O‘zbekiston Respublikasida turizm xizmatlari (safarlar) eksporti va importi hajmlari hisob-kitobini yanada takomillashtirish va tartibga solish maqsadida Vazirlar Mahkamasi qaror qiladi:

1. Vazirlar Mahkamasining 2018-yil 3-apreldagi 263-son qarori (O‘zbekiston Respublikasi QT, 2018-y., 4-son, 77-modda) bilan tasdiqlangan O‘zbekiston Respublikasining tashqi sektori statistikasini shakllantirish tartibi to‘g‘risidagi nizomga ilovaga* muvofiq qo‘shimchalar kiritilsin.

Belgilansinki, kiritilayotgan o‘zgartirishlar 2021-yil 1-yanvardan boshlab kuchga kiradi.

2. O‘zbekiston Respublikasi Davlat xavfsizlik xizmatining Chegara qo‘shinlari server asbob-uskunalari modernizatsiya qilingandan keyin va O‘zbekiston Respublikasi Vazirlar Mahkamasi huzuridagi Davlat personallashtirish markazi 2021-yil 1-yanvardan boshlab Vazirlar Mahkamasining 2018-yil 3-apreldagi 263-son qarori bilan tasdiqlangan O‘zbekiston Respublikasining tashqi sektori statistikasini shakllantirish tartibi to‘g‘risidagi nizomning 8-bandida belgilangan tartibda, ushbu qaror bilan kiritiladigan qo‘shimchalarni hisobga olgan holda kamida 24 soat davrga O‘zbekiston Respublikasiga kelgan va O‘zbekiston Respublikasidan chiqib ketgan xorijiy fuqarolar va O‘zbekiston Respublikasi fuqarolari soni to‘g‘risida statistik ma’lumotlar taqdim etilishini ta’minlasinlar.

3. O‘zbekiston Respublikasi Davlat statistika qo‘mitasi O‘zbekiston Respublikasi Davlat xavfsizlik xizmatining Chegara qo‘shinlari va O‘zbekiston Respublikasi Vazirlar Mahkamasi huzuridagi Davlat personallashtirish markazi tomonidan taqdim etilgan ma’lumotlar asosida taqqoslanadigan dinamikada turizm xizmatlari (safarlar) eksporti va importi ko‘rsatkichlari shakllantirilishini ta’minlasin.

4. Vazirliklar va idoralar o‘zlari qabul qilgan normativ-huquqiy hujjatlarni bir oy muddatda ushbu qarorga muvofiqlashtirsinlar.

5. Mazkur qarorning bajarilishini nazorat qilish O‘zbekiston Respublikasi Bosh vazirining o‘rinbosari — moliya vaziri J.A. Qo‘chqorov va O‘zbekiston Respublikasi Davlat statistika qo‘mitasi raisi B.A. Begalov zimmasiga yuklansin.