Prokuratura organlariga yuklatilgan vazifalarning samarali bajarilishi uchun zarur sharoitlar yaratish, mamlakatda qonuniylik va huquq-tartibotning so‘zsiz ta’minlanishi uchun ularning javobgarligini yanada oshirish maqsadida:

1. O‘zbekiston Respublikasi Prezidentining ayrim hujjatlariga va O‘zbekiston Respublikasi Hukumatining ba’zi qarorlariga ilovaga muvofiq o‘zgartish va qo‘shimchalar kiritilsin.

2. O‘zbekiston Respublikasi Bosh prokuraturasi va Moliya vazirligi ikki hafta muddatda ushbu Farmon talablariga muvofiq Bosh prokuraturaning shtatlar jadvali va xarajatlar smetasiga o‘zgartishlar kiritsin.

3. Mazkur Farmonning ijrosini nazorat qilish O‘zbekiston Respublikasining Bosh vaziri A.N. Aripov, O‘zbekiston Respublikasi Prezidentining Davlat maslahatchisi O.B. Murodov va O‘zbekiston Respublikasining Bosh prokurori I.B. Abdullayev zimmasiga yuklansin.

1. O‘zbekiston Respublikasi Prezidentining 2017-yil 18-apreldagi “Ijtimoiy-iqtisodiy islohotlarni amalga oshirish, mamlakatni modernizatsiya qilish, inson huquq va erkinliklarining ishonchli himoyasini ta’minlashda prokuratura organlarining rolini kuchaytirish to‘g‘risida”gi PF-5019-son Farmoni:

a) 1-ilovada (O‘zbekiston Respublikasi Bosh prokuraturasining tashkiliy-shtat tuzilmasi):

“Qishloq xo‘jaligi sohasida qonunchilik ijrosi ustidan nazorat boshqarmasi” blokidagi “10” raqami “14” raqami bilan almashtirilsin;

“244” raqami “248” raqami bilan almashtirilsin;

2. O‘zbekiston Respublikasi Prezidentining 2006-yil 21-apreldagi “Moliya-iqtisodiy, soliq sohasidagi jinoyatlarga, jinoiy faoliyatdan olingan daromadlarni legallashtirishga qarshi kurashishni kuchaytirish chora-tadbirlari to‘g‘risida”gi PQ-331-son qarori:

a) 2-band:

quyidagi mazmundagi oltinchi xatboshi bilan to‘ldirilsin:

“ijtimoiy ahamiyatga ega oziq-ovqat tovarlari uchun narx-navolarni asossiz va sun’iy oshirishga qarshi kurashish”;

oltinchi, yettinchi va sakkizinchi xatboshilar tegishincha yettinchi, sakkizinchi va to‘qqizinchi xatboshilar deb hisoblansin;

b) 1-ilova (O‘zbekiston Respublikasi Bosh prokuraturasi huzuridagi Soliq, valyutaga oid jinoyatlarga va jinoiy daromadlarni legallashtirishga qarshi kurashish departamenti to‘g‘risida nizom):

7-band:

quyidagi mazmundagi oltinchi xatboshi bilan to‘ldirilsin:

“ijtimoiy ahamiyatga ega oziq-ovqat tovarlari uchun narx-navolarni asossiz va sun’iy oshirishga qarshi kurashish”;

oltinchi, yettinchi va sakkizinchi xatboshilar tegishincha yettinchi, sakkizinchi va to‘qqizinchi xatboshilar deb hisoblansin;

8-band quyidagi mazmundagi 8.3¹-kichik band bilan to‘ldirilsin:

“8.3¹. Ijtimoiy ahamiyatga ega oziq-ovqat tovarlari uchun narx-navolarni asossiz va sun’iy oshirishga qarshi kurashish sohasida

ijtimoiy ahamiyatga ega oziq-ovqat tovarlariga (yurtimizda ishlab chiqarilgan o‘simlik yog‘i va un, go‘sht, shakar), shuningdek, sheluxa va shrotga bo‘lgan narx-navoni asossiz va sun’iy oshirishga, ularga bo‘lgan tanqislik va ajiotaj talabning vujudga kelishiga yo‘naltirilgan qonunga xilof harakatlarni aniqlash va chek qo‘yish;

markazlashtirilgan resurslar hisobidan oziq-ovqat tovarlari, paxta shroti va sheluxasini xarid qilish, yetkazib berish va sotishda suiiste’mol qilinishlar va korrupsiyaga qarshi kurashish;

ijtimoiy ahamiyatga ega oziq-ovqat tovarlariga, shuningdek, sheluxa va shrotni sotishda narx-navoni shakllantirishning belgilangan mexanizmlariga rioya etilishini tizimli o‘rganish, aniqlangan qonunchilik buzilishlari bo‘yicha materiallarni qonun hujjatlariga muvofiq chora ko‘rish uchun vakolatli organlarga yo‘naltirishi;

nazorat qiluvchi organlar va bozorlar ma’muriyati xodimlari tomonidan yo‘l qo‘yilgan korrupsiya, ular tomonidan bozorlar faoliyatini tashkil etishning belgilangan tartiblari va qonun hujjatlari talablariga rioya etmaslik, shu jumladan, narxlarni asossiz va sun’iy ko‘tarish, ularning hududlarida o‘z faoliyatini norasmiy olib borayotgan shaxslarga nisbatan choralar ko‘rmaslik holatlarini aniqlash”;

9-band:

quyidagi mazmundagi o‘n to‘rtinchi va o‘n beshinchi xatboshilar bilan to‘ldirilsin:

“mulkchilik shaklidan qat’i nazar, yuridik shaxslardan va fuqarolardan ijtimoiy ahamiyatga ega oziq-ovqat tovarlari, sheluxa va shrotga bo‘lgan narxlarning asossiz va sun’iy oshirilishi, narx-navoni manipulatsiya qilish, tanqislik va ularga ajiotaj talabni sun’iy vujudga keltirish, ularni xarid qilish, yetkazib berish va sotishda suiiste’mol qilinishlar va korrupsiyaga qarshi kurashish holatlarini o‘rganish uchun zarur bo‘lgan ma’lumotlar va tushuntirishlarni talab qilib olish;

ijtimoiy ahamiyatga ega oziq-ovqat tovarlari, paxta shroti va sheluxasiga bo‘lgan narxlarni asossiz va sun’iy oshirish, ularni xarid qilish, yetkazib berish va sotishda suiiste’mol qilinishlar va korrupsiya holatlarini aniqlash bo‘yicha tezkor-qidiruv chora-tadbirlarini olib borish, bu moliya-xo‘jalik faoliyatni tekshirish hisoblanmaydi hamda Nazorat organlari faoliyatini muvofiqlashtirish respublika kengashining maxsus ruxsati talab etilmaydi”;

o‘n to‘rtinchi — yigirma ikkinchi xatboshilar tegishincha o‘n oltinchi — yigirma to‘rtinchi xatboshilar deb hisoblansin;

quyidagi mazmundagi yigirma beshinchi xatboshi bilan to‘ldirilsin:

“Departament tomonidan olib borilgan tezkor-qidiruv chora-tadbirlari natijalari, xususan, tahliliy materiallar, tekshiruv xaridlari yoki nazorat xaridlari natijalari bo‘yicha olingan tovar yoki kassa cheklari, shuningdek, qonun buzilishini tasdiqlovchi cheklarni bermaslik holatlarini aniqlash, keyinchalik qonunbuzarlikning keng miqyosini, narxlarni asossiz va sun’iy oshirish usullari va mexanizmlarini aniqlash uchun zarur hollarda Nazorat organlari faoliyatini muvofiqlashtirish respublika kengashining maxsus ruxsati talab etilmagan holda moliya-xo‘jalik faoliyatini tekshirish uchun asos hisoblanadi”.

3. O‘zbekiston Respublikasi Prezidentining 2013-yil 12-sentabrdagi PQ-2036-son qarori bilan tasdiqlangan O‘zbekiston Respublikasi prokuratura organlari va muassasalarida xizmatni o‘tash to‘g‘risidagi nizom:

a) 30-bandning birinchi xatboshisidagi “va ish tajribasi hisobga olingan holda darajali unvonlar (harbiy unvonlar) beriladi” degan so‘zlar “yoki ish tajribasi hisobga olingan holda darajali unvonlar (harbiy unvonlar) beriladi, qonun hujjatlarida belgilangan holatlar bundan mustasno” degan so‘zlar bilan almashtirilsin;

b) quyidagi mazmundagi 41¹-band bilan to‘ldirilsin:

“O‘zbekiston Respublikasi Bosh prokurori, istisno tariqasida, boshqa davlat organlari va tashkilotlarining xodimlarini rag‘batlantirish huquqiga ega”;

v) 74-band “ularning oila a’zolari” degan so‘zlardan keyin “shuningdek, prokuratura organlari pensionerlari” degan so‘zlar bilan to‘ldirilsin;

g) 1-ilova (O‘zbekiston Respublikasi prokuratura organlari xodimlarining xizmat kiyimi tavsifi va alohida belgilari) 6-bobi “Xizmat kiyimi pogonlarining tavsifi” ellik to‘rtinchi xatboshisidagi “9,0” va “4,5” raqamlari tegishincha “11,0” va “5” raqamlari bilan almashtirilsin.

4. O‘zbekiston Respublikasi Prezidentining 2016-yil 29-iyuldagi “O‘zbekiston Respublikasi prokuratura organlari faoliyatiga axborot-kommunikatsiya texnologiyalarini keng joriy etish chora-tadbirlari to‘g‘risida”gi PQ-2568-son qarori:

a) 2-band:

quyidagi mazmundagi ikkinchi xatboshi bilan to‘ldirilsin:

“prokuratura organlari tizimida axborot tizimlari va resurslari, ma’lumotlar bazalari, korporativ hisoblash tizimlari va ma’lumotlarni qayta ishlash markazlarini yaratish, qo‘llab-quvvatlash, modernizatsiya qilish, rivojlantirish va uzluksiz ishlashini ta’minlash bo‘yicha yagona siyosatni ishlab chiqish hamda amalga oshirish”;

ikkinchi xatboshi tegishincha uchinchi xatboshi deb hisoblansin;

quyidagi mazmundagi to‘rtinchi xatboshi bilan to‘ldirilsin:

“axborot tizimlari va resurslari, ma’lumotlar bazalari, korporativ hisoblash tizimlaridan foydalanish bo‘yicha prokuratura organlari tarkibiy bo‘linmalarining faoliyatini muvofiqlashtirish”;

to‘rtinchi — sakkizinchi xatboshilar tegishincha beshinchi — to‘qqizinchi xatboshilar deb hisoblansin;

yettinchi xatboshi “integratsiya” degan so‘zdan keyin “qo‘llab-quvvatlash, modernizatsiya qilish” degan so‘zlar bilan to‘ldirilsin;

b) quyidagi mazmundagi 3¹-band bilan to‘ldirilsin:

“3¹. Belgilab qo‘yilsinki:

Yagona tarif setkasi bo‘yicha mehnatga haq to‘lash razryadlariga ko‘ra Boshqarmaning axborot-kommunikatsiya texnologiyalari, shuningdek, boshqa mutaxassislik sohasida oliy ma’lumotga ega boshqaruv xodimlarining lavozim maoshini aniqlashda tarif koeffitsiyentlari ikki baravar miqdorda qo‘llaniladi;

Boshqarma xodimlariga alohida mehnat sharoitlari uchun ularning lavozim maoshiga 100 foiz miqdorida oylik ustama to‘lanadi. Bunda ushbu ustama qonun hujjatlarida belgilangan rag‘batlantiruvchi qo‘shimcha haq va ustamalarni hisoblashda Boshqarmaning qayd etilgan xodimlari lavozim maoshi tarkibiga kiritiladi;

ushbu bandning ikkinchi va uchinchi xatboshilarida nazarda tutilgan to‘lovlar, shu jumladan, ulardan kelib chiqadigan ustamalar Majburiy ijro byurosini rivojlantirish jamg‘armasi mablag‘lari hisobidan amalga oshiriladi”.

5. O‘zbekiston Respublikasi Prezidentining 2017-yil 30-maydagi “O‘zbekiston Respublikasi Bosh prokuraturasi huzuridagi Majburiy ijro byurosi faoliyatini tashkil etish to‘g‘risida”gi PQ-3016-son qarori:

a) 4-ilova (O‘zbekiston Respublikasi Bosh prokuraturasi huzuridagi Majburiy ijro byurosi to‘g‘risidagi nizom) 22-bandining birinchi xatboshisi quyidagi tahrirda bayon etilsin:

“22. Byuroning daraja unvonlariga ega bo‘lgan, shuningdek, maxsus toifalar beriladigan mansablarni egallab turgan xodimlari belgilangan tartibda tasdiqlanadigan namunadagi tegishli xizmat kiyimi va alohida ko‘rinishdagi belgilarni kiyadilar”;

b) 5-ilova (O‘zbekiston Respublikasi Bosh prokuraturasi huzuridagi Majburiy ijro byurosida xizmatni o‘tash to‘g‘risidagi nizom) 26-bandining birinchi xatboshisidagi “darajali unvoni va” degan so‘zlar “darajali unvoni yoki” degan so‘zlar bilan almashtirilsin.