O‘zbekiston Respublikasining “Ta’lim to‘g‘risida”gi va “Kadrlar tayyorlash milliy dasturi to‘g‘risida”gi qonunlari hamda O‘zbekiston Respublikasi Prezidentining “Oliy ta’lim tizimini yanada rivojlantirish chora-tadbirlari to‘g‘risida” 2017-yil 20-apreldagi PQ-2909-son qarori talablari asosida ta’lim sifatini ijtimoiy-iqtisodiy sohalarda olib borilayotgan islohotlar talablariga muvofiq yuksak darajaga ko‘tarish, shuningdek uzluksiz ta’lim tizimida ta’lim sifatini nazorat qilishni yanada takomillashtirish, kadrlar tayyorlash sifati va o‘quv jarayoni samaradorligining xolisona baholanishini nazorat qilish sohasida davlat siyosatini amalga oshirish maqsadida Vazirlar Mahkamasi qaror qiladi:

1. O‘zbekiston Respublikasi Prezidentining “Oliy ta’lim tizimini yanada rivojlantirish chora-tadbirlari to‘g‘risida” 2017-yil 20-apreldagi PQ-2909-son qaroriga muvofiq O‘zbekiston Respublikasi Vazirlar Mahkamasi huzuridagi Davlat test markazining Kadrlar tayyorlash sifatini nazorat qilish, pedagog kadrlar va ta’lim muassasalarini attestatsiya qilish boshqarmasi negizida O‘zbekiston Respublikasi Vazirlar Mahkamasi huzuridagi Ta’lim sifatini nazorat qilish davlat inspeksiyasi (keyingi o‘rinlarda Davlat inspeksiyasi deb ataladi) tashkil etilganligi ma’lumot uchun qabul qilinsin.

2. Quyidagilar Davlat inspeksiyasining asosiy vazifalari etib belgilansin:

ta’lim tizimida o‘quv-tarbiya jarayonlari, professor-o‘qituvchilar tarkibi, kadrlar tayyorlash va ularning malakasini oshirish sifatini nazorat qilish, pedagog kadrlarga malaka toifalarini berish bo‘yicha davlat siyosatini amalga oshirish;

idoraviy mansubligi va tashkiliy huquqiy shakllaridan qat’i nazar davlat ta’lim muassasalari va nodavlat ta’lim tashkilotlarini (keyingi o‘rinlarda ta’lim tashkilotlari deb ataladi) attestatsiya va davlat akkreditatsiyasidan o‘tkazish;

o‘quvchilar, talabalar va tinglovchilar bilimlarining O‘zbekiston Respublikasi davlat ta’lim standartlari, davlat ta’lim talablari va malaka talablariga muvofiqligini tahlil qilish, ta’lim tashkilotlari reytingini aniqlash;

nodavlat ta’lim tashkilotlariga litsenziyalar berish;

xorijiy mamlakatlarda berilgan ta’lim to‘g‘risidagi hujjatlarni tan olishni tashkil etish;

respublika hududida xorijiy ta’lim muassasalarining ta’lim faoliyatini yuritish huquqiga ruxsatnomalar berish uchun taqdim etilgan hujjatlarni ekspertizadan o‘tkazish;

ta’lim va fan sohasi tashkilotlari tomonidan beriladigan rasmiy hujjatlarga apostil qo‘yish;

O‘zbekiston Respublikasi ta’lim muassasalari reytingini tuzish va rasman e’lon qilish;

o‘quvchilarning bilim darajasini baholash bo‘yicha xalqaro dasturlar va tadqiqotlarda O‘zbekiston Respublikasining ishtirokini ta’minlash;

dunyoning yetakchi reyting tashkilotlari bilan hamkorlik qilish va milliy oliy ta’lim muassasalarining ushbu reytinglarga kirishiga har tomonlama ko‘maklashish.

3. O‘zbekiston Respublikasi Vazirlar Mahkamasi huzuridagi Ta’lim sifatini nazorat qilish davlat inspeksiyasi to‘g‘risidagi nizom 1-ilovaga muvofiq tasdiqlansin.

4. Belgilab qo‘yilsinki:

Davlat inspeksiyasi boshlig‘i maqomiga ko‘ra vazirga, boshliqning birinchi o‘rinbosari vazirning birinchi o‘rinbosariga, boshliq o‘rinbosari esa vazir o‘rinbosariga tenglashtiriladi;

Davlat inspeksiyasi xodimlariga O‘zbekiston Respublikasi Oliy va o‘rta maxsus ta’lim vazirligining tegishli lavozimlari uchun belgilangan mehnatga haq to‘lash va moddiy rag‘batlantirish shartlari qo‘llaniladi.

5. Quyidagilar Davlat inspeksiyasi faoliyatini moliyalashtirishning asosiy manbalari etib belgilansin:

O‘zbekiston Respublikasi Davlat budjeti mablag‘lari;

homiylar — yuridik va jismoniy shaxslarning, O‘zbekiston Respublikasi rezidentlari va norezidentlarining mablag‘lari;

pedagog kadrlarga birinchi va oliy malaka toifasi, yetakchi va bosh o‘qituvchi lavozimi berish, shuningdek, umumiy o‘rta, o‘rta maxsus va professional ta’lim muassasalarida ushbu malaka toifasiga va lavozimiga talabgorlarga malaka toifasini berishda to‘lanadigan yig‘imlardan tushadigan mablag‘lar;

Davlat inspeksiyasining budjetdan tashqari mablag‘lari, shu jumladan vaqtincha bo‘sh turgan budjetdan tashqari mablag‘larni tijorat banklari depozitlariga joylashtirishdan tushgan mablag‘lar;

grantlar, xizmat ko‘rsatishdan tushgan daromadlar hamda qonun hujjatlarida taqiqlanmagan boshqa manbalar.

6. Davlat inspeksiyasi bir oy muddatda inspeksiyani ta’lim sifatini nazorat qilish sohasida amaliy-metodik ish tajribasiga ega bo‘lgan malakali mutaxassislar, shuningdek ilmiy-pedagogik stajga ega xodimlar bilan ta’minlasin.

7. Davlat inspeksiyasi Toshkent shahar, Chilonzor tumani, Nurxon ko‘chasi, 21-uy manziliga joylashtirilsin.

8. Toshkent shahar hokimligi, O‘zbekiston Respublikasi Oliy va o‘rta maxsus ta’lim vazirligi va Xususiylashtirilgan korxonalarga ko‘maklashish va raqobatni rivojlantirish davlat qo‘mitasi Toshkent shahar, Chilonzor tumani, Nurxon ko‘chasi, 21-uy manzilidagi binoni tutash hududi bilan birga Davlat inspeksiyasiga operativ boshqaruv huquqi bilan topshirsin.

9. Qoraqalpog‘iston Respublikasi Vazirlar Kengashi va viloyatlar hokimliklari bir oy muddatda Davlat inspeksiyasining hududiy bo‘limlarini joylashtirish masalasini hal qilsinlar.

11. O‘zbekiston Respublikasi Axborot texnologiyalari va kommunikatsiyalarini rivojlantirish vazirligi bir oy muddatda Davlat inspeksiyasini zarur aloqa vositalari, shu jumladan hukumat aloqa vositalari bilan ta’minlasin.

12. Belgilab qo‘yilsinki:

a) Pedagog xodimlarga malaka toifalarini berish bo‘yicha navbatdagi attestatsiyadan o‘tkazganlik uchun yig‘im undirilmaydi, navbatdan tashqari attestatsiyadan o‘tkazganlik uchun bazaviy hisoblash miqdorining bir baravari miqdorida;

b) nodavlat ta’lim tashkilotlari hamda o‘zini o‘zi moliyalashtiradigan davlat ta’lim muassasalarini attestatsiyadan o‘tkazganlik uchun quyidagi miqdorlarda yig‘im undiriladi:

maktabgacha, umumiy o‘rta va maktabdan tashqari ta’lim bo‘yicha — bazaviy hisoblash miqdorining o‘n besh baravari;

o‘rta maxsus va professional ta’lim bo‘yicha tegishliligiga ko‘ra attestatsiyaga jalb etiladigan har bir ta’lim yo‘nalishi va kasb uchun — bazaviy hisoblash miqdorining yetti baravari;

oliy ta’lim bo‘yicha attestatsiyaga jalb etiladigan har bir ta’lim yo‘nalishi va mutaxassislik uchun — bazaviy hisoblash miqdorining o‘n ikki baravari;

oliy ta’limdan keyingi ta’lim bo‘yicha attestatsiyaga jalb etiladigan har bir ixtisoslik uchun — bazaviy hisoblash miqdorining olti baravari miqdorida;

malaka oshirish va qayta tayyorlash ta’limi bo‘yicha attestatsiyaga jalb etiladigan har bir kurs uchun — bazaviy hisoblash miqdorining besh baravari.

13. O‘zbekiston Respublikasi Vazirlar Mahkamasi huzuridagi Davlat test markazi:

tugatilayotgan Kadrlar tayyorlash sifatini nazorat qilish, pedagog kadrlar va ta’lim muassasalarini attestatsiya qilish boshqarmasining moddiy-texnika resurslarini va taalluqliligi bo‘yicha shakllangan hujjatlarini belgilangan tartibda Davlat inspeksiyasiga o‘tkazsin;

2017-yilda Davlat inspeksiyasining asoslantirilgan hisob-kitoblariga ko‘ra uning moddiy-texnika bazasini mustahkamlash uchun Davlat test markazining budjetdan tashqari mablag‘lari hisobidan Davlat inspeksiyasiga zarur mablag‘lar ajratsin;

Davlat inspeksiyasiga tizimli ravishda o‘zida mavjud nazorat materiallari bankidan foydalanish imkoniyatini yaratsin.

14. Respublikadagi barcha oliy ta’lim muassasalari tarkibida ularning belgilangan shtatlari doirasida Davlat inspeksiyasi boshlig‘i tavsiyasiga asosan lavozimiga tayinlanadigan va lavozimidan ozod etiladigan 3 nafar (oylik ish haqi dekan lavozimiga tenglashtirilgan bo‘lim boshlig‘i va 2 nafar bosh mutaxassis) xodimdan iborat ta’lim sifatini nazorat qilish bo‘limlari tashkil etilsin. Bo‘limga oliy ta’lim muassasasi talabalari bilimlarining davlat ta’lim standartlariga muvofiqligini o‘rganib borish, tahlil qilish, kadrlar tayyorlash sifati monitoringini yuritish hamda oliy ta’lim muassasasini ichki baholashdan o‘tkazishni tashkil etish va ichki baholash natijalarini, ta’lim sifatiga ta’sir etgan omillar to‘g‘risidagi ma’lumotlarni oliy ta’lim muassasasi rektoriga hamda Davlat inspeksiyasiga taqdim etish vazifasi yuklansin

15. O‘zbekiston Respublikasi Moliya vazirligi:

ushbu qarorda nazarda tutilgan xarajatlar uchun zarur budjet mablag‘larini 2017-yilda O‘zbekiston Respublikasi Davlat budjeti parametrlarida ijtimoiy sohaga nazarda tutilgan mablag‘lar doirasida ajratsin, 2018-yildan boshlab esa O‘zbekiston Respublikasi Davlat budjetining parametrlarida ushbu sohaga ajratilgan mablag‘lar doirasida nazarda tutsin;

ushbu qarordan kelib chiqib O‘zbekiston Respublikasi Davlat budjetining 2017-yil uchun tasdiqlangan xarajatlariga tegishli o‘zgartirishlar kiritsin;

Davlat inspeksiyasiga 6 ta, shu jumladan, 4 ta biriktirilgan va 2 ta navbatchi avtotransport vositasiga limit ajratsin;

Davlat inspeksiyasining moddiy-texnika bazasini shakllantirish uchun zarur bo‘lgan jihozlar va axborot-kommunikatsiya texnologiyalarini xarid qilish uchun ikki oy muddatda mablag‘lar ajratilishini ta’minlasin.

16. O‘zbekiston Respublikasi Hukumatining 3-ilovaga muvofiq ayrim qarorlariga o‘zgartirish va qo‘shimchalar kiritilsin.

17. Mazkur qarorning bajarilishini nazorat qilish O‘zbekiston Respublikasi Vazirlar Mahkamasining Ta’lim, ilm-fan va yoshlar siyosati masalalari axborot-tahlil departamentiga yuklansin.

1. Ushbu Nizom O‘zbekiston Respublikasi Vazirlar Mahkamasi huzuridagi Ta’lim sifatini nazorat qilish davlat inspeksiyasining (keyingi o‘rinlarda Davlat inspeksiyasi deb ataladi) maqomi, asosiy vazifalari, funksiyalari, huquqlari va javobgarligi, shuningdek faoliyatini tashkil etish tartibini belgilaydi.

2. Davlat inspeksiyasi ta’lim tizimida o‘quv-tarbiya jarayonlari, professor-o‘qituvchilar tarkibi, kadrlar tayyorlash va ularning malakasini oshirish sifatini nazorat qilish bo‘yicha davlat siyosatini amalga oshiradigan, idoraviy mansubligi va mulkchilik shakllaridan qat’i nazar davlat ta’lim muassasalari va nodavlat ta’lim tashkilotlarini (keyingi o‘rinlarda ta’lim tashkilotlari deb ataladi) attestatsiya va davlat akkreditatsiyasidan o‘tkazadigan maxsus vakolatli davlat boshqaruv organi hisoblanadi.

3. Davlat inspeksiyasi o‘z faoliyatida O‘zbekiston Respublikasi Vazirlar Mahkamasiga bo‘ysunadi va unga hisobot beradi.

4. Davlat inspeksiyasi yuridik shaxs hisoblanadi, O‘zbekiston Respublikasining Davlat gerbi tasviri tushirilgan va o‘z nomi davlat tilida yozilgan muhrga, mustaqil balansga, O‘zbekiston Respublikasi Moliya vazirligining g‘aznachiligida budjet va budjetdan tashqari shaxsiy g‘azna hisobvaraqlariga ega bo‘ladi.

5. Davlat inspeksiyasi o‘z faoliyatida O‘zbekiston Respublikasi Konstitutsiyasiga va qonunlariga, O‘zbekiston Respublikasi Oliy Majlisi qarorlariga, O‘zbekiston Respublikasi Prezidentining farmonlari, qarorlari va farmoyishlariga, O‘zbekiston Respublikasi Vazirlar Mahkamasining qarorlari va farmoyishlariga, shuningdek ushbu Nizomga va boshqa qonun hujjatlariga amal qiladi.

6. Davlat inspeksiyasi tarkibiga yuridik shaxs maqomiga ega bo‘lmagan Qoraqalpog‘iston Respublikasi va viloyatlardagi hududiy bo‘limlar (keyingi o‘rinlarda Hududiy bo‘limlar deb ataladi) kiradi.

Hududiy bo‘limlar o‘z faoliyatini Davlat inspeksiyasi tomonidan tasdiqlanadigan nizomga muvofiq amalga oshiradi.

7. Davlat inspeksiyasi o‘z faoliyatini davlat hokimiyati va boshqaruvi organlari, mahalliy davlat hokimiyati organlari, nodavlat notijorat tashkilotlari va boshqa tashkilotlar bilan o‘zaro hamkorlikda amalga oshiradi.

8. Quyidagilar Davlat inspeksiyasining asosiy vazifalari hisoblanadi:

ta’lim tizimida o‘quv-tarbiya jarayonlari, professor-o‘qituvchilar tarkibi, kadrlar tayyorlash va ularning malakasini oshirish sifatini nazorat qilish, pedagog kadrlarga malaka toifalarini berish bo‘yicha davlat siyosatini amalga oshirish;

idoraviy mansubligi va mulkchilik shaklidan qat’i nazar, ta’lim tashkilotlarini attestatsiya va davlat akkreditatsiyasidan o‘tkazish;

o‘quvchilar, talabalar va tinglovchilar bilimlarining O‘zbekiston Respublikasi davlat ta’lim standartlari, davlat ta’lim talablari va malaka talablariga muvofiqligini tahlil qilish, ta’lim tashkilotlari reytingini aniqlash;

nodavlat ta’lim tashkilotlariga litsenziyalar berish;

xorijiy mamlakatlarda berilgan ta’lim to‘g‘risidagi hujjatlarni tan olishni tashkil etish;

respublika hududida xorijiy ta’lim muassasalarining ta’lim faoliyatini yuritish huquqiga ruxsatnomalar berish uchun taqdim etilgan hujjatlarni ekspertizadan o‘tkazish;

ta’lim va fan sohasi tashkilotlari tomonidan beriladigan rasmiy hujjatlarga apostil qo‘yish;

O‘zbekiston Respublikasi ta’lim muassasalari reytingini tuzish va rasman e’lon qilish;

o‘quvchilarning bilim darajasini baholash bo‘yicha xalqaro dasturlar va tadqiqotlarda O‘zbekiston Respublikasining ishtirokini ta’minlash;

dunyoning yetakchi reyting tashkilotlari bilan hamkorlik qilish va milliy oliy ta’lim muassasalarining ushbu reytinglarga kirishiga har tomonlama ko‘maklashish.

9. Davlat inspeksiyasi o‘ziga yuklangan vazifalarni bajarish uchun quyidagi funksiyalarni amalga oshiradi:

o‘quvchilar, talabalar va tinglovchilar bilimlarining O‘zbekiston Respublikasi davlat ta’lim standartlari, davlat ta’lim talablari va malaka talablariga muvofiqligini tizimli ravishda tahlil qilish;

pedagog kadrlarga lavozim va malaka toifalarini berish uchun normativ-huquqiy hujjatlar loyihalarini ishlab chiqish;

pedagog kadrlarga malaka toifalarini berish jarayonini tashkil etish jadvallarini tuzish va tasdiqlash;

ta’lim sohasidagi boshqaruv organlari hamda mahalliy ijro etuvchi hokimiyat organlarining pedagog kadrlarga mos ravishda lavozim va malaka toifalarini berishni tashkil qilish va o‘tkazish borasidagi faoliyatini muvofiqlashtirish va nazorat qilish;

pedagog kadrlarga lavozim va malaka toifalarini berish davriyligi haqidagi ma’lumotlar bazasini shakllantirish;

pedagog kadrlarga lavozim va malaka toifalari berishni tashkil etish;

lavozim va malaka toifalariga ega bo‘lgan pedagog kadrlarga belgilangan namunadagi malaka toifalariga oid sertifikatlar berish;

pedagog kadrlarning nazorat sinovlari natijasi bo‘yicha lavozim va malaka toifalariga oid sertifikatlar berilganligi to‘g‘risidagi ma’lumotlarni Davlat inspeksiyasining rasmiy veb-saytida e’lon qilib borish;

kadrlar tayyorlash sifatini nazorat qilishda ish beruvchilarning ta’lim tashkilotlarida kadrlar tayyorlash sifati bo‘yicha takliflari asosida mutaxassislik malaka talablarini takomillashtirish bo‘yicha takliflar ishlab chiqish;

davlat ta’lim standartlari, davlat ta’lim talablari va malaka talablarini, shuningdek ular asosida ta’limning barcha turlari bo‘yicha ishlab chiqilgan o‘quv reja va dasturlarini ekspertizadan o‘tkazish;

ta’lim tashkilotlarida o‘quv-tarbiya hamda kadrlar tayyorlash sifati monitoringini tashkil etish va amalga oshirish;

uzluksiz ta’lim tizimida tashkil etiladigan fan olimpiadalari, bellashuvlar va turli ko‘rik-tanlovlarni xolis va adolatli o‘tkazilishini nazorat qilish, natijalarini tahlil etish;

ta’lim sifatini baholash sohasida xalqaro hamkorlikni yo‘lga qo‘yish;

O‘zbekiston Respublikasi Oliy va o‘rta maxsus ta’lim vazirligi hamda Xalq ta’limi vazirligi bilan birgalikda ta’lim sifatini nazorat qilish va ta’lim tashkilotlari faoliyatini baholash mezonlarini ishlab chiqish;

ta’lim sifati nazorati hamda attestatsiya jarayonida qo‘llaniladigan nazorat materiallarini ishlab chiqish, maxfiyligini saqlash bo‘yicha chora-tadbirlar kompleksini amalga oshirish;

ta’lim tashkilotlarini attestatsiyadan o‘tkazish uchun jalb etiladigan ekspertlarni tanlash, o‘qitish va o‘qitish yakunlari bo‘yicha ushbu ekspertlarni saralab olish mexanizmini ishlab chiqish va takomillashtirish;

ta’lim tashkilotlarini attestatsiyadan o‘tkazish jadvallarini ishlab chiqish va tasdiqlash;

ta’lim tashkilotlarini attestatsiya va davlat akkreditatsiyasidan o‘tkazish jarayonini muvofiqlashtirish va nazorat qilish;

ta’lim sifati monitoringi, attestatsiya o‘tkazish jarayonida aniqlangan kamchiliklarni o‘z vaqtida bartaraf etilishini nazorat qilish;

attestatsiya natijalariga ko‘ra, ta’lim tashkilotlarini davlat akkreditatsiyasidan o‘tkazish;

davlat akkreditatsiyasidan o‘tgan ta’lim tashkilotlarining reyestrini yuritish;

ta’lim tashkilotlarini attestatsiyadan o‘tkazish jarayoni va natijalariga doir masalalar bo‘yicha ekspert xulosalari, hisobotlar, tahliliy materiallar tayyorlash;

idoraviy mansubligidan va mulkchilik shakllaridan qat’i nazar ta’lim tashkilotlarini tashkil etish (qayta tashkil etish, tugatish) hamda ularning maqomini qayta ko‘rib chiqish bo‘yicha tegishli xulosalar tayyorlash, tasarrufida ta’lim muassasalari bo‘lgan vazirliklar va idoralarga taqdimnomalar kiritish;

o‘quvchilar, talabalar va tinglovchilar bilimlarini aniqlash maqsadida nazorat materiallarini ishlab chiqish;

nazorat ishlarini o‘tkazish, natijalarni tahlil qilish, ta’lim sifatiga ta’sir ko‘rsatgan omillarni aniqlash, shu jumladan ta’lim tashkilotlarida umumta’lim fanlari va kasbiy fanlar bo‘yicha tanlab olish asosida bitiruvchilarning ta’lim tayyorgarligi darajasi va o‘qitish sifati monitoringini o‘tkazish orqali ta’lim sifatiga ta’sir etuvchi omillarni aniqlash;

o‘quvchilar, talabalar va tinglovchilar o‘rtasida ta’lim sifatini oshirish, davlat ta’lim standartlari, davlat ta’lim talablari va malaka talablarini bajarish darajasini o‘rganishga qaratilgan intellektual ko‘rik-tanlovlar, musobaqalarni tashkil etish;

ta’lim va kadrlar tayyorlash sifati monitoringini olib borish va nazorat qilish bo‘yicha tashkiliy-huquqiy va metodik ko‘rsatmalarni ishlab chiqishni tashkil etish;

zamonaviy axborot-telekommunikatsiya texnologiyalariga asoslangan holda ta’lim va kadrlar tayyorlash sifati monitoringini olib borish;

ta’lim tashkilotlarida o‘qitish va kadrlar tayyorlash sifatini o‘rganish maqsadida ijtimoiy so‘rovlarni o‘tkazish;

ta’lim sifatini baholash natijalari bo‘yicha tahliliy ma’lumotlar tayyorlash;

ta’lim sifatini baholash natijalari asosida ta’lim va kadrlar tayyorlash sifatining umumiy holati bo‘yicha ta’lim tashkilotlari reytingini aniqlash;

talabgorlarning litsenziya berish to‘g‘risidagi arizalarini qabul qilish va ko‘rib chiqishni tashkil etish;

talabgorlarning arizalarini ko‘rib chiqish natijalari bo‘yicha ekspert xulosasini tayyorlash;

talabgorlarning arizalarini ko‘rib chiqish natijalari haqida talabgorlarga ma’lumot berish;

ijobiy ekspert xulosalari asosida litsenziyalarni rasmiylashtirish va nodavlat ta’lim tashkilotlariga berish;

O‘zbekiston Respublikasi Oliy va o‘rta maxsus ta’lim vazirligi, Xalq ta’limi vazirligi, Adliya vazirligi hamda boshqa manfaatdor vazirliklar va idoralarning vakillaridan iborat tarkibda tegishli ta’lim yo‘nalish (mutaxassislik)lari bo‘yicha xorijiy mamlakatlarda berilgan ta’lim to‘g‘risidagi hujjatlarni tan olish va nostrifikatsiyalash (ekvivalentligini aniqlash) bo‘yicha ekspertizadan o‘tkazuvchi ekspert komissiyasini (keyingi o‘rinlarda Ekspert komissiyasi deb ataladi) shakllantirish va uning ishini tashkil etish;

talabgorlardan xorijiy mamlakatlarda berilgan ta’lim to‘g‘risidagi hujjatlarni tan olish uchun zarur bo‘lgan ta’lim to‘g‘risidagi va boshqa hujjatlarni qabul qilib olish;

ta’lim to‘g‘risidagi hujjatlarni tan olish jarayoni uchun barcha zarur hujjatlar mavjudligini aniqlash va materiallarni Ekspert komissiyasiga yuborishni tashkil etish;

Ekspert komissiyasi tomonidan tan olish uchun taqdim etilgan ta’lim to‘g‘risidagi hujjatni ekspertizadan o‘tkazish natijasiga ko‘ra xulosa tayyorlanishini tashkil etish;

Ekspert komissiyasining xulosasi haqida talabgorga ma’lum qilish;

xorijiy davlatlarda ta’lim olganlik to‘g‘risidagi hujjatlar tan olinganda talabgorlarga guvohnomalar rasmiylashtirilishini tashkil etish;

respublika hududida xorijiy ta’lim muassasalarining ta’lim faoliyatini yuritish huquqiga ruxsatnomalar berish uchun taqdim etilgan hujjatlarni qabul qilib olish;

respublika hududida xorijiy ta’lim muassasalarining ta’lim faoliyatini yuritish huquqiga ruxsatnomalar berish uchun taqdim etilgan hujjatlarni ekspertizadan o‘tkazish;

pedagog kadrlar ta’minoti, moddiy-texnik baza, o‘quv-laboratoriya jihozlari va boshqa texnik vositalarni ta’lim dasturini amalga oshirish uchun yetarliligi yuzasidan ekspert xulosasini tayyorlash;

apostil qo‘yish uchun murojaatlar va tegishli hujjatlarni qabul qilish hamda ro‘yxatdan o‘tkazish;

apostil qo‘yish to‘g‘risidagi murojaatni ko‘rib chiqish;

apostil qo‘yish to‘g‘risidagi murojaatni ko‘rib chiqish natijalari haqida ariza beruvchiga ma’lumot berish.

z) O‘zbekiston Respublikasi ta’lim muassasalari reytingini tuzish va rasman e’lon qilish sohasida:

ta’lim muassasalari reytingini aniqlashga oid ma’lumotlar bazasini shakllantirish, ta’lim muassasalarida nazorat ishlari va ijtimoiy so‘rovnomalar o‘tkazish;

tizimida ta’lim muassasalari bo‘lgan vazirliklar va idoralar bilan birgalikda reytingni aniqlashga oid ma’lumotlarni to‘plash maqsadida ishchi guruhlar va komissiyalar tuzish;

ta’lim muassasalarining faoliyati samaradorligini baholash mezonlari asosida ta’lim muassasalarining reytingini hisoblab chiqish;

ta’lim muassasalari reytingiga oid ma’lumotlar asosida ta’lim muassasalari faoliyatidagi ijobiy o‘zgarishlar haqida keng jamoatchilikni doimiy xabardor qilib borish;

ta’lim muassasalarining reytingi natijalarini ommaviy axborot vositalarida e’lon qilish va Davlat inspeksiyasining Internet jahon axborot tarmog‘idagi rasmiy veb-saytida joylashtirish;

ta’lim muassasalari reytingi natijalari asosida tahliliy materiallar tayyorlash va chop etish.

i) o‘quvchilarning bilim darajasini baholash bo‘yicha xalqaro dasturlar va tadqiqotlarda O‘zbekiston Respublikasining ishtirokini ta’minlash sohasida:

o‘quvchilarning bilim darajasini baholash bo‘yicha xalqaro dasturlar va tadqiqotlarda O‘zbekiston Respublikasi nomidan ishtirok etish va uning manfaatlarini ifodalash;

o‘quvchilarning bilim darajasini baholash bo‘yicha xalqaro dasturlar va tadqiqotlarda umumiy o‘rta ta’lim muassasalarining muvaffaqiyatli ishtirok etishini ta’minlash;

umumiy o‘rta ta’lim muassasalaridagi iqtidorli pedagog kadrlar xalqaro baholash dasturlari bo‘yicha ilmiy tadqiqotlarda faol ishtirok etishini tashkil etish yuzasidan zarur choralar ko‘rish;

o‘quvchilarning bilim darajasini baholash bo‘yicha xalqaro dasturlar va tadqiqotlar asosida umumiy o‘rta ta’lim muassasalarida tizimli monitoring olib borish hamda ilg‘or tajribani dunyo miqyosida ommalashtirish ishlarini muvofiqlashtirish;

k) dunyoning yetakchi reyting tashkilotlari bilan hamkorlik qilish va milliy oliy ta’lim muassasalarining ushbu reytinglarga kirishiga har tomonlama ko‘maklashish sohasida:

o‘quvchilarning bilim darajasini baholash bo‘yicha xalqaro dasturlar va tadqiqotlarda O‘zbekiston Respublikasining ishtirok etishi yuzasidan xalqaro tashkilotlar bilan hamkorlik shartnomalari imzolanishiga ko‘maklashish;

milliy oliy ta’lim muassasalarida xalqaro standartlar va ilg‘or xorijiy tajribani qo‘llash orqali kadrlar tayyorlash sifatini oshirish yuzasidan takliflar ishlab chiqish;

milliy oliy ta’lim muassasalarini xalqaro e’tirof etilgan tashkilotlarning reytingiga kirishiga ko‘maklashish uchun dunyoning yetakchi reyting tashkilotlari bilan birgalikda seminarlar, konferensiyalar va boshqa tadbirlar tashkil etish;

milliy reytingda yuqori o‘rinlarni egallagan oliy ta’lim muassasalarining tajribasini ommalashtirish yuzasidan takliflar ishlab chiqish va keng targ‘ib qilish;

reytinglar tuzish bo‘yicha dunyoning yetakchi reyting tashkilotlari metodologiyasi va xalqaro tajribasi haqida tahliliy materiallar tayyorlash va chop etish.

10. Hududiy bo‘limlar quyidagi vazifalarni amalga oshiradi:

ta’lim tashkilotlari attestatsiyasining o‘tkazilishini, uning sifatli va samarali tashkil qilinishini muvofiqlashtirish va nazorat qilish;

ta’lim tashkilotlarini attestatsiyadan o‘tkazish jarayonida Davlat inspeksiyasi va ta’lim sohasidagi hududiy boshqaruv organlari o‘rtasidagi o‘zaro hamkorlikni muvofiqlashtirish;

oliy ta’lim, oliy ta’limdan keyingi ta’lim hamda kadrlar malakasini oshirish va ularni qayta tayyorlash ta’lim tashkilotlarini attestatsiyadan o‘tkazish jarayonida oliy ta’lim muassasalarining ta’lim sifatini nazorat qilish bo‘limlari tomonidan o‘tkaziladigan ichki baholash jarayonini muvofiqlashtirish;

ta’lim va kadrlar tayyorlash monitoringini olib borish va sifatini nazorat qilish jarayonida tashkiliy ishlarni amalga oshirish;

ta’lim muassasalari reytingini aniqlashga oid ma’lumotlar bazasini shakllantirish, ta’lim muassasalarida nazorat ishlari va ijtimoiy so‘rovnomalar o‘tkazishda bevosita ishtirok etish;

umumiy o‘rta ta’lim muassasalari o‘quvchilarining bilim darajasini baholash bo‘yicha xalqaro dasturlar va tadqiqotlarda o‘quvchilarning ishtirok etishini tashkil etish;

ta’lim muassasalarining xalqaro tashkilotlar va xorijiy ta’lim muassasalari bilan hamkorligi masalalarini muvofiqlashtirish.

11. Davlat inspeksiyasi o‘ziga yuklatilgan vazifalar va funksiyalarni amalga oshirish uchun quyidagi huquqlarga ega:

o‘ziga yuklatilgan vazifalar va funksiyalarni bajarish uchun vazirliklar, idoralar, ta’lim tashkilotlaridan zarur ma’lumotlar va materiallarni olish;

ta’lim tizimida o‘quv-tarbiya jarayonlari, professor-o‘qituvchilar tarkibi, kadrlar tayyorlash va ularning malakasini oshirish sifatini nazorat qilish bo‘yicha ta’lim va ilmiy-tadqiqot tashkilotlari rahbarlari tomonidan ta’lim to‘g‘risidagi qonun hujjatlari buzilgan holda qabul qilingan buyruqlar, farmoyishlar va qarorlarning amal qilishini to‘xtatib qo‘yish;

ta’lim tashkilotlarida ta’lim sifatini, ta’limning barcha turlari bo‘yicha o‘quv rejalari va dasturlarining davlat ta’lim standartlariga, davlat talablari va malaka talablariga muvofiqligini belgilangan tartibda tekshirish;

attestatsiya jarayonida aniqlangan kamchiliklarni bartaraf etish bo‘yicha amalga oshirilgan ishlar to‘g‘risidagi ma’lumotlarni ta’lim sohasidagi boshqaruv organlari va ta’lim tashkilotlaridan talab qilib olish;

shartnoma asosida ilmiy-metodik va axborot-konsalting xizmatlarini ko‘rsatish;

o‘ziga yuklatilgan vazifalarni hal etish uchun vazirliklar va idoralar, ta’lim tashkilotlarining olimlari, amaliyotchi pedagog o‘qituvchi-metodistlar hamda xorijiy ekspertlarni jalb etgan holda innovatsion laboratoriyalar, tayanch ta’lim muassasalarini belgilash, maqsadli ilmiy-tadqiqot, ijodiy guruhlar, ilmiy kengash va komissiyalar tashkil etish;

o‘z vakolatlari doirasida vazirliklar va idoralar, xalqaro va xorijiy tashkilotlar bilan hamkorlikni amalga oshirish;

ta’lim va kadrlar tayyorlash sifati muammolari bo‘yicha xalqaro konferensiyalar, kongresslar, simpoziumlar, seminar va o‘quvlar tashkil etish va ularda ishtirok etish, shuningdek davlatlararo va hukumatlararo hamkorlik masalalari bo‘yicha muzokaralarda qatnashish;

o‘zining vakolatlariga kiradigan masalalar yuzasidan mahalliy davlat hokimiyati organlari va ta’lim sohasidagi boshqaruv organlari, fuqarolarning o‘zini o‘zi boshqarish organlari, nodavlat notijorat tashkilotlari rahbarlari va mutaxassislarini jalb etgan holda ta’lim sifati monitoringini, konferensiyalar, yig‘ilishlar, seminarlar va boshqa tadbirlarni o‘tkazish;

o‘z vakolatiga tegishli masalalarda o‘quv qo‘llanma, metodik ishlanmalar, nazorat materiallarini ishlab chiqish;

Davlat inspeksiyasi qonun hujjatlariga muvofiq boshqa huquqlarga ham ega bo‘lishi mumkin.

12. Davlat inspeksiyasi o‘z vakolatlari doirasida vazirliklar, davlat qo‘mitalari, idoralar, mahalliy davlat hokimiyati organlari boshqa tashkilotlar, mansabdor shaxslar va fuqarolar tomonidan bajarilishi majburiy bo‘lgan normativ-huquqiy hujjatlar qabul qilishga haqlidir.

Davlat inspeksiyasi zarur hollarda, davlat boshqaruvining boshqa organlari bilan birgalikda belgilangan tartibda qo‘shma qarorlar va boshqa hujjatlar chiqarish huquqiga ega.

13. Davlat inspeksiyasi o‘ziga yuklangan vazifalar va funksiyalarning bajarilishi uchun qonun hujjatlarida belgilangan tartibda javob beradi.

14. Davlat inspeksiyasiga O‘zbekiston Respublikasi Vazirlar Mahkamasi tomonidan belgilangan tartibda lavozimga tayinlanadigan va lavozimdan ozod qilinadigan boshliq boshchilik qiladi.

Davlat inspeksiyasi boshlig‘ining O‘zbekiston Respublikasi Vazirlar Mahkamasi tomonidan belgilangan tartibda lavozimga tayinlanadigan va lavozimdan ozod qilinadigan birinchi o‘rinbosari va o‘rinbosari bo‘ladi.

Davlat inspeksiyasi boshlig‘i maqomiga ko‘ra O‘zbekiston Respublikasi vaziriga, o‘rinbosar esa — tegishli ravishda vazirning birinchi o‘rinbosariga va vazir o‘rinbosariga tenglashtiriladi.

Davlat inspeksiyasining bosh boshqarma boshliqlari, bo‘lim boshliqlari va xodimlari, shu jumladan Hududiy bo‘limlar xodimlari Davlat inspeksiyasi boshlig‘i tomonidan lavozimga tayinlanadi va lavozimdan ozod qilinadi.

15. Davlat inspeksiyasi boshlig‘i:

Davlat inspeksiyasi faoliyatiga bevosita rahbarlik qiladi va Davlat inspeksiyasiga yuklangan vazifalar va funksiyalarning bajarilishi yuzasidan shaxsan javob beradi;

Davlat inspeksiyasi xodimlari tomonidan bajarilishi majburiy bo‘lgan buyruqlar chiqaradi va ko‘rsatmalar beradi;

Davlat inspeksiyasining tarkibiy bo‘linmalari va Hududiy bo‘limlari to‘g‘risidagi nizomlarini tasdiqlaydi;

Davlat inspeksiyasi vakolatiga kiruvchi masalalar bo‘yicha qarorlar qabul qiladi;

Davlat inspeksiyasi faoliyatining joriy va istiqbol rejalarini tuzilishini tashkil etadi;

Davlat inspeksiyasi xodimlarini rag‘batlantiradi hamda ularni davlat mukofotlari, faxriy unvonlar, faxriy yorliqlar berilishiga tavsiya etadi;

Davlat inspeksiyasi xodimlarini zarur hollarda intizomiy javobgarlikka tortadi.

Davlat inspeksiyasi boshlig‘i qonun hujjatlariga muvofiq boshqa vakolatlarni ham amalga oshirishi mumkin.

16. Davlat inspeksiyasida Davlat inspeksiyasi boshlig‘i, uning birinchi o‘rinbosari va o‘rinbosari, bosh boshqarma boshliqlari, bo‘lim boshliqlari va yuqori malakali xodimlardan iborat tarkibda ilmiy-metodik kengash tashkil etiladi. Ilmiy-metodik kengash a’zolarining soni va shaxsiy tarkibi Davlat inspeksiyasi boshlig‘i buyrug‘i bilan tasdiqlanadi.

17. Ilmiy-metodik kengash mazkur Nizomga muvofiq Davlat inspeksiyasiga yuklatilgan vazifalarni amalga oshirish jarayoniga oid ilmiy, metodik va normativ-huquqiy hujjatlarga oid masalalarni ko‘rib chiqadi.

Ilmiy-metodik kengash qarorlari Davlat inspeksiyasi boshlig‘ining buyrug‘i bilan amalga oshiriladi.

18. Davlat inspeksiyasi faoliyati quyidagi manbalar hisobidan moliyalashtiriladi:

O‘zbekiston Respublikasi Davlat budjeti mablag‘lari;

homiylar — yuridik va jismoniy shaxslarning, O‘zbekiston Respublikasi rezidentlari va norezidentlarining mablag‘lari;

pedagog kadrlarga birinchi va oliy malaka toifasi, yetakchi va bosh o‘qituvchi lavozimi berish, shuningdek, umumiy o‘rta, o‘rta maxsus va kasb-hunar ta’limi muassasalarida ushbu malaka toifasiga va lavozimiga talabgorlarga malaka toifasini berishda to‘lanadigan yig‘imlardan tushadigan mablag‘lar;

Davlat inspeksiyasining budjetdan tashqari mablag‘lari, shu jumladan vaqtincha bo‘sh turgan budjetdan tashqari mablag‘larni tijorat banklari depozitlariga joylashtirishdan tushgan mablag‘lar;

grantlar, xizmat ko‘rsatishdan tushgan daromadlar hamda qonun hujjatlarida taqiqlanmagan boshqa manbalar.

19. Davlat inspeksiyasining xarajatlar smetasi, daromadlar va xarajatlar smetasi belgilangan tartibda Davlat inspeksiyasi boshlig‘i tomonidan tasdiqlanadi va O‘zbekiston Respublikasi Moliya vazirligida ro‘yxatdan o‘tkaziladi.

20. Davlat inspeksiyasi boshlig‘ining qaroriga muvofiq Davlat inspeksiyasi rahbarlari va xodimlariga ular lavozim maoshining 200 foizigacha miqdorda oylik ustamalar belgilanishi, moddiy yordam ko‘rsatilishi, xizmat vazifalarini vijdonan va tashabbus ko‘rsatib bajarganligi uchun mukofotlanishi mumkin.

21. Davlat inspeksiyasini qayta tashkil etish va tugatish qonun hujjatlarida belgilangan tartibda amalga oshiriladi.

4. Vazirlar Mahkamasining “Maktabgacha, umumiy o‘rta, o‘rta maxsus, kasb-hunar va maktabdan tashqari davlat ta’lim muassasalari pedagog kadrlarini attestatsiyadan o‘tkazish tartibi to‘g‘risidagi nizomni tasdiqlash haqida” 2016-yil 7-apreldagi 107-son qarorida (O‘zbekiston Respublikasi QHT, 2016-y., 15-son, 146-modda):

a) 2-bandning uchinchi xatboshidagi va 3-banddagi “Davlat test markazi” so‘zlari “Ta’lim sifatini nazorat qilish davlat inspeksiyasi” so‘zlari bilan almashtirilsin;

b) Ilovada:

11-bandning birinchi xatboshidagi “Davlat test markazi (keyingi o‘rinlarda — Davlat test markazi)” so‘zlari “Ta’lim sifatini nazorat qilish davlat inspeksiyasi (keyingi o‘rinlarda — Davlat inspeksiyasi)” so‘zlari bilan almashtirilsin;

15-bandning birinchi xatboshidagi, 36, 37, 50, 56-bandlardagi va 1-ilovadagi “Davlat test markazi” so‘zlari “Davlat inspeksiyasi” so‘zlari bilan almashtirilsin;

21-bandning ikkinchi xatboshidagi va 27-bandning ikkinchi xatboshidagi “Davlat test markazining” so‘zlari “Davlat inspeksiyasining” so‘zlari bilan almashtirilsin;

22-bandning to‘rtinchi xatboshidagi va 28-bandning uchinchi xatboshidagi “Davlat test markaziga” so‘zlari “Davlat inspeksiyasiga” so‘zlari bilan almashtirilsin;

quyidagi mazmundagi 36¹-band bilan to‘ldirilsin:

“36¹. Birinchi va oliy malaka toifali, yetakchi va bosh o‘qituvchi lavozimidagi hamda mazkur malaka toifalari va lavozimlarga talabgor pedagog kadrlarni attestatsiyadan o‘tkazganlik uchun eng kam oylik ish haqining 100 foizi miqdorida yig‘im undiriladi.

Attestatsiyadan o‘tkazganlik uchun yig‘im O‘zbekiston Respublikasining Davlat budjeti daromadiga o‘tkaziladi.

Ariza beruvchi berilgan arizadan voz kechgan taqdirda hamda pedagog kadrga nisbatan “Attestatsiyadan o‘tmadi, tegishli malaka toifasi yoki lavozimi tushirilsin”, mutaxassis, oliy yoki o‘rta maxsus, kasb-hunar ma’lumotli o‘qituvchi lavozimi bo‘yicha “Attestatsiyadan o‘tmadi, mutaxassis (oliy yoki o‘rta maxsus, kasb-hunar ma’lumotli o‘qituvchi) lavozimiga muvofiq emas” qarori qabul qilinganda to‘langan yig‘im summasi qaytarilmaydi.

Pedagog kadrlar attestatsiyaning biror bosqichida uzrli sababga (mehnatga layoqatsizlik varaqasi, ta’limni boshqarish bo‘yicha maxsus vakolat berilgan davlat organi yoki ta’lim muassasalari rahbarlari ma’lumotnomasi) ko‘ra kelmagan bo‘lsa, ularning attestatsiyasi boshqa muddatga ko‘chirilgan taqdirda yig‘im summasi takroran undirilmaydi.”;

51-banddagi “Davlat test markazi direktori” so‘zlari “Davlat inspeksiyasi boshlig‘i” so‘zlari bilan almashtirilsin.