Oʻzbekiston Respublikasi Hukumati va Turkmaniston Hukumati, keyingi oʻrinlarda “Tomonlar” deb ataluvchilar,

2017-yil 6-martda imzolangan Oʻzbekiston Respublikasi bilan Turkmaniston oʻrtasida strategik sheriklik toʻgʻrisida Shartnomaga amal qilib,

ikki mamlakat oʻrtasida savdo-iqtisodiy, ilmiy-texnikaviy, madaniy-gumanitar va boshqa sohalarda hamkorlikni keng qamrovli rivojlantirish zaruriyatini tan olib,

tarixan shakllangan aloqalarni chuqurlashtirish va mahalliy darajada hamjihatlik uchun mintaqalararo hamkorlikning amaliy ahamiyati va salohiyatini eʼtirof etgan holda,

ikki mamlakat mintaqalari oʻrtasida faoliyatning turli sohalarida hamkorlikni taʼminlash hamda xoʻjalik yurituvchi subyektlarning rivojlanayotgan aloqalarini faollashtirishga qodir boʻlgan mintaqalararo hamkorlik uchun qulay shart-sharoitlar yaratish va huquqiy asoslarini mustahkamlashga intilib,

quyidagilar toʻgʻrisida kelishib oldilar:

Tomonlar oʻz davlatlarining qonunchiligiga hamda davlatlari ishtirokchi boʻlgan xalqaro shartnomalarga muvofiq savdo-iqtisodiy va madaniy-gumanitar sohalarda, qishloq va suv xoʻjaligi, sogʻliqni saqlash, turizm va atrof-muhitni himoya qilish sohalarida, shuningdek, oʻzaro qiziqish uygʻotadigan boshqa yoʻnalishlarda oʻzaro manfaatli boʻlgan mintaqalararo hamkorlikni kengaytirish va rivojlantirishga koʻmaklashadilar.

Mazkur Bitim maqsadlari uchun qoʻllaniladigan atamalar quyidagilarni anglatadi:

“mintaqalar” — Oʻzbekiston tomonidan: Oʻzbekiston Respublikasining maʼmuriy-hududiy birliklari; Turkmaniston tomonidan: Turkmanistonning maʼmuriy-hududiy birliklari;

“vakolatli organlar” — Tomonlar davlatlarining mazkur Bitimni amalga oshirish bilan bogʻliq masalalarni hal qilish boʻyicha mintaqalararo hamkorlikni rivojlantirish sohasida vakolat berilgan hokimiyat organlari;

“xoʻjalik yurituvchi subyektlar” — Oʻzbekiston Respublikasi hududida yoki Turkmaniston hududida roʻyxatdan oʻtgan xoʻjalik yurituvchi subyektlar.

Vakolatli organlar mintaqalararo hamkorlikni amalga oshirish va muvofiqlashtirish maqsadida quyidagilarga koʻmaklashadilar:

mintaqalar oʻrtasida aloqalarni oʻrnatish va rivojlantirish;

mazkur Bitimni amalga tatbiq qilishga yoʻnaltirilgan qoʻshma tadbirlar rejalari, harakat dasturlari va “yoʻl xaritalari”ni ishlab chiqish va amalga oshirish;

mintaqalararo hamkorlikning joriy holati hamda uni takomillashtirish istiqbollarini muhokama qilish boʻyicha zaruriyat boʻlganda qoʻshma ishchi guruhlar tuzish va muntazam maslahatlashuvlar mexanizmini yoʻlga qoʻyish.

Vakolatli organlar mintaqalarning korxona va tashkilotlari oʻrtasida oʻzaro manfaatli savdo va ishlab chiqarish aloqalarini rivojlantirishga koʻmaklashadilar. Mazkur maqsadlarda ular:

korxona va tashkilotlar oʻrtasida bevosita aloqalarni oʻrnatish, qoʻshma korxonalar tashkil etish, tovar va xizmatlar yetkazib berish boʻyicha oʻzaro manfaatli kontraktlar tuzishda tadbirkorlik tuzilmalarini har tomonlama qoʻllab-quvvatlashga koʻmaklashadilar;

tadbirkor va ishbilarmon doiralar vakillari ishtirokida uchrashuvlar, biznes-seminarlar, konferensiyalar, simpoziumlar, koʻrgazma va yarmarkalar tashkil etadilar;

oʻz mintaqalarini iqtisodiy rivojlantirishning ustuvor loyihalarini amalga oshirishda, shu jumladan, xoʻjalik yurituvchi subyektlari saʼy-harakatlarini muvofiqlashtirish orqali bir-birlarini qoʻllab-quvvatlaydilar;

oʻz davlatlari qonunchiligidagi oʻzgarishlar va amalga oshirilayotgan iqtisodiy islohotlar haqida bir-birlarini muntazam xabardor qiladilar;

oʻzaro savdoni tashkil etish masalalarini birgalikda tahlil qiladilar va oʻz vakolatlari doirasida tegishli takliflar ishlab chiqadilar;

mintaqalar savdo uylarini tashkil etishda koʻmaklashadilar.

Vakolatli organlar mintaqalar oʻrtasida turist almashinuvini tashkil qilish, mintaqalar jozibadorligini oshirishga qaratilgan turizm sohasidagi qoʻshma dastur va loyihalarni amalga oshirishga koʻmaklashadilar.

Vakolatli organlar ishbilarmonlik faolligini oshirish va mintaqaga turistik oqimni koʻpaytirish maqsadida transport qatnovini yaxshilash hamda infratuzilmani rivojlantirishga koʻmaklashadilar.

Vakolatli organlar mahalliy oʻzini-oʻzi boshqarish organlari oʻrtasida aloqalarning rivojlanishiga hamda ularning oldilarida turgan vazifalarni hal qilish uchun mintaqalarda tajriba almashish va tarqatishga koʻmaklashadilar.

Vakolatli organlar shaharsozlik hamda ulkan shaharsozlik loyihalarini rejalashtirish va moliyalashtirish amaliyoti boʻyicha axborot almashish sohasidagi hamkorlikni rivojlantiradilar.

Vakolatli organlar ekologiya va atrof-muhitni himoya qilish, tabiiy resurslardan oqilona foydalanish masalalari boʻyicha munosabatlarni rivojlantirishga koʻmaklashadilar va tabiatni muhofaza qilish faoliyatini boshqarish sohasida ilgʻor tajribani joriy etishga koʻmaklashadilar.

Vakolatli organlar suv va energiya taʼminoti, oqindi suvlarni tozalash, chiqindilarni boshqarish, chegaraboʻyi hududlardagi kanallar va gidrotexnik inshootlarni tozalash hamda taʼmirlash sohalarida hamkorlikni rivojlantiradilar.

Vakolatli organlar oʻzaro yaxshiroq tushunish, hamkorlik va doʻstlikni mustahkamlashga erishish uchun tarix va madaniyat bilan oʻzaro tanishish maqsadida turli darajalarda muntazam aloqalarni taʼminlaydilar.

Vakolatli organlar mintaqalarning ijtimoiy-madaniy va xoʻjalik-iqtisodiy hayotini ommaviy axborot vositalarida xolisona yoritishga koʻmaklashadilar.

Vakolatli organlar millatlararo muomala va madaniyatlararo muloqot madaniyatini mustahkamlash sohasida mintaqalar hamkorligini rivojlantirishga qaratilgan loyihalar va boshqa tadbirlarni amalga oshirishga koʻmaklashadilar.

Tomonlarning vakolatli organlari tarafidan mazkur Bitimni amalga oshirish boʻyicha oʻtkaziladigan tadbirlar, tegishli vakolatli organ vazifalarini bajarish uchun Tomonlar davlatlarining tegishli mablagʻlari doirasida moliyalashtiriladi.

Tomonlar mazkur Bitim qoidalarini talqin qilish va qoʻllashda vujudga kelishi mumkin boʻlgan har qanday nizo va kelishmovchiliklarni muzokaralar va maslahatlashuvlar orqali hal etadilar.

Tomonlarning oʻzaro kelishuvga muvofiq mazkur Bitimga alohida bayonnomalar bilan rasmiylashtiriladigan hamda mazkur Bitimning ajralmas qismi hisoblanadigan va mazkur Bitim 12-moddasida belgilangan tartibda kuchga kiruvchi oʻzgartirish va qoʻshimchalar kiritilishi mumkin.

Mazkur Bitim Tomonlar uning kuchga kirishi uchun zarur boʻlgan davlat ichki protseduralarini bajarganliklari haqida soʻnggi yozma xabarnoma diplomatik kanallar orqali olingan sanadan boshlab kuchga kiradi.

Mazkur Bitim nomuayyan muddatga tuziladi va Bitimning amal qilishi Tomonlardan biri boshqa Tomonning Bitim amal qilishini tugatish niyati toʻgʻrisidagi tegishli yozma xabarnomasini diplomatik kanallar orqali olgan sanadan boshlab olti oydan soʻng tugatiladi.

Mazkur Bitim amal qilishining tugatilishi u amal qilgan paytda bajarilishi boshlangan va uning amal qilishi tugatilgunga qadar bajarilmagan loyihalar boʻyicha Tomonlarning majburiyatlariga daxl qilmaydi.

Toshkent shahrida 2018-yil 23-aprelda har biri oʻzbek, turkman va rus tillarida boʻlgan ikki asl nusxada tuzildi, bunda barcha matnlar teng autentikdir.

Matnlar oʻrtasida tafovutlar yuzaga kelgan taqdirda, Tomonlar rus tilidagi matnga murojaat qiladilar.