Oʻzbekiston Respublikasi Prezidentining 2018-yil 6-martdagi PQ-3589-son “Avtomobil transportini boshqarish tizimini yanada takomillashtirish chora-tadbirlar toʻgʻrisida”gi qaroriga muvofiq buyuraman:

1. Oʻzbekiston avtomobil va daryo transporti agentligi boshligʻining 2006-yil 6-sentabrdagi 98-son buyrugʻi (roʻyxat raqami 1626, 2006-yil 5-oktabr) (Oʻzbekiston Respublikasi qonun hujjatlari toʻplami, 2006-y., 40-son, 403-modda) bilan tasdiqlangan Yoʻlovchilar va yuklarni avtomobil transportida tashish bilan shugʻullanayotgan yuridik shaxslarning xodimlariga va yuklarni avtomobil transportida tashish bilan shugʻullanayotgan xususiy tadbirkorlarga qoʻyiladigan malakaviy talablar toʻgʻrisidagi nizomga ilovaga muvofiq oʻzgartirish va qoʻshimchalar kiritilsin.

2. Mazkur buyruq rasmiy eʼlon qilingan kundan eʼtiboran uch oy oʻtgach kuchga kiradi.

1. 3-bandning oltinchi xatboshisi chiqarib tashlansin.

2. 4-bandda:

a) “a” kichik bandi quyidagi tahrirda bayon etilsin:

“a) avtomobil yoʻnalishida oliy kasbiy maʼlumoti toʻgʻrisida diplom, besh yildan kam boʻlmagan ish staji va malakaviy talablarga muvofiq kelish borasida Oʻzbekiston avtomobil transporti agentligida (bundan buyon — Agentlik) attestatsiyadan oʻtganlik toʻgʻrisida ijobiy xulosaning mavjudligi — yuridik shaxs (yuridik shaxsning transport boʻlinmasi (xizmati) rahbari va tashish jarayonini tashkillashtirishga javobgar boʻlgan yuridik shaxs (yuridik shaxsning transport boʻlinmasi (xizmati) rahbarining oʻrinbosari uchun.”.

3. 4³-banddagi “daryo,” degan soʻz chiqarib tashlansin.

4. 7¹- bandi quyidagi mazmundagi xatboshi bilan toʻldirilsin:

“Shaxs tomonidan attestatsiya (qayta attestatsiyalash) uchun taqdim etilgan hujjatlar Komissiya tomonidan qabul qilingan kundan boshlab Agentlik arxivida besh yilgacha saqlanadi.”.

5. 9¹-band quyidagi tahrirda bayon etilsin:

“9¹. Komissiya aʼzolari taqdim etilgan hujjatlarni har tomonlama koʻrib chiqadilar.

Taqdim etilgan hujjatlarning haqiqiyligiga shubha uygʻotgan taqdirda, Komissiya yuridik shaxs xodimi va yakka tartibdagi tadbirkordan attestatsiya oʻtkazilishidan oldin taqdim etilgan hujjatlar nusxasini solishtirish maqsadida hujjatlarning asl nusxasini soʻrashga haqlidir.

Quyidagi:

notoʻgʻri maʼlumotlarni;

zarur darajada rasmiylashtirilmagan hujjatlarni;

toʻliq hajmda taqdim etilmagan hujjatlarni taqdim etgan shaxslar attestatsiyaga qoʻyilmaydi.

Hujjatlar toʻliq hajmda taqdim etilmagan taqdirda, yuridik shaxs yoki yakka tartibdagi tadbirkor attestatsiyadan oʻtish uchun hujjatlarni yetishmaydigan materiallar bilan besh ish kunidan kam boʻlmagan muddatda toʻldirishga haqlidir.

Taqdim etilgan hujjatlarga oid eʼtirozlar boʻlmagan taqdirda, ariza taqdim etgan yuridik shaxs xodimi yoki yakka tartibdagi tadbirkor attestatsiyaga qoʻyiladi.

Uzrli sabablarsiz ikki marta ketma-ket kelmagan attestatsiyaga daʼvogar yuridik shaxs xodimi yoki yakka tartibdagi tadbirkor attestatsiyaga qoʻyilganlar roʻyxatidan chiqariladi, bunda u taqdim etgan hujjatlar qaytarib beriladi.”.

6. 10¹-band quyidagi mazmundagi xatboshilar bilan toʻldirilsin:

“Attestatsiya, Komissiya faoliyatining xolisonaligini taʼminlash maqsadida, video yozuv uchun videokuzatuv kameralari bilan jihozlangan xonalarda oʻtkaziladi.

Begona shaxslarning Komissiya yigʻilishida ishtirok etishi taqiqlanadi.”.

7. 10⁶-bandda:

a) ikkinchi xatboshidan “3 yilni, yuklarni avtomobilda xalqaro tashish bilan shugʻullanayotgan shaxslar uchun esa” degan soʻzlar chiqarib tashlansin;

b) uchinchi xatboshi chiqarib tashlansin.

8. 10⁸- band quyidagi tahrirda bayon etilsin:

“10⁸. Komissiya quyidagi hollarda navbatdan tashqari attestatsiyani tayinlash va oʻtkazishga haqli:

a) avtotransport vositalaridan foydalanishda litsenziat tomonidan qonun hujjatlari, tashish qoidalari, ekologik talablari va ekipirovkaga rioya etilmagan taqdirda;

b) litsenziat tomonidan litsenziya talablari va shartlari qoʻpol ravishda buzilgan taqdirda;

v) tashuvchining haydovchisi aybi bilan oʻlim oqibatiga sabab boʻlgan yoʻl transport hodisasi sodir etilganda.

Komissiya yuridik shaxs xodimi va yakka tartibdagi tadbirkorga Agentlikda navbatdan tashqari attestatsiya oʻtkazilishi muddatini yozma ravishda xabar qiladi.”.

9. 10⁹-bandda:

a) birinchi xatboshi quyidagi tahrirda bayon etilsin:

“10⁹. Komissiya kotibi attestatsiyadan oʻtgan shaxslar reyestrini yuritadi (bundan keyin reyestr). Attestatsiyadan oʻtgan shaxslar reyestri qogʻozli tashuvchilarda (tikilgan va vakolatli organning muhri bilan tasdiqlangan, tikilgan sahifalar miqdori koʻrsatilgan jurnallar shaklida) ham, kompyuter dasturiga kiritilgan yozuv koʻrinishidagi elektron tashuvchilarda ham yuritiladi.”

b) quyidagi mazmundagi xatboshilar bilan toʻldirilsin:

“Qogʻoz shakldagi yozuvlar bilan elektron shakldagi yozuvlar oʻrtasida nomuvofiqlik mavjud boʻlgan taqdirda, qogʻoz shakldagi yozuvlar ustuvorlikka egadir.

Qogʻoz shakldagi yozuvlar reyestri Agentlik tomonidan yagona nusxada yuritiladi.

Reyestr Agentlikning rasmiy veb-saytida joylashtiriladi.”.

10. III-boʻlim quyidagi tahrirda bayon etilsin:

11. Qonunchilik bilan belgilangan litsenzion talablar va shartlarning bir qismi hisoblangan malaka talablariga nomuvofiqlik uchun tashuvchilarga nisbatan, ularning tashkiliy-huquqiy shakllaridan qatʼi nazar, belgilangan tartibda Oʻzbekiston Respublikasining “Faoliyatning ayrim turlarini litsenziyalash toʻgʻrisida”gi Qonunida nazarda tutilgan, litsenziyaning amal qilishini toʻxtatish yoki tugatish koʻrinishida taʼsir choralari qoʻllanadi.

11¹. Yuridik shaxs xodimi va yakka tartibdagi tadbirkor uzrli sabablarsiz ikki marta ketma-ket navbatdan tashqari attestatsiyaga kelmagan taqdirda, attestatsiya varaqasining amal qilish muddati toʻxtatiladi.

Attestatsiya varaqasining amal qilish muddati toʻxtatilganligi haqida Komissiya yuridik shaxs va yakka tartibdagi tadbirkorni yozma ravishda Komissiya qarori nusxasi va u tomonidan navbatdan tashqari attestatsiya muddati haqidagi xabarni olganligi va navbatdan tashqari attestatsiyadan oʻtish zarurligi toʻgʻrisidagi xat ilova qilingan holda xabardor qiladi.

11². Attestatsiya varaqasini notoʻgʻri maʼlumotlar yoki qalbaki hujjatlardan foydalangan holda olinganligi aniqlangan taqdirda, attestatsiya varaqasining amal qilish muddati Komissiya tomonidan u olingan sanadan boshlab bekor qilinadi.”.

11. IV-boʻlim quyidagi tahrirda bayon etilsin:

12. Komissiya qarorlaridan norozi boʻlgan taqdirda, qonunchilikda belgilangan tartibda sudga shikoyat arizasi bilan murojaat etish mumkin.

13. Mazkur Nizomni buzganlikda ayblanuvchi shaxslar qonunchilikda belgilangan tartibda javobgarlikka tortiladilar.

14. Mazkur Nizom Oʻzbekiston Respublikasining Oliy va oʻrta maxsus taʼlim vazirligi hamda Oʻzbekiston Respublikasining Mehnat va aholini ijtimoiy muhofaza qilish vazirligi bilan kelishilgan.”.

12. Mazkur oʻzgartirish va qoʻshimchalar Oʻzbekiston Respublikasi Oliy va oʻrta maxsus taʼlim vazirligi va Bandlik va mehnat munosabatlari vazirligi bilan kelishilgan.