O‘zbekiston Respublikasi Prezidentining “Sobiq O‘zbekiston Qishloq xo‘jaligi fanlari akademiyasining haqiqiy a’zolari va muxbir a’zolarini rag‘batlantirish chora-tadbirlari to‘g‘risida” 2017-yil 10-avgustdagi PF-5146-son Farmoniga muvofiq, sobiq O‘zbekiston Qishloq xo‘jaligi fanlari akademiyasining haqiqiy a’zolari va muxbir a’zolarining salomatligini mustahkamlash va ularni ijtimoiy qo‘llab-quvvatlashni yanada kuchaytirish maqsadida Vazirlar Mahkamasi qaror qiladi:

1. Sobiq O‘zbekiston Qishloq xo‘jaligi fanlari akademiyasining haqiqiy a’zolari va muxbir a’zolarining salomatligini sanatoriy-sog‘lomlashtirish hamda kurort-sog‘lomlashtirish muassasalarida mustahkamlash tartibi to‘g‘risidagi nizom 1-ilovaga muvofiq tasdiqlansin.

3. O‘zbekiston Respublikasi Qishloq va suv xo‘jaligi vazirligi, manfaatdor vazirliklar va idoralar o‘zlari qabul qilgan normativ-huquqiy hujjatlarni bir oy muddatda ushbu qarorga muvofiqlashtirsinlar.

4. Mazkur qarorning bajarilishini nazorat qilish Vazirlar Mahkamasining Qishloq va suv xo‘jaligi, qishloq xo‘jaligi mahsulotlarini qayta ishlash hamda iste’mol tovarlari masalalari, Ta’lim, ilm-fan va yoshlar siyosati masalalari hamda Sog‘liqni saqlash, ekologiya, atrof muhitni muhofaza qilish, jismoniy tarbiya va sport masalalari axborot tahlil departamentlariga yuklansin.

1. Mazkur Nizom O‘zbekiston Respublikasi Prezidentining “Sobiq O‘zbekiston Qishloq xo‘jaligi fanlari akademiyasining haqiqiy a’zolari va muxbir a’zolarini rag‘batlantirish chora-tadbirlari to‘g‘risida” 2017-yil 10-avgustdagi PF-5146-son Farmoniga muvofiq sobiq O‘zbekiston Qishloq xo‘jaligi fanlari akademiyasining haqiqiy a’zolari va muxbir a’zolari (keyingi o‘rinlarda Akademiya a’zolari deb ataladi) va ularning kuzatuvchilari salomatligini sanatoriy-sog‘lomlashtirish va kurort-sog‘lomlashtirish muassasalarida mustahkamlash tartibini, shu jumladan ularni sog‘lomlashtirish shart-sharoitlari va muddatlarini, yo‘llanmalarni ajratish va moliyalashtirish tartibini belgilaydi.

2. O‘zbekiston Respublikasi Prezidentining “Sobiq O‘zbekiston Qishloq xo‘jaligi fanlari akademiyasining haqiqiy a’zolari va muxbir a’zolarini rag‘batlantirish chora-tadbirlari to‘g‘risida” 2017-yil 10-avgustdagi PF-5146-son Farmoniga muvofiq, Akademiya a’zolari bir nafar kuzatuvchi bilan birga yiliga bir marta o‘zlari uchun maqbul bo‘lgan muddatda O‘zbekiston Respublikasi Sog‘liqni saqlash vazirligi, O‘zbekiston Kasaba uyushmalari Federatsiyasi, davlat va xo‘jalik boshqaruvi organlariga qarashli sanatoriy-sog‘lomlashtirish muassasalarida hamda Yalta va Kislovodsk shaharlaridagi “O‘zbekiston” kurort-sog‘lomlashtirish aksiyadorlik jamiyatining sanatoriylarida (keyingi o‘rinlarda sanatoriylar deb ataladi) sog‘lomlashtirish kursidan bepul foydalanish huquqiga ega.

Kuzatuvchi sifatida birinchi navbatda Akademiya a’zolarining yaqin qarindoshlari bo‘lishi mumkin. Agar yaqin qarindoshlari bo‘lmasa, sog‘lomlashtirish kursidan o‘tuvchi Akademiya a’zosi tomonidan Qishloq xo‘jaligida bilim va innovatsiyalar milliy markazi (keyingi o‘rinlarda Markaz deb ataladi) bilan kelishilgan holda taklif etilgan shaxs kuzatuvchi bo‘lishi mumkin.

3. Akademiya a’zolari hamda ularning kuzatuvchilarini sanatoriylarga yuborish ushbu Nizomning 1-ilovasidagi sxemaga muvofiq amalga oshiriladi.

4. Akademiya a’zolari hamda ularning kuzatuvchi shaxslari sanatoriylarda sog‘lomlashtirish kursini Akademiya a’zolari tomonidan o‘zlariga maqbul bo‘lgan muddatlarni ko‘rsatgan holda berilgan arizalarga asosan Vazirlar Mahkamasi tomonidan har yili tasdiqlanadigan yo‘llanmalarni taqsimlash rejasiga muvofiq o‘taydilar.

5. Akademiya a’zolari keyingi yilga sanatoriyga yo‘llanma olish uchun har yili 1-sentabrgacha Markazga quyidagi hujjatlarni taqdim etadilar:

ushbu Nizomning 2-ilovasida keltirilgan shakl bo‘yicha ariza;

pasport nusxasi;

O‘zbekiston Qishloq xo‘jaligi fanlari akademiyasining haqiqiy a’zoligini yoki muxbir a’zoligini tasdiqlovchi guvohnoma nusxasi;

kuzatuvchining shaxsini tasdiqlovchi hujjat;

Markazga taqdim etilgan hujjatlar ushbu Nizomning 3-ilovasiga muvofiq “Yo‘llanmalar so‘rab yozilgan arizalarni ro‘yxatga olish daftari”da ro‘yxatdan o‘tkaziladi.

6. Yo‘llanma unda ko‘rsatilgan muddatda haqiqiy hisoblanadi.

Akademiya a’zolari salomatligining holatiga yoki boshqa asosli sabablarga ko‘ra yo‘llanmadan belgilangan muddatda foydalanish imkoniyatiga ega bo‘lmagan taqdirda, yo‘llanmaning amal qilish muddati tugashidan kamida ikki hafta oldin Markazga murojaat qilib, yo‘llanma muddatini yil yakuniga qadar o‘zgartirishlari mumkin. Yo‘llanmada ko‘rsatilgan muddatlarni kalendar yil mobaynida ikki martadan ortiq ko‘chirishga yo‘l qo‘yilmaydi.

7. Markaz salomatlikni tiklash muddati ko‘rsatilgan holda ariza bergan shaxslar ro‘yxatini shakllantiradi va har yili 10-sentabrgacha O‘zbekiston Respublikasi Sog‘liqni saqlash vazirligiga taqdim etadi.

8. O‘zbekiston Respublikasi Sog‘liqni saqlash vazirligi Markaz tomonidan taqdim etilgan ro‘yxatni olgandan keyin uni besh ish kuni mobaynida Akademiya a’zolarining doimiy yashash yoki vaqtincha turgan joyidagi tibbiyot muassasalariga yetkazadi.

9. Tibbiyot muassasalari taqdim etilgan ro‘yxatlar bo‘yicha bir oy muddatda Akademiya a’zolarini bepul dispanserizatsiyadan o‘tkazadilar va uning natijalariga ko‘ra sanatoriyda sog‘lomlashtirishning zarur yo‘nalishini aniqlaydilar.

10. Akademiya a’zolarini dispanserizatsiyadan o‘tkazish natijalari asosida uning tibbiy kartasida sanatoriyda sog‘lomlashtirishning zarur yo‘nalishi va zid ko‘rsatmalar (ular mavjud bo‘lganda) ko‘rsatilgan holda tegishli yozuv qayd etiladi.

11. Tibbiy kartadagi yozuv asosida tibbiyot muassasasi Akademiya a’zolariga belgilangan shakldagi sanatoriy-kurort kartasini rasmiylashtiradi va ushbu karta yo‘llanma olish uchun asos hisoblanadi.

Zarurat bo‘lganda, Akademiya a’zolarining salomatligida o‘zgarishlar yuz bergan taqdirda sanatoriy-kurort kartasiga tuzatishlar kiritilishi mumkin.

12. O‘zbekiston Respublikasi Sog‘liqni saqlash vazirligi:

tibbiyot muassasalaridan har yili 25-oktabrgacha dispanserizatsiyadan o‘tgan Akademiya a’zolarining sog‘lomlashtirish yo‘nalishlarini va sanatoriylar nomlarini ko‘rsatgan holda tuzilgan ro‘yxatini oladi;

besh ish kuni mobaynida ro‘yxatni Markazga taqdim etadi.

13. Tibbiyot muassasasi rahbari Akademiya a’zolarini dispanserizatsiyadan o‘tkazishning belgilangan muddatlarida ta’minlanishi, shuningdek, tibbiy va sanatoriy-kurort kartasida sog‘lomlashtirishning zarur yo‘nalishi to‘g‘risidagi yozuvlarning haqqoniyligi uchun shaxsan javob beradi.

14. Markaz O‘zbekiston Respublikasi Sog‘liqni saqlash vazirligi taqdim etgan ro‘yxat asosida har bir sanatoriy bo‘yicha kelgusi yil uchun yo‘llanmalarni taqsimlash rejasini ishlab chiqadi va sanatoriylarning yuqori turuvchi vazirliklari, idoralari va tashkilotlari bilan kelishilgan holda 15-noyabrgacha Vazirlar Mahkamasiga tasdiqlash uchun kiritadi.

15. Markaz yo‘llanmalarni taqsimlash rejasi tasdiqlangandan so‘ng uni o‘n ish kuni mobaynida sanatoriylarga yetkazadi, yo‘llanmalarni rasmiylashtiradi va ularni Akademiya a’zolariga yetkazilishini ta’minlaydi.

Zarurat bo‘lganda, yil mobaynida yo‘llanmalarni taqsimlash rejasiga asosli sabablardan (tibbiy ko‘rsatma, rad etilishi va boshqa asosli sabablar) kelib chiqqan holda, o‘zgartirishlar kiritilishi mumkin. O‘zgartirishlar Markaz tomonidan tegishli sanatoriylarning yuqori turuvchi vazirliklari, idoralari va tashkilotlari bilan kelishilgan holda kiritiladi.

Bunda Markaz har oyning 30-sanasiga qadar sanatoriylar tomonidan o‘rinlar ajratishi uchun tuzatishlar kiritilgan parametrlarni sanatoriylarga yetkazadi.

16. Yo‘llanmalar bosmaxona usulida bosilgan, tartib raqamiga ega bo‘lgan maxsus blankalarda va Akademiya a’zosi uchun yo‘llanma” so‘zlari yozilgan tegishli shtamp bilan tasdiqlanadi hamda ularda qaytarma talon bo‘lishi shart.

17. Markaz qonunchilikda belgilangan tartibda yo‘llanmalar reyestrini yuritadi.

18. Markaz yo‘llanmalarni taqsimlash rejasiga muvofiq har yili 15-yanvargacha sanatoriylar bilan Akademiya a’zolarini sog‘lomlashtirish yuzasidan shartnomalar tuzadi.

19. Sanatoriylar tuzilgan shartnomalarga muvofiq Akademiya a’zolari hamda ularning kuzatuvchi shaxslarini qabul qilinishini ta’minlaydilar.

20. Sanatoriylar rahbarlari tuzilgan shartnomalar shartlari to‘liq bajarilishiga, shuningdek ko‘rsatiladigan xizmatlar sifati uchun shaxsan mas’uldirlar.

21. Akademiya a’zolari hamda ularning kuzatuvchilari salomatligini mustahkamlash uchun xarajatlarni moliyalashtirish Qishloq xo‘jaligida bilim va innovatsiyalar milliy markazi xarajatlarining belgilangan tartibda ro‘yxatdan o‘tkazilgan smetasida yo‘llanmalar uchun to‘lovga har yili maqsadli tartibda nazarda tutiladigan budjetdan ajratiladigan mablag‘lar hisobidan amalga oshiriladi.

22. Sanatoriylar har oyning 5-kunigacha o‘tgan oyda Akademiya a’zolari hamda ularning kuzatuvchi shaxslari amalda foydalangan yo‘llanmalardan kelib chiqib, bajarilgan ishlar dalolatnomalari va o‘zaro hisob-kitoblarning taqqoslash dalolatnomalarini Markazga taqdim etib, hisob-kitoblarni amalga oshiradilar.

Markazga taqdim etiladigan ma’lumotlarning ishonchliligi va asoslanganligi uchun sanatoriylar rahbarlari shaxsan mas’uldirlar.

23. Yo‘llanmadan faqat unda ko‘rsatilgan Akademiya a’zosi foydalanishi mumkin. Yo‘llanmaning boshqa shaxsga berilishiga yo‘l qo‘yilmaydi.

Ushbu talab kuzatuvchilarga nisbatan qo‘llanilmaydi.

24. Sanatoriyga kelgan Akademiya a’zolarida pasport, sog‘liqni saqlash muassasasi tomonidan berilgan sanatoriy-kurort kartasi (tibbiy xulosa) va yo‘llanma bo‘lishi kerak.

25. Akademiya a’zolari hamda ularning kuzatuvchilariga “standart” yotoqxonalardan joy beriladi.

Akademiya a’zolari hamda ularning kuzatuvchilari sanatoriylardagi mavjud qo‘shimcha xizmatlar uchun belgilangan to‘lovlarni o‘z hisobidan amalga oshirgan holda foydalanishlari mumkin.

26. Akademiya a’zolari hamda ularning kuzatuvchilari sanatoriyning davolovchi shifokori tomonidan tayinlagan barcha zarur tibbiy muolajalar bilan birinchi navbatda ta’minlanadilar.

27. Davolanishga kelgan Akademiya a’zosi hamda uning kuzatuvchisiga sanatoriy tomonidan yo‘llanmaning qaytish taloni Markazga topshirish uchun beriladi.

Yo‘llanmaning qaytish talonida tegishli shaxsning familiyasi, ismi va otasining ismi, sanatoriyda amalda bo‘lgan vaqti ko‘rsatiladi.

28. Akademiya a’zolariga sog‘lomlashtirish uchun berilgan yo‘llanmalarga muvofiq sanatoriylarda joy ajratilishi yuzasidan sanatoriylar rahbarlari shaxsan javob beradilar.

29. Akademiya a’zolari hamda ularning kuzatuvchilariga berilgan va ular tomonidan foydalanilgan yo‘llanmalar bo‘yicha hisob-kitoblar va ularning nazorati Markaz tomonidan olib boriladi.

30. Markaz sanatoriy yo‘llanmalarining o‘z vaqtida va maqsadli berilishini ta’minlaydi.