Oʻzbekiston Respublikasi Prezidentining “Oʻzbekiston Respublikasida raqamli teleeshittirishlarga texnik va texnologik jihatdan oʻtish davlat dasturi toʻgʻrisida” 2012-yil 17-apreldagi PQ-1741-son qarorini bajarish yuzasidan, raqamli teleeshittirishlarga toʻliq oʻtishni taʼminlash va yer usti analog teleeshittirishlarni bosqichma-bosqich toʻxtatish maqsadida Vazirlar Mahkamasi qaror qiladi:

1. Quyidagilar:

a) Oʻzbekiston Respublikasi Prezidentining “Oʻzbekiston Respublikasida yer usti raqamli televideniyeni rivojlantirish uchun Yaponiya xalqaro hamkorlik banki va Yaponiya tijorat banklarining imtiyozli kreditini jalb etish chora-tadbirlari toʻgʻrisida” 2014-yil 3-apreldagi PQ-2157-son qaroriga muvofiq Oʻzbekiston Respublikasi Axborot texnologiyalari va kommunikatsiyalarini rivojlantirish vazirligining “Radioaloqa, radioeshittirish va televideniye” DUK tomonidan “Oʻzbekiston Respublikasida yer usti raqamli eshittirish tarmogʻini rivojlantirish” investitsiya loyihasini amalga oshirish doirasida 2017-yil oxirigacha:

respublikaning barcha hududlarida 90 komplekt yuqori quvvatli va 404 komplekt kam quvvatli raqamli teleeshittirish uzatkichlarini oʻrnatish va foydalanishga topshirish hisobiga respublikaning barcha aholi punktlari raqamli teleeshittirishlar bilan qamrab olinishini taʼminlash;

aholi raqamli teleeshittirish xizmatlaridan keng foydalanishini, shu jumladan xorijiy yoʻldosh aloqasi operatoridan yoʻldosh segmentini ijaraga olish hisobiga davlat teleradiodasturlarining umumfoydalanishdagi ijtimoiy paketini uzoq va borish qiyin boʻlgan aholi punktlarigacha yetkazishni taʼminlash nazarda tutilganligi;

b) Oʻzbekiston Respublikasi Prezidentining “2017 — 2021-yillarda elektrotexnika sanoatini boshqarishni yanada takomillashtirish, jadal rivojlantirish va diversifikatsiyalash chora-tadbirlari toʻgʻrisida” 2017-yil 13-fevraldagi PQ-2772-son qaroriga muvofiq “Oʻzeltexsanoat” AK korxonalari tomonidan 5 yil mobaynida 3,0 mln ta raqamli televizorlar ishlab chiqarish va yigʻish nazarda tutilganligi maʼlumot uchun qabul qilinsin.

2. Oʻzbekiston Respublikasida yer usti analog teleeshittirishlarni bosqichma-bosqich toʻxtatish jadvali ilovaga* muvofiq tasdiqlansin.

3. Axborot faoliyati va maʼlumotlar uzatishni takomillashtirish va samaradorligini oshirish boʻyicha idoralararo muvofiqlashtirish komissiyasi:

davlat va xoʻjalik boshqaruvi organlari, mahalliy davlat hokimiyati organlari hamda tashkiliy-huquqiy shaklidan qatʼi nazar, xoʻjalik subyektlarining respublikada analog teleeshittirishlarni toʻxtatishni samarali tashkil etish masalalari boʻyicha faoliyati muvofiqlashtirilishini taʼminlasin;

manfaatdor davlat boshqaruvi organlari bilan birgalikda xoʻjalik subyektlarining nodavlat telekanallarini yer usti raqamli teleeshittirishlar tarmogʻiga kiritish tartibini belgilasin;

zarurat boʻlganda, hududlarda analog teleeshittirishlarni oʻchirishning ushbu qarorga ilovada koʻrsatilgan yakuniy muddatlarining oʻzgarishiga yoʻl qoʻymagan holda, yer usti analog teleeshittirishlarni toʻxtatish muddatlariga oʻzgartirish kiritsin.

4. Oʻzbekiston Respublikasi tijorat banklariga:

“Mahalla” xayriya jamoat fondini jalb etgan holda aholiga, shu jumladan aholining kam taʼminlangan qatlamlariga va pensionerlarga raqamli teleeshittirishlarni qabul qiluvchi televizorlar, tyunerlar va boshqa qurilmalarni xarid qilish uchun imtiyozli isteʼmol kreditlari berilishini kengaytirish tavsiya etilsin;

5. Oʻzbekiston milliy teleradiokompaniyasi, Oʻzbekiston Milliy axborot agentligi, Oʻzbekiston matbuot va axborot agentligi, Axborot texnologiyalari va kommunikatsiyalarini rivojlantirish vazirligi, Qoraqalpogʻiston Respublikasi Vazirlar Kengashi, viloyatlar va Toshkent shahri hokimliklari raqamli teleeshittirishlarga oʻtishning maqsad va afzalliklari aholi orasida keng tushuntirilishini, respublika hududida raqamli teleeshittirishlar qamrovini kengaytirishi va yer usti analog teleeshittirishlarni bosqichma-bosqich toʻxtatishni taʼminlashga doir amalga oshirilayotgan ishlar, shuningdek raqamli teleeshittirishlar dasturlarini qabul qilishning zarur shartlari muntazam yoritib borilishini taʼminlasinlar.

6. Mazkur qarorning bajarilishini nazorat qilish Oʻzbekiston Respublikasi Vazirlar Mahkamasining Madaniyat, axborot tizimlari va telekommunikatsiyalar masalalari axborot-tahlil departamentiga yuklansin.