Oʻzbekiston Respublikasi Prezidentining “Yoʻl xoʻjaligini boshqarish tizimini yanada takomillashtirish chora-tadbirlari toʻgʻrisida” 2017-yil 14-fevraldagi PF-4954-son Farmoniga muvofiq, shuningdek yoʻl-qurilish ishlari sifatini nazorat qilish samaradorligini tubdan oshirish maqsadida Vazirlar Mahkamasi qaror qiladi:

1. Quyidagilar:

Oʻzbekiston Respublikasi Vazirlar Mahkamasi huzuridagi Yoʻl-qurilish ishlari sifatini nazorat qilish Davlat inspeksiyasining tuzilmasi 1-ilovaga muvofiq;

Oʻzbekiston Respublikasi Vazirlar Mahkamasi huzuridagi Yoʻl-qurilish ishlari sifatini nazorat qilish Davlat inspeksiyasi toʻgʻrisidagi nizom 2-ilovaga muvofiq tasdiqlansin.

2. Oʻzbekiston Respublikasi Vazirlar Mahkamasi huzuridagi Respublika yoʻl jamgʻarmasi mablagʻlari va qonun hujjatlarida taqiqlanmagan boshqa manbalar Oʻzbekiston Respublikasi Vazirlar Mahkamasi huzuridagi Yoʻl-qurilish ishlari sifatini nazorat qilish Davlat inspeksiyasi faoliyatini moliyalashtirish manbalari etib belgilansin.

3. Oʻzbekiston Respublikasi Vazirlar Mahkamasi huzuridagi Yoʻl-qurilish ishlari sifatini nazorat qilish Davlat inspeksiyasi Toshkent shahar, Mirzo Ulugʻbek tumani, Mustaqillik shoh koʻchasi, 68-uy manziliga joylashtirilsin.

4. Oʻzbekiston Respublikasi Axborot texnologiyalari va kommunikatsiyalarini rivojlantirish vazirligi Oʻzbekiston Respublikasi Vazirlar Mahkamasi huzuridagi Yoʻl-qurilish ishlari sifatini nazorat qilish Davlat inspeksiyasini zarur aloqa vositalari, shu jumladan Hukumat aloqasi bilan taʼminlashda belgilangan tartibda koʻmaklashsin.

5. Oʻzbekiston Respublikasi Vazirlar Mahkamasi huzuridagi Yoʻl-qurilish ishlari sifatini nazorat qilish Davlat inspeksiyasi uch oy muddatda manfaatdor vazirliklar va idoralar bilan birgalikda:

qonun hujjatlariga ushbu qarordan kelib chiqadigan oʻzgartirishlar va qoʻshimchalar toʻgʻrisida Vazirlar Mahkamasiga takliflar kiritsin;

oʻzlari qabul qilgan normativ-huquqiy hujjatlarni ushbu qarorga muvofiqlashtirsin.

6. Mazkur qarorning bajarilishini nazorat qilish Oʻzbekiston Respublikasi Bosh vazirining birinchi oʻrinbosari — “Oʻzbekiston temir yoʻllari” AJ boshqaruvi raisi A.J. Ramatov zimmasiga yuklansin.

1. Ushbu Nizom Oʻzbekiston Respublikasining Shaharsozlik kodeksiga, “Avtomobil yoʻllari toʻgʻrisida”gi Qonuniga va Oʻzbekiston Respublikasi Prezidentining “Yoʻl xoʻjaligini boshqarish tizimini yanada takomillashtirish chora-tadbirlari toʻgʻrisida” 2017-yil 14-fevraldagi PF-4954-son Farmoniga muvofiq ishlab chiqilgan hamda Oʻzbekiston Respublikasi Vazirlar Mahkamasi huzuridagi Yoʻl-qurilish ishlari sifatini nazorat qilish Davlat inspeksiyasining (keyingi oʻrinlarda Inspeksiya deb ataladi) maqomi, vazifalari, funksiyalari, huquqlari va javobgarligini belgilaydi.

2. Inspeksiya yuridik va jismoniy shaxslar tomonidan avtomobil yoʻllari va sunʼiy inshootlarni, shuningdek yoʻl boʻyidagi infratuzilmani qurish, rekonstruksiya qilish, taʼmirlash va saqlash (keyingi oʻrinlarda yoʻl qurilishi deb ataladi), yoʻl-qurilish materiallari, buyumlari va konstruksiyalarini ishlab chiqish sohasida texnik jihatdan tartibga solish borasida shaharsozlik toʻgʻrisidagi qonun hujjatlari va normativ hujjatlar talablari bajarilishini nazorat qiluvchi maxsus vakolatli davlat organi hisoblanadi.

3. Hududlarni kompleks rivojlantirish va kommunal soha, ekologiya, atrof muhitni muhofaza qilish, transport, kapital qurilish va qurilish industriyasi masalalari kompleksiga boʻysunadi va unga hisobot beradi.

4. Inspeksiya oʻz faoliyatida Oʻzbekiston Respublikasi Konstitutsiyasiga va qonunlariga, Oʻzbekiston Respublikasi Oliy Majlisi palatalarining qarorlariga, Oʻzbekiston Respublikasi Prezidentining farmonlari, qarorlari va farmoyishlariga, Vazirlar Mahkamasining qarorlari va farmoyishlariga, boshqa normativ-huquqiy hujjatlarga va ushbu Nizomga amal qiladi.

5. Inspeksiyaning tuzilmasi Oʻzbekiston Respublikasi Vazirlar Mahkamasi tomonidan tasdiqlanadi.

6. Inspeksiyaning faoliyati Oʻzbekiston Respublikasi Vazirlar Mahkamasi huzuridagi Respublika yoʻl jamgʻarmasining mablagʻlari, shuningdek qonun hujjatlarida taqiqlanmagan boshqa manbalar hisobiga moliyalashtiriladi.

7. Inspeksiya yuridik shaxs hisoblanadi, Oʻzbekiston Respublikasining Davlat gerbi tasviri tushirilgan va oʻz nomi davlat tilida yozilgan muhrga, mustaqil balansga, Oʻzbekiston Respublikasi Moliya vazirligining Gʻaznachiligida bank hisob raqamlariga va gʻaznachilik hisob raqamlariga ega.

8. Quyidagilar Inspeksiyaning asosiy vazifalari hisoblanadi:

yuridik va jismoniy shaxslar tomonidan yoʻl qurilishi ishlarida, yoʻl-qurilish materiallari, mahsulotlar va konstruksiyalarni ishlab chiqarishda texnik jihatdan tartibga solish sohasidagi normativ hujjatlar talablariga rioya etilishini nazorat qilish;

qurilishi tugallangan yoʻl obyektlarini foydalanishga qabul qilish boʻyicha komissiyalar ishida qatnashish;

yoʻl qurilishi yuzasidan shaharsozlik qonunchiligiga rioya qilinishi ustidan nazorat qilishni tashkil etish borasida texnik jihatdan tartibga solish sohasida normativ hujjatlarni takomillashtirishga doir takliflar kiritish va unda ishtirok etish;

yoʻl-qurilish materiallari, mahsulotlar va konstruksiyalarni standartlashtirish va sertifikatlashtirish ishlarini olib borish.

9. Inspeksiya oʻziga yuklangan vazifalarga muvofiq quyidagi funksiyalarni bajaradi:

a) yuridik va jismoniy shaxslar tomonidan yoʻl qurilishi ishlarida, yoʻl-qurilish materiallari, mahsulotlar va konstruksiyalarni ishlab chiqarishda texnik jihatdan tartibga solish sohasidagi normativ hujjatlar talablariga rioya etilishini nazorat qilish sohasida:

buyurtmachi tashkilotlarga avtomobil yoʻllarini qurish, rekonstruksiya qilish va mukammal taʼmirlash ishlarini bajarishga ruxsatnomalar beradi;

yoʻl qurilishi jarayonida loyiha-smeta hujjatlariga kiritiladigan oʻzgarishlarning yoʻl qurilishi sohasida texnik jihatdan tartibga solish borasidagi normativ hujjatlar talablariga muvofiqligi monitoringi olib borilishi va nazorat qilinishini taʼminlaydi;

ishlarni bajaruvchilarda va xizmatlar koʻrsatuvchi loyiha va pudrat tashkilotlarida qonun hujjatlarida nazarda tutilgan loyiha va qurilish faoliyatining litsenziyalanadigan turlarini amalga oshirish huquqiga litsenziya mavjudligini nazorat qiladi;

bajariladigan qurilish-montaj ishlari sifati, ularning yoʻl qurilishi sohasida texnik jihatdan tartibga solish borasidagi normativ hujjatlar talablariga va loyiha-smeta hujjatlariga muvofiqligini nazorat qilishni taʼminlaydi;

bajariladigan ishlar, shuningdek yoʻl qurilishi obyektida qoʻllaniladigan yoʻl-qurilish materiallari, buyumlari va konstruksiyalarini nazorat tartibida sinab koʻradi, suratga oladi va oʻlchaydi;

mavjud yoʻllar va sunʼiy inshootlarning texnik holatini ularni qayta tiklash yoki rekonstruksiya qilishning maqsadga muvofiqligi yuzasidan shartnoma asosida tekshiradi;

shaharsozlik toʻgʻrisidagi qonun hujjatlari va yoʻl qurilishi, yoʻl-qurilish materiallari, buyumlari va konstruksiyalarini ishlab chiqish sohasida texnik jihatdan tartibga solish borasidagi normativ hujjatlar talablari buzilganda maʼmuriy taʼsir koʻrsatish choralarini qoʻllaydi;

arxitektura-shaharsozlik hujjatlarini ishlab chiqish boʻyicha faoliyatni amalga oshirish huquqiga va shaharsozlik toʻgʻrisidagi qonun hujjatlari va yoʻl qurilishi sohasida texnik jihatdan tartibga solish boʻyicha normativ hujjatlar talablari buzilishiga yoʻl qoʻygan tashkilotlarning qurilish sohasida faoliyatning ayrim turlarini amalga oshirishga boʻlgan huquqiga berilgan litsenziyalarning amal qilishini toʻxtatib turish yoki toʻxtatish toʻgʻrisidagi takliflarni Oʻzbekiston Respublikasi Davlat arxitektura va qurilish qoʻmitasiga kiritadi;

b) qurilishi tugallangan yoʻl obyektlarini foydalanishga qabul qilish boʻyicha komissiyalar ishida qatnashish doirasida:

yoʻllar va sunʼiy inshootlarning, ularning qismlari va konstruktiv elementlarining avariya holatidaligi sabablarini tekshirish boʻyicha texnikaviy komissiyalar ishida ishtirok etadi;

texnik va mualliflik nazorati xizmatlari hamda idoralar va boshqa tashkilotlarning sinash yoʻl-qurilish laboratoriyalari faoliyatining doimiy monitoringini olib boradi;

v) yoʻl qurilishi yuzasidan shaharsozlik qonunchiligiga rioya qilinishi ustidan nazorat qilishni tashkil etish borasida texnik jihatdan tartibga solish sohasida normativ hujjatlarni takomillashtirishga doir takliflar kiritish va unda ishtirok etish boʻyicha:

yoʻl qurilishi sohasida normativ-huquqiy hujjatlar loyihalarini mustaqil ishlab chiqadi va ishlab chiqishda ishtirok etadi;

yoʻl qurilishi yuzasidan shaharsozlik qonun hujjatlariga rioya etilishi ustidan nazoratni tashkil etish sohasida texnik jihatdan tartibga solishni takomillashtirish boʻyicha takliflarni mustaqil ishlab chiqadi va ishlab chiqishda ishtirok etadi;

g) yoʻl-qurilish materiallari, mahsulotlar va konstruksiyalarni standartlashtirish va sertifikatlashtirish ishlarini olib borish sohasida;

monitoring natijalarini tahlil qiladi, xalqaro tajribani oʻrganadi, yoʻl qurilishi sifati, shuningdek yoʻl-qurilish materiallari, buyumlari va konstruksiyalaridan oqilona foydalanish masalalarini tartibga soluvchi metodik hujjatlarning normativ talablarini takomillashtirish boʻyicha takliflarni ishlab chiqadi;

“Oʻzstandart” agentligi, Oʻzbekiston Respublikasi Avtomobil yoʻllari davlat qoʻmitasi, Davlat arxitektura va qurilish qoʻmitasi bilan birgalikda sifat boʻyicha xalqaro talablarga muvofiq yoʻl-qurilish materiallari, buyumlari va konstruksiyalarini standartlashtirish va sertifikatlashtirish ishlarini olib boradi;

yoʻl-qurilish materiallari, buyumlari va konstruksiyalari sifatini taʼminlash, avtomobil yoʻllari sohasida shaharsozlik qonun hujjatlari va texnik jihatdan tartibga solish boʻyicha normativ hujjatlar talablariga rioya etish masalalari boʻyicha boshqa vakolatli davlat organlari, ilmiy-tadqiqot, sinash, loyiha va nodavlat notijorat tashkilotlari bilan oʻzaro hamkorlik qiladi.

10. Inspeksiya oʻziga yuklangan vazifalar va funksiyalarni bajarish uchun quyidagi huquqlarga ega:

a) yoʻl qurilishi, yoʻl-qurilish materiallari, buyumlari va konstruksiyalari ishlab chiqarish obyektlariga toʻsiqsiz kirish hamda yuridik shaxslar tomonidan yoʻl qurilishi sohasida texnik jihatdan tartibga solish borasidagi normativ hujjatlar talablariga rioya etilishini nazorat qilish;

b) loyiha-pudrat tashkilotlari va buyurtmachi tashkilotlardan qoʻllaniladigan yoʻl-qurilish materiallari, konstruksiyalari va buyumlari hamda bajariladigan yoʻl-qurilish va montaj ishlari sifatini nazorat qilish uchun zarur boʻlgan loyiha, texnologik, ijro hujjatlarini va boshqa materiallarni olish;

v) pudrat tashkilotlariga konstruksiyalar, uzellar va detallarning alohida elementlarini ochishni, qoʻllanilgan yoʻl-qurilish materiallari, konstruksiyalari va buyumlarini, muhandislik tizimlarini asoslardagi va orqaga koʻmib tashlashda tuproqni sinashni yuklash, zarurat boʻlganda tegishli xulosani tayyorlash uchun ilmiy-tadqiqot, sinash va loyiha tashkilotlarining ekspertlarini, mutaxassislarini jalb etish;

g) yoʻl qurilishi va yoʻl-qurilish materiallari, buyumlari va konstruksiyalarini ishlab chiqarish sohasida shaharsozlik faoliyati subyektlari bajarishi majburiy boʻlgan aniqlangan qoida buzilishlarini bartaraf etish toʻgʻrisida koʻrsatmalar berish;

d) qonun hujjatlarida belgilangan tartibda yoʻl qurilishi sohasida maʼmuriy huquqbuzarliklar toʻgʻrisida protokol tuzish;

e) yoʻl qurilishi sohasida texnik jihatdan tartibga solish borasida normativ hujjatlar talablari buzilganligi aniqlangan taqdirda yoʻl qurilishida materiallar va buyumlarni ishlab chiqarishni, sotishni va ularni qoʻllashni toʻxtatib turish toʻgʻrisida koʻrsatmalar berish;

j) tasdiqlangan loyiha yechimlari va yoʻl qurilishi sohasida mustahkamlik va barqarorlik tavsiflari buzilishiga olib kelgan yoʻl qurilishi sohasida texnik jihatdan tartibga solish borasidagi normativ hujjatlar talablari buzilishi aniqlanganda, shuningdek sunʼiy inshootlar, oʻzboshimchalik bilan qurilishi avariyalari xavfi mavjud boʻlgan hollarda yoʻl qurilishi sohasida qurilish-montaj ishlarini bajarishni toʻxtatib qoʻyish. Tadbirkorlik subyektining faoliyati toʻxtatib qoʻyilishiga olib kelgan qurilish-montaj ishlarini bajarishni toʻxtatib qoʻyish sud tartibida amalga oshiriladi, favqulodda vaziyatlar, epidemiyalar va aholining hayoti va sogʻligʻiga boshqa real xavf yuzaga kelishining oldi olinishi munosabati bilan faoliyatni oʻn ish kunidan ortiq boʻlmagan muddatga toʻxtatib qoʻyish hollari bundan mustasno;

z) buyurtmachilarga, pudratchilarga va umumiy foydalaniladigan avtomobil yoʻllarini, xoʻjaliklararo qishloq avtomobil yoʻllarini, shaharlar, shaharlar posyolkalari va ovullar koʻchalarini balansida saqlovchilarga shaharsozlik sohasidagi qonun hujjatlari talablarini buzayotgan mansabdor shaxslarni javobgarlikka tortish toʻgʻrisida taqdimnoma kiritish;

i) Avtomobil yoʻllari davlat qoʻmitasidan, Davlat arxitektura va qurilish qoʻmitasidan, Davlat statistika qoʻmitasidan, Oʻzbekiston Respublikasi Vazirlar Mahkamasi huzuridagi Respublika yoʻl jamgʻarmasidan, Oʻzbekiston Respublikasining boshqa vazirliklari va idoralaridan yoʻl qurilishi, yoʻl-qurilish materiallari, buyumlari va konstruksiyalari ishlab chiqarish sohasida texnik jihatdan tartibga solishga doir zarur axborotlarni va normativ hujjatlarni olish;

k) Oʻzbekiston Respublikasi Avtomobil yoʻllari davlat qoʻmitasining yagona axborot bazasidan foydalanish;

l) shaharsozlik sohasidagi qonun hujjatlarining buzilishlari toʻgʻrisidagi materiallarni prokuratura va sud organlariga berish.

11. Inspeksiya oʻz zimmasiga yuklangan vazifalar va funksiyalarning bajarilishi yuzasidan qonun hujjatlariga muvofiq javob beradi.

12. Yoʻl qurilishi obyektlarida bajarilayotgan ishlarning sifatini nazorat qilish boʻyicha ishlar buyurtmachi va pudratchining ularning buyruqlari bilan tayinlanadigan masʼul vakillari ishtirokida amalga oshiriladi.

Zarur hollarda ushbu maqsadlar uchun Inspeksiya tomonidan loyihalash tashkilotlari, banklar va boshqa manfaatdor tashkilotlarning mutaxassislari shartnoma asosida jalb etilishi mumkin.

13. Ishlab chiqaruvchi tashkilotlarda yoʻl-qurilish materiallari, konstruksiyalari va buyumlari sifatini nazorat qilish ishlari texnik jihatdan tartibga solish normativ hujjatlari (mavjud boʻlganda) talablariga rioya etilishi uchun masʼul boʻlgan mansabdor shaxslar (bosh muhandis, sex boshligʻi, texnikaviy nazorat qilish boʻlimi boshligʻi va boshqalar) ishtirokida amalga oshiriladi.

14. Qurilish obyektida yuritiladigan ishlarni amalga oshirish jurnalida ishlarning sifatini nazorat qilish natijalari boʻyicha tegishli yozuv qayd etiladi, Inspeksiya inspektori, buyurtmachi va pudratchi vakillari tomonidan imzolanadigan dalolatnoma tuziladi, zarurat boʻlganda — yozma buyruq beriladi.

Shaharsozlik toʻgʻrisidagi qonun hujjatlarida maʼmuriy chora koʻrish nazarda tutilgan buzilish faktlari boʻyicha yozma buyruqlar Inspeksiya boshligʻi yoki uning oʻrinbosari imzosi bilan beriladi.

15. Inspeksiya xodimlari oʻz funksional vazifalarini bajarishda davlat nazoratining boshqa vakolatli organlari bilan oʻzaro hamkorlik qiladilar.

16. Inspeksiyani boshliq boshqaradi, u Oʻzbekiston Respublikasi Prezidenti tomonidan lavozimga tayinlanadi va lavozimdan ozod qilinadi hamda maqomi boʻyicha vazirning birinchi oʻrinbosariga tenglashtiriladi.

17. Inspeksiya boshligʻining oʻrinbosari Oʻzbekiston Respublikasi Vazirlar Mahkamasi tomonidan lavozimga tayinlanadi va lavozimdan ozod qilinadi hamda maqomi boʻyicha vazir oʻrinbosariga tenglashtiriladi.

18. Inspeksiya xodimlari Inspeksiya boshligʻining buyrugʻi bilan tayinlanadilar.

19. Inspeksiya boshligʻi:

Inspeksiya faoliyatiga bevosita rahbarlikni amalga oshiradi va zimmasiga yuklangan vazifalarning bajarilishi yuzasidan shaxsan javob beradi;

Inspeksiya xodimlarining lavozim yoʻriqnomalarini va funksional vazifalarini tasdiqlaydi, boʻysunuvchilarning shaxsiy javobgarlik darajasini belgilaydi;

yoʻl-qurilish ishlari sifati yuzasidan tizimli monitoringni va taʼsirchan nazoratni, shuningdek yoʻl qurilishi sohasidagi muammoli masalalarni hal etish boʻyicha amaliy chora-tadbirlarni ishlab chiqish va amalga oshirishning tashkil etilishini taʼminlaydi;

respublika mintaqalaridagi ishlarning yillik hajmlaridan kelib chiqqan holda Inspeksiya kadrlarini tanlash va joy-joyiga qoʻyishni amalga oshiradi, davlat inspektorlarini belgilangan xodimlar soni doirasida mintaqalar boʻyicha qayta taqsimlaydi;

ushbu Nizomga va boshqa qonun hujjatlariga muvofiq boshqa vakolatlarni amalga oshiradi.

20. Davlat inspektorlari:

yoʻl qurilishi sohasida qurilish-montaj ishlarini amalga oshirishga ruxsatnoma olish uchun buyurtmachilar tomonidan taqdim etilgan hujjatlarni oʻrganadilar, ular boʻyicha xulosalar tayyorlaydilar va rahbariyatga kiritadilar;

bajarilayotgan qurilish-montaj ishlarining sifati, loyiha-smeta hujjatlariga kiritilayotgan oʻzgartirishlarning muvofiqligi yuzasidan nazoratni amalga oshiradilar;

loyihalash va qurilish faoliyatining litsenziyalanayotgan turlarini amalga oshirish huquqiga litsenziyaning mavjudligini tekshiradilar;

obyektlarda qoʻllanayotgan yoʻl-qurilish materiallari, konstruksiyalari va buyumlarini nazorat sinovidan oʻtkazadilar;

qonun hujjatlarida nazarda tutilgan holatlarda yoʻl qurilishi sohasidagi maʼmuriy qonun buzilishlari toʻgʻrisida protokollar tuzadilar;

tugallangan obyektlarni foydalanishga qabul qilish komissiyalari hamda yoʻllar va sunʼiy inshootlarning avariyali holatlari sabablarini tekshirish boʻyicha texnik komissiyalar ishlarida qatnashadilar;

qonun hujjatlariga muvofiq vazifalarning taqsimlanishiga koʻra boshqa vakolatlarni amalga oshiradilar.

21. Inspeksiya mansabdor shaxslarining harakatlari (harakatsizligi) yuzasidan Oʻzbekiston Respublikasi Vazirlar Mahkamasiga yoki sudlarga belgilangan tartibda shikoyat qilinishi mumkin.

22. Inspeksiya xodimlari noqonuniy harakatlari (harakatsizligi) hamda yuridik va jismoniy shaxslarga zarar yetkazganlik uchun qonun hujjatlariga muvofiq javobgarlikka tortiladilar.

23. Inspeksiyani qayta tashkil etish va tugatish qonun hujjatlarida belgilangan tartibda amalga oshiriladi.