Oʻzbekiston Respublikasi Prezidentining “Axborot-kommunikatsiya texnologiyalari sohasidagi loyihalarni boshqarish tizimini yanada takomillashtirish chora-tadbirlari toʻgʻrisida” 2017-yil 29-avgustdagi PQ-3245-son qaroriga muvofiq, shuningdek, Samarqand shahrida hodisa va favqulodda vaziyatlarga shoshilinch chora koʻrilishini taʼminlash sohasida axborot tizimlarini joriy etish maqsadida Vazirlar Mahkamasi qaror qiladi:

1. Oʻzbekiston Respublikasi Axborot texnologiyalari va kommunikatsiyalarini rivojlantirish vazirligining “Xavfsiz shahar” yagona apparat-dasturiy kompleksi loyihasini amalga oshirish doirasida Samarqand shahrida shoshilinch operativ xizmatlarning muqobil telefon raqamlaridan foydalanish imkoniyatini saqlab qolgan holda “112” yagona raqami (keyingi oʻrinlarda — “112” tizimi deb ataladi) orqali shoshilinch operativ xizmatlarni chaqirish tizimini joriy etish tajriba loyihasini amalga oshirish toʻgʻrisidagi taklifi maʼqullansin.

2. Quyidagilar “112” tizimini tashkil etishning asosiy yoʻnalishlari etib belgilansin:

Samarqand shahridagi shoshilinch operativ xizmatlarning navbatchi-dispetcherlik boʻlinmalari oʻrtasida yaqindan axborot almashinuvi boʻyicha mustahkam hamkorlikni taʼminlash;

odamlarning hayoti va sogʻligʻiga xavf tugʻilganda, yongʻinlarda, yoʻl-transport hodisalarida, jamoat tartibi buzilganda hamda avariya, baxtsiz hodisalarda va favqulodda vaziyatlarda darhol xabardor qilish va shoshilinch operativ xizmatlarning muvofiqlashtirilgan choralari koʻrilishini taʼminlash;

baxtsiz hodisalar va favqulodda vaziyatlar roʻy berganda fuqarolarga konsultativ va psixologik yordam koʻrsatish, ularning murojaatlarini koʻrib chiqishda shaffoflikni taʼminlash hamda shoshilinch operativ xizmatlarning oʻz vaqtida chora koʻrishi yuzasidan tizimli nazorat yuritish.

3. Belgilansinki, chaqiruv “112” tizimi orqali taʼminlanadigan shoshilinch operativ xizmatlarga quyidagi boʻlinmalar kiradi:

ichki ishlar organlarining yongʻin xavfsizligi xizmatlari;

ichki ishlar organlarining jamoat tartibini saqlash, tartibbuzarliklarni profilaktika qilish va jinoyatlarga qarshi kurashish boʻlinmalari;

shoshilinch tibbiy yordam xizmatlari;

gaz tarmoqlarining avariya xizmati;

Oʻzbekiston Respublikasi Favqulodda vaziyatlar vazirligining qutqaruv xizmatlari.

4. Samarqand shahrining yagona dispetcherlik xizmati (keyingi oʻrinlarda — dispetcherlik xizmati deb ataladi) Oʻzbekiston Respublikasi Axborot texnologiyalari va kommunikatsiyalarini rivojlantirish vazirligining Axborot xavfsizligi va jamoat tartibini taʼminlashga koʻmaklashish markazining filiali shaklida Axborot texnologiyalari va kommunikatsiyalarini rivojlantirish vazirligining Axborot-texnologiyalarini rivojlantirish jamgʻarmasi mablagʻlari hisobidan moliyalashtiriladigan 22 nafar shtat birligi bilan tashkil etilsin.

Oʻzbekiston Respublikasi Axborot texnologiyalari va kommunikatsiyalarini rivojlantirish vaziriga, Oʻzbekiston Respublikasi Moliya vazirligi bilan kelishgan holda, kelib tushayotgan xabarlar va murojaatlarni hisobga olib dispetcherlik xizmatining belgilangan shtatlar soniga oʻzgartirishlar kiritish huquqi berilsin.

5. Quyidagilar:

“112” yagona raqami orqali shoshilinch operativ xizmatlarni chaqirish tizimini joriy qilish tajriba loyihasini Samarqand shahrida amalga oshirish boʻyicha chora-tadbirlar dasturi 1-ilovaga* muvofiq;

“112” yagona raqami orqali shoshilinch operativ xizmatlarni chaqirishlarga xizmat koʻrsatish va ularning idoralararo oʻzaro hamkorlik qilish sxemasi chizmalari 2 va 3-ilovalarga* muvofiq tasdiqlansin.

6. Belgilansinki, kelib tushayotgan xabarlarni saqlash va ularni ishlash, shoshilinch operativ xizmat chaqiruvlari toʻgʻrisidagi maʼlumotlarni qayd etish, shuningdek, ular oʻrtasidagi idoralararo hamkorlikni taʼminlash boʻyicha “112” tizimi faoliyati Samarqand shahridagi “Oʻzbektelekom” AKning texnik uskunalari bazasida, “112” tizimining kichik tizimlari faoliyati esa — har bir shoshilinch operativ xizmatlarning texnik uskunalari bazasida tashkil etiladi.

7. Oʻzbekiston Respublikasi Axborot texnologiyalari va kommunikatsiyalarini rivojlantirish vazirligi Ichki ishlar vazirligi, Sogʻliqni saqlash vazirligi, Favqulodda vaziyatlar vazirligi va “Oʻztransgaz” AJ bilan birgalikda:

ikki hafta muddatda — Samarqand shahrida “112” tizimi faoliyatini tashkil etish boʻyicha aniq vazifalar biriktirilgan va faoliyati tartibini belgilagan holda idoralararo ishchi guruh tashkil qilsin;

ikki oy muddatda — “112” yagona raqami orqali shoshilinch operativ xizmatlar chaqirilishini taʼminlash tizimi toʻgʻrisidagi nizomning tasdiqlanishini nazarda tutuvchi Hukumat qarori loyihasini ishlab chiqsin va Oʻzbekiston Respublikasi Vazirlar Mahkamasiga kiritsin.

8. Oʻzbekiston Respublikasi Ichki ishlar vazirligi, Sogʻliqni saqlash vazirligi, Favqulodda vaziyatlar vazirligi va “Oʻztransgaz” AJ rahbarlari zimmasiga quyidagilar yuzasidan shaxsan javobgarlik yuklansin:

“112” tizimini joriy etish mobaynida xabarlarni, shu jumladan elektron tarzdagi xabarlarni qabul qilish va ularni ishlash jarayonlarini avtomatlashtirish;

oʻz axborot-kommunikatsiya resurslarini “112” yagona tizimi bilan samarali integratsiyalash;

shoshilinch operativ xizmatlar navbatchi-dispetcherlik boʻlinmalarining “112” tizimi bilan mustahkam hamkorlik qilishini amalga oshirish.

9. Oʻzbekiston Respublikasi Axborot texnologiyalari va kommunikatsiyalarini rivojlantirish vazirligi:

bir oy muddatda — Samarqand shahrining yagona dispetcherlik xizmati tuzilmasi uning aniq vazifalari va funksional majburiyatlarini belgilagan holda tasdiqlasin;

uch oy muddatda — Samarqand shahri yagona dispetcherlik xizmatining toʻlaqonli faoliyatini taʼminlash uchun, faoliyatining xususiyatini hisobga olgan holda, uni joylashtirish, jihozlash va boshqa tashkiliy masalalarni hal qilish choralarini koʻrsin;

Oʻzbekiston Respublikasi Ichki ishlar vazirligi, Sogʻliqni saqlash vazirligi, Favqulodda vaziyatlar vazirligi va “Oʻztransgaz” AJga normativ va loyiha-texnik hujjatlarni ishlab chiqishda hamda Samarqand shahrining shoshilinch operativ xizmatlarining navbatchi-dispetcherlik boʻlinmalarini zarur moddiy-texnik baza bilan taʼminlashda, shuningdek, ularning yaqindan hamkorlik qilishida va “112” tizimini joriy etish loyihasining amalga oshirilishi doirasida xodimlarni oʻqitishda amaliy yordam koʻrsatsin;

2018-yil yakunlari boʻyicha “112” tizimi tajribasini, uning Samarqand shahridagi faoliyati tahlilini hisobga olgan holda, kelgusida respublikaning boshqa mintaqalarida ham qoʻllash toʻgʻrisida takliflar kiritsin.

10. Belgilansinki, ushbu qarorning ijrosi bilan bogʻliq xarajatlar Axborot texnologiyalari va kommunikatsiyalarini rivojlantirish vazirligining Axborot-kommunikatsiya texnologiyalarini rivojlantirish jamgʻarmasi mablagʻlari hamda qonunchilikda taqiqlanmagan boshqa manbalar hisobiga amalga oshiriladi.

11. Oʻzbekiston Respublikasi Bosh prokuraturasiga “112” tizimiga kelib tushayotgan xabarlar uning oʻz vaqtida qabul qilinishi va ularning bajarilishi yuzasidan tegishli qonun buzilishlari aniqlangan holatlarda qonunchilikda nazarda tutilgan choralar koʻrish, ularning monitoringini olib borish tavsiya etilsin.

12. Mazkur qarorning bajarilishini nazorat qilish Oʻzbekiston Respublikasi Bosh vazirining birinchi oʻrinbosari — “Oʻzbekiston temir yoʻllari” AJ boshqaruvi raisi A.J. Ramatov hamda Oʻzbekiston Respublikasi Axborot texnologiyalari va kommunikatsiyalarini rivojlantirish vaziri vazifasini bajaruvchi Sh.X. Shermatov zimmasiga yuklansin.