“O‘simlik dunyosini muhofaza qilish va undan foydalanish to‘g‘risida”gi hamda “Hayvonot dunyosini muhofaza qilish va undan foydalanish to‘g‘risida”gi O‘zbekiston Respublikasi qonunlariga muvofiq Vazirlar Mahkamasi qaror qiladi:

1. O‘zbekiston Respublikasi o‘simlik dunyosi obyektlarining davlat kadastrini yuritish tartibi to‘g‘risidagi Nizom va O‘zbekiston Respublikasi hayvonot dunyosining davlat kadastrini yuritish tartibi to‘g‘risidagi Nizom 1 va 2-ilovalarga muvofiq tasdiqlansin.

2. Belgilab qo‘yilsinki, o‘simlik dunyosi va hayvonot dunyosi obyektlarining davlat kadastrini va o‘simlik dunyosi va hayvonot dunyosi obyektlarning davlat hisobini yuritishga doir ishlarni mablag‘ bilan ta’minlash davlat budjeti hisobiga amalga oshiriladi.

3. SSSR Ministrlar Sovetining “Hayvonlarning va ulardan foydalanishning davlat hisobini va hayvonot olami davlat kadastrini yuritish tartibi to‘g‘risida” 1984-yil 28-apreldagi 373-son qarori yuzasidan O‘zbekiston SSR Ministrlar Sovetining 1984-yil 17-maydagi 258-son qarori (O‘zSSR QT, 1984-y., 5-son, 24-modda) o‘z kuchini yo‘qotgan deb hisoblansin.

4. Mazkur qarorning bajarilishini nazorat qilish O‘zbekiston Respublikasi Vazirlar Mahkamasining Agrosanoat kompleksi kotibiyatiga yuklansin.

1. O‘simlik dunyosi obyektlarining davlat kadastri “O‘simlik dunyosini muhofaza qilish va undan foydalanish to‘g‘risida”gi O‘zbekiston Respublikasi Qonuniga, O‘zbekiston Respublikasi Vazirlar Mahkamasining “O‘zbekiston Respublikasi Davlat kadastrlari yagona tizimini tashkil etish va uni yuritish tartibi to‘g‘risidagi Nizomni tasdiqlash haqida” 1996-yil 17-iyuldagi 255-son qaroriga, boshqa qonun hujjatlariga va mazkur Nizomga muvofiq yuritiladi.

2. O‘simlik dunyosi obyektlarining davlat kadastri yovvoyi o‘simliklar turlari tarkibi, soni, geografik tarqalishi, miqdoriy va sifat tavsifi, ulardan foydalanish, ularni iqtisodiy baholash, ular o‘sadigan muhitning tavsifi to‘g‘risidagi uzluksiz yangilanib turadigan axborot tizimi.

3. O‘simlik dunyosi obyektlarining davlat kadastri foydalaniladigan, mintaqadagi ekologik muhitga ta’sir ko‘rsatadigan yoki kamyob va turi yo‘qolib ketish xavfi ostida turgan yovvoyi holda o‘suvchi tomirli o‘simliklar va qo‘ziqorinlarning hamma turlarini hisobga oladi.

4. Davlat kadastrini yurituvchi organlar, o‘simlik dunyosidan foydalanuvchi yuridik shaxslar: qishloq xo‘jaligida band bo‘lgan yerlarda qishloq xo‘jaligi korxonalari, muassasalar va tashkilotlar; davlat o‘rmon fondi yerlarida o‘rmon xo‘jaligi korxonalari; zaxiralardagi yerlarda korxonalar, muassasalar, tashkilotlar, joylardagi davlat hokimiyatining vakolatli organlari o‘simliklarning kamyob va yo‘qolib borayotgan, dorivor oziqbop va manzarali turlari bo‘yicha respublikaning butun hududida O‘zbekiston Respublikasi Fanlar akademiyasi o‘simlik dunyosi obyektlarining davlat kadastri subyektlari hisoblanadilar.

5. O‘simlik dunyosi obyektlarining davlat kadastri davlat hokimiyati va boshqaruvi organlarini, manfaatdor yuridik va jismoniy shaxslarni kadastr axboroti bilan ta’minlashga mo‘ljallanilgan.

6. Quyidagilar o‘simlik dunyosi obyektlarining davlat kadastrini asosiy prinsiplari hisoblanadi:

respublikaning butun hududida o‘simlik dunyosining barcha obyektlarini davlat kadastri bilan qamrab olish;

axborotni to‘plash, qayta ishlash texnologiyasi va taqdim etish usulining yagonaligi;

davlat kadastrini yuritishni markazlashtirilgan tartibda boshqarish;

Davlat kadastrlari yagona tizimi talablarini ta’minlash;

Kadastr axborotini to‘ldirish va yangilashning ishonchliligi va uzluksizligi.

7. O‘simlik dunyosi obyektlarini davlat tomonidan hisobga olish va ulardan foydalanish o‘simlik dunyosi davlat kadastrining asosiy vazifasi hisoblanadi.

8. O‘simlik dunyosi obyektlarining davlat kadastri: obyektlarni ro‘yxatga olishni, ular sonini hisobga olishni va ulardan foydalanish sifatini, obyektlarni iqtisodiy baholashni, kadastr axborotini tizimlashtirishni, saqlashni, yangilashni va uni manfaatdor foydalanuvchilarga tegishli shakllarda va hajmlarda belgilangan tartibda tezkor berishni o‘z ichiga oladi.

Davlat hokimiyati va boshqaruvi organlari kadastr axborotidan bepul foydalanadilar, manfaatdor yuridik va jismoniy shaxslar qonun hujjatlarida belgilangan miqdorda haq to‘lab foydalanadilar.

9. O‘simlik dunyosi obyektlarining davlat kadastrini yuritish budjeti mablag‘lari hisobiga amalga oshiriladi. O‘simlik dunyosi obyektlarining davlat hisobi va davlat kadastrini yurituvchi barcha tashkilotlar mablag‘ bilan ta’minlanishi kerak.

10. O‘zbekiston Respublikasi o‘simlik dunyosi obyektlarining davlat kadastrida quyidagi guruhlarga birlashtirilgan yovvoyi o‘simliklarning har bir turi bo‘yicha ma’lumotlar mavjud bo‘ladi:

yovvoyi holda o‘sadigan dorivor va manzarali, shuningdek, oziq-ovqat sifatida foydalaniladigan o‘simliklar;

texnik maqsadlarda foydalaniladigan yovvoyi o‘simliklar;

tabiiy yaylovlar va pichanzorlardagi o‘simliklar;

yovvoyi o‘simliklarning kamyob va yo‘qolib ketish xavfi ostida turgan turlari.

11. Kadastr obyektlarining har bir guruhida quyidagi ma’lumotlar mavjud bo‘ladi:

obyektlar guruhlarining maqomi;

o‘simliklar dunyosi (yaylovlarning turlari);

keng tarqalishi (hududiy taqsimlanishi);

mahsuldorligi;

iqtisodiy baholanishi;

foydalanilishi.

12. O‘zbekiston Respublikasi Fanlar akademiyasi tomonidan ishlab chiqilgan “O‘zbekiston oliy o‘simliklarining ta’rifnomasi”, shuningdek dalani tekshirish ma’lumotlari o‘simlik dunyosi obyektlarining davlat kadastrini tuzish uchun axborot manbai hisoblanadi.

13. O‘simlik dunyosi obyektlarining davlat kadastri kadastri axboroti uzluksiz yangilashini ta’minlovchi axborotning asosiy va joriy turlarni o‘z ichiga oladi.

O‘simlik dunyosi obyektlari davlat kadastrining asosiy (birlamchi) turini yuritishda obyektlar birlamchi ro‘yxatdan o‘tkaziladi (xatlanadi). Joriy turda asosiy tur o‘tkazilgandan keyin yuz bergan barcha keyingi o‘zgartirishlar qayd etiladi va kadastrga kiritiladi.

14. Ro‘yxatdan o‘tkazish, hisobga olish va baholash axboroti o‘simliklar dunyosi to‘g‘risidagi jami kadastr axborotini tashkil etadi. Ushbu axborot alifbo-raqamli (matnlar, jadvallar) va chiziqli (xaritalar, sxemalar) shakllarida, an’anaviy va avtomatlashtirilgan variantlarda taqdim etiladi.

15. O‘simlik dunyosi obyektlarining davlat kadastri Davlat tabiatni muhofaza qilish qo‘mitasi tomonidan quyidagi ma’muriy-hududiy darajalarda:

birlamchi darajada o‘simlik dunyosi obyektlarning davlat kadastri subyektlarining vakolatli shaxslari tomonidan;

mintaqaviy darajada Qoraqalpog‘iston Respublikasi Davlat tabiatni muhofaza qilish qo‘mitasining kadastr xizmati va tabiatni muhofaza qilish viloyat qo‘mitalarining vakolatli shaxslari tomonidan;

respublika darajasida O‘zbekiston Respublikasi Davlat tabiatni muhofaza qilish qo‘mitasining kadastr xizmati tomonidan yuritiladi.

16. O‘simlik dunyosi obyektlarining davlat kadastri subyektlari darajasida vakolatli shaxslar: yovvoyi holda o‘suvchi o‘simliklarni ro‘yxatga oladi, ularning soni, sifati va bahosi to‘g‘risidagi axborotni yig‘adi, kadastr kitobini yuritadi, o‘simliklarning turlar bo‘yicha tarqalishining kadastr rejasini tuzadi va mintaqaviy darajada zarur kadastr axborotini beradi.

17. Mintaqaviy darajada vakolatli shaxslar kadastrini yuritishda subyektlarga uslubiy yordam ko‘rsatadi, tushayotgan axborotni tahlil qiladi, taqdim etilgan ma’lumotlarning ishonchliligini baholaydi, Qoraqalpog‘iston Respublikasi va viloyatlar bo‘yicha yovvoyi o‘simliklarning ro‘yxatini va yovvoyi o‘simliklarning turlar bo‘yicha joylashishi hududiy sxemalarini tuzadi, hisobotlar tuzadi hamda ularni har yili 1-martgacha belgilangan shaklda Davlat tabiatni muhofaza qilish qo‘mitasiga taqdim etadi.

18. O‘zbekiston Respublikasi Davlat tabiatni muhofaza qilish qo‘mitasining kadastr xizmati respublika darajasida:

o‘simlik dunyosi obyektlarining davlat kadastri yuritilishini muvofiqlashtiradi;

me’yoriy-uslubiy hujjatlarni ishlab chiqadi;

kadastr yuritilishi ustidan nazorat qiladi;

viloyat kadastr hisobotlarini tizimlashtiradi;

kadastr xizmatlarini moddiy-texnik ta’minlaydi;

o‘simlik dunyosi obyektlari davlat kadastrining avtomatlashtirilgan axborot tizimini ishlab chiqadi;

manfaatdor yuridik va jismoniy shaxslarning kadastr materiallaridan foydalanishi tartibi va shartlarini belgilaydi;

zarur kadastr axborotini Davlat kadastrlarining yagona tizimiga beradi.

19. O‘simlik dunyosi obyektlarini davlat yo‘li bilan hisobga olish:

yovvoyi holda o‘suvchi dorivor va manzarali, oziq-ovqat maqsadida foydalaniladigan o‘simliklar bo‘yicha O‘zbekiston Respublikasi Fanlar akademiyasi hamda O‘rmon xo‘jaligi davlat qo‘mitasi tomonidan;

texnik maqsadlarda foydalaniladigan yovvoyi o‘simliklar bo‘yicha — Davlat muhofaza qilish qo‘mitasi tomonidan;

tabiiy yaylovlar va pichanzorlardagi o‘simliklar bo‘yicha — “Yergeodezkadastr” Davlat qo‘mitasi tomonidan

yovvoyi o‘simliklarning kamyob va yo‘qolib ketish xavfi ostida turgan turlari bo‘yicha O‘zbekiston Respublikasi Fanlar akademiyasi tomonidan yuritiladi.

20. O‘simlik dunyosi obyektlarining davlat hisobini yurituvchi vazirliklar va idoralar o‘simlik dunyosi obyektlarining davlat kadastri bo‘yicha zarur axborotni Davlat tabiatni muhofaza qilish qo‘mitasi tomonidan belgilangan shaklda, hajmda va muddatlarda Davlat tabiatni muhofaza qilish qo‘mitasiga taqdim etadilar.

21. Davlat tabiatni muhofaza qilish qo‘mitasi 2001-yildan boshlab har yili o‘simlik dunyosi obyektlarining davlat kadastri bo‘yicha zarur axborotni hisobot yilidan keyingi yilning 1-aprelgacha Davlat kadastrlarining yagona tizimiga taqdim etadi. Kadastr ma’lumotlarini Davlat kadastrlarining yagona tizimiga taqdim etish shakli. Davlat tabiatni muhofaza qilish qo‘mitasi tomonidan tasdiqlanadi va “Yergeodezkadastr” davlat qo‘mitasi bilan kelishiladi.

22. O‘simlik dunyosining ishlab chiqiladigan kadastr axboroti ishonchliligi uchun Davlat tabiatni muhofaza qilish qo‘mitasining kadastr xizmati, o‘simliklarning davlat tomonidan hisobga olinishi yurituvchi vazirliklar va idoralarning vakolatli shaxslari qonun hujjatlariga muvofiq javob beradilar.

1. Hayvonot dunyosining davlat kadastri yovvoyi hayvonlar sonini hisobga olish, ulardan foydalanish va ularni iqtisodiy baholash, hayvonot dunyosini muhofaza qilish va undan oqilona foydalanishni tashkil etish maqsadida, “Hayvonot dunyosini muhofaza qilish va undan foydalanish to‘g‘risida”gi O‘zbekiston Respublikasi Qonuniga, O‘zbekiston Respublikasi Vazirlar Mahkamasining “O‘zbekiston Respublikasi Davlat kadastrlari yagona tizimini tashkil etish va uni yuritish tartibi to‘g‘risidagi Nizomni tasdiqlash haqida” 1996-yil 17-iyuldagi 255-son qaroriga, boshqa qonun hujjatlariga, mazkur Nizomga muvofiq yuritiladi.

2. Hayvonot dunyosining davlat kadastri yovvoyi hayvonlar soni, ularning geografik tarqalishi, miqdoriy va sifat tavsiflari, ulardan foydalanish hamda ularni iqtisodiy baholash to‘g‘risidagi uzluksiz yangilanadigan axborot tizimi.

3. Tabiiy erkin holda yashovchi yovvoyi hayvonlar: sut emizuvchilar, parrandalar, sudralib yuruvchi hayvonlar, ham suvda, ham quruqlikda yashovchi hayvonlar, baliqlar, umrtqasizlar hayvonot dunyosining davlat kadastri obyektlari hisoblanadi.

4. Davlat kadastrini yurituvchi organlar, ov qilish va baliq ovlash xo‘jaligini yurituvchi, hayvonlarni tabiiy muhitdan ajratib olib hamda ajratib olmasdan ilmiy, madaniy-ma’rifiy, o‘quv va tayyorlash maqsadlarida hayvonot dunyosidan foydalanuvchi yuridik shaxslar hayvonot dunyosi davlat kadastrining subyektlari hisoblanadi.

5. Quyidagilar hayvonot dunyosi davlat kadastrini yuritishning asosiy prinsiplari hisoblanadi:

respublikaning butun hududida hayvonlarning barcha turlari yoki kichik turlarining imkoni boricha eng ko‘p sonini qamrab olish;

axborotni to‘plash, qayta ishlash texnologiyasi va taqdim etish metodikasining yagonaligini;

Davlat kadastrlari yagona tizimi talablarini ta’minlash;

kadastr axborotini to‘ldirish va yangilashning ishonchliligi va uzluksizligi;

davlat kadastrini yuritishni markazlashtirilgan tartibda boshqarish.

6. Hayvonot dunyosining davlat kadastri: obyektlarni ro‘yxatdan o‘tkazishni, ular sonini hisobga olishni va ulardan foydalanish sifatini, obyektlarni iqtisodiy baholashni, kadastr axborotini tizimlashtirishni, saqlashni, yangilashni va uni manfaatdor foydalanuvchilarga tegishli shakllarda va hajmlarda belgilangan tartibda tezkor berishni o‘z ichiga oladi.

Davlat hokimiyati va boshqaruvi organlari kadastr axborotidan bepul foydalanadilar, manfaatdor yuridik va jismoniy shaxslar qonun hujjatlarida belgilangan miqdorlarda haq to‘lab foydalanadilar.

7. Hayvonot dunyosining davlat kadastrini yuritish davlat budjeti mablag‘lari hisobiga amalga oshiriladi. Hayvonot dunyosini davlat tomonidan hisobga olishni va davlat kadastrini yurituvchi barcha tashkilotlar mablag‘ bilan ta’minlanishi kerak.

8. O‘zbekiston Respublikasining hayvonot dunyosini davlat kadastrida yovvoyi hayvonlarning har bir turi (kichik turi) bo‘yicha ma’lumotlar mavjud bo‘ladi. Yovvoyi hayvonlar turlarning quyidagi guruhlariga birlashtirilgan:

a) Qizil kitobga kiritilgan hayvonlarning kamyob va yo‘qolib ketayotgan turlari;

b) alohida muhofaza qilinadigan tabiiy hududlardagi hayvonlar turlari;

v) ovlanadigan hayvonlar turlari;

g) baliqlar;

d) qishloq xo‘jaligi zararkunandalari bo‘lgan hayvonlar;

e) o‘rmon xo‘jaligi zararkunandalari bo‘lgan hayvonlar;

j) odam va hayvonlarning alohida xavfli yuqumli kasalliklarini tarqatuvchi hayvonlar;

z) hayvonlarning boshqa turlari.

9. Turlar (kichik turlar)ning har bir guruhida quyidagi ma’lumotlar mavjud bo‘ladi:

tur (kichik tur)ning maqomi;

tarqalishi (hududlar bo‘yicha taqsimlanishi);

soni;

biologiyasi va tur (kichik tur)ning ommaviylashuvi;

foydalanilishi;

iqtisodiy baholanishi.

10. O‘zbekiston Respublikasi Davlat tabiatni muhofaza qilish qo‘mitasi tomonidan tasdiqlangan Nizomga muvofiq yuritiladigan “O‘zbekiston Respublikasi hayvonlarining genetik fondi kitobi” hayvonot dunyosining davlat kadastrini tuzish uchun axborot manbai hisoblanadi.

11. Hayvonot dunyosining davlat kadastri kadastr axboroti uzluksiz yangilashini ta’minlovchi asosiy (birlamchi) va joriy turlarni o‘z ichiga oladi. Hayvonot dunyosining davlat kadastri asosiy (birlamchi) turini yuritishda obyektlar birlamchi ro‘yxatdan o‘tkaziladi (xatlanadi).

Joriy turda asosiy tur o‘tkazilgandan keyin yuz bergan barcha keyingi o‘zgartirishlar qayd etiladi va kadastrga kiritiladi.

12. Ro‘yxatdan o‘tkazish, hisobga olish va baholash axboroti hayvonot dunyosi to‘g‘risidagi jami kadastr axborotini tashkil etadi. Ushbu axborot alifbo-raqamli (matnlar, jadvallar) va chiziqli (xaritalar, sxemalar) shakllarida, an’anaviy va avtomatlashtirilgan variantlarda taqdim etiladi.

13. Hayvonot dunyosining davlat kadastrini Davlat tabiatni muhofaza qilish qo‘mitasi yuritadi. O‘zbekiston Respublikasi Fanlar akademiyasi hayvonot dunyosining davlat kadastrini yuritish bo‘yicha maslahat organi hisoblanadi.

14. Hayvonot dunyosining davlat kadastri Davlat tabiatni muhofaza qilish qo‘mitasi tomonidan quyidagi ma’muriy-hududiy darajalarda:

birlamchi darajada hayvonot dunyosining davlat kadastri subyektlari vakolatli shaxslari tomonidan;

mintaqaviy darajada Qoraqalpog‘iston Respublikasi Davlat tabiatni muhofaza qilish qo‘mitasining kadastr xizmati, tabiatni muhofaza qilish viloyat qo‘mitalarining vakolatli shaxslari tomonidan;

respublika darajasida O‘zbekiston Respublikasi Davlat tabiatni muhofaza qilish qo‘mitasining kadastr xizmati tomonidan yuritiladi.

15. Yovvoyi hayvonlarni ro‘yxatdan o‘tkazish, ular to‘g‘risidagi miqdoriy va sifat axborotini to‘plash, kadastr daftarini yuritish, kadastr xaritalarini tuzish va mintaqaviy darajaga zarur axborotni berish subyektlar darajasida davlat kadastrining funksiyalari hisoblanadi.

16. Mintaqaviy darajada vakolatli shaxslar kadastrni yuritishda subyektlarga uslubiy yordam ko‘rsatadi, tushadigan axborotni tahlil qiladi, taqdim etilgan ma’lumotlarning ishonchliligini baholaydi, Qoraqalpog‘iston Respublikasi va viloyatlar bo‘yicha yovvoyi hayvonlar ro‘yxatini, yovvoyi hayvonlarning turlar bo‘yicha joylashishi hududiy sxemalarini tuzadi, hisobotlar tuzadi hamda ularni har yili 1-martgacha belgilangan shaklda Davlat tabiatni muhofaza qilish qo‘mitasiga taqdim etadi.

17. O‘zbekiston Respublikasi Davlat tabiatni muhofaza qilish qo‘mitasi kadastr xizmati respublika darajasida:

hayvonot dunyosining davlat kadastri yuritilishini muvofiqlashtiradi;

me’yoriy-uslubiy hujjatlarni ishlab chiqadi;

kadastr yuritilishi ustidan nazorat qiladi;

viloyat kadastr xizmatlari hisobotlarini tizimlashtiradi;

hayvonot dunyosining davlat kadastri bo‘yicha yillik hisobotni tuzadi;

kadastr xizmatlarini moddiy-texnik ta’minlaydi;

hayvonot dunyosini davlat kadastrining avtomatlashtirilgan axborot tizimini chiqadi;

manfaatdor yuridik va jismoniy shaxslarning kadastr materiallaridan foydalanishi tartibi va shartlarini belgilaydi;

zarur kadastr axborotini Davlat kadastrlari yagona tizimiga beradi.

18. Hayvonlarni davlat yo‘li bilan hisobga olish hamda ulardan foydalanish hajmini hisobga olish bo‘yicha hujjatlar:

turlari Qizil kitobga kiritilgan hayvonlar bo‘yicha ilmiy tashkilotlar, o‘quv yurtlari va boshqa idoralar, davlat qo‘riqxonalari va tabiiy milliy bog‘lar ishtirokida Fanlar akademiyasi tomonidan;

belgilangan tartibda ov qilish va sanoat obyektlariga kiritilgan hayvonlar bo‘yicha O‘zbekiston Respublikasi O‘rmon xo‘jaligi davlat qo‘mitasi, “O‘zbekbaliqovlash” uyushmasi, ov qilish xo‘jaligini yurituvchi boshqa tashkilotlar tomonidan;

hisobga olinishi va hayvonot dunyosining davlat kadastriga kiritilishi kerak bo‘lgan hayvonlarning barcha turlari (kichik turlari) bo‘yicha davlat qo‘riqxonalari va milliy tabiiy bog‘lar hududida tegishli ravishda idoraviy va milliy tabiiy bog‘lar hududida tegishli ravishda idoraviy bo‘ysunishidan qat’i nazar, davlat qo‘riqxonalari va tabiiy bog‘lar tomonidan;

baliqlarning sanoat turlari bo‘yicha O‘zbekiston Respublikasi Qishloq va suv xo‘jaligi vazirligi tomonidan;

alohida xavfli yuqumli kasalliklarni tarqatuvchi hayvonlar bo‘yicha O‘zbekiston Respublikasi Sog‘liqni saqlash vazirligining karantinli va alohida xavfli yuqumli kasalliklarning oldini olish respublika markazi tomonidan;

qishloq xo‘jaligi zararkunandalari bo‘lgan hayvonlar bo‘yicha O‘zbekiston Respublikasi Qishloq va suv xo‘jaligi vazirligi tomonidan;

o‘rmon xo‘jaligi zararkunandalari bo‘lgan hayvonlar bo‘yicha O‘zbekiston Respublikasi O‘rmon xo‘jaligi davlat qo‘mitasi tomonidan;

yuqorida ko‘rsatilmagan hayvonlarning qolgan turlari (guruhlari) bo‘yicha O‘zbekiston Respublikasi Fanlar akademiyasi tomonidan yuritiladi.

19. Hayvonlarning davlat ro‘yxatini va ulardan foydalanish hajmi hisobini yurituvchi vazirliklar va idoralar hayvonot dunyosining davlat kadastri bo‘yicha zarur axborotni Davlat tabiatni muhofaza qilish qo‘mitasi tomonidan belgilangan shaklda, hajmda va muddatlarda Davlat tabiatni muhofaza qilish qo‘mitasiga bepul taqdim etadilar.

20. Davlat tabiatni muhofaza qilish qo‘mitasi 2001-yildan boshlab har yili hayvonot dunyosining davlat kadastri bo‘yicha zarur axborotni hisobot yilidan keyingi yilning 1-apreligacha Davlat kadastrlari yagona tizimiga taqdim etish shakli Davlat tabiatni muhofaza qilish qo‘mitasi tomonidan tasdiqlanadi va “Yergeodezkadastr” davlat qo‘mitasi bilan kelishiladi.

21. Hayvonot dunyosining ishlab chiqiladigan kadastr axboroti ishonchliligi uchun Davlat tabiatni muhofaza qilish qo‘mitasining kadastr xizmati, hayvonlarning davlat tomonidan hisobga olinishi yurituvchi vazirliklar va idoralarning vakolatli shaxslari qonun hujjatlariga muvofiq javob beradilar.