalar bilan taʼminlash boʻyicha xarajatlarni moliyalashtirish;

Mehnat organlari xodimlari malakasini oshirish respublika kurslarida, shu jumladan Toshkent shahridagi Sergeli tumani aholi bandligiga koʻmaklashish markazining oʻquv-amaliy bazasida, shuningdek, chet davlatlarning ilmiy-tadqiqot, taʼlim va boshqa muassasalarida Oʻzbekiston Respublikasi Bandlik va mehnat munosabatlari vazirligi xodimlarini oʻqitish, ularning malakasini oshirish va amaliyot oʻtkazishini tashkil etish;

Oʻzbekiston Respublikasi Bandlik va mehnat munosabatlari vazirligi, uning idora boʻysunuvidagi tashkilotlari va hududiy boʻlinmalar faoliyatiga axborot-kommunikatsiya texnologiyalarini joriy etish, shu jumladan dasturiy taʼminot ishlab chiqish;

Oʻzbekiston Respublikasi Bandlik va mehnat munosabatlari vazirligi xodimlarining ham mamlakat ichiga, ham tashqarisiga safar qilishi bilan bogʻliq xarajatlarni toʻlash;

aholi bandligi sohasida xalqaro hamkorlikni moliyalashtirish;

xorijga ishga yuborilgan Oʻzbekiston Respublikasi fuqarolarining ishga joylashtirilishini tashkil etish va ijtimoiy himoya qilinishini taʼminlash masalalari boʻyicha xalqaro loyihalar va shartnomalarni amalga oshirish bilan bogʻliq xarajatlarni moliyalashtirish;

Vazirlikka yuklangan vazifalar va funksiyalar bilan bogʻliq masalalarga bagʻishlangan xalqaro va milliy konferensiyalar, forumlar, seminarlar va treninglar oʻtkazish, xalqaro va xorijiy tashkilotlar, xorijiy hukumatlar, davlat organlari va hukumatga qarashli boʻlmagan tashkilotlar tomonidan tashkil etiladigan tadbirlarda ishtirok etish uchun mehnat organlari xodimlarini xorijga yuborish, shuningdek, Vazirlikka yuklangan vazifalar va funksiyalar bilan bogʻliq masalalar boʻyicha loyihalarni amalga oshirish uchun xorijiy va milliy ekspertlarni jalb qilish bilan bogʻliq xarajatlarni moliyalashtirish;

xodimlar mehnatini ragʻbatlantirish va mehnat organlarining moddiy-texnik bazasini mustahkamlash jamgʻarmasini moliyalashtirish, shu maqsadlarga Bandlik jamgʻarmasining shaxsiy gʻazna hisobvaraqlariga tushadigan mablagʻlarning 10 foizini yoʻnaltirish;

qoʻllangan maʼmuriy huquqbuzarliklar boʻyicha undirilgan jarimalar summasining 10 foizigacha miqdorda Davlat mehnat inspeksiyasining mehnat organlari rahbarlariga va xodimlariga toʻlangan mukofotlar oʻrnini Mehnat organlari xodimlari mehnatini ragʻbatlantirish va moddiy-texnik bazasini mustahkamlash jamgʻarmasiga qoplash;

yengil issiqxonalar oʻrnatish uchun subsidiyalar taqdim etish, “Tomorqa xizmati” MCHJ, bandlikka koʻmaklashish markazlari va tomorqa yer egalari oʻrtasida tuzilgan uch tomonlama shartnomalar asosida eng kam oylik ish haqining 3 baravaridan 10 baravarigacha miqdorda urugʻliklar, koʻchatlar va sugʻorish vositalari xarid qilish;

tijorat banklarida ochiladigan kredit liniyalari boʻyicha resurslar joylashtirish, keyinchalik banklar tomonidan respublika tumanlari va shaharlarida yangi ish oʻrinlari tashkil etishni nazarda tutuvchi kichik va mini-loyihalarni amalga oshirish uchun mikrokreditlar ajratish;

bandlikka koʻmaklashish markazlarida roʻyxatga olingan, tadbirkorlik faoliyatini boshlashni xohlayotgan ishsiz shaxslarga yakka tartibdagi tadbirkor sifatida roʻyxatdan oʻtish, kichik korxonalar va mikrofirmalarni davlat roʻyxatidan oʻtkazish uchun sarflanadigan xarajatlarni toʻlashda bir martalik subsidiyalar berish;

aholining ijtimoiy zaif qatlamiga mansub shaxslarni, shu jumladan nogironligi boʻlgan shaxslarni zaxiralangan (kvotalangan) eng kam sondan ortiq miqdorda ishga qabul qilgan tashkilotlarga bir martalik subsidiyalar berish;

bandlikka koʻmaklashish markazlarining yoʻllanmasi boʻyicha ishga qabul qilingan aholining ijtimoiy zaif qatlamiga mansub xodimlarni, shu jumladan nogironligi boʻlgan shaxslarni kasbga oʻqitish va ularning malakasini oshirishga sarflanadigan xarajatlarni moliyalashtirish uchun ish beruvchilarga bir martalik subsidiyalar berish;

bandlikka koʻmaklashish markazlarida roʻyxatga olingan ishsiz shaxslarni, ayniqsa kam taʼminlangan oilalarga mansub xotin-qizlarni kasbga oʻqitishga sarflanadigan xarajatlarni moliyalashtirish uchun kasb-hunar taʼlimi muassasalariga grantlar ajratish;

kasbga oʻqitish markazlarida, kollejlarda va oliy taʼlim muassasalarida kasbga oʻqitishga, fermer va dehqon xoʻjaliklari rahbarlari va xodimlarini hamda tomorqa yer egalarini agrotexnologiyalar, bogʻdorchilik, sabzavotchilik, chorvachilik, parrandachilik, baliqchilik va asalarichilik sohasiga qayta tayyorlash va ularning malakasini oshirish uchun grantlar ajratish;

oʻzini oʻzi band qilgan fuqarolar uchun vaqtinchalik mehnat guvohnomasini olgan fuqarolarga ragʻbatlantiruvchi imtiyozlar berish;

Oʻzbekiston Respublikasi Bandlik va mehnat munosabatlari vazirligi faoliyatini takomillashtirishga qaratilgan boshqa tadbirlar.

9. Yuklangan vazifalar va funksiyalarni amalga oshirish uchun Oʻzbekiston Respublikasi Bandlik va mehnat munosabatlari vazirligi, Qoraqalpogʻiston Respublikasi Bandlik va mehnat munosabatlari vazirligi, viloyatlar va Toshkent shahar bandlik bosh boshqarmalari:

Bandlik jamgʻarmasining shaxsiy gʻazna hisobvaraqlarida yagona ijtimoiy toʻlovdan tushgan ajratmalar boʻyicha mablagʻlarning jamlanishini;

ishsizlik boʻyicha nafaqalar, ishsizlarga kompensatsiyalar, stipendiyalar, moddiy yordam va qonun hujjatlarida nazarda tutilgan boshqa toʻlovlarning oʻz vaqtida tayinlanishi, moliyalashtirilishi va toʻlanishini;

Bandlik jamgʻarmasining moliyaviy holati muntazam tahlil qilinishi va prognozlashtirilishini, shuningdek, uning moliyaviy barqarorligini qoʻllab-quvvatlash uchun ogohlantirish chora-tadbirlari ishlab chiqilishini;

yagona ijtimoiy toʻlovdan ajratmalar hajmlarini belgilash toʻgʻrisida takliflar tayyorlanishini;

boʻlgʻusi davrga moʻljallangan budjet soʻrovi ishlab chiqilishini va Oʻzbekiston Respublikasi Moliya vazirligiga taqdim etilishini;

Bandlik jamgʻarmasi samarali faoliyat koʻrsatishi uchun zarur normativ-huquqiy hujjatlarning oʻz vakolatlari doirasida ishlab chiqilishini;

Bandlik jamgʻarmasining keyingi yilga moʻljallangan daromad manbalari va mablagʻlaridan foydalanish yoʻnalishlari boʻyicha prognoz loyihasi ishlab chiqilishini hamda Oʻzbekiston Respublikasi Moliya vazirligiga taqdim etilishini;

Bandlik jamgʻarmasi budjetini ijro etish boʻyicha hisobotlar, shuningdek, bir yilda bir marta Bandlik jamgʻarmasi daromadlari va mablagʻlaridan foydalanish boʻyicha mustaqil auditor tekshiruvi natijalari tayyorlanishini hamda Oʻzbekiston Respublikasi Moliya vazirligi va Vazirlar Mahkamasiga taqdim etilishini;

Bandlik jamgʻarmasi toʻlov subyektlari va moliyalashtirish obyektlari boʻyicha elektron maʼlumotlar bazasi toʻliq hisobga olinishini va yuritilishini taʼminlaydi.

Oʻzbekiston Respublikasi Bandlik va mehnat munosabatlari vazirligi Bandlik jamgʻarmasi vakolatiga kiradigan masalalar yuzasidan xalqaro tashkilotlar va chet davlatlarning vakolatli organlari bilan belgilangan tartibda hamkorlik qiladi.

10. Yagona ijtimoiy toʻlovdan tushgan ajratmalar va boshqa manbalar hisobiga shakllanadigan Bandlik jamgʻarmasi mablagʻlarining yetmish foizi Qoraqalpogʻiston Respublikasi Bandlik va mehnat munosabatlari vazirligi, viloyatlar va Toshkent shahar bandlik bosh boshqarmalari ixtiyorida qoladi, ular keyinchalik bandlikka koʻmaklashish markazlari oʻrtasida taqsimlanadi, oʻttiz foizi esa Qoraqalpogʻiston Respublikasi Bandlik va mehnat munosabatlari vazirligi, tegishli hududiy bandlik bosh boshqarmalari toʻlov hujjati bilan oʻtkazish orqali respublika darajasida jamlanadi.

11. Hududiy darajada tashkil etilgan Bandlik jamgʻarmasining yetishmayotgan mablagʻlari respublika Bandlik jamgʻarmasi mablagʻlari hisobidan qoplanadi.

Zarurat boʻlsa, hisobot davri yakunlari boʻyicha mahalliy darajada tashkil etilgan Bandlik jamgʻarmasining shaxsiy gʻazna hisobvaraqlaridagi mablagʻlar qoldigʻi Oʻzbekiston Respublikasi Bandlik va mehnat munosabatlari vazirligi qarori bilan keyinchalik taqsimlash uchun respublika darajasiga yoʻnaltirilishi mumkin.

Bandlik jamgʻarmasining shaxsiy gʻazna hisobvaraqlaridagi boʻsh mablagʻlar yil boshida qonun hujjatlariga muvofiq Oʻzbekiston Respublikasi Davlat budjeti taqchilligini qoplashga yoʻnaltirilishi mumkin emas.

12. Bandlik jamgʻarmasi mablagʻlarini mazkur Nizomda nazarda tutilmagan maqsadlar uchun ishlatishga yoʻl qoʻyilmaydi.

13. Oʻzbekiston Respublikasi Bandlik va mehnat munosabatlari vazirligi Bandlik jamgʻarmasining tushum manbalari boʻyicha keyingi yilga moʻljallangan daromadlari prognozini va mablagʻlaridan foydalanish yoʻnalishlari boʻyicha xarajatlar prognozini (keyingi oʻrinlarda Bandlik jamgʻarmasining budjet loyihasi deb ataladi) har yili qonun hujjatlarida belgilangan tartibda va muddatlarda, biroq joriy yilning birinchi iyulidan kechiktirmay Oʻzbekiston Respublikasi Moliya vazirligiga koʻrib chiqish uchun taqdim etadi. Bandlik jamgʻarmasining budjet loyihasi quyidagilarni hisobga olgan holda ishlab chiqiladi:

avvalgi yil uchun mablagʻlarning amalda tushishi va hududlar kesimida joriy yilning birinchi yarim yilligidagi tushumlar manbalari boʻyicha daromadlarning kutilayotgan ijrosi;

Bandlik jamgʻarmasiga hududlar kesimida toʻlanadigan qonun hujjatlarida belgilangan toʻlovlar boʻyicha hisobot moliya yili oxiridagi tashkilotlarning (ish beruvchilarning) kreditor qarzdorligi;

Bandlik jamgʻarmasining avvalgi yildagi mablagʻlari sarfining yakuniy koʻrsatkichlari va foydalanish yoʻnalishlari va hududlar kesimida, koʻrib chiqilayotgan davrda tasdiqlangan prognozlarni bajarish natijalaridan kelib chiqib, joriy yilning birinchi yarim yilligidagi Bandlik jamgʻarmasi xarajatlar qismining kutilayotgan ijrosi;

avvalgi yilda ish haqi oshishi va xodimlar soni koʻpayishi surʼatlarini inobatga olgan holda hisoblab chiqilgan mehnatga haq toʻlash fondining prognoz parametrlari.

14. Oʻzbekiston Respublikasi Moliya vazirligi Bandlik jamgʻarmasining taqdim etilgan budjet loyihasini koʻrib chiqishda Bandlik jamgʻarmasiga toʻlanadigan yagona ijtimoiy toʻlov ajratmalari stavkasining boʻlgʻusi yilga moʻljallangan prognoz oʻzgarishini va makroiqtisodiy koʻrsatkichlar prognozi taʼsirini hisobga oladi.

15. Bandlik jamgʻarmasining koʻrib chiqilgan va kelishilgan budjet loyihasi keyingi yilga moʻljallangan Oʻzbekiston Respublikasi Davlat budjeti loyihasi bilan birga budjetnoma tarkibida Oʻzbekiston Respublikasi Vazirlar Mahkamasiga kiritiladi.

16. Oʻzbekiston Respublikasi Moliya vazirligi keyingi yilga moʻljallangan Oʻzbekiston Respublikasi Davlat budjeti, davlat maqsadli jamgʻarmalari budjetlarining asosiy parametrlari qonun hujjatlarida belgilangan tartibda tasdiqlangandan keyin oʻn ish kuni ichida Bandlik jamgʻarmasi budjetining asosiy parametrlarini Oʻzbekiston Respublikasi Bandlik va mehnat munosabatlari vazirligiga yetkazadi.

17. Oʻzbekiston Respublikasi Bandlik va mehnat munosabatlari vazirligi Oʻzbekiston Respublikasi Moliya vazirligidan tasdiqlangan Bandlik jamgʻarmasi budjetining asosiy parametrlarini olganidan keyin:

tushumlar manbalari Jamgʻarmaning keyingi yilga moʻljallangan daromadlarining asosiy parametrlarini va mablagʻlardan foydalanish yoʻnalishlari boʻyicha xarajatlarning asosiy parametrlarini bir hafta muddatda tasdiqlaydi, Qoraqalpogʻiston Respublikasi Bandlik va mehnat munosabatlari vazirligi, viloyatlar va Toshkent shahar bandlik bosh boshqarmalari, bandlikka koʻmaklashish markazlari uchun chorakma-chorak taqsimlaydi;

Oʻzbekiston Respublikasi Bandlik va mehnat munosabatlari vazirligi hayʼat majlisida ular ishlari yakunlarining koʻrib chiqilishini taʼminlaydi.

18. Oʻzbekiston Respublikasi Bandlik va mehnat munosabatlari vazirligi, Qoraqalpogʻiston Respublikasi Bandlik va mehnat munosabatlari vazirligi, viloyatlar va Toshkent shahar bandlik bosh boshqarmalari, bandlikka koʻmaklashish markazlari Bandlik jamgʻarmasi budjetining tasdiqlangan koʻrsatkichlarini bajarish uchun Bandlik jamgʻarmasi daromadlari va xarajatlarining tasdiqlangan prognoz koʻrsatkichlari bajarilishini taʼminlaydi.

19. Quyidagilar Bandlik jamgʻarmasining ijro etuvchi organlari hisoblanadi:

respublika darajasida — Oʻzbekiston Respublikasi Bandlik va mehnat munosabatlari vazirligi Bandlikka koʻmaklashish davlat jamgʻarmasi mablagʻlaridan samarali va maqsadli foydalanish boshqarmasi;

hududiy darajada — Bandlik jamgʻarmasi mablagʻlaridan samarali va maqsadli foydalanish boʻyicha shuʼbalar.

20. Ijro etuvchi organ:

Bandlik jamgʻarmasi daromadlari va xarajatlari boʻyicha prognozni va hisobot balanslarini shakllantiradi;

Bandlik jamgʻarmasining daromadlari va xarajatlarini ijro etish boʻyicha hisob va hisobot yuritilishini taʼminlaydi, Bandlik jamgʻarmasi mablagʻlari taqsimlovchi tomonidan tasdiqlandan soʻng, hisobotni tegishli moliya organlariga yuboradi;

Bandlik jamgʻarmasi moliya hisobotining ishonchliligini taʼminlaydi;

Bandlik jamgʻarmasi mablagʻlaridan maqsadli foydalanish auditini tashkil etadi;

Bandlik jamgʻarmasi mablagʻlaridan maqsadli va samarali foydalanish masalalari boʻyicha izohlar beradi.

21. Oʻzbekiston Respublikasi Bandlik va mehnat munosabatlari vazirligi, Qoraqalpogʻiston Respublikasi Bandlik va mehnat munosabatlari vazirligi, viloyatlar va Toshkent shahar bandlik bosh boshqarmalari, bandlikka koʻmaklashish markazlari Bandlik jamgʻarmasi mablagʻlaridan qatʼiyan maqsadli va samarali foydalanilishi uchun javob beradi.

22. Ishsizlik boʻyicha nafaqalar, ishsizlarga kompensatsiyalar,stipendiyalar va moliyaviy yordam hamda qonun hujjatlarida belgilangan boshqa toʻlovlar toʻgʻri toʻlanishi Oʻzbekiston Respublikasi Bandlik va mehnat munosabatlari vazirligi va hududiy mehnat organlari tomonidan nazorat qilinadi.

23. Bandlik jamgʻarmasi mablagʻlaridan foydalanish yuzasidan nazorat Oʻzbekiston Respublikasi Bandlik va mehnat munosabatlari vazirligi hamda Moliya vazirligi tomonidan amalga oshiriladi.

1. Ushbu Nizom Oʻzbekiston Respublikasi Bandlik va mehnat munosabatlari vazirligi Davlat mehnat inspeksiyasining (keyingi oʻrinlarda Inspeksiya deb ataladi) maqomi, asosiy vazifalari, funksiyalari, huquqlari, majburiyatlari va javobgarligini, shuningdek, faoliyatini tashkil etish tartibini belgilaydi.

2. Inspeksiya Oʻzbekiston Respublikasi Bandlik va mehnat munosabatlari vazirligining tarkibiy boʻlinmasi hisoblanadi.

3. Inspeksiya oʻz faoliyatida Oʻzbekiston Respublikasi Konstitutsiyasiga, Oʻzbekiston Respublikasi Oliy Majlisi palatalari qarorlariga, Oʻzbekiston Respublikasi Prezidentining farmonlari, qarorlari va farmoyishlariga, Oʻzbekiston Respublikasi Vazirlar Mahkamasi qarorlari va farmoyishlariga, ushbu Nizomga hamda boshqa qonun hujjatlariga amal qiladi.

4. Inspeksiya oʻz faoliyatini bevosita va oʻz hududiy inspeksiyalari orqali davlat va xoʻjalik boshqaruvi organlari, mahalliy davlat hokimiyati organlari hamda boshqa tashkilotlar bilan hamkorlikda amalga oshiradi.

5. Inspeksiya faoliyati Oʻzbekiston Respublikasi Davlat budjeti, Oʻzbekiston Respublikasi Bandlikka koʻmaklashish davlat jamgʻarmasi, Mehnat organlari xodimlari mehnatini ragʻbatlantirish va moddiy-texnik bazasini mustahkamlash jamgʻarmasi (keyingi oʻrinlarda Mehnatni ragʻbatlantirish jamgʻarmasi deb ataladi) mablagʻlari hisobiga moliyalashtiriladi.

6. Ish beruvchilar oʻz faoliyatini amalga oshirish jarayonida mehnat, aholi bandligi, mehnat muhofazasi, ish beruvchining fuqarolik javobgarligini majburiy sugʻurtalash, nogironligi boʻlgan shaxslarni ijtimoiy himoya qilish, jumladan, ularga ijtimoiy infratuzilma obyektlaridan toʻsqinliksiz foydalanish, shuningdek, barcha turdagi transportlardan, transport kommunikatsiyalaridan, umumiy foydalaniladigan aloqa va axborot vositalaridan foydalanish uchun mehnat shart-sharoitlarini yaratish toʻgʻrisidagi qonun hujjatlari, mehnat huquqi normalariga ega boshqa normativ-huquqiy hujjatlar, mehnatni muhofaza qilish va mehnat xavfsizligi masalalariga doir texnik tartibga solish sohasidagi normativ hujjatlar hamda mehnat standartlari talablariga rioya etish mehnat va mehnatni muhofaza qilish sohasidagi davlat nazoratining predmeti hisoblanadi.

Mehnat, bandlik va mehnatni muhofaza qilish sohasidagi davlat nazorati quyidagilarga nisbatan amalga oshiriladi:

belgilangan tartibda yakka tartibdagi tadbirkorlar sifatida roʻyxatga olingan va yuridik shaxs tashkil etmay tadbirkorlik faoliyatini amalga oshirayotgan, fuqarolar bilan mehnat munosabatlariga kirishgan davlat organlari va muassasalari, yuridik shaxslar, shuningdek, uy xoʻjaligini yuritish boʻyicha shaxsiy xizmat koʻrsatish va yordam berish maqsadida jismoniy shaxslar, fuqarolar bilan mehnat munosabatlariga kirishgan yakka tartibdagi tadbirkorlar hisoblanmaydigan jismoniy shaxslar (keyingi oʻrinlarda ish beruvchilar deb ataladi);

Oʻzbekiston Respublikasi fuqarolari, xorijiy fuqarolar va ish beruvchilar bilan mehnat munosabatlariga kirishgan fuqaroligi boʻlmagan shaxslar (keyingi oʻrinlarda xodimlar deb yuritiladi).

7. Quyidagilar Inspeksiyaning asosiy vazifalari hisoblanadi:

fuqarolarning mehnat huquqlariga rioya etishni va ularni himoya qilishni, shuningdek, xavfsiz shart-sharoitlar va mehnatni muhofaza qilishni taʼminlash sohasidagi qonun hujjatlari talablariga tashkiliy-huquqiy shaklidan qatʼi nazar tashkilotlar tomonidan rioya etilishini davlat tomonidan nazorat qilish;

respublikadagi mehnatni muhofaza qilish holatini, ishlab chiqarishda jarohatlanish va kasb kasalliklariga chalinish sabablarini muntazam tahlil qilish, ularni bartaraf etish yoʻllarini ishlab chiqish;

mehnat toʻgʻrisidagi bitimlar va lokal hujjatlarning, ish beruvchilarning mehnat munosabatlari sohasidagi buyruqlari qonun hujjatlariga mos kelishini tizimli tahlil qilish;

mehnat munosabatlari subyektlarining mehnat, aholi bandligi va mehnatni muhofaza qilish toʻgʻrisidagi qonun hujjatlarida nazarda tutilgan huquqlari monitoringini va himoyasini taʼminlash;

ish oʻrinlarini mehnat sharoitlari yuzasidan attestatsiyadan oʻtkazish sifati boʻyicha davlat nazoratini amalga oshirish;

nogironligi boʻlgan shaxslarni ijtimoiy himoya qilish, jumladan ularga ijtimoiy infratuzilma obyektlaridan toʻsqinliksiz foydalanish, shuningdek, barcha turdagi transportlardan, transport kommunikatsiyalaridan, umumiy foydalaniladigan aloqa va axborot vositalaridan foydalanish uchun mehnat shart-sharoitlarini yaratish toʻgʻrisidagi qonun hujjatlariga rioya etilishi boʻyicha davlat nazoratini amalga oshirish;

majburiy mehnatga yoʻl qoʻymaslik va uni toʻliq bartaraf etish, shu jumladan aybdor mansabdor shaxslarni qonun hujjatlariga muvofiq javobgarlikka tortish orqali bartaraf etish chora-tadbirlarining ishlab chiqilishi va amalga oshirilishini manfaatdor vazirliklar, idoralar va jamoat tashkilotlari bilan birgalikda tashkil etish;

mehnat va mehnatni muhofaza qilish toʻgʻrisidagi qonun hujjatlarini qoʻllash va ularga rioya etish masalalari boʻyicha xodimlar va ish beruvchilarga, shu jumladan tadbirkorlik subyektlariga maslahat va uslubiy yordam berish, ishlab chiqarish jarayonida jarohat olish va baxtsiz hodisalarning oldini olishga doir profilaktika ishlarini oʻtkazish;

fuqarolarning mehnat huquqlariga rioya qilish hamda xavfsiz mehnat sharoitlarini va mehnatni muhofaza qilishni taʼminlash zarurligi toʻgʻrisida yuridik va jismoniy shaxslar oʻrtasida keng axborot-tushuntirish ishlarini olib borish;

mehnat munosabatlari va mehnatni muhofaza qilish sohasidagi davlat dasturlari, normativ-huquqiy hujjatlar va boshqa hujjatlar, shuningdek fuqarolarning munosib va xavfsiz mehnat sharoitlariga boʻlgan huquqlarini taʼminlashga doir takliflar va chora-tadbirlarni ishlab chiqish va amalga oshirishda ishtirok etish.

8. Mehnat va mehnatni muhofaza qilish sohasida yuklatilgan vazifalar va davlat nazorati predmetiga muvofiq Inspeksiya quyidagi funksiyalarni amalga oshiradi:

ish beruvchilar va mansabdor shaxslarning mehnat qilish, munosib va xavfsiz mehnat sharoitlari va ishsizlikdan himoya qilishga doir konstitutsiyaviy huquqni taʼminlash maqsadida mehnat va mehnatni muhofaza qilish, aholini ish bilan taʼminlash va ish beruvchining fuqarolik javobgarligini majburiy sugʻurta qilish toʻgʻrisidagi qonun hujjatlari talablariga rioya etishini tekshiradi;

mehnat va mehnatni muhofaza qilish, aholi bandligi va ish beruvchining fuqarolik javobgarligini majburiy sugʻurta qilish toʻgʻrisidagi qonun hujjatlariga, shu jumladan nogironligi boʻlgan shaxslarni ijtimoiy himoya qilish, jumladan, ularga ijtimoiy infratuzilma obyektlaridan toʻsqinliksiz foydalanish, shuningdek, barcha turdagi transportlardan, transport kommunikatsiyalaridan, umumiy foydalaniladigan aloqa va axborot vositalaridan foydalanish uchun mehnat shart-sharoitlarini yaratish toʻgʻrisidagi qonun hujjatlariga rioya etilmaslik holatlari ustidan qonun hujjatlarida belgilangan tartibda monitoring oʻtkazadi va ularga oʻz vaqtida taʼsir chorasini koʻradi;

mehnat toʻgʻrisidagi bitimlar va lokal hujjatlarning, ish beruvchilarning mehnat munosabatlari sohasidagi buyruqlari qonun hujjatlariga mos kelishini tahlil qiladi;

jamoa shartnomalarda va bitimlarda nazarda tutilgan majburiyatlar bajarilishini nazorat qiladi;

ish oʻrinlarining mehnat sharoitlari boʻyicha attestatsiyadan oʻtkazish sifatini, qisqartirilgan ish vaqtini, noqulay mehnat sharoitlarida ishlaganlik uchun qoʻshimcha yillik taʼtillar belgilashni davlat tomonidan nazorat qiladi, ekspertiza oʻtkazilishini nazorat qiladi va mehnat sharoitlari boʻyicha ekspertiza oʻtkazadi, uning natijalari boʻyicha tegishli xulosalar beradi;

xotin-qizlar mehnatidan foydalanish taqiqlangan noqulay mehnat sharoitlarida bajariladigan ishlar roʻyxatini hamda ogʻir narsalarni koʻtarishda va tashishda xotin-qizlar uchun cheklangan yuk normalari toʻgʻri qoʻllanishi boʻyicha davlat nazoratini amalga oshiradi;

fuqarolarning mehnat huquqlariga rioya etish va ularni himoya qilish hamda mehnatni muhofaza qilish sohasidagi qonun hujjatlariga rioya etilishini kameral nazoratni oʻtkazadi;

oʻn sakkiz yoshga toʻlmagan shaxslar mehnatidan foydalanish taqiqlangan noqulay mehnat sharoitlarida bajariladigan ishlar Roʻyxatini hamda oʻn sakkiz yoshga toʻlmagan shaxslar tomonidan koʻtariladigan va tashiladigan ogʻirlikning cheklangan normalari toʻgʻri qoʻllanishi boʻyicha davlat nazoratini amalga oshiradi;

mehnatni muhofaza qilish sohasida xizmatlar bozori professional ishtirokchilarining yagona reyestri yuritilishini taʼminlaydi, mehnatni muhofaza qilish va mehnat xavfsizligi masalalari boʻyicha ularning mutaxassislarini oʻqitish va attestatsiyadan oʻtkazishda koʻmaklashadi;

mehnatni muhofaza qilish sohasidagi xizmatlar bozori professional ishtirokchilarining faoliyati ustidan belgilangan tartibda monitoring olib boradi va ularning faoliyatini yaxshilash, shu jumladan ular tomonidan koʻrsatiladigan xizmatlar sifatini oshirish yuzasidan takliflar tayyorlaydi;

xodimlarning shaxsiy va jamoaviy himoya vositalari, ishlab chiqarish muhitini nazorat qilish uskunalari bilan toʻgʻri taʼminlanganini, shuningdek, noqulay va alohida tusga ega boʻlgan sharoitlarda ishlaganlik uchun xodimlarga imtiyozlar va kompensatsiyalar taqdim etilishini nazorat qiladi hamda ulardan foydalanish yuzasidan zarur chora-tadbirlar koʻradi;

xodimlarning hayoti va sogʻligʻiga yetkazilgan zararni qoplash boʻyicha ish beruvchilar tomonidan toʻlovlar amalga oshirilishini qonun hujjatlarida belgilangan tartibda nazorat qiladi;

tashkilotlardagi mehnatni muhofaza qilishga doir ishlarning mehnatni muhofaza qilish talablariga mos kelishini manfaatdor organlar bilan hamkorlikda sertifikatlashni amalga oshiradi va oʻtkazadi;

mehnat, aholi bandligi va mehnatni muhofaza qilish sohasidagi davlat nazoratiga muvofiq qonun hujjatlari buzilishining oldini olish va buzilgan holatlarni bartaraf etish yuzasidan zarur choralar koʻradi;

ishlab chiqarish jarayonida jarohat olish va kasb kasalliklariga chalinish haqida axborot toʻplaydi va buning sabablarini tahlil qiladi, ularni bartaraf etish yoʻllari ishlab chiqilishini taʼminlaydi;

ishlab chiqarish jarayonidagi baxtsiz hodisalarni va xodimlarning sogʻligʻiga ular mehnat majburiyatlarini bajarishi vaqtida yetkazilgan zararni qonun hujjatlarida belgilangan tartibda tekshiradi;

ishlab chiqarish jarayonidagi baxtsiz hodisalar sabablarini tahlil qiladi va ularning oldini olish boʻyicha takliflar ishlab chiqadi;

mehnat va mehnat xavfsizligi sohasida aniqlangan huquqbuzarliklarni aniqlash boʻyicha belgilangan tartibda choralar koʻradi.

mehnat toʻgʻrisidagi bitimlar va lokal hujjatlarning, ish beruvchilarning mehnat munosabatlari sohasidagi buyruqlari qonun hujjatlariga mos kelishini tahlil qiladi;

mehnat toʻgʻrisidagi bitimlar va lokal hujjatlarning asosiy prinsiplari, ish beruvchilarning mehnat munosabatlari masalalariga doir buyruqlari qonun hujjatlariga mos kelishiga rioya etilishini nazorat qiladi;

tomonlar imzolagan tarmoq kelishuvlarni, uning ilovalarini belgilangan tartibda bildirish roʻyxatidan oʻtkazadi;

mehnat va mehnatni muhofaza qilish toʻgʻrisidagi bitimlar va lokal hujjatlarning, ish beruvchilarning mehnat munosabatlari masalalariga doir buyruqlari qonun hujjatlariga mos kelmasligi aniqlanganda xulosalar beradi;

mehnat munosabatlari subyektlari, shu jumladan kasanachilik shartlari asosida mehnat faoliyatini amalga oshiruvchi xodimlar hamda shaxsiy tomorqa, dehqon va fermer xoʻjaliklarida band boʻlgan shaxslarning mehnat huquqlari himoyasini taʼminlaydi;

mehnat va mehnatni muhofaza qilish, aholi bandligi va ish beruvchining fuqarolik javobgarligini majburiy sugʻurta qilish toʻgʻrisidagi qonun hujjatlari buzilganligi aniqlangan holatlar yuzasidan ularga barham berish va ularning yuzaga kelishiga koʻmaklashadigan shart-sharoitlarni bartaraf etish uchun huquqiy tartibga solish choralarini koʻradi;

mehnat va mehnatni muhofaza qilish, aholi bandligi va ish beruvchining fuqarolik javobgarligini majburiy sugʻurta qilish toʻgʻrisidagi qonun hujjatlarida kasaba uyushmalariga va xodimlarning boshqa vakillik organlariga berilgan huquqlarni amalga oshirishda koʻmaklashadi, shuningdek, ularga ish beruvchilar rioya etishini nazorat qiladi;

oʻtkazilgan tekshiruvlar natijalariga koʻra, mehnat xavfsizligi talablariga javob bermaydigan va xodimlarning sogʻligʻi yoki hayotiga xavf soladigan tashkilotlar (uning ayrim boʻlinmalari) faoliyatini yoki ishlab chiqarish vositalaridan foydalanishni ular mehnat xavfsizligi talablariga muvofiqlashtirilganiga qadar 10 kundan ortiq boʻlmagan muddatga qonun hujjatlarida belgilangan tartibda toʻxtatib turadi;

mehnat va mehnatni muhofaza qilish sohasidagi davlat nazoratiga muvofiq qonun hujjatlari buzilishiga doir jismoniy va yuridik shaxslar murojaatlarini, zarur boʻlsa, joyning oʻziga borib koʻrib chiqadi;

mehnat va mehnatni muhofaza qilish toʻgʻrisidagi qonun hujjatlari buzilishiga doir daʼvolar, shuningdek, ishlab chiqarish jarayonida xodimlar hayoti va sogʻligʻiga yetkazilgan zararni qoplash masalalari yuzasidan sudda ekspertlar sifatida ishtirok etadi;

mehnat sharoitlari boʻyicha ekspertiza oʻtkazilishini nazorat qiladi va ularning natijalari boʻyicha xulosalar beradi;

ish oʻrinlarini mehnat sharoitlari va asbob-uskunalarning jarohatlash xavfliligi yuzasidan attestatsiyadan oʻtkazuvchi yuridik shaxslarni akkreditatsiyadan oʻtkazadi, shuningdek ularning mutaxassislarini mehnatni muhofaza qilish masalalari boʻyicha oʻqitadi va attestatsiyadan oʻtkazadi;

tashkilotlarning nogironligi boʻlgan shaxslarni ijtimoiy himoya qilish toʻgʻrisidagi qonun hujjatlari talablariga rioya etishini oʻz vakolatlari doirasida tekshiradi;

tashkilotlarning nogironligi boʻlgan shaxslarga ijtimoiy infratuzilma obyektlaridan toʻsqinliksiz foydalanish, shuningdek, barcha turdagi transportlardan, transport kommunikatsiyalaridan, umumiy foydalaniladigan aloqa va axborot vositalaridan foydalanish uchun mehnat shart-sharoitlarini yaratishi boʻyicha zarur chora-tadbirlar koʻradi;

ijtimoiy infratuzilma obyektlaridan toʻsqinliksiz foydalanish, shuningdek barcha turdagi transportlardan, transport kommunikatsiyalaridan, umumiy foydalaniladigan aloqa va axborot vositalaridan foydalanish uchun mehnat shart-sharoitlarini yaratish masalalari yuzasidan ommaviy axborot vositalarida axborot-tushuntirish ishlarini tashkil etadi va oʻtkazadi;

nogironligi boʻlgan shaxslarni ijtimoiy himoya qilish toʻgʻrisidagi normativ-huquqiy hujjatlar loyihalarini belgilangan tartibda ishlab chiqish, muvofiqlashtirish va tasdiqlashda ishtirok etadi;

7) majburiy mehnatga yoʻl qoʻymaslik va uni toʻliq bartaraf etish, shu jumladan aybdor mansabdor shaxslarni qonun hujjatlariga muvofiq javobgarlikka tortish orqali bartaraf etish chora-tadbirlarining ishlab chiqilishi va amalga oshirilishini manfaatdor vazirliklar, idoralar va jamoat tashkilotlari bilan birgalikda tashkil etish sohasida:

manfaatdor vazirliklar, idoralar va jamoat tashkilotlari bilan birgalikda majburiy mehnatga yoʻl qoʻymaslik va uni butunlay bartaraf etish, shu jumladan aybdor shaxslarni qonun hujjatlariga muvofiq javobgarlikka tortish orqali bartaraf etish boʻyicha chora-tadbirlarni ishlab chiqish va amalga oshirishni tashkil etadi;

biror-bir shaklda majburiy mehnatdan foydalanish bilan bogʻliq xavf-xatarni oʻz vaqtida aniqlash va bartaraf etish orqali xodimlarning kafolatlangan mehnat huquqlarini taʼminlash yuzasidan Oʻzbekiston Respublikasi qonun hujjatlari normalari ijrosini nazorat qiladi;

xodimlarning muayyan toifalari (xotin-qizlar, voyaga yetmaganlar, oliy va oʻrta maxsus, kasb-hunar taʼlim muassasalari talabalari, nogironligi boʻlgan shaxslar, Qurolli Kuchlar safidan boʻshatilgan shaxslar) uchun qonun hujjatlarida nazarda tutilgan mehnat huquqlari hamda kafolatlariga rioya etilishini nazorat qiladi;

majburiy mehnatdan foydalanish va kamsitish yuzasidan aniqlangan har bir holat boʻyicha huquqiy tartibga solish choralarini koʻradi hamda qonunbuzarlik holatlari toʻgʻrisida davlat hokimiyatining tegishli organlarini xabardor qiladi;

Inspeksiya vakolatiga kiradigan masalalar yuzasidan amaliy, konsultativ va uslubiy yordam koʻrsatish uchun ishonch telefonlari joriy etilishini va ishlab turishini taʼminlaydi;

ishonch telefon raqamlariga kelib tushgan muammoli masalalar yuzasidan statistik hisobot yuritadi, ularni tahlil qiladi hamda muammoli va salbiy omillarni bartaraf etish yuzasidan, shu jumladan inspektorlar faoliyati boʻyicha takliflar ishlab chiqadi;

vazirlikning rasmiy saytida mavzuga doir sahifalar yuritilishini taʼminlaydi, elektron bukletlar va metodik axborot, shu jumladan majburiy mehnatga va mehnat munosabatlari sohasidagi kamsitishlarga yoʻl qoʻymaslik va unga toʻliq chek qoʻyish boʻyicha koʻrgazmali axborot joylashtiradi, ishlab chiqarish jarayonida jarohat olish va baxtsiz hodisalarning oldini olishga doir profilaktika ishlarini oʻtkazadi;

xorijiy mutaxassislarni jalb qilgan holda ilmiy-amaliy konferensiyalar, seminarlar, tashkilotlar va aholi uchun treninglar hamda davra suhbatlari oʻtkazadi;

mehnatga oid huquqiy munosabatlar va mehnat toʻgʻrisidagi, mehnatni muhofaza qilish, aholi bandligi, ish beruvchining fuqarolik javobgarligini majburiy sugʻurta qilish, nogironligi boʻlgan shaxslarni ijtimoiy himoya qilish, jumladan, ularga ijtimoiy infratuzilma obyektlaridan toʻsqinliksiz foydalanish haqidagi qonun hujjatlarini qoʻllash masalalari yuzasidan ommaviy axborot vositalarida va aholi oʻrtasida axborot-tushuntirish ishlari oʻtkazadi;

mehnat va mehnatni muhofaza qilish, aholini ish bilan taʼminlash va ish beruvchining fuqarolik javobgarligini majburiy sugʻurta qilish toʻgʻrisidagi qonun hujjatlariga rioya etilishi yuzasidan oʻtkazilgan tekshiruvlar va monitoring materiallarini tahlil qiladi hamda umumlashtiradi;

huquqni qoʻllash amaliyoti boʻyicha aniqlangan muammoli jihatlar va ularni bartaraf etish toʻgʻrisida tegishli axborot tayyorlaydi hamda belgilangan tartibda Oʻzbekiston Respublikasi Bandlik va mehnat munosabatlari vaziriga taqdim etadi;

mehnat va mehnatni muhofaza qilish, aholi bandligiga doir amaldagi normativ-huquqiy hujjatlarni va xodimlarning mehnat huquqlari va manfaatlariga rioya etilishini va himoyasini, ularning ishlash jarayonida mehnat shart-sharoitlarini va xavfsizligini taʼminlashga doir mehnat huquqi normalarini oʻz ichiga olgan boshqa normativ-huquqiy hujjatlarni tahlil qiladi, zarur boʻlganda, qonun hujjatlariga oʻzgartish va qoʻshimchalar yuzasidan takliflar kiritadi;

mehnat va mehnatni muhofaza qilish, aholi bandligi va ish beruvchining fuqarolik javobgarligini majburiy sugʻurta qilish toʻgʻrisidagi qonun hujjatlarini takomillashtirish yuzasidan takliflar tayyorlaydi;

mehnatni muhofaza qilishga doir davlat dasturlari va boshqa dasturlarni ishlab chiqishda ishtirok etadi;

mehnat va mehnatni muhofaza qilish, aholi bandligi va ish beruvchining fuqarolik javobgarligini majburiy sugʻurta qilish sohasidagi normativ-huquqiy hujjatlar loyihalarini va hujjatlarni belgilangan tartibda ishlab chiqishda ishtirok etadi;

Xalqaro mehnat tashkiloti konvensiyalarini milliy qonun hujjatlariga implementatsiya qilish boʻyicha xalqaro tashkilotlar, shu jumladan Xalqaro mehnat tashkiloti bilan hamkorlik qiladi.

9. Inspeksiya qonun hujjatlarida nazarda tutilgan boshqa funksiyalarni ham amalga oshirishi mumkin.

10. Inspeksiyaning mansabdor shaxslari oʻzlariga yuklangan vazifalar va funksiyalarni bajarish uchun quyidagi huquqlarga ega:

davlat organlari va boshqa organlar, tashkilotlar va ularning mansabdor shaxslaridan nazorat funksiyalarini bajarish uchun zarur hujjatlar, izohlar, axborot, statistik maʼlumotlar va maʼlumotnomalar olish;

ishlab chiqarish jarayonidagi baxtsiz hodisalarni va kasb kasalliklarini oʻrganish, ishlab chiqarish jarayonida jarohat olish bilan bogʻliq, shuningdek, mehnat sharoitlari toʻgʻrisidagi maʼlumotlarni Oʻzbekiston Respublikasi Sogʻliqni saqlash vazirligi, Qurilish vazirligi, Oʻzbekiston Standartlashtirish, metrologiya va sertifikatlashtirish agentligi, Oʻzbekiston Respublikasi Sanoat xavfsizligi davlat qoʻmitasi hamda Elektr energetikada nazorat boʻyicha davlat inspeksiyasidan soʻrash va olish;