Oʻzbekiston Respublikasi Prezidentining “Jismoniy shaxslar tomonidan naqd xorijiy valyutani olib kirish va olib chiqib ketish tartibini yanada soddalashtirish chora-tadbirlari toʻgʻrisida” 2017-yil 6-dekabrdagi PF-5276-son Farmoniga muvofiq Vazirlar Mahkamasi qaror qiladi:

1. Jismoniy shaxslar tomonidan naqd xorijiy valyutani Oʻzbekiston Respublikasining bojxona chegarasi orqali olib kirish va olib chiqib ketish qoidalari 1-ilovaga muvofiq tasdiqlansin.

3. Oʻzbekiston Respublikasi Hukumatining 2-ilovaga muvofiq ayrim qarorlari oʻz kuchini yoʻqotgan deb hisoblansin.

4. Vazirliklar va idoralar oʻzlari qabul qilgan normativ-huquqiy hujjatlarni bir oy muddatda ushbu qarorga muvofiqlashtirsinlar.

5. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari — “Oʻzagrotexsanoatxolding” AJ boshqaruvi raisi N.S. Otajonov va Oʻzbekiston Respublikasi Davlat bojxona qoʻmitasi raisi M.V. Toxiriy zimmasiga yuklansin.

1. Mazkur Qoidalar Oʻzbekiston Respublikasi Prezidentining “Jismoniy shaxslar tomonidan naqd xorijiy valyutani olib kirish va olib chiqib ketish tartibini yanada soddalashtirish chora-tadbirlari toʻgʻrisida” 2017-yil 6-dekabrdagi PF-5276-son Farmoniga muvofiq jismoniy shaxslar (Oʻzbekiston Respublikasining rezidentlari va norezidentlari) tomonidan naqd xorijiy valyutani olib kirish va olib chiqib ketish tartibini belgilaydi.

Ushbu Qoidalar diplomatik daxlsizlikka ega boʻlgan shaxslarga nisbatan tatbiq etilmaydi.

2. Jismoniy shaxslar tomonidan olib kirilayotgan va olib chiqib ketilayotgan 2000 (ikki ming) AQSH dollari ekvivalentidan ortiqcha miqdordagi naqd xorijiy valyuta unga deklaratsiya toʻldirish va bojxona organi xodimiga taqdim etish yoʻli bilan bojxona nazoratidan oʻtkaziladi.

Bunda yoʻlovchi bojxona deklaratsiyasida olib kirilayotgan yoki olib chiqib ketilayotgan naqd xorijiy valyutaning jami summasi koʻrsatiladi.

3. Jismoniy shaxsning xohishiga koʻra ekvivalenti 2 000 (ikki ming) AQSH dollariga teng yoki undan oshmaydigan miqdordagi naqd xorijiy valyuta deklaratsiyalanishi mumkin.

4. Jismoniy shaxslarga Oʻzbekiston Respublikasi hududiga bojxona nazorati qoidalariga rioya qilgan holda cheklanmagan miqdorda naqd xorijiy valyutani olib kirishga ruxsat etiladi.

5. Oʻzbekiston Respublikasi tashqarisiga naqd xorijiy valyutani erkin olib chiqib ketish jismoniy shaxslarga ekvivalenti 5 000 (besh ming) AQSH dollariga teng yoki undan oshmaydigan miqdorda bojxona nazorati qoidalariga rioya qilgan holda ruxsat etiladi.

Belgilangan summadan ortiqcha mablagʻni olib chiqib ketish:

rezidentlar tomonidan — Oʻzbekiston Respublikasi Markaziy bankining ruxsatnomasi asosida amalga oshiriladi, ushbu ruxsatnomada olib chiqib ketiladigan naqd xorijiy valyutaning jami summasi koʻrsatiladi;

norezidentlar tomonidan — Oʻzbekiston Respublikasiga kirish chogʻida toʻldirilgan yoʻlovchi bojxona deklaratsiyasi asosida amalga oshiriladi, ushbu deklaratsiyada naqd xorijiy valyuta summasi olib chiqib ketilayotgan naqd xorijiy valyuta summasidan kam boʻlmagan miqdorda koʻrsatilgan boʻlishi lozim.

Norezidentlar — respublikada belgilangan tartibda tashkil qilingan musobaqalar, tanlov va olimpiadalarning sovrindorlari yoki qatnashchilari tomonidan belgilangan summadan ortiqcha naqd xorijiy valyuta olib chiqib ketilayotganda naqd xorijiy valyuta olinganligining qonuniyligini tasdiqlovchi hujjat ular tomonidan ushbu naqd xorijiy valyutani olib chiqib ketish uchun asos hisoblanadi.

6. Ekvivalenti 5 000 (besh ming) AQSH dollaridan ortiqcha naqd xorijiy valyutani olib chiqib ketish uchun asos boʻlgan hujjatni boshqa shaxslarga berishga yoʻl qoʻyilmaydi.

7. Rezident tomonidan Oʻzbekiston Respublikasi Markaziy bankining ruxsatnomasini va norezident tomonidan Oʻzbekiston Respublikasiga kirish chogʻida toʻldirilgan yoʻlovchi bojxona deklaratsiyasini ishlatish bir marotaba amalga oshiriladi va kelgusida ekvivalenti 5 000 (besh ming) AQSH dollaridan ortiqcha naqd xorijiy valyutani olib chiqib ketish uchun asos sifatida foydalanishga yoʻl qoʻyilmaydi.

8. Jismoniy shaxslar Oʻzbekiston Respublikasining bojxona chegarasidan oʻtayotganlarida naqd xorijiy valyutaning haqqoniy va toʻgʻri deklaratsiyalanganligi uchun qonun hujjatlarida belgilangan tartibda javob beradilar.

9. Jismoniy shaxs bojxona organlari xodimlarining xatti-harakatlari yuzasidan qonun hujjatlarida belgilangan tartibda shikoyat qilishlari mumkin.

1. Oʻzbekiston Respublikasi Vazirlar Mahkamasining “Respublikada naqd xorijiy valyutaning muomalada boʻlishini tartibga solish chora-tadbirlarini amalga oshirish toʻgʻrisida” 1996-yil 31-oktabrdagi 376-son qarori.

2. Oʻzbekiston Respublikasi Vazirlar Mahkamasining “Oʻzbekiston Respublikasi Hukumatining qarorlarini toʻliq yoki qisman oʻz kuchini yoʻqotgan deb hisoblash hamda ayrim qarorlariga oʻzgartirishlar kiritish toʻgʻrisida” 1998-yil 16-apreldagi 161-son qaroriga 2-ilovaning 9-bandi.

3. Oʻzbekiston Respublikasi Vazirlar Mahkamasining “Valyuta bozorini yanada erkinlashtirish chora-tadbirlari toʻgʻrisida” 2001-yil 22-iyundagi 263-qaroriga ilovaning 1-bandi toʻrtinchi xatboshi (Oʻzbekiston Respublikasi QT, 2001-y., 6-son, 30-modda).

4. Oʻzbekiston Respublikasi Vazirlar Mahkamasining “Oʻzbekiston Respublikasi bojxona chegaralari orqali jismoniy shaxslar tomonidan naqd xorijiy valyutani olib kirish va olib chiqib ketish tartibiga oʻzgartirish kiritish toʻgʻrisida” 2009-yil 5-oktabrdagi 268-son qarori (Oʻzbekiston Respublikasi QHT, 2009-y., 41-son, 442-modda).

5. Oʻzbekiston Respublikasi Vazirlar Mahkamasining “Oʻzbekiston Respublikasi Hukumatining ayrim qarorlariga oʻzgartirish va qoʻshimchalar kiritish, shuningdek baʼzilarini oʻz kuchini yoʻqotgan deb hisoblash toʻgʻrisida (Oʻzbekiston Respublikasining “Oʻzbekiston Respublikasining Bojxona kodeksini tasdiqlash toʻgʻrisida” 2016-yil 20-yanvardagi OʻRQ-400-son hamda “Oʻzbekiston Respublikasining Bojxona kodeksi qabul qilinishi munosabati bilan Oʻzbekiston Respublikasining ayrim qonun hujjatlariga oʻzgartishlar kiritish, shuningdek baʼzilarini oʻz kuchini yoʻqotgan deb topish toʻgʻrisida” 2016-yil 20-yanvardagi OʻRQ-401-son qonunlari)“ 2016-yil 20-iyundagi 211-son qaroriga 1-ilovaning 3-bandi (Oʻzbekiston Respublikasi QT, 2016-y., 6-son, 59-modda).