Transport vositalarini majburiy texnik ko‘rikdan o‘tkazish samaradorligini oshirishni ta’minlash maqsadida Vazirlar Mahkamasi qaror qiladi:

1. O‘zbekiston Respublikasi Prezidentining “Yo‘l harakati xavfsizligini ta’minlash tizimini yanada takomillashtirish chora-tadbirlari to‘g‘risida” 2017-yil 11-iyuldagi PQ-3127-son qarorida 2018-yil 1-yanvardan boshlab, O‘zbekiston Respublikasi Ichki ishlar vazirligi Davlat yo‘l harakati xavfsizligi xizmati bo‘linmalarining jismoniy shaxslarga tegishli yengil avtotransport vositalarini (keyingi o‘rinlarda jismoniy shaxslarga tegishli yengil avtotransport vositalari deb ataladi), yuk, yo‘lovchi va maxsus transport vositalari bundan mustasno, majburiy texnik ko‘rikdan o‘tkazish bo‘yicha funksiyalarini yuridik shaxslar — tadbirkorlik subyektlariga ular ko‘rsatadigan xizmatlar uchun qat’iy narxlar hamda ichki ishlar organlari bilan o‘zaro hamkorlikka oid talablarni belgilagan holda bosqichma-bosqich o‘tkazish nazarda tutilganligi ma’lumot uchun qabul qilinsin.

2. Belgilansinki:

2018-yil 1-yanvardan boshlab transport vositalarini majburiy texnik ko‘rikdan o‘tkazishda jismoniy shaxslarga tegishli yengil avtotransport vositalarining texnik holati tadbirkorlik subyektlari — yuridik shaxslar tomonidan ham tekshirilishi mumkin;

2021-yil 1-yanvardan boshlab jismoniy shaxslarga tegishli yengil avtotransport vositalari tadbirkorlik subyektlari — yuridik shaxslar tomonidan majburiy texnik ko‘rikdan o‘tkaziladi.

3. Vazirlar Mahkamasining “Transport vositalarini majburiy texnik ko‘rikdan o‘tkazish tartibi to‘g‘risidagi nizomni tasdiqlash haqida” 2003-yil 31-yanvardagi 54-son qaroriga (O‘zbekiston Respublikasi QT, 2003-y., 1-son, 12-modda) 2018-yilning 1-yanvaridan boshlab ilovaga muvofiq o‘zgartirish va qo‘shimchalar kiritilsin.

4. O‘zbekiston Respublikasi Ichki ishlar vazirligi:

2018-yil 15-yanvargacha bo‘lgan muddatda O‘zbekiston Respublikasi Moliya vazirligi bilan birgalikda transport vositasining toifasini hisobga olib hamda yuridik va jismoniy shaxslar uchun alohida tabaqalashtirilgan to‘lov stavkalari miqdorlarini joriy etishni nazarda tutgan holda, transport vositalarini majburiy texnik ko‘rikdan o‘tkazish uchun undiriladigan to‘lov stavkalari miqdorlarini qayta ko‘rib chiqsin;

tadbirkorlik subyektlari — yuridik shaxslar tomonidan jismoniy shaxslarga tegishli yengil avtotransport vositalarining texnik holatini tekshirish amaliyoti va samaradorligining doimiy monitoringini va har tomonlama tahlil qilib borilishini ta’minlasin;

monitoring va tahlil natijalari bo‘yicha, shuningdek, O‘zbekiston Respublikasi Ichki ishlar vazirligi Davlat yo‘l harakati xavfsizligi xizmati bo‘linmalarining jismoniy shaxslarga tegishli yengil avtotransport vositalarini majburiy texnik ko‘rikdan o‘tkazish bo‘yicha funksiyalari tadbirkorlik subyektlari — yuridik shaxslarga o‘tkazilishini hisobga olgan holda, 2018-yil 1-oktabrga qadar muddatda transport vositalarini texnik ko‘rikdan o‘tkazish tartibini yanada takomillashtirish bo‘yicha takliflar kiritsin;

mazkur qarorning maqsadi va mazmuni, shu jumladan jismoniy shaxslarga tegishli yengil avtotransport vositalarining texnik holatini tekshirish tartibini ommaviy axborot vositalarida keng yoritishni tashkil qilsin;

manfaatdor vazirlik va idoralar bilan birgalikda ular tomonidan qabul qilingan normativ-huquqiy hujjatlarni bir oy muddatda ushbu qarorga muvofiqlashtirsin.

5. Qoraqalpog‘iston Respublikasi Vazirlar Kengashi, viloyatlar va Toshkent shahri hokimliklari hududiy moliya organlari bilan kelishgan holda tadbirkorlik subyektlari — yuridik shaxslarning jismoniy shaxslarga tegishli yengil avtotransport vositalarining texnik holatini tekshirish bo‘yicha xizmatlari uchun to‘lovlarning cheklangan miqdorlarini bir oy muddatda tasdiqlasin.

6. Mazkur qarorning bajarilishini nazorat qilish O‘zbekiston Respublikasi Ichki ishlar vaziri P.R. Bobojonov zimmasiga yuklansin.

1. Muqaddimadagi “Qonunining 13-moddasini” so‘zlari “Qonunini” so‘zi bilan almashtirilsin.

2. Ilovada:

a) 1-banddagi “Qonunining 13-moddasiga muvofiq ishlab chiqilgan va” so‘zlari “Qonuniga muvofiq” so‘zlari bilan almashtirilsin;

b) 2-bandga quyidagi mazmundagi ikkinchi — to‘rtinchi xatboshilar qo‘shilsin:

“Transport vositalarining texnik holati va uskunalarining muvofiqligini baholash uchun DYHXX organlari tomonidan tashkiliy-huquqiy shakllaridan qat’i nazar, vazirliklar va idoralarning, boshqa tashkilotlarning, shuningdek, xususiy texnik xizmat ko‘rsatish stansiyalari (keyingi o‘rinlarda TXS deb ataladi) shartnoma asosida jalb etilishi mumkin.

Jismoniy shaxslarga tegishli M1 toifadagi transport vositalarining texnik reglamentlar yoki standartlar talablariga, yo‘l harakati xavfsizligi qoidalari, normalariga muvofiqligi tadbirkorlik subyektlari — yuridik shaxslar (keyingi o‘rinlarda Subyektlar deb ataladi) tomonidan ham baholanishi mumkin.

Bunda jismoniy shaxslar — M1 toifadagi transport vositalari egalari o‘z transport vositasining texnik holati va uskunalari muvofiqligini baholash uchun o‘z tanloviga ko‘ra, DYHXX organlari, TXS yoki Subyektlarga murojaat qilishlari mumkin”;

v) 5-bandda:

oltinchi xatboshi chiqarib tashlansin;

quyidagi mazmundagi “d” va “e” kichik bandlar qo‘shilsin:

“d) navbatdagi texnik ko‘rikdan o‘tkazishning ilgari o‘rnatilgan muddatlaridan qat’i nazar, ularni DYHXX organlarida ro‘yxatdan o‘tkazish (qayta ro‘yxatdan o‘tkazish) vaqtida;

e) ular ishlab chiqarilgan yildan qat’i nazar, DYHXX organlarida ro‘yxatdan o‘tkazilgan (qayta ro‘yxatdan o‘tkazilgan) kundan boshlab bir yil o‘tgach (mazkur bandning “a” kichik bandida ko‘rsatilgan holatlar bundan mustasno)”;

d) 7-band quyidagi tahrirda bayon etilsin:

“7. Transport vositalari DYHXX organlari tomonidan texnik ko‘rikdan o‘tkazilganligi uchun O‘zbekiston Respublikasi Ichki ishlar vazirligi tomonidan Moliya vazirligi bilan kelishilgan holda tasdiqlanadigan miqdorlarda yig‘im undiriladi.

Birinchi (oldingi) texnik ko‘rikda nosoz deb topilgan transport vositalari takroriy texnik ko‘rikdan o‘tkazilganligi uchun belgilangan miqdorlarda yig‘im undiriladi.

Texnik ko‘rik o‘tkazilganligi uchun yig‘im summasi tegishli mahalliy budjetga o‘tkaziladi”;

e) II bo‘lim quyidagi tahrirda bayon etilsin:

“II. Jismoniy shaxslarga tegishli transport vositalarining texnik holatini tekshirishni tashkil etish va o‘tkazish tartibi

8. Jismoniy shaxslarga tegishli transport vositalarining texnik holatini tekshirish:

DYHXXning diagnostika stansiyalari;

TXS;

Subyektlar (yo‘lovchilar tashish uchun mo‘ljallangan va haydovchi o‘rnidan tashqari o‘tirish uchun sakkiztadan ko‘p bo‘lmagan o‘rindiqlarga ega M1 toifadagi transport vositalari) tomonidan amalga oshirilishi mumkin.

Bunda TXS va Subyektlar ko‘rsatiladigan xizmatlar uchun qat’iy belgilangan narxlarni belgilashlari va DYHXX organlari bilan hamkorlik qilishlari zarur.

9. Jismoniy shaxslarga tegishli transport vositalarining texnik holatini tekshirish uchun DYHXXning diagnostika stansiyalari, TXS va Subyektlar O‘zbekiston standartlashtirish, metrologiya va sertifikatlashtirish agentligi tomonidan belgilangan tartibda akkreditatsiyadan o‘tkazilgan, transport vositalarining texnik holatini tekshirishni tashkil etish va o‘tkazish uchun zarur texnologik jihozlar bilan ta’minlangan ishlab chiqarish-texnik bazasiga ega bo‘lishi zarur.

10. Jismoniy shaxslarga tegishli M1 toifadagi transport vositalarining texnik holatini tekshirish uchun Subyektlarning ishlab chiqarish-texnik bazasi:

a) quyidagilarga muvofiq bo‘lishi zarur:

M1 toifadagi transport vositalarining texnik holatini tekshirish uchun — O‘zbekiston Respublikasi Vazirlar Mahkamasi tomonidan tasdiqlanadigan avtotransport vositalari konstruksiyasining foydalanish shartlari bo‘yicha xavfsizligiga qo‘yiladigan talablarga;

avtotransport vositalariga o‘rnatilgan gaz ballon uskunalari ulanmalarining germetikligi va ishonchliligini sinovdan o‘tkazish va ularning ballonlarini tekshirish uchun — O‘zbekiston Respublikasi Vazirlar Mahkamasi tomonidan tasdiqlanadigan siqilgan i tabiiy gazda (keyingi o‘rinlarda STG deb ataladi), suyultirilgan neft gazida (keyingi o‘rinlarda SNG deb ataladi) yoki dizel va gazsimon yoqilg‘i aralashmasida ishlaydigan transport vositalarining xavfsizligiga qo‘yiladigan talablarga;

b) zarur texnik diagnostika vositalariga ega bo‘lishi lozim, shu jumladan:

o‘qiga tushadigan maksimal og‘irlik 3500 kg gacha bo‘lgan transport vositalarining tormoz tizimini tekshirish uchun tormoz tizimining texnik diagnostika vositalariga;

pnevmatik va pnevmogidravlik tormoz uzatmalarida siqilgan havo bosimi va germetiklikni (bosim tushishini) nazorat qilish vositalariga;

tirkamalarni ulash moslamasining bosib turish qurilmasiga;

rul boshqaruvdagi umumiy lyuftini o‘lchash priboriga;

rul boshqaruvi va podveskasi detallaridagi lyuftlarni tekshirish testeriga;

chiroqlar yorug‘ligini boshqarishni va kuchini nazorat qilish priboriga;

shinalarni texnik diagnostika qilish vositalariga;

gazanalizatori — uchqundan o‘t oldirish dvigatellariga ega transport vositalarining ishlab bo‘lingan gazlarida ifloslantiruvchi moddalarning mavjudligini aniqlash pribori;

tutun o‘lchash pribori — siqilishdan o‘t oldirish dvigatellariga ega transport vositalarining ishlab bo‘lingan gazlarida tutunni aniqlash pribori;

dvigatel aylanish chastotasi va moy haroratini o‘lchash priboriga;

shovqin o‘lchash priboriga;

oynalarning yorug‘lik o‘tkazishini tekshirish priboriga;

kompressorga;

qinchali manometrga;

zarur kompyuter texnikasiga.

Ayrim texnik diagnostika vositalari xavfsiz foydalanish bo‘yicha talablarga muvofiq bo‘lish sharti asosida universial texnik vositalar bilan almashtirilishi mumkin.

Qo‘llaniladigan barcha o‘lchov vositalari tasdiqlangan tipda bo‘lishi, qonun hujjatlariga muvofiq tekshiruvdan o‘tgan bo‘lishi zarur.

DYHXXning diagnostika stansiyalari va TXSning ishlab chiqarish-texnik bazasi tekshirilayotgan transport vositasining toifasiga ko‘ra (M1, M2, M3, №1, №2, №3) mazkur band talablariga muvofiq bo‘lishi kerak.

11. Ishlab chiqarish-texnik bazaning maydoni, texnik diagnostika vositalarining soni va xususiyatlari, mehnat va atrof-muhitni muhofaza qilishga oid talablar qonun hujjatlariga muvofiq belgilanadi.

12. Transport vositalarini tekshirishga tegishli mutaxassislikka ega bo‘lgan yoki diagnostika qilish texnologiyasi, diagnostika jihozlarining tuzilishi va ishlash prinsiplari, diagnostika vositalarini qo‘llagan holda texnik holatni tekshirish metodlari, mehnatni muhofaza qilish bo‘yicha talablarni o‘rgangan shaxslar qo‘yilishi mumkin.

13. Subyektlar jismoniy shaxslarga tegishli M1 toifadagi transport vositalarining texnik holatini tekshirishni o‘tkazish bo‘yicha faoliyatlarini boshlashdan oldin Qoraqalpog‘iston Respublikasi Ichki ishlar vazirligi, Toshkent shahar Ichki ishlar bosh boshqarmasi va viloyatlar ichki ishlar boshqarmalarining hududiy yo‘l harakati xavfsizligi boshqarmalarini (keyingi o‘rinlarda YHXB deb ataladi) yaratilgan sharoitlar mazkur Nizom talablariga muvofiqligi va ko‘rsatilgan faoliyatni amalga oshirishga tayyor ekanligi haqida yozma ravishda xabardor qilishlari shart.

Subyektning xatiga quyidagi hujjatlar ilova qilinadi:

Subyekt ustavining nusxasi;

avtotransport vositalarining texnik holatini tekshirishni tashkil etish va o‘tkazish uchun tegishli texnologik jihozlar bilan ta’minlangan ishlab chiqarish-texnik baza O‘zbekiston standartlashtirish, metrologiya va sertifikatlashtirish agentligi tomonidan berilgan akkreditatsiyadan o‘tkazilganligi haqidagi xulosa;

“Sanoatgeokontexnazorat” davlat inspeksiyasining avtotransport vositalariga o‘rnatiladigan ballonlarni texnik tekshirish bo‘yicha faoliyatni amalga oshirish huquqini beruvchi ruxsatnomasining nusxasi.

13¹. Hududiy YHXB Subyektning mazkur Nizomning 13-bandiga muvofiq taqdim etilgan xati qabul qilingan kundan boshlab uch ish kuni ichida uni o‘rganadi, Subyekt tomonidan taqdim etilgan hujjatlar to‘liqligini tekshiradi va ular mazkur Nizom talablariga muvofiq bo‘lgan taqdirda, Subyektni jismoniy shaxslarga tegishli M1 toifadagi transport vositalarining texnik holatini tekshirish uchun zarur sharoitlarga ega tadbirkorlik subyektlari — yuridik shaxslar hisobini yuritish reyestriga kiritadi hamda bu haqida ikki ish kuni ichida Subyektni xabardor qiladi.

O‘zbekiston Respublikasi Ichki ishlar vazirligining Yo‘l harakati xavfsizligi bosh boshqarmasi Subyekt xabardor qilingan paytdan boshlab 2 ish kuni ichida uni O‘zbekiston Respublikasi Ichki ishlar vazirligining Yo‘l harakati xavfsizligi bosh boshqarmasining rasmiy veb-saytiga joylashtiriladigan reyestrga kiritadi.

Reyestr aholini jismoniy shaxslarga tegishli M1 toifadagi transport vositalarining texnik holatini tekshirish uchun zarur sharoitlarga ega Subyektlar haqida xabardor qilish uchun yuritiladi.

13². Subyekt tomonidan mazkur Nizomning 13-bandida ko‘rsatilgan hujjatlar to‘liq taqdim etilmagan yoki taqdim etilgan hujjatlarda noto‘g‘ri yoki buzib ko‘rsatilgan ma’lumotlar mavjud bo‘lgan taqdirda hududiy YHXB 2 ish kuni ichida Subyektga yo‘l qo‘yilgan kamchiliklarni ko‘rsatgan holda xabar beradi.

Subyekt mazkur Nizomning 13-bandiga muvofiq hududiy YHXBga takroran xabarnoma yuborish yoki DYHXX mansabdor shaxslarining harakati (harakatsizligi) ustidan belgilangan tartibda shikoyat qilish huquqiga ega.

13³. Subyekt o‘zi yoki uning filiali ro‘yxatga olingan hududiy YHXB xizmat ko‘rsatadigan hududda ro‘yxatdan o‘tkazilgan jismoniy shaxslarga tegishli M1 toifadagi transport vositalarining texnik holatini tekshiradi.

Hududiy YHXB xizmat ko‘rsatadigan hududda ikki yoki undan ortiq Subyektlar mavjud bo‘lgan hollarda, Subyekt transport vositalari egalarining xohishiga ko‘ra tanlanadi.

13⁴. Jismoniy shaxslarga tegishli M1 toifadagi ro‘yxatdan o‘tgan transport vositalarining soni Subyektlar tomonidan tekshiriladigan transport vositalarining sonidan ko‘p bo‘lsa va buning natijasida transport vositasining texnik holati o‘z vaqtida tekshirilishini ta’minlash imkoni bo‘lmaydigan hududlarda boshqa transport vositalarining texnik holatini tekshirish joylari DYHXX organi tomonidan mazkur Nizomning 28, 29 va 33-bandlariga muvofiq belgilanadi.

13⁵. M1 toifadagi transport vositalarining texnik holatini tekshirish uchun texnik ko‘rikdan oldin uning egasi — jismoniy shaxs yoki u tomonidan vakil qilingan shaxs (keyingi o‘rinlarda arizachi ataladi) reyestrga kiritilgan Subyekt xodimiga (operatoriga) murojaat qiladi, transport vositasini va quyidagi hujjatlarni taqdim etadi:

texnik ko‘rikdan o‘tkazish uchun taqdim etilgan transport vositaning turi uchun nazarda tutilgan, tegishli toifadagi transport vositasini boshqarish huquqini beruvchi haydovchilik guvohnomasi;

transport vositasining ro‘yxatdan o‘tkazilganligi to‘g‘risidagi guvohnoma (texnik pasport, texnik talon);

gaz yoqilg‘isida ishlashga qayta jihozlangan transport vositasiga o‘rnatilgan gaz ballonining sertifikatlashtirish organi tomonidan berilgan muvofiqlik sertifikati nusxasi.

Transport vositasi taqdim etilgan hujjatlarda ko‘rsatilgan ma’lumotlarga muvofiq bo‘lgan taqdirda va u identifikatsiya qilingandan keyin mazkur transport vositasining texnik holatini tekshirishga ruxsat etiladi.

13⁶. Subyektning transport vositasi texnik holatini tekshirish xizmatlari uchun mazkur xizmatni ko‘rsatadigan Subyekt tomonidan tasdiqlangan, biroq Qoraqalpog‘iston Respublikasi Vazirlar Kengashi, viloyatlar va Toshkent shahri hokimlari tomonidan Qoraqalpog‘iston Respublikasi Moliya vazirligi, viloyatlar va Toshkent shahar moliya bosh boshqarmalari bilan kelishgan holda belgilanadigan cheklangan miqdorlardan oshmaydigan tariflar bo‘yicha haq to‘lanadi.

13⁷. Transport vositasining texnik holati Subyekt xodimi (operatori) tomonidan mazkur Nizomning VI bo‘limida nazarda tutilgan tartibda tekshiriladi.

Avtotransport vositalariga o‘rnatilgan STG va SNG tizimlarining germetikligi hamda agregatlari va uzellari (opressovka) ulangan joylarning ishonchliligi Subyekt tomonidan O‘zbekiston Respublikasi Vazirlar Mahkamasi tomonidan tasdiqlangan Siqilgan tabiiy gazda, suyultirilgan neft gazida yoki dizel va gazsimon yoqilg‘i aralashmasida ishlaydigan transport vositalarining xavfsizligi to‘g‘risidagi umumiy texnik reglamentga muvofiq sinovdan o‘tkaziladi.

13⁸. Tekshiruvdan o‘tgan va texnik soz deb topilgan har bir transport vositasiga Subyekt va TXS tomonidan mazkur Nizomga 2-ilovaga muvofiq shaklda uning texnik holati haqida ma’lumotnoma rasmiylashtiriladi va beriladi.

13⁹. Transport vositasini texnik ko‘rikdan o‘tkazish uchun taqdim etgan avtotransport egasi tomonidan qonun hujjatlari buzilgan (ko‘rsatilgan hujjatlarni, agregatlarning identifikatsiya raqamlarini soxtalashtirish va boshq.) holatlar aniqlangan taqdirda, Subyekt vakili bu haqida darhol DYHXX organlariga xabar berishi shart.

13¹⁰. Transport vositasining texnik holatini tekshirishda huquqbuzarliklarga yo‘l qo‘ygan Subyektlarga nisbatan qonun hujjatlariga muvofiq javobgarlik choralari qo‘llaniladi.

13¹¹. Subyekt qayta tashkil etilganda, uning nomi yoki joylashgan joyi (pochta manzili) o‘zgargan hollarda Subyekt yoki uning huquqiy vorisi (merosxo‘ri) qayta ro‘yxatdan o‘tkazilgandan so‘ng yetti ish kuni ichida hududiy YHXBni ko‘rsatilgan ma’lumotlarni tasdiqlovchi hujjatlarni ilova qilgan holda xabardor qilishi shart.

14. Subyekt yoki TXS tomonidan jismoniy shaxslarga tegishli M1 toifadagi transport vositasining texnik holati haqida berilgan ma’lumotnoma berilgan kundan boshlab o‘n kun ichida haqiqiy hisoblanadi va DYHXX organlarida transport vositalari texnik holatini tekshirmasdan, ularning texnik ko‘rikdan o‘tkazish natijalarini rasmiylashtirish uchun asos bo‘lib xizmat qiladi”.

j) 18-bandning ikkinchi xatboshidagi “avtomototransport vositalarining texnik holati, ulardan foydalanish normalari va qoidalariga rioya etilishini nazorat qilish” so‘zlari “yo‘l harakati xavfsizligi” so‘zlari bilan almashtirilsin;

z) 27-bandda:

ikkinchi xatboshi quyidagi tahrirda bayon etilsin:

“Texnik ko‘rikni bir tekis o‘tkazish maqsadida DYHXX organlari jadvallar tuzishi va 1-yanvardan 31-avgustgacha bo‘lgan davrda transport vositalari egalari tomonidan transport vositalarini navbatdagi texnik ko‘rikdan o‘tkazish uchun taqdim etishning aniq sanalari (oylari)ni belgilashi mumkin”;

quyidagi mazmundagi uchinchi xatboshi qo‘shilsin:

“Transport vositalari egalari transport vositalarini navbatdagi texnik ko‘rikka DYHXX organlari tomonidan belgilangan muddatdan kechiktirmay taqdim etishlari shart”;

i) 28-band quyidagi tahrirda bayon etilsin:

“28. Texnik ko‘rik transport vositalari ro‘yxatdan o‘tkazadigan (vaqtincha ro‘yxatdan o‘tkazadigan) joydagi:

TXSda;

DYHXX diagnostika stansiyalarida (jismoniy shaxslarga tegishli M1 toifadagi transport vositalarining texnik holati mazkur Nizomning 134-bandi talablariga rioya etilgan holda baholanishi lozim);

DYHXX organlari tomonidan belgilangan texnik nazorat postlarida;

transport vositalarining texnik holatini tekshirish uchun zarur shart-sharoitlarga ega bo‘lgan jamoaviy garaj hududida, avtomobillar to‘xtash joylarida;

Subyektlar tomonidan (jismoniy shaxslarga tegishli M1 toifadagi transport vositalari) o‘tkaziladi”;

k) 30-bandning to‘qqizinchi xatboshidagi “texnik ko‘rikdan o‘tkazish shoxobchasining” so‘zlari “TXS va Subyektning” so‘zlari bilan almashtirilsin;

l) 31-banddagi “ro‘yxatdan o‘tkazish guvohnomasiga (texnik pasportga, talonga)” so‘zlari “texnik ko‘rikdan o‘tkazilganligi to‘g‘risidagi talonga” so‘zlari bilan almashtirilsin;

m) 33-band quyidagi tahrirda bayon etilsin:

“33. Transport vositalari texnik ko‘rikdan o‘tkazishga DYHXX organlari tomonidan ko‘rsatilgan joyga qo‘yilishi lozim (Subyektlar tomonidan jismoniy shaxslarga tegishli M1 toifadagi transport vositalarining texnik holatini baholash hollari bundan mustasno)”;

n) 37-bandda:

ikkinchi xatboshidagi “ro‘yxatdan o‘tkazish guvohnomasiga (texnik pasportga, talonga)” so‘zlari “texnik ko‘rikdan o‘tkazilganligi to‘g‘risidagi talonga” so‘zlari bilan almashtirilsin;

to‘rtinchi xatboshi chiqarib tashlansin;

beshinchi xatboshi to‘rtinchi xatboshi deb hisoblansin;

o) 46-bandning birinchi xatboshi quyidagi tahrirda bayon etilsin:

“Texnik ko‘rikdan o‘tkazilganligi to‘g‘risidagi talon qat’iy hisobda turadigan blanka hisoblanadi, uni tayyorlash, saqlash, sarflash va hisobga olish belgilangan tartibda DYHXX organlari tomonidan amalga oshiriladi”;

p) 2-ilova matni quyidagi tahrirda bayon etilsin:

r) 5-ilova matni quyidagi tahrirda bayon etilsin: