Charm-poyabzal tarmog‘ini yanada rivojlantirish, ishlab chiqarish samaradorligini oshirish va tarmoq korxonalarining barqaror faoliyatini ta’minlash, charm xomashyosini yanada puxta qayta ishlash hamda raqobatbardoshli tayyor mahsulot ishlab chiqarishni kengaytirish maqsadida Vazirlar Mahkamasi qaror qiladi:

1. “O‘zbekcharmpoyabzali” uyushmasi:

mahalliy xomashyodan furnitura, yordamchi va butlovchi materiallar hamda boshqa mahsulotlar ishlab chiqarishni mahalliylashtirishning tarmoq dasturini bir oy muddatda ishlab chiqsin va Vazirlar Mahkamasiga kiritsin;

O‘zbekiston Respublikasi Moliya vazirligi, Kasaba uyushmalari Federatsiyasi Kengashi, Namangan va Farg‘ona viloyatlari, Toshkent shahar hokimliklari bilan birgalikda 2002-yildan boshlab ilovaga* muvofiq ijtimoiy soha obyektlarini topshirish - qabul qilib olish dalolatnomalari asosida hokimliklar balansiga berish bo‘yicha bir oy muddatda kelishilgan qaror qabul qilsin.

2. “O‘zbekcharmpoyabzali” uyushmasi korxonalarining ishlamayotgan ishlab chiqarishlari 2001-yil 1-maydan boshlab uch yil muddatga mulk solig‘i to‘lashdan istisno tariqasida ozod qilinsin.

“O‘zbekcharmpoyabzali” uyushmasi mavjud ishlab chiqarish potensialidan yanada to‘liq va samarali foydalanish dasturini ikki oy muddatda ishlab chiqsin va Vazirlar Mahkamasiga kiritsin, dasturda istiqbolsiz ishlab chiqarishlarni tugatish, ishlamayotgan ishlab chiqarishlarni, shu jumladan xorijiy investitsiyalarni jalb etgan holda, rekonstruksiya qilish, zamonaviylashtirish va texnika bilan qayta jihozlash, ularni raqobatbardoshli charm tovarlar va poyabzallar chiqarishga qayta ixtisoslashtirish chora-tadbirlarini nazarda tutsin.

O‘zbekiston Respublikasi Moliya vazirligi, Davlat soliq qo‘mitasi “O‘zbekcharmpoyabzali” uyushmasi bilan birgalikda shu yil 1-maygacha uyushmaning ishlamayotgan, mol-mulki qiymati belgilangan imtiyozga muvofiq soliqqa tortilmaydigan ishlab chiqarishlari ro‘yxatini aniqlasinlar.

3. “O‘zbekcharmpoyabzali” uyushmasi tashkilotlari tomonidan ishlab chiqariladigan bolalar poyabzali va maxsus poyabzallar narxini pasaytirish maqsadida ushbu mahsulotlar 2001-yil 1-iyundan 2003-yil 1-yanvargacha qo‘shilgan qiymat solig‘idan istisno tariqasida ozod qilinsin.

5. Tashqi iqtisodiy faoliyat milliy banki, “Savdogarbank”, “O‘zbekcharmpoyabzali” va “O‘zbekcharmpoyabzali”ning 2001-yilda o‘z resurslari hisobidan “O‘zbekcharmpoyabzali” uyushmasi korxonalari va tashkilotlarining aylanma mablag‘larini to‘ldirishga jami 1,0 mlrd so‘m miqdorida o‘rtacha muddatli kredit ajratish, mablag‘larning bir qismini xorijiy banklarning asbob-anjomlar sotib olish uchun ajratilgan kreditlarini to‘lashga yo‘naltirish to‘g‘risidagi takliflari qabul qilinsin.

6. O‘zbekiston Respublikasi Davlat bojxona qo‘mitasi:

“O‘zbekcharmpoyabzali” uyushmasi tashkilotlariga import qilinadigan xomashyo, moddiy va texnika resurslari bo‘yicha qo‘shilgan qiymat solig‘i, bojxona bojlari va yig‘imlari to‘lovini belgilangan tartibda 2 oy muddatgacha kechiktirsin;

charm va mo‘yna (shuningdek nostandart), shu jumladan qorako‘l xomashyosining (TIF TN kodlari 4101-4103, 4301-4302) respublikadan tashqariga noqonuniy olib ketilishini bartaraf etish maqsadida bojxona nazoratini kuchaytirsin.

Davlat daromadiga o‘tkazilgan teri, mo‘yna va qorako‘l xomashyo ularni qayta ishlashga ixtisoslashgan tashkilotlarga to‘lov evaziga beriladi.

7. “O‘zbekcharmpoyabzali” uyushmasi O‘zbekiston Respublikasi Davlat soliq qo‘mitasi, Moliya vazirligi, Davlat bojxona qo‘mitasi, Sog‘liqni saqlash vazirligining Davlat sanitariya-epidemiologiya nazorati Respublika markazi, Qishloq va suv xo‘jaligi vazirligi huzuridagi Davlat veterinariya bosh boshqarmasi bilan birgalikda bojxona organlari tomonidan musodara qilingan charm, mo‘yna va qorako‘l xomashyosini keyinchalik qayta ishlash uchun “O‘zbekcharmpoyabzali” uyushmasi tashkilotlariga berish, to‘lov narxini belgilash tartibini bir oy muddatda, belgilangan tartibda ishlab chiqsin va tasdiqlasin.

8. O‘zbekiston Respublikasi Ichki ishlar vazirligi Davlat soliq qo‘mitasi, Davlat bojxona qo‘mitasi bilan birgalikda charm, mo‘yna va qorako‘l xomashyosini noqonuniy tayyorlash, tashish hamda O‘zbekiston Respublikasi tashqarisiga olib ketish hollarining oldini olish va bartaraf etish bo‘yicha kelishilgan tadbirlarni bir oy muddatda ishlab chiqsin.

10. Mazkur qarorning bajarilishini nazorat qilish O‘zbekiston Respublikasi Bosh vazirining o‘rinbosarlari M.Z. Usmonov va R.S. Azimov zimmasiga yuklansin.