Jahon banki guruhi bilan moliyaviy hamkorlikni yanada kengaytirish, iqtisodiyotning ustuvor tarmoqlarini, ishlab chiqarish tuzilmasi va ijtimoiy sohani rivojlantirishni jadallashtirish, jalb etilayotgan moliyaviy resurslardan samarali foydalanilishini ta’minlash uchun imtiyozli uzoq muddatli qarzlarni jalb etish maqsadida Vazirlar Mahkamasi qaror qiladi:

1. Jahon banki guruhiga kiruvchi Xalqaro taraqqiyot uyushmasining uzoq muddatli imtiyozli kreditlarini 2001-yildan boshlab jalb etish, ularni ishlab chiqarish va ijtimoiy infratuzilmani jadal rivojlantirishni ta’minlovchi ustuvor loyihalarni amalga oshirishga jamlash maqsadga muvofiq deb hisoblansin.

2. Quyidagilar Xalqaro taraqqiyot uyushmasining 40 yilgacha bo‘lgan muddatga beriladigan 10 yilgacha imtiyozli davrga ega bo‘lgan imtiyozli foizsiz kreditlaridan foydalanishning ustuvor yo‘nalishlari etib belgilansin:

irrigatsiya-melioratsiya tarmog‘ini rekonstruksiya qilish va samaradorligini oshirish;

elektr energetikada energiya ishlab chiqaruvchi quvvatlarni zamonaviylashtirish;

shahar va qishloq infratuzilmasini rivojlantirish;

ijtimoiy infratuzilma (ta’lim, sog‘liqni saqlash)ni rivojlantirish.

Xalqaro taraqqiyot uyushmasi bilan o‘zaro kelishuvga ko‘ra hamkorlikning boshqa yo‘nalishlari.

3. Xalqaro taraqqiyot uyushmasi bilan ishlash bo‘yicha Idoralararo ishchi guruhning tarkibi ilovaga* muvofiq tasdiqlansin.

4. Idoralararo ishchi guruhga:

bozor islohotlarini chuqurlashtirish, iqtisodiyotning strategik muhim tarmoqlarini texnika bilan qayta jihozlash, infratuzilmani zamonaviylashtirish va ijtimoiy sohani rivojlantirishga doir birinchi navbatdagi vazifalarni hal etish uchun Xalqaro taraqqiyot uyushmasining uzoq muddatli imtiyozli kreditlari jalb etilishini;

Xalqaro taraqqiyot uyushmasi tomonidan ajratilayotgan mablag‘lardan eng ko‘p darajada samarali va maqsadli foydalanilishini ta’minlash yuklansin.

5. Idoralararo ishchi guruh Xalqaro taraqqiyot uyushmasi bilan qo‘shma loyihalarni tayyorlash va amalga oshirishda ushbu loyihalarning Jahon banki guruhiga kiruvchi boshqa xalqaro moliya institutlari (Xalqaro tiklanish va taraqqiyot banki, Xalqaro moliya korporatsiyasi, Investitsiyalarni kafolatlash xalqaro agentligi), shuningdek Osiyo taraqqiyot banki, Yevropa tiklanish va taraqqiyot banki va boshqalar bilan O‘zbekiston Respublikasining o‘zaro hamkorlik dasturlarining chambarchas muvofiqlashtirilishiga va o‘zaro bir-birini to‘ldirishiga alohida e’tiborni qaratsin.

6. Mazkur qarorning bajarilishini nazorat qilish Bosh vazir o‘rinbosari R.S.Azimov zimmasiga yuklansin.