Qoraqalpog‘iston Respublikasining Mo‘ynoq tumanida baliqchilik tarmog‘ini yanada rivojlantirish, “Jaltirbas”, “Sudochye” va “Ribachye” tabiiy suv havzalarining baliq mahsuldorligini oshirish, yangi ish o‘rinlarini yaratishga, aholini yuqori sifatli baliq mahsulotlari bilan ta’minlashga doir vazifalarni hal etishga kompleks yondashish, shuningdek yuqorida qayd etilgan tabiiy suv havzalarini baliqlantirishni samarali tashkil etish maqsadida Vazirlar Mahkamasi qaror qiladi:

1. Qoraqalpog‘iston Respublikasi Vazirlar Kengashi, O‘zbekiston Respublikasi Tabiatni muhofaza qilish davlat qo‘mitasi, O‘zbekiston Respublikasi Qishloq va suv xo‘jaligi vazirligining:

Mo‘ynoq tumani hokimligi huzurida “Mo‘ynoq akva sanoat” davlat unitar korxonasini (keyingi o‘rinlarda “Mo‘ynoq akva sanoat” DUK deb ataladi) tashkil etish;

Qoraqalpog‘iston Respublikasining Mo‘ynoq tumanida joylashgan “Jaltirbas” (17280 ga), “Sudochye” (19000 ga) va “Ribachye” (3000 ga) tabiiy suv havzalarini (keyingi o‘rinlarda suv havzalari deb ataladi) baliqchilik tarmog‘ini rivojlantirish uchun belgilangan tartibda “Mo‘ynoq akva sanoat” DUKga doimiy alohida foydalanish uchun berish to‘g‘risidagi takliflariga rozilik berilsin.

2. Quyidagilar “Mo‘ynoq akva sanoat” DUKning asosiy vazifalari hisoblansin:

suv havzalarini kelgusida baliqlantirish uchun baliq chavoqlarini yetishtirish maqsadida suv havzalari hududida baliq pitomniklari va inkubatsiya sexlarini tashkil etish va ularning faoliyatini ta’minlash;

suv havzalarida qafas usulida baliq yetishtirish texnologiyalarini yaratish va joriy etish ishlarini tashkil qilish;

suv havzalari hududida havaskorlik va sport maqsadidagi baliq ovini, turizmni rivojlantirish:

baliq ovlash hajmini ko‘paytirish, raqobatbardosh baliq mahsulotlari va yarim tayyor mahsulotlarni ishlab chiqarish bo‘yicha texnologik jarayonlarni bosqichma-bosqich shakllantirish.

3. Quyidagilar:

“Mo‘ynoq akva sanoat” DUKning boshqaruv xodimlarining cheklangan soni 9 nafardan iborat bo‘lgan boshqaruv tuzilmasi 1-ilovaga* muvofiq:

Qoraqalpog‘iston Respublikasining Mo‘ynoq tumanidagi “Jaltirbas”, “Sudochye” va “Ribachye” tabiiy suv havzalarini yanada rivojlantirish va biologik resurslaridan oqilona foydalanish chora-tadbirlari kompleksi 2-ilovaga* muvofiq tasdiqlansin.

4. Belgilansinki:

Qoraqalpog‘iston Respublikasining Mo‘ynoq tumani hokimligi “Mo‘ynoq akva sanoat” DUKning muassisi hisoblanadi:

“Mo‘ynoq akva sanoat” DUK o‘z faoliyatini to‘liq o‘zini o‘zi moliyalashtirish asosida amalga oshiradi, ishlab chiqarish-xo‘jalik va moliyaviy faoliyat masalalarini mustaqil hal qiladi.

5. Tijorat banklariga Qoraqalpog‘iston Respublikasining Mo‘ynoq tumanidagi “Jaltirbas”, “Sudochye” va “Ribachye” tabiiy suv havzalarini yanada rivojlantirish va biologik resurslaridan oqilona foydalanish bo‘yicha tasdiqlangan chora-tadbirlar kompleksida nazarda tutilgan tadbirlarning bajarilishini moliyalashtirish uchun “Mo‘ynoq akva sanoat” DUKga belgilangan tartibda kreditlar ajratish tavsiya etilsin.

6. Qoraqalpog‘iston Respublikasi Vazirlar Kengashi bir oy muddatda:

Mo‘ynoq tumani hokimligi tomonidan “Mo‘ynoq akva sanoat” DUKning ustavi tasdiqlanishini va uning davlat ro‘yxatidan o‘tkazilishini:

“Mo‘ynoq akva sanoat” DUKning ijro etuvchi apparati tasdiqlangan tuzilma va shtatlar jadvaliga muvofiq puxta tanlov asosida yuqori malakali mutaxassislar bilan to‘ldirilishini ta’minlasin.

“Mo‘ynoq akva sanoat” DUK quyidagi manzilga joylashtirilsin:

Qoraqalpog‘iston Respublikasi, Mo‘ynoq tumani, Ajiniyoz ko‘chasi, 77-uy.

7. Mazkur qarorning bajarilishini nazorat qilish O‘zbekiston Respublikasi Vazirlar Mahkamasining Qishloq va suv xo‘jaligi, qishloq xo‘jaligi mahsulotlarini qayta ishlash hamda iste’mol tovarlari masalalari axborot-tahlil departamentiga yuklansin.