Oʻzbekiston Respublikasi Vazirlar Mahkamasining 2016-yil 7-apreldagi 107-son “Maktabgacha, umumiy oʻrta, oʻrta maxsus, kasb-hunar va maktabdan tashqari davlat taʼlim muassasalari pedagog kadrlarini attestatsiyadan oʻtkazish tartibi toʻgʻrisidagi nizomni tasdiqlash haqida”gi qaroriga asosan buyuraman:

1. Pedagog kadrning attestatsiyadan oʻtganligi toʻgʻrisidagi sertifikatlarni hisobga olish, saqlash va topshirish tartibi toʻgʻrisidagi nizom ilovaga muvofiq tasdiqlansin.

2. Mazkur buyruq rasmiy eʼlon qilingan kundan eʼtiboran kuchga kiradi.

Mazkur Nizom Oʻzbekiston Respublikasi Vazirlar Mahkamasining 2016-yil 7-apreldagi 107-son “Maktabgacha, umumiy oʻrta, oʻrta maxsus, kasb-hunar va maktabdan tashqari davlat taʼlim muassasalari pedagog kadrlarini attestatsiyadan oʻtkazish tartibi toʻgʻrisidagi nizomni tasdiqlash haqida”gi qaroriga muvofiq, maktabgacha, umumiy oʻrta, oʻrta maxsus, kasb-hunar va maktabdan tashqari davlat taʼlim muassasalari (bundan buyon matnda taʼlim muassasalari deb yuritiladi) pedagog kadrlarining attestatsiyadan oʻtganligi toʻgʻrisidagi sertifikatlarni (bundan buyon matnda sertifikat deb yuritiladi) hisobga olish, saqlash va topshirish tartibini belgilaydi.

1. Oʻzbekiston Respublikasi Vazirlar Mahkamasi huzuridagi Davlat test markazi (bundan buyon matnda DTM deb yuritiladi), Qoraqalpogʻiston Respublikasi Xalq taʼlimi vazirligi, viloyatlar xalq taʼlimi boshqarmalari, Toshkent shahar xalq taʼlimi bosh boshqarmasi (bundan buyon matnda xalq taʼlimi boshqarmalari deb yuritiladi), oʻrta maxsus, kasb-hunar taʼlimi hududiy boshqarmalari, xalq taʼlimi muassasalari faoliyatini metodik taʼminlash va tashkil etish tuman (shahar) boʻlimi hamda attestatsiya komissiyalari tuzilgan taʼlim muassasalarida ushbu tashkilotlar rahbarlarining buyrugʻi bilan sertifikatlarni hisobga olish, saqlash va topshirish boʻyicha moddiy javobgar shaxslar (bundan buyon matnda masʼul shaxs deb yuritiladi) belgilanadi.

2. Sertifikatlarni hisobga olish, saqlash va topshirish masʼul shaxslar tomonidan amalga oshiriladi.

3. Sertifikatlar hisobi masʼul shaxs tomonidan doimiy ravishda olib borilishi shart.

4. Qabul qilingan (kirim qilingan) sertifikatlar shu kunning oʻzida mazkur Nizomning ilovasiga muvofiq shaklda yuritiladigan Sertifikatlarning hisobini yuritish jurnalida (bundan buyon matnda jurnal deb yuritiladi) hisobga olinishi lozim.

5. Jurnal ip oʻtkazib tikilgan, uning varaqlariga tartib raqamlari qoʻyilgan boʻlishi kerak. Jurnalning oxirgi betida jami varaqlar soni koʻrsatilib, masʼul shaxs tomonidan imzolanadi va tashkilot muhri qoʻyiladi. Jurnalga maʼlumotlar masʼul shaxs tomonidan qayd etib boriladi.

6. Jurnalni toʻldirishda yoʻl qoʻyilgan xato bir chiziq bilan oʻchiriladi va keyingi qatorga toʻgʻri yozuv kiritiladi. Kiritilgan har bir tuzatish shu varaqning pastki qismida izohlanib, tashkilot muhri bilan tasdiqlanishi zarur. Jurnaldagi yozuvlarni oʻchirish, boʻyash, ustidan qogʻoz yopishtirish, shuningdek jurnalda ochiq qatorlar qoldirib ketish taqiqlanadi.

7. Sertifikatlar masʼul shaxs tomonidan poʻlat seyfda (yonmaydigan shkafda) saqlanishi zarur. Agar masʼul shaxsning xonasida poʻlat seyf (yonmaydigan shkaf) boʻlmasa, sertifikatlar tashkilot rahbarining poʻlat seyfida (yonmaydigan shkafida) saqlanadi.

8. Ishdan tashqari vaqtlarda sertifikatlar saqlanayotgan poʻlat seyf (yonmaydigan shkaf) joylashgan xona muhrlangan boʻlishi kerak.

9. Sertifikatlar:

xalq taʼlimi boshqarmalari va oʻrta maxsus, kasb-hunar taʼlimi hududiy boshqarmalariga — DTM tomonidan;

xalq taʼlimi muassasalari faoliyatini metodik taʼminlash va tashkil etish tuman (shahar) boʻlimlariga — tegishli xalq taʼlimi boshqarmalari tomonidan;

taʼlim muassasalariga — xalq taʼlimi muassasalari faoliyatini metodik taʼminlash va tashkil etish tuman (shahar) boʻlimlari tomonidan buyurtmanomalarga muvofiq belgilangan tartibda beriladi.

10. Sertifikatlar ishonchnomaga asosan dalolatnoma rasmiylashtirilgan holda beriladi. Dalolatnoma sertifikatlarni topshirgan va qabul qilib olgan shaxslar tomonidan imzolanadi hamda sertifikatlarni topshirayotgan tashkilot rahbari tomonidan tasdiqlanadi.

Ushbu dalolatnomada topshirilgan sertifikatlar haqida maʼlumot (seriyasi, tartib raqami), miqdori va topshirilgan tashkilot hamda boshqa zarur maʼlumotlar koʻrsatilishi lozim.

11. Attestatsiya komissiyalari pedagog kadrlarga tarqatish uchun sertifikatlarni masʼul shaxsdan oladi.

12. Attestatsiya komissiyalari Vazirlar Mahkamasining 2016-yil 7-apreldagi 107-son qarori bilan tasdiqlangan Maktabgacha, umumiy oʻrta, oʻrta maxsus, kasb-hunar va maktabdan tashqari davlat taʼlim muassasalari pedagog kadrlarini attestatsiyadan oʻtkazish tartibi toʻgʻrisida nizomga muvofiq sertifikatlarning pedagog kadrlarga tarqatilishini roʻyxatga olish uchun maxsus daftar (sahifalangan, tikilgan va muhrlangan) yuritadi.

13. Sertifikatlarning xatosiz toʻldirilishi uchun attestatsiya komissiyasi raislari masʼul hisoblanadi. Sertifikatlarni toʻldirish vaqtida yoki toʻldirilgandan keyin undagi yozuvlarni boʻyash, oʻchirish, tuzatish kiritish hamda ushbu holatlarga izoh berib muhr bilan tasdiqlashga yoʻl qoʻyilmaydi. Toʻldirish vaqtida buzilgan sertifikatlar boʻyicha ikki nusxada dalolatnoma tuzilib, har chorakda mazkur Nizomning 15-bandida belgilangan tartibda tegishli tashkilotga topshiriladi.

14. Buzilgan va yaroqsiz holga kelgan sertifikatlar dalolatnoma asosida hisobdan chiqariladi. Mazkur dalolatnoma ikki nusxada tuzilib, masʼul xodim va tashkilot rahbari tomonidan imzolanadi. Ushbu dalolatnomada buzilgan va yaroqsiz holga kelgan sertifikatlar haqidagi maʼlumotlar (sertifikatlarning buzilishi, yaroqsiz holga kelishi sabablari, seriyasi, tartib raqami, miqdori) koʻrsatilishi lozim. Dalolatnoma asosida buzilgan va yaroqsiz holga kelgan sertifikatlar haqida jurnalga tegishli yozuv kiritiladi.

15. Buzilgan va yaroqsiz holga kelgan sertifikatlar boʻyicha rasmiylashtirilgan dalolatnomaning bir nusxasi:

taʼlim muassasasi tomonidan — tegishli xalq taʼlimi muassasalari faoliyatini metodik taʼminlash va tashkil etish tuman (shahar) boʻlimiga;

xalq taʼlimi muassasalari faoliyatini metodik taʼminlash va tashkil etish tuman (shahar) boʻlimi tomonidan — tegishli xalq taʼlimi boshqarmasiga;

xalq taʼlimi boshqarmasi yoki hududiy oʻrta maxsus, kasb-hunar taʼlimi boshqarmasi tomonidan — DTMga sertifikatlar ilova qilingan holda yuborilishi lozim. Bunda xalq taʼlimi boshqarmasi tomonidan taʼlim muassasasi hamda xalq taʼlimi muassasalari faoliyatini metodik taʼminlash va tashkil etish tuman (shahar) boʻlimi yuborgan yaroqsiz holga kelgan sertifikatlar va dalolatnoma nusxalarini ham DTMga yuboriladi.

16. DTMga yuborilgan buzilgan va yaroqsiz holga kelgan sertifikatlarni yoʻq qilish boʻyicha ikki nusxada dalolatnoma rasmiylashtiriladi hamda masʼul shaxs va DTM direktori tomonidan imzolanadi. Sertifikatlarning seriyalari, tartib raqamlari qirqib olinib, dalolatnomaning bir nusxasiga ilova qilingandan soʻng, sertifikatlarning oʻzi yoqib yuborish yoʻli bilan yoʻq qilinadi.

17. Maʼlum sabablarga koʻra tarqatilmay qolgan sertifikatlar boʻyicha har yarim yilda ikki nusxada dalolatnoma tuziladi hamda masʼul shaxs va attestatsiya komissiyasi raisi tomonidan imzolanadi. Dalolatnomaning bir nusxasi, tarqatilmay qolgan sertifikatlar unga ilova qilingan holda, sertifikatlarni bergan masʼul shaxsga qaytariladi. Masʼul shaxs tarqatilmay qolgan barcha sertifikatlarni umumlashtirib, ularni dalolatnoma asosida mazkur Nizomning 15-bandida belgilangan tartibda DTMga yuborilishini taʼminlaydi.

18. DTMga yuborilgan va maʼlum sabablarga koʻra tarqatilmay qolgan foydalanish uchun yaroqli boʻlgan sertifikatlar masʼul shaxs tomonidan qayta hisobga olinadi va kelgusida mazkur Nizomda belgilangan tartibda foydalaniladi.

19. Mazkur Nizom Oʻzbekiston Respublikasi Xalq taʼlimi vazirligi hamda Oliy va oʻrta maxsus taʼlim vazirligining Oʻrta maxsus, kasb-hunar taʼlimi markazi bilan kelishilgan.