Respublikaning ijtimoiy-iqtisodiy ahvolini barqarorlashtirish va bozor munosabatlarini shakllantirish uchun shart-sharoit yaratish maqsadida Vazirlar Mahkamasi qaror qiladi:

1. 1992-yil 16-yanvardan ishlab chiqarish-texnika maqsadlaridagi mahsulotlarga, xalq iste’moli tovarlariga, ishlar va xizmatlarga talab va taklif asosida shakllanadigan shartnomaviy (erkin) narxlar va tariflarga asosan o‘tish amalga oshirilsin.

2. Aholining, eng avvalo ijtimoiy jihatdan muhtoj aholi talabalarining manfaatlarini himoya qilish zarurligini e’tiborga olib, 1—3-ilovalarga muvofiq oziq-ovqat va sanoat (bolalar) tovarlarining chegaralangan doirasiga cheklangan narxlar miqdorlari, shuningdek, aholiga ko‘rsatiladigan xizmatlarga tariflarning cheklangan miqdorlari belgilansin.

3. Qishloq xo‘jaligi mahsulotlari yetishtirishni ko‘paytirishni rag‘batlantirish va eng muhim oziq-ovqat tovarlarining belgilanadigan cheklangan chakana narxlari bilan bog‘liqlikni ta’minlash maqsadida don, guruh, chorva mollari, parranda, sut va tuxum uchun 4-ilovaga muvofiq boshqariladigan xarid narxlarining chegarasi belgilansin. Bunda xo‘jaliklarga belgilanadigan topshiriqdagi mahsulotning 15 foizining va topshirishdan oshiqcha barcha mahsulotning narxi ishlab chiqaruvchilar tomonidan belgilanadi, ya’ni ko‘rsatilgan mahsulot hajmlari erkin narxlarda sotiladi.

4. O‘zbekiston Respublikasi Moliya vazirligi, Savdo vazirligi, moddiy-texnika ta’minoti davlat-kooperativ qo‘mitasi, Davlat tashqi savdo va xorijiy mamlakatlar bilan aloqalar qo‘mitasi va O‘zbekbirlashuvga mahalliy Kengashlar ijroiya qo‘mitalari bilan birgalikda respublika tashqarisidan olib kelinadigan tovarlarning shartnomaviy narxlari hamda oziq-ovqat va nooziq-ovqat tovarlarining cheklangan chakana narxlari o‘rtasidagi tafovutni 1, 2-ilovalarga muvofiq ko‘rib chiqish va belgilangan tartibda hal qilish topshirilsin.

5. O‘zbekiston Respublikasi Savdo vazirligi, O‘zbekbirlashuv o‘n kun muddat ichida Davlat narxlar qo‘mitasi bilan birgalikda umumiy ovqatlanish korxonalari uchun ustama narxlarning cheklangan darajalarini ishlab chiqsinlar, Qoraqalpog‘iston Respublikasi Vazirlar Kengashi, viloyat ijroiya qo‘mitalari va Toshkent shahar ijroiya qo‘mitasi esa ularni tasdiqlasinlar.

6. O‘zbekiston Respublikasi Davlat narxlar qo‘mitasi, Qoraqalpog‘iston Respublikasi Vazirlar Kengashi, viloyat ijroiya qo‘mitalari va Toshkent shahar ijroiya qo‘mitasiga narxlarni tahlil qilish asosida o‘zining yakkahukmronlik holatidan foydalanuvchi va narxlarni asoslanmagan xolda oshirishga yo‘l qo‘yuvchi korxonalarni shartnomaviy (erkin) narxlar va tariflarni qo‘llash huquqidan mahrum qilishga hamda ularning mahsulotlariga narxlarning cheklangan darajalarini joriy qilishga ruxsat berilsin.

7. Konsernlarga, birlashmalarga; korxonalar va xo‘jaliklarga Qoraqalpog‘iston Respublikasi, viloyatlar va Toshkent shahri hududida zaruriyat bo‘lganda o‘z mablag‘lari hisobidan, eng avvalo o‘z xodimlari va xizmatchilari uchun quyidagicha kompensatsiyalar ajratish hisobiga narxlarning cheklangan darajalarini kamaytirish imkoniyatlarini qidirib topish tavsiya qilinsin:

umumiy ovqatlanish korxonalari mahsulotlariga (maktab, studentlar, ishchilar oshxonalari va boshqalar);

transport, maishiy, Kommunal va boshqa xizmat turlariga.

9. Konsernlar, korxonalar va tashkilotlar (mulkchilik shaklidan qat’i nazar) ishlab chiqarish-texnika maqsadlaridagi mahsulotlar va iste’mol tovarlarining qoldiqlarini qayta baholasinlar, oshirib baholangan summa miqdorining 50 foizi aholini ijtimoiy himoya qilish uchun respublika budjetiga va 50 foizi o‘zining oborot mablag‘larini to‘ldirishga o‘tkazilsin,

10. Kalish ishlab chiqarishning moddiy-texnika bazasini mustahkamlash maqsadida “O‘zbekrezinotexnika” birlashmasiga ishlab chiqarilgan mahsulot hajmining 15 foizini tuzilgan shartnomalar bo‘yicha valyutaga sotishga ruxsat berilsin.

11. Aholining ayrim toifalarini ijtimoiy himoya qilish maqsadida Vazirlar Mahkamasining 1991-yil 2-apreldagi 82-son, 1991-yil 12-apreldagi 97-son, 1991-yil 22-maydagi 140-son qarorlari bilan belgilangan amaldagi imtiyozlar saqlab qolinsin.

12. O‘zbekiston Respublikasi Moliya vazirligi vazirliklar, idoralar, korxonalar va tashkilotlarning hisob-kitoblari bo‘yicha 1992-yilgi budjetda aholiga ayrim oziq-ovqat va nooziq-ovqat tovarlarini belgilangan norma bo‘yicha sotishdan, shahar avtomobil va shahar elektr transportida yo‘lovchilar tashish, shuningdek, issiqlik ta’minoti va kvartira haqi xizmatlaridan dotatsiyalarni nazarda tutsin.

13. O‘zbekiston Respublikasi Davlat narxlar qo‘mitasi o‘n kun muddat ichida ishlab chiqarish-texnika maqsadlaridagi mahsulotga, xalq iste’moli tovarlari va xizmatlarga shartnomaviy (erkin) narxlarni qo‘llanish tartibi to‘g‘risida Vaqtinchalik nizom ishlab chiqsin.

14. O‘zbekiston Respublikasi Davlat narxlar qo‘mitasi, Davlat soliq xizmati, Qoraqalpog‘iston Respublikasi Vazirlar Kengashi, viloyat ijroiya qo‘mitalari va Toshkent shahar ijroiya qo‘mitasi xalq iste’moli tovarlari, ishlab chiqarish-texnika maqsadlaridagi mahsulotlar va xizmatlar uchun narx intizomiga rioya qilish ustidan nazoratni kuchaytirsinlar.

15. Mazkur qarorning bajarilishini nazorat qilish Vazirlar Mahkamasi Raisining o‘rinbosarlari — komplekslarning rahbarlariga yuklansin.