O‘zbekiston Respublikasi Vazirlar Mahkamasining “Davlat soliq xizmati organlari faoliyatini tashkil etishni takomillashtirish to‘g‘risida” 2000-yil 13-martdagi 87-son qarorining bajarish yuzasidan hamda Davlat soliq xizmatini malakali kadrlar bilan ta’minlash maqsadida Vazirlar Mahkamasi qaror qiladi:

1. Buxoro va Farg‘ona shaharlarida O‘zbekiston Respublikasi Davlat soliq qo‘mitasining Soliq kollejlari tashkil etilsin.

2. O‘zbekiston Respublikasi Vazirlar Mahkamasining “O‘zbekiston Respublikasi Davlat soliq qo‘mitasining Soliq kollejini tashkil etish to‘g‘risida” 1998-yil 14-iyuldagi 298-son qarorining 1 va 2-bandlari yangi tashkil etilayotgan Soliq kollejlariga tatbiq etilsin.

3. Soliq kollejlari ma’muriy va o‘qituvchilar tarkibining shtatlar soni qonun hujjatlariga muvofiq belgilanadi.

4. O‘zbekiston Respublikasi Davlat soliq qo‘mitasi:

2000-yil 1-sentabrdan boshlab kollejlarda mashg‘ulotlar boshlanishini ta’minlasin;

Davlat test markazi bilan birgalikda test sinovlari natijalari bo‘yicha abituriyentlarni belgilangan tartibda 2000/2001 o‘quv yilida O‘zbekiston Respublikasi o‘rta maxsus, kasb-hunar ta’limi muassasalarida o‘qitish uchun belgilangan davlat grantlari doirasida xolisona, sifatli tanlab olsin.

5. O‘zbekiston Respublikasi Moliya vazirligi 2001-yildan boshlab Buxoro va Farg‘ona shaharlaridagi Soliq kollejlarining xarajatlariga belgilangan tartibda zarur mablag‘lar ajratishni nazarda tutsin.

6. 2000-yilda kollejlarning joriy xarajatlari O‘zbekiston Respublikasi Davlat soliq qo‘mitasining ijtimoiy rivojlantirish va moddiy-texnika ta’minoti jamg‘armasi mablag‘lari hisobiga amalga oshirilsin.

7. Vazirlar Mahkamasining Qurilish va qurilish materiallari sanoati kompleksi (A.N. Isayev), Davlat soliq qo‘mitasi (B.A. Xo‘jayev), Moliya vazirligi (R.S. Azimov), Oliy va o‘rta maxsus ta’lim vazirligi (S.S. G‘ulomov), Buxoro (S.Q. Husenov) va Farg‘ona (A.A. Otabayev) viloyatlari hokimliklari 2000-yilning 1-avgustigacha Buxoro shahar Sanoatchilar ko‘chasidagi 7-uyda joylashgan 7-son kasb-hunar kolleji, Farg‘ona shahar Qirguli tuman Farg‘ona ko‘chasidagi 122-uyda joylashgan elektrotexnika kasb-hunar litseyi binolarining qurilishi va rekonstruksiyasini yakunlasinlar, bu binolar Davlat soliq qo‘mitasi balansiga o‘tkazilsin.

8. Belgilansinki, kollejlar binolari va inshootlari qurilishi, ularni rekonstruksiya qilish va ta’mirlash Buxoro va Farg‘ona viloyatlarining 2000-yilga mo‘ljallangan kasb-hunar kollejlarini qurish va rekonstruksiya qilish maqsadli dasturlarida ko‘zda tutilgan kapital quyilmalar limitlari doirasida amalga oshiriladi.

9. O‘zbekiston Respublikasi Oliy va o‘rta maxsus ta’lim vazirligi, Moliya vazirligi, Davlat soliq qo‘mitasi, Davlat bojxona qo‘mitasi tegishli vazirlik va idoralar bilan birgalikda bir oy muddatda soliq va bojxona idoralari xodimlarini tayyorlash, qayta tayyorlash va malakasini oshirish bo‘yicha oliy kurslar tashkil etish haqida takliflar kiritsinlar.

10. Mazkur qarorning bajarilishini nazorat qilish O‘zbekiston Respublikasi Bosh vazirining birinchi o‘rinbosari B. Hamidov zimmasiga yuklansin.