Davlat mulki obyektlaridan foydalanish samaradorligini oshirish va Andijon viloyatida xususiy mulkchilik va tadbirkorlikni rivojlantirish uchun qoʻshimcha shart-sharoitlar yaratish maqsadida Vazirlar Mahkamasi qaror qiladi:

1. Andijon viloyati hokimligi tomonidan Oʻzbekiston Respublikasi Xususiylashtirilgan korxonalarga koʻmaklashish va raqobatni rivojlantirish davlat qoʻmitasi, vazirliklar, idoralar, xoʻjalik boshqaruvi organlari bilan birgalikda Andijon viloyatida boʻsh turgan, foydalanilmayotgan davlat mulki obyektlari hamda yer uchastkalari xatlovdan oʻtkazilganligi va ulardan kelgusida samarali foydalanish boʻyicha takliflar ishlab chiqilganligi maʼlumot uchun qabul qilinsin.

2. Andijon viloyatidagi ishlamay turgan, foydalanilmayotgan davlat mulki boʻlgan obyektlardan va yer uchastkalaridan foydalanish boʻyicha chora-tadbirlar dasturi tasdiqlansin, ushbu Dasturda quyidagilar nazarda tutilsin:

samarali foydalanish uchun tadbirkorlik subyektlariga, shu jumladan investitsiya majburiyatlari qabul qilish sharti bilan “nol” xarid qiymatida sotishga tavsiya etilayotgan boʻsh turgan va foydalanilmayotgan davlat mulki obyektlari roʻyxati 1-ilovaga* muvofiq;

ular negizida yangi kichik sanoat zonalari tashkil etiladigan ishlab chiqarish maydonlari va yer uchastkalari roʻyxati 2-ilovaga* muvofiq.

3. “Oʻzbekenergo” AJ va “Oʻztransgaz” AJ kichik sanoat zonalari hududlarida faoliyat yuritayotgan tadbirkorlik subyektlarini elektroenergiya va tabiiy gaz bilan uzluksiz taʼminlasinlar.

4. Andijon viloyati hokimligi va Oʻzbekiston Respublikasi Uy-joy kommunal xizmat koʻrsatish vazirligining Andijon shahar hokimligi tasarrufidagi va Andijon shahar, Bobur shoh koʻchasi manzilida joylashgan sobiq “Bobur”OAJga qarashli “Suv tozalash” bino va inshootlarini sobiq “Bobur” AJ hududidagi tadbirkorlik subyektlariga suv tozalash inshootlari va tashkilotlarga xizmat koʻrsatish faoliyatini tiklash sharti bilan muzokaralar oʻtkazish hamda ijtimoiy shartlarni bajarish sharti bilan “nol” xarid qiymati boʻyicha toʻgʻridan toʻgʻri oldi-sotdi shartnomalari tuzish toʻgʻrisidagi taklifi maʼqullansin.

5. Andijon viloyat hokimligi bir oy muddatda tadbirkorlik subyektlari bilan muzokaralar olib borilishini va belgilangan tartibda sobiq “Bobur” OAJga qarashli “Suv tozalash” bino va inshootlarini “nol” xarid qiymati boʻyicha ushbu qarorning 4-bandida koʻrsatilgan shartlarda sotish toʻgʻrisida Andijon viloyati hududiy tanlov komissiyasining qarori qabul qilinishini taʼminlasin.

6. Andijon viloyati tuman (shahar)lari hokimlariga “Davlat mulkini ijaraga berish markazi” DUK bilan birgalikda tadbirkorlik faoliyatini yuritish uchun respublika davlat boshqaruvi organi tasurrufida boʻlgan tuman (shahar) hududida joylashgan foydalanilmayotgan davlat mulki obyektlarini (maydonlarini), tegishli tuman (shahar) hokimining tegishli murojaatidan soʻng ikki oy muddatda balansda saqlovchilar tomonidan ularni ijaraga berish taʼminlanmagan taqdirda, istisno tariqasida, bir yilgacha boʻlgan muddatga ijaraga berish toʻgʻrisida qaror qabul qilish huquqi berilsin, bunda qonun hujjatlarida nazarda tutilgan tartibda balansda saqlovchilarga ajratmalar tegishli tuman (shahar) budjetiga yoʻnaltiriladi.

8. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari J.A. Qoʻchqorov, Oʻzbekiston Respublikasi Xususiylashtirilgan korxonalarga koʻmaklashish va raqobatni rivojlantirish davlat qoʻmitasi raisi R.A. Gulyamov va Andijon viloyati hokimi Sh. Abduraxmanov zimmasiga yuklansin.