Vazirlar Mahkamasi qaror qiladi:

1. O‘zbekiston Respublikasining xo‘jalik yurituvchi subyektlari tomonidan xorijiy mamlakatlardan ular tashkil etgan savdo uylari, vakolatxonalar, korxonalar orqali olib chiqilayotgan tovarlarni bojxonada rasmiylashtirish tartibi to‘g‘risidagi Nizom ilovaga muvofiq tasdiqlansin va u 2000-yil 15-iyuldan boshlab amalga kiritilsin.

2. Vazirliklar va idoralar ikki hafta muddatda o‘zlarining me’yoriy hujjatlarini mazkur qarorga muvofiqlashtirsinlar.

3. Mazkur qarorning bajarilishini nazorat qilish Vazirlar Mahkamasining Tashqi iqtisodiy faoliyatni muvofiqlashtirish departamentiga yuklansin.

1. Ushbu Nizom O‘zbekiston Respublikasining Bojxona kodeksiga hamda boshqa qonun hujjatlariga muvofiq ishlab chiqilgan va O‘zbekiston Respublikasining xo‘jalik yurituvchi subyektlari tomonidan xorijiy mamlakatlarda ular tashkil etgan savdo uylari, vakolatxonalar, korxonalar (keyingi o‘rinlarda chet eldagi korxonalar deb ataladi) orqali olib chiqilayotgan tovarlarni bojxonada rasmiylashtirish tartibini belgilaydi.

2. Ushbu Nizomda O‘zbekiston Respublikasining Bojxona kodeksida qo‘llangan tushunchalardan foydalaniladi.

3. Muassislar tomonidan chet eldagi korxonalar nomiga olib chiqiladigan tovarlar bojxonaning “vaqtincha olib chiqish” rejimiga, ular sotilmagan taqdirda qonun hujjatlarida belgilangan muddatlarda qaytarib olib kelish majburiyati bilan kiritiladi.

4. Keyinchalik chet eldagi korxonalar orqali sotish uchun “vaqtincha olib chiqish” rejimidagi tovarlarning yuk bojxona deklaratsiyasi belgilangan tartibda to‘ldiriladi.

5. Tovarlarni chet eldagi korxona nomiga olib chiqish konsignatsiya shartnomalari, boshqa shartnomalar asosida, shuningdek, kontraktsiz asosda (tovarlar namunalari, shuningdek, yuridik shaxs maqomiga ega bo‘lmagan chet eldagi korxona nomiga yetkazib beriladigan, o‘z ehtiyojlari uchun kerakli mol-mulklar) qonun hujjatlariga muvofiq amalga oshiriladi.

Tovarlarni olib chiqish kontraktlari (shartnomalari) muassis tomonidan, hisob-kitoblar to‘g‘risida ma’lumotnomalar taqdim etmasdan, belgilangan tartibda vakolatli bankda va bojxona organlarida hisobga qo‘yiladi.

Tovarlar kontraktsiz asosda olib chiqilgan taqdirda hisobga olish bojxona organlari tomonidan yuk bojxona deklaratsiyasi asosida yuritiladi.

6. Tovarlar chet eldagi korxonalar nomiga olib chiqilayotganda muassislar ilovaga muvofiq shakldagi yozma ariza bilan bojxona organlariga (davlat bojxona qo‘mitasi Qoraqalpog‘iston Respublikasi, viloyatlar, Toshkent shahar boshqarmasiga va “Toshkent-AERO” maxsus bojxona kompleksiga) murojaat qiladilar.

Chet eldagi korxonalar muassislarining arizalari belgilangan tartibda bojxona organlari tomonidan bir ish kuni mobaynida ko‘rib chiqiladi.

Muassis tomonidan tovarlarni u chet elda tashkil etgan korxona nomiga konsignatsiya kontraktlari va boshqa shakllardagi shartnomalar asosida olib chiqish hisob-kitoblar to‘g‘risida ma’lumotnomalar rasmiylashtirilmasdan amalga oshiriladi.

7. Vaqtincha olib chiqilayotgan tovarlarni O‘zbekiston Respublikasi bojxona organlari tomonidan nazorat qilish qonun hujjatlarida belgilangan tartibda amalga oshiriladi.

Tovarlar “vaqtincha olib chiqish” rejimi davrida sotilganda muassislar bojxona organlariga zarur hujjatlarni, shu jumladan, “vaqtincha olib chiqish” rejimidan “eksport” rejimiga qayta rasmiylashtirish uchun hisob-kitoblar to‘g‘risidagi ma’lumotnomani taqdim etishlari kerak. Tovarlarni “eksport” rejimida bojxonada rasmiylashtirish qonun hujjatlariga muvofiq tovarlarni eksport qiluvchi muassisning arizasiga ko‘ra bir ish kuni mobaynida amalga oshirilishi kerak.

Chet eldagi korxonada “vaqtincha olib chiqish” rejimida turgan tovarni sotish yuzasidan kontrakt tuzilgan sanadan boshlab valyuta mablag‘larining O‘zbekiston Respublikasiga tushishi muddatini hisoblash boshlanadi, u qonun hujjatlariga muvofiq 180 kundan ortiq bo‘lmasligi kerak.

8. Xaridorlarga xizmat ko‘rsatuvchi banklarning kafolati berilmagan konsignatsiya asosidagi tovar O‘zbekiston Respublikasining amaldagi qonun hujjatlarida belgilangan valyuta tushumi tushishi muddatlariga rioya qilingan taqdirda mazkur tovar muassisning (muassislarning) o‘zi ishlab chiqargan mahsulot hisoblanishi, shu jumladan, agar tegishli vazirliklar, idoralar, korporatsiyalar, konsernlar, uyushmalar va kompaniyalar tarkibiga kiruvchi korxonalar tomonidan ishlab chiqarilgan tovarlarni eksport qiluvchi vazirliklar, idoralar, korporatsiyalar, konsernlar, uyushmalar va kompaniyalarning tarkibiy bo‘linmalari hisoblangan ixtisoslashtirilgan tashqi savdo birlashmalari va firmalar muassis (muassislar) bo‘lishi sharti bilan muassis (muassislar) tomonidan muassis (muassislar)ning 100 foiz investitsiyasiga asoslangan yoki muassis (muassislar)ning ustav jamg‘armasidagi ulushi kamida 51 foizni tashkil etgan chet eldagi korxonaga yetkazib berilishi mumkin.

9. Chet eldagi korxonadan eksport-import operatsiyalari bo‘yicha xorijiy valyutadagi tushum tushishi ustidan nazorat Davlat soliq qo‘mitasi tomonidan Davlat bojxona qo‘mitasi va vakolatli banklar bilan birgalikda qonun hujjatlarida belgilangan tartibda amalga oshiriladi.

Valyuta tushumining O‘zbekiston Respublikasi vakolatli bankiga o‘z vaqtida va to‘liq tushishi uchun javobgarlik qonun hujjatlariga muvofiq tashkilotlarning rahbarlariga — chet eldagi korxonalarning muassislariga yuklanadi.

Eksport kontraktlari bo‘yicha mahsulotlarni sotishdan tushgan valyuta tushumi eksport qiluvchilarning O‘zbekiston Respublikasining vakolatli banklaridagi hisob raqamlariga o‘tkazilishi kerak. Eksport qiluvchi (muassis) tushgan tushumning bir qismini qonun hujjatlarida belgilangan tartibda majburiy ravishda sotadi.

10. Davlat bojxona qo‘mitasi chet eldagi korxona orqali mahsulot eksporti hisobini yuritish maqsadida har oyda Makroiqtisodiyot va statistika vazirligiga, Tashqi iqtisodiy aloqalar vazirligiga va Davlat soliq qo‘mitasiga belgilangan tartibda tegishli statistika ma’lumotlarini taqdim etadi.