Ishlab chiqarishni mahalliylashtirish darajasini yanada chuqurlashtirish, tarmoqlararo sanoat kooperatsiyasini, shu jumladan kichik tadbirkorlik subyektlari va respublikaning yirik korxonalari oʻrtasidagi kooperatsiyani kengaytirish, mahalliy xomashyo resurslari negizida import oʻrnini qoplashni hamda ichki bozorni zarur isteʼmol tovarlari va butlovchi buyumlar bilan toʻldirishni, valyuta mablagʻlari tejalishini va ulardan oqilona foydalanilishini, yangi ish oʻrinlari tashkil etilishini hamda aholi bandligini oshirishni taʼminlaydigan zamonaviy, yuqori texnologiyali, raqobatbardoshli ishlab chiqarishlarni tashkil etish maqsadida Vazirlar Mahkamasi qaror qiladi:

1. Sanoat kooperatsiyasi asosida tayyor mahsulotlar, butlovchi buyumlar va materiallar ishlab chiqarishni mahalliylashtirish dasturi amalga oshirilishini taʼminlash boʻyicha Maxsus idoralararo komissiyaning Oʻzbekiston Respublikasi Prezidentining 2016-yil 26-dekabrdagi PQ-2698-son qarori bilan tasdiqlangan 2017 — 2019-yillarda mahsulotlar, butlovchi buyumlar va materiallarning tayyor turlarini ishlab chiqarishni mahalliylashtirish dasturiga ushbu qarorning 1-ilovasiga ilovaga* muvofiq roʻyxat boʻyicha mahalliylashtirish loyihalari kiritilishini nazarda tutuvchi tuzatishlar kiritish toʻgʻrisidagi taklifi qabul qilinsin.

2. Belgilab qoʻyilsinki, Oʻzbekiston Respublikasi Prezidentining “2017 — 2019-yillarda mahsulotlar, butlovchi buyumlar va materiallarning tayyor turlarini ishlab chiqarishni mahalliylashtirishning istiqbolli loyihalarini amalga oshirishni davom ettirish chora-tadbirlari toʻgʻrisida” 2016-yil 26-dekabrdagi PQ-2698-son qarori 7-bandida nazarda tutilgan imtiyozlar ushbu qarorga ilovada koʻrsatilgan tashkilotlarga nisbatan bojxona toʻlovlari boʻyicha — mazkur qaror rasmiy ravishda eʼlon qilingan kundan boshlab, soliqlar boʻyicha imtiyozlar esa — ushbu qaror rasmiy ravishda eʼlon qilingan sanadan keyingi oyning birinchi kunidan boshlab qoʻllanadi.

3. Oʻzbekiston Respublikasi Iqtisodiyot vazirligi loyihalarning tashabbuskorlari bilan birgalikda bir hafta muddatda ushbu qarorning ilovasiga kiritilgan mahalliylashtirish loyihalari boʻyicha mahalliylashtiriladigan mahsulotlar ishlab chiqarish va prognoz hajmlari bajarilishini tashkil etishning tarmoq jadvallarini tasdiqlasin.

4. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari R.S. Azimov zimmasiga yuklansin.