Vazirlar Mahkamasi qaror qiladi:

1. O‘zbekiston Qishloq xo‘jaligi fanlari akademiyasining Umumiy yig‘ilishida qabul qilingan O‘zbekiston Qishloq xo‘jaligi fanlari akademiyasining Nizomi ilovaga muvofiq tasdiqlansin.

2. O‘zbekiston Qishloq xo‘jaligi fanlari akademiyasi Prezidiumi Akademiyaning barcha tuzilmalarida Nizom talablarini bajarishga doir zarur tashkiliy chora-tadbirlarni bir oy muddatda amalga oshirsin.

1. O‘zbekiston Qishloq xo‘jaligi fanlari akademiyasi agrar fanlar sohasida fundamental va amaliy tadqiqotlarni va O‘zbekiston Respublikasi agrosanoat majmuini ilm-fan bilan ta’minlashni amalga oshiruvchi, o‘z-o‘zini boshqaruvchi ilmiy tashkilot hisoblanadi.

U Akademiyaning haqiqiy muxbir, faxriy va xorijiy a’zolarini, shuningdek, uning muassasalarida ishlovchi ilmiy xodimlar va mutaxassislarni birlashtiradi.

O‘zbekiston Qishloq xo‘jaligi fanlari akademiyasi budjet va shartnoma mablag‘lari hisobiga mablag‘ bilan ta’minlanadi.

2. O‘zbekiston Qishloq xo‘jaligi fanlari akademiyasi o‘z faoliyatida O‘zbekiston Respublikasi Konstitutsiyasiga, O‘zbekiston Respublikasi qonunlariga, O‘zbekiston Respublikasi Prezidenti farmonlariga, O‘zbekiston Respublikasi Vazirlar Mahkamasining qarorlari va farmoyishlariga hamda ushbu Nizomga amal qiladi.

O‘zbekiston Qishloq xo‘jaligi fanlari akademiyasi O‘zbekiston Respublikasi Fanlar akademiyasi, Fan va texnika davlat qo‘mitasi, O‘zbekiston Respublikasi agrosanoat majmui oliy o‘quv yurtlari, vazirliklari va idoralari bilan yaqin aloqada ish olib boradi, ular bilan agrar ilm-fan sohasida yagona davlat siyosatini ishlab chiqadi, qishloq xo‘jaligidagi fundamental va eng muhim amaliy tadqiqotlar mavzularini muvofiqlashtirib boradi.

3. Quyidagilar O‘zbekiston Qishloq xo‘jaligi fanlari akademiyasining asosiy vazifalari hisoblanadi:

agrosanoat majmui sohasida fundamental va amaliy tadqiqotlarni butun choralar bilan rivojlantirishni ta’minlash, yer-suv, meliorativ-texnika va mehnat resurslaridan, meva-sabzavot, chorvachilik va boshqa qishloq xo‘jaligi mahsulotlaridan oqilona hamda samarali foydalanish maqsadida agrosanoat majmui vazirliklari, idoralari va korxonalari bilan birgalikda fan yutuqlarini xalq xo‘jaligiga jadal joriy etish;

sug‘oriladigan va lalmi yerlar unumdorligini oshirishning nazariy va amaliy asoslarini ishlab chiqish, qishloq xo‘jaligi ekinlarining ularning biologik imkoniyatidan eng ko‘p foydalanishni, yer va suv resurslari samaradorligini oshirishni ta’minlaydigan resurslarni tejovchi texnologiyalarini yaratish;

g‘o‘za, beda, makkajo‘xori, don, dukkakli don, meva, uzum, sabzavot, kartoshka va boshqa ekinlar, chorvachilik va ipakchilik seleksiyasi va urug‘chiligi sohasidagi tadqiqotlarni butun choralar bilan kengaytirish;

o‘rmon xo‘jaligi, ihota o‘rmonchiligi va o‘rmon melioratsiyasi sohasidagi tadqiqotlarni rivojlantirish va kengaytirish, tog‘, cho‘l, sug‘oriladigan va lalmi hududlarning hamda yaylovlarning mahsuldorligini oshirish;

o‘simliklarni himoya qilishning biologik va uyg‘unlashtirilgan usullari sohasidagi tadqiqotlarni rivojlantirish, kam zaharli gerbitsidlar, pestitsidlar va defoliantlarni, o‘stirish regulyatorlarini hamda atrof muhit va ekologik jihatdan toza mahsulot olish uchun xavfsiz bo‘lgan boshqa yuqori samarali birikmalarni qidirib topish;

yuqori unumli, ishonchli, metall va energiya kam sarflanadigan qishloq xo‘jaligi mashinalarining yangi turlarini yaratish;

veterinariya tibbiyotining nazariy asoslarini ishlab chiqish, davolash, kasallikning oldini olish tadbirlarining ilmiy asoslangan tizimlarini yaratish;

ishlab chiqarish tuzilmasini, bozor xo‘jalik mexanizmini, agrosanoat majmuini kooperatsiyalash va integratsiyalashning samarali shakllarini, ijaraning progressiv shakllarini, qishloqni ijtimoiy rivojlantirish masalalarini takomillashtirishning nazariy va amaliy muammolarini ishlab chiqish;

xorijiy mamlakatlarning ilmiy-tadqiqot muassasalari bilan xalqaro hamkorlikni rivojlantirishni tashkil etish, jahon fani va amaliyoti yutuqlarini o‘rganish hamda umumlashtirish;

yuqori malakali ilmiy kadrlar (fan doktorlari va nomzodlari) tayyorlash;

tasarrufidagi ilmiy tashkilotlar ilmiy xodimlarining xorijiy ilmiy muassasalarda tajriba o‘rganishini tashkil etish;

Akademiya a’zolarining va institutlarning ilmiy ishlarini nashr etish, ilmiy bilimlarni ommalashtirish.

4. O‘zbekiston Qishloq xo‘jaligi fanlari akademiyasi o‘ziga yuklatilgan vazifalarni kompleks hal etish uchun;

ilmiy-tadqiqot muassasalarini, ularning filiallarini va boshqa yordamchi tashkilotlarni belgilangan tartibda tashkil qiladi, qayta tashkil qiladi va tugatadi;

o‘z muassasalari kuchi bilan tegishli yo‘nalishlar bo‘yicha fundamental va amaliy tadqiqotlar dasturlarini ishlab chiqadi;

eng muhim dolzarb ilmiy muammolar bo‘yicha ilmiy, ilmiy-amaliy konferensiyalar, kengashlar, simpoziumlar tashkil qiladi;

fundamental va amaliy tadqiqotlarning eng muhim yo‘nalishlari bo‘yicha ilmiy kengashlar, jamiyatlar, uyushmalar va boshqa birlashmalar tashkil etadi;

respublika agrosanoat majmuining ilmiy-texnika potensialini rivojlantirish, ilm-fanning moddiy bazasini mustahkamlash bo‘yicha takliflar tayyorlaydi;

yirik ilmiy, ilmiy-texnikaviy, ijtimoiy-iqtisodiy dasturlar va loyihalar ekspertizasini, o‘z vakolatlari doirasida manfaatdor tashkilotlar va muassasalar bilan birgalikda ularning muhokamasini o‘tkazadi;

ilmiy tadqiqotlarni zarur axborotlar bilan ta’minlaydi;

belgilangan tartibda xo‘jalik shartnomalari va boshqa budjetdan tashqari manbalar bo‘yicha daromadlar hisobiga ishlab chiqarishni, ilm-fanni, texnikani va moliyaviy zaxirani rivojlantirish markazlashtirilgan fondlarini tashkil qiladi.

5. O‘zbekiston Qishloq xo‘jaligi fanlari akademiyasi har yili o‘z faoliyati to‘g‘risida O‘zbekiston Respublikasi Vazirlar Mahkamasiga hisobot taqdim etadi.

6. O‘zbekiston Qishloq xo‘jaligi fanlari akademiyasi ilmiy-tarmoq va hududiy tamoyillar bo‘yicha tuziladi.

7. Akademiya tarkibiga tarmoq bo‘limlari, Qoraqalpog‘iston mintaqaviy bo‘limi, ilmiy-ishlab chiqarish birlashmalari (IIB) va ilmiy-tadqiqot institutlari (ITI), konstruktorlik byurolari, tajriba zavodlari, xo‘jaliklar, kutubxona va boshqa ilmiy hamda ilmiy-yordamchi bo‘linmalar kiradi.

8. Qishloq xo‘jaligi fanlari akademiyasi tasarrufida bo‘lgan asosiy fondlar va boshqa mol-mulklar uning begonalashtirish huquqisiz mulki hisoblanadi.

9. Qishloq xo‘jaligi fanlari akademiyasi Prezidiumi va muassasalari huzurida belgilangan tartibda firmalar, kichik va qo‘shma korxonalar, xo‘jalik jamiyatlari, shirkatlar hamda mulkchilikning turli shakllaridagi tashkilot va korxonalarni birlashtiruvchi uyushmalar tashkil etilishi mumkin.

10. Qishloq xo‘jaligi fanlari akademiyasi, Qoraqalpog‘iston bo‘limi, mustaqil ilmiy-tadqiqot institutlari, ilmiy ishlab chiqarish birlashmalari hamda ularga tenglashtirilgan tashkilotlar ular davlat ro‘yxatidan o‘tkazilgan vaqtdan boshlab yuridik shaxs maqomiga ega bo‘ladilar.

Yuridik shaxs maqomiga ega bo‘lgan ilmiy hamda ilmiy-yordamchi tashkilotlar va xo‘jalik muassasalari ro‘yxati Qishloq xo‘jaligi fanlari akademiyasi Prezidiumi tomonidan belgilanadi.

O‘zbekiston Qishloq xo‘jaligi fanlari akademiyasi Prezidiumi va uning muassasalari O‘zbekiston Respublikasining amaldagi qonunchiligi doirasida tashqi iqtisodiy faoliyatni amalga oshirishlari shuningdek, milliy va chet el valyutasida shu jumladan xorijiy mamlakatlarda bank schyotlari ochishi mumkin.

11. Qishloq xo‘jaligi fanlari akademiyasining haqiqiy a’zolari, muxbir a’zolari hamda ilmiy ishlab chiqarish birlashmalari va mustaqil ilmiy tadqiqot institutlari direktorlaridan iborat bo‘ladigan Umumiy yig‘ilish O‘zbekiston Qishloq xo‘jaligi fanlari akademiyasining yuqori organi hisoblanadi.

12. O‘zbekiston Qishloq xo‘jaligi fanlari akademiyasi Umumiy yig‘ilishi a’zolari agar ushbu Nizomda boshqacha tartibda nazarda tutilmagan bo‘lsa, Umumiy yig‘ilishda ko‘rib chiqiladigan barcha masalalarni hal etishda teng huquqlarga ega bo‘ladilar.

13. Qishloq xo‘jaligi fanlari akademiyasining Umumiy yig‘ilishi ilm-fanni rivojlantirish va akademiyaning o‘z faoliyati eng muhim masalalarni ko‘rib chiqish uchun uning Prezidiumi tomonidan har yili kamida bir marta chaqiriladi. Yig‘ilishni chaqirishning navbatdagi sanasini Prezidium belgilaydi.

14. Umumiy yig‘ilish:

ilm-fanni rivojlantirishning ustuvor yo‘nalishlarini hamda ularga tegishli kompleks dasturlarni muhokama qiladi va ular bo‘yicha zarur qarorlar qabul qiladi;

fanlar bo‘limlari faoliyati yo‘nalishlarni hamda tarkiblarini shakllantiradi va tasdiqlaydi;

Akademiyaning haqiqiy a’zolarini, muxbir a’zolarini, shuningdek, faxriy va xorijiy a’zolarini saylaydi;

Akademiya Nizomini qabul qiladi, unga o‘zgartirishlar va qo‘shimchalar kiritadi hamda tasdiqlash uchun uni Vazirlar Mahkamasiga taqdim etadi;

Akademiya tuzilmasini hamda ilmiy tadqiqot institutlarining, ilmiy-ishlab chiqarish birlashmalarining namunaviy nizomini tasdiqlaydi;

Akademiya Prezidiumining ma’ruzalari va hisobotlarini, shuningdek, Akademiya ilmiy-tadqiqotlarining qisqa muddatli va uzoq muddatli mavzuli rejalarini muhokama qiladi va tasdiqlaydi;

belgilangan tartibda atoqli olimlar nomidagi mukofotlar va medallarni ta’sis etish to‘g‘risida qarorlar qabul qiladi hamda mukofotlar va medallar to‘g‘risidagi Nizomga muvofiq ularni fan sohasidagi yutuqlar va kashfiyotlar uchun yetakchi olimlarga, ijodiy jamoalarga beradi;

yangi ilmiy-tadqiqot institutlari tashkil etish va ularning faoliyatini to‘xtatish to‘g‘risidagi masalalarni belgilangan tartibda ko‘rib chiqadi;

ushbu Nizom asosida O‘zbekiston Qishloq xo‘jaligi fanlari akademiyasi Prezidentini saylaydi va uni egallab turgan lavozimidan ozod qiladi, Prezidium a’zolarini a’zolikdan chiqaradi;

zarurat bo‘lganda Akademiya faoliyatiga taalluqli boshqa masalalarni ham hal etish huquqiga egadir.

15. Navbatdan tashqari Umumiy yig‘ilish Akademiya bo‘limlarining a’zolarining yoki Akademiya ilmiy tadqiqot tashkilotlarining ular tomonidan taklif etilgan kun tartibini muhokama qilish uchun kamida uchdan bir qismining taklifiga ko‘ra chaqirilishi mumkin.

16. Umumiy yig‘ilishda Akademiya Prezidiumi taklif etgan shaxslar qatnashishlari va kun tartibi bo‘yicha so‘zga chiqishlari mumkin.

17. Umumiy yig‘ilish Prezidiumining ayrim a’zolarining muddatidan oldin ozod qilishi va bo‘shab qolgan o‘rinlarga yangi a’zolar saylashi mumkin.

18. Umumiy yig‘ilish Akademiyani tarqatib yuborish yoki uning o‘rniga boshqa birlashma tuzish to‘g‘risida O‘zbekiston Respublikasi Vazirlar Mahkamasiga taklif bilan kirish huquqiga egadir. Ushbu masala bo‘yicha qaror qabul qilish uchun Akademiya Umumiy yig‘ilish a’zolari ro‘yxatdagi tarkibining kamida uchdan ikki qismining ovozini olish zarur.

19. Yig‘ilishda Akademiya Umumiy yig‘ilish a’zolari ro‘yxatdagi tarkibining kamida uchdan ikki qismi qatnashganda qarorni qabul qilish uchun qatnashchilarning ko‘pchiligi ovoz berganda agar Nizomda va saylovlar to‘g‘risidagi Nizomda boshqacha tartib nazarda tutilmagan bo‘lsa, Umumiy yig‘ilish to‘la huquqli bo‘ladi, uning qarorlari esa qabul qilingan hisoblanadi.

20. Chet elda xizmat safarida bo‘lgan, salomatligining ahvoli yoki boshqa biron-bir sabab tufayli qatnashmayotganlarni Umumiy yig‘ilish a’zolari ovoz berayotganda Akademiya Prezidiumi maxsus qaror bilan hisobdan chiqarish huquqiga egadir.

Barcha shaxsiy masalalar, agar ushbu Nizomda boshqacha tartibda nazarda tutilmagan bo‘lsa Umumiy yig‘ilish tomonidan yopiq ovoz berish yo‘li bilan hal etiladi. Qishloq xo‘jaligi fanlari Akademiyasi Prezidiumi yashirin ovoz berish tadbirini o‘tkazish uchun barcha zarur shart-sharoitlarni yaratishi kerak.

21. Umumiy yig‘ilish qarorlarini bajarish Akademiyaning barcha tashkilotlari a’zolari va xodimlari uchun majburiy hisoblanadi.

22. O‘zbekiston Qishloq xo‘jaligi fanlari Akademiyasining shaxsiy tarkibiga haqiqiy a’zolar (akademiklar), muxbir a’zolar, faxriy va xorijiy a’zolar kiradi.

23. Akademiyaning haqiqiy a’zolari, muxbir a’zolari faxriy va xorijiy a’zolari umrbod saylanadilar.

24. Akademiyaning haqiqiy a’zolari ilm-fanni birinchi darajali ilmiy ahamiyatga ega bo‘lgan ilmiy ishlar bilan boyitgan, ilmiy maktab yaratgan, ilmiy yutuqlari jahon darajasiga javob beradigan, yoshi 65 dan oshmagan muxbir a’zolardan va fan doktorlaridan saylanadi.

Qoraqalpog‘iston bo‘limining haqiqiy a’zolari (akademiklari) va muxbir a’zolari ushbu mintaqalarda doimiy yashovchi va Akademiyaning mintaqaviy muassasalarida ishlovchi olimlardan saylanadi.

Qishloq xo‘jaligi fanlari akademiyasining haqiqiy a’zolari yoki muxbir a’zolari 70 yoshga to‘lganda, Qishloq xo‘jaligi fanlari akademiyasining haqiqiy a’zolarini yoki muxbir a’zolarini saylash uchun qo‘shimcha o‘rinlar ochiladi.

Akademiyaning ko‘rsatib o‘tilgan yoshga to‘lgan haqiqiy a’zolari va muxbir a’zolari Akademiya a’zolarining barcha huquqlari va vakolatlarini to‘liq saqlab qoladilar.

25. Qishloq xo‘jaligi fanlari akademiyasining faxriy a’zosi etib O‘zbekiston Respublikasining fuqarosi jahon va mamlakat ilm-fani oldida e’tirof qilingan xizmatlari uchun saylanishi mumkin.

26. Qishloq xo‘jaligi fanlari akademiyasining xorijiy a’zosi ilmiy yutuqlari jahon va mamlakat ilm-fani va O‘zbekiston Respublikasi xalq xo‘jaligi rivojiga ta’sir ko‘rsatgan xorijiy fuqarolardan saylanadi.

27. Qishloq xo‘jaligi fanlari akademiyasi a’zolari fanlar yo‘nalishlari bo‘yicha fanlarning tegishli bo‘limlariga birlashadilar. Qishloq xo‘jaligi fanlari akademiyasining haqiqiy a’zosi va muxbir a’zosi ovoz berishda qatnashgan bo‘lim a’zolari uchdan ikki qismining roziligi bilan boshqa bo‘limga o‘tishlari mumkin.

Fanlar bo‘limlaridan birida turuvchi akademiyaning haqiqiy a’zosi va muxbir a’zosi boshqa bo‘lim ko‘pchilik a’zolarining roziligi bilan uning ishida qatnashishi mumkin. Bunda ular mazkur bo‘lim a’zolarining barcha huquqlaridan foydalanadilar, Akademiyaning haqiqiy a’zolarini va muxbir a’zolarini saylash huquqi bundan mustasno.

Akademiyaning Qoraqalpog‘iston bo‘limining haqiqiy a’zolari va muxbir a’zolari ayni bir vaqtda o‘z mutaxassisliklari bo‘yicha O‘zbekiston Qishloq xo‘jaligi fanlari akademiyasining tegishli bo‘limlari tarkibiga kiradilar.

28. Akademiyaga saylovlar ushbu Nizom hamda Prezidium tomonidan tasdiqlangan saylovlar to‘g‘risidagi Nizom asosida o‘tkaziladi.

29. Akademiyaning haqiqiy a’zosi ilmiy tadqiqotlarda shaxsan ishtirok etadi, tadqiqotlarning yangi yo‘nalishlarini shakllantiradi va fanning o‘zi saylangan sohasining yuksak darajada rivojlanishi uchun shaxsan javob beradi.

Akademiyaning muxbir a’zosi o‘zining shaxsiy ilmiy tadqiqotlari va yirik ilmiy-texnikaviy muammolar yechimlari natijalari bo‘yicha muhim asarlari bilan fanni boyitadi.

Akademiyaning haqiqiy va muxbir a’zolari ilmiy kadrlar tayyorlash ishlarida va ilmiy maktablarni shakllantirish va rivojlantirishda bevosita ishtirok etadilar.

Akademiyaning haqiqiy va muxbir a’zolari Akademiya Prezidiumiga:

ilmiy tadqiqotlarni amalga oshirishda, yuqori malakali kadrlar tayyorlashda shaxsan erishgan yutuqlarini, ilmiy asarlarini o‘z ichiga olgan ilmiy va ilmiy-tashkilotchilik faoliyati haqidagi yillik hisobotni taqdim etadilar;

Akademiyaning haqiqiy va muxbir a’zolari Akademiya Prezidiumi, Akademiya Prezidenti, tegishli bo‘limlarining topshiriqlarini bajaradi, Akademiyaning Umumiy yig‘ilishi va tegishli bo‘limning umumiy yig‘ilish ishida qatnashadi.

30. Qishloq xo‘jaligi fanlar akademiyasining haqiqiy va muxbir a’zolari:

Akademiya muassasalarida ilmiy tadqiqot ishlarini bajarish;

Akademiyaning ilmiy muassasalarida tanlovdan o‘tmasdan ilmiy lavozimlarni egallash;

o‘zining ilmiy asrlarini nashr etish;

Akademiya Prezidiumi, Akademiya Umumiy yig‘ilishi, bo‘lim umumiy yig‘ilishini ko‘rib chiqishi uchun ilmiy va ilmiy tashkiliy masalalarni kiritish va ularning muhokamasida ishtirok etish huquqiga egadirlar.

Akademiyaning haqiqiy va muxbir a’zolari akademiklik unvoni uchun har oyda belgilangan gonorar oladilar va belgilangan huquq va imtiyozlardan foydalanadilar.

Akademiyaning faxriy va xorijiy a’zolari Akademiyaning haqiqiy a’zolariga tegishli barcha huquqlardan foydalanadilar. Akademiyaning rahbariyatiga saylanish, akademiya a’zolarini saylashda ovoz berish akademiklik unvoni uchun gonorar olish bundan mustasnodir.

Qishloq xo‘jaligi fanlari akademiyasi a’zolari O‘zbekiston fuqaroligini boshqa mamlakat fuqaroligiga almashtirgan taqdirda akademiyaning xorijiy a’zolari tarkibiga o‘tishlari mumkin. Bunday hollarda ovoz berishning belgilangan qoidalari qo‘llaniladi.

31. Akademiyaning haqiqiy a’zolari (akademiklar)ni muxbir, faxriy va xorijiy a’zolarini saylash har ikki yilda bir marta o‘tkaziladi.

32. Akademiyaning bo‘sh o‘rinlarini va yangi a’zolar saylash uchun yangidan ochiladigan o‘rinlarni Qishloq xo‘jaligi fanlar akademiyasi Prezidiumi tavsiyasiga binoan ilm-fan sohalari va mutaxassisliklarning turli yo‘nalishlari ehtiyojlarini hisobga olgan holda O‘zbekiston Respublikasi Vazirlar Mahkamasi belgilaydi.

Prezidiumning Akademiyaning haqiqiy a’zolari va muxbir a’zolari saylovlari o‘tkazilishi haqidagi xabari saylovlar o‘tkazilishidan kamida ikki oy oldin respublika matbuotida e’lon qilinadi.

33. Akademiyaning faxriy va xorijiy a’zolari bo‘limlarining tavsiyasi va Prezidiumning taqdimnomasiga binoan Akademiyaning Umumiy yig‘ilishida ochiq ovoz berish yo‘li bilan saylanadi.

34. E’londa ko‘rsatilgan ixtisosliklar bo‘yicha haqiqiy muxbir a’zolikka nomzodlar ko‘rsatish huquqi Akademiya a’zolari, ilmiy kengashlar, ilmiy muassasalar, oliy o‘quv yurtlariga beriladi.

35. Ilmiy muassasalar, oliy o‘quv yurtlari tomonidan nomzodlar ko‘rsatish ilmiy va ilmiy-texnika kengashlari majlislarida yashirin ovoz berish yo‘li bilan o‘tkaziladi. Ovoz berishda qatnashgan kishilarning kamida 50 foiz ovozini olganlar nomzodlikka ko‘rsatilgan hisoblanadi. Ovoz berishda Kengash a’zolarining kamida uchdan ikki qismi qatnashishi shart.

Akademiyaning haqiqiy va muxbir a’zoligiga nomzodlar ko‘rsatgan muassasalar nomzodlarning ilmiy va ilmiy-tashkilotchilik faoliyatini tavsiflovchi barcha hujjatlarni 20 kun muddatda Akademiya Prezidiumining Ilmiy kadrlar boshqarmasiga ro‘yxatdan o‘tkazish uchun taqdim etadi. Nomzodlar ko‘rsatish uchun belgilangan muddat tugagandan keyin nomzodlar haqidagi hujjatlar ko‘rib chiqish uchun 10 kun ichida tegishli fanlar bo‘limlariga topshirilishi zarur.

Fanlar bo‘limlarida nomzodlarning hujjatlari ekspertizadan o‘tkaziladi, ularning ilmiy faoliyati yo‘nalishlari e’lon qilingan ixtisosliklarga mos yoki mos emasligi aniqlanadi va saylovda ishtirok etishga ruxsat berilgan nomzodlarning ro‘yxati respublika matbuotida saylovdan kamida 20 kun oldin e’lon qilinadi.

Matbuotda e’lon qilingan nomzodlarning ilmiy va ilmiy-tashkilotchilik faoliyati haqidagi materiallar Fanlar akademiyasi Prezidiumi tomonidan Umumiy yig‘ilishning a’zolari o‘rtasida tarqatiladi.

36. Fanlar bo‘limlarining umumiy yig‘ilishlarida mutaxassislar ishtirokida nomzodlarning ilmiy ma’ruzalari tinglanadi va muhokama qilinadi va so‘ngra ochiq yoki yashirin ovoz berish yo‘li bilan Akademiyaning Umumiy yig‘ilishida saylash uchun nomzodlar tanlanadi.

Nomzodlarni haqiqiy va muxbir a’zolikka tanlashda haqiqiy va muxbir a’zolar, ushbu fan bo‘limi mustaqil institutlarning direktorlari hal qiluvchi ovoz huquqiga egadirlar. Bunda ushbu bo‘lim hisobidagi haqiqiy va muxbir a’zolarning, institutlar direktorlarining kamida uchdan ikki qismi yig‘ilishida qatnashgan taqdirda bo‘lim yig‘ilishi ovoz berishni o‘tkazish vakolatiga ega bo‘ladi. 50 foizdan ortiq ovoz olgan nomzod Akademiyaning Umumiy yig‘ilishida saylash uchun tavsiya etilgan hisoblanadi.

37. Haqiqiy va muxbir a’zolikka saylovlar Akademiyaning Umumiy yig‘ilishida yashirin ovoz berish yo‘li bilan o‘tkaziladi. Haqiqiy va muxbir a’zolarni saylashda, Umumiy yig‘ilishning barcha a’zolarini saylashda Umumiy yig‘ilishning barcha a’zolari hal qiluvchi ovoz berish huquqiga ega bo‘ladilar. Akademiya Umumiy yig‘ilishi ro‘yxatidagi a’zolarning kamida uchdan ikki qismi ovoz berishda qatnashishlari shart.

38. Ovoz berishda qatnashgan Umumiy yig‘ilish a’zolarining kamida uchdan ikki qismi ovozini olgan nomzodlar saylangan hisoblanadilar.

39. Agar dastlabki saylovda nomzodlardan birortasi ham saylanish uchun yetarli miqdorda ovoz ololmasa, Umumiy yig‘ilish uch marta qayta saylov o‘tkazish huquqiga egadir. Keyingi saylovlarga ovoz berishda qatnashganlarning kamida uchdan bir qismi yoki undan ko‘p qismi qo‘llab-quvvatlagan nomzodlar qo‘yiladi.

Ovoz berishning uchinchi martasiga ikkinchi martasida eng ko‘p ovoz olgan nomzod qo‘yiladi.

40. Saylovlarni o‘tkazish uchun Akademiya Umumiy yig‘ilishi tomonidan sanoq komissiyasi saylanadi. Sanoq komissiyasi saylov yakunlari bo‘yicha bayon tayyorlaydi. Sanoq komissiyasining bayoni Umumiy yig‘ilish tomonidan tasdiqlanadi.

41. Qishloq xo‘jaligi fanlar akademiyasi tarkibiga saylangan yangi a’zolar ro‘yxati matbuotda e’lon qilinadi.

42. Akademiya Prezidenti O‘zbekiston Respublikasi Prezidentining taklifiga binoan, ochiq ovoz berish natijasida Umumiy yig‘ilish a’zolarining ko‘pchilik ovozi bilan Akademiya a’zolari orasidan saylanadi.

43. Umumiy yig‘ilish sessiyalari o‘rtasidagi davrda Akademiya faoliyatiga Prezidium rahbarlik qiladi. Prezidium a’zolari soni Umumiy yig‘ilish tomonidan belgilanadi. Qishloq xo‘jaligi fanlari akademiyasining Prezidenti bajarayotgan vazifasiga ko‘ra Prezidium tarkibiga kiradi. Prezidiumning qolgan a’zolari Umumiy yig‘ilishi tomonidan Akademiyaning haqiqiy a’zolari va muxbir a’zolari orasidan yashirin ovoz berish yo‘li bilan 5 yil muddatga saylanadi.

44. Prezidium a’zolari saylovi Akademiya Prezidiumi tomonidan tasdiqlangan nizom asosida o‘tkaziladi. Prezidium har 5 yilda bir marta saylanadi. Zarurat bo‘lganda Akademiya Prezidiumi a’zolarining bir qismini tasdiqlangan Nizomga muvofiq rotatsiya qilish mumkin.

45. Akademiya Prezidenti Prezidium a’zolari etib saylangan haqiqiy a’zolar va muxbir a’zolar orasidan Qishloq xo‘jaligi fanlar akademiyasining vitse-prezidentlarini va bosh ilmiy kotibini tayinlaydi.

46. Fanlar bo‘limlari, Qoraqalpog‘iston bo‘limi raislari Akademiya Prezidenti tomonidan Prezidiumning saylangan a’zolari orasidan tayinlanadi. Qishloq xo‘jaligi fanlar akademiyasi Prezidiumi Qishloq xo‘jaligi fanlar akademiyasining vitse-prezidenti, bosh ilmiy kotibi va Qoraqalpog‘iston hududiy bo‘limi raisining huquq va majburiyatlarini belgilaydi.

47. Akademiya Prezidiumi o‘z faoliyatida Akademiya Umumiy yig‘ilishida hisobot beradi, unga Umumiy yig‘ilishlar o‘rtasidagi davrda qilingan ishlar haqida axborot beradi.

48. Qishloq xo‘jaligi fanlar akademiyasi Prezidiumi:

fanlar bo‘limlari tarkibiga kiruvchi ilmiy-tadqiqot muassasalarining ro‘yxatini tasdiqlaydi;

Akademiyaning tegishli bo‘limlari orqali ilmiy tadqiqot muassasalarining faoliyatiga rahbarlik qiladi;

O‘zbekiston Respublikasi Fan va texnika davlat qo‘mitasi va boshqa organlari bilan birgalikda fan va taraqqiyotining ustuvor yo‘nalishlarini belgilaydi;

fanning dolzarb yo‘nalishlari bo‘yicha ilmiy ma’ruzalar va axborotlarni eshitadi;

davlat budjeti mablag‘lari hisobidan amalga oshiriladigan fundamental tadqiqotlarning ilmiy darajasini muvofiqlashtiradi va nazorat qiladi;
agrar fanning eng muhim muammolari bo‘yicha ilmiy kengashlar, qo‘mita va komissiyalarni tasdiqlaydi va ularning faoliyatiga rahbarlik qiladi;

Akademiya zimmasiga yuklangan vazifalarni bajarish uchun ilmiy-tadqiqot va ilmiy-yordamchi muassasalar va korxonalarni belgilangan tartibda tashkil etadi hamda bu muassasalar va korxonalar haqidagi Nizomlarni yoki ularning ustavlarini tasdiqlaydi, shuningdek, tashkil etilayotgan ilmiy-tadqiqot muassasalarining ish yo‘nalishi va ixtisoslashuvini belgilaydi;

Qishloq xo‘jaligi fanlar akademiyasining Umumiy yig‘ilishini chaqiradi;

Akademiya a’zolari saylovini belgilaydi va tashkil etadi;

ilmiy konferensiyalar va kengashlar chaqiradi, munozaralar o‘tkazadi, tadqiqot ekspeditsiyalari tashkil qiladi;

Akademiyaning fan va texnika taraqqiyoti yo‘nalishlari bo‘yicha faoliyati haqidagi yillik hisobotlarni tasdiqlash uchun Umumiy yig‘ilishga taqdim etadi;

Akademiya tizimida yuqori malakali kadrlar tayyorlash ish rejalarini muhokama etadi va unga rahbarlik qiladi;
fan-texnika faoliyatida bozor munosabatlari mexanizmlarini ishlab chiqadi va ularni amalga oshiradi;

Akademiya bo‘limlari va ilmiy muassasalarga fan uchun ajratiladigan mablag‘lardan foydalanish samaradorligi haqida bo‘limlar va muassasalarning hisobotlarini eshitadi;

O‘zbekiston Respublikasi vazirliklari va idoralari, jamoat tashkilotlari va jamg‘armalari bilan birgalikdagi ishlarni va hamkorlikni amalga oshiradi;

Akademiyaning xalqaro aloqalarini rejalashtiradi; uning xorijiy mamlakatlar akademiyalari va ilmiy muassasalari bilan ilmiy va iqtisodiy aloqalarni o‘rnatadi;

yirik fundamental va amaliy tadqiqotlarni hayotga joriy etish uchun xalqaro va xorijiy muassasalar bilan birgalikda qo‘shma korxonalar, ilmiy markazlar va boshqa tuzilmalar tashkil qiladi;

fanlar bo‘limlari tavsiyasiga binoan ilmiy muassasalardagi ilmiy kengashlar tarkibini tasdiqlaydilar;

dissertatsiyalar himoyasi bo‘yicha ixtisoslashtirilgan kengashlar tarkibini tasdiqlash uchun Oliy attestatsiya komissiyasiga taklif kiritadi va ixtisoslashtirilgan kengashlar raislarining kengashlar faoliyati haqidagi hisobotlarini eshitadi;

ilmiy-tadqiqotlar va tajriba-konstruktorlik ishlari natijalaridan amalda foydalanishga ko‘maklashadi;

Qishloq xo‘jaligi fanlari akademiyasining barcha muassasalari va mansabdor shaxslar tomonidan mazkur Nizomga rioya etilishni nazorat qiladi;

Nizomga binoan kadrlar masalalarini ko‘rib chiqadi;

Qishloq xo‘jaligi fanlar akademiyasi mukofotlarini berish uchun Umumiy yig‘ilishga nomzodlarni tavsiya etadi.

49. Qishloq xo‘jaligi fanlar akademiyasi Prezidiumi o‘z a’zolarining uchdan ikki qismi yig‘ilishida ishtirok etgan taqdirdagina qarorlar qabul qilish huquqiga ega bo‘ladi. Qarorlar ochiq ovoz berish orqali ko‘pchilik ovoz bilan qabul qilinadi. Prezident Prezidium qaroridan norozi bo‘lgan hollar bundan mustasnodir. Qayta muhokama qilishda Prezidium a’zolarining uchdan ikki qismi ovoz bergan qarorlar qabul qilingan hisoblanadi. Shuningdek, Prezidiumning istalgan qarori yashirin ovoz berish yo‘li bilan ham qabul qilinishi mumkin.

Prezidium qarori Qishloq xo‘jaligi fanlari akademiyasining Prezidenti va bosh ilmiy kotib tomonidan imzolanadi.

50. Akademiyaning xo‘jalik-ishlab chiqarish tashkilotlariga, shu jumladan kapital qurilishga rahbarlikni Prezidentning umumiy masalalar bo‘yicha o‘rinbosari amalga oshiradi.

Prezidentning umumiy masalalar bo‘yicha o‘rinbosarining huquq va burchlari Akademiya Prezidiumi tasdiqlagan Nizom bilan belgilanadi.

51. Prezident, vitse-prezidentlar va bosh ilmiy kotib, shuningdek Akademiya Prezidiumining boshqa a’zolari surunkasiga ko‘pi bilan ikki muddatga saylanishlari mumkin.

52. Qishloq xo‘jaligi fanlar akademiyasi Prezidenti:

Akademiyaga umumiy rahbarlikni amalga oshiradi va kundalik masalalarni hal etadi, Akademiyadagi ishlarning ahvoli uchun O‘zbekiston Respublikasi Prezidenti va Vazirlar Mahkamasi hamda Fanlar akademiyasining Umumiy yig‘ilishi oldida shaxsan javob beradi;

davlat yuqori organlari, ilmiy muassasalar va xorijiy tashkilotlar oldida Akademiya nomidan ish ko‘radi va uning manfaatlarini himoya qiladi;

Qishloq xo‘jaligi fanlari akademiyasi Prezidiumi va uning apparati ishini tashkil qiladi;

qishloq xo‘jaligi, texnikaviy va ijtimoiy fanlar bo‘yicha eng muhim ilmiy-tadqiqot ishlari dasturlarini tasdiqlaydi va ularning bajarilishini nazorat qiladi;

Akademiyaning nashr rejalarini tasdiqlaydi va ularning bajarilishini nazorat qiladi;

ilmiy kadrlar tayyorlash va ularning malakasini oshirish ishiga rahbarlik qiladi;

dolzarb ilmiy, ilmiy-texnikaviy muammolarni, shuningdek tashkiliy masalalarni hal etish uchun olimlar va mutaxassislarning doimiy hamda muvaqqat ilmiy va maslahatchi jamoalarini tuzadi;

fan bo‘limlari tavsiyasi bo‘yicha institutlar, ilmiy ishlab-chiqarish birlashmalari direktorlarini va ularning fan bo‘yicha o‘rinbosarlarini kontrakt asosida lavozimga tayinlaydi va lavozimidan ozod qiladi;

Akademiya moliya resurslarining asosiy boshqaruvchisi hisoblanadi va ularning to‘g‘ri sarflanishini nazorat qiladi.

53. Akademiya Prezidiumi, ilmiy-tadqiqot va xo‘jalik muassasalarining faoliyati bilan bog‘liq kundalik masalalarni hal qilish, shuningdek Prezidiumda ko‘rib chiqiladigan masalalarni tayyorlash uchun Akademiya Prezidenti, vitse-prezidentlari va bosh ilmiy kotibidan iborat tarkibda prezidium byurosi tashkil etiladi.

54. Fan bo‘limlari bir yoki bir necha fan tarmoqlari olimlarini birlashtiruvchi Akademiyaning ilmiy va ilmiy tashkiliy bo‘linmasi hisoblanadi. Bo‘lim o‘z tarkibiga kiruvchi institutlar va boshqa ilmiy muassasalarga umumiy rahbarlikni amalga oshiradi.

Akademiyaning fan bo‘limlari respublikada fanning tegishli sohasi bo‘yicha fundamental va amaliy tadqiqotlarning rivojlantirilishiga va muvofiqlashtirilishiga, xalqaro aloqalarning kengaytirilishiga ko‘maklashadi, fan-texnika taraqqiyotini va respublika agrosanoat majmuini rivojlantirishni tezlashtirishga oid takliflarni umumlashtiradi hamda ularni Akademiya Prezidiumiga ko‘rib chiqish uchun kiritadi.

55. Akademiyaning bo‘limi tarkibiga kiruvchi haqiqiy a’zolari va muxbir a’zolarining hamda Akademiya ilmiy institutlari direktorlarining umumiy yig‘ilishi shu fan bo‘limining yuqori organi hisoblanadi.

Bo‘limlarning umumiy yig‘ilishi:

fan yo‘nalishlarida muhim ilmiy natijalarga erishishga hamda ularni amaliyotga joriy qilishga ko‘maklashadi;

Akademiyaning ilmiy muassasalaridagi ilmiy ishlar hamda ilmiy kadrlar tayyorlash haqidagi hisobotlarni eshitadi va tahlil qiladi;

tarmoq institutlari va ilmiy muassasalarga ilmiy-uslubiy yordam ko‘rsatadi;

fanning tegishli tarmoqlari bo‘yicha ilmiy muammolarni va ilmiy-tadqiqot ishlarini muvofiqlashtirish masalalarini muhokama qilish uchun ilmiy sessiyalar, konferensiyalar va kengashlar chaqiradi;

yashirin ovoz berish yo‘li bilan Qishloq xo‘jaligi fanlar akademiyasining haqiqiy va muxbir a’zoligiga nomzodlarni, shuningdek faxriy va xorijiy a’zoligiga nomzodlarni tavsiya etadi;

ilmiy tadqiqotlarni rejalashtiradi, ularning bajarilishini nazorat qiladi;

o‘z vakolatlari doirasida boshqa masalalarni ham ko‘rib chiqadi.

56. Umumiy yig‘ilishlar o‘rtasidagi davrda bo‘limlarning ishlariga bo‘limning byurosi va uning raisi rahbarlik qiladi.

Bo‘limlarning byuro a’zolari bo‘lim umumiy yig‘ilishi tomonidan bo‘lim a’zolari va shu bo‘lim ilmiy tadqiqot institutlari direktorlari orasidan ochiq ovoz berish yo‘li bilan besh yil muddatga saylanadilar. Ovoz berishda qatnashgan Akademiyaning haqiqiy muxbir a’zolari va shu bo‘limga qarashli ilmiy tadqiqot institutlari direktorlarining yarmidan ko‘prog‘i ovoz berganda nomzodlar saylangan hisoblanadilar.

Bo‘limlarning rahbarlarini saylashda rahbariyatining yangilanib turish va uzviyligi prinsipiga rioya qilinadi. Bo‘limlarning raislarini Akademiya Prezidiumi tasdiqlaydi.

57. Bo‘limlarning ilmiy kotiblari Qishloq xo‘jaligi fanlari akademiyasining Prezidenti tomonidan tayinlanadi.

58. Bo‘limlarning byurosi:

bo‘limlarning umumiy yig‘ilishlarini chaqiradi;

bo‘limlarning vakolatlari doirasiga kiruvchi ilmiy va ilmiy-tashkiliy masalalarni umumiy yig‘ilishida ko‘rib chiqishni tashkil etadi, uning qarorlarining bajarilishini ta’minlaydi;

ilmiy tadqiqot institutlari direktorlarining hisobotlarini ko‘rib chiqadi, institutlar faoliyati natijalariga baho beradi:

ilmiy muassasalarning ish yo‘nalishlarini o‘zgartirish haqidagi masalalarni ko‘rib chiqadi va shu masalalar yuzasidan Akademiya Prezidiumiga tegishli takliflar kiritadi;

ilmiy tadqiqot ishlari dasturlarini va ularning bajarilishi haqidagi hisobotlarni, shuningdek Akademiyaning shu bo‘limga qarashli haqiqiy a’zolari va muxbir a’zolarining hisobotlarini ko‘rib chiqadi;

dissertatsiyalar himoyasi bo‘yicha ixtisoslashtirilgan kengashlar faoliyatiga ko‘maklashadi va uni nazorat qiladi;

bo‘limlar tarkibiga kiruvchi ilmiy jamiyatlarga umumiy rahbarlikni amalga oshiradi;

eng muhim muammolar bo‘yicha ilmiy kengashlar ishni va ular faoliyati natijalarini muhokama qilishni uyushtiradi;

xorijiy ilmiy markazlarda muddatli tajriba o‘rganish maqsadida nomzodlar tanlashni amalga oshiradi va bo‘lim ixtisosiga kiruvchi mutaxassisliklar bo‘yicha ilmiy kadrlar tayyorlash ishini nazorat qiladi;

Akademiyaning ilmiy tadqiqot institutlari hamda tegishli vazirliklar va idoralar bilan birgalikda fundamental va amaliy tadqiqotlar dasturlarini shakllantiradi, ushbu dasturlarning ilmiy darajasini belgilovchi ekspert komissiyalarini tuzadi va keyinchalik ularni ko‘rib chiqish uchun Akademiya Prezidiumiga taqdim etadi.

59. Bo‘limlarning byurolari bo‘limlar umumiy yig‘ilishiga va Akademiya Prezidiumiga bo‘ysunadi va har yili bo‘limlar umumiy yig‘ilishiga o‘z ishi haqida hisobot berib turadi.

60. Qoraqalpog‘iston bo‘limi o‘z faoliyatini Qoraqalpog‘iston bo‘limi nizomiga muvofiq amalga oshiradi va bevosita O‘zbekiston qishloq xo‘jaligi fanlari akademiyasi Prezidentiga bo‘ysunadi.

Bo‘lim muassasalariga ilmiy-uslubiy rahbarlikni uning Prezidiumi amalga oshiradi. Uning tarkibiga rais, rais o‘rinbosari, bosh ilmiy kotib va Prezidium a’zolari kiradi.

61. Qoraqalpog‘iston bo‘limi raisining o‘rinbosari va bosh ilmiy kotib Qoraqalpog‘iston bo‘limi Prezidiumi raisining tavsiyasiga binoan O‘zbekiston Qishloq xo‘jaligi fanlar akademiyasi tomonidan 5 yil muddatga tasdiqlanadilar.

Qoraqalpog‘iston bo‘limi o‘z bo‘limi bo‘yicha ajratiladigan haqiqiy a’zolar va muxbir a’zolarning bo‘sh o‘rinlariga nomzodlarni muhokama qiladi va sohalar bo‘yicha saylash uchun o‘z tavsiyasini Akademiyaning tegishli fan bo‘limlariga beradi.

Qoraqalpog‘iston bo‘limi Prezidiumini saylashda uning tarkibini muntazam ravishda yangilab turish va rahbarlikning davomiyligi prinsipiga rioya qilinishi lozim.

Qoraqalpog‘iston bo‘limining Prezidiumi Akademiyaning Umumiy yig‘ilishi qarorlarining bajarilishini ta’minlaydi va bo‘limlarning faoliyatiga rahbarlik qiladi.

Qoraqalpog‘iston bo‘limining Prezidiumi yuridik shaxs hisoblanadi va bo‘limlarning barcha moliyaviy masalalarini hal qiladi.

Qoraqalpog‘iston bo‘limining Prezidiumi o‘z faoliyatida O‘zbekiston Qishloq xo‘jaligi fanlar akademiyasi Prezidiumiga bo‘ysunadi.

62. Qoraqalpog‘iston bo‘limining Nizomi Akademiyaning Prezidiumi tomonidan tasdiqlanadi.

63. Qoraqalpog‘iston bo‘limi Prezidiumining raisi egallab turgan lavozimiga ko‘ra O‘zbekiston qishloq xo‘jaligi fanlar akademiyasining vitse-prezidenti hisoblanadi.

64. Akademiyaning ilmiy-tadqiqot va ilmiy-ishlab chiqarish faoliyati uning ilmiy tadqiqot muassasalarida (institutlari, ilmiy-ishlab chiqarish birlashmalari, konstruktorlik byurolarida) jamlangandir. Institut va ilmiy-ishlab chiqarish birlashmasi faoliyati yo‘nalishiga muvofiq Akademiya bo‘limlari tarkibiga kiradi.

Institut, ilmiy-ishlab chiqarish birlashmasi o‘z faoliyatini Akademiya bo‘limining ilmiy-uslubiy rahbarligida amalga oshiradi.

65. Ilmiy-ishlab chiqarish birlashmalarining bosh direktorlari, ilmiy-tadqiqot institutlarining direktorlari, direktorlarning o‘rinbosarlari Akademiya Prezidenti tomonidan 65 yoshdan oshmagan yirik olimlar, odatda fan doktorlari orasidan kontrakt asosida 5 yilgacha muddatga tayinlanadilar.

Institut, ilmiy-ishlab chiqarish birlashmasi direktori o‘zi rahbarlik qilayotgan ilmiy muassasaning muvaffaqiyatli faoliyati uchun shaxsan javobgardir.

66. Institutning ilmiy kotibi, ilmiy-tadqiqot bo‘linmasi (institut, ilmiy-ishlab chiqarish birlashmasi bo‘limi, sektori, laboratoriyasi) mudiri institut ilmiy kengashida tanlovdan o‘tgan, odatda, fan doktorlaridan kontrakt asosida direktor tomonidan tayinlanadi. Fan nomzodi laboratoriya mudiri lavozimiga ko‘pi bilan ikki muddatga tayinlanishi mumkin.

67. Ilmiy-tadqiqot instituti, ilmiy-ishlab chiqarish birlashmasi huzurida belgilangan tartibda zavodlar, konstruktorlik, texnologik va loyiha byurolari, hisoblash markazlari, eksperimental xo‘jaliklar, zavodlar, ustaxonalar, sexlar, shuningdek, kooperativlar, kichik korxonalar, qo‘shma korxonalar tashkil qilinishi mumkin.

68. Akademiyaning ilmiy-tadqiqot muassasalari (institutlar, ilmiy-ishlab chiqarish birlashmasi, konstruktorlik byurolari) ushbu Nizomga hamda O‘zbekiston Qishloq xo‘jaligi fanlar akademiyasi Umumiy yig‘ilishida tasdiqlanadigan ilmiy-tadqiqot instituti ilmiy-ishlab chiqarish birlashmasining Namunaviy nizomiga muvofiq ish yuritadilar.

69. Akademiya faoliyatining iqtisodiy asosini ularning mulkchilik shakllarini o‘zgartirmagan holda egalik qilish va foydalanish uchun o‘ziga davlat tomonidan berilgan asosiy fondlar va boshqa mol-mulklar tashkil etadi.

Akademiya o‘z faoliyatini o‘ziga mulk sifatida va foydalanish uchun berilgan fondlar va boshqa davlat mol-mulklariga tayanib, davlat topshiriqlari asosida va O‘zbekiston Respublikasining amaldagi qonunchiligi doirasida amalga oshiradi.

70. Akademiyani mablag‘ bilan ta’minlashning asosiy manbai O‘zbekiston Respublikasi davlat budjetining mablag‘i hisoblanadi. Davlat budjetidan ajratilgan mablag‘lar FTDQ tomonidan tasdiqlangan davlat dasturlari doirasida fundamental va amaliy tadqiqotlar o‘tkazish uchun yo‘llanadi. Ilmiy tadqiqotlar davlat fondlaridan, jamoat va xususiy jamg‘armalardan olinadigan mablag‘lar, shuningdek, manfaatdor buyurtmachilar bilan tuziladigan shartnomalar, bitimlar va kontraktlardan olinadigan mablag‘lar mablag‘ bilan ta’minlashning qo‘shimcha manbalari hisoblanadi.

71. Ilmiy-tadqiqot, xo‘jalik, tashqi iqtisodiy faoliyatdan, tashkilotlar va ayrim shaxslar badallaridan tushadigan mablag‘lar, shu jumladan, xalqaro tashkilotlarning xayriya badallari va O‘zbekiston Respublikasi qonunchiligida nazarda tutilgan boshqa yo‘llar bilan olingan mablag‘lar Akademiyaning mulki hisoblanadi.

72. Akademiyaning ilmiy-tadqiqot tashkilotlari kundalik va boshqa ishlarini bajarishda O‘zbekiston Qishloq xo‘jaligi fanlari akademiyasi tasarrufidagi asosiy va oborot fondlaridan foydalanadilar.

73. Akademiyaning mol-mulki va mablag‘larini uning muassasalari va tashkilotlari o‘rtasida taqsimlash va ulardan foydalanish qoidalari amaldagi qonunchilik va O‘zbekiston Qishloq xo‘jaligi fanlari akademiyasi Nizomiga ko‘ra Akademiya Prezidiumi tomonidan amalga oshiriladi.

74. Akademiya va uning tashkilotlarining ilmiy-tadqiqot ishlarini tashkil etishda, kadrlarni tayyorlash va moddiy-texnika hamda ijtimoiy bazasini rivojlantirishda ilmiy tadqiqot institutlari va davlat budjetidagi boshqa tashkilotlar xo‘jalik faoliyatlarini o‘z nizomlariga muvofiq yuritadilar va bu faoliyatdan olingan daromadlarni tasarruf qilish huquqiga ega bo‘ladilar.

75. Akademiyaning xo‘jalik hisobidagi muassasalari, birlashmalari, ilmiy-tadqiqot tashkilotlari o‘z xo‘jalik va tadbirkorlik faoliyatlarini shu faoliyatdan olinadigan mablag‘lar hisobiga amalga oshiradilar.

76. Akademiya Prezidiumi, tashkilotlari va muassasalari O‘zbekiston Respublikasining amaldagi qonunchiligi asosida tadbirkorlik faoliyatidan olingan daromadlar hisobiga birlashmalarning ta’sischisi bo‘lish huquqiga egadirlar. Ular shunday faoliyatdan, ilmiy ishlanmalar natijalaridan, shuningdek, kichik seriyadagi priborlarni, ko‘p ilm talab qiladigan asbob-uskunalarni, materiallarni, ilmiy-texnika va reklama-tijorat xizmatlarini ichki va tashqi bozorda sotishdan olinadigan foydaga egalik qilish va tasarruf etish subyektlari hisoblanadilar.

77. Davlat budjetidan mablag‘ bilan ta’minlanadigan fundamental va amaliy tadqiqotlar natijalari Akademiya olimlari va ilmiy-tadqiqot muassasalarining mualliflik huquqini himoya qilish normalariga rioya etgan holda davlatga topshiriladi.

78. Akademiyaning ilmiy-tadqiqot muassasalari va boshqa tashkilotlarning ilmiy xodimlari va mutaxassislari shu tashkilotlarda yaratilgan intellektual mulkka nisbatan mualliflik huquqiga ega bo‘lgan subyektlar hisoblanadilar.

Akademiyaning muassasalari, tashkilotlari va boshqa bo‘linmalari shu muassasalar xodimlari bilan amaldagi qonunchilik asosida shartnomalar tuzish yo‘li bilan intellektual mulkka va uning obyektlariga (ilmiy tadqiqot ishlari natijalari), ekspremental-konstruktorlik ishlanmalari, kashfiyotlar, sanoat namunalari, seleksiya-urug‘chilik yutuqlari va boshqalarga egalik qilish huquqiga ega bo‘ladilar.

79. Qishloq xo‘jaligi fanlar akademiyasi o‘z mablag‘lari (budjetdan tashqari) va o‘z muassasalarining xo‘jalik hamda tadbirkorlik faoliyatlaridan olinadigan daromadning bir qismi, shuningdek, jalb qilingan boshqa mablag‘lar hisobiga maxsus moliya va innovatsiya fondlarni (ilmiy-texnika va ijtimoiy rivojlantirish, olimlarni, innovatsiyalarni ijtimoiy himoyalash va boshqa fondlar) tashkil etish mumkin. Bunday fondlarni tashkil etish va ularning mablag‘larini sarflash tartibi O‘zbekiston Respublikasi Moliya vazirligi bilan kelishgan holda Akademiya tomonidan ishlab chiqilgan maxsus nizomga muvofiq belgilanadi.

80. Akademiya olimlarining qo‘lyozmalari va arxivlarini, shuningdek, o‘z muassasalarining fan uchun ahamiyatli bo‘lgan arxiv va boshqa materiallarini saqlash huquqiga egadir.

81. Akademiya boshqa mamlakatlarning ilmiy muassasalari, oliy o‘quv yurtlari, kutubxonalari, muzeylari, nashriyotlari va muassasalari bilan matbaa nashrlarni ayirboshlash huquqiga egadir.

82. Akademiyaning Nizomi Akademiya Umumiy yig‘ilishi tomonidan qabul qilinadi va O‘zbekiston Respublikasi Vazirlar Mahkamasi tomonidan tasdiqlanadi. Qishloq xo‘jaligi fanlar akademiyasining Nizomi tasdiqlangan kundan boshlab kuchga kiradi.

83. Nizomni o‘zgartirish Umumiy yig‘ilishning ko‘pchilik ovozi bilan — Akademiya Umumiy yig‘ilishi a’zolari ro‘yxatidagi tarkibning kamida uchdan ikki qismi ovozi bilan qabul qilingan qaroriga muvofiq amalga oshiriladi. Bu o‘zgartirishlar O‘zbekiston Respublikasi Vazirlar Mahkamasi tomonidan tasdiqlanadi.