Vazirlar Mahkamasi qayd etadiki, arxitektura va shaharsozlik masalalari bo‘yicha qonun hujjatlari talablariga rioya qilinishini tekshirish davomida shaharlar va aholi yashash joylarini rivojlantirishning bosh rejalari yo‘qligining, obyektlar loyiha-smeta hujjatlari va ruxsat berish hujjatlarisiz qurilishining ko‘plab hollari aniqlandi.

Tender hujjatlarini tasdiqlangan tartibga soluvchi hujjatlarsiz ekspertizadan o‘tkazish hollari davom etmoqda, pudrat ishlariga tuzilgan shartnomalar shartlari bajarilmayapti, narx belgilash mexanizmi ustidan zarur darajada nazorat o‘rnatilmagan.

Arxitektura va shaharsozlik sohasidagi qonun hujjatlari talablariga rioya qilinishi yuzasidan yo‘l qo‘yilgan xato va kamchiliklarni tugatish, transport magistrallari, muhandislik-kommunikatsiya tizimlari va ijtimoiy-maishiy infratuzilmani ishga tushirishni hisobga olgan holda shaharlar, tumanlar va posyolkalarni kompleks rivojlantirishdagi buzilishlarni bartaraf etish, joylardagi ijro etuvchi organlar rahbarlarining mas’uliyatini oshirish maqsadida Vazirlar Mahkamasi qaror qiladi:

1. Yo‘l qo‘yilgan kamchiliklar hamda arxitektura va shaharsozlik masalalari bo‘yicha qonunchilik hujjatlari va Hukumat qarorlarining bajarilishi ustidan nazoratni bo‘shashtirib yuborganligi uchun Samarqand (E. Ro‘ziyev), Buxoro (S. Xusenov), Namangan (T. Jabborov), Toshkent (U. Mirzaqulov) va Farg‘ona (A. Otaboyev) viloyatlari hokimlariga hayfsan berilsin.

2. Toshkent shahar hokimi K. To‘laganovning e’tibori obyektlar tasdiqlagan loyiha-smeta hujjatlari va ruxsat berish hujjatlarisiz qurilishi hollari mavjudligiga qaratilsin.

3. Samarqand, Buxoro, Namangan, Toshkent, Farg‘ona viloyatlari va Toshkent shahar hokimlari shaharsozlik talablarini buzgan, hamda obyektlar qurilishiga yo‘l qo‘ygan joylardagi mansabdor shaxslarning javobgarlik darajasini bir hafta muddatda ko‘rib chiqsinlar, hokimlarning qurilish bo‘yicha o‘rinbosarlari faoliyatiga qat’iy baho bersinlar.

4. Qoraqalpog‘iston Respublikasi Vazirlar Kengashining Raisi, viloyatlar va Toshkent shahar hokimlari shaharlar va aholi yashash joylari qurilishining tasdiqlangan bosh rejalariga qat’iy rioya qilinishi uchun shaxsan javobgar ekanliklari to‘g‘risida ogohlantirilsinlar. Ularga qurilishda narx belgilash mexanizmi ustidan doimiy monitoring yuritilishini tashkil etish majburiyati yuklansin.

5. Respublika arxitektura-shaharsozlik kengashi (A.N. Isayev) uy-joy, arxitektura-shaharsozlik qonun hujjatlariga rioya qilinishi ustidan nazorat o‘rnatish bo‘yicha hududiy komissiyalar bilan birgalikda O‘zbekiston Respublikasi Prezidentining “O‘zbekiston Respublikasida arxitektura va shahar qurilishini yanada takomillashtirish chora-tadbirlari to‘g‘risida” 2000-yil 26-apreldagi PF-2595-son Farmoni va mazkur masalalar bo‘yicha Hukumat qarorlarining bajarilishini bir oy muddatda batafsil tahlil qilib chiqsin. Bu sohada amaldagi qonun hujjatlariga so‘zsiz rioya qilinishini ta’minlash yuzasidan aniq chora-tadbirlarni belgilasin. Qilingan ishlar natijalari to‘g‘risida 2000-yilning 10-oktabrigacha Vazirlar Mahkamasiga axborot berilsin.

6. “Davarxitektqurilish” qo‘mitasi (A.R. To‘xtayev) shaharlar va aholi yashash joylari qurilishlarining tasdiqlangan bosh rejalariga rioya qilinishi, qurilish tegishli loyiha-smeta hujjatlari va ruxsat berish hujjatlari albatta mavjud bo‘lgan holda amalga oshirilishi ustidan nazoratni kuchaytirsin, O‘zbekiston Respublikasi Vazirlar Mahkamasining “Shaharlar, tuman markazlari va shahar tipdagi posyolkalarning bosh rejalarini ishlab chiqish va ularni qurish tartibi to‘g‘risidagi nizomni tasdiqlash haqida” 2000-yil 14-avgustdagi 320-son qarori talablari boshqaruvning tarmoq va hududiy organlari tomonidan qat’iy bajarilishini ta’minlasin.

7. Mazkur qarorning bajarilishini nazorat qilish Bosh vazirning o‘rinbosari A.N. Isayev zimmasiga yuklansin.