Fuqarolar yigʻini masʼul kotibi faoliyatining samaradorligini oshirish, mahalla tizimida ish yuritishni tashkil etish va olib borishni yanada takomillashtirish maqsadida Vazirlar Mahkamasi qaror qiladi:

1. Fuqarolar yigʻinining masʼul kotibi faoliyatini tashkil etish toʻgʻrisida nizom ilovaga muvofiq tasdiqlansin.

2. Fuqarolarning oʻzini oʻzi boshqarish organlari faoliyatini muvofiqlashtirish boʻyicha respublika kengashi Qoraqalpogʻiston Respublikasi Vazirlar Kengashi, viloyatlar va Toshkent shahri hokimliklari, manfaatdor vazirliklar va idoralar bilan birgalikda:

bir oy muddatda fuqarolar yigʻinining masʼul kotiblari oʻz faoliyatini tasdiqlangan ushbu Nizom asosida tashkil etishiga koʻmaklashsin;

ikki oy muddatda fuqarolar yigʻinining masʼul kotiblari malakasini oshirishga doir oʻquv seminarlarini tashkil etsin.

3. Mazkur qarorning bajarilishini nazorat qilish Fuqarolarning oʻzini oʻzi boshqarish organlari faoliyatini muvofiqlashtirish boʻyicha respublika kengashi raisining birinchi oʻrinbosari Sh. Javlonov zimmasiga hamda Vazirlar Mahkamasining Taʼlim, ilm-fan va yoshlar siyosati axborot-tahlil departamentiga yuklansin.

1. Ushbu Nizom “Fuqarolarning oʻzini oʻzi boshqarish organlari toʻgʻrisida”gi Oʻzbekiston Respublikasi Qonuniga muvofiq fuqarolar yigʻini masʼul kotibining (keyingi oʻrinlarda masʼul kotib deb ataladi) asosiy vazifalari, huquq va majburiyatlari hamda uning faoliyatini tashkil etish tartibini belgilaydi.

2. Masʼul kotib oʻz faoliyatida Oʻzbekiston Respublikasi Konstitutsiyasi va qonunlariga, Oʻzbekiston Respublikasi Oliy Majlisining palatalari qarorlariga, Oʻzbekiston Respublikasi Prezidentining farmonlari, qarorlari va farmoyishlariga, Oʻzbekiston Respublikasi Vazirlar Mahkamasining qarorlari va farmoyishlariga, ushbu Nizomga va boshqa qonun hujjatlariga amal qiladi.

3. Masʼul kotib fuqarolar yigʻinida ish yuritishni ijro intizomiga qatʼiy rioya etgan holda zamonaviy axborot-kommunikatsiya texnologiyalaridan foydalanish asosida samarali amalga oshiradi.

4. Quyidagilar masʼul kotibning asosiy vazifalari hisoblanadi:

fuqarolar yigʻini kengashi aʼzolarini Oʻzbekiston Respublikasining Konstitutsiyasi va qonunlari, Oʻzbekiston Respublikasi Prezidentining farmonlari, qarorlari, farmoyishlari, Oʻzbekiston Respublikasi Vazirlar Mahkamasining qarorlari va farmoyishlari bilan muntazam tanishtirib borish;

fuqarolar yigʻini organlarida fuqarolar yigʻini faoliyatiga doir hujjatlarning yuritilishini nazorat qilish;

fuqarolar yigʻini (fuqarolar vakillarining yigʻilishi) va fuqarolar yigʻini kengashi majlisini oʻtkazishga doir materiallarni tayyorlash, fuqarolar yigʻini (fuqarolar vakillarining yigʻilishi) va fuqarolar yigʻini kengashi hamda fuqarolar yigʻini raisi (oqsoqoli) qarorlarini ijrochilarga oʻz vaqtida yetkazilishini taʼminlash;

fuqarolar yigʻini raisi (oqsoqoli)ning oʻrinbosarlari, yigʻin faoliyatining asosiy yoʻnalishlari boʻyicha komissiyalar hamda yigʻin huzuridagi taftish komissiyasida ish yuritishni tashkil etish va olib borishga uslubiy va amaliy yordam koʻrsatish;

fuqarolar yigʻini aʼzolariga oʻz huquqlari va qonuniy manfaatlariga daxldor boʻlgan hujjatlar, fuqarolar yigʻini kengashining qarorlari va boshqa materiallar bilan tanishib chiqish imkoniyatini yaratish;

fuqarolar yigʻiniga tushayotgan hujjatlar va murojaatlar, shu jumladan, jismoniy va yuridik shaxslarning murojaatlari bilan ishlash;

fuqarolar yigʻini faoliyatining asosiy yoʻnalishlari boʻyicha komissiyalarda kotiblik qilish;

bolali oilalarga nafaqalar, bola parvarishi boʻyicha nafaqalar va moddiy yordam tayinlash va toʻlash toʻgʻrisida hisobot tuzish hamda hisobotni belgilangan sanalarda tegishli davlat organlariga taqdim etish;

fuqarolar yigʻini qarorlari, bayonnomalari hamda fuqarolar yigʻini kengashi bayonnomalarini imzolash;

fuqarolar yigʻini hududida istiqomat qiluvchi oilalar roʻyxatini tuzish va ushbu oilalarda istiqomat qiluvchi fuqarolarni roʻyxatga olish daftariga va maxsus elektron dasturga kiritish hamda har oy yakuni boʻyicha roʻyxatni monitoring asosida yangilab turish.

Masʼul kotib qonun hujjatlariga muvofiq boshqa vazifalarni ham bajarishi mumkin.

5. Masʼul kotib ushbu Nizomda belgilangan vazifalarni amalga oshirishda quyidagi huquqlarga ega:

fuqarolar yigʻini raisi (oqsoqoli) topshirigʻi bilan fuqarolar yigʻini faoliyatiga aloqador boʻlgan zarur maʼlumotlarni boshqa tashkilotlardan soʻrash va olish;

bosma va elektron ommaviy axborot vositalarida oʻz vakolati doirasiga kiruvchi masalalar yuzasidan materiallar eʼlon qilish;

moddiy yordam va nafaqalar belgilashda ularga muhtoj boʻlgan oilalar toʻgʻrisida fuqarolar yigʻiniga yoki fuqarolar yigʻinining ijtimoiy qoʻllab-quvvatlash boʻyicha komissiyasiga takliflar kiritish;

fuqarolar yigʻinida ish yuritishni toʻgʻri tashkil qilish, ijro intizomi yuzasidan olib borilayotgan faoliyat samaradorligini oshirishga doir takliflarni fuqarolar yigʻini hamda fuqarolarning oʻzini oʻzi boshqarish organlari faoliyatini muvofiqlashtirish boʻyicha tuman (shahar) kengashiga kiritish;

fuqarolar yigʻini hududidagi ishsizlarni ishga joylashtirish, kasbga tayyorlash, qayta tayyorlash va malakasini oshirish uchun tuman (shahar) bandlikka koʻmaklashish markaziga yoʻllash haqida takliflar kiritish;

“Fuqarolarning oʻzini oʻzi boshqarish organlari toʻgʻrisida”gi Oʻzbekiston Respublikasi Qonuni talablari ijrosini taʼminlash yuzasidan oʻz vakolatlari doirasida fuqarolar yigʻini hamda fuqarolarning oʻzini oʻzi boshqarish organlari faoliyatini muvofiqlashtirish boʻyicha tuman (shahar) kengashiga takliflar kiritish;

ushbu Nizomda belgilangan vazifalarni bajarishda tegishli chora-tadbirlarni amalga oshirish boʻyicha fuqarolar yigʻini hamda fuqarolarning oʻzini oʻzi boshqarish organlari faoliyatini muvofiqlashtirish boʻyicha tuman (shahar) kengashiga takliflar kiritish;

fuqarolar yigʻini hududida istiqomat qiluvchi fuqarolar oʻrtasidagi turli nizolarni hal etishda, huquqbuzarlik sodir etgan shaxslarni muhokama qilishda, noqonuniy xatti-harakatlar sodir etishga moyil shaxslar bilan maʼnaviy-axloqiy tarbiya mavzusida suhbatlar oʻtkazish chogʻida bevosita ishtirok etib oʻz fikr va mulohazalarini bildirish;

oʻz vazifalarining samarali bajarilishini taʼminlash maqsadida fuqarolar yigʻini kengashi aʼzolariga, fuqarolarning oʻzini oʻzi boshqarish organlari faoliyatini muvofiqlashtirish boʻyicha tuman (shahar) kengashiga murojaat qilish;

fuqarolar yigʻini hamda fuqarolarning oʻzini oʻzi boshqarish organlari faoliyatini muvofiqlashtirish boʻyicha tuman (shahar) kengashiga yigʻin organlari faoliyatini samarali tashkil etishga doir takliflar kiritish.

Masʼul kotib oʻz vazifalarini bajarishda qonun hujjatlariga muvofiq boshqa huquqlarga ham ega boʻlishi mumkin.

6. Masʼul kotibning majburiyatlari quyidagilardan iborat:

masʼul kotib faoliyatiga doir tegishli hujjatlarni belgilangan tartibda yuritish;

fuqarolar yigʻini organlarida hujjatlar yuritilishi, hujjatlar ijrosi, ichki mehnat intizomi tartibi va fuqarolar yigʻini faoliyatini tartibga solishga qaratilgan boshqa hujjatlar yuritilishini nazorat qilish;

boʻsh va yangi tashkil etilgan ish oʻrinlari toʻgʻrisida tuman (shahar) bandlikka koʻmaklashish markazidan olingan maʼlumotlar fuqarolar yigʻini binosida muntazam eʼlon qilinishini taʼminlash;

zimmasiga yuklangan vazifalarning amalga oshirilishini tartibga solishga doir qonun hujjatlari talablariga fuqarolar yigʻini aʼzolari tomonidan rioya qilinmagan hollarda fuqarolar yigʻini va uning faoliyatining asosiy yoʻnalishlari boʻyicha komissiyalar, davlat organlari, nodavlat notijorat tashkilotlari va boshqa tashkilotlar bilan birgalikda tegishli tarbiyaviy taʼsir choralarini koʻrish, tushuntirish ishlarini tashkil etish boʻyicha fuqarolar yigʻini raisi hamda fuqarolarning oʻzini oʻzi boshqarish organlari faoliyatini muvofiqlashtirish boʻyicha tuman (shahar) kengashi raisining birinchi oʻrinbosariga takliflar kiritish, ushbu chora-tadbirlarning amalga oshirilishiga koʻmaklashadi.

Masʼul kotib qonun hujjatlariga muvofiq boshqa majburiyatlarni ham bajarishi mumkin.

7. Masʼul kotib oʻziga yuklangan vazifalarni bajarishida fuqarolar yigʻini hamda fuqarolarning oʻzini oʻzi boshqarish organlari faoliyatini muvofiqlashtirish boʻyicha tuman (shahar) kengashiga hisobot beradi.

8. Masʼul kotib fuqarolar yigʻini raisi (oqsoqoli)ning taqdimiga koʻra fuqarolar yigʻini tomonidan tasdiqlanadi.

Masʼul kotib fuqarolar yigʻini kengashi tarkibiga kiritiladi.

Masʼul kotib lavozimiga nomzodlar Oʻzbekiston Respublikasi fuqarolari boʻlishi, qoida tariqasida, oliy maʼlumotga ega boʻlgan, bevosita tayinlangungacha kamida besh yil tegishli hududda doimiy yashayotgan boʻlishi, tashkilotchilik qobiliyatiga, davlat organlarida va tashkilotlarida yoki nodavlat notijorat tashkilotlarida ish tajribasiga, shuningdek, hayotiy tajribaga va aholi oʻrtasida obroʻ-eʼtiborga ega boʻlishi kerak.

9. Quyidagilar masʼul kotib lavozimiga tayinlanmaydi:

Oʻzbekiston Respublikasining fuqarosi boʻlmagan shaxslar;

oʻz turmush tarzi bilan fuqarolar yigʻini aʼzolari oʻrtasida salbiy tavsiflangan shaxslar;

ichki ishlar organlari profilaktik hisobida turuvchi shaxslar;

ruhiy kasalligi, giyohvandlikka, surunkali ichkilikbozlikka ruju qoʻyganligi uchun tegishli tibbiyot muassasalari hisobida turuvchi shaxslar;

ogʻir yoki oʻta ogʻir jinoyatlarni sodir etganlik uchun sudlanganlik holati tugallanmagan yoxud sudlanganligi olib tashlanmagan shaxslar;

sud tomonidan muomalaga layoqatsiz deb topilgan shaxslar;

haqiqiy harbiy xizmatdagi shaxslar;

diniy tashkilotlarning professional xizmatchilari.

10. Masʼul kotibning vakolatlari quyidagi hollarda muddatdan ilgari tugatiladi:

oʻz vakolatlarini zimmasidan soqit qilganda;

belgilangan tartibda muomalaga layoqatsiz deb topilganda;

unga nisbatan sudning ayblov hukmi qonuniy kuchga kirganda;

sudning qonuniy kuchga kirgan hal qiluv qarori asosida bedarak yoʻqolgan deb topilgan yoxud vafot etgan deb eʼlon qilinganda;

Oʻzbekiston Respublikasi fuqaroligini yoʻqotganda;

sogʻligʻi holati yoki boshqa uzrli sabablarga koʻra uch oy davomida oʻz vazifalarini bajara olmay qolganda;

vafot etganda;

qonun hujjatlarda nazarda tutilgan boshqa hollarda.

11. Davlat organlari masʼul kotibning ushbu Nizomda belgilangan faoliyatini amalga oshirishi uchun zarur shart-sharoitlar yaratishda, shuningdek, qonun hujjatlarida belgilangan vakolatlarni amalga oshirishida koʻmaklashadi.

12. Masʼul kotib faoliyatini fuqarolar yigʻini raisi (oqsoqoli) muvofiqlashtiradi.

Fuqarolarning oʻzini oʻzi boshqarish organlari faoliyatini muvofiqlashtirish boʻyicha tuman (shahar) kengashi masʼul kotib faoliyatini samarali tashkil etishiga uslubiy va amaliy koʻmaklashadi.

13. Masʼul kotib fuqarolar yigʻinining oʻz mablagʻlari va qonun hujjatlarida nazarda tutilgan tartibda mahalliy budjet mablagʻlari hisobidan taʼminlanadi.

14. Fuqarolarning oʻzini oʻzi boshqarish organlari faoliyatini muvofiqlashtirish boʻyicha respublika kengashi, uning Qoraqalpogʻiston Respublikasi, viloyatlar, tumanlar va shaharlardagi hududiy kengashlari tomonidan masʼul kotibning faoliyatini yoʻnaltirish hamda uslubiy va amaliy yordam koʻrsatish ishlari tashkil etiladi.

15. Masʼul kotibning faoliyatini oʻrganish, tahlil qilish, aniqlangan kamchiliklarni bartaraf etish, faoliyatini takomillashtirish va uni ragʻbatlantirish haqidagi masala Fuqarolarning oʻzini oʻzi boshqarish organlari faoliyatini muvofiqlashtirish boʻyicha respublika kengashi hamda uning Qoraqalpogʻiston Respublikasi, viloyatlar, tumanlar va shaharlardagi hududiy kengashlari tomonidan har yili kamida bir marta muhokama etib boriladi.

16. Masʼul kotibni ushbu Nizomda koʻrsatilmagan vazifalarni bajarishga jalb etish taqiqlanadi.

17. Ushbu Nizom talablari buzilishida aybdor boʻlgan shaxslar qonun hujjatlarida belgilangan tartibda javob beradilar.