Oʻzbekiston Respublikasi Prezidentining “Respublika davlat boshqaruvi organlari tizimini takomillashtirish toʻgʻrisida” 2003-yil 9-dekabrdagi PF-3358-son Farmonini bajarish va oʻrta maxsus, kasb-hunar taʼlimi tizimini yanada takomillashtirish maqsadida Vazirlar Mahkamasi qaror qiladi:

1. Quyidagilar Oʻzbekiston Respublikasi Oliy va oʻrta maxsus taʼlim vazirligi Oʻrta maxsus, kasb-hunar taʼlimi markazining asosiy vazifalari etib belgilansin:

oʻrta maxsus, kasb-hunar taʼlimi sohasida keng koʻlamli chuqur bilimlarga ega boʻlgan, hozirgi bozor sharoitlarida muayyan kasb-hunarni va ish koʻnikmalarini egallagan yoshlarni tayyorlashga yoʻnaltirilgan yagona davlat siyosatini amalga oshirish;

Kadrlar tayyorlash milliy dasturida belgilangan oʻrta maxsus, kasb-hunar taʼlimi sohasida uzluksiz taʼlimning maqsadli vazifalari va ustuvor yoʻnalishlarini roʻyobga chiqarish boʻyicha chora-tadbirlar kompleksini amalga oshirish;

akademik litseylar va kasb-hunar kollejlari oʻquv jarayoniga yangi pedagogika va axborot texnologiyalarini, shuningdek oʻquvchilarni milliy mustaqillik gʻoyalari, boy intellektual meros hamda umuminsoniy qadriyatlar asosida maʼnaviy-axloqiy tarbiyalashning samarali shakllari va metodlarini joriy etish;

taʼlim darajasini va kasb-hunar mutaxassislarini tayyorlash sifatini oshirishga yoʻnaltirilgan oʻrta maxsus, kasb-hunar taʼlimi davlat taʼlim standartlarini hamda oʻquv dasturlarini takomillashtirish;

akademik litseylar va kasb-hunar kollejlari uchun oʻquv va oʻquv-metodik adabiyotlar yaratilishi va nashr qilinishini tashkil etish;

oʻrta maxsus, kasb-hunar taʼlimi taʼlim muassasalari pedagog kadrlarining kasb darajasini oshirish va ularning mehnatini ragʻbatlantirish ishlarini tashkil etish.

2. Oʻzbekiston Respublikasi Oliy va oʻrta maxsus taʼlim vazirligi, Oʻrta maxsus, kasb-hunar taʼlimi markazining Markaz huzurida Oʻrta maxsus, kasb-hunar taʼlimini rivojlantirish instituti negizida Oʻrta maxsus, kasb-hunar taʼlimi tizimi kadrlari malakasini oshirish va ularni qayta tayyorlash institutini tashkil etish toʻgʻrisidagi taklifi qabul qilinsin.

Oʻzbekiston Respublikasi Oliy va oʻrta maxsus taʼlim vazirligi Moliya vazirligi, Mehnat va aholini ijtimoiy muhofaza qilish vazirligi bilan birgalikda 2004-yil 25-avgustgacha Oʻrta maxsus, kasb-hunar taʼlimi tizimi kadrlari malakasini oshirish va ularni qayta tayyorlash instituti Ustavini, tuzilmasini va shtat jadvalini belgilangan tartibda tasdiqlasin.

3. Quyidagilar:

Oʻzbekiston Respublikasi Oliy va oʻrta maxsus taʼlim vazirligi Oʻrta maxsus, kasb-hunar taʼlimi markazining tashkiliy tuzilmasi hamda uning xodimlarning cheklangan umumiy soni 79 nafar, shu jumladan boshqaruv xodimlari soni 58 nafar boʻlgan markaziy apparati tuzilmasi 1 va 2-ilovalarga muvofiq;

hududiy oʻrta maxsus, kasb-hunar taʼlimi boshqarmalarining namunaviy tuzilmasi va apparati xodimlarining cheklangan soni 3 va 3a-ilovalarga muvofiq;

Oʻzbekiston Respublikasi Oliy va oʻrta maxsus taʼlim vazirligining Oʻrta maxsus, kasb-hunar taʼlimi markazi toʻgʻrisidagi nizom 4-ilovaga muvofiq tasdiqlansin.

Oʻzbekiston Respublikasi Oliy va oʻrta maxsus taʼlim vazirligining Oʻrta maxsus, kasb-hunar taʼlimi markazi direktoriga, zarurat boʻlganda, Markazning markaziy apparati tuzilmasiga xodimlarning belgilangan cheklangan umumiy soni doirasida oʻzgartirishlar kiritish huquqi berilsin.

4. Vazirlar Mahkamasining “Vazirlar Mahkamasining “Viloyatlar va Toshkent shahar hokimliklari apparati tuzilmasini takomillashtirish toʻgʻrisida” 1997-yil 17-iyundagi 301-son qaroriga oʻzgartirishlar kiritish haqida” 1998-yil 26-fevraldagi 82-son qarori oʻz kuchini yoʻqotgan deb hisoblansin.

5. Vazirlar Mahkamasining 5-ilovaga muvofiq qarorlariga oʻzgartirish va qoʻshimchalar kiritilsin.

6. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari A.A. Azizxoʻjayev zimmasiga yuklansin.

1. Oʻzbekiston Respublikasi Oliy va oʻrta maxsus taʼlim vazirligining Oʻrta maxsus, kasb-hunar taʼlimi markazi (keyingi oʻrinlarda Markaz deb ataladi) oʻrta maxsus, kasb-hunar taʼlimi sohasidagi davlat boshqaruv organi hisoblanadi hamda oʻz faoliyati toʻgʻrisida Oʻzbekiston Respublikasi Vazirlar Mahkamasiga hisob beradi.

2. Markaz tizimiga hududiy oʻrta maxsus, kasb-hunar taʼlimi boshqarmalari, Oʻrta maxsus, kasb-hunar taʼlimi tizimi kadrlarining malakasini oshirish va ularni qayta tayyorlash instituti, shuningdek Markazga qarashli akademik litseylar va kasb-hunar kollejlari kiradi.

Hududiy oʻrta maxsus, kasb-hunar taʼlimi boshqarmalari ikki tomonlama boʻysunishda boʻladilar va Markazga hamda tegishli ravishda Qoraqalpogʻiston Respublikasi Vazirlar Kengashiga va mahalliy davlat hokimiyati organlariga hisob beradilar.

3. Markaz oʻz faoliyatida Oʻzbekiston Respublikasi Konstitutsiyasiga va qonunlariga, Oʻzbekiston Respublikasi Oliy Majlisi qarorlariga va boshqa hujjatlariga, Oʻzbekiston Respublikasi Prezidentining farmonlari, qarorlari va farmoyishlariga, Oʻzbekiston Respublikasi Vazirlar Mahkamasi qarorlari va farmoyishlariga, Kadrlar tayyorlash milliy dasturiga, shuningdek ushbu Nizomga amal qiladi.

4. Markaz oʻz faoliyatini davlat boshqaruvi boshqa organlari, mahalliy davlat hokimiyati organlari, jamoat birlashmalari va boshqa tashkilotlar bilan oʻzaro hamkorlikda amalga oshiradi.

5. Markaz va hududiy oʻrta maxsus, kasb-hunar taʼlimi boshqarmalari moddiy-texnika taʼminoti, shuningdek Markaz tizimi xodimlari mehnatiga haq toʻlash Markazga ajratiladigan mablagʻlar doirasida davlat budjeti mablagʻlari va qonun hujjatlarida taqiqlanmagan boshqa manbalar hisobiga amalga oshiriladi.

6. Markaz, hududiy oʻrta maxsus, kasb-hunar taʼlimi boshqarmalari, Markaz tasarrufidagi boshqa muassasalar yuridik shaxs hisoblanadilar, Oʻzbekiston Respublikasi Davlat gerbi tasviri tushirilgan va oʻz nomi yozilgan muhrga ega boʻladilar.

7. Quyidagilar Markazning asosiy vazifalari hisoblanadi:

oʻrta maxsus, kasb-hunar taʼlimi sohasida keng koʻlamli chuqur bilimlarga ega boʻlgan, hozirgi bozor sharoitlarida muayyan kasb-hunarni va ish koʻnikmalarini egallagan yoshlarni tayyorlashga yoʻnaltirilgan yagona davlat siyosatini amalga oshirish;

Kadrlar tayyorlash milliy dasturida belgilangan oʻrta maxsus, kasb-hunar taʼlimi sohasida uzluksiz taʼlimning maqsadli vazifalari va ustuvor yoʻnalishlarini roʻyobga chiqarish boʻyicha chora-tadbirlar kompleksini amalga oshirish;

akademik litseylar va kasb-hunar kollejlari oʻquv jarayoniga yangi pedagogika va axborot texnologiyalarini, shuningdek oʻquvchilarni milliy mustaqillik gʻoyalari, boy intellektual meros hamda umuminsoniy qadriyatlar asosida maʼnaviy-axloqiy tarbiyalashning samarali shakllari va metodlarini joriy etish;

taʼlim darajasini va kasb-hunar mutaxassislarini tayyorlash sifatini oshirishga yoʻnaltirilgan oʻrta maxsus, kasb-hunar taʼlimi davlat taʼlim standartlarini hamda oʻquv dasturlarini takomillashtirish;

akademik litseylar va kasb-hunar kollejlari uchun oʻquv va oʻquv-metodik adabiyotlar yaratilishi va nashr qilinishini tashkil etish;

oʻrta maxsus, kasb-hunar taʼlimi taʼlim muassasalari pedagog kadrlarining kasb darajasini oshirish va ularning mehnatini ragʻbatlantirish ishlarini tashkil etish.

8. Markaz oʻziga yuklangan vazifalarni bajarish uchun quyidagi funksiyalarni amalga oshiradi:

Kadrlar tayyorlash milliy dasturi va “Taʼlim toʻgʻrisida”gi Oʻzbekiston Respublikasi Qonunining bajarilishi monitoringini amalga oshiradi;

manfaatdor vazirliklar, davlat qoʻmitalari va idoralar bilan birgalikda Kadrlar tayyorlash milliy dasturining maqsadi, vazifalari va yoʻnalishlarini amalga oshirishga qaratilgan oʻrta maxsus, kasb-hunar taʼlimi tizimini rivojlantirish va takomillashtirishning ilmiy asoslangan prognozlarini ishlab chiqadi;

akademik litseylar va kasb-hunar kollejlari turlari va yoʻnalishlarini belgilaydi, mintaqalarning geografik, demografik va ijtimoiy-iqtisodiy xususiyatlarini hisobga olgan holda ularni oqilona joylashtirilishini taʼminlaydi;

akademik litseylarni loyihalashtirish va qurish boʻyicha bosh pudratchi sifatida ish koʻradi, kasb-hunar kollejlarining loyihalashtirilishiga, qurilishiga va rekonstruksiya qilinishiga metodik rahbarlik qiladi va texnik jihatdan koʻmaklashadi;

oʻrta maxsus, kasb-hunar taʼlimi davlat standarti, oʻquv rejalari va dasturlarining joriy etilishini va takomillashtirilishini taʼminlaydi;

taʼlim oluvchilarning yakuniy davlat attestatsiyasi toʻgʻrisidagi nizomni tasdiqlaydi;

oʻrta maxsus, kasb-hunar taʼlimi muassasalari uchun oʻquv va oʻquv-metodik adabiyotlarni yaratish va nashr etish chora-tadbirlarini koʻradi;

taʼlim va ilmiy-tadqiqot muassasalarining, oʻquv-pedagogika markazlari va kabinetlarining pedagoglar jamoalarini oʻquv-metodik materiallar va darsliklarni ishlab chiqishga, yangi pedagogik texnologiyalarni, oʻrta maxsus, kasb-hunar taʼlimi muassasalarida oʻquv-tarbiya jarayonini tashkil etishga istiqbolli yondashuvlarni ishlab chiqishga keng jalb etishni taʼminlaydi;

oʻrta maxsus, kasb-hunar taʼlimi muassasalariga taʼlim yoʻnalishlari boʻyicha oʻquvchilar qabul qilish tartibi va sifat koʻrsatkichlari toʻgʻrisida Vazirlar Mahkamasiga belgilangan tartibda takliflar kiritadi;

oʻsib kelayotgan avlodni maʼnaviy-ahloqiy tarbiyalashning milliy mustaqillik gʻoyalariga, boy milliy madaniy-tarixiy anʼanalarga, xalq urf-odatlariga va umuminsoniy qadriyatlarga asoslangan samarali tashkiliy hamda pedagogik shakl va vositalarini joriy qiladi, shaxsni tarbiyalash va har tomonlama kamol toptirish ustuvorligini taʼminlaydi;

oʻrta maxsus, kasb-hunar taʼlimi taʼlim muassasalarida yoshlarning ilmiy-texnik ijodiyotini rivojlantiradi va uning samaradorligini oshiradi;

oʻrta maxsus, kasb-hunar taʼlimi muassasalarida jismoniy tarbiya va sportni rivojlantirish uchun shart-sharoitlar yaratish chora-tadbirlarini taʼminlaydi;

yetim bolalar hamda ota-onalar qarovisiz qolgan bolalarning markazlashtirilgan hisobini olib borishda vasiylik va homiylik organlariga metodik yordam koʻrsatadi va koʻmaklashadi;

kasb-hunar kollejlaridagi taʼlim jarayonini ishlab chiqarish va tadbirkorlar bilan integratsiyalashni chuqurlashtirish boʻyicha chora-tadbirlar kompleksini ishlab chiqadi va joriy etadi;

akademik litseylar va kasb-hunar kollejlarining pedagog va muhandis-pedagog kadrlarga boʻlgan ehtiyojini oʻrganadi va ularning butlanishini taʼminlaydi;

kasaba uyushmalari, jamoat tashkilotlari, davlat boshqaruvi manfaatdor organlari bilan birgalikda oʻrta maxsus, kasb-hunar taʼlimi tizimi oʻquvchilari va xodimlarining mehnatini muhofaza qilish, sogʻligʻini hamda oʻqishi va mehnati uchun xavfsiz shart-sharoitlarni taʼminlash boʻyicha chora-tadbirlar kompleksini ishlab chiqadi va amalga oshiradi;

pedagog xodimlarni ragʻbatlantirish va ularning mehnatiga haq toʻlash tizimini takomillashtirishga doir takliflar tayyorlaydi;

oʻrta maxsus, kasb-hunar taʼlimi tizimi pedagog xodimlarini Hukumat mukofotlariga taqdim etadi;

Markaz tasarrufidagi oʻrta maxsus, kasb-hunar taʼlimi muassasalarining direktorlarini tanlov orqali tanlashni tashkil etadi, kelishish uchun Vazirlar Mahkamasiga taqdim etadi va belgilangan tartibda tayinlaydi;

manfaatdor respublika davlat boshqaruvi organlari va mahalliy davlat hokimiyati organlari ishtirokida deviant xulq-atvorli, jismoniy va aqliy rivojlanishi zaif oʻsmirlarning taʼlim olishi, rivojlanishdagi nuqsonini tuzatish va ijtimoiy moslashtirish ishlarini tashkil etadi;

oʻrta maxsus, kasb-hunar taʼlimi muassasalarini jihozlashning normativ talablarini ishlab chiqadi, Markaz tizimidagi muassasalar va tashkilotlarda moddiy-texnika resurslaridan samarali foydalanilishini taʼminlaydi;

oʻrta maxsus, kasb-hunar taʼlimi sohasida xalqaro hamkorlikni amalga oshiradi, xorijiy investitsiyalarni akademik litseylar va kasb-hunar kollejlarini rivojlantirishga va ularning faoliyatini takomillashtirishga jalb etish ishlarini olib boradi;

mamlakatimiz va xorijiy moliya institutlarining kreditlari, qarzlari va grantlaridan maqsadli va samarali foydalanilishini taʼminlaydi;

oʻrta maxsus, kasb-hunar taʼlimini takomillashtirish muammolari boʻyicha kengashlar, simpoziumlar, seminarlar, oʻquv-metodik konferensiyalar, tanlovlar, koʻrgazmalar va boshqa tadbirlarni tashkil etadi.

9. Markaz oʻziga yuklangan vazifalar va funksiyalarni bevosita, shuningdek hududiy oʻrta maxsus, kasb-hunar taʼlimi boshqarmalari va Markazga qarashli boshqa muassasalar orqali hal etadi.

10. Markaz oʻziga yuklangan vazifalar va funksiyalarni bajarish uchun quyidagi huquqlarga ega:

tegishli vazirliklar va idoralardan, Markazning hududiy boʻlinmalaridan statistika maʼlumotlarini va prognoz koʻrsatkichlarini olish;

oʻrta maxsus, kasb-hunar taʼlimining ayrim masalalarini hal etish, akademik litseylar va kasb-hunar kollejlari ishini takomillashtirish, ularning oʻquv-moddiy bazasini mustahkamlash, malakali pedagog kadrlar tayyorlash, davlat taʼlim muassasalari xodimlari va oʻquvchilarning belgilangan ijtimoiy muhofazasini taʼminlash boʻyicha takliflarni koʻrib chiqish uchun Oʻzbekiston Respublikasi Vazirlar Mahkamasiga kiritish;

mulkchilik shakllari va boʻysunishidan qatʼi nazar, akademik litseylar va kasb-hunar kollejlari tomonidan “Taʼlim toʻgʻrisida”gi Oʻzbekiston Respublikasi Qonuni, Kadrlar tayyorlash milliy dasturi va oʻrta maxsus, kasb-hunar taʼlimi masalalari boʻyicha boshqa qonun hujjatlari bajarilishini belgilangan tartibda tekshirish;

oʻquv dasturlari, darsliklar va oʻquv qoʻllanmalari hamda metodik materiallar toʻgʻrisida xulosalar tayyorlash, pedagogika fani yutuqlari va ilgʻor tajribadan foydalanish boʻyicha tavsiyalarni ishlab chiqish maqsadida ilmiy metodik kengash tashkil etish, metodik kengash tarkibini va uning toʻgʻrisidagi nizomni tasdiqlash;

idoraviy boʻysunishidan va mulkchilik shakllaridan qatʼi nazar, akademik litseylar va kasb-hunar kollejlarini tashkil etish, qayta tashkil etish va tugatish yuzasidan xulosalar berish;

xorijiy investitsiyalar hisobiga sotib olinadigan oʻquv-laboratoriya jihozlari qabul qilinishi va yetkazib berilishini taʼminlash;

bazaviy oliy taʼlim muassasalari tomonidan kasb-hunar kollejlari va akademik litseylar uchun malakali pedagoglar va muhandis-pedagog kadrlar tayyorlashni muvofiqlashtirishda va unga metodik rahbarlik qilishda qatnashish.

Markaz Oʻzbekiston Respublikasining amaldagi qonun hujjatlariga muvofiq boshqa huquqlarga ham ega boʻlishi mumkin.

11. Markaz oʻz vakolatlari doirasida vazirliklar, davlat qoʻmitalari, idoralar, mahalliy davlat hokimiyati organlari, korxonalar, muassasalar, tashkilotlar, mansabdor shaxslar va fuqarolar uchun bajarish majburiy boʻlgan normativ-huquqiy hujjatlarni tasdiqlashga haqlidir.

Markaz, zarur hollarda, boshqa vazirliklar, davlat qoʻmitalari va idoralar bilan birga qoʻshma qarorlar va boshqa hujjatlar chiqarishga haqlidir.

12. Markaz oʻrta maxsus, kasb-hunar taʼlimi sohasida davlat siyosati amalga oshirilishini taʼminlash, shuningdek oʻziga yuklangan vazifalarning zarur darajada bajarilishi uchun javob beradi.

13. Markazga Oʻzbekiston Respublikasi Prezidenti tomonidan lavozimga tayinlanadigan va lavozimdan ozod qilinadigan Oʻzbekiston Respublikasi Oliy va oʻrta maxsus taʼlim vazirining birinchi oʻrinbosari — direktor boshchilik qiladi.

Direktorning belgilangan tartibda Oʻzbekiston Respublikasi Vazirlar Mahkamasi tomonidan lavozimga tayinlanadigan va lavozimdan ozod qilinadigan ikki nafar oʻrinbosarlari, shu jumladan bir nafar birinchi oʻrinbosari boʻladi.

14. Direktor:

Markaz faoliyatiga yakka boshchilik asosida umumiy rahbarlikni amalga oshiradi;

Markaz vakolatiga kiruvchi masalalar boʻyicha qarorlar qabul qiladi hamda Markazga yuklangan vazifalar va funksiyalarning bajarilishi uchun shaxsan javob beradi;

oʻz oʻrinbosarlarining vakolatlarini belgilaydi, ular oʻrtasida vazifalarni taqsimlaydi, Markaz tizimidagi boshqa mansabdor shaxslarning vakolatlarini, oʻz oʻrinbosarlarining va boshqa mansabdor shaxslarning Markaz faoliyati alohida uchastkalariga rahbarligi va tasarrufidagi organlar va muassasalar ishlari uchun javobgarlik darajasini belgilaydi;

Markaz tizimi xodimlarining bajarishi majburiy boʻlgan buyruqlar chiqaradi va koʻrsatmalar beradi;

Markazning markaziy apparati tuzilmasiga oʻzgartirishlar kiritadi, xodimlarning belgilangan cheklangan umumiy soni doirasida shtat jadvalini, shuningdek Markaz markaziy apparatining hamda respublika budjetidan moliyalashtiriladigan tasarrufidagi muassasalarning xarajatlar smetasini tasdiqlaydi;

Markazning tarkibiy va hududiy boʻlinmalari toʻgʻrisidagi nizomlarni, Markaz tizimiga kiruvchi tasarrufidagi boshqa muassasalarning nizomlari (ustavlari)ni belgilangan tartibda tasdiqlaydi;

Markazning markaziy apparati xodimlarini, hududiy oʻrta maxsus, kasb-hunar taʼlimi boshqarmalari, Markaz tizimiga kiruvchi tasarrufidagi boshqa muassasalar rahbarlarini belgilangan tartibda lavozimga tayinlaydi va lavozimdan ozod qiladi.

Direktor qonun hujjatlariga muvofiq boshqa vakolatlarni amalga oshiradi.

15. Markazda direktor (hayʼat raisi), uning oʻrinbosarlari (lavozimiga koʻra), shuningdek Markaz faoliyatining asosiy yoʻnalishlarini muvofiqlashtiruvchi tarkibiy boʻlinmalari rahbarlaridan iborat tarkibda hayʼat tashkil etiladi.

Hayʼatning aʼzolari soni va shaxsiy tarkibi Markaz direktorining taqdimnomasiga binoan Oʻzbekiston Respublikasi Vazirlar Mahkamasi tomonidan tasdiqlanadi.

Hayʼat quyidagilar bilan bogʻliq masalalarni koʻrib chiqadi:

Markaz faoliyatining oʻrta maxsus, kasb-hunar taʼlimi sohasida keng koʻlamli chuqur bilimlarga ega boʻlgan, hozirgi bozor sharoitlarida muayyan kasb-hunarni va ish koʻnikmalarini egallagan yoshlarni tayyorlashga yoʻnaltirilgan yagona davlat siyosatini yanada amalga oshirish, Kadrlar tayyorlash milliy dasturida belgilangan oʻrta maxsus, kasb-hunar taʼlimi sohasida uzluksiz taʼlimning maqsadli vazifalari va ustuvor yoʻnalishlarini roʻyobga chiqarish boʻyicha chora-tadbirlar kompleksini amalga oshirish boʻyicha ushbu Nizomda belgilangan asosiy yoʻnalishlarini tayyorlash va amalga oshirish;

Oʻzbekiston Respublikasi Oliy va oʻrta maxsus taʼlim vazirligining Oʻrta maxsus, kasb-hunar taʼlimi markazi nomenklaturasiga kiradigan lavozimlarga kadrlarni tanlash, joy-joyiga qoʻyish, tayyorlash va qayta tayyorlash;

Oʻzbekiston Respublikasi Prezidentining farmonlari, qarorlari va farmoyishlarida, Oʻzbekiston Respublikasi Vazirlar Mahkamasi qarorlari va farmoyishlarida belgilangan vazifalarni amalga oshirish boʻyicha ijro intizomini mustahkamlash, ularning oʻz vaqtida va sifatli amalga oshirilishini taʼminlash uchun Markaz rahbarlari va xodimlarining shaxsiy javobgarligini oshirish.

Hayʼat Markaz vakolatiga taalluqli boshqa masalalarni ham koʻrib chiqish huquqiga ega.

Hayʼat majlisiga Markaz vakolatiga kiradigan masalalar boʻyicha boshqa vazirliklar, davlat qoʻmitalari, idoralar, mahalliy davlat hokimiyati organlari, korxonalar, muassasalar, tashkilotlar rahbarlari taklif etilishi mumkin.

Hayʼat uning majlisida tarkibining yarmidan koʻpi qatnashgan taqdirda vakolatli boʻladi. Koʻrib chiqilayotgan masalalar boʻyicha qarorlar oddiy koʻpchilik ovoz bilan qabul qilinadi.

Hayʼat qarorlari direktorning buyruqlari bilan amalga oshiriladi. Direktor va hayʼat aʼzolari oʻrtasida kelishmovchiliklar paydo boʻlgan taqdirda direktor paydo boʻlgan kelishmovchiliklar toʻgʻrisida Oʻzbekiston Respublikasi Vazirlar Mahkamasiga axborot bergan holda mustaqil ravishda qaror qabul qiladi. Hayʼat aʼzolari ham oʻz fikr-mulohazalarini Oʻzbekiston Respublikasi Vazirlar Mahkamasiga xabar qilishlari mumkin.

Hayʼat faoliyati tartibi uning hayʼat tasdiqlaydigan reglamentida belgilanadi.

16. Hududiy boshqarmalar, shuningdek Markaz tasarrufidagi muassasalar oʻz faoliyatini Qoraqalpogʻiston Respublikasi Vazirlar Kengashi va mahalliy davlat hokimiyati organlari bilan kelishgan holda Markaz tomonidan tasdiqlanadigan nizomlarga muvofiq amalga oshiradilar.

Hududiy oʻrta maxsus, kasb-hunar taʼlimi boshqarmalari boshliqlari tegishli ravishda Qoraqalpogʻiston Respublikasi Vazirlar Kengashi Raisi, viloyatlar va Toshkent shahar hokimlari taqdimnomasiga binoan Markaz direktori tomonidan lavozimga tayinlanadilar.

17. Markazni qayta tashkil etish va tugatish qonun hujjatlarida belgilangan tartibda amalga oshiriladi.

1. Vazirlar Mahkamasining “Akademik litseylar va kasb-hunar kollejlarini tashkil etish va ularning faoliyatini boshqarish toʻgʻrisida” 1998-yil 24-fevraldagi 77-son qarorida:

1-bandning ikkinchi—oʻn birinchi xatboshi, 4-bandning ikkinchi—sakkizinchi xatboshi chiqarib tashlansin;

3, 5-bandlar va qarorga 1, 1a, 2-ilovalar oʻz kuchini yoʻqotgan deb hisoblansin;

6-bandning ikkinchi xatboshidagi “Oʻzbekiston Respublikasi Oliy va oʻrta maxsus taʼlim vazirligi” soʻzlari “Oʻzbekiston Respublikasi Oliy va oʻrta maxsus taʼlim vazirligining Oʻrta maxsus, kasb-hunar taʼlimi markazi” soʻzlari bilan almashtirilsin.

2. Vazirlar Mahkamasining “Davlat va xoʻjalik boshqaruvi respublika organlarining boshqaruv xodimlari sonini maqbullashtirish va qisqartirish toʻgʻrisida” 2004-yil 5-yanvardagi 1-son qaroriga 2-ilova 17-bandining “Markaziy apparat” satrida toʻrtinchi va beshinchi ustunlardagi “5” va “10” raqamlari chiqarib tashlansin, oltinchi ustundagi “46” raqami “58” raqami bilan almashtirilsin.