Resurslari ishlatilib boʻlgan yoki foydalanish uchun yaroqsiz simobli lampalarni toʻplash va ularni utilizatsiya qilishni tashkil etishni takomillashtirish, atrof muhitni simob bilan ifloslanishdan muhofaza qilishni taʼminlash maqsadida Vazirlar Mahkamasi qaror qiladi:

1. Vazirlar Mahkamasining “Simobli lampalarning ishlatilib boʻlgan resurslarini toʻplash va ularni utilizatsiya qilishni tashkil etish toʻgʻrisidagi nizomni tasdiqlash haqida” 2011-yil 21-sentabrdagi 266-son qaroriga (Oʻzbekiston Respublikasi QT, 2011-y., 9-son, 79-modda) ilovaga muvofiq oʻzgartirish va qoʻshimchalar kiritilsin.

2. “Oʻzeltexsanoat” aksiyadorlik kompaniyasi:

energiyani tejaydigan lampalarni ishlab chiqaruvchi korxonalar bilan birgalikda hamda Qoraqalpogʻiston Respublikasi Vazirlar Kengashi, viloyatlar va Toshkent shahri hokimliklari bilan kelishgan holda aholidan resurslari ishlatilib boʻlgan simobli lampalarni qabul qilib olish va utilizatsiya qilish tashkilotlariga berish uchun kompaniya tuzilmasiga kiradigan tashkilotlar ishlab chiqarayotgan energiyani tejaydigan lampalarni turgʻun savdo shoxobchalari orqali sotuvchi savdo obyektlarini joylashtirish;

Oʻzbekiston Milliy axborot agentligi va Oʻzbekiston milliy teleradiokompaniyasi bilan birgalikda resurslari ishlatilib boʻlgan simobli lampalarni qabul qilib olish, utilizatsiya qilish hamda ularni topshirishda mukofot berish mexanizmlari toʻgʻrisida ommaviy axborot vositalarida keng yoritish tadbirlarini bir oy muddatda ishlab chiqsin va tasdiqlasin.

3. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari U.U. Rozukulov zimmasiga yuklansin.

1. 1-bandda:

a) “Oʻzbekiston Respublikasi Iqtisodiyot vazirligi, “Oʻzeltexsanoat” uyushmasi tomonidan Davlat tabiatni muhofaza qilish qoʻmitasi va energiyani tejaydigan lampalarni ishlab chiqaruvchi korxonalar bilan birgalikda ishlab chiqilgan” soʻzlari chiqarib tashlansin.

2. 2-bandda:

a) ikkinchi xatboshi quyidagi tahrirda bayon qilinsin:

“simobli chiqindilarni zararsizlantiruvchi (demerkurizatsiyalovchi) va utilizatsiya qiluvchi, ekologiya va sanitariya-gigiyena ekspertizatsiyasidan oʻtgan zarur texnologik asbob-uskunalarga ega boʻlgan yuridik shaxslar (keyingi oʻrinlarda utilizatsiya qilish tashkilotlari deb ataladi) tomonidan”;

b) toʻrtinchi xatboshi quyidagi tahrirda bayon qilinsin:

“lampalarning sinishini va ularning tarkibidagi simob mavjud boʻlgan moddalarning havoga chiqib ketishini, suv manbalariga, tuproqqa va oziq-ovqat mahsulotlariga tushishini istisno etuvchi maxsus oʻrnatilgan konteynerlardan foydalangan holda maishiy chiqindilarni toʻplash punktlari orqali amalga oshiriladi”.

3. 4-bandda:

a) birinchi xatboshidagi “uyushmasi” soʻzi “aksiyadorlik kompaniyasi” soʻzlari bilan almashtirilsin;

b) uchinchi xatboshidagi “5” raqami “10” raqami bilan almashtirilsin.

4. 5-band oʻz kuchini yoʻqotgan deb hisoblansin.

5. 6-banddagi “uyushmasi” soʻzi “aksiyadorlik kompaniyasi” soʻzlari bilan almashtirilsin.

6. 7-banddagi “uyushmasi” soʻzi “aksiyadorlik kompaniyasi” soʻzlari bilan almashtirilsin.

7. 9-banddagi “uyushmasi” soʻzi “aksiyadorlik kompaniyasi” soʻzlari bilan almashtirilsin.

8. Ilovada:

a) 3-bandning toʻrtinchi xatboshi quyidagi tahrirda bayon qilinsin:

“utilizatsiya qilish tashkilotlari — simobli chiqindilarni zararsizlantirishni (demerkurizatsiyalashni) va utilizatsiya qiluvchi, ekologik va sanitariya-gigiyena ekspertizasidan oʻtgan zarur texnologik asbob-uskunalarga ega boʻlgan yuridik shaxslar”;

b) 8-bandning toʻrtinchi xatboshidagi “tushishiga yoʻl qoʻymaydigan maxsus idishda” soʻzlari “tushishini istisno etuvchi maxsus oʻrnatilgan konteynerlardan foydalangan holda” soʻzlari bilan almashtirilsin;

v) 9-bandda:

birinchi xatboshidagi “ishlab chiqaruvchi” soʻzlaridan keyin “(import qiluvchi)” soʻzlari qoʻshilsin;

ikkinchi xatboshidagi “5” raqami “10” raqami bilan almashtirilsin;

g) 17-bandning ikkinchi xatboshi quyidagi tahrirda bayon qilinsin:

“Maishiy chiqindilarni toʻplash punktlarida yigʻilgan resursi ishlatilib boʻlgan simobli lampalarni utilizatsiya qilish tashkilotlarigacha transportda yetkazib berish:

shaharlarda — ixtisoslashtirilgan sanitariya-tozalash tashkilotlari;

tuman markazlarida, shahar posyolkalarida va qishloq aholi punktlarida — tuman obodonlashtirish boshqarmalari yoki ixtisoslashtirilgan sanitariya-tozalash tashkilotlari tomonidan amalga oshiriladi”.

d) 18-banddagi “ikkilamchi materiallar” soʻzlaridan keyin “demerkurizatsiyalash taʼminlangan taqdirda” soʻzlari qoʻshilsin.