Davlat ehtiyojlari uchun xarid qilinadigan qishloq xoʻjaligi mahsulotlarining hisob-kitob jamgʻarmasining davlat ehtiyojlari uchun xarid qilinadigan qishloq xoʻjaligi mahsulotlari yetishtirishni va uzil-kesil hisob-kitoblarni mablagʻ bilan taʼminlashga ajratiladigan kredit resurslari boʻyicha tushadigan daromadlarini taqsimlash va ulardan foydalanish tartibini belgilash maqsadida Vazirlar Mahkamasi qaror qiladi:

1. Davlat ehtiyojlari uchun xarid qilinadigan qishloq xoʻjaligi mahsulotlarining hisob-kitob jamgʻarmasi daromad (foyda)larini taqsimlash va ulardan foydalanish tartibi toʻgʻrisidagi Nizom ilovaga muvofiq tasdiqlansin.

2. Belgilab qoʻyilsinki, Jamgʻarma daromadlari, Jamgʻarma xarajatlarini mablagʻ bilan taʼminlash uchun Moliya vazirligi tomonidan Markaziy bankdan jalb etilgan kreditlar boʻyicha hisoblab qoʻshilgan foizlar boʻyicha majburiyatlar bajarilgandan keyin, birinchi navbatda Oʻzbekiston Respublikasi Vazirlar Mahkamasining 2000-yil 2-noyabrdagi 428-66-son qarorida belgilangan maqsadlarga yoʻnaltiriladi.

3. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari R.S. Azimov zimmasiga yuklansin.

Ushbu Nizom Oʻzbekiston Respublikasi Moliya vazirligi huzuridagi Davlat ehtiyojlari uchun xarid qilinadigan qishloq xoʻjaligi mahsulotlarining hisob-kitob jamgʻarmasi (keyingi oʻrinlarda Jamgʻarma deb ataladi) daromad (foyda)larini taqsimlash va ulardan foydalanishni tartibga soladi hamda faqat davlat ehtiyojlari uchun xarid qilinadigan qishloq xoʻjaligi mahsulotlari yetishtirishni va uzil-kesil hisob-kitoblarni mablagʻ bilan taʼminlashga ajratilgan maqsadli mablagʻlar boʻyicha Jamgʻarma hisob raqamiga tushadigan daromad (foyda)largagina tatbiq etiladi.

1. Jamgʻarmaning daromad (foyda)lari Jamgʻarmaning moliyaviy agenti (“Agrobank” ATB”)dan Jamgʻarma toʻgʻrisidagi Nizomga hamda boshqa normativ-huquqiy hujjatlarga muvofiq ularga Jamgʻarma tomonidan paxta, don, sholi yetishtirishni va uzil-kesil hisob-kitoblarni mablagʻ bilan taʼminlashga ajratilgan maqsadli mablagʻlar boʻyicha har oylik vositachilik toʻlovlari tarzidagi tushumlar hisobiga shakllantiriladi.

2. Jamgʻarma daromad (foyda)lari hisobi Jamgʻarma buxgalteriyasi tomonidan, Oʻzbekiston Respublikasi Markaziy bankining Toshkent shahri boʻyicha hisob-kitob-kassa markazida Jamgʻarma belgilangan tartibda ochgan talab qilib olinadigan maxsus ikkilamchi depozit hisob raqamlarida, paxta, don va sholi xarajatlarini mablagʻ bilan taʼminlashga ajratilgan maqsadli mablagʻlar boʻyicha vositachilik toʻlovlarini oʻtkazish uchun alohida yuritiladi.

3. Jamgʻarma vositachilik toʻlovlari tushumlarining Jamgʻarma tomonidan mablagʻ bilan taʼminlanadigan har qaysi qishloq xoʻjaligi ekini va vaqt davri boʻyicha har oyda alohida hisoblab qoʻshilishini, hisobga olinishini va nazorat qilib borilishini taʼminlaydi.

4. Vositachilik toʻlovlari tarzida Jamgʻarmaning daromadlar boʻyicha maxsus maqsadli hisob raqamlariga tushadigan mablagʻlar birinchi navbatda Jamgʻarmaning davlat ehtiyojlari uchun xarid qilinadigan qishloq xoʻjaligi mahsulotlari yetishtirishni va uzil-kesil hisob-kitoblarni mablagʻ bilan taʼminlash boʻyicha maqsadli xarajatlari uchun Moliya vazirligi tomonidan Oʻzbekiston Respublikasi Markaziy bankidan jalb etilgan kreditlar boʻyicha hisoblab qoʻshilgan foizlarni toʻlashga yoʻnaltiriladi.

5. Jamgʻarma har oylik daromad (foyda)larining ushbu Nizomning 4-bandida nazarda tutilgan majburiyatlar bajarilgandan keyin qolgan miqdorining 50 foizgachasidan Oʻzbekiston Respublikasi Vazirlar Mahkamasining 2000-yil 2-noyabrdagi 428-66-son qarorida belgilangan maqsadlar uchun foydalaniladi.

6. Jamgʻarmaning maqsadli hisob raqamlarida ushbu Nizomning 4 va 5-bandlarida nazarda tutilgan toʻlovlar amalga oshirilgandan keyin qolgan mablagʻlardan:

birinchi navbatda – davlat ehtiyojlari uchun xarid qilinadigan qishloq xoʻjaligi mahsulotlari yetishtirishni va uzil-kesil hisob-kitoblarni mablagʻ bilan taʼminlashda Jamgʻarma mablagʻlarining vaqtinchalik kamomadini qoplash uchun foydalaniladi;

yuqorida sanab oʻtilgan toʻlovlar amalga oshirilgandan keyin qolgan mablagʻlardan, Oʻzbekiston Respublikasi Moliya vazirining yozma qaroriga binoan, qishloqda islohotlar oʻtkazishni qoʻllab-quvvatlash chora-tadbirlarini amalga oshirishda, shuningdek Ijtimoiy rivojlantirish va moddiy ragʻbatlantirish jamgʻarmasini shakllantirishda hamda xodimlarni ragʻbatlantirishda, moddiy-texnik bazani mustahkamlashda va Moliya vazirligi huzuridagi Jamgʻarmaning koʻzda tutilmagan xarajatlarini mablagʻ bilan taʼminlashda foydalanish mumkin.

7. Jamgʻarma daromadlaridan ushbu Nizomning 6-bandi uchinchi xatboshida belgilangan maqsadlarda foydalanish mablagʻlarni Jamgʻarmaning maxsus hisob raqamlaridan Moliya vazirligining tegishli hisob raqamlariga oʻtkazish yoʻli bilan amalga oshiriladi.

8. Jamgʻarmaning daromadlar boʻyicha maxsus maqsadli hisob raqamlaridagi Jamgʻarma daromad (foyda)larining toʻgʻri taqsimlanishi va foydalanilishi uchun javobgarlik Jamgʻarma direktori va bosh buxgalteri yoki ularning vazifasini bajarayotgan shaxslar zimmasiga yuklanadi.

9. Jamgʻarma daromad (foyda)larining toʻgʻri taqsimlanishi va foydalanilishini nazorat qilish Davlat moliyaviy nazorati inspeksiyasi tomonidan amalga oshiriladi.