O‘zbekiston Respublikasi “Tovar belgilari, xizmat ko‘rsatish belgilari va tovar kelib chiqqan joy nomlari to‘g‘risida”gi Qonuniga muvofiq buyuraman:

1. Tovar belgisini milliy ro‘yxatdan o‘tkazishni xalqaro ro‘yxatdan o‘tkazishga almashtirish qoidalari ilovaga muvofiq tasdiqlansin.

2. Mazkur buyruq rasmiy e’lon qilingan kundan e’tiboran kuchga kiradi.

Mazkur Qoidalar Belgilarni xalqaro ro‘yxatdan o‘tkazish to‘g‘risidagi Madrid bitimiga doir Bayonnomaning (Madrid, 1989-yil 27-iyun) 4-bis moddasiga va O‘zbekiston Respublikasining “Tovar belgilari, xizmat ko‘rsatish belgilari va tovar kelib chiqqan joy nomlari to‘g‘risida”gi Qonuniga muvofiq tovar belgisini milliy ro‘yxatdan o‘tkazishni xalqaro ro‘yxatdan o‘tkazishga almashtirish tartibini belgilaydi.

1. Belgilarni xalqaro ro‘yxatdan o‘tkazish to‘g‘risidagi Madrid bitimiga doir Bayonnomaning (Madrid, 1989-yil 27-iyun) 4-bis moddasiga muvofiq, agar O‘zbekiston Respublikasida milliy ro‘yxatdan o‘tkazilgan tovar belgisi xalqaro ro‘yxatdan o‘tkazilgan tovar belgisi bilan bir xil bo‘lsa va ushbu ro‘yxatdan o‘tkazilgan tovar belgilari bitta shaxs nomiga berilgan bo‘lsa, tovar belgisini milliy ro‘yxatdan o‘tkazishni xalqaro ro‘yxatdan o‘tkazishga almashtirish mumkin. Bunda, milliy ro‘yxatdan o‘tkazilgan tovar belgisiga doir huquqlarga ta’sir qilinmasligi lozim.

2. Tovar belgisini milliy ro‘yxatdan o‘tkazishni xalqaro ro‘yxatdan o‘tkazishga almashtirish quyidagi shartlarga rioya etilgan holda amalga oshiriladi:

xalqaro ro‘yxatdan o‘tkazish natijasida yuzaga keladigan huquqiy jihatdan muhofaza qilish O‘zbekiston Respublikasi hududiga tatbiq etilsa;

milliy ro‘yxatdan o‘tkazilgan barcha tovarlar O‘zbekiston Respublikasiga nisbatan xalqaro ro‘yxatdan o‘tkazishda ham sanab o‘tilgan bo‘lsa;

tovar belgisini xalqaro ro‘yxatdan o‘tkazishning kuchga kirish sanasi tovar belgisini milliy ro‘yxatdan o‘tkazish sanasidan keyin bo‘lsa.

3. Tovar belgisini milliy ro‘yxatdan o‘tkazishni xalqaro ro‘yxatdan o‘tkazishga almashtirish to‘g‘risidagi ariza (bundan buyon matnda ariza deb yuritiladi) mazkur Qoidalarning 1-ilovasiga muvofiq shaklda O‘zbekiston Respublikasi Adliya vazirligiga (bundan buyon matnda Vazirlik deb yuritiladi) xalqaro ro‘yxatdan o‘tkazish egasining ishonchnomasi bilan patent vakili tomonidan taqdim etiladi. Ariza patent vakili tomonidan imzolanadi.

4. Ariza bitta tovar belgisini ro‘yxatga o‘tkazishga oid bo‘lishi lozim.

5. Ariza va ishonchnoma Vazirlikka bevosita taqdim etiladi yoki pochta orqali yuboriladi.

6. Ariza Vazirlikka kelib tushgan kundan e’tiboran o‘n besh kunlik muddat ichida ko‘rib chiqiladi.

7. Ariza Vazirlik tomonidan mazkur Qoidalarning 2-bandida belgilangan talablarga muvofiqligi yuzasidan tekshirib chiqiladi.

8. Agar ariza mazkur Qoidalarning 2-bandida belgilangan talablarga muvofiq bo‘lmasa, Vazirlik xalqaro ro‘yxatdan o‘tkazish egasiga mavjud kamchiliklarni bartaraf etish to‘g‘risida patent vakili orqali so‘rov yuboradi.

9. Xalqaro ro‘yxatdan o‘tkazish egasi so‘rov jo‘natilgan sanadan e’tiboran uch oy muddat ichida so‘rovdagi kamchiliklarni bartaraf etishi lozim. Bunda arizani ko‘rib chiqish muddatining o‘tishi kamchiliklar bartaraf etilganligi haqidagi javob Vazirlikka kelib tushgunga qadar to‘xtatib turiladi.

10. So‘rovga mazkur Qoidalarning 9-bandida ko‘rsatilgan muddat ichida javob taqdim etilmagan taqdirda, Vazirlik tomonidan patent vakili orqali xalqaro ro‘yxatdan o‘tkazish egasiga arizani qanoatlantirishni rad etish asoslarini ko‘rsatgan holda bildirishnoma yuboriladi.

11. Xalqaro ro‘yxatdan o‘tkazish egasi arizani qanoatlantirishni rad etish ustidan sudga shikoyat qilishi mumkin.

12. Arizani qanoatlantirish rad etilgandan keyin xalqaro ro‘yxatdan o‘tkazish egasi Vazirlik bildirishnomasida nazarda tutilgan kamchiliklarni bartaraf etgan holda takroran Ariza topshirishi mumkin.

13. Ariza mazkur Qoidalarning 2-bandida belgilangan talablarga muvofiq bo‘lsa, tovar belgisini milliy ro‘yxatdan o‘tkazishni xalqaro ro‘yxatdan o‘tkazishga almashtirish to‘g‘risidagi ma’lumotlar Tovar belgilari davlat reyestriga (bundan buyon matnda Davlat reyestri deb yuritiladi) kiritiladi.

14. Ma’lumotlar Davlat reyestriga kiritilgan sanadan e’tiboran o‘n kun ichida Vazirlik Butunjahon intellektual mulk tashkiloti Xalqaro byurosiga mazkur Qoidalarning 2-ilovasida keltirilgan shaklda (ingliz tilida) tovar belgisini milliy ro‘yxatdan o‘tkazishni xalqaro ro‘yxatdan o‘tkazishga almashtirilganligi to‘g‘risida bildirishnoma tayyorlaydi.

15. Bildirishnoma ikki nusxada rasmiylashtiriladi. Birinchi nusxa Butunjahon intellektual mulk tashkiloti Xalqaro byurosiga jo‘natiladi, ikkinchi nusxa esa milliy ro‘yxatdan o‘tkazishga oid hujjatlarga qo‘shib qo‘yiladi.

16. Tovar belgisini milliy ro‘yxatdan o‘tkazishni xalqaro ro‘yxatdan o‘tkazishga almashtirish to‘g‘risidagi ma’lumotlar Davlat reyestriga kiritiladi va Vazirlikning o‘z rasmiy veb-saytida ham joylashtiriladigan rasmiy axborotnomasida e’lon qilinadi hamda xalqaro ro‘yxatdan o‘tkazish egasi tovar belgisini milliy ro‘yxatdan o‘tkazishni xalqaro ro‘yxatdan o‘tkazishga almashtirilganligi to‘g‘risida xabardor qilinadi.

17. Tovar belgisini milliy ro‘yxatdan o‘tkazishni xalqaro ro‘yxatdan o‘tkazishga almashtirilishi milliy ro‘yxatdan o‘tkazilgan tovar belgisining amal qilishini tugatilishiga olib kelmaydi.