405-сон 21.06.2017. Tibbiy faoliyatni litsenziyalash tartibini yanada takomillashtirish chora-tadbirlari toʻgʻrisida

Oʻzbekiston Respublikasi Vazirlar Mahkamasining qarori, 21.06.2017 yildagi 405-son

Kuchga kirish sanasi

01.07.2017

Рус

Eng

Ўзб

O’zb

O‘zb|Рус

Hujjat 22.10.2019 sanasi holatiga

Hujjat 01.03.2022 sanasi holatiga

Oʻzbekiston Respublikasi Vazirlar Mahkamasining

qarori

Tibbiy faoliyatni litsenziyalash tartibini yanada takomillashtirish chora-tadbirlari toʻgʻrisida

Oʻzbekiston Respublikasining “Faoliyatning ayrim turlarini litsenziyalash toʻgʻrisida”gi Qonuniga muvofiq hamda Oʻzbekiston Respublikasi Prezidentining “Sogʻliqni saqlash sohasida xususiy sektorni yanada rivojlantirish chora-tadbirlari toʻgʻrisida” 2017-yil 1-apreldagi PQ-2863-son qarorini bajarish maqsadida Vazirlar Mahkamasi qaror qiladi:

1. Tibbiy faoliyatni litsenziyalash tartibi toʻgʻrisidagi nizom ilovaga muvofiq tasdiqlansin.

2. Belgilab qoʻyilsinki:

Litsenziya talablari va shartlari litsenziya olish yoki litsenziyaning amal qilish muddatini uzaytirish uchun yangidan ariza bergan tibbiy muassasalarga, shuningdek litsenziyani qayta rasmiylashtirish uchun murojaat qilgan faoliyat yurituvchi litsenziatlarga tatbiq etiladi;

tibbiy faoliyatni amalga oshirish uchun avval berilgan litsenziyalar ularning amal qilish muddati tugagungacha amal qiladi.

3. Oʻzbekiston Respublikasi Sogʻliqni saqlash vazirligi bir oy muddatda quyidagilarni tasdiqlasin:

ular boʻyicha tibbiy faoliyat amalga oshirilayotgan tibbiy ixtisosliklar turlari nomenklaturasi;

tibbiy ixtisoslashuvning tegishli turini amalga oshirish uchun zarur boʻlgan moddiy-texnik baza, asbob-uskunalar va boshqa texnik vositalar, shu jumladan tibbiy texnikaga eng kam talablar, shuningdek tibbiy tashkilotning turidan kelib chiqib aniqlanadigan tibbiy uskunaning maʼnan eskirganligi darajasini aniqlovchi mezonlar;

tegishli mutaxassislikka ega vrachlar tibbiy ixtisoslashuvining litsenziyalanadigan turlari boʻyicha vrachlar lavozimini egallashi mumkin boʻlgan tibbiy mutaxassisliklar roʻyxati;

litsenziyani olish, uzaytirish va qayta rasmiylashtirish boʻyicha arizalar shakllari;

litsenziya berish yoki litsenziya berishni rad etish toʻgʻrisidagi ekspert xulosasining shakli.

4. Oʻzbekiston Respublikasi Sogʻliqni saqlash vazirligi:

manfaatdor vazirliklar va idoralar bilan birgalikda oʻzlari qabul qilgan normativ-huquqiy hujjatlarni bir oy muddatda ushbu qarorga muvofiqlashtirsin;

ikki oy muddatda Oʻzbekiston xususiy amaliyot vrachlari uyushmasi bilan birgalikda nodavlat tibbiy tashkilotlar oʻrtasida ushbu qaror qoidalarini bajarish boʻyicha keng tushuntirish ishlarini amalga oshirsin.

5. Ushbu qaror 2017-yil 1-iyuldan boshlab kuchga kiradi.

6. Vazirlar Mahkamasining “Tibbiy faoliyatni litsenziyalash tartibi toʻgʻrisida” 2012-yil 29-martdagi 92-son qarorining (Oʻzbekiston Respublikasi QT, 2012-yil, 3-son, 21-modda) 1-bandi, shuningdek qarorga 1 va 2- ilovalar 2017-yil 1-iyuldan boshlab oʻz kuchini yoʻqotgan deb hisoblansin.

7. Mazkur qarorning bajarilishini nazorat qilish Oʻzbekiston Respublikasi sogʻliqni saqlash vaziri A.K. Shadmanov zimmasiga va Oʻzbekiston Respublikasi Vazirlar Mahkamasining Sogʻliqni saqlash, ekologiya, atrof muhitni muhofaza qilish, jismoniy tarbiya va sport masalalari axborot-tahlil departamentiga yuklansin.

Oʻzbekiston Respublikasining Bosh vaziri A. ARIPOV

Toshkent sh.,

2017-yil 21-iyun,

405-son

Vazirlar Mahkamasining 2017-yil 21-iyundagi 405-son qaroriga
ILOVA

Tibbiy faoliyatni litsenziyalash tartibi toʻgʻrisida

NIZOM

1-bob. Umumiy qoidalar

1. Ushbu Nizom tibbiy faoliyatni litsenziyalash tartibini belgilaydi.

2. Ushbu Nizomda quyidagi asosiy tushunchalar qoʻllaniladi:

diagnostika — mijozning shikoyatlari, anamnezi va koʻrik maʼlumotlarini toʻplash va tahlil qilish, tashxisni aniqlash maqsadida laboratoriya, instrumental, patalogo-anatomik va boshqa koʻriklarni oʻtkazish, mijozni davolash boʻyicha tadbirlarni tanlash va (yoki) ushbu tadbirlarning amalga oshirilishini nazorat qilish boʻyicha amalga oshiriladigan, holatni oydinlashtirishga yoki kasallikning bor yoki yoʻqligi faktini aniqlashga yoʻnaltirilgan tibbiy aralashuvlar majmui;

konsultatsiya — tibbiy mutaxassisning kasallikni aniqlash, bartaraf etish va namoyon boʻlish shakllari yoki holatini yengillashtirish boʻyicha professional maslahati;

davolash — tibbiy mutaxassisning koʻrsatmasiga koʻra bajariladigan, u yoki bu kasallik yoki jarohat, patologik holat yoki organizm faoliyatining boshqacha tarzda buzilishi alomatlarini yengillashtirish, yoʻqotish yoki bartaraf etish maqsadida bajariladigan tibbiy aralashuvlar majmuasi, hayotiy faoliyatning buzilgan jarayonlarini normallashtirish va sogʻlomlashtirish, sogʻliqni, mehnatga layoqatni va turmush sifatini tiklash;

tibbiy faoliyat — maxsus tibbiy maʼlumot va koʻnikmalarni talab qiluvchi kasalliklarning profilaktikasi, diagnostikasi, davolash va mijozning reabilitatsiyasiga yoʻnaltirilgan faoliyat;

ambulatoriya turidagi tibbiy tashkilotlar — tunu-kun kuzatishga muhtoj boʻlmagan mijozlarga davolash-diagnostika yordami koʻrsatiladigan tashkilot;

statsionar turdagi tibbiy tashkilotlar — tunu-kun kuzatish, parvarish qilish va davolash-saqlash rejimiga muhtoj boʻlgan bemorlarga davolash-diagnostika yordami koʻrsatuvchi tashkilot;

nodavlat tibbiy tashkilotlar — faoliyati litsenziyalanadigan, davlat sogʻliqni saqlash tizimiga kirmaydigan tashkilotlar;

mijoz — kasalligi bor yoki yoʻqligidan va holatidan qatʼi nazar, unga yordam koʻrsatilayotgan yoki tibbiy yordam soʻrab murojaat qilgan jismoniy shaxs;

profilaktika — mijozning sogʻligʻini saqlash va mustahkamlashga yoʻnaltirilgan, sogʻlom turmush tarzini shakllantirish, kasalliklarning yuzaga kelishi va (yoki) tarqalishining oldini olish, ularni barvaqt aniqlash, ularning yuzaga kelishi va rivojlanishi sabablarini aniqlashdan iborat boʻlgan hamda odam sogʻligʻiga u yashayotgan muhit omillarining salbiy taʼsirini yoʻqotishga qaratilgan tadbirlar majmui;

reabilitatsiya — boshdan kechirilgan kasallikdan soʻng qoʻllaniladigan, odam organizmining kasallik yoki jarohat tufayli buzilgan yoki toʻliq yoʻqotilgan normal ruhiy va fiziologik funksiyalari (ehtiyojlari)ni, uning mehnatga layoqatini eng yuqori darajada tiklash yoki oʻrnini bosishga yoʻnaltirilgan tadbirlar majmui.

3. Tibbiy faoliyatni litsenziyalash ushbu Nizomga 1 va 1a-ilovalaridagi sxemalar boʻyicha amalga oshiriladi.

Tibbiy faoliyatni litsenziyalash litsenziya talabgorining xohishiga koʻra, umumiy (1-ilova) yoki tezlashtirilgan (1a-ilova) tartibda amalga oshiriladi.

4. Tibbiy faoliyatni litsenziyalash Oʻzbekiston Respublikasi Sogʻliqni saqlash vazirligi (keyingi oʻrinlarda litsenziyalovchi organ deb ataladi) tomonidan, xalq tabobati usullarini qoʻllagan holda tibbiy faoliyatni litsenziyalash litsenziyalovchi organ huzurida tashkil etilgan xalq tabobati usullaridan foydalangan holda Tibbiy xizmat koʻrsatish faoliyatini litsenziyalash maxsus komissiyasi tomonidan Davlat xizmatlari markazlari (keyingi oʻrinlarda markazlar deb ataladi) yoki Oʻzbekiston Respublikasining Yagona interfaol davlat xizmatlari portali (keyingi oʻrinlarda Yagona portal deb ataladi) orqali amalga oshiriladi.

Xalq tabobati usulida xizmat koʻrsatish faoliyatini litsenziyalash tibbiy faoliyatni litsenziyalash uchun belgilangan tartibda (tibbiy taʼlim maʼlumoti mavjudligi talabi bundan mustasno) amalga oshiriladi.

5. Tibbiy xizmatlar maslahatlar, diagnostika, davolash va reabilitatsiya shaklida tegishli ambulatoriya va statsionar turdagi tibbiy tashkilotlarda koʻrsatiladi.

Tibbiy faoliyat litsenziyalovchi organ tomonidan tasdiqlanadigan tibbiy ixtisoslashuv shakllari nomenklaturasiga (keyingi oʻrinlarda ixtisoslashuv shakllari deb ataladi) muvofiq amalga oshiriladi.

Tibbiy ixtisoslashuvning tegishli turini amalga oshirish uchun zarur boʻlgan moddiy-texnik baza, asbob-uskunalar va boshqa texnik vositalar, shu jumladan tibbiy texnikaga eng kam talablar (keyingi oʻrinlarda kam talablar deb ataladi), shuningdek tibbiy asbob-uskunaning maʼnan eskirganligi darajasini aniqlovchi mezonlar tibbiy tashkilotning turidan kelib chiqib, litsenziyalovchi organ tomonidan belgilanadi.

6. Tibbiy faoliyatni amalga oshirish uchun ushbu Nizomning 2-ilovasidagi shaklga muvofiq namunaviy (oddiy) litsenziyalar beriladi.

7. Tibbiy faoliyatni amalga oshirish uchun litsenziya (keyingi oʻrinlarda litsenziya deb ataladi) besh yil muddatga beriladi. Litsenziya litsenziyaga talabgorning arizasiga koʻra 5 yildan kam muddatga berilishi mumkin.

8. Litsenziya talabgorlari litsenziya talablariga va ushbu Nizomda nazarda tutilgan shartlarga muvofiq boʻlgan yuridik shaxslar boʻlishi lozim.

9. Oʻzbekiston Respublikasi Prezidenti yoki Oʻzbekiston Respublikasi Vazirlar Mahkamasining qarorlariga binoan tashkil etilgan davlat tibbiy unitar korxonalari va muassasalari, ularning tibbiy faoliyati Oʻzbekiston Respublikasi Prezidenti yoki Oʻzbekiston Respublikasi Vazirlar Mahkamasining qarorlarida nazarda tutilgan taqdirda litsenziya olmasdan tibbiy faoliyat yuritishga haqlidir. Ushbu qoida sanab oʻtilgan tashkilotlarni litsenziya talablari va shartlarini (mutaxassislarning malakaviy toifasiga nisbatan litsenziya talablari bundan mustasno), shuningdek tibbiy faoliyatni amalga oshirish boʻyicha qonunchilikda nazarda tutilgan boshqa talablarni bajarishdan ozod etmaydi.

2-bob. Litsenziya talablari va shartlari

10. Quyidagilar tibbiy faoliyatni amalga oshirish boʻyicha litsenziya talablari va shartlari hisoblanadi:

a) quyidagilarning mavjudligi:

bosh shifokorda — oliy tibbiy maʼlumot va malakaviy toifa, boshqa vrach-mutaxassislarda (oliy tibbiy taʼlim maʼlumotiga ega boʻlmagan, xalq tabobati usullaridan foydalangan holda tibbiy faoliyat bilan shugʻullanuvchi shaxslardan tashqari) tegishli tibbiy mutaxassislik boʻyicha oliy maʼlumot va malakaviy toifa;

statsionar turdagi nodavlat tibbiy tashkilotda operatsiya boʻlimi tashkil etilgan taqdirda operatsiya qiluvchi vrachda — kamida birinchi malakaviy toifa;

xorijiy mutaxassis jalb etilgan taqdirda operatsiya qiluvchi vrachda kamida yetti yillik ish staji yoki yetakchi tibbiy muassasalar yoki klinikalarning operatsiya qiluvchi vrachining zarur kasbiy koʻnikmalarga ega ekanligini tasdiqlovchi tavsiyanomasi;

mutaxassis-vrachlarda belgilangan tartibda olingan malaka oshirish boʻyicha amaldagi sertifikat;

xorijiy bilim yurtini tamomlagan mutaxassisni ishga jalb qilishda xorijiy mamlakatlarda olingan maʼlumoti toʻgʻrisidagi hujjatlarning nostrifikatsiyasi (ekvivalentligini belgilash) haqidagi guvohnomaning davlat namunasi;

xorijiy bilim yurtini tamomlagan mutaxassisni ishga jalb qilishda mutaxassisligi boʻyicha malakasini tasdiqlovchi hujjat;

litsenziya talabgorida — talabgorga mulkchilik asosida yoki boshqa mulkiy huquqlar boʻyicha tegishli boʻlgan, sanitariya qoidalari, meʼyorlari va gigiyenik normativlarga mos boʻlgan litsenziyalangan faoliyat turini amalga oshirishga moʻljallangan xonalar;

litsenziya talabgorida — talabgorga mulkchilik asosida yoki boshqa mulkiy huquqlar boʻyicha tegishli boʻlgan, tegishli metrologik meʼyorlar va texnika xavfsizligi meʼyorlariga mos boʻlgan uskunalar va boshqa texnika vositalari, shu jumladan, tibbiy texnika;

terapevtik yoʻnalish va diagnostika ixtisosliklari boʻyicha tibbiy faoliyatni amalga oshirishda sterilizatsiya ishlarini bajarishga shartnoma yoki sterilizatsiya boʻlimi;

xirurgiya yoʻnalishidagi ixtisosliklar, shu jumladan, stomatologiya boʻyicha tibbiy faoliyatni yuritishda sterilizatsiya boʻlimi;

tibbiy xodimda — sterilizatsiya uskunasida ishlash boʻyicha oʻquvdan oʻtganligini tasdiqlovchi hujjat;

b) qonunchilikka qatʼiyan rioya qilgan holda tibbiy faoliyatni amalga oshirish, bunda quyidagilarga rioya qilish:

litsenziyalovchi organ tomonidan tasdiqlangan namunalar va shakllar boʻyicha birlamchi tibbiy hujjatlarni yuritish;

belgilangan tartibda Oʻzbekiston Respublikasi Sogʻliqni saqlash vazirligi huzuridagi Jamoatchilik sogʻligʻi va sogʻliqni saqlashni tashkil qilish boʻyicha ilmiy-tadqiqot instituti filiallariga statistika maʼlumotlarini taqdim etish;

sanitariya qoidalari, meʼyorlari va gigiyenik normativlarga rioya qilish;

litsenziyalovchi organ tomonidan tasdiqlangan va (yoki) xalqaro tibbiy amaliyotda sinovdan oʻtgan profilaktika usullari, diagnostika va davolash standartlariga rioya qilish;

litsenziyalovchi organ tomonidan ruxsat berilgan dorivor, dezinfeksiya va zararsizlantiruvchi vositalar, laboratoriya reagentlaridan foydalanish;

tibbiy faoliyatni qatʼiyan litsenziyada koʻrsatilgan doirada amalga oshirish;

v) ushbu Nizomda belgilangan holatlarda, muddatda va miqdorda yigʻimlarni, davlat bojlarini toʻlash.

3-bob. Litsenziyani olish uchun zarur boʻlgan hujjatlar

11. Litsenziya olish uchun talabgor markazlarga yoki Yagona portal orqali elektron shaklda litsenziyalovchi organ tomonidan belgilangan shaklga muvofiq litsenziya berilishi haqidagi arizani taqdim etadi va unda quyidagilarni koʻrsatadi:

yuridik shaxsning nomi va soliq toʻlovchining identifikatsiya raqami, joylashgan manzili (pochta manzili) va tibbiy faoliyatni amalga oshirish manzili, elektron pochtasi, bank rekvizitlari;

tibbiy tashkilotning turi va yuridik shaxs koʻrsatmoqchi boʻlgan ixtisoslashuvlar shakllari va koʻrsatilgan tibbiy faoliyat amalga oshiriladigan muddat;

litsenziya olish tartibi — umumiy yoki tezlashtirilgan tartib;

tasdiqlangan eng kam talablarga muvofiq tibbiy faoliyatni amalga oshirish uchun zarur boʻlgan uskunalar va boshqa texnika vositalari, shu jumladan, tibbiy texnikaning mavjudligi haqidagi maʼlumot.

12. Litsenziya talabgoridan ushbu Nizomning 11-bandida nazarda tutilmagan boshqa hujjatlarni, shu jumladan boshqa identifikatorli qoʻshimcha hujjatlar va maʼlumotlar taqdim etilishini talab qilishga hamda idoralararo axborot almashinuvida boshqa identifikatorlardan foydalanishga yoʻl qoʻyilmaydi.

13. Litsenziya beruvchi organ litsenziya berish uchun zarur boʻlgan, boshqa vakolatli organlarning ixtiyorida boʻlgan maʼlumotlarni mustaqil ravishda, belgilangan tartibda, shu jumladan elektron shaklda oladi, ushbu Nizomning 11-bandida nazarda tutilgan hujjatlar bundan mustasno.

14. Litsenziya talabgori litsenziya berish haqidagi arizani mazkur Nizomning 11-bandida nazarda tutilgan maʼlumotlarni koʻrsatgan holda markazga shaxsan topshiradi yoki Yagona portal orqali yetkazadi. Litsenziya berish haqidagi arizani mazkur Nizomning 11-bandida nazarda tutilgan maʼlumotlarni ilova qilgan holda elektron shaklda Yagona portal orqali yetkazishda ariza litsenziya talabgorining elektron raqamli imzosi bilan tasdiqlanadi. Litsenziya talabgori arizada topshirilgan arizani koʻrib chiqish natijalari boʻyicha qabul qilingan qaror haqidagi xabarnomani olish shaklini koʻrsatadi.

Litsenziyalarni berish, ularning amal qilish muddatini uzaytirish, ular boʻyicha xulosalarni tayyorlash Oʻzbekiston Respublikasi Sogʻliqni saqlash vazirligining Nodavlat tashkilotlari tibbiy faoliyatini litsenziyalash boshqarmasi (keyingi oʻrinlarda ishchi organ deb ataladi) tomonidan amalga oshiriladi.

Litsenziya talabgori tomonidan Yagona portal orqali taqdim etilgan, kerakli maʼlumotlar koʻrsatilgan ariza ishchi organning masʼul xodimi tomonidan qabul qilinadi va uning olinganligi xabar qilinadi, shuningdek avtomatik tarzda Yagona portalda roʻyxatga olinadi va takrorlanmaydigan roʻyxatga olish raqami beriladi.

Litsenziya talabgori tomonidan markaz orqali zarur maʼlumotlar koʻrsatilgani holda ariza berilganda, “yagona darcha” markazi xodimi ushbu arizani qonunchilikda belgilangan tartibda litsenziya beruvchi organga yuboradi.

15. Litsenziya talabgori ishonchli boʻlmagan yoki notoʻgʻri maʼlumotlar taqdim etilgani uchun qonunchilikka muvofiq javob beradi.

4-bob. Arizani koʻrib chiqish va litsenziya berish yoki litsenziya berishni rad etish haqida qaror qabul qilish

16. Litsenziya berish haqidagi arizani umumiy tartibda koʻrib chiqish uchun litsenziya talabgoridan ariza berilgan kunda qonunchilikda belgilangan eng kam oylik ish haqining ikki baravari miqdorida yigʻim undiriladi. Arizani tezlashtirilgan tartibda koʻrib chiqish uchun ushbu xatboshida nazarda tutilgan yigʻimdan tashqari eng kam oylik ish haqining uch baravari miqdorida qoʻshimcha toʻlov undiriladi.

Litsenziya olish uchun Yagona portal orqali murojaat etilganda, ushbu bandning birinchi xatboshida koʻrsatilgan yigʻim summasining 90 foizi undiriladi.

17. Litsenziya berish haqidagi ariza talabgor tomonidan Yagona portal orqali berilgan taqdirda, arizani koʻrib chiqish uchun yigʻim summasining 10 foizi Oʻzbekiston Respublikasi Adliya vazirligi huzuridagi Davlat xizmatlari agentligining budjetdan tashqari jamgʻarmasi hisob raqamiga oʻtkaziladi, yigʻim summasining qolgan qismi esa litsenziya beruvchi organning hisob raqamiga oʻtkaziladi.

Markazlarga oʻzi kelib murojaat qilingan taqdirda, arizani koʻrib chiqish uchun toʻlanadigan yigʻimlar summasining 20 foizi belgilangan tartibda Oʻzbekiston Respublikasi Adliya vazirligi huzuridagi Davlat xizmatlari agentligining budjetdan tashqari jamgʻarmasi hisob raqamiga oʻtkaziladi.

Litsenziyani olish haqidagi ariza tezlashtirilgan tartibda koʻrib chiqilganligi uchun toʻlangan qoʻshimcha toʻlov summasining 20 foizi Oʻzbekiston Respublikasi Adliya vazirligi huzuridagi Davlat xizmatlari agentligi budjetdan tashqari jamgʻarmasining shaxsiy hisob raqamiga, qoʻshimcha toʻlov summasining qolgan qismi esa litsenziya beruvchi organning hisob raqamiga oʻtkaziladi.

Litsenziya talabgori berilgan arizadan bosh tortgan taqdirda toʻlangan yigʻim summasi qaytarilmaydi.

18. Litsenziya berish yoki uni berishni rad etish toʻgʻrisidagi qaror talabgor arizasi olingandan soʻng umumiy tartib boʻyicha yigirma kundan oshmaydigan muddatda, tezlashtirilgan tartib boʻyicha esa besh ish kunidan oshmaydigan muddatda, uning berilishi shaklidan qatʼi nazar, zarur maʼlumotlar koʻrsatilgan holda qabul qilinadi.

19. Litsenziya talabgorining arizasi barcha zarur maʼlumotlar bilan birga berilgan kunda ishchi organga koʻrib chiqish uchun kiritiladi.

20. Tibbiy faoliyatni amalga oshirish uchun yaratilgan sharoitlarning belgilangan litsenziya talablari va shartlariga mosligini aniqlash uchun ishchi organ ariza qabul qilingan kundan boshlab bir kun mobaynida tibbiy faoliyatni amalga oshirishga moʻljallangan xonalarning sanitariya qoidalari, meʼyorlari va gigiyenik normativlarga muvofiqligi haqidagi xulosani olish uchun davlat sanitariya-epidemiologiya nazoratining tegishli hududiy markaziga uni yoʻllashi shart.

21. Davlat sanitariya-epidemiologiya nazoratining hududiy markazi umumiy tartib boʻyicha bir hafta davomida, tezlashtirilgan tartib boʻyicha esa 3 ish kuni davomida ishchi organga idoralararo elektron hamkorlik tizimi orqali joyiga borib, oʻrganish xulosalari asosida tuzilgan xonalarning sanitariya qoidalari, meʼyorlari va gigiyena normativlariga mosligi haqidagi xulosasini taqdim etadi.

22. Ishchi organ eksperti xonalarning sanitariya qoidalari, meʼyorlari va gigiyena normativlariga mosligi haqidagi xulosa olingandan soʻng joyiga borgan holda umumiy tartib boʻyicha bir hafta muddatda litsenziya talabgorining litsenziya talablari va shartlariga muvofiqligini tekshirish boʻyicha ekspertiza oʻtkazadi.

Tezlashtirilgan tartibdagi murojaat qabul qilingan kundan boshlab, 4 ish kuni davomida litsenziya talabgorining litsenziya talablari va shartlariga muvofiqligini tekshirish boʻyicha ekspertiza ishchi organ eksperti tomonidan joyiga borgan holda oʻtkaziladi.

Litsenziya talabgorining litsenziya talablari va shartlariga muvofiqligini tekshirish boʻyicha ekspertiza litsenziyalovchi organning oʻz mablagʻlari hisobiga amalga oshiriladi.

Ekspertizani amalga oshirishda ekspert xulosasini asoslash uchun zarur hujjatlarning nusxalarini tayyorlashga haqli.

Ekspertiza natijalariga koʻra ekspert tomonidan litsenziya berish yoki uni berishni rad etish haqidagi ekspert xulosasi tuziladi.

Tegishli xulosalarni tayyorlash uchun litsenziyalovchi organ shartnomaviy asosda qoʻshimcha ekspertlarni jalb etishga haqli.

Litsenziyalovchi organning litsenziya berish yoki uni berishni rad etish haqidagi qarori umumiy tartib boʻyicha uch kun muddatda, tezlashtirilgan tartib boʻyicha bir ish kuni davomida tasdiqlanadi va litsenziya berish yoki uni berishni rad etish uchun asos hisoblanadi.

Litsenziyalovchi organ umumiy tartib boʻyicha ikki kun muddatda, tezlashtirilgan tartib boʻyicha esa litsenziya berish haqida qaror qabul qilingan kunning oʻzida litsenziya talabgorini u oʻz arizasida koʻrsatgan shaklda, bank hisob raqami rekvizitlari va davlat bojini toʻlash muddati koʻrsatilgan holda bundan xabardor qiladi.

23. Litsenziya litsenziya talabgori davlat boji toʻlaganligi haqidagi hujjat yoki toʻlanganligining elektron tasdigʻini taqdim etgan kunda beriladi.

24. Litsenziyalar qonunchilikda belgilangan tartibda rasmiylashtiriladi.

Berilgan, toʻxtatib turilgan, yangilangan, qayta rasmiylashtirilgan, bekor qilingan, shuningdek amal qilishi toʻxtatilgan litsenziyalar “Litsenziya” axborot tizimlari kompleksi reyestriga kiritiladi.

25. Litsenziat litsenziya berilishi toʻgʻrisida qaror qabul qilingani haqidagi xabarnoma yuborilgan kundan boshlab uch oy muddatda litsenziya berilishi uchun davlat bojini toʻlamagan boʻlsa, litsenziyalovchi organ litsenziyani bekor qilish haqida qaror qabul qilishga haqli.

26. Oʻzbekiston Respublikasining “Faoliyatning ayrim turlarini litsenziyalash toʻgʻrisida”gi Qonunining 17-moddasida nazarda tutilgan asoslar boʻyicha litsenziya berish rad etilishi mumkin.

Litsenziya talabgori litsenziya beruvchi organning litsenziya berishni rad etish, shuningdek litsenziyalovchi organ mansabdor shaxsining harakatlari (harakatsizligi) yuzasidan qonunchilikda belgilangan tartibda shikoyat qilish huquqiga ega.

27. Litsenziya berishni rad etish toʻgʻrisida qaror qabul qilingan taqdirda litsenziya berishni rad etish haqidagi xabarnoma litsenziya talabgoriga u arizada koʻrsatgan shaklda yoʻllanadi, unda rad etish sabablari va litsenziya talabgori ularni bartaraf etgan holda qayta koʻrib chiqish uchun ariza berishi mumkin boʻlgan muddat koʻrsatiladi. Litsenziya berishni rad etish toʻgʻrisidagi xabarnomada koʻrsatilgan muddat kamchiliklarni bartaraf etish uchun yetarli boʻlishi zarur.

Litsenziya berishni rad etishga asos boʻlgan sabablar bartaraf etilgan taqdirda, litsenziya berish toʻgʻrisidagi arizaning litsenziyalovchi organ tomonidan takroran koʻrib chiqilishi litsenziya talabgorining arizasi barcha zarur hujjatlar bilan birga taqdim etilgandan soʻng umumiy tartibda koʻrib chiqib rad etilgan arizalar boʻyicha oʻn kundan, tezlashtirilgan tartibda koʻrib chiqib rad etilgan arizalar boʻyicha toʻrt ish kunidan oshmasligi kerak.

Bunda takroran berilgan ariza ishchi organga koʻrib chiqish uchun ular qabul qilingan kunda beriladi.

Taqdim etilgan hujjatlar va takroriy ekspertiza xulosalari boʻyicha litsenziyalovchi organning litsenziyani berish yoki uni berishni rad etish toʻgʻrisidagi protokoli tuziladi.

Litsenziya talabgorining arizasi qayta koʻrib chiqilishi uchun yigʻim undirilmaydi.

Talabgorning arizasini qayta koʻrib chiqishda litsenziya berishni rad etish toʻgʻrisidagi avvalgi xabarnomada koʻrsatilmagan yangi asoslar boʻyicha litsenziya berishning rad etilishiga yoʻl qoʻyilmaydi.

Litsenziya berishni rad etish toʻgʻrisidagi xabarnomada koʻrsatilgan muddatdan soʻng berilgan ariza yangidan berilgan deb hisoblanadi.

28. Tibbiy faoliyatning amalga oshirilish joyi, tashkilot turi, ixtisoslashuv turi oʻzgargan yoki filiali ochilgan taqdirda litsenziat litsenziya olish uchun qayta ariza berishi shart. Bunda yangi litsenziya olingungacha litsenziat avval berilgan litsenziya asosida tibbiy faoliyatni amalga oshirishga haqli.

5-bob. Litsenziyani qayta rasmiylashtirish, amal qilish muddatini uzaytirish, dublikat berish

29. Litsenziat oʻzgartirilgan, uning nomi, joyi (pochta manzili) oʻzgargan taqdirda litsenziat va uning huquqiy vorisi roʻyxatdan oʻtgandan soʻng bir oy muddatda litsenziyalovchi organga markazlar yoki Yagona portal orqali elektron shaklda litsenziyani qayta rasmiylashtirish toʻgʻrisida ariza berishi, unga tegishli maʼlumotlarni va amaldagi litsenziyaning asl nusxasini ilova qilishi shart.

Litsenziatlar — yuridik shaxslar birlashgan, davlat roʻyxatidan oʻtgan sanaga koʻra yangidan tashkil etilgan yuridik shaxs tashkil qilib, aynan oʻsha faoliyat turi bilan shugʻullanish uchun litsenziyaga ega boʻlgan taqdirda, litsenziyaning ushbu bobda nazarda tutilgan tartibda qayta rasmiylashtirilishiga yoʻl qoʻyiladi.

Litsenziyalovchi organ qonunchilikka muvofiq tadbirkorlik subyektlarini davlat roʻyxatidan oʻtkazish va ularning hisobini yuritish boʻyicha avtomatlashtirilgan tizim orqali koʻrsatilgan maʼlumotlarning tasdigʻini oladi.

Faoliyatning bir qismi (qismlari) boʻyicha litsenziyaning amal qilish muddati tugagan taqdirda litsenziya qayta rasmiylashtirilishi kerak.

30. Litsenziya qayta rasmiylashtirilgungacha litsenziat unda koʻrsatilgan faoliyat turi bilan avval berilgan litsenziya asosida faoliyat yuritadi.

Litsenziyani qayta rasmiylashtirishda litsenziyalovchi organ elektron shaklda shakllantiriladigan “Litsenziya” axborot tizimlari kompleksidagi litsenziyalar reyestriga tegishli oʻzgartirishlar kiritadi.

Litsenziyani qayta rasmiylashtirish litsenziatga litsenziyalovchi organ tomonidan litsenziyani qayta rasmiylashtirish boʻyicha ariza olingani haqida xabarnoma yoʻllangandan yoki litsenziyaning amal qilishini litsenziyalanadigan faoliyat turining bir qismi (qismlari) uchun tugatish toʻgʻrisida qaror qabul qilingan kundan soʻng umumiy tartib boʻyicha besh kun mobaynida, tezlashtirilgan tartib boʻyicha esa bir ish kuni mobaynida amalga oshiriladi.

Litsenziyani umumiy tartibda qayta rasmiylashtirishda litsenziya talabgorining litsenziya berish toʻgʻrisidagi arizasini koʻrib chiqish uchun toʻlanadigan summaning yarmi miqdorida yigʻim undiriladi. Litsenziyat Yagona portal orqali murojaat etganda ushbu bandda koʻrsatilgan yigʻim summasining 90 foizi undiriladi. Litsenziyani tezlashtirilgan tartibda qayta rasmiylashtirishda ushbu xatboshida nazarda tutilgan yigʻimdan tashqari eng kam oylik ish haqining bir baravari miqdorida qoʻshimcha toʻlov undiriladi.

Litsenziyani qayta rasmiylashtirish toʻgʻrisidagi ariza elektron shaklda Yagona portal orqali berilgan taqdirda, yigʻim summasining 10 foizi Oʻzbekiston Respublikasi Adliya vazirligi huzuridagi Davlat xizmatlari agentligining budjetdan tashqari jamgʻarmasi hisob raqamiga oʻtkaziladi, yigʻim summasining qolgan qismi esa litsenziya beruvchi organning hisob raqamiga oʻtkaziladi.

Markazlarga oʻzi kelib murojaat qilinganda, arizalarni koʻrib chiqish uchun toʻlanadigan summaning 20 foizi miqdoridagi mablagʻlar belgilangan tartibda Oʻzbekiston Respublikasi Adliya vazirligi huzuridagi Davlat xizmatlari agentligining budjetdan tashqari jamgʻarmasi hisob raqamiga oʻtkaziladi.

Litsenziyani qayta rasmiylashtirish toʻgʻrisidagi ariza tezlashtirilgan tartibda koʻrib chiqilganligi uchun toʻlangan toʻlov summasining 20 foizi Oʻzbekiston Respublikasi Adliya vazirligi huzuridagi Davlat xizmatlari agentligi budjetdan tashqari jamgʻarmasining shaxsiy hisob raqamiga, qolgan qismi litsenziya beruvchi organning hisob raqamiga oʻtkaziladi.

Litsenziat arizadan voz kechgan taqdirda, toʻlangan summa qaytarilmaydi. Litsenziya qayta rasmiylashtirilganda davlat boji undirilmaydi.

Tezlashtirilgan tartib boʻyicha litsenziyani qayta rasmiylashtirish haqidagi ariza oʻz vaqtida koʻrib chiqilmagan taqdirda, qoʻshimcha toʻlov summasi litsenziya talabgoriga qaytarilishi shart.

31. Litsenziyaning amal qilish muddati litsenziatning arizasiga koʻra uzaytirilishi mumkin. Litsenziyaning amal qilish muddatini uzaytirish litsenziyani olish uchun nazarda tutilgan tartibda amalga oshiriladi.

Litsenziyaning amal qilish muddatini uzaytirish haqidagi ariza litsenziyalovchi organga litsenziyaning amal qilish muddati tugashidan kamida ikki oy avval berilishi kerak.

32. Litsenziya yoʻqotilgan yoki yaroqsiz holga kelgan taqdirda, uning dublikati beriladi. Dublikat olish uchun litsenziat markazlarga yoki Yagona portal orqali ariza va litsenziyaning yoʻqolganligini tasdiqlovchi hujjat bilan, shuningdek, litsenziyani olish uchun nazarda tutiladigan yigʻimning yarmini toʻlagan holda umumiy tartibda yoki ushbu xatboshida nazarda tutilgan toʻlovdan tashqari eng kam oylik ish haqining bir baravari miqdorida qoʻshimcha toʻlov toʻlagan holda tezlashtirilgan tartibda koʻrib chiqilishi uchun murojaat qiladi. Litsenziat Yagona portal orqali murojaat etganda ushbu bandda koʻrsatilgan yigʻim summasining 90 foizi undiriladi.

Ariza elektron shaklda Yagona portal orqali berilgan taqdirda, yigʻim summasining 10 foizi Oʻzbekiston Respublikasi Adliya vazirligi huzuridagi Davlat xizmatlari agentligining budjetdan tashqari jamgʻarmasi hisob raqamiga oʻtkaziladi, yigʻim summasining qolgan qismi esa litsenziyalovchi organning hisob raqamiga oʻtkaziladi.

Markazlarga oʻzi kelib murojaat qilingan taqdirda, arizalarni koʻrib chiqish uchun toʻlanadigan summaning 20 foizi miqdoridagi mablagʻlar belgilangan tartibda Oʻzbekiston Respublikasi Adliya vazirligi huzuridagi Davlat xizmatlari agentligining budjetdan tashqari jamgʻarmasi hisob raqamiga oʻtkaziladi.

Litsenziya dublikatini tezlashtirilgan tartibda olish uchun toʻlangan toʻlov summasining 20 foizi Oʻzbekiston Respublikasi Adliya vazirligi huzuridagi Davlat xizmatlari agentligi budjetdan tashqari jamgʻarmasining shaxsiy hisob raqamiga, qolgan qismi litsenziya beruvchi organning hisob raqamiga oʻtkaziladi.

Tezlashtirilgan tartib boʻyicha litsenziya dublikatini olish haqidagi ariza oʻz vaqtida koʻrib chiqilmagan taqdirda, qoʻshimcha toʻlov summasi litsenziya talabgoriga qaytarilishi shart.

6-bob. Litsenziya talablari va shartlariga rioya etilishini nazorat qilish

33. Litsenziat tomonidan litsenziya talablari va shartlariga rioya qilinishi yuzasidan nazoratni amalga oshirishda litsenziyalovchi organ oʻz vakolatlari doirasida quyidagi huquqlarga ega:

tadbirkorlik subyektlari faoliyatida oʻtkaziladigan tekshiruvlarni muvofiqlashtirish boʻyicha vakolatli organ bilan kelishgan holda, qonun hujjatlarida belgilangan tartibda litsenziat tomonidan litsenziya talablari va shartlariga rioya qilinishi yuzasidan tekshiruvlar oʻtkazish;

litsenziya talablari va shartlariga rioya qilinishi yuzasidan tekshiruvlarni oʻtkazishda paydo boʻladigan savollar boʻyicha litsenziatdan zarur maʼlumotlarni soʻrash va olish;

tekshirishlar natijalari boʻyicha dalolatnomalar (maʼlumotnomalar) tuzish va unda litsenziat tomonidan yoʻl qoʻyilgan muayyan litsenziya talablari va shartlari buzilishini koʻrsatish;

bajarilishi shart boʻlgan, litsenziat tomonidan aniqlangan kamchiliklarni bartaraf etish haqidagi koʻrsatmalarni qabul qilish, bunday buzilishlarni tuzatish uchun yetarli boʻlgan muddatni belgilash;

qonunchilikda belgilangan tartibda qarorlar qabul qilish hamda litsenziyalarning amal qilishini toʻxtatib turish, toʻxtatish yoki uni bekor qilish toʻgʻrisidagi taqdimnomalarni kiritish;

jismoniy va yuridik shaxslar tomonidan litsenziya olmasdan tibbiy faoliyat bilan shugʻullanish va/yoki litsenziyada nazarda tutilmagan tibbiy xizmatlar koʻrsatish holatlari aniqlangan taqdirda qonunchilikda nazarda tutilgan tartibda choralar koʻrish uchun ularga oid materialarni huquqni muhofaza qiluvchi organlarga yuborish.

34. Litsenziyalovchi organning tekshiruvchi xodimlari tomonidan tekshiruv oʻtkazish paytida ikki nusxada dalolatnoma tuziladi, ulardan biri litsenziatga beriladi, ikkinchi nusxasi litsenziyalovchi organda qoladi.

35. Litsenziyalovchi organ, shuningdek litsenziat tomonidan litsenziya talablari va shartlariga rioya qilinishi yuzasidan quyidagi yoʻllar bilan monitoring olib borishi mumkin:

fuqarolar va yuridik shaxslarning murojaatlarini belgilangan tartibda qabul qilish va oʻrganish;

litsenziatlardan fuqarolar va yuridik shaxslarning murojaatlariga tegishli boʻlgan maʼlumotlarni, axborotlarni va yozma tushuntirishlarni olish;

Oʻzbekiston Respublikasi Sogʻliqni saqlash vazirligi markaziy apparatida va sogʻliqni saqlash boshqarmalari hududiy organlarida oʻrnatilgan “ishonch telefonlari” orqali maʼlumotlar olish;

nazorat qiluvchi boshqa organlar tomonidan oʻtkazilgan tekshiruvlar natijalari boʻyicha kelib tushayotgan maʼlumotlarni yigʻish, umumlashtirish va tahlil qilish;

moliyaviy-xoʻjalik faoliyatiga aralashmagan holda amalga oshirilayotgan litsenziyaviy faoliyatning holati va shartlari bilan joyida tanishish.

7-bob. Litsenziyaning amal qilishini toʻxtatib turish, toʻxtatish va uni bekor qilish

36. Litsenziyaning amal qilishini toʻxtatib turish, toʻxtatish va uni bekor qilish Oʻzbekiston Respublikasining “Faoliyatning ayrim turlarini litsenziyalash toʻgʻrisida”gi Qonunining 22, 23 va 24-moddalarida nazarda tutilgan holatlarda va tartibda amalga oshiriladi.

Amal qilishi toʻxtatib turilgan, toʻxtatilgan, bekor qilingan litsenziyalar haqidagi maʼlumotlar litsenziyalovchi organ tomonidan tegishli axborot resurslariga kiritiladi.

37. Litsenziyalovchi organning litsenziyaning amal qilishini toʻxtatib turish, toʻxtatish va uni bekor qilish toʻgʻrisidagi qarori yuzasidan sudga ariza berilishi mumkin. Sud tomonidan litsenziyaning amal qilishini toʻxtatish haqidagi qaror asossiz deb topilgan taqdirda, litsenziyalovchi organ litsenziat oldida unga yetkazilgan zarar miqdorida javobgar hisoblanadi.

8-bob. Litsenziyalar reyestri

38. Litsenziyalovchi organ “Litsenziya” axborot tizimlari kompleksida litsenziyalar reyestrini yuritadi.

39. Litsenziyalar reyestrida quyidagilar koʻrsatilishi kerak:

a) litsenziatlar toʻgʻrisidagi asosiy maʼlumotlar, shu jumladan, tashkilotning nomi va indentifikatsiya raqami, tashkiliy-huquqiy shakli, tashkilot rahbarining familiyasi, ismi, otasining ismi;

b) tibbiy faoliyatning litsenziyalanayotgan yoʻnalishi (uning qismi) amalga oshiriladigan manzil, ish joyi telefoni, faks;

v) litsenziyaning berilgan sanasi va tartib raqami;

g) litsenziyaning amal qilishi muddati;

d) tibbiy ixtisoslashuvning litsenziyalanayotgan turi;

e) litsenziyani qayta rasmiylashtirishning asoslari va sanasi, uning amal qilish muddatining uzaytirilishi va tiklanishi;

j) litsenziyaning amal qilish muddatini toʻxtatish asoslari va sanasi;

z) litsenziyani bekor qilishning asoslari va sanasi.

Litsenziyalar reyestridagi maʼlumotlar “Litsenziya” axborot tizimlari kompleksidagi veb-saytda joylashtiriladi va tanishish uchun ochiq hisoblanadi.

9-bob. Litsenziya berilishi uchun undiriladigan davlat boji

40. Tibbiy faoliyatni amalga oshirish uchun litsenziya berish yoki uning amal qilish muddatini uzaytirish uchun eng kam oylik ish haqining besh baravari miqdorida davlat boji toʻlanadi.

Tibbiy faoliyatni amalga oshirish uchun litsenziya berish yoki uning amal qilish muddatini uzaytirish uchun Yagona portal orqali murojaat etilganda, ushbu bandning birinchi xatboshida koʻrsatilgan boj summasining 90 foizi undiriladi.

41. Toʻlanadigan davlat boji summalari quyidagi tartibda taqsimlanadi:

Markazlarga oʻzi kelib murojaat qilingan taqdirda, davlat bojining 20 foizi, Yagona portal orqali elektron shaklda murojaat qilingan taqdirda esa, davlat bojining 10 foizi belgilangan tartibda Oʻzbekiston Respublikasi Adliya vazirligi huzuridagi Davlat xizmatlari agentligining budjetdan tashqari shaxsiy hisob raqamiga oʻtkaziladi.

elektron shaklda murojaat qilinganda — 10 foizi litsenziyalovchi organning hisob raqamiga oʻtkaziladi;

20 foizi murojaat qilish shaklidan (elektron shaklda yoki oʻzi kelgan holda) qatʼi nazar — budjetdan tashqari Rivojlantirish va sogʻliqni saqlashni boshqarish organlari xodimlarini moddiy ragʻbatlantirish jamgʻarmasining hisob raqamlariga oʻtkaziladi;

qolgan summalar respublika budjetiga yoʻnaltiriladi.

10-bob. Yakunlovchi qoida

42. Mazkur Nizomning qoidalari buzilishida aybdor boʻlgan shaxslar qonunchilikka muvofiq javob beradi.

Tibbiy faoliyatni litsenziyalash tartibi toʻgʻrisidagi nizomga
1-ILOVA

Tibbiy faoliyatni amalga oshirish uchun litsenziyani umumiy tartibda berish

SXEMASI

Tibbiy faoliyatni litsenziyalash tartibi toʻgʻrisidagi nizomga
1a-ILOVA

Tibbiy faoliyatni amalga oshirish huquqini beruvchi litsenziyani tezlashtirilgan tartibda berish

SXEMASI

Bosqichlar	Subyektlar	Tadbirlar	Bajarish muddatlari
1-bosqich	Litsenziya talabgori	1. Tibbiy faoliyatni litsenziyalash tartibi toʻgʻrisidagi nizomga muvofiq litsenziya olish uchun sharoitlar yaratadi. 2. Markazga shaxsan borib yoki pochta aloqasi orqali yoki YIDXP orqali ariza beradi.	Xohishiga koʻra
1-bosqich	Litsenziya talabgori		Xohishiga koʻra

2-bosqich	Markaz	1. Tibbiy faoliyatni amalga oshirish boʻyicha litsenziya berish uchun arizani qabul qiladi. Arizachiga ariza qabul qilingan sana qayd etilgan roʻyxatga olish nusxasini beradi. 2. Litsenziya talabgorining arizasi barcha zarur malumotlari bilan birga litsenziyalovchi organga koʻrib chiqish uchun beradi.	1 ish soati mobaynida
2-bosqich	Markaz		1 ish soati mobaynida

3-bosqich	Ishchi organ	Tibbiy faoliyatni amalga oshirishga moʻljallangan xonalarning sanitariya qoidalari, meʼyorlari va gigiyenik normativlarga muvofiqligi haqidagi xulosani olish uchun davlat sanitariya-epidemiologiya nazoratining tegishli hududiy markaziga arizani yoʻllashi shart.	Ariza kelib tushgandan soʻng 1 ish kuni mobaynida
3-bosqich	Ishchi organ		Ariza kelib tushgandan soʻng 1 ish kuni mobaynida

4-bosqich	1. Davlat sanitariya-epidemiologiya nazoratining hududiy markazi 2. Ishchi organ	1. Ishchi organga idoralararo elektron hamkorlik tizimi orqali joyiga borib, oʻrganish xulosalari asosida tuzilgan xonalarning sanitariya qoidalari, meʼyorlari va gigiyena normativlariga mosligi haqidagi xulosasini taqdim etadi. 2. Litsenziya talabgorining litsenziya talablari va shartlariga muvofiqligini tekshirish boʻyicha ekspertiza joyiga borgan holda oʻtkazadi. Ekspertiza natijalariga koʻra litsenziya berish yoki uni berishni rad etish haqidagi ekspert xulosasi tuzadi.	1. Ariza ishchi organdan kelib tushgan kundan boshlab 3 ish kuni mobaynida 2. Ariza kelib tushgan kundan boshlab 4 ish kuni mobaynida
4-bosqich

5-bosqich	Litsenziyalovchi organ	Litsenziya berish yoki uni berishni rad etish haqida qaror tasdiqlaydi. Litsenziya talabgoriga bank hisob raqami rekvizitlari va davlat bojini toʻlash muddati koʻrsatilgan xabarnoma yoʻllaydi.	1 ish kuni mobaynida
5-bosqich	Litsenziyalovchi organ		1 ish kuni mobaynida

6-bosqich	Litsenziya talabgori	Litsenziya berish uchun eng kam oylik ish haqining besh baravari miqdorida toʻlovni amalga oshiradi.	3 oy mobaynida
6-bosqich	Litsenziya talabgori		3 oy mobaynida

7-bosqich	Litsenziyalovchi organ	Litsenziyani rasmiylashtiradi va litsenziya talabgoriga beradi.	Davlat boji toʻlanganidan soʻng
7-bosqich	Litsenziyalovchi organ		Davlat boji toʻlanganidan soʻng

Tibbiy faoliyatni litsenziyalash tartibi toʻgʻrisidagi nizomga
2-ILOVA

‎

‎‎Seriya _____ №________

(Oʻzbekiston Respublikasi Davlat gerbi tasviri)
‎
‎OʻZBEKISTON RESUBLIKASI
‎SOGʻLIQNI SAQLASH VAZIRLIGI

‎‎Tibbiy faoliyatni amalga oshirish uchun
‎LITSENZIYA
‎‎№ _________________
‎(litsenziya raqami)

Ushbu litsenziya: _______________________________________________________________________________
‎___________________________________________________________________________________ga berildi.

‎‎(yuridik shaxsning toʻliq firma nomi, tashkiliy-huquqiy shakli)

Tashkilot joylashgan manzil (pochta manzili):
‎____________________________________________________________________________________________
Tibbiy faoliyat amalga oshiriladigan joy (manzil):
‎____________________________________________________________________________________________
‎____________________________________________________________________________________________

‎‎Soliq toʻlovchining identifikatsiya raqami (STIR):

‎

Ruxsat etilgan ixtisosliklar turlari va tibbiy tashkilotning turi:
‎‎____________________________________________________________________________________________ ‎____________________________________________________________________________________________ ‎____________________________________________________________________________________________ ‎____________________________________________________________________________________________ ‎____________________________________________________________________________________________

‎‎Litsenziya berilgan sana:

‎

20__y. “___” _____________

‎

(yil, sana, oy)

‎‎Litsenziyaning amal qilish muddati:‎

‎

‎‎20__y. “___” __________gacha

‎

(yil, sana, oy)

‎

‎‎Litsenziyalar reyestri boʻyicha tartib raqami:‎

‎

‎‎Vakolatli shaxs:

‎

‎‎___________

‎

‎‎__________________________________________

‎

(imzo)

‎

‎‎(Litsenziyalovchi organ rahbarining F.I.O.)

‎

‎‎M.Oʻ.

‎

Ko‘rinish

Ko‘rinish