Oʻzbekiston Respublikasi va Birlashgan Arab Amirliklari, keyingi oʻrinlarda “Davlatlar” deb ataluvchilar,

mahkumlarga jazoni oʻz davlatida oʻtash imkoniyatini berish orqali ularning jamiyatda moslashishlariga koʻmaklashishni istab, quyidagilar toʻgʻrisida kelishib oldilar:

Ushbu Shartnoma maqsadlarida atamalar quyidagi maʼnoni bildiradi:

1. “Hukm” — sodir etilgan jinoyat uchun cheklangan yoki cheklanmagan muddatga ozodlikdan mahrum etish haqidagi sud qarori.

2. “Mahkum” — hukm chiqarish Davlati hududida unga nisbatan ozodlikdan mahrum etish hukmi chiqarilgan shaxs.

3. “Hukm chiqarish Davlati” — topshirilishi mumkin boʻlgan yoki topshirilgan shaxsga nisbatan hududida hukm chiqarilgan davlat.

4. “Hukmni ijro etish Davlati” — mahkum jazo muddatini yoki uning qolgan qismini oʻtashi uchun topshirilishi mumkin boʻlgan davlat.

5. “Qarindoshlar” — Oʻzbekiston Respublikasi uchun milliy qonunchilikka muvofiq yaqin qarindoshlar; Birlashgan Arab Amirliklari uchun milliy qonunchilikka muvofiq toʻrtinchi darajagacha boʻlgan qarindoshlar.

1. Davlatlar ushbu Shartnoma qoidalariga muvofiq mahkumni topshirish sohasida hamkorlikni amalga oshirish uchun barcha zarur choralar koʻradilar.

2. Ushbu Shartnoma qoidalariga muvofiq, mahkum hukm chiqarish Davlati hududidan hukmni ijro etish Davlati hududiga jazoni yoki uning qolgan qismini oʻtash uchun topshirilishi mumkin.

3. Ushbu Shartnomaning 8-moddasi qoidalariga muvofiq, topshirish toʻgʻrisidagi soʻrov hukm chiqarish Davlati yoki hukmni ijro etish Davlati tomonidan taqdim qilinishi mumkin. Mahkum yoki uning qarindoshlaridan biri yoxud qonuniy vakili uning bunday topshirishdan manfaatdor ekanligini hukm chiqarish Davlati yoki hukmni ijro etish Davlatiga bildirishi mumkin.

1. Ushbu Shartnoma maqsadlarida Davlatlar tomonidan tayinlangan Markaziy organlar topshirish toʻgʻrisidagi soʻrovlar bilan bogʻliq masalalarda bir-birlari bilan diplomatik kanallar orqali aloqa qiladilar.

2. Oʻzbekiston Respublikasi uchun Bosh prokuratura va Birlashgan Arab Amirliklari uchun Adliya vazirligi Markaziy organ hisoblanadi.

3. Davlatlardan biri oʻzining Markaziy organini oʻzgartirgan hollarda u boshqa Davlatni bunday oʻzgarishlar toʻgʻrisida diplomatik kanallar orqali yozma ravishda xabardor qiladi.

1. Topshirish toʻgʻrisidagi soʻrovlar va zarur hujjatlar yozma shaklda tuzilgan boʻlishi va diplomatik kanallar orqali soʻralayotgan Davlatning Markaziy organiga yuborilishi lozim.

2. Topshirish toʻgʻrisidagi soʻrovlar va unga ilova qilingan hujjatlar soʻrayotgan Davlatning rasmiy tilida tuzilishi hamda soʻralayotgan Davlatning rasmiy tiliga yoki ingliz tiliga tarjimasi bilan birga taqdim qilinishi, soʻrayotgan vakolatli organ tomonidan imzolangan, muhrlangan va tasdiqlangan boʻlishi lozim, bunda ularning haqiqiyligini boshqacha tarzda tasdiqlash talab etilmaydi.

1. Hukm chiqarish Davlati tomonidan ushbu Shartnomaga muvofiq taqdim qilingan soʻrov boʻyicha qaror qabul qilish maqsadida, hukm chiqarish Davlati hukmni ijro etish Davlatini quyidagi maʼlumot va hujjatlar bilan taʼminlashi lozim:

a) mahkumning familiyasi, ismi, otasining ismi, tugʻilgan sanasi va joyi;

b) hukmning xususiyati, muddati va ijro sanasi, jazo muddatining oʻtalmagan qismini tasdiqlovchi bayonot hamda dastlabki qamoqda saqlash yoki jazodan ozod qilish toʻgʻrisida yoxud hukmni ijro etishga oid boshqa har qanday maʼlumotlar;

c) hukmning tasdiqlangan nusxasi va qoʻllanilgan jinoyat qonunchiligi matnining nusxasi;

yo) mahkumga oid tibbiy, ijtimoiy va boshqa har qanday hisobot, zarur hollarda, uning hukm chiqarish Davlatida davolanganligi toʻgʻrisida har qanday maʼlumot hamda hukmni ijro etish Davlatida davolanishni davom ettirish boʻyicha tavsiyalar;

e) 6-moddaning “e” bandida nazarda tutilgan hollarda, topshirishga rozilikni tasdiqlovchi hujjat.

2. Hukmni ijro etish Davlati tomonidan ushbu Shartnomaga muvofiq taqdim qilingan soʻrov boʻyicha qaror qabul qilish maqsadida, hukmni ijro etish Davlati hukm chiqarish Davlatiga quyidagi maʼlumot va hujjatlarni yuborishi lozim:

a) mahkumning hukmni ijro etish Davlati fuqarosi ekanligini tasdiqlovchi bayonot yoki hujjat;

b) hukm chiqarishga asos boʻlgan harakat yoki harakatsizlik hukmni ijro etish Davlati hududida sodir etilgan taqdirda, jinoiy qilmishni tashkil qilishi toʻgʻrisidagi tegishli qonunchilik normalarining koʻchirmasi;

c) topshirilayotgan shaxs hukmni ijro etish Davlatida boshqa ishlar boʻyicha soʻralayotganligi yoki ayblanayotganligi yoxud hukm qilinayotganligi toʻgʻrisida bayonot;

d) hukm chiqarish Davlatining roziligisiz topshirilishi soʻralayotgan shaxsni afv etmaslik toʻgʻrisida majburiyat.

3. Hukm chiqarish Davlati hukmni ijro etish Davlatining soʻrovi boʻyicha shaxsni topshirishga rozilik bergan taqdirda, hukm chiqarish Davlati ushbu moddaning 1-bandida nazarda tutilgan maʼlumot va hujjatlarni taqdim etadi.

1. Ushbu Shartnomaga muvofiq mahkum quyidagi shartlar asosida topshirilishi mumkin:

a) agar mahkum hukmni ijro etish Davlati fuqarosi boʻlsa;

b) agar sud qarori yakuniy va ijro etilishi mumkin boʻlsa;

s) agar oʻzgacha tarzda axdlashilmagan boʻlsa, topshirish toʻgʻrisida soʻrov kelib tushgan paytda jazo muddatining oʻtalmay qolgan qismi olti (6) oydan kam boʻlmasa;

d) agar hukm chiqarishga asos boʻlgan harakat yoki harakatsizlik hukmni ijro etish Davlati hududida sodir etilgan taqdirda, uning qonunchiligiga muvofiq jinoyat hisoblansa;

e) agar mahkum topshirishga yozma ravishda rozilik bildirsa, Mahkumning yoshi yoki jismoniy yoxud ruhiy holatini eʼtiborga olgan holda, quyidagilar tomonidan topshirishga rozilik berilishi mumkin:

Oʻzbekiston Respublikasi fuqarolari uchun — mahkumning qonuniy vakili tomonidan;

Birlashgan Arab Amirliklari fuqarolari uchun — mahkumning qonuniy vakili yoki uning qarindoshlaridan biri tomonidan;

f) agar topshirishga har ikkala hukm chiqarish Davlati va hukmni ijro etish Davlati rozilik bildirsa.

1. Quyidagi hollarda topshirish toʻgʻrisidagi soʻrov rad etiladi:

a) agar topshirish hukm chiqarish Davlatining suvereniteti, xavfsizligi, jamoat tartibi yoki boshqa har qanday muhim manfaatlariga daxl qilishi mumkin boʻlsa;

b) agar mahkumni topshirishni soʻrash uchun asos boʻlgan qilmish harbiy jinoyat boʻlib, umumiy jinoyat huquqi boʻyicha jinoyat deb hisoblanmasa;

c) agar hukmni ijro etish ikkala davlatda ijro etishga taʼsir qiladigan darajada bir-biridan farq qilsa, basharti soʻrov bajarilishi mumkin boʻlgan boshqacha tartib va shartlar kelishib olinmasa;

d) agar hukmni ijro etish Davlati topshirish koʻzda tutilayotgan mahkumni 5-modda 2-bandining “d” kichik bandiga muvofiq afv etmaslik toʻgʻrisida majburiyatni oʻz zimmasiga olmasa.

2. Quyidagi hollarda topshirish toʻgʻrisidagi soʻrov rad qilinishi mumkin:

a) agar mahkum hukm chiqarish Davlatida sud qarorlari boʻyicha jarimalar, sud xarajatlari, badallar va boshqa moliyaviy toʻlovlarni amalga oshirmagan boʻlsa;

b) agar hukm chiqarish Davlatining sudlarida pul kompensatsiyasi bilan bogʻliq har qanday boshqa huquqlarni talab qilish boʻyicha mahkumga qarshi daʼvo qoʻzgʻatilgan boʻlsa.

Hukm chiqarish Davlati 6-moddaning “e” bandiga binoan topshirish uchun shaxsning berayotgan roziligi ixtiyoriy ekanligini hamda u bunday rozilikning huquqiy oqibatlarini toʻla tushunayotganligini oʻz milliy qonunchiligiga muvofiq tekshirishi lozim.

Topshirish toʻgʻrisidagi soʻrov qanoatlantirilgan taqdirda, Davlatlarning markaziy organlari mahkumni topshirish joyi, vaqti va tartibi toʻgʻrisida oʻzaro kelishib oladilar.

1. Hukmni ijro etish Davlati hukmning huquqiy xususiyati va muddati bilan cheklangan.

2. Hukmni ijro etish Davlatining qonunchiligiga muvofiq hukm ijro etiladi va faqat mazkur Davlat ushbu Shartnomaning 13 va 14-moddalari qoidalarini hisobga olgan holda, tegishli qarorlar qabul qilishga haqli.

3. Hukmni ijro etish Davlatining vakolatli organlari ushbu Shartnomaning 12-moddasini hisobga olgan holda, oʻz qonunchiligiga muvofiq hukmning ijro etilishini davom ettiradilar.

1. Faqat hukm chiqarish Davlatining sudi topshirilgan mahkumga nisbatan chiqarilgan hukmning qonuniyligi va asosliligini qayta koʻrib chiqishga haqli.

2. Hukm qayta koʻrib chiqilgan taqdirda, hukm chiqarish Davlatining Markaziy organi hukmni ijro etish Davlatiga hukmning bekor qilingani yoki oʻzgartirilgani toʻgʻrisidagi sud qarorining tasdiqlangan nusxasini zudlik bilan yuboradi.

1. Mahkumga nisbatan hukm chiqarish Davlatida yoki hukmni ijro etish Davlatida eʼlon qilingan amnistiya tatbiq qilinadi.

2. Mahkumga nisbatan hukm chiqarish Davlati tomonidan eʼlon qilingan afv etish tatbiq qilinadi.

3. Mahkum hukm chiqarish Davlatining roziligisiz hukmni ijro etish Davlati tomonidan afv etilishi yoki shartli ravishda yoxud sogʻligʻi tufayli ozod etilishi yoki boshqacha tarzda afv etilishi mumkin emas.

Hukmni ijro etish Davlati hukm chiqarish Davlati tomonidan hukm ijrosini bekor qiladigan har qanday qaror va choralar toʻgʻrisida xabardor qilinishi bilan darhol hukmning ijro etilishini tugatadi.

1. Hukmni ijro etish Davlati quyidagilar toʻgʻrisida hukm chiqarish Davlatini xabardor qilishi lozim:

a) hukm muddatining tugashi;

b) mahkumning hukm muddati tugashidan avval qochib ketishi. Mazkur holatda hukmni ijro etish Davlati oʻz qonunchiligiga muvofiq uni qamoqqa olish va sud muhokamasiga topshirish uchun tegishli choralar koʻrishi lozim.

2. Hukm chiqarish Davlatining soʻroviga muvofiq, hukmni ijro etish Davlati har bir alohida holatda hukmning qolgan qismini hisobga olgan holda uning ijro etilishi haqida xabardor qiladi.

1. Har bir Davlat soʻrov asosida boshqa Davlatga uchinchi davlat tomonidan topshirilayotgan mahkumni oʻz hududi orqali tranzit olib oʻtishga ruxsat beradi, bunda hukm qilingan shaxsni qamoqda saqlash uchun zarur qonuniy shart-sharoitlar yaratilishi lozim.

2. Havo transportidan foydalanish va boshqa Davlat hududiga qoʻnmaslik rejalashtirilgan taqdirda, mazkur qoida qoʻllanilmaydi.

Ushbu Shartnoma qoidalariga muvofiq hukmni ijro etish uchun topshirilgan mahkum hukm chiqarish Davlatida sudlangan aynan bitta jinoyati uchun hukmni ijro etish Davlatida qamoqqa olinishi, sudga berilishi yoki hukm qilinishi mumkin emas.

1. Hukmni ijro etish Davlati mahkumni topshirish oqibatida yuzaga keladigan xarajatlarni qoplaydi, hukm chiqarish Davlati hududida yuzaga keladigan xarajatlar bundan mustasno boʻlib, ular ushbu Davlat tomonidan qoplanishi lozim.

2. Agar soʻrovni bajarish koʻzda tutilmagan xarajatlarni talab qilsa, Davlatlar soʻrov bajarilishi mumkin boʻlgan muddatlar va shartlarni belgilash boʻyicha oʻzaro maslahatlashishlari lozim.

Ushbu Shartnomaning samaradorligini oshirish maqsadida Davlatlarning Markaziy organlari oʻzaro maslahatlashuvlar oʻtkazishlari mumkin. Markaziy organlar ushbu Shartnomaning tatbiq etilishini yengillashtirish uchun zarur boʻlgan amaliy choralar koʻrishlari mumkin.

Ushbu Shartnoma qoidalari uning kuchga kirguniga qadar yoki undan keyin chiqarilgan hukmlarga nisbatan qoʻllaniladi.

Ushbu Shartnomani talqin qilish va qoʻllashda yuzaga keladigan barcha nizolar boʻyicha Davlatlarning Markaziy organlari tomonidan oʻzaro kelishuvga erishilmasa, ular diplomatik kanallar orqali maslahatlashuvlar yoʻli bilan hal qilinadi.

Ushbu Shartnoma Davlatlar ishtirokchi boʻlgan boshqa xalqaro shartnomalardan kelib chiqadigan huquq va majburiyatlarga daxl qilmaydi.

1. Ushbu Shartnoma ratifikatsiya qilinishi hamda ratifikatsiya yorliqlari almashinishi lozim.

2. Ushbu Shartnoma ratifikatsiya yorliqlari almashingan sanadan soʻng oʻttizinchi (30) kunda kuchga kiradi.

3. Ushbu Shartnoma Davlatlarning oʻzaro kelishuviga asosan oʻzgartirilishi mumkin, bunday holatlarda mazkur modda qoidalari qoʻllaniladi.

4. Har bir Davlat istalgan vaqtda diplomatik kanallar orqali yozma xabarnoma yuborish bilan Shartnomaning amal qilishini tugatishi mumkin. Shartnomaning amal qilishi bunday xabarnoma berilgan sanadan boshlab olti (6) oydan soʻng tugaydi. Biroq xabarnoma berilishidan oldin boshlangan protsessual harakatlar ular yakunlanguniga qadar ushbu Shartnoma bilan tartibga solinishda davom etadi.

Tegishli tartibda oʻz davlatlari tomonidan vakolatlangan quyida imzo chekuvchilar shunga guvohlik berib, ushbu Shartnomani imzoladilar.

Abu Dabi shahrida 2014-yil 11-noyabrda ikki nusxada, har biri oʻzbek, arab va ingliz tillarida tuzildi, bunda barcha matnlar teng autentikdir. Ushbu Shartnoma matnlarini talqin qilishda kelishmovchiliklar yuzaga kelgan taqdirda, ingliz tilidagi matn ustuvor hisoblanadi.