Davlat va jamiyat boshqaruvi sohasiga zamonaviy axborot-kommunikatsiya tizimlarini joriy etish mamlakatimizda olib borilayotgan ijtimoiy-iqtisodiy va ijtimoiy-siyosiy islohotlar va oʻzgarishlarni samarali amalga oshirishning muhim sharti hisoblanadi.

Shu bilan birga, davlat organlari va tashkilotlarida axborot-kommunikatsiya texnologiyalarini rivojlantirish, axborot xavfsizligini taʼminlash tizimini takomillashtirish boʻyicha chora-tadbirlar koʻrilayotganiga qaramasdan “Elektron hukumat” tizimining joriy etilishi va samarali faoliyat koʻrsatishiga, axborot sohasidagi tahdidlarga qarshi kurashishga toʻsqinlik qiluvchi qator muammolar saqlanib qolmoqda. Jumladan:

birinchidan, axborotlashtirish subyektlari tomonidan qonun hujjatlari, normativ hujjatlar va davlat standartlarining ijro etilishi ustidan nazorat va tekshirishning amaldagi mexanizmi zamonaviy talablarga muvofiq emasligi koʻrsatilayotgan xizmatlar sifatining pasayishiga olib kelmoqda;

ikkinchidan, axborot xavfsizligi sohasidagi davlat siyosatini amalga oshirishga masʼul yagona vakolatli organning mavjud emasligi mazkur yoʻnalishda amalga oshirilayotgan ishlarning samarasizligiga sabab boʻlmoqda;

uchinchidan, davlat organlari va tashkilotlari tomonidan joriy etilayotgan apparat vositalari va dasturiy mahsulotlarni ekspertiza va sertifikatsiyadan oʻtkazish tizimidagi kamchiliklar ularning “Elektron hukumat” tizimiga jadal integratsiyalashuvini susaytirmoqda;

toʻrtinchidan, telekommunikatsiya, axborot va kiberxavfsizlik sohasidagi nazorat tizimi, muhim axborot infratuzilmasining mukammal emasligi davlat axborot tizimlari obyektlari, raqamli iqtisodiyot va shaxsiy maʼlumotlarning zaiflashuviga olib kelmoqda;

beshinchidan, buzgʻunchi kuchlarning zamonaviy axborot-kommunikatsiya texnologiyalari va Internet tarmogʻidan faol foydalanishi aholi, ayniqsa, oʻsib kelayotgan avlodning dunyoqarashi va ongiga salbiy taʼsir koʻrsatmoqda;

oltinchidan, axborot va kiberxavfsizlikni taʼminlash sohasidagi ilgʻor xorijiy tajribani oʻrganish va joriy qilish boʻyicha tizimli ishlarning mavjud emasligi milliy axborot makonini himoya qilishning zamonaviy usullarini joriy qilish imkonini bermayapti.

Axborot sohasida yagona davlat siyosati roʻyobga chiqarilishining samaradorligini oshirish, telekommunikatsiya, axborot va kiberxavfsizlikni taʼminlash sohasidagi nazorat tizimini yanada takomillashtirish maqsadida:

1. Oʻzbekiston Respublikasi Axborot texnologiyalari va kommunikatsiyalarini rivojlantirish vazirligining:

Oʻzbekiston Respublikasi Axborot texnologiyalari va kommunikatsiyalarini rivojlantirish vazirligi huzuridagi Aloqa, axborotlashtirish va telekommunikatsiya texnologiyalari sohasida nazorat boʻyicha inspeksiyani;

Oʻzbekiston Respublikasi Axborot texnologiyalari va kommunikatsiyalarini rivojlantirish vazirligining Axborot xavfsizligi va jamoat tartibini taʼminlashga koʻmaklashish markazini tugatish toʻgʻrisidagi taklifi maʼqullansin.

2. Quyidagilar:

umumiy shtat birligi 198 nafar, shu jumladan hududiy boʻlinmalarda — 110 nafar boʻlgan Oʻzbekiston Respublikasi Axborotlashtirish va telekommunikatsiyalar sohasida nazorat boʻyicha davlat inspeksiyasi (keyingi oʻrinlarda — Davlat inspeksiyasi);

davlat unitar korxonasi shaklida Texnik koʻmaklashish markazi (keyingi oʻrinlarda — Markaz);

Oʻzbekiston Respublikasi Axborot texnologiyalari va kommunikatsiyalarini rivojlantirish vazirligining “Xavfsiz shahar” jamoat tartibiga koʻmaklashish markazi tashkil etilsin.

3. Oʻzbekiston Respublikasi Axborot texnologiyalari va kommunikatsiyalarini rivojlantirish vazirligining Axborot xavfsizligi va jamoat tartibini taʼminlashga koʻmaklashish markazining boʻshayotgan 135 nafar shtat birligi Markazga oʻtkazilsin.

4. Belgilab qoʻyilsinki:

Davlat inspeksiyasi Oʻzbekiston Respublikasi Axborot texnologiyalari va kommunikatsiyalarini rivojlantirish vazirligi huzuridagi Aloqa, axborotlashtirish va telekommunikatsiya texnologiyalari sohasida nazorat boʻyicha inspeksiyaning huquq va majburiyatlari boʻyicha huquqiy vorisi hisoblanadi;

Markaz Oʻzbekiston Respublikasi Axborot texnologiyalari va kommunikatsiyalarini rivojlantirish vazirligining Axborot xavfsizligi va jamoat tartibini taʼminlashga koʻmaklashish markazining huquq va majburiyatlari boʻyicha huquqiy vorisi hisoblanadi, “Xavfsiz shahar” loyihasini amalga oshirish bilan bogʻliq huquq va majburiyatlari bundan mustasno.

Davlat inspeksiyasi Markazning taʼsischisi hisoblanadi.

5. Quyidagilar:

a) Davlat inspeksiyasining asosiy vazifalari etib belgilansin:

aloqa, axborotlashtirish va telekommunikatsiya texnologiyalari, davriy bosma nashrlarni tarqatish sohasida qonun hujjatlari, normativ hujjatlar va davlat standartlari talablariga rioya qilinishi ustidan davlat nazoratini amalga oshirish;

oʻz vakolati doirasida pochta aloqasi, axborot texnologiyalari va telekommunikatsiyalari xizmatlarining sifatli taqdim etilishi, davriy bosma nashrlar, fonogrammalar, audiovizual asarlar va EHM uchun dasturlar tarqatilishida isteʼmolchilar huquqlarini himoya qilish choralarini taʼminlash ustidan davlat nazoratini amalga oshirish;

fonogrammalar, audiovizual asarlar, EHM uchun dasturlar tarqatishda (sotish, ijaraga berish va barchaning eʼtiboriga yetkazishda) mualliflik huquqlari sohasidagi qonun hujjatlariga va normativ hujjatlarga rioya qilinishi ustidan davlat nazoratini amalga oshirish;

normativ-huquqiy hujjatlar talablariga muvofiq davlat organlari va tashkilotlari, shuningdek, boshqa tashkilot va idoralarda “Elektron hukumat” tizimida infratuzilmani rivojlantirish va axborot-kommunikatsiya texnologiyalaridan samarali foydalanilishi ustidan davlat nazoratini amalga oshirish;

ish va boshqaruv jarayonlarini avtomatlashtirish, integrallashgan axborot tizimlarini, maʼlumotlar uzatish va almashishning idoralararo tarmoqlarini joriy etish va ulardan foydalanish, davlat axborot resurslari integratsiyasi, shu jumladan, elektron davlat xizmatlari koʻrsatish samaradorligi;

“oxirgi milya” tamoyili boʻyicha Internet tarmogʻidan keng polosali foydalanishni, multiservis aloqa tarmoqlari texnologiyalarini, mobil aloqa bozorini, boshqa zamonaviy telekommunikatsiya xizmatlarini, shuningdek, pochta aloqasi xizmatlarini va davriy bosma nashrlar tarqatishni kengaytirish yoʻli bilan telekommunikatsiya infratuzilmasini rivojlantirish ustidan davlat nazoratini amalga oshirish;

b) Markazning asosiy vazifalari etib belgilansin:

axborot xavfsizligiga hozirgi vaqtdagi tahdidlar toʻgʻrisidagi maʼlumotlarni yigʻish, tahlil qilish va toʻplash, davlat organlari va tashkilotlari axborot tizimlari, resurslari va maʼlumotlar bazalariga noqonuniy kirib olish holatlarining oldini olishni taʼminlaydigan samarali tashkiliy va dasturiy-texnik yechimlarni tezkor qabul qilish boʻyicha tavsiyalar va takliflar ishlab chiqish;

qonun buzuvchilarni, axborotlar makonidagi ruxsatsiz yoxud buzuvchi harakatlarni amalga oshirishda foydalaniladigan metodlar va vositalarni tahlil qilish, identifikatsiyalashda telekommunikatsiyalar tarmoqlarining operatorlari va provayderlari, huquqni muhofaza qilish organlari bilan hamkorlik qilish;

axborotlashtirish obyektlarida (davlat sirlari bundan mustasno) apparat vositalari va dasturiy mahsulotlarni, axborot-kommunikatsiya texnologiyalari, telekommunikatsiya jihozlari va boshqa texnik vositalarni attestatsiya, ekspertiza va sertifikatsiyadan oʻtkazish;

davlat organlari va tashkilotlari axborot tizimlari va resurslari axborot xavfsizligi siyosatini ishlab chiqish va amalga oshirishda koʻmaklashish;

davlat axborot tizimlari va resurslari, shuningdek, Internet tarmogʻi milliy segmentining axborot xavfsizligini taʼminlash sohasidagi normativ-huquqiy bazani takomillashtirish boʻyicha takliflar ishlab chiqish;

Internetning milliy foydalanuvchilarini Internet tarmogʻi milliy segmentida axborot xavfsizligiga paydo boʻlayotgan tahdidlar toʻgʻrisida oʻz vaqtida xabardor qilish, shuningdek, axborotlarni himoya qilish boʻyicha maslahat xizmatlari koʻrsatish.

6. Quyidagilar:

Oʻzbekiston Respublikasi Axborotlashtirish va telekommunikatsiyalar sohasida nazorat boʻyicha davlat inspeksiyasi toʻgʻrisidagi nizom 1-ilovaga muvofiq;

Oʻzbekiston Respublikasi Axborotlashtirish va telekommunikatsiyalar sohasida nazorat boʻyicha davlat inspeksiyasi tuzilmasi 2-ilovaga muvofiq;

Oʻzbekiston Respublikasi Axborotlashtirish va telekommunikatsiyalar sohasida nazorat boʻyicha davlat inspeksiyasi hududiy boʻlinmalarining namunaviy tuzilmasi 3-ilovaga muvofiq tasdiqlansin.

Belgilansinki, Oʻzbekiston Respublikasi Prezidentining 2018-yil 27-iyuldagi PF-5490-son “Tadbirkorlik subyektlarining huquqlari va qonuniy manfaatlarini himoya qilish tizimini yanada takomillashtirish chora-tadbirlari toʻgʻrisida”gi Farmoni 5 va 6-bandlari talablari Davlat inspeksiyasi tomonidan amalga oshiriladigan tekshirishlarga tatbiq etilmaydi.

7. Quyidagi tartib oʻrnatilsinki, unga koʻra:

a) Joriy taʼminot (ish haqiga davlat qoʻshimcha toʻlovlari va ustama pullar saqlangan holda), Davlat inspeksiyasi va Markazning moddiy-texnika bazasini mustahkamlash, ular xodimlarining mehnatini qoʻshimcha moddiy ragʻbatlantirish boʻyicha xarajatlarni moliyalashtirish Axborot-kommunikatsiya texnologiyalarini rivojlantirish jamgʻarmasining mablagʻlari hisobidan amalga oshiriladi;

b) Markaz xodimlariga axborot va kiberxavfsizlik sohasidagi alohida mehnat sharoitlari uchun xodim lavozim maoshining kamida 100 foizi miqdorida oylik ustama belgilanadi;

v) 2019-yil 1-yanvardan:

axborot-kommunikatsiya texnologiyalari, apparat vositalari va dasturiy mahsulotlar, himoya vositalari va boshqa texnik vositalarga texnik topshiriqlar boʻyicha xulosalar Markaz bilan majburiy tartibda kelishiladi;

davlat organlari va tashkilotlarining axborotlashtirish obyektlarida (davlat sirlari bundan mustasno) joriy etiladigan va foydalaniladigan apparat vositalari va dasturiy mahsulotlar majburiy ravishda Markazda attestatsiya va ekspertizadan oʻtkazilishi zarur;

Oʻzbekiston Respublikasi Prezidenti huzuridagi Loyiha boshqaruvi milliy agentligi axborot-kommunikatsiya texnologiyalari, apparat vositalari va dasturiy mahsulotlar, himoya vositalari hamda boshqa texnik vositalarga texnik topshiriqlar boʻyicha xulosalarni Markaz bilan majburiy kelishilgandan soʻng berilishini taʼminlasin.

11. Oʻzbekiston Respublikasi Axborot texnologiyalari va kommunikatsiyalarini rivojlantirish vazirligi va Oʻzbekiston Respublikasi Xususiylashtirilgan korxonalarga koʻmaklashish va raqobatni rivojlantirish davlat qoʻmitasi:

Oʻzbekiston Respublikasi Axborot texnologiyalari va kommunikatsiyalarini rivojlantirish vazirligi huzuridagi Aloqa, axborotlashtirish va telekommunikatsiya texnologiyalari sohasida nazorat boʻyicha inspeksiyaga biriktirilgan transport vositalari va boshqa mol-mulkni Davlat inspeksiyasiga;

Oʻzbekiston Respublikasi Axborot texnologiyalari va kommunikatsiyalarini rivojlantirish vazirligining Axborot xavfsizligi va jamoat tartibini taʼminlashga koʻmaklashish markaziga biriktirilgan texnik va transport vositalari, shuningdek, boshqa mol-mulkni Markaz balansiga begʻaraz oʻtkazsin, Xavfsiz shahar loyihasini amalga oshirish uchun moʻljallangan mol-mulk bundan mustasno.

12. Davlat inspeksiyasi va Markaz operativ boshqaruv huquqi asosida Toshkent shahar, Doʻrmon yoʻli koʻchasi, 31-uy manzilidagi binoda joylashtirishsin.

13. Quyidagilar:

“Oʻzbektelekom” AKga Markazni zarur aloqa vositalari va yuqori tezlikdagi Internet tarmogʻi bilan taʼminlash;

“Oʻzbekenergo” AJga Markazga ajratilgan binoni majburiy tartibda zaxira qilingan uzluksiz energiya taʼminoti bilan taʼminlash tavsiya etilsin.

14. Markaz axborot sohasida davlat xavfsizligini taʼminlash uchun olib kiriladigan zamonaviy axborot-kommunikatsiya texnologiyalari, kompyuter texnikasi, dasturiy mahsulotlar, apparat-dasturiy komplekslar, oʻquv va laboratoriya jihozlari, ehtiyot qismlar, butlovchi qismlar va radiodetallarga bojxona toʻlovlarini (bojxona rasmiylashtiruvi uchun yigʻimlardan tashqari) toʻlashdan ozod etilsin.

15. Oʻzbekiston Respublikasi Axborot texnologiyalari va kommunikatsiyalarini rivojlantirish vazirligi Oʻzbekiston Respublikasi Adliya vazirligi va manfaatdor vazirlik va idoralar bilan birgalikda bir oy muddatda:

Oʻzbekiston Respublikasi Axborot texnologiyalari va kommunikatsiyalarini rivojlantirish vazirligining “Xavfsiz shahar” jamoat tartibiga koʻmaklashish markazi faoliyatini tashkil etish toʻgʻrisidagi Oʻzbekiston Respublikasi Prezidenti qarori loyihasini kiritsin;

qonun hujjatlariga ushbu qarordan kelib chiqadigan oʻzgartish va qoʻshimchalar toʻgʻrisida Oʻzbekiston Respublikasi Vazirlar Mahkamasiga takliflar kiritsin;

oʻzlari qabul qilgan idoraviy hujjatlarni Oʻzbekiston Respublikasi Prezidentining ushbu qaroriga muvofiqlashtirsin.

16. Mazkur qarorning ijrosini nazorat qilish Oʻzbekiston Respublikasi Davlat xavfsizlik xizmati Raisi I.B. Abdullayev zimmasiga yuklansin.

1. Ushbu Nizom Oʻzbekiston Respublikasi Axborotlashtirish va telekommunikatsiyalar sohasida nazorat boʻyicha davlat inspeksiyasining (keyingi oʻrinlarda — Davlat inspeksiyasi) maqomi, asosiy vazifalari, funksiyalari, huquqlari, javobgarligi va faoliyatining tashkiliy asoslarini, shuningdek, uning rahbarlari funksional majburiyatlarini belgilaydi.

2. Davlat inspeksiyasi aloqa, axborotlashtirish va telekommunikatsiya texnologiyalari, davriy bosma nashrlarni tarqatish va mualliflik huquqlari sohasida fonogrammalar, audiovizual asarlar, elektron hisoblash mashinalari (keyingi oʻrinlarda — EHM) uchun dasturlar tarqatilishida qonun hujjatlariga rioya qilinishi yuzasidan nazoratni amalga oshiruvchi maxsus maqomga ega vakolatli davlat organi hisoblanadi.

3. Davlat inspeksiyasi oʻz faoliyatida Oʻzbekiston Respublikasi Konstitutsiyasi va qonunlariga, Oʻzbekiston Respublikasi Oliy Majlisi palatalarining qarorlariga, Oʻzbekiston Respublikasi Prezidentining farmonlari, qarorlari va farmoyishlariga, Oʻzbekiston Respublikasi Vazirlar Mahkamasining qarorlari va farmoyishlariga, shuningdek, boshqa normativ-huquqiy hujjatlar va ushbu Nizomga amal qiladi.

4. Davlat inspeksiyasining oʻz vakolati doirasida qabul qiladigan qarorlari aloqa, axborotlashtirish va telekommunikatsiya texnologiyalari, davriy bosma nashrlarni tarqatish, audiovizual asarlar, fonogrammalar, EHM uchun dasturlarni (sotish, ijaraga berish va barchaning eʼtiboriga yetkazish) tarqatish sohasida faoliyat yurituvchi barcha davlat va xoʻjalik boshqaruvi organlari, mahalliy davlat hokimiyati organlari, boshqa tashkilotlar va idoralar, xoʻjalik yurituvchi subyektlar tomonidan bajarilishi majburiy hisoblanadi.

5. Davlat inspeksiyasi davlat va xoʻjalik boshqaruvi organlarida, mahalliy davlat hokimiyati organlarida, boshqa tashkilotlar va idoralarda axborot-kommunikatsiya texnologiyalari, axborot va kiberxavfsizlikni qonun hujjatlarida belgilangan tartibda joriy etish va rivojlantirish holati ustidan nazorat, monitoring olib borish, uni oʻrganish va tekshirish vakolatiga ega.

6. Davlat inspeksiyasi yuridik shaxs hisoblanadi, oʻzining mustaqil balansiga, Oʻzbekiston Respublikasining bank muassasalarida hisob raqamiga, shuningdek, Oʻzbekiston Respublikasi Davlat gerbi tasviri tushirilgan va oʻz nomi davlat tilida yozilgan muhrga ega.

Qoraqalpogʻiston Respublikasi, viloyatlar va Toshkent shahar hududiy inspeksiyalari yuridik shaxs hisoblanmaydi hamda oʻz faoliyatini ushbu Nizomga muvofiq amalga oshiradi.

7. Davlat inspeksiyasining rasmiy nomi:

a) davlat tilida:

toʻliq nomi — Oʻzbekiston Respublikasi Axborotlashtirish va telekommunikatsiyalar sohasida nazorat boʻyicha davlat inspeksiyasi, qisqartirilgan nomi — Oʻzaloqanazorat;

b) rus tilida:

toʻliq nomi — Gosudarstvennaya inspeksiya po kontrolyu v sfere informatizatsii i telekommunikatsiy Respubliki Uzbekistan, qisqartirilgan nomi — Gosinspeksiyasvyazi;

v) ingliz tilida:

toʻliq nomi — The State Inspection for control in the field of informatization and telecommunication of the Republic of Uzbekistan.

8. Davlat inspeksiyasi tuzilmasiga:

Davlat inspeksiyasining markaziy apparati;

Qoraqalpogʻiston Respublikasi, viloyatlar va Toshkent shahar hududiy inspeksiyalari;

“Texnik koʻmaklashish markazi” davlat unitar korxonasi kiradi.

Davlat inspeksiyasi boshligʻiga, zarurat boʻlganda, belgilangan shtatlar soni doirasida tuzilmaga va shtatlar jadvaliga oʻzgartirishlar kiritish huquqi beriladi.

9. Quyidagilar yuzasidan davlat nazoratini amalga oshirish Davlat inspeksiyasining asosiy vazifalari hisoblanadi:

1) aloqa, axborotlashtirish va telekommunikatsiya texnologiyalari, davriy bosma nashrlarni tarqatish sohasida qonun hujjatlari, normativ hujjatlar va davlat standartlari talablariga rioya qilish;

2) oʻz vakolati doirasida pochta aloqasi, axborot texnologiyalari va telekommunikatsiyalari xizmatlarining sifatli taqdim etilishi, davriy bosma nashrlar, fonogrammalar, audiovizual asarlar va EHM uchun dasturlar tarqatilishida isteʼmolchilar huquqlarini himoya qilish choralarini taʼminlash;

3) fonogrammalar, audiovizual asarlar, EHM uchun dasturlar tarqatish (sotish, ijaraga berish va barchaning eʼtiboriga yetkazish)da mualliflik huquqlari sohasidagi qonun hujjatlariga va normativ hujjatlarga rioya qilish;

4) normativ-huquqiy hujjatlar talablariga muvofiq davlat organlari va tashkilotlarida, shuningdek, boshqa tashkilot va idoralarda “Elektron hukumat” tizimida infratuzilmani rivojlantirish va axborot-kommunikatsiya texnologiyalaridan samarali foydalanish;

5) ish va boshqaruv jarayonlarini avtomatlashtirish, integratsiyalashgan axborot tizimlarini, maʼlumotlar uzatish va almashishning idoralararo tarmoqlarini joriy etish va ulardan foydalanish, davlat axborot resurslari integratsiyasi, shu jumladan elektron davlat xizmatlari koʻrsatish samaradorligi;

6) “oxirgi milya” tamoyili boʻyicha Internet tarmogʻidan keng polosali foydalanishni, multiservis aloqa tarmoqlari texnologiyalarini, mobil aloqa bozorini, boshqa zamonaviy telekommunikatsiya xizmatlarini, shuningdek, pochta aloqasi xizmatlarini va davriy bosma nashrlar tarqatishni kengaytirish yoʻli bilan telekommunikatsiya infratuzilmasini rivojlantirish.

10. Davlat inspeksiyasi oʻziga yuklangan vazifalarga muvofiq quyidagi funksiyalarni bajaradi:

1) aloqa, axborotlashtirish va telekommunikatsiya texnologiyalari, davriy bosma nashrlarni tarqatish sohasida qonun hujjatlari, normativ hujjatlar va davlat standartlari talablariga rioya qilinishi yuzasidan nazorat sohasida:

xoʻjalik yurituvchi subyektlar tomonidan litsenziyalash haqidagi qonun hujjatlari, litsenziya bitimlari bajarilishi, radiochastota spektridan foydalanish, pochta aloqasi va telekommunikatsiyalar tarmoqlaridagi, maʼlumotlar uzatishdagi xavfsizlik, axborot xavfsizligi va kiberxavfsizlik, teleradioeshittirish va axborot tizimlarida xavfsizlik boʻyicha texnik va texnologik talablar bajarilishini nazorat qiladi, oʻrganadi va tekshiradi;

aloqa, axborotlashtirish va telekommunikatsiya texnologiyalari sohasida litsenziya talablari va shartlarini buzgan holda, shuningdek, tegishli litsenziyani rasmiylashtirmasdan faoliyatni amalga oshirayotgan xoʻjalik yurituvchi subyektlarni aniqlaydi, oʻrganadi va tekshiradi;

telekommunikatsiyalar, pochta aloqasi, davriy bosma nashrlarni tarqatish xizmatlarini koʻrsatishda, shuningdek, telekommunikatsiyalar tarmoqlarini, shu jumladan mobil aloqa, radioelektron vositalar, yuqori chastotali qurilmalar va telekommunikatsiya tizimlari tarmoqlarini loyihalash, qurish, qayta qurish, kengaytirish va foydalanishda qonun hujjatlari, normativ hujjatlar va davlat standartlari, amaldagi normalar va qoidalarning bajarilishini nazorat qiladi va tekshiradi;

elektr aloqa tarmoqlarining umumiy foydalanishdagi aloqa tarmoqlariga ulanishi qoidalarining, jumladan ulanish shartlarining bajarilishini nazorat qiladi, oʻrganadi va tekshiradi;

radioelektron vositalarni, yuqori chastotali qurilmalarni va telekommunikatsiya tizimlarini Oʻzbekiston Respublikasi hududida sotib olish (berish) hamda chet eldan olib kelish tartibini, pochta va telekommunikatsiyalar tarmoqlari va inshootlarida sertifikatlashtirilgan asbob-uskunalar qoʻllanishini nazorat qiladi, oʻrganadi va tekshiradi;

radioelektron vositalar va yuqori chastotali qurilmalarning elektromagnit moslashuvchanligini taʼminlash boʻyicha tashkiliy-texnik tadbirlar bajarilishi ustidan nazorat, tekshiruv va monitoring olib boradi;

radioelektron vositalar va yuqori chastotali qurilmalar radionurlanishlari parametrlari, radiochastota spektridan foydalanish qoidalariga rioya qilinishi ustidan nazorat, tekshiruv va monitoring olib boradi, aloqa, axborotlashtirish va telekommunikatsiya texnologiyalari, radiochastota spektridan foydalanish va elektron raqamli imzo sohasida monitoringni olib borish, huquqbuzarliklarning oldini olish va ularga chek qoʻyish masalalarida huquqni muhofaza qilish organlari va boshqa organlar bilan oʻzaro hamkorlik qiladi;

jinoiy faoliyatdan olingan daromadlarni legallashtirishga va terrorizmni moliyalashtirishga qarshi kurashish boʻyicha qonun hujjatlarida belgilangan ichki nazorat qoidalariga pochta aloqasi operatorlari, provayderlari rioya etishini belgilangan tartibda monitoring qiladi, oʻrganadi, tekshiradi va nazorat qiladi;

pochta aloqasi xizmatlari tashkil etilishini, pochta joʻnatmalarini va pul summalarini saqlash taʼminlanishini, pochta joʻnatmalari qabul qilish, qayta ishlash, topshirish texnologiyalariga rioya etilishini va ularning belgilangan nazorat muddatlarida oʻtkazilishini oʻrganadi va tekshiradi;

aloqa, axborotlashtirish va telekommunikatsiya texnologiyalari sohasida qoʻllanadigan oʻlchash vositalarini tekshirish va kalibrlash tartibiga rioya etilishini nazorat qiladi;

telekommunikatsiyalar, pochta aloqasi, teleradioeshittirish tarmoqlarida va axborot tizimlarida axborot xavfsizligini taʼminlash ishlarining xoʻjalik yurituvchi subyektlar tomonidan bajarilishi yuzasidan nazoratni, oʻrganishni va tekshiruvni tashkil etadi;

aloqa, axborotlashtirish va telekommunikatsiya texnologiyalari sohasida huquqbuzarliklar profilaktikasi, ularning oldini olish, ularni aniqlash va ularga chek qoʻyish boʻyicha kompleks tadbirlar amalga oshirilishini taʼminlaydi;

monitoring va tekshirishlar natijalari boʻyicha aniqlangan qoidabuzarliklar haqida tegishli qarorlar qabul qiladi, koʻrsatmalar beradi va ularni bartaraf etish muddatlarini belgilaydi, shuningdek, litsenziya beradigan organga xoʻjalik yurituvchi subyektlar litsenziyalarining amal qilishini toʻxtatib turish yoki tugatish toʻgʻrisida takliflar kiritadi, Davlat inspeksiyasi vakolatlariga kirmaydigan qoidabuzarliklar boʻyicha materiallarni belgilangan tartibda tegishli vakolatli organlarga beradi;

oʻtkazilgan nazorat natijalarini tahlil qiladi va umumlashtiradi, aniqlangan kamchiliklar va qoidabuzarliklarni bartaraf etish yuzasidan takliflar tayyorlaydi, ularni tegishli davlat organlariga koʻrib chiqish uchun kiritadi;

aloqa, axborotlashtirish va telekommunikatsiya texnologiyalari sohasida faoliyatni amalga oshiruvchi xoʻjalik yurituvchi subyektlar tomonidan axborot xavfsizligini, shu jumladan foydalanilishi cheklangan axborotning himoyalanishini taʼminlash, axborotni kriptografik himoyalash sohasidagi faoliyat turi boʻyicha litsenziya bitimlari va mahsulotlarni sertifikatlash shartlariga rioya etish masalalari borasida davlat organlari bilan oʻzaro hamkorlik qiladi;

amaldagi qonun hujjatlariga muvofiq maʼmuriy jazo choralarini qoʻllaydi;

2) oʻz vakolati doirasida pochta aloqasi, axborot texnologiyalari va telekommunikatsiyalari xizmatlarining sifatli taqdim etilishi, davriy bosma nashrlar, fonogrammalar, audiovizual asarlar va EHM uchun dasturlar tarqatilishida isteʼmolchilar huquqlarini himoya qilish choralarini taʼminlash yuzasidan nazorat sohasida:

respublika hududida joylashgan aloqa, axborotlashtirish va telekommunikatsiya texnologiyalari sohasidagi xoʻjalik yurituvchi subyektlarda pochta aloqasi, axborot texnologiyalari va telekommunikatsiyalar, davriy matbuot nashrlarini tarqatish xizmatlari parametrlari va sifat koʻrsatkichlarining amaldagi normalarga muvofiqligi yuzasidan monitoring, tekshiruv va nazorat oʻtkazadi;

texnik vositalar va axborot tizimlari orqali telekommunikatsiyalar tarmoqlari xizmatlarining parametrlari va sifat koʻrsatkichlarining muvofiqligini oʻlchaydi va monitoring olib boradi;

pochta aloqasi, telekommunikatsiyalar va davriy bosma nashrlarni tarqatish xizmatlarini hamda davlat va xoʻjalik boshqaruvi organlari, mahalliy davlat hokimiyati organlari tomonidan, shuningdek, tashkiliy-huquqiy shakli va idoraviy mansubligidan qatʼi nazar, boshqa tashkilotlar va idoralar tomonidan elektron davlat xizmatlarini koʻrsatish masalalari boʻyicha yuridik va jismoniy shaxslarning murojaatlarini zarur holatlarda joyiga borib hamda tegishli hujjatlarni oʻrgangan holda qonun hujjatlariga muvofiq koʻrib chiqadi;

vakolatli davlat organlari tomonidan tartibga solinadigan tariflar roʻyxatiga kiruvchi pochta aloqasi va telekommunikatsiyalar xizmatlariga tariflarning toʻgʻri qoʻllanilishini qonun hujjatlarida belgilangan tartibda tekshiradi;

koʻrsatiladigan xizmatlar, tariflar, xizmatlar koʻrsatish qoidalari toʻgʻrisidagi axborotning, aloqa, axborotlashtirish va telekommunikatsiya texnologiyalari, davriy matbuot nashrlarini tarqatish sohasida xoʻjalik yurituvchi subyektlarning ish tartibi va ularni tartibga soluvchi boshqa axborotlarning mavjudligi va foydalanuvchilar uchun tushunarliligini, shuningdek, ular tomonidan koʻrsatiladigan xizmatlar hajmining toʻliqligi va muddatlarini nazorat qiladi;

Oʻzbekiston Respublikasi hududida xorijiy ommaviy axborot vositalarining teleradiomahsulotlarini va davriy nashrlarini tarqatish tartibiga rioya qilinishini belgilangan tartibda nazorat qiladi, oʻrganadi va tekshiradi;

pochta aloqasi, telekommunikatsiyalar va davriy matbuot nashrlarini tarqatish xizmatlari sifati boʻyicha statistik hisobotlarning ishonchliligiga rioya etilishini nazorat qiladi va tekshiradi;

hisoblangan moliyaviy sanksiyalar (jarimalar)ning belgilangan muddatlarga rioya qilingan holda toʻlanishi va toʻlanayotgan moliyaviy sanksiyalar (jarimalar)ning summasi toʻgʻriligini nazorat qiladi;

aloqa mahsulotlari sifatiga va isteʼmolchilarning huquqlarini himoya qilishga, telekommunikatsiyalar vositalari parametrlariga, radioelektron vositalar va yuqori chastotali qurilmalar radionurlanishlariga tegishli normativ-huquqiy hujjatlar, texnik reglamentlar, standartlar, texnik shartlar, qoidalar, yoʻriqnomalar, litsenziya talablari va shartlari loyihalarini koʻrib chiqadi va ular boʻyicha xulosalar beradi;

aloqa, axborotlashtirish va telekommunikatsiya texnologiyalari sohasida normativ-huquqiy hujjatlar, texnik reglamentlar, standartlar, normalar, qoidalar va boshqa normativ hujjatlarni ishlab chiqish, qayta koʻrib chiqish boʻyicha buyurtmachi funksiyalarini bajaradi;

3) fonogrammalar, audiovizual asarlar, EHM uchun dasturlar tarqatish (sotish, ijaraga berish, barchaning eʼtiboriga yetkazish)da mualliflik huquqlari sohasidagi qonun hujjatlariga va normativ hujjatlarga rioya qilinishi yuzasidan nazorat sohasida:

faoliyatni amalga oshirishda litsenziya bitim talablari va shartlarining xoʻjalik yurituvchi subyektlar tomonidan bajarilishini nazorat qiladi, oʻrganadi va tekshiradi;

fonogrammalar, audiovizual asarlar, EHM uchun dasturlarni tarqatishda mualliflik huquqlariga rioya etilishini oʻrganadi, monitoring qiladi va tekshiradi, uning yakunlari boʻyicha tegishli xulosalar tayyorlaydi;

audiovizual asarlar, fonogrammalar va EHM uchun dasturlarni sotish, ijaraga berish va barchaning eʼtiboriga yetkazish boʻyicha faoliyatni amalga oshiradigan xoʻjalik yurituvchi subyektlarni tekshirish natijalarini tahlil qiladi va umumlashtiradi hamda tahliliy materiallarni Oʻzbekiston Respublikasi Intellektual mulk agentligiga taqdim etadi;

Internet tarmogʻida mualliflik huquqi obyektlari noqonuniy tarqalishini (barchaning eʼtiboriga yetkazilishini) bartaraf etish choralarini koʻradi;

4) normativ-huquqiy hujjatlar talablariga muvofiq davlat organlari va tashkilotlarida, shuningdek, boshqa tashkilotlar va idoralarda “Elektron hukumat” tizimida infratuzilmani rivojlantirish va axborot-kommunikatsiya texnologiyalaridan samarali foydalanishni nazorat qilish sohasida:

davlat va xoʻjalik boshqaruvi organlari, mahalliy davlat hokimiyati organlarida, shuningdek, aloqa, axborotlashtirish va telekommunikatsiya texnologiyalari sohasi korxonalari va tashkilotlarida “Elektron hukumat” tizimida axborot-kommunikatsiya texnologiyalarini joriy etish va rivojlantirish jarayonlarini belgilangan tartibda oʻrganadi, monitoring qiladi va tekshiradi;

“Elektron hukumat” tizimida davlat va xoʻjalik boshqaruvi organlari, mahalliy davlat hokimiyati organlarida axborot-kommunikatsiya texnologiyalari infratuzilmasining joriy holatini oʻrganadi va tekshiradi;

davlat va xoʻjalik boshqaruvi organlarida, mahalliy davlat hokimiyati organlarida, shuningdek, boshqa tashkilot va idoralarda aloqa, axborotlashtirish va telekommunikatsiya texnologiyalari sohasida qonun hujjatlari, normativ hujjatlar va davlat standartlari talablari bajarilishini nazorat qiladi;

davlat va xoʻjalik boshqaruvi organlarida, mahalliy davlat hokimiyati organlarida, shuningdek, boshqa tashkilotlar va idoralarda axborot resurslari va elektron davlat xizmatlarining mavjudligi hamda ulardan foydalanishning imkoni yaratilganligi ustidan monitoring va tekshiruv olib boradi;

5) ish va boshqaruv jarayonlarini avtomatlashtirish, integratsiyalashgan axborot tizimlarini, maʼlumotlar uzatish va almashishning idoralararo tarmoqlarini joriy etish va ulardan foydalanish, davlat axborot resurslari integratsiyasi, shu jumladan elektron davlat xizmatlari koʻrsatish samaradorligi yuzasidan nazorat sohasida:

ish va boshqaruv jarayonlarini avtomatlashtirish, integratsiyalashgan axborot tizimlari, maʼlumotlar uzatish va maʼlumotlar almashishning idoralararo tarmoqlarini joriy etish hamda ulardan foydalanish, davlat axborot resurslari integratsiyasi holatini tahlil qiladi, baholaydi va tekshiradi;

davlat va xoʻjalik boshqaruvi organlarida, mahalliy davlat hokimiyati organlarida axborot-kommunikatsiya texnologiyalarini joriy etish va rivojlantirish jarayonlari ustidan olib borilgan monitoring va tekshiruv natijalarini tahlil qiladi va umumlashtiradi, aniqlangan kamchiliklarni bartaraf etish boʻyicha tegishli xulosa va takliflar tayyorlaydi;

davlat va xoʻjalik boshqaruvi organlari, mahalliy davlat hokimiyati organlari tomonidan axborot-kommunikatsiya texnologiyalarining holati va ularni rivojlantirish toʻgʻrisida axborotlarning ishonchliligi taʼminlanishi va oʻz vaqtida taqdim etilishini oʻrganadi, tekshiradi va monitoringini olib boradi;

6) “oxirgi milya” tamoyili boʻyicha Internet tarmogʻidan keng polosali foydalanishni, multiservis aloqa tarmoqlari texnologiyalarini, mobil aloqa bozorini, boshqa zamonaviy telekommunikatsiya xizmatlarini, shuningdek, pochta aloqasi xizmatlarini va davriy bosma nashrlar tarqatishni kengaytirish yoʻli bilan telekommunikatsiya infratuzilmasini rivojlantirish yuzasidan nazorat sohasida:

qonun hujjatlariga muvofiq telekommunikatsiya tarmoqlari, axborotlashtirish tizimlari va vositalari yaratilishi va ishlatilishi boʻyicha xoʻjalik yurituvchi subyektlar faoliyatini tekshiradi, oʻrganadi va nazorat qiladi;

aloqa, axborotlashtirish va telekommunikatsiya texnologiyalari tarmoqlarining yangidan quriladigan va qayta quriladigan obyektlarini foydalanishga qabul qilib olish komissiyalarida qatnashadi.

Davlat inspeksiyasi qonun hujjatlariga muvofiq boshqa vazifalarni ham bajarishi mumkin.

11. Quyidagilar Davlat inspeksiyasi markaziy apparatining asosiy vazifalari hisoblanadi:

1) hududiy inspeksiyalar bilan birgalikda Davlat inspeksiyasiga yuklatilgan vazifa va funksiyalarning samarali bajarilishini taʼminlash;

2) hududiy inspeksiyalarni rivojlantirishga koʻmaklashish va ularni rivojlantirish istiqbollarini belgilash;

3) Davlat inspeksiyasiga yuklangan vazifalarni bajarishda boshqa vazirliklar va idoralar bilan oʻzaro hamkorlikni tashkil qilish va hududiy inspeksiyalar faoliyatini muvofiqlashtirish va nazorat qilish;

4) aloqa, axborotlashtirish va telekommunikatsiya texnologiyalari, axborot xavfsizligi hamda mualliflik huquqini himoya qilish sohasidagi yoʻnalishlar boʻyicha tegishli taʼlim muassasalarida, shuningdek, respublika vakolatli organlarining ixtisoslashgan oʻquv yurtlarida Davlat inspeksiyasi xodimlari qayta tayyorlanishini va malakasi oshirilishini tashkil etish.

12. Davlat inspeksiyasining markaziy apparati oʻziga yuklangan asosiy vazifalarga muvofiq quyidagi funksiyalarni amalga oshiradi:

1) hududiy inspeksiyalar bilan birgalikda Davlat inspeksiyasiga yuklatilgan vazifalar va funksiyalar bajarilishini taʼminlaydi;

2) olib boriladigan nazorat, tekshiruv va oʻrganish natijalarini tahlil qiladi hamda umumlashtiradi, aniqlangan kamchiliklar va qoidabuzarliklarini bartaraf etish yuzasidan takliflar tayyorlaydi, ularni koʻrib chiqish uchun tegishli davlat organlariga kiritadi;

3) monitoring va tekshirishlar natijalari boʻyicha aniqlangan qoidabuzarliklar yuzasidan tegishli qarorlar, ularni bartaraf etish muddatlari belgilangan koʻrsatmalar, xoʻjalik yurituvchi subyektlar litsenziyalarining amal qilishini toʻxtatib turish yoki tugatish toʻgʻrisida takliflar, shuningdek, Davlat inspeksiyasi vakolatlariga kirmaydigan qoidabuzarliklar boʻyicha materiallarni belgilangan tartibda tegishli vakolatli organlarga topshirish uchun tayyorlaydi;

4) aloqa sifatiga va isteʼmolchilarning huquqlarini himoya qilishga, telekommunikatsiya vositalari parametrlariga, radioelektron vositalar va yuqori chastotali qurilmalar radionurlanishlariga tegishli normativ-huquqiy hujjatlar, texnik reglamentlar, standartlar, texnik shartlar, qoidalar, yoʻriqnomalar, litsenziya talablari va shartlari loyihalarini koʻrib chiqadi va ular boʻyicha taklif tayyorlaydi;

5) davlat va xoʻjalik boshqaruvi organlari, mahalliy davlat hokimiyati organlarida, shuningdek, boshqa tashkilotlar va idoralarda axborot-kommunikatsiya texnologiyalarining holati hamda uni rivojlantirish boʻyicha hududiy inspeksiyalar tomonidan taqdim etiladigan hisobotlar va axborotlarning ishonchliligini oʻrganadi.

Davlat inspeksiyasining markaziy apparati qonun hujjatlariga muvofiq boshqa funksiyalarni ham bajarishi mumkin.

13. Hududiy inspeksiyalar tegishli hududda Davlat inspeksiyasiga yuklangan va ushbu Nizom bilan belgilangan vazifalar hamda funksiyalarning samarali bajarilishini amalga oshiradi.

Bundan tashqari, hududiy inspeksiyalar:

1) yuklangan vazifa va funksiyalarni amalga oshirish doirasida yillik, choraklik va oylik ish rejalarini ishlab chiqadi hamda belgilangan tartibda Davlat inspeksiyasi bilan kelishadi;

2) aloqa, axborotlashtirish va telekommunikatsiya texnologiyalari, fonogrammalar, audiovizual asarlar, EHM uchun dasturlarni tarqatishda mualliflik huquqlari sohasida amalga oshirilgan ishlar toʻgʻrisida belgilangan tartibda hisobot va axborotlarni taqdim etadi;

3) Davlat inspeksiyasi ish rejalarini tayyorlashda qatnashadi;

4) aholini ommaviy axborot vositalari orqali Davlat inspeksiyasining maqsadlari, vazifalari va amalga oshirilayotgan faoliyatining aniq natijalari toʻgʻrisida muntazam xabardor qilib boradi.

Hududiy inspeksiyalar qonun hujjatlariga muvofiq boshqa funksiyalarni ham amalga oshirishi mumkin.

14. Davlat inspeksiyasi oʻziga yuklangan vazifalar va funksiyalarni amalga oshirish uchun quyidagi huquqlarga ega:

1) aloqa, axborotlashtirish va telekommunikatsiya texnologiyalari, shuningdek, davriy bosma nashrlarni tarqatish sohasidagi qonun hujjatlari, normativ hujjatlar va davlat standartlari talablari va koʻrsatiladigan xizmatlar sifati buzilishi faktlari toʻgʻrisida maʼlumotlar olish va aniqlash;

2) aloqa, axborotlashtirish, telekommunikatsiya texnologiyalari, audiovizual asarlar, fonogrammalar va EHM uchun dasturlarni, davriy bosma nashrlarni tarqatish (sotish, ijaraga berish va barchaning eʼtiboriga yetkazish) sohasida faoliyat yuritadigan xoʻjalik yurituvchi subyektlarni, shuningdek, davlat va xoʻjalik boshqaruvi organlari, mahalliy davlat hokimiyati organlarida axborot-kommunikatsiya texnologiyalarini joriy etish va rivojlantirishning holatini oʻrganish va tekshirish;

3) aloqa, axborotlashtirish va telekommunikatsiya texnologiyalari, davriy bosma nashrlarni tarqatish sohasida faoliyatni amalga oshiruvchi xoʻjalik yurituvchi subyektlarga, ular tomonidan normativ-huquqiy hujjatlar, texnik reglamentlar, standartlar, normalar talablari va taqdim etilayotgan xizmatlar sifati buzilgan holda belgilangan tartibda moliyaviy sanksiyalar (jarimalar)ni hisoblash toʻgʻrisida qaror qabul qilish;

4) davlat va xoʻjalik boshqaruvi, mahalliy davlat hokimiyati organlari, boshqa tashkilotlar va idoralardan oʻz faoliyatini amalga oshirish uchun zarur boʻlgan axborotlar, hujjatlar, maʼlumotnomalar va boshqa materiallarni soʻrash va olish;

5) aloqa, axborotlashtirish, va telekommunikatsiya texnologiyalari, radiochastota spektridan foydalanish va davriy bosma nashrlarni tarqatish sohasidagi maʼmuriy huquqbuzarlik toʻgʻrisidagi ishlarni koʻrib chiqish va bayonnomalar tuzish, jinoiy faoliyatdan olingan daromadlarni legallashtirishga va terrorizmni moliyalashtirishga qarshi kurashish doirasida qonun hujjatlarining pochta aloqasi operatorlari, provayderlari tomonidan buzilishi holatlari aniqlangan taqdirda esa, ushbu holatlar toʻgʻrisidagi maʼlumotlarni tegishli davlat nazorati organlariga belgilangan tartibda yuborish;

6) fonogrammalar, audiovizual asarlar, EHM uchun dasturlarni tarqatishda mualliflik huquqlari sohasidagi maʼmuriy huquqbuzarlik toʻgʻrisida bayonnomalarni tuzish va koʻrib chiqish uchun sudga yuborish;

7) zarur hollarda, aloqa, axborotlashtirish va telekommunikatsiya texnologiyalari sohasidagi masalalarni tekshirish, oʻrganish va koʻrib chiqishda qatnashish uchun davlat va xoʻjalik boshqaruvi organlari, mahalliy davlat hokimiyati organlari, ilmiy-tadqiqot muassasalarining mutaxassislari va ekspertlarini jalb etish, shuningdek, huquqni muhofaza qilish organlari bilan hamkorlik qilish;

8) aloqa, axborotlashtirish, va telekommunikatsiya texnologiyalari, davriy bosma nashrlarni tarqatish sohasida faoliyatni amalga oshiruvchi xoʻjalik yurituvchi subyektlardan, shuningdek, davlat va xoʻjalik boshqaruvi organlari, mahalliy davlat hokimiyati organlaridan Davlat inspeksiyasi vakolatiga tegishli masalalar boʻyicha zarur maʼlumotlar, materiallar va hisobotlarni talab qilish;

9) vazirliklar, idoralar va boshqa tashkilotlardan, shu jumladan ilmiy-tadqiqot muassasalari va laboratoriyalardan oʻz vakolatlarini amalga oshirish uchun aloqa, axborotlashtirish va telekommunikatsiya texnologiyalari, davriy bosma nashrlarni tarqatish sohasidagi texnik hujjatlar, qoidalar, vositalarning ish normalarini olish;

10) Oʻzbekiston Respublikasi hududida radioelektron vositalar va yuqori chastotali qurilmalardan foydalanish monitoringini olib borish;

11) ekspert xulosasini olish uchun tekshirish va monitoring natijalarini vakolatli organlarga taqdim etish;

12) aloqa, axborotlashtirish va telekommunikatsiya texnologiyalari sohasidagi vositalar va inshootlarning texnik holatini, ulardan texnik foydalanish qoidalariga rioya etilishini nazorat qilish;

13) aloqa, axborotlashtirish va telekommunikatsiya texnologiyalari sohasida qurilish normalari va qoidalari buzilgan holda olib borilayotgan qurilish ishlarini aniqlangan kamchiliklar bartaraf etilgunga qadar toʻxtatib turish;

14) litsenziya bitimlari talab va shartlari xoʻjalik yurituvchi subyektlar tomonidan buzilgan holatlarda ularga ogohlantirishlar berish;

15) tashkiliy-huquqiy shaklidan va idoraviy mansubligidan qatʼi nazar xoʻjalik yurituvchi subyektlarga, yuridik va jismoniy shaxslarga, shuningdek, davlat va xoʻjalik boshqaruvi organlarining, mahalliy davlat hokimiyati organlarining axborot-kommunikatsiya texnologiyalarini joriy qilish va rivojlantirishning borishida qoidabuzarliklarga yoʻl qoʻygan mansabdor shaxslariga davlat nazorati doirasida olib borilgan oʻrganishlar, monitoring, tekshirishlar natijasida aniqlangan qoidabuzarliklarni bartaraf etish toʻgʻrisida bajarilishi majburiy boʻlgan koʻrsatmalar berish;

16) texnik vositalar va axborot tizimlari orqali telekommunikatsiyalar tarmoqlari xizmatlarining sifatini oʻlchash va monitoringini olib borish.

Davlat inspeksiyasi qonun hujjatlariga muvofiq boshqa huquqlarga ham ega boʻlishi mumkin.

15. Davlat inspeksiyasi:

1) oʻziga yuklangan vazifalar va funksiyalarning samarali bajarilishi va taqdim etiladigan tahliliy hujjatlarning xolisonaligi va kompleksliligi;

2) oʻz vakolatiga kirmaydigan qoidabuzarliklar boʻyicha maʼlumotlarning vakolatli organlarga oʻz vaqtida taqdim etilishi;

3) aloqa, axborotlashtirish va telekommunikatsiya texnologiyalari, fonogrammalar, audiovizual asarlar, EHM uchun dasturlarni tarqatishda mualliflik huquqlari sohasida fuqarolar va tadbirkorlik subyektlarining huquqlari va qonuniy manfaatlariga rioya etilishi va ularning himoyasi taʼminlanishi;

4) aloqa, axborotlashtirish va telekommunikatsiya texnologiyalari, fonogrammalar, audiovizual asarlar, EHM uchun dasturlarni tarqatishda mualliflik huquqlari sohasida qonun hujjatlari, normativ hujjatlar va davlat standartlari bajarilishi yuzasidan nazoratning taʼminlanishi uchun javob beradi.

16. Davlat inspeksiyasining markaziy apparati oʻziga yuklangan vazifalar va funksiyalarni amalga oshirish uchun Davlat inspeksiyasining huquqlari bilan bir qatorda quyidagi huquqlarga ham ega:

1) aloqa, axborotlashtirish va telekommunikatsiya texnologiyalari, davriy bosma nashrlarni tarqatish sohasida faoliyat koʻrsatuvchi va normativ-huquqiy hujjatlar, texnik reglamentlar, standartlar talablari va ular tomonidan koʻrsatiladigan xizmatlar sifati, respublika hududida foydalaniladigan telekommunikatsiya vositalari, radioelektron vositalar va yuqori chastotali qurilmalar radionurlanishlari parametrlarining muntazam ravishda buzilishiga yoʻl qoʻyayotgan xoʻjalik yurituvchi subyektlarning ayrim qurilmalari va texnologik uchastkalari ishini aniqlangan kamchiliklar bartaraf etilgunga qadar vaqtincha toʻxtatish toʻgʻrisida qaror chiqarish;

2) radionurlanishlar normasi va parametrlari buzilganda, shu jumladan televideniye va radioeshittirish dasturlarini qabul qilishda toʻsqinlik qilishga olib kelgan holatlarda radioelektron vositalar va yuqori chastotali qurilmalardan foydalanishga berilgan ruxsatnomalarning amal qilishini aniqlangan kamchiliklar bartaraf etilgungacha 10 kundan koʻp boʻlmagan muddatga toʻxtatib qoʻyish;

3) litsenziya bitimlarining talab va shartlari buzilganligi uchun litsenziyalarning amal qilishini tugatish va toʻxtatib turish, ularni bekor qilish toʻgʻrisida Oʻzbekiston Respublikasi Vazirlar Mahkamasiga takliflar kiritish;

4) aloqa, axborotlashtirish va telekommunikatsiya texnologiyalari, mualliflik huquqlari sohasida faoliyatni amalga oshirishga litsenziya olish uchun ariza beruvchi tomonidan taqdim etilgan hujjatlardagi maʼlumotlarning ishonchliligini tekshirish;

5) hududiy inspeksiyalardan Davlat inspeksiyasining markaziy apparatida koʻrib chiqiladigan masalalarni, shuningdek, normativ hujjatlar loyihalarini tahlil qilish va oʻrganish uchun zarur boʻlgan materiallar va maʼlumotlarni soʻrash va olish;

6) zarur boʻlganda, Davlat inspeksiyasida koʻrib chiqiladigan masalalarni oʻrganish, axborot va tahliliy materiallarni, shuningdek, normativ hujjatlar loyihalarini tayyorlash uchun hududiy inspeksiyalar rahbarlari hamda vakillarini jalb qilish, ushbu maqsadlar uchun ekspert va ishchi guruhlar tuzish;

7) hududiy inspeksiyalardan ular tomonidan kiritilgan normativ hujjatlar loyihalari qayta ishlab chiqilishini talab qilish, zarur boʻlganda, ularni puxtalashtirish uchun qaytarish;

8) hududiy inspeksiyalar rahbarlari hamda vakillari ishtirokida yigʻilishlar oʻtkazish;

9) hududiy inspeksiyalarga Davlat inspeksiyasiga yuklangan hamda tezkor hal etishni talab etadigan vazifalar va funksiyalarni bajarish bilan bogʻliq masalalar boʻyicha belgilangan tartibda topshiriqlar berish;

10) hududiy inspeksiyalar normativ-huquqiy hujjatlar, Oʻzbekiston Respublikasi Prezidentining topshiriqlari, shuningdek, Davlat inspeksiyasi va uning rahbariyati hujjatlari hamda topshiriqlarini bajarish boʻyicha faoliyatini belgilangan tartibda oʻrganish hamda tekshirish;

11) aloqa, axborotlashtirish va telekommunikatsiya texnologiyalari, fonogrammalar, audiovizual asarlar, EHM uchun dasturlarni tarqatishda mualliflik huquqlari sohasidagi qonun hujjatlari, normativ hujjatlar va davlat standartlari buzilishlari bilan bogʻliq materiallarni vakolatli organlar va huquqni muhofaza qilish organlariga belgilangan tartibda yuborish.

Davlat inspeksiyasining markaziy apparati qonun hujjatlariga muvofiq boshqa huquqlarga ham ega boʻlishi mumkin.

17. Davlat inspeksiyasining markaziy apparati quyidagilar uchun masʼul:

1) hududiy inspeksiyalar bilan birgalikda Davlat inspeksiyasiga yuklangan vazifalar va funksiyalarning sifatli va oʻz vaqtida bajarilishini, taqdim etiladigan tahliliy hujjatlarning xolisligini va kompleksliligini taʼminlash;

2) Davlat inspeksiyasi tomonidan kiritiladigan, shuningdek, oʻzi tomonidan qabul qilinadigan qarorlarni sifatli tayyorlash va ekspertizadan oʻtkazish;

3) markaziy apparat va hududiy inspeksiyalar tomonidan aloqa, axborotlashtirish va telekommunikatsiya texnologiyalari, fonogrammalar, audiovizual asarlar, EHM uchun dasturlarni tarqatish sohasida qonun hujjatlariga, normativ hujjatlar va davlat standartlariga rioya qilinishini nazorat qilish boʻyicha dasturlar, tadbirlar rejalari, “yoʻl xaritalari” va boshqa dasturiy hujjatlar amalga oshirilishini tashkil qilish;

4) markaziy apparat va hududiy inspeksiyalar xodimlari rezervini shakllantirish.

18. Hududiy inspeksiyalar oʻzlariga yuklangan vazifalar va funksiyalarni amalga oshirish uchun Davlat inspeksiyasining huquqlari bilan bir qatorda quyidagi huquqlarga ham ega:

1) davlat va xoʻjalik boshqaruvi hududiy organlaridan, mahalliy davlat hokimiyati organlaridan hududiy inspeksiyalarning vakolatiga kiradigan masalalarni hal qilish uchun zarur boʻlgan axborotni belgilangan tartibda soʻrash va olish;

2) davlat va xoʻjalik boshqaruvi hududiy organlariga, mahalliy davlat hokimiyati organlariga koʻrib chiqish uchun hududiy inspeksiyalar vakolatiga kiradigan masalalar boʻyicha takliflarni koʻrib chiqish uchun kiritish;

3) Davlat inspeksiyasi hayʼati va ilmiy-texnik kengashi ishida qatnashish;

4) Davlat inspeksiyasi topshirigʻiga koʻra aloqa, axborotlashtirish va telekommunikatsiya texnologiyalari, fonogrammalar, audiovizual asarlar, EHM uchun dasturlarni tarqatishda mualliflik huquqlari sohasidagi masalalar boʻyicha yigʻilishlar va seminarlar tashkil qilish va oʻtkazish;

5) hududiy inspeksiyalarning moddiy-texnika bazasini yaxshilash boʻyicha takliflar kiritish;

6) aloqa, axborotlashtirish va telekommunikatsiya texnologiyalari, fonogrammalar, audiovizual asarlar, EHM uchun dasturlarni tarqatishda mualliflik huquqlari sohasidagi qonun hujjatlari, normativ hujjatlar va davlat standartlari buzilishlari bilan bogʻliq materiallarni vakolatli organlar va huquqni muhofaza qilish organlariga belgilangan tartibda yuborish;

7) Davlat inspeksiyasiga hududiy inspeksiyalarning rahbarlari va xodimlari uchun malaka oshirish kurslarini tashkil qilish boʻyicha takliflar berish;

8) hududiy inspeksiyalarga malakali va qobiliyatli yosh xodimlarni jalb qilish.

Hududiy inspeksiyalar qonun hujjatlariga muvofiq boshqa huquqlarga ham ega boʻlishi mumkin.

19. Hududiy inspeksiyalar quyidagilar uchun masʼul:

1) hududiy inspeksiyalarga yuklangan vazifalar va funksiyalarning oʻz vaqtida va sifatli bajarilishini taʼminlash;

2) oʻz vakolatiga kirmaydigan masalalar boʻyicha aniqlangan kamchiliklar toʻgʻrisidagi maʼlumotlarni vakolatli organlarga oʻz vaqtida taqdim etish;

3) aloqa, axborotlashtirish va telekommunikatsiya texnologiyalari, fonogrammalar, audiovizual asarlar, EHM uchun dasturlarni tarqatishda mualliflik huquqlari sohasida fuqarolar va tadbirkorlik subyektlarining huquqlari va qonuniy manfaatlari himoya qilinishini va ularga rioya etilishini taʼminlash;

4) aloqa, axborotlashtirish va telekommunikatsiya texnologiyalari, fonogrammalar, audiovizual asarlar, EHM uchun dasturlarni tarqatishda mualliflik huquqlari sohasidagi qonun hujjatlari, normativ hujjatlar va davlat standartlari bajarilishi yuzasidan nazoratni taʼminlash;

5) Davlat inspeksiyasiga kiritiladigan hujjatlar va takliflarning loyihalarini ishlab chiqish sifati, yakuniy natijalari va amalga oshirish oqibatlari;

6) Davlat inspeksiyasining markaziy apparati bilan birgalikda aloqa, axborotlashtirish va telekommunikatsiya texnologiyalari, fonogrammalar, audiovizual asarlar, EHM uchun dasturlarni tarqatishda mualliflik huquqlari sohasida qonunchilikka rioya qilinishi yuzasidan nazoratni taʼminlash boʻyicha dasturlar, tadbirlar rejalari, “yoʻl xaritalari” va boshqa dasturiy hujjatlarning samarali amalga oshirilishi.

20. Quyidagilar Davlat inspeksiyasi boshligʻining asosiy funksional vazifalari hisoblanadi:

1) Oʻzbekiston Respublikasi Konstitutsiyasi va qonunlari, shuningdek, boshqa normativ-huquqiy hujjatlar talablariga rioya qilish;

2) Davlat inspeksiyasi faoliyatiga umumiy rahbarlikni amalga oshirish, Oʻzbekiston Respublikasi Prezidentining tegishli hujjatlari hamda boshqa qonun hujjatlari bilan yuklangan vazifa va funksiyalar bajarilishini tashkillashtirish;

3) Davlat inspeksiyasi faoliyatini yanada takomillashtirish boʻyicha Oʻzbekiston Respublikasi Prezidentining hujjatlari bilan tasdiqlangan konsepsiyalar, kompleks dasturlar va kompleks tadbirlar bajarilishini tanqidiy va puxta tahlil qilish;

4) Oʻzbekiston Respublikasi Prezidentining topshiriqlarini bajarish;

5) oʻz oʻrinbosarlarining va Davlat inspeksiyasi boshqa mansabdor shaxslarining vakolatlarini belgilash, ular oʻrtasida vazifalarni taqsimlash, Davlat inspeksiyasi faoliyatining ayrim uchastkalariga rahbarlik yuzasidan oʻz oʻrinbosarlarining va boshqa mansabdor shaxslarning vakolatlarini hamda shaxsiy javobgarligi darajasini belgilash;

6) Davlat inspeksiyasi xodimlarini tizimli qayta tayyorlash va ularning malakasini oshirishni tashkil qilish;

7) Davlat inspeksiyasi tizimida kadrlarni tanlash va joy-joyiga qoʻyish, ularning samarali faoliyati uchun zarur shart-sharoitlar yaratish, Davlat inspeksiyasining kadrlar zaxirasini shakllantirish;

8) boʻsh lavozimlarga taklif etilgan nomzodlarning, shuningdek, Davlat inspeksiyasiga ishga qabul qilinadigan boshqa kadrlarning professionalligi, chuqur bilimga egaligi, amaliy tajribasi, ishchanlik va maʼnaviy-axloqiy fazilatlari yuqori darajasi kafolatlanganligini taʼminlash;

9) Davlat inspeksiyasi faoliyatiga taalluqli boʻlgan masalalar boʻyicha normativ-huquqiy hujjatlarning loyihalari sifatli ishlab chiqilishini, Oʻzbekiston Respublikasining “Normativ-huquqiy hujjatlar toʻgʻrisida”gi, “Qonunlar loyihalarini tayyorlash va Oʻzbekiston Respublikasi Oliy Majlisining Qonunchilik palatasiga kiritish tartibi toʻgʻrisida”gi qonunlari, Oʻzbekiston Respublikasi Vazirlar Mahkamasining 2005-yil 14-fevraldagi 62-son qarori bilan tasdiqlangan Oʻzbekiston Respublikasi Vazirlar Mahkamasining Reglamenti, Oʻzbekiston Respublikasi Prezidentining 2018-yil 26-avgustdagi PF-5519-son Farmoni bilan tasdiqlangan Oʻzbekiston Respublikasi Prezidenti Administratsiyasining Reglamenti talablariga qatʼiy muvofiq holda ularning tegishli vazirlik va idoralarga kiritilishini tashkil qilish, ularni ishlab chiqishda qatnashish;

10) qonunchilik talablariga qatʼiy muvofiq ravishda Davlat inspeksiyasi rahbarlari va xodimlarining xizmat safarlarini tashkil etish, xizmat safarlarining asosliligi, samaradorligi hamda natijadorligini, safar xarajatlari uchun ajratiladigan mablagʻlardan maqsadli va oqilona foydalanilishini taʼminlash;

11) oʻz oʻrinbosarlarining, markaziy apparat boʻlinmalari va hududiy inspeksiyalar rahbarlarining faoliyati samaradorligi va natijadorligini tizimli ravishda tanqidiy tahlil qilish, Davlat inspeksiyasi kengashi majlislarida ularning shaxsiy hisobotlarini tinglash, chorak yakunlari boʻyicha zarur choralar koʻrish;

12) Davlat inspeksiyasi xodimlari va oʻrinbosarlarini ragʻbatlantirish va intizomiy javobgarlikka tortish masalalarini hal qilish, ularning shaxsiy javobgarligini oshirish boʻyicha tizimli chora-tadbirlarni amalga oshirish;

13) Xodimlarning tasdiqlangan odob-axloq qoidalari talablariga Davlat inspeksiyasi xodimlari tomonidan rioya etilishini taʼminlash;

14) Oʻzbekiston Respublikasining “Korrupsiyaga qarshi kurashish toʻgʻrisida”gi Qonuni talablariga muvofiq Davlat inspeksiyasi faoliyatida korrupsiya va boshqa huquqbuzarliklarning oldini olish choralarini koʻrish, shuningdek, ularning sodir etilishiga koʻmaklashadigan sabablar hamda sharoitlarni huquqni qoʻllash amaliyoti va qonunchilikni takomillashtirish chora-tadbirlarini ishlab chiqish hamda amalga oshirish orqali aniqlash, tahlil qilish, bartaraf etish;

15) Davlat inspeksiyasi va uning hududiy inspeksiyalari ishlarini tashkil qilishning zamonaviy shakllari joriy etilishini taʼminlash;

16) jismoniy va yuridik shaxslar murojaatlarini koʻrib chiqish boʻyicha samarali ishlarni tashkil qilish, aholi bilan bevosita va ochiq muloqotni yoʻlga qoʻyish, qonunchilik bilan belgilangan muddatlarda va tartibda jismoniy shaxslarning va yuridik shaxslar vakillarining shaxsiy qabullarini, shu jumladan sayyor qabullarini muntazam olib borish;

17) Oʻzbekiston Respublikasi Prezidentining Xalq qabulxonalari bilan samarali hamkorlik qilish, Davlat inspeksiyasi rahbarlari va xodimlarining qabulxonalar faoliyatida faol ishtirok etishini tashkil qilish, jismoniy va yuridik shaxslardan Oʻzbekiston Respublikasi Prezidentining Virtual qabulxonasiga kelib tushadigan murojaatlarning oʻz vaqtida va toʻliq koʻrib chiqilishini taʼminlash;

18) davlat sirlariga kiritilgan axborot va maxfiy axborot bilan ishlashda qonun hujjatlari talablariga rioya qilish;

19) Davlat inspeksiyasining, shuningdek, uning hududiy inspeksiyalarining barcha xodimlari tomonidan bajarilishi majburiy boʻlgan buyruqlar, farmoyishlar, qarorlar chiqarish hamda koʻrsatmalar berish;

20) zarur boʻlganda belgilangan umumiy shtatlar soni doirasida Davlat inspeksiyasi tuzilmasiga oʻzgartirishlar kiritish.

Davlat inspeksiyasi boshligʻi qonun hujjatlariga muvofiq boshqa vakolatlarni ham amalga oshirishi mumkin.

21. Quyidagilar Davlat inspeksiyasi boshligʻi oʻrinbosarlarining asosiy funksional vazifalari hisoblanadi:

1) Oʻzbekiston Respublikasi Konstitutsiyasi va qonunlari, shuningdek, boshqa normativ-huquqiy hujjatlar talablariga rioya qilish;

2) Davlat inspeksiyasi boshligʻi vaqtinchalik boʻlmaganda tegishli buyruq asosida uning vazifalarini bajarish;

3) mutasaddilik qilinadigan markaziy apparat boʻlinmalari va hududiy inspeksiyalarning faoliyatini muvofiqlashtirish, nazorat qilish va bevosita rahbarlik qilish, xodimlar oʻrtasida majburiyatlarni taqsimlash;

4) Davlat inspeksiyasi faoliyatini yanada takomillashtirish boʻyicha konsepsiyalar, kompleks dasturlar va tadbirlar bajarilishini tanqidiy hamda chuqur tahlil qilish;

5) mutasaddilik qilinadigan markaziy apparat boʻlinmalari va hududiy inspeksiyalar tomonidan vazifalarning bajarilishini soʻzsiz taʼminlash choralarini koʻrish, boshqarmalar rahbarlarining hisobotlarini tizimli ravishda eshitish hamda qayd etilgan koʻrsatkichlarga erishish borasida ularning shaxsiy masʼuliyatini oshirish;

6) mutasaddilik qilinadigan markaziy apparat boʻlinmalari va hududiy inspeksiyalar rahbarlarining har choraklik ish rejalarini tasdiqlash, ularning bajarilishi nazoratini taʼminlash;

7) Oʻzbekiston Respublikasi Prezidenti hujjatlari va topshiriqlari bajarilishini taʼminlash, ijro intizomini mustahkamlash boʻyicha kompleks amaliy chora-tadbirlarni amalga oshirish, shuningdek, topshiriqlarning oʻz vaqtida va sifatli bajarilishi uchun markaziy apparat boʻlinmalari va hududiy inspeksiyalar rahbarlarining shaxsiy masʼuliyatini oshirish choralarini koʻrish;

8) Davlat inspeksiyasi boshligʻining topshiriqlari va buyruqlari oʻz vaqtida hamda sifatli bajarilishini taʼminlash;

9) Davlat inspeksiyasi boshligʻiga mutasaddilik qilinadigan markaziy apparat boʻlinmalarida va hududiy inspeksiyalarda kadrlarni tanlash va joy-joyiga qoʻyishga doir takliflar taqdim etish, ularning professional darajasi, chuqur bilimga, amaliy tajribaga egaligi, ishchanlik va maʼnaviy-axloqiy fazilatlarining yuqoriligi kafolatlanganini taʼminlash, ularning kasb malakasini oshirish choralarini koʻrish, Davlat inspeksiyasining kadrlar zaxirasini shakllantirish;

10) normativ-huquqiy hujjatlar loyihalarining sifatli ishlab chiqilishini taʼminlash, qonun hujjatlari talablariga qatʼiy muvofiq ravishda Davlat inspeksiyasi tomonidan tayyorlangan hujjatlarning loyihalarini koʻrib chiqish va ularga viza qoʻyish;

11) qonunchilik talablariga qatʼiy muvofiq ravishda xizmat safarlarida boʻlish, xizmat safarlarining asosliligi, samaradorligi va natijadorligini hamda xizmat safarlari uchun ajratiladigan mablagʻlardan maqsadli va oqilona foydalanilishini taʼminlash;

12) mutasaddilik qilinadigan markaziy apparat boʻlinmalari va hududiy inspeksiyalarning rahbarlari hamda xodimlari faoliyati samaradorligi va natijadorligini tizimli ravishda tanqidiy tahlil qilish, Davlat inspeksiyasi kengashi majlislarida ularning shaxsiy hisobotlarini eshitish, yakunlari boʻyicha zarur choralar koʻrish;

13) Davlat inspeksiyasi boshligʻiga mutasaddilik qilinadigan markaziy apparat boʻlinmalari hamda hududiy inspeksiyalarning rahbarlari va xodimlarini ragʻbatlantirish va intizomiy javobgarlikka tortish, shu jumladan ularning egallab turgan lavozimiga noloyiqligi toʻgʻrisidagi masalani koʻrib chiqish boʻyicha takliflar berish, yuklangan vazifalar va funksional majburiyatlarning bajarilishi yuzasidan ularning shaxsiy masʼuliyatini oshirish boʻyicha tizimli chora-tadbirlarni amalga oshirish;

14) Davlat inspeksiyasi xodimlarining tasdiqlangan Odob-axloq qoidalari talablariga rioya qilishini, koʻrsatilgan qoidalarga mutasaddilik qilinadigan markaziy apparat boʻlinmalari va hududiy inspeksiyalarning rahbarlari va xodimlari tomonidan rioya qilinishini taʼminlash;

15) Oʻzbekiston Respublikasining “Korrupsiyaga qarshi kurashish toʻgʻrisida”gi Qonuni talablariga muvofiq Davlat inspeksiyasi faoliyatida korrupsiya va boshqa huquqbuzarliklarning oldini olish choralarini koʻrish, shuningdek, ularning sodir etilishiga imkon beruvchi sabablar hamda sharoitlarni huquqni qoʻllash amaliyoti va qonunchilikni takomillashtirish chora-tadbirlarini ishlab chiqish va amalga oshirish orqali aniqlash, tahlil qilish, bartaraf etish;

16) Davlat inspeksiyasi boshligʻiga davlat xizmatlarining samaradorligi, sifati va qulayligini oshirish boʻyicha takliflar kiritish;

17) jismoniy va yuridik shaxslar murojaatlarini koʻrib chiqishni tashkil qilish, aholi bilan bevosita va ochiq muloqotni yoʻlga qoʻyish, qonunchilik bilan belgilangan muddatlarda va tartibda jismoniy shaxslar va yuridik shaxslar vakillarining shaxsiy qabullarini, shu jumladan, sayyor qabullarni muntazam oʻtkazish;

18) Oʻzbekiston Respublikasi Prezidentining Xalq qabulxonalari bilan samarali hamkorlik qilish, ularning ishida faol qatnashish, Oʻzbekiston Respublikasi Prezidentining Virtual qabulxonasidan kelib tushadigan jismoniy va yuridik shaxslarning barcha murojaatlari oʻz vaqtida hamda toʻliq koʻrib chiqilishini taʼminlash;

19) davlat sirlari hisoblangan axborot va maxfiy axborot bilan ishlashda qonunchilik talablariga rioya etish.

22. Quyidagilar hududiy inspeksiyalar rahbarlarining asosiy funksional majburiyatlari hisoblanadi:

1) Oʻzbekiston Respublikasi Konstitutsiyasi va qonunlari, shuningdek, boshqa normativ-huquqiy hujjatlar talablariga rioya etish;

2) hududiy inspeksiyalar faoliyatiga umumiy rahbarlik qilish, ushbu hududiy inspeksiyalarga Oʻzbekiston Respublikasi Prezidentining tegishli farmonlari va qarorlari, boshqa qonun hujjatlari hamda Davlat inspeksiyasining buyruqlari, farmoyishlari bilan yuklangan vazifa va funksiyalarning bajarilishini tashkil qilish;

3) hududiy inspeksiyalar faoliyati bilan bogʻliq prognoz koʻrsatkichlarga soʻzsiz erishish boʻyicha amaliy chora-tadbirlarni ishlab chiqish va qabul qilish;

4) Oʻzbekiston Respublikasi Prezidenti hujjatlari va topshiriqlari, shuningdek, Davlat inspeksiyasining buyruqlari, farmoyishlari bajarilishini taʼminlash, ijro intizomini mustahkamlashga doir kompleks amaliy chora-tadbirlarni amalga oshirish, shu jumladan topshiriqlar oʻz vaqtida va sifatli bajarilishi uchun hududiy inspeksiyalar xodimlarining shaxsiy masʼuliyatini oshirish choralarini koʻrish;

5) Davlat inspeksiyasi boshligʻi va uning oʻrinbosarlarining buyruqlari hamda farmoyishlari oʻz vaqtida va sifatli bajarilishini taʼminlash;

6) Davlat inspeksiyasi faoliyati sohasiga kiradigan masalalar boʻyicha mahalliy davlat hokimiyati organlari va kompleks ijtimoiy-iqtisodiy rivojlantirish sektorlari bilan oʻzaro hamkorlik qilish;

7) hududiy inspeksiyalar faoliyati rejalashtirilishini tashkil etish, hududiy inspeksiyalar va ular xodimlarining har choraklik ish rejalarini tasdiqlash, ularning bajarilishini nazorat qilish;

8) hududiy inspeksiyalarda kadrlarni joy-joyiga qoʻyish boʻyicha takliflarni tanlash va kiritish, ularning samarali faoliyat koʻrsatishi uchun zarur sharoitlar yaratish, hududiy inspeksiyalarning kadrlar zaxirasini shakllantirish;

9) Davlat inspeksiyasi nomenklaturasiga kiruvchi boʻsh lavozimlarga tavsiya etilgan nomzodlarning, shuningdek, hududiy inspeksiyalarga ishga qabul qilinadigan boshqa kadrlarning kasbiy mahorat, chuqur bilim, amaliy tajribaga egaligi, ishchanlik va maʼnaviy-axloqiy fazilatlarining yuqoriligi kafolatlanganligini taʼminlash;

10) hududiy inspeksiyalar xodimlarini ragʻbatlantirish va intizomiy javobgarlikka tortish masalalarini hal etish, shu jumladan ularning egallab turgan lavozimiga noloyiqligi masalalarini koʻrib chiqish, ularning shaxsiy masʼuliyatini oshirishga doir tizimli choralarni amalga oshirish;

11) Davlat inspeksiyasi xodimlarining tasdiqlangan Odob-axloq qoidalari talablariga hududiy inspeksiyalar xodimlari tomonidan rioya etilishini taʼminlash;

12) Oʻzbekiston Respublikasining “Korrupsiyaga qarshi kurashish toʻgʻrisida”gi Qonuni talablariga muvofiq Davlat inspeksiyasi tizimida korrupsiya va boshqa huquqbuzarliklarning oldini olish choralarini koʻrish, shuningdek, ularning sodir etilishiga imkon beruvchi sabablar va sharoitlarni huquqni qoʻllash amaliyotini va qonunchilikni takomillashtirish chora-tadbirlarini ishlab chiqish hamda amalga oshirish orqali aniqlash, tahlil qilish, bartaraf etish;

13) prognoz koʻrsatkichlar bajarilishini tizimli tahlil qilish, Davlat inspeksiyasining nazorat qiladigan oʻrinbosarlariga hududiy inspeksiyalar tomonidan belgilangan koʻrsatkichlarga soʻzsiz erishilishini taʼminlashga qaratilgan qoʻshimcha choralar koʻrish boʻyicha takliflar kiritish;

14) hududiy inspeksiyalar xodimlarining faoliyati samaradorligi va natijadorligini tizimli ravishda tanqidiy tahlil qilish, majlislarda ularning shaxsiy hisobotlarini eshitish, yakunlari boʻyicha zarur choralar koʻrish;

15) jismoniy va yuridik shaxslarning murojaatlarini koʻrib chiqish, aholi bilan bevosita va ochiq muloqotni yoʻlga qoʻyish, belgilangan muddatlarda va tartibda jismoniy shaxslar va yuridik shaxslar vakillarining shaxsiy qabullari, shu jumladan sayyor qabullarini muntazam oʻtkazish;

16) Oʻzbekiston Respublikasi Prezidentining Xalq qabulxonalari bilan samarali hamkorlik qilish, ularning ishida faol qatnashish, Oʻzbekiston Respublikasi Prezidentining Virtual qabulxonasidan kelib tushadigan jismoniy va yuridik shaxslarning murojaatlarini oʻz vaqtida hamda toʻliq koʻrib chiqish;

17) davlat siri boʻlgan maʼlumotlarning yoki qonun bilan qoʻriqlanadigan boshqa sirning muhofaza qilinishini taʼminlash.

23. Davlat inspeksiyasi boshligʻi quyidagilar uchun shaxsan javobgardir:

1) Davlat inspeksiyasiga yuklangan vazifalar va funksiyalarning bajarilishi;

2) Davlat inspeksiyasining ushbu Nizom 15-bandida nazarda tutilgan javobgarlik sohalari boʻyicha;

3) ushbu Nizomning 20-bandida koʻrsatilgan oʻz funksional majburiyatlarining sifatli bajarilishi.

24. Davlat inspeksiyasi boshligʻining oʻrinbosarlari quyidagilar uchun shaxsan javobgardir:

1) mutasaddilik qilinadigan boʻlinmalar va hududiy inspeksiyalar tomonidan Davlat inspeksiyasiga yuklangan vazifalar va funksiyalarning bajarilishi;

2) ushbu Nizomning 15-bandida nazarda tutilgan Davlat inspeksiyasi javobgarlik sohalarining oʻzi nazorat qiladigan masalalar qismi;

3) ushbu Nizomning 21-bandida koʻrsatilgan oʻz funksional majburiyatlarining sifatli bajarilishi.

25. Hududiy inspeksiyalar boshliqlari quyidagilar uchun shaxsan javobgardir:

1) hududiy inspeksiyalarga yuklangan vazifalar va funksiyalar amalga oshirilishi;

2) hududiy inspeksiyalarning ushbu Nizom 19-bandida nazarda tutilgan javobgarlik sohalari boʻyicha;

3) ushbu Nizomning 22-bandida koʻrsatilgan oʻz funksional majburiyatlarining sifatli bajarilishi.

26. Davlat inspeksiyasiga belgilangan tartibda lavozimga tayinlanadigan va lavozimdan ozod qilinadigan boshliq rahbarlik qiladi.

27. Davlat inspeksiyasi boshligʻi uning buyrugʻi bilan lavozimga tayinlanadigan va lavozimidan ozod qilinadigan uch nafar oʻrinbosari, shu jumladan, bir nafar birinchi oʻrinbosariga ega boʻladi.

28. Davlat inspeksiyasi raisi maqomi, moddiy taʼminoti, transport va tibbiy xizmat koʻrsatish boʻyicha vazirga, uning oʻrinbosarlari esa tegishlicha vazir oʻrinbosarlariga tenglashtiriladi.

29. Davlat inspeksiyasi boshligʻi Kompyuterlashtirish va axborot-kommunikatsiya texnologiyalarini rivojlantirish boʻyicha muvofiqlashtirish kengashining aʼzosi hisoblanadi.

30. Hududiy inspeksiyalarga Davlat inspeksiyasi boshligʻi tomonidan lavozimga tayinlanadigan va lavozimdan ozod qilinadigan boshliqlar rahbarlik qiladi.

31. Davlat inspeksiyasi markaziy apparati boʻlinmalarining rahbarlari markaziy apparat boʻlinmalarining hududiy inspeksiyalar bilan oʻzaro hamkorligini taʼminlaydi.

32. Davlat inspeksiyasi markaziy apparatining boʻlinmalari hududiy inspeksiyalar bilan oʻzaro hamkorlik qilish doirasida:

1) topshiriqlarni hududiy inspeksiyalarga yetkazadi, ularning bajarilishini nazorat qiladi;

2) hududiy inspeksiyalar faoliyatini oʻrganadi va umumlashtiradi, uni takomillashtirishga qaratilgan chora-tadbirlarni ishlab chiqadi va amalga oshiradi;

3) hududiy inspeksiyalar faoliyatini tashkil etish va uning natijalari toʻgʻrisidagi hisobot, axborot materiallari hamda statistika va boshqa maʼlumotlarni oʻrganishni tashkil qiladi;

4) hududiy inspeksiyalarning ish rejalarini tahlil qiladi, ularning faoliyatini rejalashtirishni takomillashtirish choralarini koʻradi;

5) hududiy inspeksiyalardan kelgan takliflarni koʻrib chiqadi;

6) hududiy inspeksiyalarning normativ hujjatlar loyihalarini tayyorlashdagi ishtirokini tashkil qiladi, qonunchilikni takomillashtirish boʻyicha ulardan kelgan takliflarni koʻrib chiqadi;

7) davlat va xoʻjalik boshqaruvi organlari, mahalliy davlat hokimiyati organlari, shuningdek, xoʻjalik yurituvchi subyektlar tomonidan litsenziyalash haqidagi qonun hujjatlari, litsenziya bitimlari bajarilishi, radiochastota spektridan foydalanish, pochta aloqasi va telekommunikatsiyalar, maʼlumotlar uzatish, teleradioeshittirish tarmoqlarida, axborot tizimlarida xavfsizlik boʻyicha texnik va texnologik talablar bajarilishi ustidan nazoratni tashkil etadi;

8) hududiy inspeksiyalar xodimlarini aloqa, axborotlashtirish va telekommunikatsiya texnologiyalari, axborot xavfsizligi va axborotni himoya qilish, mualliflik huquqini himoya qilish sohasidagi yoʻnalishlar boʻyicha tegishli oliy taʼlim muassasalarida, shuningdek, ixtisoslashtirilgan taʼlim muassasalarida qayta tayyorlash va ularning malakasini oshirishni tashkil etadi.

33. Hududiy inspeksiyalar Davlat inspeksiyasi markaziy apparatining boʻlinmalari bilan hamkorlik qiladi, shu jumladan:

1) Davlat inspeksiyasi rahbariyatining topshiriqlari bajarilishi toʻgʻrisida axborot beradi;

2) markaziy apparatga aloqa, axborotlashtirish va telekommunikatsiya texnologiyalari, davriy bosma nashrlarni tarqatish sohasidagi qonunchilik, normativ hujjatlar va davlat standartlarini bajarish boʻyicha faoliyat natijalari toʻgʻrisida axborot taqdim etadi;

3) hududiy inspeksiyalar faoliyatini oʻrganish va tekshirishlar natijasida aniqlangan kamchiliklar hamda qonunbuzarliklarni bartaraf etish natijalari toʻgʻrisida axborot beradi;

4) Davlat inspeksiyasining markaziy apparatiga belgilangan tartibda va muddatlarda oʻz faoliyati natijalari toʻgʻrisida hisobotlar taqdim etadi;

5) Davlat inspeksiyasining markaziy apparatiga aloqa sifatini yaxshilash boʻyicha takliflar yuboradi;

6) oʻz faoliyatining vakolatli organlar tomonidan tekshirilishi natijalari haqida xabardor qiladi.

34. Markaziy apparat boʻlinmalari va hududiy inspeksiyalarning oʻzaro hamkorligi jarayonida yuzaga keladigan kelishmovchiliklar Davlat inspeksiyasi boshligʻining topshirigʻiga binoan uning tegishli oʻrinbosari tomonidan koʻrib chiqiladi. Kelishmovchiliklar koʻrib chiqilgandan soʻng ham hal etilmagan taqdirda, ular yuzasidan qaror bevosita Davlat inspeksiyasi boshligʻi tomonidan qabul qilinadi.

35. Davlat inspeksiyasi oʻz vazifalari va funksiyalarini amalga oshirishda davlat va xoʻjalik boshqaruvi organlari, mahalliy davlat hokimiyati organlari hamda boshqa tashkilotlar bilan oʻzaro hamkorlik qiladi.

36. Davlat inspeksiyasi aloqa, axborotlashtirish va telekommunikatsiya texnologiyalari, axborot xavfsizligi va kiberxavfsizlik sohasida davlat va xoʻjalik boshqaruvi organlari, mahalliy davlat hokimiyati organlari, boshqa tashkilotlar va idoralar bilan oʻzaro hamkorlik qiladi.

37. Davlat inspeksiyasi foydalanilishi cheklangan axborotning muhofaza qilinishini taʼminlash, faoliyat turiga doir litsenziya bitimlari shartlariga rioya qilish, axborotni kriptografik muhofaza qilish shu jumladan, fonogrammalar, audiovizual asarlar, EHM dasturlarini tarqatishda mualliflik huquqlarini taʼminlash sohasidagi mahsulotlarni sertifikatlash masalalari boʻyicha xoʻjalik yurituvchi subyektlar, boshqa tashkilotlar va idoralar bilan birgalikda ishlaydi.

38. Davlat inspeksiyasi aloqa, axborotlashtirish va telekommunikatsiya texnologiyalari, axborot xavfsizligi va kiberxavfsizlik, radiochastota spektridan foydalanish, elektron raqamli imzo va fonogrammalar, audiovizual asarlar, EHM uchun dasturlarni tarqatishda mualliflik huquqlari sohasida monitoring olib borish, huquqbuzarliklarni aniqlash va ularning oldini olish boʻyicha huquqni muhofaza qiluvchi va boshqa organlar bilan oʻzaro hamkorlik qiladi.

39. Hududiy inspeksiyalar oʻz vakolatlari doirasida davlat va xoʻjalik boshqaruvi organlarining hududiy boshqarmalari, mahalliy davlat hokimiyati organlari bilan oʻzaro hamkorlik qiladi.

40. Davlat inspeksiyasi faoliyatining samaradorligi muntazam baholab boriladi.

41. Davlat inspeksiyasi faoliyatining samaradorligi va natijadorligi Davlat inspeksiyasi boshligʻi tomonidan tasdiqlangan samaradorlik va natijadorlik mezonlari hamda ish koʻrsatkichlari asosida baholanadi.

42. Davlat inspeksiyasi faoliyatining samaradorligi va natijadorligini baholash yakunlari boʻyicha:

Davlat inspeksiyasi rahbarlari va xodimlariga nisbatan ragʻbatlantirish (mukofotlash) yoki tegishli intizomiy javobgarlik choralari;

aniqlangan kamchiliklarni bartaraf etish va ularning Davlat inspeksiyasidagi faoliyatini yanada takomillashtirish choralari koʻriladi.

43. Axborot-kommunikatsiya texnologiyalarini rivojlantirish jamgʻarmasining mablagʻlari va qonun hujjatlariga muvofiq boshqa mablagʻlar Davlat inspeksiyasi faoliyatini moliyalashtirish manbalari hisoblanadi.

Joriy taʼminot (ish haqiga davlat qoʻshimcha toʻlovlari va ustama pullar saqlangan holda), Davlat inspeksiyasi moddiy-texnika bazasini mustahkamlash va xodimlarning mehnatini qoʻshimcha moddiy ragʻbatlantirish boʻyicha xarajatlarni moliyalashtirish Axborot-kommunikatsiya texnologiyalarini rivojlantirish jamgʻarmasining mablagʻlari va qonun hujjatlariga muvofiq boshqa mablagʻlar hisobidan Oʻzbekiston Respublikasi Moliya vazirligi bilan kelishilgan holda tasdiqlangan smeta doirasida amalga oshiriladi.

44. Davlat inspeksiyasi xodimlarining mehnatini qoʻshimcha moddiy ragʻbatlantirish Davlat inspeksiyasi boshligʻi tomonidan tasdiqlangan Nizomga muvofiq Oʻzbekiston Respublikasi Moliya vazirligi bilan kelishilgan holda tasdiqlangan smeta doirasida amalga oshiriladi.

Bunda Davlat inspeksiyasi xodimlarining mehnatini ragʻbatlantirish toʻgʻrisidagi Nizomda ularning lavozim maoshlariga mehnatning alohida sharoitlari uchun 200 foiz oylik ustama belgilanishi koʻzda tutiladi.

45. Davlat inspeksiyasining markaziy apparatiga 8 ta, shu jumladan 4 ta biriktirilgan, 2 ta navbatchi, 2 ta maxsus avtomobil, hududiy boshqarmalarga — 14 ta maxsus avtomobildan iborat xizmat avtomobil transporti limiti koʻzda tutiladi.

Xizmat avtomobillarining yillik yoʻl bosish limiti 36 500 km etib belgilanadi.

46. Davlat inspeksiyasi qonun hujjatlarida belgilangan tartibda qayta tashkil etiladi va tugatiladi.