Oʻzbekiston Respublikasi Prezidentining “Oʻzbekiston Respublikasi Adliya vazirligi faoliyatini yanada takomillashtirishga doir tashkiliy chora-tadbirlar toʻgʻrisida” 2018-yil 13-apreldagi PQ-3666-son qarori ijrosini taʼminlash hamda davlat va xoʻjalik boshqaruvi organlarida talab yuqori boʻlgan tor doiradagi va ixtisosli mutaxassisliklar boʻyicha yuridik kadrlar tayyorlash tizimini yaratish, shuningdek, kasbiy yuridik taʼlim sifatini oshirish maqsadida Vazirlar Mahkamasi qaror qiladi:

1. Oʻzbekiston Respublikasi Prezidentining “Oʻzbekiston Respublikasi Adliya vazirligi faoliyatini yanada takomillashtirishga doir tashkiliy chora-tadbirlar toʻgʻrisida” 2018-yil 13-apreldagi PQ-3666-son qarori bilan:

Adliya vazirligi tuzilmasida har bir hududda bittadan — 14 ta yuridik texnikum (keyingi oʻrinlarda yuridik texnikumlar deb ataladi) tashkil etilganligi;

yuridik texnikumlarning oʻquv-metodik jarayonini muvofiqlashtirish, ularga amaliy va axborot-resurs jihatidan koʻmaklashish Toshkent davlat yuridik universiteti (keyingi oʻrinlarda TDYU deb ataladi) tomonidan, ularning faoliyatiga rahbarlik qilish va nazoratni tashkil etish hamda tashkiliy-kadrlar bazasini mustahkamlash esa — hududiy adliya organlari tomonidan amalga oshirilishi maʼlumot uchun qabul qilinsin.

3. Quyidagilar yuridik texnikumlarning asosiy vazifalari etib belgilansin:

davlat va xoʻjalik boshqaruvi organlarining talab yuqori boʻlgan tor doiradagi va ixtisosli mutaxassisliklar boʻyicha tizimli fikrlash qobiliyati, ish yuritish, zamonaviy axborot-kommunikatsiya texnologiyalarini qoʻllashning amaliy koʻnikmalariga ega boʻlgan va xorijiy tillarni biladigan kasb-hunar taʼlimi boʻyicha yuridik kadrlarni tayyorlash;

taʼlim jarayonini oʻquv jarayoniga ilgʻor taʼlim standartlarini joriy etishga yoʻnaltirilgan zamonaviy shakllar va usullar, innovatsion pedagogik texnologiyalar asosida tashkil etish;

oʻquv jarayoniga tegishli mutaxassislik va kasblar boʻyicha boy ish tajribasiga ega boʻlgan amaliyotchi mutaxassislarni keng jalb etgan holda yuridik taʼlim va huquqni qoʻllash amaliyotining oʻzaro yaqin hamkorligini taʼminlash;

zamonaviy innovatsion oʻquv loyihalarini birgalikda amalga oshirish, shuningdek, oʻquvchilar amaliyotini tashkil etish uchun tegishli hududlardagi davlat va xoʻjalik boshqaruvi organlari, sudlar va huquqni muhofaza qiluvchi organlar, boshqa tashkilotlar, taʼlim va ilmiy muassasalar bilan hamkorlikni har tomonlama rivojlantirish;

oʻquvchilar uchun moʻljallangan yangi avlod darsliklari, maxsus oʻquv-metodik adabiyotlar yaratishda ishtirok etish;

oʻquvchilarni maʼnaviy-axloqiy tarbiyalash samaradorligini, ularning huquqiy madaniyati va huquqiy ongini oshirish, ularda vatanparvarlik, Vatan taqdiri va kelajagiga masʼullik hamda daxldorlik tuygʻusini shakllantirish va rivojlantirish choralarini amalga oshirish.

4. TDYUga quyidagi vazifalar yuklansin:

a) yuridik texnikumlarda oʻquv-metodik jarayonni muvofiqlashtirishning samarali mexanizmini yaratish boʻyicha:

“yurisprudensiya” yoʻnalishi boʻyicha zamonaviy standartlarni hisobga olgan holda oʻrta maxsus professional taʼlim mutaxassisliklari va kasblari boʻyicha malaka talablari, oʻquv rejalari va fan dasturlarini ishlab chiqish va tasdiqlash, shuningdek, chet tillari boʻyicha oʻquv mashgʻulotlarini oʻtkazish uchun guruhlarda oʻquvchilar miqdorini belgilash;

yuridik texnikumlarni oʻquv-metodik jarayonni tashkil etish sohasidagi yangiliklar haqida, shu jumladan, sayyor maslahatlarni oʻtkazish orqali doimiy xabardor qilishni yoʻlga qoʻyish;

taʼlim jarayonida oʻquvchilarning mantiqiy va tizimli fikrlash, huquqiy hujjatlarni tuzish amaliy koʻnikmalarini rivojlantirishga yoʻnaltirilgan yuridik fanlarni oʻqitishning zamonaviy shakl va usullarini, pedagogik, axborot-kommunikatsiya, innovatsion texnologiyalarni qoʻllash;

oʻquvchilar bilimini noxolis baholash ehtimolini istisno qiladigan zamonaviy baholash tizimini joriy etish;

taʼlim mutaxassisliklari va kasblari doirasida oʻquvchilar amaliyotini tashkil etish va oʻtash mexanizmini takomillashtirish;

yuridik texnikumlar uchun moʻljallangan yangi avlod darsliklari, maxsus oʻquv-metodik adabiyotlarni yaratish boʻyicha ishlarni tashkil etish;

b) yuridik texnikumlar oʻquvchilari bilim olishi va madaniyati darajasini oshirishning doimiy monitoringi olib borilishini nazarda tutadigan tizimni joriy etish boʻyicha:

oʻquvchilarning klublar, toʻgaraklar va sport seksiyalari shaklidagi ijtimoiy tadbirlarda ishtirok etishini tashkil etish va hisobga olish;

oʻquvchilarning yuridik texnikumlar axborot-resurs markazlaridan foydalanishini ragʻbatlantirish;

yuridik texnikumlar faoliyatiga rahbarlik qilish va nazoratni tashkil etish boʻyicha hududiy adliya organlariga doimiy asosda amaliy koʻmaklashish;

yuridik texnikumlarda oʻquv jarayonini tashkil etish, ularning faoliyati samaradorligini oshirish boʻyicha normativ-huquqiy bazani takomillashtirish boʻyicha Oʻzbekiston Respublikasi Adliya vazirligiga takliflar kiritish.

5. TDYUga oʻquvchilarda ishga qabul qilishda talab qilinadigan bilim va koʻnikmalarni shakllantirish uchun yuridik texnikumlarda umumiy oʻquv-metodik siyosatni ishlab chiqish boʻyicha vakolatli organlar, ish beruvchilar va fuqarolik jamiyati institutlari vakillaridan iborat maslahat kengashini tuzish huquqi berilsin.

7. Davlat va xoʻjalik boshqaruvi organlari, mahalliy ijro etuvchi hokimiyat organlari yuridik texnikumlarga oʻquvchilarning amaliyot oʻtashini tashkil etishda har tomonlama koʻmaklashsinlar.

8. Belgilansinki, yuridik texnikumlarga xodimlarni ishga qabul qilish va davriy attestatsiyadan oʻtkazish adliya organlari va muassasalari uchun belgilangan tartibda amalga oshiriladi.

9. Yuridik texnikumlarga 2 tadan navbatchi yengil avtotransport vositasini saqlash uchun limit ajratilsin.

10. Belgilansinki:

TDYUning yuridik texnikumlar va TDYU qoshidagi akademik litseyda oʻquv-metodik jarayonini muvofiqlashtirish boʻyicha faoliyatni tashkil etadigan tarkibiy boʻlinmasi xodimlarining shtatdagi cheklangan soni Adliya vazirligi tomonidan tasdiqlanadigan TDYU namunaviy shtatlari bilan aniqlanadi;

TDYU mazkur tarkibiy boʻlinmasi boshligʻining lavozim maoshi oliy taʼlim muassasasi dekanining bazaviy lavozim maoshiga, uning oʻrinbosari lavozim maoshi — oliy taʼlim muassasasi dekani oʻrinbosari bazaviy lavozim maoshiga tenglashtiriladi;

avtotransport vositalarini sotib olish va saqlash bilan bogʻliq xarajatlar yuridik texnikumlarning budjetdan tashqari mablagʻlari, budjetdan tashqari Adliya organlari va muassasalarini rivojlantirish jamgʻarmasi mablagʻlari hamda adliya organlari va muassasalarining budjetdan tashqari boshqa mablagʻlari hisobiga amalga oshiriladi;

Yuridik texnikumlar va TDYU huzuridagi akademik litsey oʻquv-metodik jarayonini muvofiqlashtirish boʻyicha faoliyatni tashkil etadigan TDYU tarkibiy boʻlinmasi shtat birliklarining soni koʻpaytirilishi bilan hamda mazkur tarkibiy boʻlinma boshligʻining lavozim maoshi oliy taʼlim muassasasi dekanining bazaviy lavozim maoshiga, uning oʻrinbosari lavozim maoshi — oliy taʼlim muassasasi dekani oʻrinbosari bazaviy lavozim maoshiga tenglashtirish bilan bogʻliq xarajatlar TDYU budjetdan tashqari mablagʻlari hisobiga amalga oshiriladi.

11. Oʻzbekiston Respublikasi Iqtisodiyot va moliya vazirligi Oʻzbekiston Respublikasi Davlat budjeti parametrlarida yuridik texnikumlarda kam taʼminlangan oilalar aʼzolari boʻlgan oʻquvchilar, Mehribonlik uyi, Bolalar shaharchasi va Oilaviy bolalar uyining bitiruvchilari, I guruh nogironligi boʻlgan shaxslar hamda nogironligi boʻlgan bolalar taʼlim olishi bilan bogʻliq xarajatlar uchun zarur mablagʻlarni nazarda tutsin.

12. Oʻzbekiston Respublikasi Adliya vazirligiga taʼlim xizmatlari sifatini oshirish maqsadida yuridik texnikumlaring boshqaruv, pedagog, oʻquv-yordamchi, texnik va xizmat koʻrsatuvchi xodimlariga ustama haqlari va moddiy ragʻbatlantirishning boshqa turlari miqdorlarini yuridik texnikumlarning toʻlov-kontraktdan kelib tushgan mablagʻlari (shu jumladan, tabaqalashtirilgan kontrakt) hisobidan hamda Adliya organlari va muassasalarini rivojlantirish jamgʻarmasi mablagʻlari, adliya organlari va muassasalarining budjetdan tashqari boshqa mablagʻlari hisobidan mustaqil belgilash huquqi berilsin.

Yuridik texnikumlar xodimlariga har oylik ustamalarni belgilash mezonlari Oʻzbekiston Respublikasi Adliya vazirligi tomonidan oʻrnatiladi.

13. Belgilansinki, 2019/2020 oʻquv yilidan boshlab Oʻzbekiston Respublikasi Adliya vazirligi tuzilmasiga kirmagan kollejlarda va texnikumlarda “Yurisprudensiya”, “Huquqshunoslik”, “Ijtimoiy muhofaza qilish huquqshunosi” yoʻnalishlari va mutaxassisliklari boʻyicha oʻquvchilarni tayyorlash toʻxtatiladi.

Belgilab qoʻyilsinki, ushbu yoʻnalishlar va mutaxassisliklar boʻyicha 2-3-bosqich oʻquvchilari oʻqishni yuqorida koʻrsatilgan taʼlim muassasalarida tamomlaydi va diplom oladi.

14. Oʻzbekiston Respublikasi Adliya vazirligi manfaatdor vazirliklar va idoralar bilan birgalikda ular qabul qilgan normativ-huquqiy hujjatlarni bir oy muddatda ushbu qarorga muvofiqlashtirsin.

15. Oʻzbekiston Respublikasi Hukumatining 4-ilovaga muvofiq ayrim qarorlariga qoʻshimchalar kiritilsin.

16. Mazkur qarorning bajarilishini nazorat qilish Oʻzbekiston Respublikasi adliya vaziri R. Davletov zimmasiga yuklansin.

1. Vazirlar Mahkamasining “Umumiy oʻrta va oʻrta maxsus, kasb-hunar taʼlimining davlat taʼlim standartlarini tasdiqlash toʻgʻrisida” 2017-yil 6-apreldagi 187-son qarorida (Oʻzbekiston Respublikasi QHT, 2017-y., 14-son, 230-modda):

a) 2-ilovada:

4-bobning 1-paragrafiga quyidagi mazmundagi 16¹-band qoʻshilsin:

“16¹. Ushbu paragraf qoidalari Oʻzbekiston Respublikasi Adliya vazirligining yuridik kollejlariga nisbatan tatbiq etilmaydi”;

18-bandga quyidagi mazmundagi xatboshi qoʻshilsin:

“Oʻzbekiston Respublikasi Adliya vazirligi yuridik kollejlarining malaka talablari Toshkent davlat yuridik universiteti tomonidan ishlab chiqiladi va tasdiqlanadi”;

b) 3-ilovaning 3-bandiga quyidagi mazmundagi xatboshi qoʻshilsin:

“Oʻzbekiston Respublikasi Adliya vazirligi yuridik kollejlarining oʻquv dasturlari, davlat attestatsiyasi uchun umumtaʼlim fanlari boʻyicha nazorat-baholash koʻrsatkichlari Toshkent davlat yuridik universiteti tomonidan ishlab chiqiladi va tasdiqlanadi”.

2. Vazirlar Mahkamasining 2009-yil 11-fevraldagi 40-son qarori (Oʻzbekiston Respublikasi QT, 2009-y., 2-son, 11-modda) bilan tasdiqlangan Kasb-hunar kollejlari oʻquvchilari tomonidan korxonalar, muassasalar va tashkilotlarda ishlab chiqarish amaliyotini oʻtash tartibi toʻgʻrisidagi nizomning 1-bandiga quyidagi mazmundagi xatboshi qoʻshilsin:

“Ushbu Nizom Oʻzbekiston Respublikasi Adliya vazirligining yuridik kollejlari oʻquvchilariga tatbiq etilmaydi”.