Farg‘ona viloyatida tomorqa yer uchastkalaridan samarali foydalanish uchun qo‘shimcha qulay sharoitlar yaratish va tomorqa yer egalarini qo‘llab-quvvatlash maqsadida Vazirlar Mahkamasi qaror qiladi:

1. Farg‘ona viloyatining Oltiariq tumanida tomorqa yer uchastkalarini uyma-uy yurib o‘rganish natijalariga ko‘ra, meva-sabzavot va bog‘dorchilik-dehqonchilik mahsulotlarini yetishtirish hajmlarini ko‘paytirish, qishloq xo‘jaligi mahsulotlari yetishtirishning innovatsion shakllari va texnologiyalarini o‘zlashtirish, xususan, yengil konstruksiyali issiqxonalar qurish, pakana va yarim pakana mevali daraxtlarning yuqori hosil beradigan navlarini ekish, yiliga 2-3 marotaba hosil olish imkoniyatini beruvchi agrotexnologiyalardan foydalanish, shuningdek, parranda, baliq, quyon, asalari va mayda shoxli mollarni intensiv usulda ko‘paytirish orqali tomorqa yer egalarining daromadini oshirish uchun mavjud ulkan salohiyatdan yetarlicha foydalanilmayotgani ma’lumot uchun qabul qilinsin.

2. 2018-2019-yillarda Farg‘ona viloyatining Oltiariq tumanidagi tomorqa yer egalariga imtiyozli kreditlar berish uchun Fermer, dehqon xo‘jaliklari va tomorqa yer egalarini qo‘llab-quvvatlash jamg‘armasidan maqsadli mablag‘lar ajratishning prognoz ko‘rsatkichlari ilovaga muvofiq tasdiqlansin.

3. O‘zbekiston fermer, dehqon xo‘jaliklari va tomorqa yer egalari kengashiga:

Farg‘ona viloyati hokimligi va tegishli hududlardagi fuqarolarning o‘zini o‘zi boshqarish organlari bilan birgalikda imtiyozli kreditlarni mahallalar kesimida berish uchun manzilli dasturlarning shakllantirilishini va tasdiqlanishini;

Fermer, dehqon xo‘jaliklari va tomorqa yer egalarini qo‘llab-quvvatlash jamg‘armasidan tasdiqlangan manzilli dasturlarga muvofiq tijorat banklari orqali keyinchalik imtiyozli kreditlar berish uchun mablag‘lar ajratilishini ta’minlash tavsiya etilsin.

4. Farg‘ona viloyati hokimligi O‘zbekiston fermer, dehqon xo‘jaliklari va tomorqa yer egalari kengashi bilan birgalikda manzilli dasturlarni mahallalar kesimida tasdiqlagan holda, ikki oy muddatda mazkur qarorning 3-bandida nazarda tutilgan imtiyozli kreditlar berish amaliyotini Farg‘ona viloyatining barcha tumanlarida joriy etsin.

5. O‘zbekiston fermerlari kengashi, Farg‘ona viloyati hokimligi, O‘zbekiston Respublikasi Fanlar akademiyasi, Qishloq xo‘jaligi vazirligi va Xususiylashtirilgan korxonalarga ko‘maklashish va raqobatni rivojlantirish davlat qo‘mitasining akademik M. Mirzayev nomidagi bog‘dorchilik, uzumchilik va vinochilik ilmiy tadqiqot institutining Farg‘ona viloyati Quva tumanida 395 gektar yer maydonida joylashgan Farg‘ona ilmiy-amaliy stansiyasi mulkini mavjud ekinzorlar bilan birga (keyingi o‘rinlarda obyekt deb ataladi) O‘zbekiston fermerlari kengashi kengashiga bepul foydalanish huquqi bilan berish to‘g‘risidagi taklifiga rozilik berilsin.

O‘zbekiston Respublikasi Fanlar akademiyasi, O‘zbekiston fermerlari kengashi va Farg‘ona viloyati hokimligi ushbu bandning birinchi xatboshida qayd etilgan obyektni bir oy muddatda belgilangan tartibda topshirish va qabul qilishni ta’minlasin.

6. O‘zbekiston fermerlari kengashining:

mevali ekinlar va uzumning duplet kolleksiyalari hamda onalik bog‘larini saqlab qolish va kengaytirishni ta’minlagan holda, berilayotgan mulk negizida Tomorqa yer uchastkalarini rivojlantirish ilmiy-amaliy markazini (keyingi o‘rinlarda Markaz deb ataladi) tashkil etish;

2018 — 2025-yillar Fermer, dehqon xo‘jaliklari va tomorqa yer egalarini qo‘llab-quvvatlash jamg‘armasidan Markaz ustav jamg‘armasini to‘ldirish uchun 8 mlrd. so‘m yo‘naltirish hamda ushbu mablag‘lardan innovatsion texnologiyalarni joriy etish, zamonaviy issiqxonalar tashkil qilish, intensiv bog‘larni ko‘paytirish va tegishli infratuzilmani rekonstruksiya qilish uchun maqsadli foydalanish to‘g‘risidagi takliflari ma’qullansin.

Tomorqa yer uchastkalarini rivojlantirish ilmiy-amaliy markazi” MChJning ustav kapitalidagi Fermer xo‘jaliklarini qo‘llab-quvvatlash jamg‘armasi ulushi nominal (balans) qiymatida Jamg‘arma mablag‘larini tijorat banklariga joylashtirish hisobidan olinadigan daromadlarning Kengashga yo‘naltiriladigan 30 foiz qismi hisobidan Kengashga rasmiylashtirib beriladi.

7. Quyidagilar Markazning asosiy vazifalari va faoliyat yo‘nalishlari etib belgilansin:

qishloq xo‘jaligini istiqbolli rivojlantirish maqsadida mamlakatimiz va jahon ilm-fani hamda amaliyotining eng yaxshi yutuqlaridan to‘liq foydalanishni hisobga olgan holda ko‘chatchilik, urug‘chilik va naslchilikni ko‘paytirish, tomchilatib sug‘orishni joriy qilish, muqobil energiyadan foydalanish, tomorqa yerlarida baliq boqish uchun hovuzlar tashkil etish sohasida ilmiy tadqiqotlarni amalga oshirish;

fermer, dehqon xo‘jaliklari va tomorqa yer egalariga qishloq xo‘jaligi mahsulotlari yetishtirishni tashkil etish va kengaytirishga, ular tomonidan yetishtirilgan qishloq xo‘jaligi mahsulotlarini keyinchalik sotish, jumladan eksport qilishga ko‘maklashish;

tomorqa yer egalarini sifatli urug‘lar va ko‘chatlar bilan ta’minlash;

fermer, dehqon xo‘jaliklari ishchilari, tomorqa yer egalari va qishloq xo‘jaligi sohasining boshqa mutaxassislarini, zarur bo‘lganda, qishloq xo‘jaligi sohasida yuqori malakali mahalliy va xorijiy mutaxassislarni taklif etgan holda qayta tayyorlash hamda malakasini oshirish kurslarini belgilangan tartibda tashkil qilish;

qishloq xo‘jaligi mutaxassisliklari bo‘yicha o‘qiyotgan talabalar uchun malaka oshirish va amaliyot o‘tashni tashkil etishga, shuningdek, qishloq joylarda qishloq turizmi va dam olish turlarini rivojlantirishga ko‘maklashish;

qishloq xo‘jaligi ishlab chiqarish korxonalarini hosildorligi yaxshilangan va moslashtirilgan limon, pakana va yarim pakana mevali daraxt ko‘chatlarini yetishtirish bo‘yicha “in vitro” laboratoriyasini tashkil etish, fermer, dehqon xo‘jaliklari hamda tomorqa yer egalariga konsalting xizmatlarini ko‘rsatish.

8. O‘zbekiston fermer, dehqon xo‘jaliklari va tomorqa yer egalari kengashi Farg‘ona viloyati hokimligi bilan birgalikda bir oy muddatda:

Markazning ta’sis hujjatlarini belgilangan tartibda tasdiqlasin va davlat ro‘yxatidan o‘tkazsin;

Markazni malakali mutaxassislar bilan ta’minlasin.

9. “Sitrus, subtropik va tropik o‘simlik yetishtiruvchilar va eksport qiluvchilar” uyushmasi, “Kartoshka yetishtiruvchilar” uyushmasi, “O‘zparrandasanoat” uyushmasi, “O‘zbekbaliqsanoat” uyushmasi, “O‘zbekiston asalarichilari” uyushmasiga ilmiy-tadqiqot ishlarini olib borish uchun Markaz hududida namunali issiqxonalar, laboratoriyalar, hovuzlar va boshqa ishlab chiqarish maydonchalarini tashkil etish tavsiya etilsin.

10. O‘zbekiston Respublikasi Tashqi ishlar vazirligi ilg‘or xorijiy davlatlar tajribasini o‘rganish maqsadida Markazga qishloq xo‘jaligi sohasidagi yuqori malakali xorijiy mutaxassislarni O‘zbekistonga taklif etish va ularga viza berish bilan bog‘liq masalalarni hal etishga ko‘maklashsin.

11. Mazkur qarorning bajarilishini nazorat qilish O‘zbekiston Respublikasi Bosh vazirining o‘rinbosari Z.T. Mirzayev va O‘zbekiston fermer, dehqon xo‘jaliklari va tomorqa yer egalari kengashi raisi v.b. A.A. Xaitov zimmasiga yuklansin.