O‘zbekistonning boy tarixiy va madaniy merosining yorqin namunasi sifatida hunarmandchilikni keng qo‘llab-quvvatlash, Farg‘ona viloyatining xalq badiiy hunarmandchiligi va amaliy san’atining tarixiy markazlari bo‘lgan Marg‘ilon, Qo‘qon shaharlari va Rishton tumanida ko‘p asrlik an’analarni asrab-avaylash va davom ettirish uchun qulay shart-sharoitlar yaratish, shu asosda ishsiz aholi, ayniqsa yoshlar, ayollar va kam ta’minlangan oilalarning bandligini ta’minlash maqsadida Vazirlar Mahkamasi qaror qiladi:

1. Quyidagilar Farg‘ona viloyatining Marg‘ilon, Qo‘qon shaharlari va Rishton tumanida milliy hunarmandchilikni rivojlantirishning asosiy yo‘nalishlari etib belgilansin:

birinchidan, xalq amaliy san’ati va hunarmandchiligi bilan shug‘ullanuvchi fuqarolar va oilalarni har tomonlama qo‘llab-quvvatlash, ularning faoliyatini tashkil etish, rivojlantirish, ishlab chiqarish jarayonini takomillashtirish va kengaytirish, shu asosda yangi ish o‘rinlari yaratilishini rag‘batlantirish bo‘yicha tizimli chora-tadbirlarni amalga oshirish;

ikkinchidan, hunarmandlar markazlari va mavzelarini tashkil etish, ularni turistlar yo‘nalishlariga kiritish yoki yangi turistik yo‘nalishlar tuzish takliflarini ishlab chiqish;

uchinchidan, hunarmandchilik faoliyatini amalga oshirish uchun moddiy-texnika bazani yaratish, shu jumladan, hunarmandlarga yer maydonlari va binolar ajratish, muhandislik-kommunikatsiyalari tarmoqlariga ulash, asbob-uskunalar va xomashyo materiallari bilan uzluksiz ta’minlash, ularga imtiyozli kredit va lizing mablag‘lari ajratish bo‘yicha aniq choralar ko‘rish;

to‘rtinchidan, hunarmandlar ishlab chiqargan mahsulotlarni xaridorlarga yetkazib berish bo‘yicha tegishli bozor infratuzilmasini yaratish, shu jumladan, barpo etiladigan hunarmandchilikni qo‘llab-quvvatlash markazlarida ko‘rgazma-savdolar tashkil etish, hunarmandlarga bozorlar va savdo majmualarida savdo rastalari ajratish;

beshinchidan, hunarmandchilik mahsulotlarini eksport qilish tizimini shakllantirish va har tomonlama rag‘batlantirish, xalq hunarmandchiligi mahsulotlar xorijiy davlatlarda o‘tkaziladigan ko‘rgazma, festival, yarmarkalarda namoyish qilinishiga ko‘maklashish;

oltinchidan, noyob, o‘tmishda avloddan avlodga o‘tib kelayotgan, lekin hozirda yo‘qolib borish xavfi ostidagi hunarmandchilik turlarini qayta tiklash va rivojlantirish choralarini ko‘rish, ushbu yo‘nalishlar bo‘yicha faoliyat yuritayotgan hunarmandlarga tegishli imtiyozlar va sharoitlar yaratish;

yettinchidan, “Usto-shogird” maktablari faoliyatini doimiy tahlil qilib borish, ularni yanada takomillashtirish choralarini ko‘rish, hunarmandlarni shogirdlikka olish va hunarga o‘rgatishni rag‘batlantiruvchi choralar ko‘rish, yangidan yetishib chiqayotgan hunarmandlarga tadbirkorlik faoliyatini boshlashda har tomonlama ko‘maklashish.

2. Farg‘ona viloyati hokimligi, O‘zbekiston Respublikasi Iqtisodiyot vazirligi, Savdo-sanoat palatasi, “Hunarmand” uyushmasi, Davlat soliq qo‘mitasi, Turizmni rivojlantirish davlat qo‘mitasi tomonidan ishlab chiqilgan quyidagilarni o‘z ichiga oluvchi Farg‘ona viloyatining Marg‘ilon, Qo‘qon shaharlari va Rishton tumanida milliy hunarmandchilikni rivojlantirish dasturi (keyingi o‘rinlarda Dastur deb ataladi) ma’qullansin, jumladan:

Farg‘ona viloyatining Marg‘ilon, Qo‘qon shaharlari va Rishton tumanida milliy hunarmandchilik, xalq badiiy hunarmandchiligi va amaliy san’atini yanada rivojlantirish kompleks chora-tadbirlar dasturi 1-ilovaga* muvofiq;

Farg‘ona viloyatining Marg‘ilon, Qo‘qon shaharlari va Rishton tumanida hunarmandchilikni rivojlantirish bo‘yicha manzilli dastur 2-ilovaga* muvofiq;

Farg‘ona viloyatining Marg‘ilon, Qo‘qon shaharlari va Rishton tumanida milliy hunarmandchilikni rivojlantirish dasturi ijrosini ta’minlash bo‘yicha Respublika muvofiqlashtiruvchi kengashi (keyingi o‘rinlarda Respublika muvofiqlashtiruvchi kengash deb ataladi) tarkibi 3-ilovaga* muvofiq.

3. Respublika muvofiqlashtiruvchi kengashi Dasturning to‘liq, sifatli va o‘z vaqtida bajarilishi, shu jumladan, Farg‘ona viloyatining Marg‘ilon, Qo‘qon shaharlari va Rishton tumanida milliy hunarmandchilikni rivojlantirishning asosiy yo‘nalishlari amalga oshirilishi ustidan doimiy monitoring o‘rnatsin.

4. Farg‘ona viloyati hududida chuqur tarixiy ildizlarga ega bo‘lgan, an’anaviy tarzda saqlanib, avloddan-avlodga o‘tib kelayotgan quyidagi hunarmandchilik turlarini:

Marg‘ilon shahrida — atlas, adras to‘qimachiligi, chitkarlik, yog‘och o‘ymakorligi, kosibchilik va ipakdan gilam to‘qishni;

Qo‘qon shahrida — yog‘och o‘ymakorligi, pichoqchilik, zargarlik, kandakorlik va temirchilikni;

Rishton tumanida — kulolchilik, chinni mahsulotlari va musavvirlikni rivojlantirishga alohida e’tibor berilsin.

5. Farg‘ona viloyati hokimligi, O‘zbekiston Respublikasi Madaniyat vazirligi, “Hunarmand” uyushmasi, Turizmni rivojlantirish davlat qo‘mitasi, Davlat arxitektura va qurilish qo‘mitasining Farg‘ona viloyatining Marg‘ilon, Qo‘qon shaharlari va Rishton tumanida quyidagilarni o‘z ichiga oluvchi hunarmandchilik va turizm markazlarini (keyingi o‘rinlarda markazlar deb ataladi) qurish va ularning faoliyatini tashkil etish bo‘yicha taklifi ma’qullansin:

a) markazlarni qurish va ular faoliyatini tashkil etish bo‘yicha:

markazlar qadimgi milliy me’morchilik uslublari va shaklida qurilgan bo‘lib, zamonaviy infratuzilma va kommunikatsiyalar bilan jihozlangan bo‘lishi;

markazlarga milliy matolar (adras, atlas va boshqalar), milliy poyabzal ishlab chiqarish, yog‘ochsozlik va yog‘och o‘ymakorligi, do‘ppichilik, gilamchilik, to‘nchilik, temirchilik, misgarlik, zargarlik, kulolchilik va boshqa yo‘nalishlar bo‘yicha hunarmandlarni, ayniqsa, avloddan avlodga o‘tib kelayotgan hunarmandlar sulolalarini jalb etish;

markazlarga jalb etilgan hunarmandlar uchun ushbu markazlarda quriladigan va ularga imtiyozli ipoteka kreditlari asosida ajratiladigan uy-joylarning 1-qavatida hunarmandlar ustaxonalari va do‘konlari, 2-qavatida esa hunarmandlarning xonadonlari joylashtirilishi;

markazlarda turistlar uchun karvonsaroylar (mehmonxonalar), oshxonalar, restoranlar, qahvaxonalar va boshqa ko‘ngilochar xizmatlar ko‘rsatuvchi joylar tashkil etilishi;

markazlar hududlarida “qadimgi sharqiy bozor” uslubida qurilgan bozor rastalari, milliy san’atkorlar (askiyachilar, dorbozlar, masxarabozlar va boshqalar)ning o‘z mahoratlarini namoyish qilishlari uchun joylar, mavze hududi bo‘ylab va boshqa mavzelar bilan bog‘laydigan zamonaviy texnik yechimlar asosida ishlab chiqarilgan tarixiy ko‘rinishdagi transport vositalari (foytun va arava) qatnovining yo‘lga qo‘yilishi;

b) markazlarni joylashtirish manzillari bo‘yicha:

Farg‘ona viloyatining Marg‘ilon shahri Xiyobon ko‘chasida Marg‘ilon hunarmandlari markazi — “Karvonsaroy-hunarmandlar markazi”ni tashkil etish;

Qo‘qon shahri Bog‘iston ko‘chasi hududida Hunarmandchilik va turizm markazini, “Jome’” tarixiy yodgorligi masjidida “Qo‘qon adabiy badiiy, ma’naviy-marifiy muhiti” markazini tashkil etish, Tinchlik ko‘chasida joylashgan “Dasturxonchi” madrasasida tikuvchilik yo‘nalishidagi hunarmandlarni joylashtirish.

6. “Ipoteka-bank” ATIBga “Qishloqqurilishbank” ATB bilan birgalikda hunarmandlar uchun uy-joylar qurish uchun kreditlar ajratish tavsiya etilsin.

7. Mazkur qarorning bajarilishini nazorat qilish O‘zbekiston Respublikasi Bosh vazirining o‘rinbosarlari J.A. Qo‘chqorov, Z.T. Mirzayev, Bandlik va mehnat munosabatlari vaziri A.A. Xaitov va “Hunarmand” uyushmasi raisi A.A. Xakimov zimmasiga yuklansin.