O‘zbekiston Respublikasi Prezidentining “2017 ― 2021-yillarda ko‘p xonadonli uy-joy fondini saqlash va undan foydalanish tizimini yanada takomillashtirish chora-tadbirlari to‘g‘risida” 2017-yil 24-apreldagi PQ-2922-son qarori ijrosini ta’minlash, shuningdek, mamlakatimiz aholisining uy-joy sharoitlarini yaxshilash, muhandislik kommunikatsiyalarini o‘z vaqtida sifatli qurish va ta’mirlash, ularning atrofidagi hududlarni obodonlashtirish, uy-joy kommunal xizmatlar ko‘rsatish tashkilotlarining moddiy-texnika bazasini mustahkamlash va zamonaviy uskunalar bilan jihozlash ishlarida yuqori natijalarni qo‘lga kiritgan, soha rivojiga munosib hissa qo‘shgan fuqarolarni rag‘batlantirish maqsadida Vazirlar Mahkamasi qaror qiladi:

1. “Uy-joy kommunal xizmat ko‘rsatish a’lochisi” ko‘krak nishoni ta’sis etilsin.

2. Quyidagilar:

“Uy-joy kommunal xizmat ko‘rsatish a’lochisi” ko‘krak nishoni to‘g‘risida nizom 1-ilovaga muvofiq;

“Uy-joy kommunal xizmat ko‘rsatish a’lochisi” ko‘krak nishoni va uning guvohnomasining tavsiflari 2 va 3-ilovalarga muvofiq tasdiqlansin.

3. “Davlat belgisi” davlat ishlab chiqarish birlashmasi O‘zbekiston Respublikasi Uy-joy kommunal xizmat ko‘rsatish vazirligining buyurtmasiga asosan “Uy-joy kommunal xizmat ko‘rsatish a’lochisi” ko‘krak nishoni va uning guvohnomasi belgilangan tartibda tayyorlanishini ta’minlasin.

4. “Uy-joy kommunal xizmat ko‘rsatish a’lochisi” ko‘krak nishoni va uning guvohnomasini tayyorlash hamda mukofotlanganlarni taqdirlash bilan bog‘liq xarajatlar O‘zbekiston Respublikasi Uy-joy kommunal xizmat ko‘rsatish vazirligining budjetdan tashqari mablag‘lari hisobidan qoplanishi inobatga olinsin.

5. O‘zbekiston Respublikasi Uy-joy kommunal xizmat ko‘rsatish vazirligi manfaatdor vazirliklar va idoralar bilan birgalikda ular qabul qilgan normativ-huquqiy hujjatlarni bir oy muddatda ushbu qarorga muvofiqlashtirsin.

6. Mazkur qarorning bajarilishini nazorat qilish O‘zbekiston Respublikasi Bosh vazirining birinchi o‘rinbosari ― “O‘zbekiston temir yo‘llari” AJ boshqaruvi raisi A.J. Ramatov va O‘zbekiston Respublikasi uy-joy kommunal xizmat ko‘rsatish vaziri M.X. Saliyev zimmasiga yuklansin.

1. Ushbu Nizom “Uy-joy kommunal xizmat ko‘rsatish a’lochisi” ko‘krak nishoni (keyingi o‘rinlarda ko‘krak nishoni deb ataladi) bilan taqdirlash tartibini belgilaydi.

2. Ko‘krak nishoni bilan mamlakatimiz aholisining uy-joy sharoitlarini yaxshilash, muhandislik kommunikatsiyalarini o‘z vaqtida sifatli qurish va ta’mirlash, ularning atrofidagi hududlarni obodonlashtirish, uy-joy kommunal xizmatlar ko‘rsatish tashkilotlarining moddiy-texnika bazasini mustahkamlash va zamonaviy uskunalar bilan jihozlash ishlarida yuqori natijalarni qo‘lga kiritgan, soha rivojiga munosib hissa qo‘shgan fuqarolar taqdirlanadi.

Ko‘krak nishoni bilan O‘zbekiston Respublikasi fuqarosi bo‘lmagan shaxslar ham taqdirlanishi mumkin.

3. Ko‘krak nishoni bilan taqdirlash tartibi ushbu Nizomga ilova qilingan sxemaga muvofiq amalga oshiriladi.

4. Xususiy uy-joy mulkdorlari shirkatlari, ichimlik suvi va issiqlik ta’minoti korxonalari hamda uy-joy kommunal xizmat ko‘rsatish sohasidagi boshqa tashkilotlar xodimlarini ko‘krak nishoni bilan taqdirlash bo‘yicha takliflar tegishlicha Qoraqalpog‘iston Respublikasi Uy-joy kommunal xizmat ko‘rsatish vazirligi, viloyatlar uy-joy kommunal xizmat ko‘rsatish boshqarmalari hamda Toshkent shahar Uy-joy kommunal xizmat ko‘rsatish bosh boshqarmasiga har yili 25-yanvargacha taqdim etiladi.

5. Qoraqalpog‘iston Respublikasi Uy-joy kommunal xizmat ko‘rsatish vazirligi, viloyatlar uy-joy kommunal xizmat ko‘rsatish boshqarmalari hamda Toshkent shahar uy-joy kommunal xizmat ko‘rsatish bosh boshqarmasi nomzodlar bo‘yicha takliflarni belgilangan tartibda ko‘rib chiqadi hamda har yili 25-fevralgacha O‘zbekiston Respublikasi Uy-joy kommunal xizmat ko‘rsatish vazirligiga (keyingi o‘rinlarda vazirlik deb ataladi) taqdim etadi.

6. Vazirlikka to‘g‘ridan to‘g‘ri bo‘ysunuvchi tashkilotlar hamda boshqa vazirlik va idoralar uy-joy kommunal xizmat ko‘rsatish yo‘nalishida faoliyat yuritayotgan o‘z xodimlarini ko‘krak nishoni bilan taqdirlash bo‘yicha takliflarni har yili 25-fevralgacha vazirlikka taqdim etadi.

7. O‘zbekiston Respublikasi uy-joy kommunal xizmat ko‘rsatish vaziri tomonidan ko‘krak nishoni bilan taqdirlashga oid takliflarni ko‘rib chiqish bo‘yicha Komissiya (keyingi o‘rinlarda Komissiya deb ataladi) tashkil etiladi.

Komissiya yig‘ilishida nomzodlar bo‘yicha hujjatlar o‘rganilib, har yili 1-aprelgacha eng munosib nomzodlar bo‘yicha yakuniy xulosa qabul qilinadi.

8. O‘zbekiston Respublikasi uy-joy kommunal xizmat ko‘rsatish vazirining ko‘krak nishoni bilan taqdirlash to‘g‘risidagi buyrug‘i har yili 15-aprelgacha qabul qilinadi.

9. Ko‘krak nishoni har yili 18-aprel ― O‘zbekiston Respublikasi uy-joy kommunal xizmat ko‘rsatish sohasi xodimlari kuni arafasida O‘zbekiston Respublikasi uy-joy kommunal xizmat ko‘rsatish vaziri (yoki uning topshirig‘iga binoan boshqa mas’ul shaxslar) tomonidan tantanali vaziyatda topshiriladi.

10. Ko‘krak nishoni bilan mukofotlangan shaxslar bazaviy hisoblash miqdorining to‘rt baravari miqdorida bir yo‘la to‘lanadigan pul mukofoti oladi.

Bir yo‘la to‘lanadigan pul mukofotlari vazirlikning budjetdan tashqari mablag‘lari hisobidan topshiriladi.

11. Bir shaxs ko‘krak nishoni bilan bir marta mukofotlanadi.

12. Ko‘krak nishoni davlat mukofotlaridan keyin ko‘krakning chap tomoniga taqiladi.

13. Vazirlik ushbu Nizomga muvofiq ko‘krak nishoniga tavsiya etilgan nomzodlarning hujjatlari xolis ko‘rib chiqilishi uchun bevosita mas’uldir.

“Uy-joy kommunal xizmat ko‘rsatish a’lochisi” ko‘krak nishoni diametri 34 millimetrli doira shaklida bo‘lib, mis qotishmasidan tayyorlanadi.

Ko‘krak nishonining old tomoni pastki qismida quyosh nurlari fonida ikkita uy binosi ko‘k rangda va muqobil elektr energiyasini anglatuvchi tomi va mo‘risi qizil rangda tasvirlangan. Uning orqasida ko‘p xonadonli uy binolari ifodalangan bo‘lib, binolarning romlari zarhallangan.

Pastdan tepaga qalinlashib boruvchi radiusga ega bo‘lgan yarim aylana O‘zbekiston Respublikasi Davlat bayrog‘i ranglarida ishlangan.

Ko‘krak nishonining aylanasi bo‘ylab zarhal hoshiya bilan o‘ralgan oq emalli doirada balandligi 6 millimetr bo‘lgan “UY-JOY KOMMUNAL XIZMAT KO‘RSATISH” so‘zlari hamda pastdan ikkita sakkiz qirrali yulduz o‘rtasida “A‘LOCHISI” so‘zlari yozilgan.

Ko‘krak nishonining orqa tomoni markazida besh qatorda harflarning balandligi 2 millimetr bo‘lgan “Uy-joy kommunal”, “xizmat ko‘rsatish”, “sohasi rivojiga”, “qo‘shgan hissasi”, “uchun” yozuvi joylashgan.

Ko‘krak nishonining qalinligi 2,2 millimetr.

Tasvirlar va yozuvlar qavariqdir.

Ko‘krak nishoni old va orqa tomonlarining chetlari qavariq doira bilan o‘ralgan.

Ko‘krak nishoni halqa va ilmoqchalar yordamida to‘g‘ri to‘rtburchak shaklidagi qadag‘ichga ulangan.

Qadag‘ichning eni ― 26 millimetr, bo‘yi ― 17 millimetrdan iborat. Qadag‘ich eni 22 millimetrli shoyi lenta bilan qoplangan bo‘lib, lentaning markazidan eni 6 millimetrli ko‘k yo‘l o‘tgan. Uning har ikki tarafidan eni 1 millimetrli ko‘k, eni 2 millimetrli yashil va eni 5 millimetr bo‘lgan oq rangdagi yo‘llar tushirilgan.

Qadag‘ichning orqa tomoniga ko‘krak nishonini kiyimga taqib qo‘yish uchun to‘g‘nog‘ich ko‘rinishidagi moslama o‘rnatilgan.

“Uy-joy kommunal xizmat ko‘rsatish a’lochisi” ko‘krak nishoni guvohnomasi 160x110 millimetr o‘lchamdagi kitobcha shaklida bo‘lib, 240 g/kv.m. qalinlikdagi ofset qog‘ozdan tayyorlanadi.

Guvohnomaning tashqi tomoni (birinchi va to‘rtinchi betlari) moviy rangda bo‘lib, plyonka bilan qoplangan.

Guvohnomaning birinchi beti eni 7,5 millimetrli, ichki burchaklari aylana shaklida bo‘lgan ko‘k rangli hoshiya bilan o‘ralgan.

Guvohnomaning yuqori chekkasidan (birinchi beti) 35 millimetr pastda, markazda, oralig‘i 3,5 millimetrli ikki satrdan iborat matn joylashgan. Birinchi satrda “UY-JOY KOMMUNAL XIZMAT”, ikkinchi satrda “KO‘RSATISH A‘LOCNISI” (katta harflarda, “Times new Roman Bolt” shrifti, 12-kegl), uchinchi satrda “ko‘krak nishoni” (“Times new Roman Bolt” shrifti, 12-kegl) so‘zlari yozilgan. Undan 6 millimetr pastda “GUVOHNOMASI” (katta harflarda, “Times new Roman Bolt” shrifti, 17-kegl) so‘zi yozilgan.

Yozuvlar zarhal rangida aks ettirilgan.

Guvohnomaning ichki tomoni (ikkinchi va uchinchi betlari) “Tangir” tasviri tushirilgan och havo rangda bo‘lib, ofset usulida chop etilgan.

Ichki tomonining chap qismida (ikkinchi beti), markazda ko‘krak nishonining asliga teng o‘lchamdagi rangli tasviri aks ettirilgan.

Guvohnomaning ichki o‘ng tomoni (uchinchi beti) yuqori chekkasidan 8 millimetr pastda, markazda “GUVOHNOMA” (katta harflarda, “Times new Roman Bolt” shrifti, 10-kegl) so‘zi hamda guvohnoma tartib raqami uchun “№” belgisi va 15 millimetrli chiziq joylashgan.

“GUVOHNOMA” so‘zidan 11 millimetr pastda mukofotlangan shaxsning familiyasi, ismi va otasining ismini qayd etish uchun oralig‘i 8 millimetrli uchta chiziq tortilgan.

Pastki chiziqdan 6 millimetr quyida, markazda, oralig‘i 2 millimetrli uch satrdan iborat matn joylashgan. Birinchi satrda “O‘zbekiston Respublikasi”, ikkinchi satrda “uy-joy kommunal xizmat ko‘rsatish”, uchinchi satrda “vazirining” (“Times new Roman Bolt” shrifti, 10-kegl) so‘zlari yozilgan.

Undan 5 millimetr pastda oralig‘i 4 millimetr bo‘lgan ikki satrdan iborat matn joylashgan. Birinchi satrda “20__ y. “___” ___________dagi”, ikkinchi satrda “____-son buyrug‘iga asosan” (“Times new Roman Bolt” shrifti, 10-kegl) so‘zlari yozilgan.

Undan 5 millimetr pastda, markazda, oralig‘i 3 millimetrli uch satrdan iborat matn joylashgan. Birinchi catrda “UY-JOY KOMMUNAL XIZMAT”, ikkinchi satrda “KO‘RSATISH A‘LOCNISI” (katta harflarda, “Times new Roman Bolt” shrifti, 10-kegl), uchinchi satrda “ko‘krak nishoni bilan mukofotlandi” (“Times new Roman Bolt” shrifti, 10-kegl) so‘zlari yozilgan.

So‘nggi so‘zlardan 9 millimetr pastda, chap tomonda “Vazir” (“Times new Roman Bolt” shrifti, 10-kegl) so‘zi yozilgan.