Transport vositalarini majburiy texnik koʻrikdan oʻtkazish samaradorligini oshirishni taʼminlash maqsadida Vazirlar Mahkamasi qaror qiladi:

1. Oʻzbekiston Respublikasi Prezidentining “Yoʻl harakati xavfsizligini taʼminlash tizimini yanada takomillashtirish chora-tadbirlari toʻgʻrisida” 2017-yil 11-iyuldagi PQ-3127-son qarorida 2018-yil 1-yanvardan boshlab, Oʻzbekiston Respublikasi Ichki ishlar vazirligi Davlat yoʻl harakati xavfsizligi xizmati boʻlinmalarining jismoniy shaxslarga tegishli yengil avtotransport vositalarini (keyingi oʻrinlarda jismoniy shaxslarga tegishli yengil avtotransport vositalari deb ataladi), yuk, yoʻlovchi va maxsus transport vositalari bundan mustasno, majburiy texnik koʻrikdan oʻtkazish boʻyicha funksiyalarini yuridik shaxslar — tadbirkorlik subyektlariga ular koʻrsatadigan xizmatlar uchun qatʼiy narxlar hamda ichki ishlar organlari bilan oʻzaro hamkorlikka oid talablarni belgilagan holda bosqichma-bosqich oʻtkazish nazarda tutilganligi maʼlumot uchun qabul qilinsin.

2. Belgilansinki:

2018-yil 1-yanvardan boshlab transport vositalarini majburiy texnik koʻrikdan oʻtkazishda jismoniy shaxslarga tegishli yengil avtotransport vositalarining texnik holati tadbirkorlik subyektlari — yuridik shaxslar tomonidan ham tekshirilishi mumkin;

2019-yil 1-yanvardan boshlab jismoniy shaxslarga tegishli yengil avtotransport vositalari tadbirkorlik subyektlari — yuridik shaxslar tomonidan majburiy texnik koʻrikdan oʻtkaziladi.

3. Vazirlar Mahkamasining “Transport vositalarini majburiy texnik koʻrikdan oʻtkazish tartibi toʻgʻrisidagi nizomni tasdiqlash haqida” 2003-yil 31-yanvardagi 54-son qaroriga (Oʻzbekiston Respublikasi QT, 2003-y., 1-son, 12-modda) 2018-yilning 1-yanvaridan boshlab ilovaga muvofiq oʻzgartirish va qoʻshimchalar kiritilsin.

4. Oʻzbekiston Respublikasi Ichki ishlar vazirligi:

2018-yil 15-yanvargacha boʻlgan muddatda Oʻzbekiston Respublikasi Moliya vazirligi bilan birgalikda transport vositasining toifasini hisobga olib hamda yuridik va jismoniy shaxslar uchun alohida tabaqalashtirilgan toʻlov stavkalari miqdorlarini joriy etishni nazarda tutgan holda, transport vositalarini majburiy texnik koʻrikdan oʻtkazish uchun undiriladigan toʻlov stavkalari miqdorlarini qayta koʻrib chiqsin;

tadbirkorlik subyektlari — yuridik shaxslar tomonidan jismoniy shaxslarga tegishli yengil avtotransport vositalarining texnik holatini tekshirish amaliyoti va samaradorligining doimiy monitoringini va har tomonlama tahlil qilib borilishini taʼminlasin;

monitoring va tahlil natijalari boʻyicha, shuningdek, Oʻzbekiston Respublikasi Ichki ishlar vazirligi Davlat yoʻl harakati xavfsizligi xizmati boʻlinmalarining jismoniy shaxslarga tegishli yengil avtotransport vositalarini majburiy texnik koʻrikdan oʻtkazish boʻyicha funksiyalari tadbirkorlik subyektlari — yuridik shaxslarga oʻtkazilishini hisobga olgan holda, 2018-yil 1-oktabrga qadar muddatda transport vositalarini texnik koʻrikdan oʻtkazish tartibini yanada takomillashtirish boʻyicha takliflar kiritsin;

mazkur qarorning maqsadi va mazmuni, shu jumladan jismoniy shaxslarga tegishli yengil avtotransport vositalarining texnik holatini tekshirish tartibini ommaviy axborot vositalarida keng yoritishni tashkil qilsin;

manfaatdor vazirlik va idoralar bilan birgalikda ular tomonidan qabul qilingan normativ-huquqiy hujjatlarni bir oy muddatda ushbu qarorga muvofiqlashtirsin.

5. Qoraqalpogʻiston Respublikasi Vazirlar Kengashi, viloyatlar va Toshkent shahri hokimliklari hududiy moliya organlari bilan kelishgan holda tadbirkorlik subyektlari — yuridik shaxslarning jismoniy shaxslarga tegishli yengil avtotransport vositalarining texnik holatini tekshirish boʻyicha xizmatlari uchun toʻlovlarning cheklangan miqdorlarini bir oy muddatda tasdiqlasin.

6. Mazkur qarorning bajarilishini nazorat qilish Oʻzbekiston Respublikasi Ichki ishlar vaziri P.R. Bobojonov zimmasiga yuklansin.

1. Muqaddimadagi “Qonunining 13-moddasini” soʻzlari “Qonunini” soʻzi bilan almashtirilsin.

2. Ilovada:

a) 1-banddagi “Qonunining 13-moddasiga muvofiq ishlab chiqilgan va” soʻzlari “Qonuniga muvofiq” soʻzlari bilan almashtirilsin;

b) 2-bandga quyidagi mazmundagi ikkinchi — toʻrtinchi xatboshilar qoʻshilsin:

“Transport vositalarining texnik holati va uskunalarining muvofiqligini baholash uchun DYHXX organlari tomonidan tashkiliy-huquqiy shakllaridan qatʼi nazar, vazirliklar va idoralarning, boshqa tashkilotlarning, shuningdek, xususiy texnik xizmat koʻrsatish stansiyalari (keyingi oʻrinlarda TXS deb ataladi) shartnoma asosida jalb etilishi mumkin.

Jismoniy shaxslarga tegishli M1 toifadagi transport vositalarining texnik reglamentlar yoki standartlar talablariga, yoʻl harakati xavfsizligi qoidalari, normalariga muvofiqligi tadbirkorlik subyektlari — yuridik shaxslar (keyingi oʻrinlarda Subyektlar deb ataladi) tomonidan ham baholanishi mumkin.

Bunda jismoniy shaxslar — M1 toifadagi transport vositalari egalari oʻz transport vositasining texnik holati va uskunalari muvofiqligini baholash uchun oʻz tanloviga koʻra, DYHXX organlari, TXS yoki Subyektlarga murojaat qilishlari mumkin”;

v) 5-bandda:

oltinchi xatboshi chiqarib tashlansin;

quyidagi mazmundagi “d” va “e” kichik bandlar qoʻshilsin:

“d) navbatdagi texnik koʻrikdan oʻtkazishning ilgari oʻrnatilgan muddatlaridan qatʼi nazar, ularni DYHXX organlarida roʻyxatdan oʻtkazish (qayta roʻyxatdan oʻtkazish) vaqtida;

e) ular ishlab chiqarilgan yildan qatʼi nazar, DYHXX organlarida roʻyxatdan oʻtkazilgan (qayta roʻyxatdan oʻtkazilgan) kundan boshlab bir yil oʻtgach (mazkur bandning “a” kichik bandida koʻrsatilgan holatlar bundan mustasno)”;

d) 7-band quyidagi tahrirda bayon etilsin:

“7. Transport vositalari DYHXX organlari tomonidan texnik koʻrikdan oʻtkazilganligi uchun Oʻzbekiston Respublikasi Ichki ishlar vazirligi tomonidan Moliya vazirligi bilan kelishilgan holda tasdiqlanadigan miqdorlarda yigʻim undiriladi.

Birinchi (oldingi) texnik koʻrikda nosoz deb topilgan transport vositalari takroriy texnik koʻrikdan oʻtkazilganligi uchun belgilangan miqdorlarda yigʻim undiriladi.

Texnik koʻrik oʻtkazilganligi uchun yigʻim summasi tegishli mahalliy budjetga oʻtkaziladi”;

e) II boʻlim quyidagi tahrirda bayon etilsin:

“II. Jismoniy shaxslarga tegishli transport vositalarining texnik holatini tekshirishni tashkil etish va oʻtkazish tartibi

8. Jismoniy shaxslarga tegishli transport vositalarining texnik holatini tekshirish:

DYHXXning diagnostika stansiyalari;

TXS;

Subyektlar (yoʻlovchilar tashish uchun moʻljallangan va haydovchi oʻrnidan tashqari oʻtirish uchun sakkiztadan koʻp boʻlmagan oʻrindiqlarga ega M1 toifadagi transport vositalari) tomonidan amalga oshirilishi mumkin.

Bunda TXS va Subyektlar koʻrsatiladigan xizmatlar uchun qatʼiy belgilangan narxlarni belgilashlari va DYHXX organlari bilan hamkorlik qilishlari zarur.

9. Jismoniy shaxslarga tegishli transport vositalarining texnik holatini tekshirish uchun DYHXXning diagnostika stansiyalari, TXS va Subyektlar Oʻzbekiston standartlashtirish, metrologiya va sertifikatlashtirish agentligi tomonidan belgilangan tartibda akkreditatsiyadan oʻtkazilgan, transport vositalarining texnik holatini tekshirishni tashkil etish va oʻtkazish uchun zarur texnologik jihozlar bilan taʼminlangan ishlab chiqarish-texnik bazasiga ega boʻlishi zarur.

10. Jismoniy shaxslarga tegishli M1 toifadagi transport vositalarining texnik holatini tekshirish uchun Subyektlarning ishlab chiqarish-texnik bazasi:

a) quyidagilarga muvofiq boʻlishi zarur:

M1 toifadagi transport vositalarining texnik holatini tekshirish uchun — Oʻzbekiston Respublikasi Vazirlar Mahkamasi tomonidan tasdiqlanadigan avtotransport vositalari konstruksiyasining foydalanish shartlari boʻyicha xavfsizligiga qoʻyiladigan talablarga;

avtotransport vositalariga oʻrnatilgan gaz ballon uskunalari ulanmalarining germetikligi va ishonchliligini sinovdan oʻtkazish va ularning ballonlarini tekshirish uchun — Oʻzbekiston Respublikasi Vazirlar Mahkamasi tomonidan tasdiqlanadigan siqilgan i tabiiy gazda (keyingi oʻrinlarda STG deb ataladi), suyultirilgan neft gazida (keyingi oʻrinlarda SNG deb ataladi) yoki dizel va gazsimon yoqilgʻi aralashmasida ishlaydigan transport vositalarining xavfsizligiga qoʻyiladigan talablarga;

b) zarur texnik diagnostika vositalariga ega boʻlishi lozim, shu jumladan:

oʻqiga tushadigan maksimal ogʻirlik 3500 kg gacha boʻlgan transport vositalarining tormoz tizimini tekshirish uchun tormoz tizimining texnik diagnostika vositalariga;

pnevmatik va pnevmogidravlik tormoz uzatmalarida siqilgan havo bosimi va germetiklikni (bosim tushishini) nazorat qilish vositalariga;

tirkamalarni ulash moslamasining bosib turish qurilmasiga;

rul boshqaruvdagi umumiy lyuftini oʻlchash priboriga;

rul boshqaruvi va podveskasi detallaridagi lyuftlarni tekshirish testeriga;

chiroqlar yorugʻligini boshqarishni va kuchini nazorat qilish priboriga;

shinalarni texnik diagnostika qilish vositalariga;

gazanalizatori — uchqundan oʻt oldirish dvigatellariga ega transport vositalarining ishlab boʻlingan gazlarida ifloslantiruvchi moddalarning mavjudligini aniqlash pribori;

tutun oʻlchash pribori — siqilishdan oʻt oldirish dvigatellariga ega transport vositalarining ishlab boʻlingan gazlarida tutunni aniqlash pribori;

dvigatel aylanish chastotasi va moy haroratini oʻlchash priboriga;

shovqin oʻlchash priboriga;

oynalarning yorugʻlik oʻtkazishini tekshirish priboriga;

kompressorga;

qinchali manometrga;

zarur kompyuter texnikasiga.

Ayrim texnik diagnostika vositalari xavfsiz foydalanish boʻyicha talablarga muvofiq boʻlish sharti asosida universial texnik vositalar bilan almashtirilishi mumkin.

Qoʻllaniladigan barcha oʻlchov vositalari tasdiqlangan tipda boʻlishi, qonun hujjatlariga muvofiq tekshiruvdan oʻtgan boʻlishi zarur.

DYHXXning diagnostika stansiyalari va TXSning ishlab chiqarish-texnik bazasi tekshirilayotgan transport vositasining toifasiga koʻra (M1, M2, M3, №1, №2, №3) mazkur band talablariga muvofiq boʻlishi kerak.

11. Ishlab chiqarish-texnik bazaning maydoni, texnik diagnostika vositalarining soni va xususiyatlari, mehnat va atrof-muhitni muhofaza qilishga oid talablar qonun hujjatlariga muvofiq belgilanadi.

12. Transport vositalarini tekshirishga tegishli mutaxassislikka ega boʻlgan yoki diagnostika qilish texnologiyasi, diagnostika jihozlarining tuzilishi va ishlash prinsiplari, diagnostika vositalarini qoʻllagan holda texnik holatni tekshirish metodlari, mehnatni muhofaza qilish boʻyicha talablarni oʻrgangan shaxslar qoʻyilishi mumkin.

13. Subyektlar jismoniy shaxslarga tegishli M1 toifadagi transport vositalarining texnik holatini tekshirishni oʻtkazish boʻyicha faoliyatlarini boshlashdan oldin Qoraqalpogʻiston Respublikasi Ichki ishlar vazirligi, Toshkent shahar Ichki ishlar bosh boshqarmasi va viloyatlar ichki ishlar boshqarmalarining hududiy yoʻl harakati xavfsizligi boshqarmalarini (keyingi oʻrinlarda YHXB deb ataladi) yaratilgan sharoitlar mazkur Nizom talablariga muvofiqligi va koʻrsatilgan faoliyatni amalga oshirishga tayyor ekanligi haqida yozma ravishda xabardor qilishlari shart.

Subyektning xatiga quyidagi hujjatlar ilova qilinadi:

Subyekt ustavining nusxasi;

avtotransport vositalarining texnik holatini tekshirishni tashkil etish va oʻtkazish uchun tegishli texnologik jihozlar bilan taʼminlangan ishlab chiqarish-texnik baza Oʻzbekiston standartlashtirish, metrologiya va sertifikatlashtirish agentligi tomonidan berilgan akkreditatsiyadan oʻtkazilganligi haqidagi xulosa;

“Sanoatgeokontexnazorat” davlat inspeksiyasining avtotransport vositalariga oʻrnatiladigan ballonlarni texnik tekshirish boʻyicha faoliyatni amalga oshirish huquqini beruvchi ruxsatnomasining nusxasi.

13¹. Hududiy YHXB Subyektning mazkur Nizomning 13-bandiga muvofiq taqdim etilgan xati qabul qilingan kundan boshlab uch ish kuni ichida uni oʻrganadi, Subyekt tomonidan taqdim etilgan hujjatlar toʻliqligini tekshiradi va ular mazkur Nizom talablariga muvofiq boʻlgan taqdirda, Subyektni jismoniy shaxslarga tegishli M1 toifadagi transport vositalarining texnik holatini tekshirish uchun zarur sharoitlarga ega tadbirkorlik subyektlari — yuridik shaxslar hisobini yuritish reyestriga kiritadi hamda bu haqida ikki ish kuni ichida Subyektni xabardor qiladi.

Oʻzbekiston Respublikasi Ichki ishlar vazirligining Yoʻl harakati xavfsizligi bosh boshqarmasi Subyekt xabardor qilingan paytdan boshlab 2 ish kuni ichida uni Oʻzbekiston Respublikasi Ichki ishlar vazirligining Yoʻl harakati xavfsizligi bosh boshqarmasining rasmiy veb-saytiga joylashtiriladigan reyestrga kiritadi.

Reyestr aholini jismoniy shaxslarga tegishli M1 toifadagi transport vositalarining texnik holatini tekshirish uchun zarur sharoitlarga ega Subyektlar haqida xabardor qilish uchun yuritiladi.

13². Subyekt tomonidan mazkur Nizomning 13-bandida koʻrsatilgan hujjatlar toʻliq taqdim etilmagan yoki taqdim etilgan hujjatlarda notoʻgʻri yoki buzib koʻrsatilgan maʼlumotlar mavjud boʻlgan taqdirda hududiy YHXB 2 ish kuni ichida Subyektga yoʻl qoʻyilgan kamchiliklarni koʻrsatgan holda xabar beradi.

Subyekt mazkur Nizomning 13-bandiga muvofiq hududiy YHXBga takroran xabarnoma yuborish yoki DYHXX mansabdor shaxslarining harakati (harakatsizligi) ustidan belgilangan tartibda shikoyat qilish huquqiga ega.

13³. Subyekt oʻzi yoki uning filiali roʻyxatga olingan hududiy YHXB xizmat koʻrsatadigan hududda roʻyxatdan oʻtkazilgan jismoniy shaxslarga tegishli M1 toifadagi transport vositalarining texnik holatini tekshiradi.

Hududiy YHXB xizmat koʻrsatadigan hududda ikki yoki undan ortiq Subyektlar mavjud boʻlgan hollarda, Subyekt transport vositalari egalarining xohishiga koʻra tanlanadi.

13⁴. Jismoniy shaxslarga tegishli M1 toifadagi roʻyxatdan oʻtgan transport vositalarining soni Subyektlar tomonidan tekshiriladigan transport vositalarining sonidan koʻp boʻlsa va buning natijasida transport vositasining texnik holati oʻz vaqtida tekshirilishini taʼminlash imkoni boʻlmaydigan hududlarda boshqa transport vositalarining texnik holatini tekshirish joylari DYHXX organi tomonidan mazkur Nizomning 28, 29 va 33-bandlariga muvofiq belgilanadi.

13⁵. M1 toifadagi transport vositalarining texnik holatini tekshirish uchun texnik koʻrikdan oldin uning egasi — jismoniy shaxs yoki u tomonidan vakil qilingan shaxs (keyingi oʻrinlarda arizachi ataladi) reyestrga kiritilgan Subyekt xodimiga (operatoriga) murojaat qiladi, transport vositasini va quyidagi hujjatlarni taqdim etadi:

texnik koʻrikdan oʻtkazish uchun taqdim etilgan transport vositaning turi uchun nazarda tutilgan, tegishli toifadagi transport vositasini boshqarish huquqini beruvchi haydovchilik guvohnomasi;

transport vositasining roʻyxatdan oʻtkazilganligi toʻgʻrisidagi guvohnoma (texnik pasport, texnik talon);

gaz yoqilgʻisida ishlashga qayta jihozlangan transport vositasiga oʻrnatilgan gaz ballonining sertifikatlashtirish organi tomonidan berilgan muvofiqlik sertifikati nusxasi.

Transport vositasi taqdim etilgan hujjatlarda koʻrsatilgan maʼlumotlarga muvofiq boʻlgan taqdirda va u identifikatsiya qilingandan keyin mazkur transport vositasining texnik holatini tekshirishga ruxsat etiladi.

13⁶. Subyektning transport vositasi texnik holatini tekshirish xizmatlari uchun mazkur xizmatni koʻrsatadigan Subyekt tomonidan tasdiqlangan, biroq Qoraqalpogʻiston Respublikasi Vazirlar Kengashi, viloyatlar va Toshkent shahri hokimlari tomonidan Qoraqalpogʻiston Respublikasi Moliya vazirligi, viloyatlar va Toshkent shahar moliya bosh boshqarmalari bilan kelishgan holda belgilanadigan cheklangan miqdorlardan oshmaydigan tariflar boʻyicha haq toʻlanadi.

13⁷. Transport vositasining texnik holati Subyekt xodimi (operatori) tomonidan mazkur Nizomning VI boʻlimida nazarda tutilgan tartibda tekshiriladi.

Avtotransport vositalariga oʻrnatilgan STG va SNG tizimlarining germetikligi hamda agregatlari va uzellari (opressovka) ulangan joylarning ishonchliligi Subyekt tomonidan Oʻzbekiston Respublikasi Vazirlar Mahkamasi tomonidan tasdiqlangan Siqilgan tabiiy gazda, suyultirilgan neft gazida yoki dizel va gazsimon yoqilgʻi aralashmasida ishlaydigan transport vositalarining xavfsizligi toʻgʻrisidagi umumiy texnik reglamentga muvofiq sinovdan oʻtkaziladi.

13⁸. Tekshiruvdan oʻtgan va texnik soz deb topilgan har bir transport vositasiga Subyekt va TXS tomonidan mazkur Nizomga 2-ilovaga muvofiq shaklda uning texnik holati haqida maʼlumotnoma rasmiylashtiriladi va beriladi.

13⁹. Transport vositasini texnik koʻrikdan oʻtkazish uchun taqdim etgan avtotransport egasi tomonidan qonun hujjatlari buzilgan (koʻrsatilgan hujjatlarni, agregatlarning identifikatsiya raqamlarini soxtalashtirish va boshq.) holatlar aniqlangan taqdirda, Subyekt vakili bu haqida darhol DYHXX organlariga xabar berishi shart.

13¹⁰. Transport vositasining texnik holatini tekshirishda huquqbuzarliklarga yoʻl qoʻygan Subyektlarga nisbatan qonun hujjatlariga muvofiq javobgarlik choralari qoʻllaniladi.

13¹¹. Subyekt qayta tashkil etilganda, uning nomi yoki joylashgan joyi (pochta manzili) oʻzgargan hollarda Subyekt yoki uning huquqiy vorisi (merosxoʻri) qayta roʻyxatdan oʻtkazilgandan soʻng yetti ish kuni ichida hududiy YHXBni koʻrsatilgan maʼlumotlarni tasdiqlovchi hujjatlarni ilova qilgan holda xabardor qilishi shart.

14. Subyekt yoki TXS tomonidan jismoniy shaxslarga tegishli M1 toifadagi transport vositasining texnik holati haqida berilgan maʼlumotnoma berilgan kundan boshlab oʻn kun ichida haqiqiy hisoblanadi va DYHXX organlarida transport vositalari texnik holatini tekshirmasdan, ularning texnik koʻrikdan oʻtkazish natijalarini rasmiylashtirish uchun asos boʻlib xizmat qiladi”.

j) 18-bandning ikkinchi xatboshidagi “avtomototransport vositalarining texnik holati, ulardan foydalanish normalari va qoidalariga rioya etilishini nazorat qilish” soʻzlari “yoʻl harakati xavfsizligi” soʻzlari bilan almashtirilsin;

z) 27-bandda:

ikkinchi xatboshi quyidagi tahrirda bayon etilsin:

“Texnik koʻrikni bir tekis oʻtkazish maqsadida DYHXX organlari jadvallar tuzishi va 1-yanvardan 31-avgustgacha boʻlgan davrda transport vositalari egalari tomonidan transport vositalarini navbatdagi texnik koʻrikdan oʻtkazish uchun taqdim etishning aniq sanalari (oylari)ni belgilashi mumkin”;

quyidagi mazmundagi uchinchi xatboshi qoʻshilsin:

“Transport vositalari egalari transport vositalarini navbatdagi texnik koʻrikka DYHXX organlari tomonidan belgilangan muddatdan kechiktirmay taqdim etishlari shart”;

i) 28-band quyidagi tahrirda bayon etilsin:

“28. Texnik koʻrik transport vositalari roʻyxatdan oʻtkazadigan (vaqtincha roʻyxatdan oʻtkazadigan) joydagi:

TXSda;

DYHXX diagnostika stansiyalarida (jismoniy shaxslarga tegishli M1 toifadagi transport vositalarining texnik holati mazkur Nizomning 134-bandi talablariga rioya etilgan holda baholanishi lozim);

DYHXX organlari tomonidan belgilangan texnik nazorat postlarida;

transport vositalarining texnik holatini tekshirish uchun zarur shart-sharoitlarga ega boʻlgan jamoaviy garaj hududida, avtomobillar toʻxtash joylarida;

Subyektlar tomonidan (jismoniy shaxslarga tegishli M1 toifadagi transport vositalari) oʻtkaziladi”;

k) 30-bandning toʻqqizinchi xatboshidagi “texnik koʻrikdan oʻtkazish shoxobchasining” soʻzlari “TXS va Subyektning” soʻzlari bilan almashtirilsin;

l) 31-banddagi “roʻyxatdan oʻtkazish guvohnomasiga (texnik pasportga, talonga)” soʻzlari “texnik koʻrikdan oʻtkazilganligi toʻgʻrisidagi talonga” soʻzlari bilan almashtirilsin;

m) 33-band quyidagi tahrirda bayon etilsin:

“33. Transport vositalari texnik koʻrikdan oʻtkazishga DYHXX organlari tomonidan koʻrsatilgan joyga qoʻyilishi lozim (Subyektlar tomonidan jismoniy shaxslarga tegishli M1 toifadagi transport vositalarining texnik holatini baholash hollari bundan mustasno)”;

n) 37-bandda:

ikkinchi xatboshidagi “roʻyxatdan oʻtkazish guvohnomasiga (texnik pasportga, talonga)” soʻzlari “texnik koʻrikdan oʻtkazilganligi toʻgʻrisidagi talonga” soʻzlari bilan almashtirilsin;

toʻrtinchi xatboshi chiqarib tashlansin;

beshinchi xatboshi toʻrtinchi xatboshi deb hisoblansin;

o) 46-bandning birinchi xatboshi quyidagi tahrirda bayon etilsin:

“Texnik koʻrikdan oʻtkazilganligi toʻgʻrisidagi talon qatʼiy hisobda turadigan blanka hisoblanadi, uni tayyorlash, saqlash, sarflash va hisobga olish belgilangan tartibda DYHXX organlari tomonidan amalga oshiriladi”;

p) 2-ilova matni quyidagi tahrirda bayon etilsin:

r) 5-ilova matni quyidagi tahrirda bayon etilsin: