Oʻzbekiston Respublikasi Prezidentining “Qishloq va suv xoʻjaligi davlat boshqaruvi tizimini tubdan takomillashtirish boʻyicha tashkiliy chora-tadbirlar toʻgʻrisida” 2018-yil 12-fevraldagi PF-5330-son, “Qishloq va suv xoʻjaligi davlat boshqaruvi tizimini tubdan takomillashtirish chora-tadbirlari toʻgʻrisida”gi 2018-yil 17-apreldagi PF-5418-son farmonlarining hamda va Oʻzbekiston Respublikasi Prezidentining “Oʻzbekiston Respublikasi Qishloq xoʻjaligi vazirligi faoliyatini tashkil etish chora-tadbirlari toʻgʻrisida” 2018-yil 17-apreldagi PQ-3671-son qarorining ijrosini taʼminlash maqsadida Vazirlar Mahkamasi qaror qiladi:

1. Quyidagilar:

Oʻzbekiston Respublikasi Qishloq xoʻjaligi vazirligi toʻgʻrisidagi nizom 1-ilovaga muvofiq;

Oʻzbekiston Respublikasi Qishloq xoʻjaligi vazirligi huzuridagi Qishloq xoʻjaligini rivojlantirish va oziq-ovqat taʼminoti jamgʻarmasi mablagʻlarini shakllantirish va ulardan foydalanish tartibi toʻgʻrisidagi nizom 2-ilovaga muvofiq;

Oʻzbekiston Respublikasi Qishloq xoʻjaligi vazirligi va uning tarkibiga kiruvchi tashkilotlar xodimlarini moddiy ragʻbatlantirish tartibi toʻgʻrisidagi nizom 3-ilovaga muvofiq;

“Oʻzbekiston Respublikasi qishloq xoʻjaligi fidoyisi” koʻkrak nishoni toʻgʻrisidagi nizom 4-ilovaga muvofiq;

“Oʻzbekiston Respublikasi qishloq xoʻjaligi fidoyisi” koʻkrak nishoni tavsifi va guvohnomasi 5, 5a-ilovalarga muvofiq tasdiqlansin.

2. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari Z.T. Mirzayev, Oʻzbekiston Respublikasi Qishloq xoʻjaligi vaziri B.T. Yusupov zimmasiga yuklansin.

1. Mazkur Nizom Oʻzbekiston Respublikasi Qishloq xoʻjaligi vazirligining (keyingi oʻrinlarda Vazirlik deb ataladi) maqomi, asosiy vazifalari, funksiyalari, huquqlari, javobgarligini, faoliyatini tashkil etish va hisobot berish tartibini, shuningdek, uning rahbarlarining funksional vazifalari va masʼuliyatini belgilaydi.

2. Vazirlik qishloq xoʻjaligi va oziq-ovqat xavfsizligi sohasida yagona siyosatni amalga oshiruvchi davlat boshqaruvi organi hisoblanadi va oʻz faoliyatida Oʻzbekiston Respublikasi Vazirlar Mahkamasiga (keyingi oʻrinlarda Vazirlar Mahkamasi deb ataladi) boʻysunadi.

3. Vazirlik oʻz faoliyatida Oʻzbekiston Respublikasining Konstitutsiyasi va qonunlariga, Oʻzbekiston Respublikasi Oliy Majlisi palatalarining qarorlariga, Oʻzbekiston Respublikasi Prezidentining farmonlari, qarorlari va farmoyishlariga, Vazirlar Mahkamasining qarorlari va farmoyishlariga, shuningdek, ushbu Nizomga va boshqa qonun hujjatlariga amal qiladi.

4. Vazirlikning oʻz vakolatlari doirasida qabul qilgan qarorlari davlat va xoʻjalik boshqaruvi organlari, mahalliy ijro etuvchi hokimiyat organlari, boshqa tashkilotlar va ularning mansabdor shaxslari, shuningdek, fuqarolar tomonidan bajarilishi majburiy hisoblanadi.

5. Vazirlik, uning tashkiliy tuzilmasiga kiradigan hududiy va tarkibiy tuzilmalar yuridik shaxs hisoblanadi, Oʻzbekiston Respublikasi Davlat gerbi tasviri tushirilgan muhrga va blankalarga, mustaqil balansga, shaxsiy gʻazna hisobvaraqlariga, bank hisobraqamlariga, shu jumladan xorijiy valyutadagi bank hisobraqamlariga egadir.

6. Vazirlikning rasmiy nomi:

a) davlat tilida:

toʻliq nomi — Oʻzbekiston Respublikasi Qishloq xoʻjaligi vazirligi, qisqartirilgan — QXV;

b) ingliz tilida:

toʻliq nomi — Ministry of agriculture of the Republic of Uzbekistan, qisqartirilgan — MA;

v) rus tilida:

toʻliq nomi — Ministerstvo selskogo xozyaystva Respubliki Uzbekistan, qisqartirilgan — Minselxoz.

7. Vazirlikning joylashgan joyi (pochta manzili): 100140, Toshkent viloyati, Kibray tumani, Universitet koʻchasi, 2-uy.

8. Vazirlik tizimiga quyidagilar kiradi:

Vazirlik markaziy apparati;

Qoraqalpogʻiston Respublikasi Qishloq xoʻjaligi vazirligi, viloyatlar qishloq xoʻjaligi boshqarmalari, tumanlar (Quvasoy sh.) qishloq xoʻjaligi boʻlimlari (keyingi oʻrinlarda hududiy boʻlinmalar deb ataladi);

Qishloq xoʻjaligi ekinlari navlarini sinash markazi;

“Agroinnovatsiya” davlat unitar korxonasi;

“Oʻzzoovettaʼminotxizmat” davlat unitar korxonasi;

“Qishloq xoʻjaligini standartlashtirish markazi” davlat unitar korxonasi;

“Maʼmuriy-xoʻjalik xizmati” davlat unitar korxonasi;

Monitoring xizmati.

9. Quyidagilar Vazirlikning asosiy vazifalari hisoblanadi:

qishloq xoʻjaligi va oziq-ovqat xavfsizligi sohasida tarmoqni kompleks modernizatsiya qilishga, qishloq xoʻjaligida fan va texnika yutuqlarini, resurslarni tejaydigan zamonaviy va intensiv agrotexnologiyalarni, ilgʻor tajribalarni joriy qilishga yoʻnaltirilgan yagona siyosatni amalga oshirish;

Oʻzbekiston Respublikasi oziq-ovqat xavfsizligini taʼminlash sohasida davlat organlari, xoʻjalik boshqaruvi organlari va boshqa tashkilotlar faoliyatini muvofiqlashtirish;

raqobatbardosh mahsulotlar ishlab chiqarish orqali iqtisodiyot tarmoqlarining eksport salohiyatini oshirish, bozor konyunkturasi boʻyicha chuqur marketing tadqiqotlarini oʻtkazish, xorijiy investitsiyalar va begʻaraz texnik koʻmak mablagʻlarini (grantlar) jalb qilish;

aholini yil davomida va uzluksiz ravishda barqaror narxlarda taʼminlash uchun zarur boʻlgan hajmda qishloq xoʻjaligi va oziq-ovqat mahsulotlari zaxirasini shakllantirishni tashkil etish;

qishloq xoʻjaligi mahsulotlarini chuqur qayta ishlash, davlat-xususiy sheriklik mexanizmlarini takomillashtirish, shuningdek, hududlarni ijtimoiy-iqtisodiy rivojlantirishda tadbirkorlik subyektlari ishtirokini ragʻbatlantirishni taʼminlash;

qishloq xoʻjaligini izchil va barqaror rivojlantirish, mamlakatning oziq-ovqat xavfsizligini taʼminlash, qishloq aholisining bandlik darajasini va daromadlarini oshirish, ichki bozorda oziq-ovqat mahsulotlari narxlarining barqaror darajasini saqlab qolishga yoʻnaltirilgan kompleks maqsadli, tarmoq va hududiy dasturlarni ishlab chiqish;

taʼlim, fan va qishloq xoʻjaligi ishlab chiqarishini tizimli asosda uzviy integratsiyalashtirishni, qishloq xoʻjaligi tarmoqlarining yuqori malakali soha mutaxassislariga boʻlgan joriy va istiqboldagi ehtiyojlarini hisobga olgan holda kadrlar tayyorlash, qayta tayyorlash va ularning malakasini oshirishni taʼminlash.

10. Vazirlik oʻziga yuklangan vazifalarga muvofiq quyidagi funksiyalarni amalga oshiradi:

qishloq xoʻjaligi va oziq-ovqat xavfsizligi sohasida davlat siyosatining asosiy yoʻnalishlari boʻyicha takliflarni Vazirlar Mahkamasiga kiritadi;

qishloq xoʻjaligini rivojlantirish va oziq-ovqat xavfsizligini taʼminlash boʻyicha tarmoq va hududiy dasturlarni ishlab chiqadi;

qishloq xoʻjaligi va oziq-ovqat taʼminoti sohasida ilmiy-tadqiqot, loyiha-qidiruv va konstruktorlik ishlarining asosiy yoʻnalishlarini belgilashda ishtirok etadi;

bogʻdorchilik, sabzavotchilik, polizchilik, chorvachilik, parrandachilik, asalarichilik, baliqchilik, pillachilik va naslchilik ishlarini rivojlantirish boʻyicha dasturlarni ishlab chiqadi va amalga oshiradi;

qishloq xoʻjaligi ekinlarini yetishtirishning zamonaviy resurs tejovchi agrotexnologiyalarini ishlab chiqish va joriy qilishda ishtirok etadi;

qishloq xoʻjaligi ekinlari navlarini sinash boʻyicha ixtisoslashgan xoʻjaliklar faoliyatini muvofiqlashtiradi;

yer-suv resurslaridan oqilona foydalanish, qishloq xoʻjaligini mexanizatsiyalash darajasini oshirish, texnika va texnologiyalarning zamonaviy turlarini faol joriy qilish sohasidagi vazifalarning innovatsion ilmiy-texnik yechimlarini ishlab chiqishga qaratilgan davlat ilmiy-texnik dasturlarni shakllantirishda ishtirok etadi;

qishloq xoʻjaligini va oziq-ovqat sanoatini rivojlantirishning ilmiy, axborot va konsultativ taʼminotini, ilm-fan-texnika yutuqlarining targʻib va joriy qilinishini tashkil etadi;

qishloq xoʻjaligi korxonalarining ishlab chiqarish va moliyaviy-iqtisodiy faoliyati samaradorligini oshirish boʻyicha uslubiy tavsiyalarni ishlab chiqadi;

qishloq xoʻjaligi ishlab chiqarishiga iqlim oʻzgarishi oqibatlarining taʼsirini ijtimoiy-iqtisodiy baholash, qishloq xoʻjaligini rivojlantirish va aholi turmush darajasiga global iqlim oʻzgarishi va Orol dengizi qurishining salbiy taʼsirini yumshatish boʻyicha tizimli choralar ishlab chiqish va qoʻllashda ishtirok etadi;

oziq-ovqat xavfsizligini taʼminlash sohasida respublika davlat va xoʻjalik boshqaruvi organlari va boshqa tashkilotlar faoliyatini muvofiqlashtiradi;

oziq-ovqat xavfsizligini taʼminlash sohasida davlat va xoʻjalik boshqaruvi organlari va boshqa tashkilotlar faoliyatini muvofiqlashtirish mexanizmlarini takomillashtirish boʻyicha takliflar ishlab chiqadi;

oziq-ovqat xavfsizligini taʼminlash sohasida davlat va xoʻjalik boshqaruvi organlari va boshqa tashkilotlar faoliyatini takomillashtirish boʻyicha tegishli normativ-huquqiy hujjatlarni ishlab chiqishda ishtirok etadi;

oziq-ovqat xavfsizligini taʼminlash sohasida davlat va xoʻjalik boshqaruvi organlari va boshqa tashkilotlar faoliyatini har tomonlama tahlil qiladi;

davlat ehtiyojlari uchun mahsulotlarni xarid qilishda qishloq xoʻjaligi tovar ishlab chiqaruvchilar bilan tayyorlov tuzilmalarining oʻzaro munosabatlarini muvofiqlashtiradi;

bozor konyunkturasi va aholining oziq-ovqat mahsulotlariga ehtiyojini oʻrganish, agrar soha eksport salohiyatini yanada oshirish choralarini ishlab chiqish va amalga oshirish, qishloq xoʻjaligi va oziq-ovqat mahsulotlari eksportini diversifikatsiya qilishda ishtirok etadi;

ichki va tashqi bozorlar konyunkturasini oʻrganish boʻyicha chuqur marketing tadqiqotlar olib borilishini taʼminlaydi, qishloq xoʻjaligi mahsulotlari marketingi tizimini takomillashtirishga doir takliflar ishlab chiqadi;

qishloq xoʻjaligi va oziq-ovqat mahsulotlari raqobatbardoshligini oshirishni ragʻbatlantirish choralarini ishlab chiqadi va amalga oshiradi;

tariflar yuzasidan kelishuvlar, tarmoq va jamoaviy shartnomalarni ishlab chiqishda ishtirok etadi;

meva-sabzavot mahsulotlarini sotish boʻyicha ixtisoslashtirilgan milliy va xalqaro koʻrgazmalarni tashkil qilish va oʻtkazishda ishtirok etadi;

investitsion loyihalarni oʻz vaqtida va samarali amalga oshirish uchun xorijiy investitsiyalarning jalb qilinishi, imtiyozli kreditlar va texnik koʻmak mablagʻlari (grantlar) ajratilishini taʼminlaydi;

qishloq xoʻjaligi hamda qishloq xoʻjaligi va oziq-ovqat mahsulotlarini qayta ishlash sohasiga investitsiyalar jalb qilishda ishtirok etadi;

oʻz vakolatlari doirasida qishloq xoʻjaligi va oziq-ovqat mahsulotlarini ishlab chiqarish sohasidagi tashkilotlarning tashqi iqtisodiy faoliyatiga koʻmaklashadi hamda uning axborot taʼminotini amalga oshiradi;

qishloq xoʻjaligi va oziq-ovqat xavfsizligi sohasida xalqaro hamkorlikning ustuvor yoʻnalishlari boʻyicha takliflarni Vazirlar Mahkamasiga kiritadi;

ekin maydonlarini maqbullashtirish, shu jumladan paxta va boshoqli don ekinlari maydonlarini qisqartirish, ulardan boʻshagan maydonlarga kartoshka, sabzavot, poliz, ozuqa, dukkakli va moyli ekinlarni joylashtirish hamda intensiv bogʻ va tokzorlar barpo etish hisobiga qishloq xoʻjaligi mahsulotlarining asosiy turlarini yetishtirish hajmlarining maqsadli prognoz koʻrsatkichlarini ishlab chiqadi;

davlat xaridi koʻrsatkichlarining bajarilishini hisobga olgan holda meva-sabzavot ekinlarini oqilona joylashtirish, ekologik toza mahsulot ishlab chiqarishni yanada kengaytirish boʻyicha takliflar tayyorlaydi;

ichki isteʼmol bozorini barqaror toʻldirish va narxlar barqarorligini taʼminlash maqsadida qish-bahor mavsumiga zaxira qilish uchun fermer va dehqon xoʻjaliklari, agrofirmalardan yangi uzilgan meva-sabzavot mahsulotlari, kartoshka, poliz va uzumni xarid qilish boʻyicha talabni chuqur oʻrganadi;

qish-bahor mavsumi uchun zaxira qilingan meva-sabzavot, kartoshka, poliz va uzumning talab darajasida saqlanishi, saqlash davrida yoʻqotilishini qisqartirish choralarini amalga oshirishda, mahsulotlar xarid qilish va yetkazib berishda zamonaviy logistika tizimi keng joriy qilinishini tashkil etadi;

meva-sabzavot mahsulotlari, kartoshka, poliz va uzumni sotish boʻyicha respublika shaharlarida doimiy asosda ixtisoslashtirilgan savdo yarmarkalari oʻtkazilishini tashkil etadi;

meva-sabzavot mahsulotlarini saqlash uchun korxonalar moddiy-texnika bazasini mustahkamlash va rivojlantirish, maxsus saqlash omborlari va sovutish kameralarini qurish, rekonstruksiya va modernizatsiya qilish, ularni zamonaviy uskunalar bilan jihozlash ishlarini tashkil etishga toʻgʻridan-toʻgʻri investitsiyalarning keng jalb qilinishini taʼminlaydi;

oziq-ovqat va qishloq xoʻjaligi xomashyo resurslarini koʻpaytirish, respublika aholisini oziq-ovqat mahsulotlari bilan taʼminlashni yaxshilash uchun sharoitlar yaratishda ishtirok etadi;

olis va borish qiyin tumanlarda istiqomat qiluvchi aholini ijtimoiy muhim turdagi oziq-ovqat mahsulotlari bilan ishonchli va uzluksiz taʼminlash chora-tadbirlarini amalga oshiradi;

qishloq xoʻjaligi mahsulotlarini chuqur qayta ishlash, xom ashyo bazasini kengaytirish, zamonaviy qayta ishlash quvvatlarini yaratish va qayta ishlash jarayoniga ilgʻor texnologiyalarni joriy qilish chora-tadbirlari ishlab chiqilishi va amalga oshirilishini taʼminlaydi;

moddiy-texnik taʼminot, servis xizmatlari koʻrsatish va qishloq xoʻjaligi mahsulotlarini chuqur qayta ishlash sohasida davlat-xususiy sheriklik mexanizmlarini takomillashtirishga doir takliflar ishlab chiqadi;

hududlarni ijtimoiy-iqtisodiy rivojlantirishda tadbirkorlik subyektlarining ishtirokini ragʻbatlantirish choralarini ishlab chiqadi;

fermer xoʻjaliklari, birinchi navbatda, qishloq xoʻjaligi mahsulotlarini ishlab chiqarish, qayta ishlash, saqlash va sotish, ishlarni bajarish, xizmatlar koʻrsatish va qonunchilikda taqiqlanmagan boshqa faoliyat turlari bilan shugʻullanayotgan koʻp tarmoqli fermer xoʻjaliklarini ragʻbatlantirish va ularni rivojlantirish uchun qulay sharoitlar yaratish boʻyicha takliflar ishlab chiqadi;

qishloq xoʻjaligi va oziq-ovqat sanoati tarmoqlarini ijtimoiy-iqtisodiy rivojlantirishning kelgusi yil va uzoq muddatga moʻljallangan prognoz loyihalarini ishlab chiqadi;

vakolatli idoralar bilan hamkorlikda agrar tadbirkorlikni qoʻllab-quvvatlash va rivojlantirish chora-tadbirlarini amalga oshiradi va ajratilayotgan resurslardan maqsadli foydalanilishini nazorat qiladi;

tarkibiy islohotlarni chuqurlashtirish va qishloq xoʻjaligi ishlab chiqarishini jadal rivojlantirish, tarmoqda ishlab chiqarish munosabatlarini va mehnatni tashkil etishni takomillashtirish yuzasidan Vazirlar Mahkamasiga takliflar kiritadi;

oziq-ovqat mahsulotlarini koʻpaytirish boʻyicha qishloq xoʻjaligi tovar ishlab chiqaruvchilari uchun qulay sharoitlar yaratishga qaratilgan tadbirlarni amalga oshiradi;

mamlakat oziq-ovqat xavfsizligini taʼminlash chora-tadbirlar amalga oshirilishini taʼminlaydi;

aholining bandlik darajasini oshirish va yangi ish joylarini, ayniqsa, qishloq joylarida yaratish tadbirlari amalga oshirilishini nazarda tutuvchi davlat dasturlarini roʻyobga chiqarishda ishtirok etadi;

ichki bozorda oziq-ovqat mahsulotlari narxlarining barqarorligini saqlab turish boʻyicha takliflar ishlab chiqadi;

qishloq xoʻjaligi mahsulotlari, xomashyo va oziq-ovqatning ayrim turlari boʻyicha talab va taklif balanslarining prognozlarini ishlab chiqishda ishtirok etadi;

qishloq xoʻjaligi tovar ishlab chiqaruvchilariga xizmat koʻrsatuvchi ishlab chiqarish infratuzilma obyektlarini rivojlantirish, ularning moddiy-texnika bazasini mustahkamlash boʻyicha konsepsiya, strategiya va kompleks choralar hamda normativ-huquqiy hujjatlarni ishlab chiqishda ishtirok etadi;

qarzdorliklar va oʻzaro hisob-kitoblar mexanizmini chuqur tahlil qilish asosida qishloq xoʻjaligi tovar ishlab chiqaruvchilari va infratuzilma obyektlari oʻrtasidagi oʻzaro iqtisodiy munosabatlarni takomillashtirish boʻyicha kompleks chora-tadbirlar ishlab chiqilishi va amalga oshirilishida ishtirok etadi;

qishloq xoʻjaligi tovar ishlab chiqaruvchilariga infratuzilma obyektlari tomonidan koʻrsatilayotgan xizmatlar koʻlamini kengaytirish va sifatini yaxshilash boʻyicha takliflar ishlab chiqadi;

hududlar va qishloq xoʻjaligi tarmoqlarini kompleks rivojlantirish istiqbollari hamda amalga oshirilayotgan tarmoq va hududiy dasturlar doirasidagi ehtiyojni hisobga olgan holda, oʻrta-maxsus taʼlim muassasalarida taʼlim yoʻnalishlari va mutaxassisliklarini maqbullashtirilishini nazarda tutuvchi oʻrta-maxsus maʼlumotli kadrlar tayyorlashning maqsadli parametrlarini shakllantiradi;

agrar sohada zamonaviy va ilgʻor texnologiyalarni keng joriy qilish va foydalanish boʻyicha strategik vazifalarni samarali hal etishga qodir, qishloq xoʻjaligi sohasida yuqori malakali, talab yuqori boʻlgan kadrlar tayyorlashga koʻmaklashadi;

pedagog kadrlar tayyorlash, malaka va tajriba oshirilishini tashkil etish maqsadida xorijiy yetakchi ixtisoslashgan taʼlim muassasalari va ilmiy markazlar bilan sheriklik munosabatlarini rivojlantirishga doir takliflar tayyorlaydi;

qishloq xoʻjaligi sohasi mutaxassislari, shu jumladan fermer xoʻjaliklari rahbarlarini respublika va xorijiy taʼlim muassasalari va ilmiy muassasalarda qayta tayyorlash va ularning malakasini oshirish boʻyicha doimiy kurslarni tashkil etadi;

talabalar amaliyotini tashkil etish va bitiruvchilarni ishga joylashtirish maqsadida tarmoq korxonalari bilan hamkorlikni amalga oshiradi;

Vazirlik qonun hujjatlarida belgilangan boshqa funksiyalarni ham amalga oshirishi mumkin.

11. Vazirlikning markaziy apparati, hududiy va tarkibiy tuzilmalarining funksiyalari, agar Oʻzbekiston Respublikasi Prezidentining yoki Vazirlar Mahkamasining qarorlarida boshqacha qoida belgilanmagan boʻlsa, Oʻzbekiston Respublikasi Qishloq xoʻjaligi vaziri (keyingi oʻrinlarda vazir deb ataladi) tomonidan tasdiqlanadigan nizomlar va ustavlar bilan belgilanadi.

12. Vazirlik oʻziga yuklatilgan vazifalar va funksiyalarni amalga oshirish uchun quyidagi huquqlarga egadir:

oʻz vakolati doirasida davlat va xoʻjalik boshqaruvi organlari, mahalliy ijro etuvchi hokimiyat organlari, boshqa tashkilotlar va ularning mansabdor shaxslari hamda fuqarolar uchun majburiy boʻlgan normativ-huquqiy hujjatlarni qabul qilish;

Vazirlikka yuklatilgan vazifa va funksiyalarni bajarish bilan bogʻliq normativ-huquqiy hujjatlar loyihalarini va boshqa hujjatlarni oʻrnatilgan tartibda Vazirlar Mahkamasiga kiritish;

Vazirlik vakolatiga kiradigan masalalarda davlat va xoʻjalik boshqaruvi organlari, mahalliy ijro etuvchi hokimiyat organlari faoliyatini muvofiqlashtirish;

Vazirlik vakolatiga kiradigan masalalarni hal etish uchun zarur axborotni davlat va xoʻjalik boshqaruvi organlari, mahalliy ijro etuvchi hokimiyat organlaridan soʻrash va olish;

Vazirlik vakolatiga kiradigan masalalar boʻyicha zarur statistik axborotni davlat statistika organlaridan bepul olish;

Vazirlik va uning idoraviy mansub tuzilmalari davlat mulkini bir boʻlinmadan boshqasiga oʻrnatilgan tartibda oʻz tashkiliy tuzilmasi doirasida, begʻaraz foydalanish huquqi bilan berish;

Vazirlik va uning idoraviy mansub tashkilotlari xodimlarini qishloq xoʻjaligidagi faoliyatining asosiy koʻrsatkichlari parametrlarining bajarilishini hisobga olgan holda moddiy ragʻbatlantirish tartibi, miqdori va shartlarini belgilash;

Vazirlik vakolatiga kiradigan masalalar boʻyicha takliflarni koʻrib chiqish uchun Vazirlar Mahkamasi, davlat va xoʻjalik boshqaruvi organlari, mahalliy ijro etuvchi hokimiyat organlariga kiritish;

Vazirlik vakolatiga kiradigan masalalar boʻyicha idoralararo xususiyatga ega xalqaro shartnomalarni tuzish;

Vazirlik vakolatiga kiradigan masalalar boʻyicha xalqaro darajada Oʻzbekiston Respublikasi manfaatlarini ifodalash;

yuklatilgan vazifalar doirasida bevosita yoki vazirlikning idoraviy mansub boʻlinmalari orqali xorijiy tarmoq idoralari, ilmiy va taʼlim muassasalari bilan hamkorlikni amalga oshirish;

qishloq xoʻjaligi sohasida joriy va strategik vazifalarni yoritish uchun oʻrnatilgan tartibda noshirlik faoliyatini amalga oshirish;

binolarga xizmat koʻrsatish, jihoz va uskunalar, avtotransport, aloqa va hisoblash vositalari, kompyuter va orgtexnika vositalari saqlash va ishlatish boʻyicha ishlarni bajarish, dasturiy taʼminotni sotib olish boʻyicha belgilangan tartibda shartnomalar tuzish;

Vazirlik vakolatiga kiradigan masalalarni hal etish uchun shartnoma asosida mahalliy va xorijiy ilmiy muassasalar, olim va mutaxassislarni jalb qilish;

Vazirlik va tizim tashkilotlarining moddiy-texnika bazasini mustahkamlash choralarini koʻrish;

amaldagi qonunchilikka muvofiq Vazirlik ijtimoiy infratuzilmasini yaratish va takomillashtirish, Vazirlik tizimi xodimlari mehnatini ragʻbatlantirish va mukofotlashning yagona tizimini shakllantirish;

oʻquv va ilmiy-innovatsion faoliyatida namuna koʻrsatgan bakalavr, magistr va doktorantlar uchun Vazirlik stipendiyasini taʼsis etish.

Vazirlik qonun hujjatlariga muvofiq boshqa huquqlarga ham ega boʻlishi mumkin.

13. Vazirlikning markaziy apparati, hududiy va tarkibiy tuzilmalarining huquqlari, agar Oʻzbekiston Respublikasi Prezidenti yoki Oʻzbekiston Respublikasi Vazirlar Mahkamasining qarorlarida boshqacha qoida nazarda tutilmagan boʻlsa, Vazir tomonidan tasdiqlanadigan nizomlar (ustavlar) bilan belgilanadi.

14. Vazirlik:

oʻziga yuklatilgan vazifalar va funksiyalarning samarali bajarilishi, shuningdek, tegishli sohadagi (tarmoqdagi) davlat siyosatining samarali amalga oshirilishi;

oʻz faoliyati bilan bogʻliq prognoz koʻrsatkichlarga soʻzsiz erishilishini taʼminlash;

Vazirlar Mahkamasiga va Oʻzbekiston Respublikasi Prezidenti devoniga kiritiladigan normativ-huquqiy hujjatlar va boshqa hujjatlar loyihalari, shuningdek, Vazirlik tomonidan qabul qilinadigan buyruqlar amalga oshirilishining sifati va pirovard natijalari;

oʻz faoliyati sohasini rivojlantirish boʻyicha dasturlar, tadbirlar rejalari, “yoʻl xaritalari” va boshqa dasturiy hujjatlarning samarali amalga oshirilishi uchun javob beradi.

15. Vazirlikning markaziy apparati:

Vazirlikning tarkibiy va hududiy boʻlinmalari hamda idoraviy mansub tashkilotlar bilan birgalikda Vazirlikka yuklangan vazifalar va funksiyalarning samarali bajarilishini taʼminlash;

Vazirlik faoliyati bilan bogʻliq prognoz koʻrsatkichlarga erishishni taʼminlash boʻyicha Vazirlik markaziy apparati tuzilmalarining ishini tashkil etish;

Vazirlik tomonidan koʻrib chiqish uchun Oʻzbekiston Respublikasi Vazirlar Mahkamasi va Oʻzbekiston Respublikasi Prezidenti devoniga kiritiladigan normativ-huquqiy hujjatlar va boshqa hujjatlar loyihalari, shuningdek, Vazirlik tomonidan qabul qilinadigan buyruqlarning tayyorlanishi va ekspertizadan oʻtkazish sifati;

oʻz faoliyat sohasini rivojlantirish boʻyicha dasturlar, tadbirlar rejalari, “yoʻl xaritalari” va boshqa dasturiy hujjatlarning tarkibiy va hududiy boʻlinmalar hamda idoraviy mansub tashkilotlar tomonidan amalga oshirilishini tashkil etish uchun javob beradi.

16. Vazirlikning hududiy boʻlinmalari:

oʻziga yuklangan vazifalar va funksiyalar sifatli va oʻz vaqtida bajarilishini taʼminlash;

Vazirlikning hududiy boʻlinmalari faoliyati bilan bogʻliq boʻlgan prognoz koʻrsatkichlarga erishishni taʼminlash;

Vazirlik, mahalliy ijro hokimiyati organlariga kiritilayotgan hujjatlar loyihalari va takliflar, shuningdek, Vazirlikning hududiy boʻlinmalari tomonidan qabul qilinadigan qarorlarning amalga oshirilishi sifati, pirovard natijalari va oqibatlari;

tumanlar (Quvasoy sh.) aniqlangan muammolarni har tomonlama va chuqur tahlil qilish va umumlashtirish asosida Qoraqalpogʻiston Respublikasi va viloyatlarda qishloq xoʻjaligini rivojlantirish boʻyicha takliflar tayyorlash;

oʻz faoliyati sohasini rivojlantirish, muammoli masalalarni hal qilish boʻyicha dasturlar, tadbirlar rejalari, “yoʻl xaritalari” va boshqa dasturiy hujjatlarni Qoraqalpogʻiston Respublikasi va viloyatlarda samarali amalga oshirish;

fuqarolar va tadbirkorlik subyektlarining qonuniy huquq va manfaatlari himoya qilinishi va ularga rioya etilishi uchun javob beradi.

17. Quyidagilar vazirning asosiy funksional vazifalari hisoblanadi:

Vazirlik faoliyatini umumiy boshqarish, qonunchilik hujjatlarida Vazirlikka yuklatilgan vazifa va funksiyalar bajarilishini tashkil etish;

Oʻzbekiston Respublikasi Prezidenti, Vazirlar Mahkamasining qarorlari bilan tasdiqlangan Vazirlik faoliyatini yanada takomillashtirish boʻyicha konsepsiyalar, kompleks dasturlar va kompleks tadbirlar ijrosini tanqidiy va chuqur tahlil qilish;

Vazirlik, uning tarkibiy va hududiy boʻlinmalari faoliyati bilan bogʻliq boʻlgan prognoz koʻrsatkichlariga erishishni soʻzsiz taʼminlash boʻyicha amaliy chora-tadbirlarni ishlab chiqish va qabul qilish;

Oʻzbekiston Respublikasi Prezidenti devoni xizmatlari va Vazirlar Mahkamasining komplekslari hamda Vazirlik faoliyati sohasiga kiradigan masalalar boʻyicha tegishli vazirlik va idoralar bilan hamkorlik qilish, Vazirlar Mahkamasi yigʻilishlarida va uning Rayosatida masalalarni koʻrib chiqishda qatnashish;

Oʻzbekiston Respublikasi Prezidenti, Oʻzbekiston Respublikasi Bosh vaziri va uning oʻrinbosarlari topshiriqlarini bajarish;

oʻz oʻrinbosarlari vakolatlarini belgilash, ular oʻrtasida vazifalarni taqsimlash, Vazirlikning boshqa mansabdor shaxslari vakolatlarini belgilash, Vazirlik faoliyatining alohida uchastkalariga rahbarlik qilish uchun oʻz oʻrinbosarlari va boshqa mansabdor shaxslarning shaxsiy masʼuliyati darajasini belgilash;

Vazirlik faoliyati rejalashtirilishini tashkil etish, Vazirlik va oʻz oʻrinbosarlarining choraklik ish rejalarini tasdiqlash, ularning bajarilishi ustidan nazoratni taʼminlash;

Oʻzbekiston Respublikasi Prezidenti va Oʻzbekiston Respublikasi Vazirlar Mahkamasining qarorlari va topshiriqlari ijrosini tashkil etish va monitoringini olib borishning amaliy tizimini yaratish, Vazirlik faoliyatida ijro intizomini mustahkamlash boʻyicha kompleks amaliy chora-tadbirlarni bajarish, Oʻzbekiston Respublikasi Prezidentining “Oʻzbekiston Respublikasi Prezidentining hujjatlari va topshiriqlari samarali va natijali ijro etilishi, shuningdek ijro intizomi mustahkamlanishi uchun Oʻzbekiston Respublikasi Prezidenti Davlat maslahatchilarining, Vazirlar Mahkamasi va uning komplekslari, davlat va xoʻjalik boshqaruvi organlari hamda barcha darajalardagi hokimliklar rahbarlarining shaxsiy javobgarligi toʻgʻrisida” 2017-yil 11-apreldagi PQ-2881-son qarori va Vazirlar Mahkamasining 1999-yil 12-yanvardagi “Ijro intizomini mustahkamlash chora-tadbirlari toʻgʻrisida”gi 12-son qaroriga muvofiq topshiriqlarning oʻz vaqtida va sifatli bajarilishi uchun tarkibiy va hududiy boʻlinmalar rahbarlarining shaxsiy masʼuliyatini oshirish choralarini koʻrish;

Vazirlik xodimlarini tizimli qayta tayyorlashni va ularning malakasini oshirishni tashkil etish;

Vazirlik tizimida kadrlarni tanlash va joy-joyiga qoʻyish, ularning samarali faoliyati uchun zarur shart-sharoitlar yaratish, Vazirlikning kadrlar zaxirasini shakllantirish;

Oʻzbekiston Respublikasi Prezidenti, Oʻzbekiston Respublikasi Prezidenti devoni va Vazirlar Mahkamasi nomenklaturasiga kiradigan boʻsh lavozimlarga taklif etilgan kadrlarning, shuningdek Vazirlikka ishga qabul qilinayotgan boshqa kadrlarning professionalligi va oʻz ishini bilishi, yuksak darajadagi ishchanlik va maʼnaviy-axloqiy fazilatlarga ega boʻlishini taʼminlashga qaratilgan choralarni amalga oshirish;

“Normativ-huquqiy hujjatlar toʻgʻrisida”gi, “Qonunlar loyihalarini tayyorlash va Oʻzbekiston Respublikasi Oliy Majlisining Qonunchilik palatasiga kiritish tartibi toʻgʻrisida”gi Oʻzbekiston Respublikasi qonunlari, Oʻzbekiston Respublikasi Prezidentining 2017-yil 28-iyuldagi PQ-3161-son qarori bilan tasdiqlangan Oʻzbekiston Respublikasi Prezidenti devoni Reglamenti, Vazirlar Mahkamasining 2005-yil 14-fevraldagi 62-son qarori bilan tasdiqlangan Oʻzbekiston Respublikasi Vazirlar Mahkamasining Reglamenti talablariga muvofiq qishloq xoʻjaligi va oziq-ovqat xavfsizligi masalalari boʻyicha normativ-huquqiy hujjatlar loyihalarining sifatli ishlab chiqilishi va oʻz vaqtida kiritilishini tashkil etish, ularning Vazirlar Mahkamasi apparatida puxta ishlanishida, Vazirlar Mahkamasi rahbariyatida himoya qilinishi va Oʻzbekiston Respublikasi Prezidenti devonida koʻrib chiqilishida ishtirok etish;

“Normativ-huquqiy hujjatlar toʻgʻrisida”gi, “Qonunlar loyihalarini tayyorlash va Oʻzbekiston Respublikasi Oliy Majlisining Qonunchilik palatasiga kiritish tartibi toʻgʻrisida”gi Oʻzbekiston Respublikasi qonunlariga va Vazirlar Mahkamasining 2016-yil 17-oktabrdagi 345-son qarori bilan tasdiqlangan Davlat va xoʻjalik boshqaruvi organlari, mahalliy ijro etuvchi hokimiyat organlarining qonun loyihasini tayyorlash faoliyatining Namunaviy reglamentiga muvofiq Vazirlikning qonun loyihalarini tayyorlash faoliyatini tashkil etish;

qishloq xoʻjaligi va oziq-ovqat xavfsizligini taʼminlash masalalari boʻyicha buyruqlar qabul qilish, zarur hollarda boshqa vazirlik va idoralar bilan birgalikda tegishli qarorlarni qabul qilish;

Oʻzbekiston Respublikasi Prezidentining 2017-yil 28-iyuldagi PQ-3161-son qarori bilan tasdiqlangan Oʻzbekiston Respublikasi Prezidenti devoni Reglamenti, Vazirlar Mahkamasining 2005-yil 14-fevraldagi 62-son qarori bilan tasdiqlangan Oʻzbekiston Respublikasi Vazirlar Mahkamasining Reglamentida belgilangan muddatlarga muvofiq Vazirlikka taqdim qilingan takliflar va normativ-huquqiy hujjatlar loyihalarini toʻliq va har tomonlama koʻrib chiqilishi, ularning puxta huquqiy, iqtisodiy va boshqa turdagi ekspertizasini oʻtkazilishi hamda kelishilishini (vizalash) taʼminlash;

Vazirlik rahbarlari va xodimlari xizmat safarlarini Oʻzbekiston Respublikasi Prezidentining “Mansabdor shaxslarning xorijiy mamlakatlarga chiqish tartibini takomillashtirish choralari toʻgʻrisida” 2014-yil 5-martdagi PQ-2142-son va “Xorijiy xizmat safarlarida boʻlish samaradorligi va xorijiy delegatsiyalarning Oʻzbekiston Respublikasiga tashriflarini tashkil etish uchun mansabdor shaxslarning shaxsiy masʼuliyatini yanada oshirish chora-tadbirlari toʻgʻrisida” 2017-yil 3-avgustdagi PQ-3170-son qarorlari talablariga muvofiq tashkil etish, xizmat safarlarining asoslanganligi, samaradorligi va natijadorligini, safar uchun ajratiladigan mablagʻlardan maqsadli va oqilona foydalanishni taʼminlash;

oʻz oʻrinbosarlari va hududiy boʻlinmalar, shuningdek, idoraviy mansub tashkilotlar rahbarlari faoliyati samaradorligini va natijadorligini muntazam tanqidiy tahlil qilish, Vazirlik hayʼati majlislarida ularning shaxsiy hisobotlarini eshitish, ularning yakunlari boʻyicha zarur chora-tadbirlar koʻrish;

Vazirlik xodimlarini ragʻbatlantirish va intizomiy javobgarlikka tortish masalalarini hal etish, oʻzining oʻrinbosarlarini ragʻbatlantirish va intizomiy javobgarlikka tortish, shu jumladan ularning egallab turgan lavozimda qolishi maqsadga muvofiqligi masalasini koʻrib chiqish boʻyicha takliflarni kiritish, ularning shaxsiy masʼuliyatini oshirish boʻyicha tizimli chora-tadbirlar koʻrish;

Vazirlar Mahkamasining 2016-yil 2-martdagi 62-son qarori bilan tasdiqlangan davlat boshqaruvi organlari va mahalliy ijro etuvchi hokimiyat organlari xodimlarining odob-axloq namunaviy qoidalari asosida vazir tomonidan tasdiqlanadigan Vazirlik xodimlarining odob-axloq qoidalari talablariga Vazirlik xodimlari tomonidan rioya etilishini taʼminlash;

huquqni qoʻllash amaliyotini va qonun hujjatlarini takomillashtirishga doir chora-tadbirlarni ishlab chiqish va amalga oshirish orqali “Korrupsiyaga qarshi kurashish toʻgʻrisida”gi Oʻzbekiston Respublikasi Qonuni talablariga muvofiq Vazirlik tizimida korrupsiya va boshqa huquqbuzarliklarning oldini olish choralarini koʻrish, shuningdek, ularning sodir etilishiga koʻmaklashuvchi sabablar va shart-sharoitlarni aniqlash, tahlil qilish, bartaraf etish;

Vazirlik, uning tarkibiy va hududiy boʻlinmalari ish faoliyatining zamonaviy shakllarini joriy etishni taʼminlash;

aholi va tadbirkorlik subyektlari bilan oʻzaro munosabatlarni amalga oshirishda “yagona darcha” tamoyilini joriy qilish yoʻli bilan davlat xizmatlari samaradorligi, sifati va ulardan erkin foydalanishni oshirish, “Elektron hukumat toʻgʻrisida”gi Oʻzbekiston Respublikasining Qonuni doirasida zamonaviy axborot-kommunikatsiya texnologiyalarini keng qoʻllash;

“Jismoniy va yuridik shaxslarning murojaatlari toʻgʻrisida”gi Oʻzbekiston Respublikasi qonuni, Vazirlar Mahkamasining 2018-yil 7-maydagi 341-son qarori bilan tasdiqlangan Davlat organlarida, davlat muassasalarida va davlat ishtirokidagi tashkilotlarda jismoniy va yuridik shaxslarning murojaatlari bilan ishlash tartibi toʻgʻrisidagi namunaviy nizomda belgilangan muddat va tartibda jismoniy va yuridik shaxslar murojaatlarini koʻrib chiqish, aholi bilan toʻgʻridan-toʻgʻri va ochiq muloqotni yoʻlga qoʻyish, shu jumladan jismoniy shaxslar va yuridik shaxslar vakillarini sayyor qabullarini oʻtkazish boʻyicha samarali ishlar tashkil etish;

Oʻzbekiston Respublikasi Prezidentining Xalq qabulxonalari bilan samarali hamkorlik qilishni tashkil etish, Vazirlikning rahbarlari va xodimlarini ularning faoliyatida faol ishtirok etishini, jismoniy va yuridik shaxslarning Oʻzbekiston Respublikasi Prezidentining Virtual qabulxonasiga kelib tushgan murojaatlari oʻz vaqtida va toʻlaqonli koʻrib chiqilishini taʼminlash;

davlat siriga kiritilgan maʼlumotlar va maxfiy axborot bilan ishlashda qonun hujjatlari talablariga rioya qilish;

Vazirlikning tarkibiy va hududiy boʻlinmalarining nizomlari hamda idoraviy mansub tashkilotlar ustavlarini oʻrnatilgan tartibda tasdiqlash;

Vazirlik markaziy apparati xodimlari, tarkibiy boʻlinmalar hamda idoraviy mansub tashkilotlar rahbarlarini qonun hujjatlarida belgilangan tartibda lavozimga tayinlash va lavozimdan ozod etish;

Vazirlik, hududiy boʻlinmalar, idoraviy mansub tashkilotlar mansabdor shaxslari bajarishi majburiy boʻlgan buyruqlar chiqarish va topshiriqlar berish, shuningdek, ularning ijrosini oʻrnatilgan tartibda nazorat qilish;

Vazirlik markaziy apparati, hududiy boʻlinmalar, idoraviy mansub tashkilotlarning tasdiqlangan tuzilmalari va shtatlar jadvaliga xodimlarning cheklangan soni doirasida oʻzgartirishlar kiritish.

18. Quyidagilar vazirning birinchi oʻrinbosari va oʻrinbosarlarining asosiy funksional vazifalari hisoblanadi:

Vazir vaqtincha boʻlmaganida tegishli buyruq asosida uning vazifalarini bajarish;

Vazirlikning mutasaddilik qilinadigan tarkibiy tuzilmalari faoliyatini muvofiqlashtirish, nazorat qilish va ularga bevosita rahbarlik qilish, ularning xodimlari oʻrtasida vazifalarni taqsimlash;

Vazirlik faoliyatining mutasaddilik qilinadigan yoʻnalishlari boʻyicha Oʻzbekiston Respublikasi Prezidenti va Vazirlar Mahkamasining qarorlari bilan tasdiqlangan Vazirlik faoliyatini yanada takomillashtirish boʻyicha konsepsiyalar, kompleks dasturlar va kompleks tadbirlar ijrosini tanqidiy va chuqur tahlil qilish;

mutasaddilik qilinadigan tarkibiy tuzilmalar tomonidan prognoz koʻrsatkichlarga erishishni soʻzsiz taʼminlash chora-tadbirlarini koʻrish, tuzilmalar rahbarlarining hisobotlarini muntazam eshitish va ushbu koʻrsatkichlarga erishish uchun ularning shaxsiy javobgarligini oshirish;

mutasaddilik qilinadigan tarkibiy tuzilmalarning choraklik rejalarini tasdiqlash, ularning bajarilishi ustidan nazoratni taʼminlash;

Oʻzbekiston Respublikasi Prezidenti va Oʻzbekiston Respublikasi Vazirlar Mahkamasining qarorlari va topshiriqlari ijrosini taʼminlash, Vazirlikning mutasaddilik qilinadigan tarkibiy tuzilmalarida ijro intizomi boʻyicha kompleks amaliy chora-tadbirlarni amalga oshirish, shuningdek Oʻzbekiston Respublikasi Prezidentining “Oʻzbekiston Respublikasi Prezidentining hujjatlari va topshiriqlari samarali va natijali ijro etilishi, shuningdek ijro intizomi mustahkamlanishi uchun Oʻzbekiston Respublikasi Prezidenti Davlat maslahatchilarining, Vazirlar Mahkamasi va uning komplekslari, davlat va xoʻjalik boshqaruvi organlari, shuningdek barcha darajalardagi hokimliklar rahbarlarining shaxsiy javobgarligi toʻgʻrisida” 2017-yil 11-apreldagi PQ-2881-son qarori va Vazirlar Mahkamasining “Ijro intizomini mustahkamlash chora-tadbirlari toʻgʻrisida” 1999-yil 12-yanvardagi 12-son qaroriga muvofiq topshiriqlar oʻz vaqtida va sifatli ijro etilishi uchun tarkibiy tuzilmalar rahbarlarining shaxsiy masʼuliyatini oshirish chora-tadbirlarini koʻrish;

Vazirlik hayʼati qarorlari, vazirning buyruq va topshiriqlarini oʻz vaqtida va sifatli bajarilishini taʼminlash;

mutasaddilik qilinadigan tarkibiy tuzilmalarda kadrlarni tanlash va joy-joyiga qoʻyish boʻyicha Vazirga takliflar taqdim etish, ularning professionalligi, oʻz ishini bilishi, yuksak darajadagi ishchanlik va maʼnaviy-axloqiy fazilatlarga ega boʻlishini taʼminlash, ularning kasbiy malakasini oshirish chora-tadbirlarini koʻrish, mutasaddilik qilinadigan tarkibiy tuzilmalarda kadrlar zaxirasini shakllantirish;

mutasaddilik qilinadigan tarkibiy tuzilmalar tomonidan normativ-huquqiy hujjatlar loyihalari sifatli ishlab chiqilishini tashkil etish, Vazirlikning mutasaddilik qilinadigan tarkibiy tuzilmalarida tayyorlangan hujjatlar loyihalarini koʻrib chiqish va ular keyinchalik Vazir tomonidan koʻrib chiqilishi, imzolanishi (viza qoʻyilishi) uchun viza qoʻyish, ularning Oʻzbekiston Respublikasi Prezidentining 2017-yil 28-iyuldagi PQ-3161-son qarori bilan tasdiqlangan Oʻzbekiston Respublikasi Prezidenti devoni Reglamenti, Vazirlar Mahkamasining 2005-yil 14-fevraldagi 62-son qarori bilan tasdiqlangan Oʻzbekiston Respublikasi Vazirlar Mahkamasining Reglamenti talablariga qatʼiy muvofiq ravishda Vazirlar Mahkamasiga oʻz vaqtida kiritilishini taʼminlash, shuningdek, Vazirlar Mahkamasi apparatida normativ-huquqiy hujjatlar loyihalarini ishlab chiqishda Vazirning topshirigʻiga binoan ishtirok etish;

Vazirlikka taqdim etilgan takliflar va normativ-huquqiy hujjatlar loyihalari toʻliq va oʻz vaqtida koʻrib chiqilishini taʼminlash, ularni puxta huquqiy, iqtisodiy va boshqa turdagi ekspertizadan oʻtkazish;

xizmat safarlarini Oʻzbekiston Respublikasi Prezidentining “Mansabdor shaxslarning xorijiy mamlakatlarga chiqish tartibini takomillashtirish choralari toʻgʻrisida” 2014-yil 5-martdagi PQ-2142-son va “Xorijiy xizmat safarlarida boʻlishning samaradorligi va xorijiy delegatsiyalarning Oʻzbekiston Respublikasiga tashrifini tashkil etish uchun mansabdor shaxslarning shaxsiy javobgarligini yanada oshirish chora-tadbirlari toʻgʻrisida” 2017-yil 3-avgustdagi PQ-3170-son qarorlari talablariga muvofiq amalga oshirish, xizmat safarlarining asoslanganligi, samaradorligi va natijadorligini, safar uchun ajratiladigan mablagʻlardan maqsadli va oqilona foydalanishni taʼminlash;

mutasaddilik qilinadigan tarkibiy tuzilmalar rahbarlari va xodimlari faoliyati samaradorligi va natijadorligini muntazam tanqidiy tahlil qilish, Vazirlik hayʼati majlislarida ularning shaxsiy hisobotlarini eshitish, ularning yakunlari boʻyicha zarur chora-tadbirlar koʻrish;

qishloq xoʻjaligi va oziq-ovqat xavfsizligi masalalari boʻyicha Vazirlik faoliyatini takomillashtirishga doir amaliy chora-tadbirlar koʻrish, qonun hujjatlarini takomillashtirish boʻyicha takliflarni ishlab chiqish va ularni Vazirga kiritish;

mutasaddilik qilinadigan tarkibiy tuzilmalar rahbarlari va xodimlarini ragʻbatlantirish va intizomiy javobgarlikka tortish, shu jumladan, ularning egallab turgan lavozimda qolishi maqsadga muvofiqligi masalasini koʻrib chiqish boʻyicha Vazirga taklif kiritish, funksional vazifalar va yuklangan vazifalar bajarilishi uchun ularning shaxsiy masʼuliyatini oshirish boʻyicha tizimli chora-tadbirlar koʻrish;

Vazirlar Mahkamasining 2016-yil 2-martdagi 62-son qarori bilan tasdiqlangan davlat boshqaruvi organlari va mahalliy ijro etuvchi hokimiyat organlari xodimlarining odob-axloq namunaviy qoidalari asosida vazir tomonidan tasdiqlanadigan Vazirlik xodimlarining odob-axloq qoidalari talablariga rioya etish, mutasaddilik qilinadigan tarkibiy boʻlinmalar rahbarlari va xodimlari tomonidan qayd qilingan Qoidalarga rioya etilishini taʼminlash;

“Korrupsiyaga qarshi kurashish toʻgʻrisida”gi Oʻzbekiston Respublikasi Qonuni talablariga muvofiq Vazirlik tizimida korrupsiya va boshqa huquqbuzarliklarning oldini olish choralarini koʻrish, shuningdek, huquqni qoʻllash amaliyotini va qonun hujjatlarini takomillashtirishga doir chora-tadbirlarni ishlab chiqish va amalga oshirish orqali ularning sodir etilishiga koʻmaklashuvchi sabablar va shart-sharoitlarni aniqlash, tahlil qilish va bartaraf etish;

“Jismoniy va yuridik shaxslarning murojaatlari toʻgʻrisida”gi Oʻzbekiston Respublikasi qonuni, Vazirlar Mahkamasining 2018-yil 7-maydagi 341-son qarori bilan tasdiqlangan Davlat organlarida, davlat muassasalarida va davlat ishtirokidagi tashkilotlarda jismoniy va yuridik shaxslarning murojaatlari bilan ishlash tartibi toʻgʻrisidagi namunaviy nizomda belgilangan muddat va tartibda jismoniy va yuridik shaxslar murojaatlarini koʻrib chiqish, aholi bilan toʻgʻridan-toʻgʻri va ochiq muloqotni yoʻlga qoʻyish, shu jumladan jismoniy shaxslar va yuridik shaxslar vakillarini sayyor qabullarini oʻtkazish boʻyicha samarali ish tashkil etish;

Oʻzbekiston Respublikasi Prezidentining Xalq qabulxonalari bilan samarali hamkorlikni, ularning faoliyatida Oʻzbekiston Respublikasi Prezidentining “Jismoniy va yuridik shaxslarning murojaatlari bilan ishlash tizimini tubdan takomillashtirishga doir chora-tadbirlar toʻgʻrisida” 2016-yil 28-dekabrdagi PF-4904-son Farmoniga muvofiq faol ishtirok etish, jismoniy va yuridik shaxslarning Oʻzbekiston Respublikasi Prezidenti Virtual qabulxonasidan kelib tushgan barcha murojaatlarini oʻz vaqtida va toʻliq koʻrib chiqilishini taʼminlash;

davlat siriga kiritilgan maʼlumotlar va maxfiy axborot bilan ishlashda qonun hujjatlari talablariga rioya qilish.

19. Quyidagilar Vazirlik markaziy apparati tarkibiy tuzilmalari rahbarlarining asosiy funksional vazifalari hisoblanadi:

tarkibiy tuzilmalar faoliyatiga umumiy rahbarlik qilish, ushbu tuzilmalarga yuklangan vazifalar va funksiyalar bajarilishini tashkil etish;

tegishli tarkibiy tuzilmalar va idoraviy mansub tashkilotlar faoliyatini oʻz vakolatlari doirasida muvofiqlashtirish;

prognoz koʻrsatkichlar ijrosini tizimli tahlil qilish, tarkibiy va hududiy boʻlinmalar tomonidan prognoz koʻrsatkichlarga erishishni soʻzsiz taʼminlashga qaratilgan qoʻshimcha chora-tadbirlarini koʻrish boʻyicha takliflarni vazirning mutasaddi oʻrinbosarlariga (shu jumladan birinchi oʻrinbosarga) kiritish;

Vazirlik markaziy apparati tarkibiy tuzilmasi xodimlari tomonidan Oʻzbekiston Respublikasi Prezidenti va Oʻzbekiston Respublikasi Vazirlar Mahkamasining qarorlari va topshiriqlari ijrosini taʼminlash, ijro intizomini mustahkamlash boʻyicha kompleks amaliy chora-tadbirlarni amalga oshirish, shuningdek, Oʻzbekiston Respublikasi Prezidentining “Oʻzbekiston Respublikasi Prezidentining hujjatlari va topshiriqlari samarali va natijali ijro etilishi, shuningdek ijro intizomi mustahkamlanishi uchun Oʻzbekiston Respublikasi Prezidenti Davlat maslahatchilarining, Vazirlar Mahkamasi va uning komplekslari, davlat va xoʻjalik boshqaruvi organlari, shuningdek barcha darajalardagi hokimliklar rahbarlarining shaxsiy javobgarligi toʻgʻrisida” 2017-yil 11-apreldagi PQ-2881-son qarori va Vazirlar Mahkamasining “Ijro intizomini mustahkamlash chora-tadbirlari toʻgʻrisida” 1999-yil 12-yanvardagi 12-son qaroriga muvofiq topshiriqlarning oʻz vaqtida va sifatli bajarilishi uchun tarkibiy tuzilmalar xodimlarining shaxsiy masʼuliyatini oshirish chora-tadbirlarini koʻrish;

Vazirlik hayʼati qarorlari, Vazir, uning birinchi oʻrinbosari va oʻrinbosarlari buyruqlari hamda topshiriqlari oʻz vaqtida va sifatli bajarilishini taʼminlash;

tarkibiy tuzilmalarning har choraklik ish rejalari ishlab chiqilishini taʼminlash, ularni tasdiqlash uchun kiritish, ularda koʻrsatilgan vazifalar va tadbirlar oʻz vaqtida va sifatli bajarilishini taʼminlash;

tarkibiy tuzilmalarga yuklangan vazifalar bajarilishini nazorat qilish va muvofiqlashtirish, Vazirlik hududiy boʻlinmalari va idoraviy mansub tashkilotlar faoliyatiga amaliy va uslubiy yordam koʻrsatish;

Vazirlik tarkibiy tuzilmalar faoliyatini takomillashtirish boʻyicha takliflarni ishlab chiqish va ularni koʻrib chiqish uchun Vazirga kiritish;

tarkibiy tuzilmalarda kadrlarni tanlash va joy-joyiga qoʻyishda Vazirning birinchi oʻrinbosari va oʻrinbosarlariga takliflar taqdim etish, professionalligi, oʻz ishini bilishi, amaliy tajribaga, yuksak ishchanlik va maʼnaviy-axloqiy fazilatlarga ega ekanligi kafolatini taʼminlash, ularning kasb malakasini oshirish choralarini koʻrish, tarkibiy tuzilmalarda kadrlar zaxirasini shakllantirish;

normativ-huquqiy hujjatlar loyihalari tarkibiy tuzilmalar tomonidan sifatli ishlab chiqilishini tashkil etish, Vazirlikning tarkibiy tuzilmalarida tayyorlangan hujjatlar loyihalarini keyinchalik Vazirlik rahbariyati tomonidan koʻrib chiqish, imzolash (viza qoʻyish) uchun koʻrib chiqish va viza qoʻyish, ularning Oʻzbekiston Respublikasi Prezidentining 2017-yil 28-iyuldagi PQ-3161-son qarori bilan tasdiqlangan Oʻzbekiston Respublikasi Prezidenti devoni Reglamenti, Vazirlar Mahkamasining 2005-yil 14-fevraldagi 62-son qarori bilan tasdiqlangan Oʻzbekiston Respublikasi Vazirlar Mahkamasining Reglamenti talablariga qatʼiy muvofiq ravishda Vazirlar Mahkamasiga oʻz vaqtida kiritilishini taʼminlash, shuningdek, Vazirlar Mahkamasi apparatida normativ-huquqiy hujjatlar loyihalarini ishlab chiqishda Vazirlik rahbariyati topshirigʻiga binoan ishtirok etish;

Vazirlikka taqdim etilgan takliflar va normativ-huquqiy hujjatlar loyihalarini toʻliq va har tomonlama koʻrib chiqish, ularni puxta huquqiy, iqtisodiy va boshqa turdagi ekspertizadan oʻtkazish;

xizmat safarlarini Oʻzbekiston Respublikasi Prezidentining “Mansabdor shaxslarning xorijiy mamlakatlarga chiqish tartibini takomillashtirish chora-tadbirlari toʻgʻrisida” 2014-yil 5-martdagi PQ-2142-son va “Xorijiy xizmat safarlarida boʻlishning samaradorligi va xorijiy delegatsiyalarning Oʻzbekiston Respublikasiga tashrifini tashkil etish uchun mansabdor shaxslarning shaxsiy javobgarligini yanada oshirish chora-tadbirlari toʻgʻrisida” 2017-yil 3-avgustdagi PQ-3170-son qarorlari talablariga muvofiq amalga oshirish, xizmat safarlari asoslanganligi, samaradorligi va natijadorligini, safar uchun ajratiladigan mablagʻlardan maqsadli va oqilona foydalanishni taʼminlash;

tarkibiy tuzilmalar xodimlari faoliyati samaradorligi va natijadorligini muntazam ravishda tanqidiy tahlil qilish, yigʻilishlarda ularning shaxsiy hisobotlarini eshitish, ularning yakunlari boʻyicha zarur chora-tadbirlarni koʻrish;

Vazirlar Mahkamasining 2016-yil 2-martdagi 62-son qarori bilan tasdiqlangan davlat boshqaruvi organlari va mahalliy ijro etuvchi hokimiyat organlari xodimlarining odob-axloq namunaviy qoidalari asosida vazir tomonidan tasdiqlanadigan Vazirlik xodimlarining odob-axloq qoidalari talablariga rioya etish, tarkibiy boʻlinmalar xodimlari tomonidan qayd qilingan Qoidalarga rioya etilishini taʼminlash;

“Korrupsiyaga qarshi kurashish toʻgʻrisida”gi Oʻzbekiston Respublikasi Qonuni talablariga muvofiq tarkibiy tuzilmalarda korrupsiya va boshqa huquqbuzarliklarning oldini olish choralarini koʻrish, shuningdek huquqni qoʻllash amaliyotini va qonun hujjatlarini takomillashtirishga doir chora-tadbirlarni ishlab chiqish va amalga oshirish orqali ularning sodir etilishiga koʻmaklashuvchi sabablar va shart-sharoitlarni aniqlash, tahlil qilish, bartaraf etish;

davlat xizmatlarining samaradorligi, sifatini oshirish va ulardan foydalanish boʻyicha takliflarni vazirlik rahbariyatiga kiritish;

“Jismoniy va yuridik shaxslarning murojaatlari toʻgʻrisida”gi Oʻzbekiston Respublikasi qonuni, Vazirlar Mahkamasining 2018-yil 7-maydagi 341-son qarori bilan tasdiqlangan Davlat organlarida, davlat muassasalarida va davlat ishtirokidagi tashkilotlarda jismoniy va yuridik shaxslarning murojaatlari bilan ishlash tartibi toʻgʻrisidagi namunaviy nizomda belgilangan muddat va tartibda jismoniy va yuridik shaxslar murojaatlarini koʻrib chiqish, aholi bilan toʻgʻridan-toʻgʻri va ochiq muloqotni yoʻlga qoʻyish, jismoniy shaxslar va yuridik shaxslar vakillarini shaxsan qabul qilish, shu jumladan sayyor qabullarini tizimli oʻtkazish boʻyicha samarali ishlarni tashkil etish;

Oʻzbekiston Respublikasi Prezidentining Xalq qabulxonalari bilan samarali hamkorlik qilish, ularning faoliyatida Oʻzbekiston Respublikasi Prezidentining “Jismoniy va yuridik shaxslarning murojaatlari bilan ishlash tizimini tubdan takomillashtirishga doir chora-tadbirlar toʻgʻrisida” 2016-yil 28-dekabrdagi PF-4904-son Farmoniga muvofiq faol ishtirok etish, jismoniy va yuridik shaxslarning Oʻzbekiston Respublikasi Prezidenti Virtual qabulxonasidan kelib tushgan barcha murojaatlarini oʻz vaqtida va toʻliq koʻrib chiqish;

davlat siriga kiritilgan maʼlumotlar va maxfiy axborot bilan ishlashda qonun hujjatlari talablariga rioya qilish.

20. Quyidagilar Vazirlikning hududiy boʻlinmalari rahbarlarining asosiy funksional majburiyatlari hisoblanadi:

hududiy boʻlinma faoliyatiga umumiy rahbarlik qilish, Oʻzbekiston Respublikasi Prezidentining tegishli Farmoni va qarori, Vazirlar Mahkamasining qarori va boshqa qonun hujjatlari, shuningdek Vazirlik hujjatlari bilan ushbu tuzilmaga yuklangan vazifalar va funksiyalar bajarilishini tashkil etish;

hududiy boʻlinma faoliyati bilan bogʻliq prognoz koʻrsatkichlarga erishishni soʻzsiz taʼminlash boʻyicha amaliy chora-tadbirlarni ishlab chiqish va qabul qilish;

hududiy boʻlinma xodimlari tomonidan Oʻzbekiston Respublikasi Prezidenti va Vazirlar Mahkamasining qarorlari va topshiriqlari ijrosini taʼminlash, ijro intizomini mustahkamlash boʻyicha kompleks amaliy chora-tadbirlarni amalga oshirish, shuningdek, Oʻzbekiston Respublikasi Prezidentining “Oʻzbekiston Respublikasi Prezidentining hujjatlari va topshiriqlari samarali va natijali ijro etilishi, shuningdek, ijro intizomi mustahkamlanishi uchun Oʻzbekiston Respublikasi Prezidenti Davlat maslahatchilarining, Vazirlar Mahkamasi va uning komplekslari, davlat va xoʻjalik boshqaruvi organlari, shuningdek, barcha darajalardagi hokimliklar rahbarlarining shaxsiy javobgarligi toʻgʻrisida” 2017-yil 11-apreldagi PQ-2881-son qarori va Vazirlar Mahkamasining “Ijro intizomini mustahkamlash chora-tadbirlari toʻgʻrisida” 1999-yil 12-yanvardagi 12-son qaroriga muvofiq topshiriqlarning oʻz vaqtida sifatli bajarilishi uchun hududiy boʻlinma xodimlarining shaxsiy masʼuliyatini oshirish chora-tadbirlarini koʻrish;

Vazirlik hayʼati qarorlari, Vazir, uning birinchi oʻrinbosari va oʻrinbosarlari buyruqlari hamda topshiriqlari, mahalliy ijro etuvchi hokimiyat organlari qaror va farmoyishlarining oʻz vaqtida va sifatli bajarilishini taʼminlash;

Vazirlik faoliyati sohasi va vakolatiga kiradigan masalalar yuzasidan mahalliy davlat hokimiyati organlari va kompleks ijtimoiy-iqtisodiy rivojlantirish boʻyicha sektorlar bilan hamkorlik qilish;

oʻz oʻrinbosarlarining vakolatlarini belgilash, ular oʻrtasida vazifalarni taqsimlash, hududiy boʻlinmaning boshqa mansabdor shaxslari vakolatlarini belgilash, hududiy boʻlinma faoliyatining alohida tarmoqlariga rahbarlik qilish uchun oʻz oʻrinbosarlari va boshqa mansabdor shaxslarning shaxsiy javobgarligi darajasini belgilash;

hududiy boʻlinma faoliyatini rejalashtirishni tashkil etish, hududiy boʻlinma va oʻz oʻrinbosarlarining har choraklik ish rejalarini tasdiqlash, ularning bajarilishi ustidan nazoratni taʼminlash;

hududiy boʻlinmada kadrlarni tanlash va joy-joyiga qoʻyish, ularning samarali faoliyat koʻrsatishi uchun zarur shart-sharoitlar yaratish, hududiy boʻlinma kadrlar zaxirasini shakllantirish;

Vazir, mahalliy ijro etuvchi hokimiyat nomenklaturasiga kiradigan boʻsh lavozimlarga taklif etilgan kadrlarning, shuningdek, hududiy boʻlinmaga ishga qabul qilinayotgan boshqa kadrlarning professionalligi, oʻz ishini bilishi, amaliy tajribaga, yuksak darajada ishchanlik va maʼnaviy-axloqiy fazilatlarga ega ekanligi kafolatini taʼminlash;

hududiy boʻlinma xodimlarini ragʻbatlantirish va intizomiy javobgarlikka tortish masalalarini hal qilish, oʻz oʻrinbosarlarini ragʻbatlantirish va intizomiy javobgarlikka tortish toʻgʻrisida takliflar kiritish, shu jumladan ular egallab turgan lavozimda qolishi maqsadga muvofiqligiga doir masalalarni koʻrib chiqish, ularning shaxsiy masʼuliyatini oshirish boʻyicha muntazam chora-tadbirlar koʻrish;

Vazirlar Mahkamasining 2016-yil 2-martdagi 62-son qarori bilan tasdiqlangan davlat boshqaruvi organlari va mahalliy ijro etuvchi hokimiyat organlari xodimlarining odob-axloq namunaviy qoidalari asosida tasdiqlanadigan Vazirlik xodimlarining odob-axloq qoidalari talablariga hududiy boʻlinma xodimlari tomonidan rioya etilishini taʼminlash;

“Korrupsiyaga qarshi kurashish toʻgʻrisida”gi Oʻzbekiston Respublikasi Qonuni talablariga muvofiq hududiy boʻlinmada korrupsiya va boshqa huquqbuzarliklarning oldini olish choralarini koʻrish, shuningdek, huquqni qoʻllash amaliyotini va qonun hujjatlarini takomillashtirishga doir chora-tadbirlarni ishlab chiqish va amalga oshirish orqali ularning sodir etilishiga koʻmaklashuvchi sabablar va shart-sharoitlarni aniqlash, tahlil qilish, bartaraf etish;

prognoz koʻrsatkichlar ijrosini tizimli tahlil qilish, hududiy boʻlinma tomonidan prognoz koʻrsatkichlarga erishishni soʻzsiz taʼminlashga qaratilgan qoʻshimcha chora-tadbirlarini koʻrish boʻyicha takliflarni vazirning mutasaddi oʻrinbosarlariga (shu jumladan birinchi oʻrinbosarga) kiritish;

hududiy boʻlinma xodimlari faoliyatining samaradorligi va natijadorligini tizimli ravishda tanqidiy tahlil qilish, yigʻilishlarda ularning shaxsiy hisobotlarini eshitish, ularning yakunlari boʻyicha zarur chora-tadbirlar koʻrish;

hududiy boʻlinmalar faoliyatiga oid masalalar boʻyicha qonun hujjatlarini takomillashtirish, shuningdek, davlat xizmatlari samaradorligi, sifati va ulardan erkin foydalanishni oshirish boʻyicha takliflarni ishlab chiqish hamda ularni koʻrib chiqish uchun Vazirlik rahbariyatiga kiritish;

“Jismoniy va yuridik shaxslarning murojaatlari toʻgʻrisida”gi Oʻzbekiston Respublikasi qonuni, Vazirlar Mahkamasining 2018-yil 7-maydagi 341-son qarori bilan tasdiqlangan Davlat organlarida, davlat muassasalarida va davlat ishtirokidagi tashkilotlarda jismoniy va yuridik shaxslarning murojaatlari bilan ishlash tartibi toʻgʻrisidagi namunaviy nizomda belgilangan muddat va tartibda jismoniy va yuridik shaxslar murojaatlarini koʻrib chiqish, aholi bilan toʻgʻridan-toʻgʻri va ochiq muloqotni yoʻlga qoʻyish, jismoniy shaxslar va yuridik shaxslar vakillarini shaxsan qabul qilish, shu jumladan sayyor qabullarini tizimli oʻtkazish boʻyicha samarali ish tashkil etish;

Oʻzbekiston Respublikasi Prezidentining Xalq qabulxonalari bilan samarali hamkorlik qilish, ularning faoliyatida Oʻzbekiston Respublikasi Prezidentining “Jismoniy va yuridik shaxslarning murojaatlari bilan ishlash tizimini tubdan takomillashtirishga doir chora-tadbirlar toʻgʻrisida” 2016-yil 28-dekabrdagi PF-4904-son Farmoniga muvofiq faol ishtirok etish, jismoniy va yuridik shaxslarning Oʻzbekiston Respublikasi Prezidenti Virtual qabulxonasidan kelib tushgan barcha murojaatlarini oʻz vaqtida va toʻliq koʻrib chiqish;

hududiy boʻlinma xodimlari lavozim maoshiga mukofotlar, ustamalar toʻlash, ularga moddiy yordam berish, ularni mukofotlash, ragʻbatlantirish va ularga intizomiy chora qoʻllash toʻgʻrisida qaror qabul qilish, ularni davlat mukofotlari va idoraviy mukofotlar bilan taqdirlash toʻgʻrisida Vazirlikka takliflar kiritish;

davlat sirini yoki qonun bilan qoʻriqlanadigan boshqa sirni tashkil etuvchi maʼlumotlarning himoya qilinishini taʼminlash.

21. Vazir:

Oʻzbekiston Respublikasi qonunlari, Oʻzbekiston Respublikasi prezidentining hujjatlari va Vazirlar Mahkamasining qarorlari hamda normativ-huquqiy hujjatlar talablarining oʻz vaqtida va sifatli bajarilishi;

Vazirlikka yuklangan vazifalar va funksiyalarning bajarilishini tashkil qilish, Vazirlik faoliyatini rejalashtirish, shuningdek, uning faoliyati bilan bogʻliq prognoz koʻrsatkichlarning soʻzsiz bajarilishini taʼminlash;

qishloq xoʻjaligini rivojlantirish, shuningdek, hududlarni ijtimoiy-iqtisodiy rivojlantirish va qishloq xoʻjaligi sohasiga oid muammoli masalalarni hal etish boʻyicha dasturlar, chora-tadbirlar rejalari, “yoʻl xaritalari” va boshqa dasturiy hujjatlarni samarali amalga oshirish;

kadrlarni tanlash va joy-joyiga qoʻyish, Vazirlik xodimlarini qayta tayyorlash va malakasini oshirish ishlarini tashkil etish, ularning samarali faoliyati uchun zarur sharoitlarni yaratish, mehnat intizomi, qonunchilik talablarini qoʻpol ravishda buzgan xodimlarni intizomiy va boshqa javobgarlikka tortish;

xorijiy mamlakatlarning qishloq xoʻjaligi organlari va xalqaro tashkilotlar bilan hamkorlikni tashkil etish, ilgʻor tajribani tizimli oʻrganish va joriy qilish;

qishloq xoʻjaligi organlari faoliyatining ochiqligini taʼminlash, jismoniy va yuridik shaxslarning murojaatlarini koʻrib chiqish boʻyicha samarali ishlarni tashkil etish, aholi bilan toʻgʻridan-toʻgʻri va ochiq muloqotni yoʻlga qoʻyish, fuqarolar qabulini tizimli oʻtkazish;

ushbu Nizomning 14-bandida nazarda tutilgan Vazirlikning mutasaddilik qilinadigan masalalarga doir javobgarlik sohalari boʻyicha;

ushbu Nizomning 17-bandida koʻrsatilgan oʻz funksional vazifalarining sifatli bajarilishi uchun shaxsan javob beradi.

22. Vazirning birinchi oʻrinbosari:

paxta va texnik ekinlar, shuningdek, boshoqli don, dukkakli va moyli ekinlarni yetishtirish boʻyicha agrotexnik tadbirlarning oʻz vaqtida va sifatli oʻtkazilishini taʼminlash;

suvdan foydalanish sohasida Suv xoʻjaligi vazirligi bilan vazirlik oʻrtasida oʻzaro hamkorlikni taʼminlash;

qishloq xoʻjaligini mexanizatsiyalash darajasini oshirish hamda agrokimyoviy tadbirlarni amalga oshirish;

qishloq xoʻjaligi ekinlarini parvarishlashning ilgʻor agrotexnologiyalari, resurs tejovchi va suv tejovchi texnologiyalarni joriy qilish;

kontraktatsiya shartnomalarining tuzilishi va bajarilishi monitoringini tashkil etish va qishloq xoʻjaligida davlat xaridlarini shakllantirish;

ushbu Nizomning 14-bandida nazarda tutilgan, mutasaddilik qilinadigan qismida Vazirlikning javobgarlik sohalari boʻyicha;

ushbu Nizomning 18-bandida koʻrsatilgan oʻz funksional vazifalarining sifatli bajarilishi uchun shaxsan javob beradi.

23. Vazirning oʻrinbosarlari:

bogʻdorchilik, uzumchilik, chorvachilik, parrandachilik, naslchilik ishi, asalarichilik, baliqchilik va pillachilikni rivojlantirish;

barqaror baholarda aholini yoʻl davomida va uzluksiz taʼminlash uchun zarur hajmlarda qishloq xoʻjaligi va oziq-ovqat zaxiralarini shakllantirilishini taʼminlash;

qishloq xoʻjaligi va oziq-ovqat mahsulotlarining chuqur qayta ishlanishini taʼminlash;

qishloq xoʻjaligi va oziq-ovqat ishlab chiqarishini iqtisodiy tahlil qilish, meʼyorlar va baholarni shakllantirish;

agrar sohada iqtisodiy islohotlarni chuqurlashtirish, agrar tadbirkorlikni davlat tomonidan qoʻllab-quvvatlash, davlat-xususiy sherikligi mexanizmlarini takomillashtirish boʻyicha ishlarni muvofiqlashtirish;

qishloq xoʻjaligi bozorlari konyunkturasini oʻrganish boʻyicha chuqur marketing tadqiqotlarini olib borish, aholining oziq-ovqat mahsulotlariga boʻlgan talabini oʻrganish, agrar soha eksport salohiyatini yanada oshirish boʻyicha chora-tadbirlarni ishlab chiqish va amalga oshirish;

qishloq xoʻjaligiga investitsiyalarni jalb qilish va ulardan samarali foydalanishni monitoring qilish;

qishloq xoʻjaligida innovatsiyalar va axborot-kommunikatsiya texnologiyalarini joriy qilish;

qishloq xoʻjaligiga xizmat koʻrsatuvchi infratuzilmani rivojlantirish, tarmoq moddiy-texnika bazasini mustahkamlash;

ushbu Nizomning 14-bandida nazarda tutilgan, mutasaddilik qilinadigan qismida Vazirlikning javobgarlik sohalari boʻyicha;

ushbu Nizomning 18-bandida koʻrsatilgan oʻz funksional vazifalarining sifatli bajarilishi uchun shaxsan javob beradi.

24. Markaziy apparat tarkibiy boʻlinmalari rahbarlari:

tegishli tarkibiy boʻlinmalarga yuklangan vazifalar va funksiyalarning amalga oshirilishi;

ushbu Nizomning 15-bandida nazarda tutilgan Vazirlik markaziy apparatining javobgarlik sohalari boʻyicha;

ushbu Nizomning 19-bandida koʻrsatilgan oʻz funksional vazifalarining sifatli bajarilishi uchun shaxsan javob beradi.

25. Vazirlik hududiy boʻlinmalari rahbarlari:

hududiy boʻlinmalarga yuklangan vazifalar va funksiyalarning amalga oshirilishi;

ushbu Nizomning 16-bandida nazarda tutilgan Vazirlik hududiy boʻlinmalarining javobgarlik sohalari boʻyicha;

ushbu Nizomning 20-bandida koʻrsatilgan oʻz funksional vazifalarining sifatli bajarilishi uchun shaxsan javob beradi.

26. Vazirlikka Oʻzbekiston Respublikasi Bosh vazirining tavsiyasiga binoan Oʻzbekiston Respublikasi Prezidenti tomonidan lavozimga tayinlanadigan va lavozimdan ozod qilinadigan vazir rahbarlik qiladi.

27. Vazir oʻz maqomiga qoʻra Vazirlar Mahkamasi aʼzosi hisoblanadi.

28. Vazirning Oʻzbekiston Respublikasi Bosh vazirining tavsiyasiga binoan Oʻzbekiston Respublikasi Prezidenti tomonidan lavozimga tayinlanadigan va lavozimdan ozod qilinadigan uch nafar oʻrinbosari, shu jumladan birinchi oʻrinbosari boʻladi.

29. Vazir boʻlmagan vaqtda uning vakolatlari vazifalar taqsimotiga muvofiq uning birinchi oʻrinbosari yoki oʻrinbosarlari tomonidan amalga oshiriladi.

30. Markaziy apparatning tarkibiy boʻlinmalari xodimlari, idoraviy mansub tashkilotlar rahbarlari mutasaddilik qiladigan vazir oʻrinbosari (shu jumladan birinchi oʻrinbosar) taqdimnomasi boʻyicha Vazir tomonidan lavozimga tayinlanadi va lavozimdan ozod qilinadi.

31. Qoraqalpogʻiston Respublikasi Qishloq xoʻjaligi vaziri Oʻzbekiston Respublikasi Qishloq xoʻjaligi vaziri bilan kelishilgan holda, Qoraqalpogʻiston Respublikasi Vazirlar Kengashining raisi tomonidan lavozimga tayinlanadi va lavozimdan ozod qilinadi.

32. Viloyatlar qishloq xoʻjaligi boshqarmalari boshliqlari tegishli viloyatlar hokimlari bilan kelishilgan holda, Oʻzbekiston Respublikasi Qishloq xoʻjaligi vaziri tomonidan lavozimga tayinlanadi va lavozimdan ozod qilinadi.

33. Tumanlar (Quvasoy sh.) qishloq xoʻjaligi boʻlimlari boshliqlari Oʻzbekiston Respublikasi Qishloq xoʻjaligi vaziri bilan kelishilgan holda, tegishli ravishda Qoraqalpogʻiston Respublikasi Qishloq xoʻjaligi vaziri va viloyatlar qishloq xoʻjaligi boshqarmalari boshliqlari tomonidan lavozimga tayinlanadi va lavozimdan ozod qilinadi.

34. Vazirlikning hududiy boʻlinmalari va idoraviy mansub tashkilotlari toʻgʻrisidagi nizomlar vazir tomonidan tasdiqlanadi, agar Oʻzbekiston Respublikasi Prezidenti yoki Vazirlar Mahkamasi qarorlarida boshqacha qoida nazarda tutilmagan boʻlsa.

35. Vazirlik markaziy apparati tarkibiy boʻlinmalarining uning hududiy boʻlinmalari va idoraviy mansub tashkilotlari bilan oʻzaro hamkorligi markaziy apparat tarkibiy boʻlinmalarining rahbarlari tomonidan taʼminlanadi.

36. Vazirlik markaziy apparatining tarkibiy boʻlinmalari Vazirlikning hududiy boʻlinmalari bilan oʻz faoliyati yoʻnalishlari boʻyicha oʻzaro hamkorlik qilib:

topshiriqlarni hududiy boʻlinmalarga va idoraviy mansub tashkilotlarga yetkazadi hamda ularning bajarilishini nazorat qiladi;

Vazirlikning hududiy boʻlinmalariga va idoraviy mansub tashkilotlariga tarkibiy boʻlinmalarning bevosita faoliyati masalalari boʻyicha soʻrovlar yuboradi hamda ularning ijro etilishini nazorat qiladi;

Vazirlikning hududiy boʻlinmalari va idoraviy mansub tashkilotlari faoliyati amaliyotini tekshiradi va oʻrganadi, umumlashtiradi, uni takomillashtirishga qaratilgan chora-tadbirlarni ishlab chiqadi va qabul qiladi;

Vazirlikning hududiy boʻlinmalari va idoraviy mansub tashkilotlari faoliyatini tashkil etish va faoliyati natijalari toʻgʻrisida hisobot va axborot materiallari, statistika maʼlumotlari va boshqa maʼlumotlarning oʻrganilishini tashkil etadi;

Vazirlikning hududiy boʻlinmalari va idoraviy mansub tashkilotlari ish rejalarini tahlil qiladi, ularning faoliyatini rejalashtirishni takomillashtirishga doir choralar koʻradi;

Vazirlikning hududiy boʻlinmalari va idoraviy mansub tashkilotlaridan tushgan takliflarni koʻrib chiqadi;

normativ-huquqiy hujjatlar loyihalarini tayyorlashda Vazirlikning hududiy boʻlinmalari va idoraviy mansub tashkilotlari ishtirokini tashkil etadi, qonun hujjatlarini takomillashtirish boʻyicha ulardan tushgan takliflarni koʻrib chiqadi.

37. Vazirlikning hududiy boʻlinmalari va idoraviy mansub tashkilotlari Vazirlik markaziy apparatining tarkibiy boʻlinmalari bilan oʻzaro hamkorlik qiladi, shu jumladan:

Vazirlik rahbariyati topshiriqlari ijrosi haqida axborot beradi;

qishloq xoʻjaligi sohasida qonun hujjatlarini amalga oshirish boʻyicha faoliyat natijalari toʻgʻrisida markaziy apparatga axborot taqdim etadi;

ularning faoliyatini tekshirish va oʻrganish natijasida ishda aniqlangan kamchiliklar va qoidabuzarliklarni bartaraf etish natijalari toʻgʻrisida axborot beradi;

oʻz faoliyati natijalari toʻgʻrisidagi hisobotlarni belgilangan tartibda va muddatlarda Vazirlikning markaziy apparatiga taqdim etadi;

hududlarni ijtimoiy-iqtisodiy rivojlantirish muammolari, shu jumladan aholining dolzarb muammolarini hal etishga qaratilgan takliflarni Vazirlik markaziy apparatiga taqdim etadi;

kompleks ijtimoiy-iqtisodiy rivojlantirish boʻyicha sektorlar bilan oʻzaro hamkorlik natijalari toʻgʻrisida axborot beradi;

vakolatli organlar tomonidan oʻtkazilgan oʻz faoliyatini tekshirish natijalari toʻgʻrisida maʼlumot beradi.

38. Vazirlik markaziy apparati tarkibiy boʻlinmalari va uning hududiy boʻlinmalari hamda idoraviy mansub tashkilotlarning oʻzaro hamkorligi jarayonida yuzaga keladigan kelishmovchiliklar vazirning topshirigʻiga binoan uning tegishli oʻrinbosarlari tomonidan koʻrib chiqiladi. Agar kelishmovchiliklar bartaraf etilmasa ular yuzasidan qaror bevosita Vazir tomonidan qabul qilinadi.

39. Vazirlik oʻz vazifalari va funksiyalarini amalga oshirishda boshqa davlat va xoʻjalik boshqaruvi organlari, mahalliy davlat hokimiyati organlari va boshqa tashkilotlar bilan oʻzaro hamkorlik qiladi.

40. Vazirlikning hududiy boʻlinmalari oʻz vakolati doirasida boshqa davlat va xoʻjalik boshqaruvi organlarining hududiy organlari, mahalliy davlat hokimiyati organlari va boshqa tashkilotlar bilan oʻzaro hamkorlik qiladi.

Vazirlikning hududiy boʻlinmalari tegishli hududlarni ijtimoiy-iqtisodiy rivojlantirish boʻyicha “yoʻl xaritalari”ni ishlab chiqishda va amalga oshirishda kompleks ijtimoiy-iqtisodiy rivojlantirish boʻyicha sektorlar bilan oʻzaro yaqin hamkorlik qiladi.

41. Vazirlikning faoliyatiga Vazirlar Mahkamasining Qishloq va suv xoʻjaligi, qishloq xoʻjaligi va oziq-ovqat mahsulotlarini qayta ishlash masalalari kompleksi rahbari, Vazirlar Mahkamasining Qishloq va suv xoʻjaligi, qishloq xoʻjaligi va oziq-ovqat mahsulotlarini qayta ishlash masalalari axborot-tahlil departamenti va Oʻzbekiston Respublikasi Prezidenti Devonining tegishli xizmatlari tomonidan mutasaddilik qilinadi.

42. Vazirlikda rahbar, (hayʼat raisi), uning oʻrinbosarlari (lavozimi boʻyicha), shuningdek, uning faoliyati asosiy yoʻnalishlarini muvofiqlashtiruvchi tarkibiy boʻlinmalar rahbarlaridan iborat hayʼat tuziladi.

Hayʼat tarkibining soni va shaxsiy tarkibi vazirning taqdimnomasiga binoan Vazirlar Mahkamasi tomonidan tasdiqlanadi.

43. Hayʼatga quyidagi vazifalar yuklanadi:

Vazirlik faoliyatining ushbu Nizomda belgilangan asosiy yoʻnalishlarini ishlab chiqish va amalga oshirish;

qonun hujjatlarida, Oʻzbekiston Respublikasi Prezidenti hujjatlari va Oʻzbekiston Respublikasi Hukumati qarorlarida belgilangan vazifalar oʻz vaqtida va sifatli amalga oshirilishini taʼminlash uchun Vazirlik tizimi xodimlari va rahbarlarining shaxsiy javobgarligini oshirish choralarini koʻrgan holda, tarkibiy va hududiy boʻlinmalar hamda idoraviy mansub tashkilotlar rahbarlari hisobotlarini muntazam ravishda eshitilishini tashkil etish;

Vazirlik faoliyati sohasidagi hududiy va tarmoq dasturlari amalga oshirilishining natijadorligini har chorakda va muntazam koʻrib chiqish;

joylarda Vazirlik faoliyati sohasidagi dolzarb masalalar muhokama qilinishini taʼminlagan holda, hayʼatning kengaytirilgan sayyor majlislari oʻtkazilishini tashkil etish, shuningdek, yuzaga kelgan muammolarni bartaraf etish boʻyicha tegishli qarorlarni ishlab chiqish va qabul qilish;

Vazirlik markaziy apparati va uning tizimiga kiradigan lavozimlar nomenklaturasini koʻrib chiqish va tasdiqlash;

Vazirlik nomenklaturasiga kiradigan lavozimlarga kadrlarni tanlash, joy-joyiga qoʻyish masalalarini koʻrib chiqish;

Oʻzbekiston Respublikasi Prezidenti va Vazirlar Mahkamasining qarorlari va topshiriqlari bilan belgilangan vazifalar oʻz vaqtida va sifatli bajarilishini taʼminlash uchun Vazirlik rahbarlari va xodimlarining ijro intizomini mustahkamlash va shaxsiy javobgarligini oshirish.

Hayʼat Vazirlik vakolatiga kiritilgan boshqa masalalarni ham koʻrib chiqishga haqlidir.

44. Hayʼat majlisiga davlat va xoʻjalik boshqaruvi organlari, boshqa tashkilotlar rahbarlari, ularning vakolatiga kiradigan masalalar yuzasidan taklif etilishi mumkin.

45. Hayʼat, agar uning majlisida hayʼat tarkibining yarmidan koʻpi qatnashsa, vakolatli hisoblanadi. Koʻrib chiqilayotgan masalalar yuzasidan qarorlar oddiy koʻpchilik ovoz bilan qabul qilinadi.

46. Hayʼat qarorlari vazirning buyruqlari bilan amalga oshiriladi.

47. Vazir va hayʼat aʼzolari oʻrtasida kelishmovchiliklar yuzaga kelgan taqdirda, vazir yuzaga kelgan kelishmovchiliklar haqida Vazirlar Mahkamasiga va Oʻzbekiston Respublikasi Prezidenti devoniga axborot bergan holda mustaqil ravishda qaror qabul qiladi. Hayʼat aʼzolari ham Vazirlar Mahkamasiga va Oʻzbekiston Respublikasi Prezidenti devoniga oʻz fikrini xabar qilishi mumkin.

48. Hayʼat faoliyati tartibi uning hayʼat tomonidan tasdiqlanadigan reglamenti bilan belgilanadi.

49. Vazirlikda kengash, maslahat va ekspert organlari tuzilishi mumkin.

50. Vazirlik huzurida tuziladigan kengash, maslahat va ekspert organlari tarkibi va ular toʻgʻrisidagi nizomlar vazir tomonidan tasdiqlanadi, ularning tarkibi va nizomlari Oʻzbekiston Respublikasi Prezidenti hujjatlari va Vazirlar Mahkamasi qarorlari bilan tasdiqlanadigan hollar bundan mustasno.

51. Vazirlik faoliyatining samaradorligi muntazam baholanadi.

52. Vazirlik faoliyati samaradorligi va natijadorligini baholash, Vazirlar Mahkamasining mutasaddilik qiladigan kompleksi rahbari tomonidan tasdiqlanadigan Vazirlik faoliyati samaradorligi va natijadorligini baholash mezonlari va ish indikatorlari asosida amalga oshiriladi.

53. Vazirlik faoliyati samaradorligi va natijadorligini baholash yakunlari boʻyicha:

Vazirlik rahbarlari va xodimlarini ragʻbatlantirish (mukofotlash) yoki intizomiy javobgarlikka tortish;

Vazirlik faoliyatida aniqlangan kamchiliklarni bartaraf etish va uning faoliyatini yanada takomillashtirish chora-tadbirlari koʻriladi.

54. Vazirlik va uning Qoraqalpogʻiston Respublikasi, viloyatlar va tumanlar (Quvasoy sh.)dagi hududiy boʻlinmalarini moddiy-texnik taʼminlash xarajatlarini moliyalashtirish, shuningdek ularning xodimlari mehnatiga haq toʻlash va moddiy ragʻbatlantirish Oʻzbekiston Respublikasi Davlat budjeti, budjetdan tashqari jamgʻarmalarning manbalari va qonun hujjatlarida taqiqlanmagan boshqa manbalar hisobiga amalga oshiriladi.

55. Vazirlik xodimlarining ish haqi lavozim maoshi, mukofotlar, qoʻshimcha haqlar, ustamalardan va qonun hujjatlarida nazarda tutilgan boshqa toʻlovlardan iborat.

Vazirlik xodimlari lavozim maoshlariga har oyda qoʻshiladigan ragʻbatlantirish xususiyatiga ega boʻlgan qoʻshimcha haqlar va ustamalar Vazirlar Mahkamasi tomonidan tasdiqlanadigan Oʻzbekiston Respublikasi Qishloq xoʻjaligi vazirligi va uning tarkibiga kiruvchi tashkilotlar xodimlarini moddiy ragʻbatlantirish tartibi toʻgʻrisidagi nizomga muvofiq toʻlanadi.

56. Vazir oʻz faoliyati toʻgʻrisida Oʻzbekiston Respublikasi Prezidentiga, Oʻzbekiston Respublikasi Prezidenti devonining tegishli xizmatlariga va Vazirlar Mahkamasiga muntazam ravishda hisobot beradi.

57. Vazirlar Mahkamasining Qishloq va suv xoʻjaligi, qishloq xoʻjaligi va oziq-ovqat mahsulotlarini qayta ishlash masalalari kompleksi rahbari Vazirlik rahbarlariga yuklangan vazifalar samarali bajarilishi boʻyicha ularning faoliyati ustidan muntazam monitoring olib boradi, Vazirlik faoliyati samaradorligiga xolisona baho beradi.

58. Monitoring va baholash yakunlari boʻyicha Vazirlikning yuklangan vazifalarni sidqidildan va oʻz vaqtida bajargan mansabdor shaxslari va xodimlari ragʻbatlantiriladi yoxud yoʻl qoʻyilgan jiddiy kamchiliklar uchun egallab turgan lavozimidan ozod etishgacha boʻlgan javobgarlikka tortiladi.

59. Vazirlikni qayta tashkil etish va tugatish qonun hujjatlarida belgilangan tartibda amalga oshiriladi.

1. Ushbu Nizom Oʻzbekiston Respublikasi Qishloq xoʻjaligi vazirligi huzuridagi Qishloq xoʻjaligini rivojlantirish va oziq-ovqat taʼminoti jamgʻarmasi (keyingi oʻrinlarda Jamgʻarma deb ataladi) mablagʻlarini shakllantirish va ulardan foydalanish tartibini belgilaydi.

2. Jamgʻarma yuridik shaxs hisoblanmaydi va quyidagi maqsadlarda tashkil qilinadi:

Oʻzbekiston Respublikasi Qishloq xoʻjaligi vazirligi (keyingi oʻrinlarda vazirlik deb ataladi) va uning hududiy boʻlinmalari moddiy-texnika bazasini rivojlantirish;

qishloq xoʻjaligi va oziq-ovqat taʼminoti sohasiga innovatsion texnologiyalarni joriy qilish;

Vazirlik markaziy apparati, Qoraqalpogʻiston Respublikasi Qishloq xoʻjaligi vazirligi, viloyatlar qishloq xoʻjaligi boshqarmalari, tumanlar (Quvasoy sh.) qishloq xoʻjaligi boʻlimlarining xodimlarini moddiy ragʻbatlantirish va ijtimoiy muhofaza qilish.

3. Jamgʻarma mablagʻlari quyidagi manbalar hisobiga shakllantiriladi:

Vazirlik tarkibiga kiruvchi oʻzini oʻzi moliyalashtiradigan tashkilotlar sof foydasining oʻz ixtiyorida qoldiriladigan qismidan tuzilgan shartnomalar asosidagi ajratmalari;

Oʻzbekiston Respublikasi Moliya vazirligi huzuridagi Qishloq xoʻjaligini qoʻllab-quvvatlash jamgʻarmasiga tushumlarning 0,2 foizi miqdoridagi ajratmalar;

jismoniy va yuridik shaxslarning xayriya mablagʻlari;

xalqaro grantlar va texnik koʻmak mablagʻlari;

qonun hujjatlari bilan taqiqlanmagan boshqa manbalar.

4. Jamgʻarmaga kelib tushgan mablagʻlar Oʻzbekiston Respublikasi Moliya vazirligining Gʻaznachiligida ochilgan maxsus gʻaznachilik hisobraqamida jamlanadi.

5. Jamgʻarma mablagʻlaridan quyidagi maqsadlarda foydalaniladi:

a) Vazirlik, Qoraqalpogʻiston Respublikasi Qishloq xoʻjaligi vazirligi, viloyatlar qishloq xoʻjaligi boshqarmalari, tumanlar (Quvasoy sh.) qishloq xoʻjaligi boʻlimlari moddiy-texnika bazasini rivojlantirish, shu jumladan:

qishloq xoʻjaligida iqtisodiy islohotlarni amalga oshirish uchun texnika va texnologiyalar, ekologik monitoring tizimi, uskunalar, kompyuter dasturlari va aloqa vositalarini xarid qilish;

boshqa xarajatlarga (bino, isitish tizimini taʼmirlash, tutash hududni obodonlashtirish, avtotransport vositalariga texnik xizmat koʻrsatish, ehtiyot qismlar va yonilgʻi-moylash materiallarini xarid qilish va boshq.);

loyiha-qidiruv ishlarini amalga oshirish, qishloq xoʻjaligi obyektlari, shu jumladan markaziy apparat bino va inshootlarini qurish, rekonstruksiya qilish va taʼmirlash, texnik qayta jihozlash;

b) qishloq xoʻjaligi va oziq-ovqat taʼminoti sohasiga innovatsion texnologiyalarni joriy qilish, shu jumladan:

idoraviy normativ-huquqiy hujjatlar loyihalarini ishlab chiqish hamda innovatsion loyihalar va zamonaviy texnologiyalarni joriy qilishni ragʻbatlantirish;

qishloq xoʻjaligi va oziq-ovqat sohasini rivojlantirish boʻyicha maqsadli dasturlarni ishlab chiqish va amalga oshirish;

noshirlik va ilmiy-tadqiqot faoliyatini moliyalashtirish;

ilmiy ishlanmalar, innovatsion loyihalar va ilgʻor texnologiyalarni ishlab chiqish va joriy qilish, ixtirolar yaratish va ilmiy ishlarni ragʻbatlantirish, qishloq xoʻjaligi va oziq-ovqat taʼminoti masalalari boʻyicha uslubiy koʻrsatma va maqolalar chop etish, ilmiy-amaliy anjumanlarni tashkil etish va oʻtkazish;

hududiy boʻlinmalar xodimlarini tayyorlash va malakasini oshirish, shu jumladan xorijiy taʼlim muassasalarida tajriba oshirishini tashkil etish;

qishloq xoʻjaligi va oziq-ovqat taʼminoti sohasini rivojlantirish boʻyicha xalqaro koʻrgazmalar, loyiha va dasturlarda ishtirok etish;

Oʻzbekiston Respublikasida boʻlish davrida xorijiy va xalqaro tashkilotlar rahbar va mutaxassislarini qabul qilish va ularga hamrohlik qilish, shuningdek, anjumanlar tashkil etish va oʻtkazish;

v) xodimlarni moddiy ragʻbatlantirish va ijtimoiy muhofaza qilish, shu jumladan Markaziy apparat xodimlarining oylik lavozim maoshlariga qoʻshimchalar (mukofotlar, moddiy yordam, transport va ovqatlanish xarajatlari, xizmat muddati uchun toʻlovlar) belgilash yoʻli bilan moddiy ragʻbatlantirish xarajatlarini, shuningdek, Qoraqalpogʻiston Respublikasi Qishloq xoʻjaligi vazirligi, viloyatlar qishloq xoʻjaligi boshqarmalari, tumanlar (Quvasoy sh.) qishloq xoʻjaligi boʻlimlari xodimlarini saqlash va moddiy ragʻbatlantirish xarajatlarini qoplash;

g) vazifalar bajarilishini taʼminlash bilan bogʻliq qonunchilikda nazarda tutilgan boshqa maqsadlarga.

6. Jamgʻarma mablagʻlaridan Oʻzbekiston Respublikasi Qishloq xoʻjaligi vaziri (keyingi oʻrinlarda Vazir deb ataladi) tomonidan har yili tasdiqlanadigan daromadlar va xarajatlar smetasiga (keyingi oʻrinlarda smeta deb ataladi) muvofiq foydalaniladi.

7. Jamgʻarma smetasi kelgusi yil uchun kutilayotgan moliyaviy mablagʻlar tushumi prognozi va tadbirlarni amalga oshirish zaruratidan kelib chiqqan holda tuziladi.

8. Vazirlik Markaziy apparati boʻlinmalari, Qoraqalpogʻiston Respublikasi Qishloq xoʻjaligi vazirligi, viloyatlar qishloq xoʻjaligi boshqarmalari, tumanlar (Quvasoy sh.) qishloq xoʻjaligi boʻlimlari daromadlar va xarajatlar smetasiga kiritish uchun Jamgʻarma mablagʻlarini ajratish haqida buyurtmanoma (keyingi oʻrinlarda buyurtmanoma deb ataladi) beradi.

9. Buyurtmanomada tadbirlar, ularni oʻtkazish zaruratining asosi, zarur mablagʻlar miqdori koʻrsatiladi.

Kelgusi moliyaviy yil uchun buyurtmanomalar joriy yilning 1-iyuniga qadar Vazirlikka taqdim qilinadi.

Buyurtmanoma yozma yoki elektron shaklda taqdim qilinadi.

Buyurtmanomada quyidagilar koʻrsatilishi lozim:

tashkilotning toʻliq nomi va aniq manzili, bank rekvizitlari;

tadbir (loyiha) nomi;

loyihani amalga oshirish zarurati asoslangan, mavjud muammolar va ularni hal etish (toʻliq yoki qisman va belgilangan muddatlarda) imkoniyatlari, talab etiladigan mablagʻlar miqdori, mablagʻlardan foydalanish maqsadlari, loyihani amalga oshirish uchun mablagʻ mavjud emasligining asosi, shuningdek, kutilayotgan natijalar bayon etilgan tushuntirish xati;

soʻralayotgan mablagʻlar hisob-kitobi (loyihani amalga oshirish uchun foydalaniladigan mablagʻlar kalkulyatsiyasi yoki loyihani amalga oshirish smetasi).

Zarur hollarda, buyurtmanomani asoslaydigan tegishli hujjatlar, tadbirlar rejasi yoki qishloq xoʻjaligini rivojlantirish, shuningdek, ijtimoiy-iqtisodiy rivojlantirish va boʻlinmalarning muammoli masalalarini hal etish boʻyicha dasturiy hujjatlar buyurtmanomaga ilova qilinadi.

10. Hududiy boʻlinmalardan kelib tushgan buyurtmalarni koʻrib chiqish, kutilayotgan moliyaviy tushumlar haqida maʼlumotlarni oʻrganish va tegishli qarorlarni qabul qilish maqsadida Jamgʻarma Kengashi tuziladi. Jamgʻarma Kengashining shaxsiy tarkibi Vazirlik tomonidan shakllantiriladi va vazir tomonidan tasdiqlanadi.

11. Buyurtmanomalarni qabul qilish, umumlashtirish va ularni Jamgʻarma Kengashiga taqdim etish Vazirlikning Moliyalashtirish, buxgalteriya hisobi va hisoboti boshqarmasi tomonidan amalga oshiriladi, Jamgʻarma mablagʻlaridan maqsadli foydalanilishi boʻyicha doimiy monitoring esa iqtisodiy islohotlar masalalari boʻyicha vazir oʻrinbosari tomonidan yuritiladi.

12. Jamgʻarma Kengashi:

ushbu Nizomda nazarda tutilgan maqsadlar uchun Jamgʻarma mablagʻlarining ajratilishi haqida buyurtmanomalarni koʻrib chiqadi;

qabul qilingan buyurtmanomalar orasidan eng dolzarb va asoslanganlarini tanlab oladi, ularni umumlashtiradi va mablagʻlar ajratilishi haqida qaror qabul qiladi;

ajratilgan mablagʻlardan maqsadsiz foydalanish holatlari aniqlanganda moliyalashtirishni toʻxtatadi va Oʻzbekiston Respublikasi Qishloq xoʻjaligi vazirligining Moliyalashtirish, buxgalteriya hisobi va hisoboti boshqarmasiga ajratilgan mablagʻlarni qaytarish haqida topshiriq beradi;

mablagʻ oluvchilarning mablagʻlardan foydalanish va bajarilgan ishlar haqidagi hisobotlarini eshitadi;

oʻz vakolatiga kiradigan boshqa masalalar boʻyicha qarorlar qabul qiladi.

13. Kelgusi yil uchun taqdim qilingan buyurtmanomalar har yili 1-iyunga qadar Jamgʻarma Kengashi tomonidan koʻrib chiqiladi va Jamgʻarma mablagʻlaridan foydalanishning asosiy yoʻnalishlari belgilanadi hamda ular asosida mablagʻlar ajratish haqida qaror qabul qilinadi.

14. Vazirlik tasdiqlangan smetaga asosan Jamgʻarma mablagʻlarini tasarruf etuvchi hisoblanadi.

15. Jamgʻarma mablagʻlaridan oqilona va qatʼiy maqsadlarda foydalanilishi yuzasidan nazorat qonun hujjatlarida belgilangan tartibda amalga oshiriladi.

16. Iqtisodiy islohotlar masalalari boʻyicha vazir oʻrinbosari, Moliyalashtirish, buxgalteriya hisobi va hisoboti boshqarmasi boshligʻi — Vazirlikning bosh hisobchisi buxgalteriya hisobining toʻgʻri yuritilishi, Jamgʻarmaga mablagʻlar tushumi va ulardan foydalanish toʻgʻrisida hisobotlarni tuzilishi va taqdim etilishiga javobgar hisoblanadi.

17. Jamgʻarma mablagʻlarini oluvchilar Jamgʻarma mablagʻlaridan foydalanish va bajarilgan ishlar toʻgʻrisidagi hisobotlarni Vazirlikka taqdim etadi.

18. Moliyalashtirish, buxgalteriya hisobi va hisoboti boshqarmasi boshligʻi — Vazirlikning bosh hisobchisi Jamgʻarma mablagʻlarini oluvchilardan mablagʻlardan foydalanish va bajarilgan ishlar toʻgʻrisidagi hisobotlarni qabul qiladi va ular Jamgʻarma Kengashida eshitilganidan soʻng umumlashtiradi.

Jamgʻarma daromadlari va xarajatlari toʻgʻrisidagi hisobot har chorakda hisobot davri tugagandan soʻng 25 kundan kechikmasdan, yillik hisobotlar esa kelgusi yilning 30-yanvaridan kechikmasdan Oʻzbekiston Respublikasi Moliya vazirligiga taqdim qilinadi.

19. Ushbu Nizom talablarining buzilishida aybdor shaxslar, qonunchilikda belgilangan tartibda javobgar boʻladilar.

1. Ushbu Nizom Oʻzbekiston Respublikasi Qishloq xoʻjaligi vazirligi va uning tarkibiga kiruvchi tashkilotlar xodimlarini moddiy ragʻbatlantirish tartibini belgilaydi.

2. Xodimlarni mukofotlash va ularga moddiy yordam koʻrsatish quyidagi mablagʻlar hisobiga amalga oshiriladi:

a) budjet mablagʻlari:

bir yilda ikki oylik ish haqi fondi miqdoridagi mukofotlar;

bir yilda bir oylik ish haqi fondi miqdoridagi moddiy yordam toʻlovlari;

qonunchilikda belgilangan miqdor va tartibda davlat xizmatchilarining lavozim maoshiga mehnatni ragʻbatlantirish koeffitsiyenti;

Maxsus moddiy ragʻbatlantirish jamgʻarmasi mablagʻlari hisobiga mehnatga haq toʻlash fondidan 15 foiz miqdorida xodimlar mehnatini moddiy ragʻbatlantirish;

b) Oʻzbekiston Respublikasi Qishloq xoʻjaligi vazirligi huzuridagi Qishloq xoʻjaligini rivojlantirish va oziq-ovqat taʼminoti jamgʻarmasi, Budjet tashkilotlarini rivojlantirish jamgʻarmasi, budjetdan tashqari jamgʻarmalar va qonunchilikda taqiqlanmagan boshqa manbalar mablagʻlari hisobiga:

xodimning umumiy ish staji davomiyligidan kelib chiqib, xizmat muddati uchun lavozim maoshiga har oylik ustamalar;

bayram sanalariga mukofotlar;

xizmat vazifalarini sidqidildan va samarali bajarganlik uchun yuqori malakali xodimlarning lavozim maoshlariga ustamalar;

xodimlarni ijtimoiy muhofaza qilish va ularning sogʻligini tiklash maqsadida toʻlanadigan moddiy yordam;

qishloq xoʻjaligi mahsulotlarini xarid qilish uchun bir yilda bir marotaba toʻlanadigan moddiy yordam.

3. Oʻzbekiston Respublikasi Prezidenti va Vazirlar Mahkamasining qarorlari asosida lavozimga tayinlangan mansabdor shaxslarning umumiy ish staji, xizmat muddati, qishloq xoʻjaligi sohasida faoliyat yurituvchi xodimlarning umumiy ish staji uchun lavozim maoshiga oylik ustamalar shtatlar jadvaliga muvofiq har oyda quyidagi miqdorlarda toʻlanadi:

3 yildan 5 yilgacha — 10 foiz;

5 yildan 10 yilgacha — 20 foiz;

10 yildan 20 yilgacha — 30 foiz;

20 yildan ortiq — 40 foiz;

4. Bayram sanalarida — Oʻzbekiston Respublikasi Mustaqilligi kuni, Konstitutsiya kuni, 8-mart kuni, Navroʻz, Yangi yil, diniy bayramlarda (“Roʻza hayit” (Iyd-al-Fitr) i “Qurbon hayit” (Iyd-al-Adxa) hamda kasb bayramida xodimlar oylik lavozim maoshining bir barobari miqdorida ragʻbatlantiriladi.

5. Xizmat vazifalarini sidqidildan va samarali bajarib kelayotgan yuqori malakali, tashabbuskor markaziy apparat xodimlariga lavozim maoshining 200 foizi, hududiy boʻlinmalar xodimlariga 100 foizi miqdorigacha ustamalar belgilanadi. Ustamaning aniq miqdorini tashkilot rahbari belgilaydi.

6. Xodimlarni ijtimoiy muhofaza qilish va ularning mehnati samaradorligini oshirish maqsadida har oyda (jamoa shartnomasiga muvofiq) transport xarajatlari uchun eng kam oylik ish haqining bir barobarigacha boʻlgan toʻlovlar va ularga yordam koʻrsatish maqsadida ovqatlanish xarajatlarini qoplash uchun eng kam oylik ish haqining ikki barobarigacha boʻlgan toʻlovlar amalga oshiriladi.

7. Zaruratga koʻra, kasaba uyushmasi tashkiloti bilan kelishilgan holda xodimlar va (yoki) ularning oila aʼzolariga quyidagi holatlarda eng kam oylik ish haqining 10 barobarigacha boʻlgan miqdorda moddiy yordam toʻlab beriladi:

xodim vafot etganda — bunda moddiy yordam xotiniga (eriga) toʻlab beriladi, agar xodimning xotini (eri) boʻlmasa, moddiy yordam farzandlariga yoki qonuniy vakillariga (vasiylari va homiylariga) yoxud ularning voyaga yetmagan farzandlarini asrab olgan shaxslarga toʻlab beriladi, shuningdek, xodim turmush qurmagan boʻlsa, moddiy yordam ota-onasi yoki boqimandalar oʻrtasida teng ulushlarda taqsimlanadi;

turmush qurganda;

istisno tariqasida, xodim arizasini qanoatlantirish toʻgʻrisidagi vazirning roziligi asosida quyidagi holatlarda eng kam oylik ish haqining 10 barobarigacha boʻlgan miqdorda moddiy yordam toʻlab beriladi:

yaqin qarindoshi vafot etganda — vafoti toʻgʻrisida guvohnoma nusxasi taqdim etilganda;

alohida zaruratga koʻra (baxtsiz hodisa, falokat, uzoq muddatli kasallik sababli davolanish va sogʻligini tiklash, oilaning kam taʼminlanganligi va moliyaviy holatining ogʻirligi).

8. Qishloq xoʻjaligi mahsulotlarini xarid qilish uchun xodimlarga bir yilda bir marotaba eng kam oylik ish haqining 10 barobarigacha boʻlgan miqdorda toʻlovlar amalga oshiriladi.

9. Quyidagilar xodimlarni ragʻbatlantirishning moliyaviy manbalari hisoblanadi:

Oʻzbekiston Respublikasi Qishloq xoʻjaligi vazirligi, Qoraqalpogʻiston Respublikasi Qishloq xoʻjaligi vazirligi, viloyatlar qishloq xoʻjaligi boshqarmalari, tumanlar (Quvasoy sh.) qishloq xoʻjaligi boʻlimlari –Oʻzbekiston Respublikasi Qishloq xoʻjaligi vazirligi huzuridagi Qishloq xoʻjaligini rivojlantirish va oziq-ovqat taʼminoti jamgʻarmasi va budjet mablagʻlari;

Oʻzbekiston Respublikasi Qishloq xoʻjaligi vazirligi tarkibiga kiruvchi budjet tashkilotlari — Oʻzbekiston Respublikasi Davlat budjeti, Budjet tashkilotlarini rivojlantirish jamgʻarmasi va budjetdan tashqari jamgʻarmalar mablagʻlari;

Oʻzbekiston Respublikasi Qishloq xoʻjaligi vazirligining xoʻjalik hisobidagi boʻlinmalari — ular faoliyati natijalari boʻyicha olingan sof foydaning bir qismi;

shuningdek, qonunchilik bilan taqiqlanmagan boshqa mablagʻlar.

10. Moliyalashtirish qonunchilikda belgilangan tartibda tasdiqlanadigan xarajatlar smetasi, budjetdan tashqari jamgʻarmalarning daromadlari va xarajatlari smetasiga muvofiq tegishli miqdor va manbalar hisobidan amalga oshiriladi.

11. Ushbu Nizom talablarining buzilishida aybdor shaxslar qonun hujjatlarida belgilangan tartibda javob beradilar.

1. “Oʻzbekiston Respublikasi qishloq xoʻjaligi fidoyisi” koʻkrak nishoni (keyingi oʻrinlarda koʻkrak nishoni deb ataladi) bilan mehnat tajribasi va kasbiy malakaga ega, faoliyatida yuqori natijalarga erishgan va sohada fidokorona mehnati bilan namuna boʻlgan Oʻzbekiston Respublikasi Qishloq xoʻjaligi vazirligi markaziy apparati, uning hududiy va tarkibiy boʻlinmalari rahbar va xodimlari, shuningdek, qishloq xoʻjaligi mahsulotlarini qayta ishlash korxonalari, xizmat koʻrsatuvchi tashkilotlar, davlat va xoʻjalik boshqaruvi idoralari hamda joylardagi ijro hokimiyati organlari xodimlari mukofotlanadi.

2. Koʻkrak nishoni bilan ushbu Nizomning 1-bandida qayd qilingan xizmatlari uchun Oʻzbekiston Respublikasi fuqarolari hisoblanmagan shaxslar ham mukofotlanishi mumkin.

3. Mukofotlash tartibi Oʻzbekiston Respublikasi Qishloq xoʻjaligi vazirligi tomonidan belgilanadi.

4. Mukofotlash ushbu Nizomning 1-bandida qayd qilingan tashkilotlar va tarkibiy boʻlinmalar rahbarlarining taqdimnomasi boʻyicha har yili 5-dekabrga qadar Oʻzbekiston Respublikasi Qishloq xoʻjaligi vazirining buyrugʻi bilan amalga oshiriladi.

5. Koʻkrak nishoni bilan mukofotlash toʻgʻrisidagi buyruq Oʻzbekiston Respublikasi Qishloq xoʻjaligi vazirligining rasmiy saytida chop etiladi.

6. Koʻkrak nishoni va uning guvohnomasini topshirish Oʻzbekiston Respublikasi Qishloq xoʻjaligi xodimlari kuni arafasida Oʻzbekiston Respublikasi qishloq xoʻjaligi vaziri yoki uning topshirigʻi va uning nomidan masʼul shaxslar tomonidan tantanali vaziyatda amalga oshiriladi.

7. Koʻkrak nishoni koʻkrakning chap tomonida davlat mukofotlaridan quyida taqiladi.

8. Koʻkrak nishoni bilan mukofotlangan shaxslar eng kam oylik ish haqining toʻrt baravari miqdorida bir yoʻla pul mukofoti oladilar.

Bir yoʻla pul mukofotlari Oʻzbekiston Respublikasi Qishloq xoʻjaligi vazirligi huzuridagi Qishloq xoʻjaligini rivojlantirish va oziq-ovqat taʼminoti jamgʻarmasi mablagʻlari hisobidan toʻlanadi.

9. Aynan bir shaxs koʻkrak nishoni bilan, qoidaga koʻra, bir marta mukofotlanadi.

“Oʻzbekiston Respublikasi qishloq xoʻjaligi fidoyisi” koʻkrak nishoni (keyingi oʻrinlarda koʻkrak nishoni deb ataladi) mis qotishmasidan tayyorlanadi va 34 mm diametrli aylana shakliga ega boʻladi:

Koʻkrak nishonining old qismining markazi boʻylab paxta va bugʻdoy boshoqlari tasviri joylashtirilgan, ular aylana shaklidagi qishloq xoʻjaligi texnikasi belgisi bilan oʻralgan, aylananing quyida daryo tasvirlangan. Koʻkrak nishonining aylanasi boʻyicha sirlangan doiraga yashil rangda va bronza hoshiya bilan hoshiyalangan “O`ZBEKISTON RESPUBLIKASI QISNLOQ XO`JALIGI FIDOYISI” yozuvi tushirilgan. Bronza rangidagi harflar balandligi 2,3 mm tashkil etadi. Quyi qismida markaz boʻylab bronza rangidagi sakkizburchakli yulduz tasviri joylashtirilgan.

Koʻkrak nishonining orqa tomonida “SONADAGI KO`P YILLIK FIDOKORONA MENNATLARI UCNUN” yozuvi joylashtirilgan.

Koʻkrak nishonining qalinligi — 2,2 millimetr.

Tasvir va yozuvlar boʻrtib chiqqan.

Koʻkrak nishoni old va orqa tomonlarining chetlari hoshiyalangan.

Koʻkrak nishoni ilmoqcha va halqa yordamida toʻgʻri toʻrtburchakli qadagʻichga ulanadi.

Qadagʻich kengligi — 26 millimetr, balandligi — 17 millimetr. Qadagʻich toʻq yashil rangda. Qadagʻich markazi boʻylab kengligi 20 millimetr, uzunligi 13 millimetr, 6 ta barg va 5 ta novdachadan iborat bronza rangidagi novda joylashtirilgan.

Qadagʻichning orqa tomonida koʻkrak nishonini kiyimga mahkamlash uchun toʻgʻnogʻich shaklidagi moslama mavjud.

“Oʻzbekiston Respublikasi qishloq xoʻjaligi fidoyisi” koʻkrak nishoniga guvohnoma 240 g/m.kv qalinlikdagi ofset qogʻozidan tayyorlangan 160x110 millimetr oʻlchamdagi kitobchadan iborat.

Guvohnomaning oldi tomoni (birinchi va toʻrtinchi betlari) plyonka bilan zichlangan, yashil rang foniga ega.

Guvohnomaning birinchi beti 7,5 millimetr qalinlikdagi ichki burchaklari yumaloqlangan toʻq yashil rangdagi hoshiya bilan hoshiyalangan.

Guvohnoma yuqori qismidan 35 millimetr quyida markaz boʻylab 3,5 millimetr oraliqda uch qator matn joylashtirilgan: birinchi qatori “OʼZBEKISTON RESPUBLIKASI”, ikkinchisi — “QISNLOQ XOʼJALIGI FIDOYISI”, uchinchisi — “koʼkrak nishoni” (shrift “Times new Roman Bolt”, kegl 17). 6 millimetr quyida — “GUVONNOMASI” yozuvi (yozuvlar bosh harflarda, shrift “Times new Roman Bolt”, kegl 17) joylashtirilgan. Yozuvlar bronza rangida tayyorlangan.

Guvohnomaning ichki qismi (ikkinchi va uchinchi betlari) “Tangʻir” tasviri tushirilgan moviy osmon rangida tayyorlangan va ofset usulida bosilgan.

Guvohnoma ichki tomonining chap qismida (ikkinchi bet) markaz boʻylab oʻz kattaligidagi koʻkrak nishonining rangli tasviri joylashtirilgan.

Guvohnoma ichki tomonining oʻng qismida (uchinchi bet) yuqori chetidan 8 millimetr quyida markaz boʻylab “_____-sonli guvohnoma” yozuvi joylashtirilgan (shrift “Times new Roman Bolt”, kegl 10) (15 millimetr uzunlikdagi chiziq bilan).

“GUVONNOMA” yozuvidan 11 millimetr quyida 8 millimetr oraliqda mukofotlanadigan rahbar yoki xodimning familiyasi, ismi va otasining ismini qayd qilish uchun uchta chiziq joylashtirilgan.

Quyi chiziqdan 6 millimetr masofada markaz boʻylab 2 millimetr oraliqda uch qatorli matn joylashtirilgan. Matn “Oʼzbekiston Respublikasi Qishloq xoʼjaligi vazirining” (shrift “Times new Roman Bolt”, kegl 10) yozuvdan iborat.

Soʻng 5 millimetr quyida 4 millimetr oraliqda ikki qatorli matn joylashtirilgan. Birinchi qator “20__ y. “___” ___________dagi”, ikkinchisi — “____-sonli buyrugʼiga asosan” (shrift “Times new Roman Bolt”, kegl 10) yozuvlaridan iborat.

Davomida 5 millimetr quyida markaz boʻylab 5 millimetr oraliqda uch qatorda matn joylashtirilgan. Birinchi qatori — “OʼZBEKISTON RESPUBLIKASI”, ikkinchisi — “QISNLOQ XOʼJALIGI FIDOYISI” (shrift “Times new Roman Bolt”, 12-kegl), uchinchisi — “koʻkrak nishoni bilan mukofotlandi” (shrift “Times new Roman Bolt”, kegl 10) yozuvlaridan iborat.

Chapda oxirgi soʻzlardan 9 millimetr quyida 2 millimetr oraliqda bir qatorda yozuv joylashtirilgan. Matn “VAZIR”: (shrift “Times new Roman Bolt”, kegl 10) yozuvidan iborat.

“VAZIR” soʻzidan keyin imzo uchun 20 millimetr uzunlikda chiziq tushirilgan. Uning ostida “(Imzo)” yozuvi mavjud. Uning ostida chap tomonida muhr uchun “M.Oʼ.” yozuvi mavjud.