O‘zbekiston Respublikasining “Qimmatli qog‘ozlar bozori to‘g‘risida”gi Qonuni, O‘zbekiston Respublikasi Vazirlar Mahkamasining 2016-yil 11-yanvardagi 6-son “Ko‘chmas mulkka bo‘lgan huquqlarni va u haqda tuzilgan bitimlarni davlat ro‘yxatidan o‘tkazish tartibi to‘g‘risidagi nizomning 40-bandiga qo‘shimchalar kiritish haqida”gi, 2016-yil 7-iyundagi 190-son “O‘zbekiston Respublikasi Hukumatining ayrim qarorlariga davlat uy-joy fondini xususiylashtirish tartibini takomillashtirishga yo‘naltirilgan o‘zgartirish va qo‘shimchalar kiritish to‘g‘risida”gi va 2016-yil 7-oktabrdagi 336-son “O‘zbekiston Respublikasi fuqarolarini, chet el fuqarolari va fuqaroligi bo‘lmagan shaxslarni Toshkent shahri va Toshkent viloyatida doimiy propiska qilish tartibini yanada takomillashtirish chora-tadbirlari to‘g‘risida”gi qarorlariga muvofiq buyuraman:

1. O‘zbekiston Respublikasi adliya vazirining 2010-yil 30-martdagi 64-mh-son buyrug‘i (ro‘yxat raqami 2090, 2010-yil 30-mart) (O‘zbekiston Respublikasi qonun hujjatlari to‘plami, 2010-y., 13-son, 99-modda) bilan tasdiqlangan Notariuslar tomonidan notarial harakatlarni amalga oshirish tartibi to‘g‘risidagi yo‘riqnomaga ilovaga muvofiq o‘zgartirish va qo‘shimchalar kiritilsin.

2. Mazkur buyruq davlat ro‘yxatidan o‘tkazilsin va bu haqda Idoraviy normativ-huquqiy hujjatlarni davlat ro‘yxatidan o‘tkazish boshqarmasi (B. Boliyev) Idoraviy normativ-huquqiy hujjatlarning davlat reyestriga tegishli yozuv kiritsin.

3. Notariat, advokatura va FHDY organlari boshqarmasi (D. Yakubova) hamda Qonun hujjatlarini turkumlash va huquqiy axborot boshqarmasi (Sh. Saidov) ushbu idoraviy normativ-huquqiy hujjatni barcha manfaatdor shaxslarga yetkazilishi va “O‘zbekiston Respublikasi qonun hujjatlari to‘plami” — “Sobraniye zakonodatelstva Respubliki Uzbekistan”da nashr etilishini ta’minlasin.

4. Mazkur buyruq rasmiy e’lon qilingan kundan e’tiboran kuchga kiradi.

5. Mazkur buyruq ijrosini nazorat qilish vazir o‘rinbosari N. Jo‘rayev zimmasiga yuklansin.

1. 58 va 58¹-bandlar quyidagi tahrirda bayon etilsin:

“58. Toshkent shahrida joylashgan uy, kvartira, uyning yoki kvartiraning bir qismi bo‘yicha oldi-sotdi, ayirboshlash, renta, umrbod ta’minlash sharti bilan o‘zgaga berish va hadya shartnomalarini, shuningdek Toshkent shahridagi turar joy yoxud turar joy bo‘lmagan bino shaklidagi ko‘chmas mulkni garovga (ipotekaga) qo‘yish, ko‘chmas mulkdan (ko‘chmas mulkning bir qismidan) voz kechish va ko‘chmas mulkni o‘zgaga berishning boshqa usullarini notarial tasdiqlash, agar sotib oluvchi tomon Toshkent shahrida doimiy propiskaga ega bo‘lgan jismoniy shaxs hisoblansa (O‘zbekiston Respublikasi fuqarosi, chet el fuqarosi yoki fuqaroligi bo‘lmagan shaxs bo‘lsa) amalga oshiriladi.

Bunda, notarius notarial harakatni amalga oshirishni so‘rab murojaat qilgan shaxsning pasportiga qo‘yilgan doimiy propiska shtampini tekshiradi. Agar pasportda “Toshkent shahri va Toshkent viloyatida doimiy propiska qilinishi lozim bo‘lgan shaxslar — O‘zbekiston Respublikasi fuqarolari toifalarining ro‘yxati to‘g‘risida”gi O‘zbekiston Respublikasi Qonuni bilan tasdiqlangan Ro‘yxatning (keyingi o‘rinlarda Ro‘yxat deb yuritiladi) 2, 5, 9 — 11-bandlari asosida yoki Vazirlar Mahkamasining 2012-yil 16-fevraldagi 41-son qarori bilan tasdiqlangan Chet el fuqarolari hamda fuqaroligi bo‘lmagan shaxslarni Toshkent shahrida va Toshkent viloyatida doimiy va vaqtincha propiska qilish to‘g‘risidagi nizomning ilovasidagi Toshkent shahrida va Toshkent viloyatida doimiy propiska qilinish huquqiga ega bo‘lgan shaxslar — chet el fuqarolari va fuqaroligi bo‘lmagan shaxslar toifalari ro‘yxatining (keyingi o‘rinlarda chet el fuqarolari va fuqaroligi bo‘lmagan shaxslar toifalari ro‘yxati deb yuritiladi) 2, 3 va 6-bandlari asosida qo‘yilgan doimiy propiska shtampi mavjud bo‘lsa, notarius ichki ishlar organining doimiy propiska borligi to‘g‘risidagi ma’lumotnomasini talab qiladi.

Bu holatda mazkur shaxsning pasportiga doimiy propiska shtampi qo‘yilgan sanadan boshlab u Toshkent shahri hududida uch yil doimiy yashagan bo‘lishi lozim.

58¹. Toshkent viloyatida joylashgan uy, kvartira, uyning yoki kvartiraning bir qismi bo‘yicha oldi-sotdi, ayirboshlash, renta, umrbod ta’minlash sharti bilan o‘zgaga berish va hadya shartnomalarini, shuningdek Toshkent viloyatidagi turar joy yoxud turar joy bo‘lmagan bino shaklidagi ko‘chmas mulkni garovga (ipotekaga) qo‘yish, ko‘chmas mulkdan (ko‘chmas mulkning bir qismidan) voz kechish va ko‘chmas mulkni o‘zgaga berishning boshqa usullarini notarial tasdiqlash, agar sotib oluvchi tomon Toshkent shahri yoki Toshkent viloyatida doimiy propiskaga ega bo‘lgan jismoniy shaxs hisoblansa (O‘zbekiston Respublikasi fuqarosi, chet el fuqarosi yoki fuqaroligi bo‘lmagan shaxs bo‘lsa) amalga oshiriladi.

Bunda, notarius notarial harakatni amalga oshirishni so‘rab murojaat qilgan shaxsning pasportiga qo‘yilgan doimiy propiska shtampini tekshiradi. Agar pasportda Ro‘yxatning 2, 5, 9 — 11-bandlari asosida yoki chet el fuqarolari va fuqaroligi bo‘lmagan shaxslar toifalari ro‘yxatining 2, 3 va 6-bandlari asosida qo‘yilgan doimiy propiska shtampi mavjud bo‘lsa, notarius ichki ishlar organining doimiy propiska borligi to‘g‘risidagi ma’lumotnomasini talab qiladi.

Bu holatda mazkur shaxsning pasportiga doimiy propiska shtampi qo‘yilgan sanadan boshlab u Toshkent shahri yoki Toshkent viloyati hududida uch yil doimiy yashagan bo‘lishi lozim.”.

2. 80-bandning sakkizinchi xatboshisi “boshqarmalaridan” degan so‘zdan keyin “(Toshkent shahrida — “Toshkent shahrida uy-joyga davlat orderlari va ma’lumotlar berish markazi” davlat unitar korxonasidan)” degan so‘zlar bilan to‘ldirilsin.

3. 80¹ va 80²-bandlar quyidagi tahrirda bayon etilsin:

“80¹. Toshkent shahrida joylashgan xususiylashtirilgan uy, kvartira, uyning yoki kvartiraning bir qismi bo‘yicha oldi-sotdi, ayirboshlash, renta, umrbod ta’minlash sharti bilan o‘zgaga berish va hadya shartnomalarini notarial tasdiqlash, agar sotib oluvchi tomon Toshkent shahrida doimiy propiskaga ega bo‘lgan jismoniy shaxs hisoblansa (O‘zbekiston Respublikasi fuqarosi, chet el fuqarosi yoki fuqaroligi bo‘lmagan shaxs bo‘lsa) amalga oshiriladi.

Bunda, notarius notarial harakatni amalga oshirishni so‘rab murojaat qilgan shaxsning pasportiga qo‘yilgan doimiy propiska shtampini tekshiradi. Agar pasportda Ro‘yxatning 2, 5, 9 — 11-bandlari asosida yoki chet el fuqarolari va fuqaroligi bo‘lmagan shaxslar toifalari ro‘yxatining 2, 3 va 6-bandlari asosida qo‘yilgan doimiy propiska shtampi mavjud bo‘lsa, notarius ichki ishlar organining doimiy propiska borligi to‘g‘risidagi ma’lumotnomasini talab qiladi.

Bu holatda mazkur shaxsning pasportiga doimiy propiska shtampi qo‘yilgan sanadan boshlab u Toshkent shahri hududida uch yil doimiy yashagan bo‘lishi lozim.

80². Toshkent viloyatida joylashgan xususiylashtirilgan uy, kvartira, uyning yoki kvartiraning bir qismi bo‘yicha oldi-sotdi, ayirboshlash, renta, umrbod ta’minlash sharti bilan o‘zgaga berish va hadya shartnomalarini notarial tasdiqlash, agar sotib oluvchi tomon Toshkent shahri yoki Toshkent viloyatida doimiy propiskaga ega bo‘lgan jismoniy shaxs hisoblansa (O‘zbekiston Respublikasi fuqarosi, chet el fuqarosi yoki fuqaroligi bo‘lmagan shaxs bo‘lsa) amalga oshiriladi.

Bunda, notarius notarial harakatni amalga oshirishni so‘rab murojaat qilgan shaxsning pasportiga qo‘yilgan doimiy propiska shtampini tekshiradi. Agar pasportda Ro‘yxatning 2, 5, 9 — 11-bandlari asosida yoki chet el fuqarolari va fuqaroligi bo‘lmagan shaxslar toifalari ro‘yxatining 2, 3 va 6-bandlari asosida qo‘yilgan doimiy propiska shtampi mavjud bo‘lsa, notarius ichki ishlar organining doimiy propiska borligi to‘g‘risidagi ma’lumotnomasini talab qiladi.

Bu holatda mazkur shaxsning pasportiga doimiy propiska shtampi qo‘yilgan sanadan boshlab u Toshkent shahri yoki Toshkent viloyati hududida uch yil doimiy yashagan bo‘lishi lozim.”.

4. 96-bandda:

ikkinchi xatboshidagi “dalolatnomasi” degan so‘z “orderi” degan so‘z bilan almashtirilsin;

quyidagi mazmundagi xatboshilar bilan to‘ldirilsin:

“Bunda, korxonaga bo‘lgan mulk huquqini tasdiqlovchi order mazkur xususiylashtirilgan korxonaning quyidagi ko‘chmas mulklari uchun (qonunga muvofiq xususiylashtirilmaydigan obyektlar bundan mustasno) ham mulk huquqini tasdiqlovchi hujjat bo‘lib hisoblanadi:

xususiylashtirilgan korxonalardagi davlat mulkini xususiylashtirishda aniqlanmagan ko‘chmas mulk;

xususiylashtirishda tasarruf etish huquqisiz foydalanishga berilgan, korxona hududida joylashgan ko‘chmas mulk.”.

5. Quyidagi mazmundagi 132¹-band bilan to‘ldirilsin:

“132¹. Toshkent shahri va Toshkent viloyatidagi turar joy yoxud turar joy bo‘lmagan bino shaklidagi ko‘chmas mulkni garovga (ipotekaga) qo‘yishda, ushbu Yo‘riqnomaning 57, 58, 58¹ va 58²-bandlari qoidalariga rioya qilinadi.”.

6. 136-bandning yettinchi xatboshisi “boshqarmalari” degan so‘zdan keyin “(Toshkent shahrida — “Toshkent shahrida uy-joyga davlat orderlari va ma’lumotlar berish markazi” davlat unitar korxonasi)” degan so‘zlar bilan to‘ldirilsin.

7. 215-bandning ikkinchi xatboshisi quyidagi tahrirda bayon etilsin:

“Hujjatsiz shakldagi qimmatli qog‘ozlar hisobga olish registrlaridagi yozuvlar tarzida tegishli investitsiya vositachisi yoki Qimmatli qog‘ozlar markaziy depozitariysida saqlanadi.”.

8. 258-banddagi “depozitariylardan” degan so‘zlar “investitsiya vositachisi yoki Qimmatli qog‘ozlar markaziy depozitariysidan” degan so‘zlar bilan almashtirilsin.

9. 260-band quyidagi tahrirda bayon etilsin:

“260. Bankda (boshqa kredit tashkilotida) saqlanayotgan omonat, meros beruvchining nomidagi qimmatli qog‘ozlar mavjudligini tasdiqlashda, notarius merosxo‘rlardan omonat daftarchasini (bank omonati shartnomasini yoki omonat mavjudligini isbotlovchi boshqa tegishli hujjatni), qimmatli qog‘ozlarga nisbatan esa tegishli investitsiya vositachisi yoki Qimmatli qog‘ozlar markaziy depozitariysining ma’lumotnomasini talab qiladi. Tadbirkorlik subyektlari notarial harakatni amalga oshirish yuzasidan murojaat etsa, ushbu ma’lumotnoma tegishli investitsiya vositachisi yoki Qimmatli qog‘ozlar markaziy depozitariysidan idoralararo so‘rov orqali olinadi. Omonat daftarchalari nusxalari va ma’lumotnomalar meros ishiga biriktirilgan bo‘lishi kerak.”.

10. 325-bandning oltinchi xatboshisidagi “depozitariy” degan so‘z “tegishli investitsiya vositachisi yoki Qimmatli qog‘ozlar markaziy depozitariysi” degan so‘zlar bilan almashtirilsin.