O‘zbekiston Respublikasi Prezidentining “Qishloq va suv xo‘jaligi tarmoqlari uchun muhandis-texnik kadrlar tayyorlash tizimini tubdan takomillashtirish chora-tadbirlari to‘g‘risida” 2017-yil 24-maydagi PQ-3003-son qarorini bajarish yuzasidan Vazirlar Mahkamasi qaror qiladi:

1. O‘zbekiston Respublikasi Qishloq va suv xo‘jaligi vazirligi huzuridagi Qishloq xo‘jaligi yo‘nalishidagi oliy ta’lim muassasalarini qo‘llab-quvvatlash jamg‘armasi mablag‘larini shakllantirish va ulardan foydalanish tartibi to‘g‘risidagi nizom ilovaga muvofiq tasdiqlansin.

2. Mazkur qarorning bajarilishini nazorat qilish O‘zbekiston Respublikasi Bosh vazirining o‘rinbosari — qishloq va suv xo‘jaligi vaziri Z.T. Mirzayev zimmasiga yuklansin.

1. Ushbu Nizom O‘zbekiston Respublikasi Qishloq va suv xo‘jaligi vazirligi huzuridagi Qishloq xo‘jaligi yo‘nalishidagi oliy ta’lim muassasalarini qo‘llab-quvvatlash jamg‘armasi (keyingi o‘rinlarda Jamg‘arma deb ataladi) mablag‘larini shakllantirish va ulardan foydalanish, shuningdek Jamg‘arma mablag‘larini boshqarish tartibini belgilaydi.

2. Jamg‘arma Qishloq va suv xo‘jaligi vazirligi huzuridagi oliy ta’lim muassasalarini, shu jumladan ularning tuzilmasiga kiruvchi ilmiy-tadqiqot institutlarining (keyingi o‘rinlarda oliy ta’lim muassasalari deb ataladi) moddiy-texnika bazasini mustahkamlashga yo‘naltirilgan mablag‘larni jamlaydi.

3. Jamg‘arma yuridik shaxs hisoblanmaydi.

4. Quyidagilar Jamg‘arma mablag‘laridan foydalanishning yo‘nalishlari hisoblanadi:

o‘quv va ilmiy-laboratoriya binolari va korpuslarini, sport inshootlarini va ijtimoiy-muhandislik infratuzilmasi obyektlarini qurish, rekonstruksiya qilish, mukammal ta’mirlash ishlarini moliyalashtirish;

o‘quv-ilmiy laboratoriya bazasini zamonaviy asbob-uskunalar va jihozlar, axborot-kommunikatsiya texnologiyalari bilan jihozlash, jahon ta’lim resurslaridan, ilg‘or ilmiy adabiyotlar elektron kataloglaridan va ma’lumotlar bazalaridan foydalanish xarajatlarini qoplash.

5. Jamg‘arma mablag‘lari quyidagi manbalar hisobiga shakllantiriladi:

polietilen granulalarga qo‘shimcha foyda solig‘i mablag‘larining bir qismi, oliy ta’lim muassasalarini qurish, rekonstruksiya qilish, mukammal ta’mirlash va jihozlash ishlarini moliyalashtirish uchun zarur bo‘lgan mablag‘lar;

qishloq va suv xo‘jaligi, shu jumladan kadrlarni tayyorlash va qayta tayyorlashga yo‘naltirilgan xalqaro va xorijiy hukumat moliya institutlarining imtiyozli kredit (qarz) mablag‘lari;

jismoniy va yuridik shaxslar, xalqaro tashkilotlarning homiylik xayriyalari, grantlari;

qonun hujjatlarida taqiqlanmagan boshqa manbalar.

6. Polietilen granulalarga qo‘shimcha foyda solig‘i mablag‘larining bir qismi hisobidan ajratiladigan mablag‘lar Jamg‘armaga har oyda, o‘quv va ilmiy-laboratoriya binolarini, sport inshootlarini va ijtimoiy-muhandislik infratuzilmasi obyektlarini, shu jumladan birgalikda foydalaniladigan oliy ta’lim muassasalararo ilmiy-laboratoriya komplekslarini qurish, rekonstruksiya qilish, mukammal ta’mirlash va jihozlash ishlarini moliyalashtirish uchun mablag‘larga bo‘lgan ehtiyojga ko‘ra O‘zbekiston Respublikasi Qishloq va suv xo‘jaligi vazirligining buyurtmasi asosida O‘zbekiston Respublikasi Moliya vazirligi tomonidan ajratiladi.

7. Xalqaro moliya tashkilotlari hamda donorlarning grantlari va imtiyozli kreditlari, homiylarning, shu jumladan O‘zbekiston Respublikasi norezidentlari mablag‘lari Jamg‘armaning shaxsiy g‘azna hisobvaraqlariga qonun hujjatlarida belgilangan tartibda tushadi.

8. Jamg‘arma mablag‘larini boshqarish O‘zbekiston Respublikasi Prezidentining 2017-yil 24-maydagi PQ-3003-son qarori bilan tasdiqlangan O‘zbekiston Respublikasi Qishloq va suv xo‘jaligi vazirligi huzuridagi Qishloq xo‘jaligi yo‘nalishidagi oliy ta’lim muassasalarini qo‘llab-quvvatlash jamg‘armasi kengashi (keyingi o‘rinlarda Jamg‘arma kengashi deb ataladi) tomonidan amalga oshiriladi.

9. Jamg‘arma kengashi:

har yili Jamg‘armaning daromadlari va xarajatlari prognozi parametrlarini, shuningdek Jamg‘armaga tushgan va sarflangan mablag‘lar hisobotini tasdiqlaydi;

o‘quv va ilmiy-laboratoriya binolari va korpuslarini, sport inshootlarini va ijtimoiy-muhandislik infratuzilmasi obyektlarini, shu jumladan birgalikda foydalaniladigan oliy ta’lim muassasalararo ilmiy-laboratoriya komplekslarini qurish, rekonstruksiya qilish, mukammal ta’mirlash va jihozlashning aniq manzilli dasturiga kiritiladigan obyektlar bo‘yicha loyiha-smeta hujjatlarini ishlab chiqish va bosh pudrat tashkilotlarini tanlash yuzasidan tanlov savdolarini belgilangan tartibda tashkil etadi;

Jamg‘arma mablag‘lari hisobidan moliyalashtiriladigan o‘quv-ilmiy laboratoriya bazasini zamonaviy asbob-uskunalar va jihozlar, axborot-kommunikatsiya texnologiyalari bilan jihozlash yuzasidan tanlov savdolarini belgilangan tartibda tashkil etadi;

jahon ta’lim resurslaridan, ilg‘or ilmiy adabiyotlar elektron kataloglaridan va ma’lumotlar bazalaridan foydalanish uchun talab etiladigan xarajatlarni Jamg‘arma mablag‘lari hisobidan qoplashni nazarda tutgan holda O‘zbekiston Respublikasi Qishloq va suv xo‘jaligi vazirligi takliflari asosida ushbu ma’lumotlar bazasi ro‘yxatini tasdiqlaydi;

Jamg‘armaga xalqaro va xorijiy hukumat moliya institutlarining imtiyozli kredit (qarz) mablag‘lari, jismoniy va yuridik shaxslarning, boshqa xorijiy donorlarning grantlari va ixtiyoriy badallarini jalb etishda ko‘maklashadi;

Jamg‘arma yuklangan vazifalar bilan bog‘liq masalalarni hal etishga manfaatdor vazirliklar, idoralar, nodavlat notijorat tashkilotlarini jalb qiladi;

Jamg‘arma daromadlarini to‘liq shakllantirish hamda uning mablag‘laridan maqsadli foydalanish yuzasidan O‘zbekiston Respublikasi Qishloq va suv xo‘jaligi vazirligi va Jamg‘arma faoliyatini nazorat qiladi;

Jamg‘arma mablag‘larini shakllantirish hamda ulardan foydalanish bilan bog‘liq boshqa vakolatlarni amalga oshiradi.

10. Jamg‘armaning ishchi organi funksiyalari O‘zbekiston Respublikasi Qishloq va suv xo‘jaligi vazirligi tuzilmasida tashkil etilgan Jamg‘arma mablag‘larini boshqarish sektoriga yuklanadi.

11. Quyidagilar O‘zbekiston Respublikasi Qishloq va suv xo‘jaligi vazirligining Jamg‘arma faoliyati bilan bog‘liq asosiy funksiyalari hisoblanadi:

Jamg‘arma daromadlari va xarajatlarining har yillik prognoz parametrlarini, shuningdek ularning bajarilishi bo‘yicha hisobotni Jamg‘arma Kengashiga taqdim etish uchun tayyorlash;

har yili kelgusi yilning manzilli dasturiga kiritiladigan obyektlar bo‘yicha loyiha-smeta hujjatlari ishlab chiqilishini va bosh pudrat tashkilotlarini tanlash yuzasidan tanlov savdolari o‘tkazilishini ta’minlash;

oliy ta’lim muassasalarining o‘quv-ilmiy laboratoriya bazasini zamonaviy asbob-uskunalar va jihozlar, axborot-kommunikatsiya texnologiyalari bilan jihozlash tadbirlarini moliyalashtirishni tashkil etish;

jahon ta’lim resurslaridan, ilg‘or ilmiy adabiyotlar elektron kataloglaridan va ma’lumotlar bazalaridan foydalanishni ta’minlash xarajatlari to‘lanishini ta’minlash;

Jamg‘arma mablag‘larini bank depozitlariga joylashtirish yo‘li bilan ularni boshqarish;

Jamg‘arma mablag‘laridan maqsadli foydalanilishi yuzasidan tizimli monitoring olib borish.

12. Jamg‘arma xarajatlari har chorakda, O‘zbekiston Respublikasi Prezidentining “Qishloq va suv xo‘jaligi tarmoqlari uchun muhandis-texnik kadrlar tayyorlash tizimini tubdan takomillashtirish chora-tadbirlari to‘g‘risida” 2017-yil 24-maydagi PQ-3003-son qarori bilan tasdiqlangan 2017 — 2021-yillarda qishloq va suv xo‘jaligi sohasidagi oliy ta’lim muassasalarini qurish, rekonstruksiya qilish, mukammal ta’mirlash va jihozlash dasturi (keyingi o‘rinlarda Dastur deb ataladi) parametrlari bilan bog‘langan holda, Jamg‘arma kengashi tomonidan tasdiqlanadigan daromadlar va xarajatlarning prognoz balansi asosida amalga oshiriladi.

13. Jamg‘arma mablag‘lari hisobiga oliy ta’lim muassasalari obyektlarini qurish, rekonstruksiya qilish, mukammal ta’mirlash bo‘yicha buyurtmachi O‘zbekiston Respublikasi Qishloq va suv xo‘jaligi vazirligining tegishli “Qurilayotgan korxonalar birlashgan direksiyasi” davlat unitar korxonalari, “O‘zagrosanoatloyiha” aksiyadorlik jamiyati esa — bosh loyihalashtirish tashkiloti hisoblanadi.

14. O‘quv-ilmiy laboratoriya bazasini zamonaviy asbob-uskunalar va jihozlar, axborot-kommunikatsiya texnologiyalari bilan jihozlash bo‘yicha buyurtmachi funksiyasi O‘zbekiston Respublikasi Qishloq va suv xo‘jaligi vazirligi tomonidan amalga oshiriladi.

15. Jamg‘arma mablag‘laridan foydalanish belgilangan tartibda shakllantirilgan va tasdiqlangan daromadlar va xarajatlar smetalari asosida:

oliy ta’lim muassasalari obyektlarini qurish, rekonstruksiya qilish va mukammal ta’mirlash bo‘yicha — qonun hujjatlarida belgilangan tartibda o‘tkazilgan qurish, rekonstruksiya qilish va mukammal ta’mirlash bo‘yicha tanlov savdolari natijalari asosida O‘zbekiston Respublikasi Qishloq va suv xo‘jaligi vazirligining tegishli “Qurilayotgan korxonalar birlashgan direksiyasi” davlat unitar korxonalari tomonidan;

o‘quv-ilmiy laboratoriya bazasini zamonaviy asbob-uskunalar va jihozlar, axborot-kommunikatsiya texnologiyalari bilan jihozlash — belgilangan tartibda o‘tkazilgan tanlov asosida O‘zbekiston Respublikasi Qishloq va suv xo‘jaligi vazirligi tomonidan;

jahon ta’lim resurslaridan, ilg‘or ilmiy adabiyotlar elektron kataloglaridan va ma’lumotlar bazalaridan foydalanish — tasdiqlangan ma’lumotlar bazalari ro‘yxati asosida O‘zbekiston Respublikasi Qishloq va suv xo‘jaligi vazirligi tomonidan amalga oshiriladi.

16. Bepul asosda olingan o‘quv va ilmiy uskuna, sarflash materiallari va butlovchi buyumlardan maqsadli va samarali foydalanish yuzasidan mas’uliyat tegishli oliy ta’lim muassasalari rahbarlari zimmasiga yuklanadi.

17. Xarajatlarni to‘lash:

oliy ta’lim muassasalarini qurish, rekonstruksiya qilish, mukammal ta’mirlash bo‘yicha xarajatlar — qat’iyan xarajatlar smetalarida nazarda tutilgan mablag‘lar doirasida va oliy ta’lim muassasalarini qurish, rekonstruksiya qilish va mukammal ta’mirlash bo‘yicha qurilishlarning tasdiqlangan aniq manzilli ro‘yxatlariga muvofiq;

o‘quv-ilmiy laboratoriya bazasini zamonaviy asbob-uskunalar va jihozlar, axborot-kommunikatsiya texnologiyalari bilan jihozlash — belgilangan tartibda o‘tkazilgan tanlov natijalari va tuzilgan shartnomalarga muvofiq;

jahon ta’lim resurslaridan, ilg‘or ilmiy adabiyotlar elektron kataloglaridan va ma’lumotlar bazalaridan foydalanishni ta’minlash bo‘yicha xarajatlar — O‘zbekiston Respublikasi Qishloq va suv xo‘jaligi vazirligi jahon ta’lim resurslari, ilmiy adabiyotlar elektron katalogining va ma’lumotlar bazasining egasi bo‘lgan muassasa o‘rtasida tegishli ma’lumotlar bazasiga obuna bo‘lish to‘g‘risida tuziladigan shartnoma asosida amalga oshiriladi.

18. Oliy ta’lim muassasalarini qurish, rekonstruksiya qilish va mukammal ta’mirlash bo‘yicha xarajatlarni to‘lash — oliy ta’lim muassasalarini qurish, rekonstruksiya qilish va mukammal ta’mirlashning aniq manzilli ro‘yxatlari bo‘yicha belgilangan limitlar doirasida hamda tanlov savdolari natijalari hisobga olingan holda tuzilgan shartnomalar bo‘yicha O‘zbekiston Respublikasi Qishloq va suv xo‘jaligi vazirligining tegishli “Qurilayotgan korxonalar birlashgan direksiyasi” davlat unitar korxonalarining to‘lov topshiriqnomalari asosida O‘zbekiston Respublikasi Moliya vazirligining G‘aznachiligi tomonidan amalga oshiriladi. Shartnomalarda quyidagilar nazarda tutiladi:

qurish, rekonstruksiya qilish va mukammal ta’mirlashning dastlabki ikki oyi mobaynida qurishning prognozlashtirilayotgan yili uchun tanlov savdolari natijalari bo‘yicha aniqlangan ishlar qiymatining 30 foizigacha miqdorida avans to‘lovlarini teng ulushlarda amalga oshirish;

ajratilgan avansni mutanosib ravishda ushlab qolishni hisobga olgan holda, bajarilgan ishlar qiymatining 95 foizi miqdorida har oyda joriy moliyalashtirish;

qolgan 5 foizni pudratchiga shartnomada qayd etilgan kafolat muddati tamom bo‘lgandan keyin to‘lash.

19. Oliy ta’lim muassasalarini jihozlash bo‘yicha xarajatlarni to‘lash nazarda tutilgan mablag‘lar doirasida va Moliya vazirligining G‘aznachiligida ro‘yxatdan o‘tkazilgan shartnomalar bo‘yicha O‘zbekiston Respublikasi Qishloq va suv xo‘jaligi vazirligining to‘lov topshiriqnomalari asosida O‘zbekiston Respublikasi Moliya vazirligining G‘aznachiligi tomonidan amalga oshiriladi. Shartnomalarda quyidagilar nazarda tutiladi:

shartnoma umumiy summasining 30 foizi miqdorida avans to‘lash;

ajratilgan avans to‘lovlarini ushlab qolgan holda, yetkazib berishning amaldagi hajmidan kelib chiqib, har oyda joriy moliyalashtirish.

20. Jamg‘armaning joriy yilda foydalanilmagan mablag‘lari olib qo‘yilmaydi va Dasturni keyingi yilda moliyalashtirish uchun sarflanadi.

21. Jamg‘arma mablag‘larining tushishi va undan foydalanishning buxgalteriya hisobini yuritish, shuningdek hisobotlarni tuzish qonun hujjatlarida belgilangan tartibda O‘zbekiston Respublikasi Qishloq va suv xo‘jaligi vazirligi tomonidan amalga oshiriladi.

22. Jamg‘arma mablag‘laridan maqsadli foydalanilish ustidan nazorat O‘zbekiston Respublikasi Moliya vazirligi tomonidan amalga oshiriladi.