Vazirlar Mahkamasining “Fermer xoʻjaliklarini yuritish uchun berilgan yer uchastkalari maydonlarini maqbullashtirish chora-tadbirlari toʻgʻrisida” 2015-yil 15-dekabrdagi 362-son qarorini ijro etish yuzasidan, fermer xoʻjaliklarini yuritish uchun yer uchastkalari berish va ularni olib qoʻyish tartibini takomillashtirish maqsadida Vazirlar Mahkamasi qaror qiladi:

1. Oʻzbekiston Respublikasi Hukumatining ilovaga muvofiq ayrim qarorlariga oʻzgartirish va qoʻshimchalar kiritilsin.

2. Vazirliklar va idoralar bir oy muddatda oʻz idoraviy normativ-huquqiy hujjatlarini ushbu qarorga muvofiqlashtirsinlar.

3. Mazkur qarorning bajarilishini nazorat qilish Oʻzbekiston Respublikasi Bosh vazirining birinchi oʻrinbosari R.S. Azimov zimmasiga yuklansin.

1. Vazirlar Mahkamasining 2003-yil 30-oktabrdagi 476-son qarori (Oʻzbekiston Respublikasi QT, 2003-y, 10-son, 105-modda) bilan tasdiqlangan Yer uchastkalarini fermer xoʻjaliklariga uzoq muddatli ijaraga berish tartibi toʻgʻrisidagi nizomning 15-bandi quyidagi tahrirda bayon qilinsin:

“15. Tuman hokimi arizalarni tuman fermerlari kengashiga yuboradi.

Tuman fermerlari kengashi ikki kun mobaynida arizalarni koʻrib chiqadi va ularni koʻrib chiqish natijalari boʻyicha xulosa chiqaradi.

Tuman fermerlari kengashining xulosasi arizalar bilan birgalikda yer maydonlarini berish (realizatsiya qilish) masalalarini koʻrib chiqish boʻyicha tuman komissiyasiga yuboriladi, Komissiya fermer xoʻjaligiga yer uchastkalari berish boʻyicha tanlov oʻtkazadi.

Yer maydonlarini berish (realizatsiya qilish) masalalarini koʻrib chiqish boʻyicha tuman komissiyasining tarkibiga yer resurslari va davlat kadastri, qishloq va suv xoʻjaligi, tabiatni muhofaza qilish, arxitektura va qurilish, sanitariya-epidemiologiya xizmati organlari, fuqarolarning oʻzini oʻzi boshqarish organlari vakillari, shuningdek tuman fermerlari kengashining raisi va boshqa shaxslar kiritiladi.

Yer maydonlarini berish (realizatsiya qilish) masalalarini koʻrib chiqish boʻyicha tuman komissiyasining qarori protokol bilan rasmiylashtiriladi va barcha hujjatlar, shu jumladan tuman fermerlari kengashining xulosasi bilan birgalikda koʻrib chiqish uchun xalq deputatlari tuman Kengashiga yuboriladi.

Xalq deputatlari tuman Kengashi eng yaqindagi sessiyada yer uchastkalari berish (realizatsiya qilish) masalalarini koʻrib chiqish boʻyicha tuman komissiyasi tomonidan taqdim etilgan hujjatlarni koʻrib chiqadi va tegishli qaror qabul qiladi, ushbu qaror tuman hokimiga yuboriladi.

Tuman hokimi xalq deputatlari tuman Kengashining ijobiy qarori asosida uch kun mobaynida fermer xoʻjaligi yuritish uchun yer uchastkasi berish toʻgʻrisida qaror chiqaradi va uch kun muddatda ushbu qarorni tasdiqlash uchun viloyat hokimi boshchilik qiladigan yer maydonlarini berish (realizatsiya qilish) masalalarini koʻrib chiqish boʻyicha viloyat komissiyasiga yuboradi. Bunda tuman hokimining qaroriga tuman fermerlari kengashining xulosasi, yer maydonlarini berish (realizatsiya qilish) masalalarini koʻrib chiqish boʻyicha tuman komissiyasining qarori, shuningdek xalq deputatlari tuman Kengashining qarori ilova qilinadi”.

2. Vazirlar Mahkamasining 2013-yil 31-yanvardagi 22-son qarori (Oʻzbekiston Respublikasi QT, 2013-y., 1-son, 6-modda) bilan tasdiqlangan Fermer xoʻjaligi yer maydonini maqbullashtirish va uni tugatish tartibi toʻgʻrisidagi nizomda:

a) 4-bandda:

uchinchi xatboshidagi “tegishli xulosani olish uchun Komissiyaga” soʻzlari “tuman fermerlari kengashiga” soʻzlari bilan almashtirilsin;

quyidagi mazmundagi toʻrtinchi va beshinchi xatboshilar qoʻshilsin:

“Tuman fermerlari kengashi ikki kun mobaynida arizalarni koʻrib chiqadi va ularni koʻrib chiqish natijalari boʻyicha xulosa chiqaradi.

Tuman fermerlari kengashi xulosasi arizalar bilan birgalikda tegishli xulosani olish uchun Komissiyaga yuboriladi”;

b) 5-bandda:

birinchi jumladagi “va tegishli xulosa chiqaradi” soʻzlari chiqarib tashlansin;

quyidagi mazmundagi ikkinchi va uchinchi xatboshilar qoʻshilsin:

“koʻrib chiqish natijalari boʻyicha Komissiya qaror qabul qiladi, ushbu qaror protokol bilan rasmiylashtiriladi va barcha hujjatlar, shu jumladan tuman fermerlari kengashining qarori bilan birgalikda koʻrib chiqish uchun xalq deputatlari tuman Kengashiga yuboriladi.

Xalq deputatlari tuman Kengashi eng yaqindagi sessiyada Komissiya tomonidan taqdim etilgan hujjatlarni koʻrib chiqadi va tegishli qaror qabul qiladi. Ushbu qaror tuman (shahar) hokimiga yuboriladi”;

v) 6-banddagi “Komissiyaning ijobiy xulosasi” soʻzlari “xalq deputatlari tuman Kengashining ijobiy qarori” soʻzlari bilan almashtirilsin;

g) 17-banddan “tuman fermerlari kengashi bilan kelishilgan” soʻzlari chiqarib tashlansin;

d) 18 — 22-bandlar quyidagi tahrirda bayon qilinsin:

“18. Tuman (shahar) hokimi uch kun muddatda barcha hujjatlar va materiallarni tuman fermerlari kengashiga yuboradi.

Tuman fermerlari kengashi ikki kun mobaynida hujjatlar va materiallarni koʻrib chiqadi va ularni koʻrib chiqish natijalari boʻyicha xulosa chiqaradi.

Tuman fermerlari kengashining xulosasi hujjatlar va materiallar bilan birgalikda tegishli xulosani olish uchun Komissiyaga yuboriladi.

19. Dalolatnomada koʻrsatilgan holatlar tasdigʻini topmagan va (yoki) asoslanmaganligi aniqlangan taqdirda, Komissiya mazkur Nizomning 14-bandida koʻrsatilgan organlar (tashkilotlar)ning taqdimnomasini qaytarish toʻgʻrisida qaror qabul qilib, tuman (shahar) hokimiga va koʻrsatilgan organlar (tashkilotlar)ga bildirishnoma yuboradi va kiritilgan hujjatlarni qaytaradi.

20. Dalolatnomada koʻrsatilgan holatlar tasdigʻini topgan taqdirda, Komissiya bir hafta muddatda taqdim etilgan hujjatlar va materiallarni tahlil qilish asosida yer uchastkasini ijaraga berish shartnomasini bekor qilish toʻgʻrisida yoxud uning maydonini maqbullashtirish toʻgʻrisida xulosa tayyorlaydi, ushbu xulosa barcha hujjatlar bilan birgalikda koʻrib chiqish uchun xalq deputatlari tuman Kengashiga yuboriladi.

Xalq deputatlari tuman Kengashi eng yaqindagi sessiyada Komissiya tomonidan taqdim etilgan hujjatlarni koʻrib chiqadi va tegishli qaror qabul qiladi, ushbu qaror Komissiya tomonidan taqdim etilgan hujjatlar bilan birgalikda tuman (shahar) hokimiga yuboriladi.

21. Tuman (shahar) hokimi xalq deputatlari tuman Kengashining yer uchastkasini ijaraga berish shartnomasini bekor qilish yoxud yer maydonini maqbullashtirish toʻgʻrisidagi qarori asosida, qonun hujjatlarida belgilangan tartibda, xalq deputatlari tuman Kengashining qarorini, Komissiyaning xulosasini, tuman fermerlari kengashining xulosasini, dalolatnomani va boshqa zarur hujjatlar hamda materiallarni ilova qilgan holda fermer xoʻjaligi rahbari bilan yer uchastkasini ijaraga berish shartnomasini bekor qilish yoxud uning yer uchastkasi maydonini maqbullashtirish toʻgʻrisida fermer xoʻjaligi rahbariga taklif kiritadi.

Shartnomani bekor qilish toʻgʻrisidagi taklif fermer xoʻjaligi rahbari tomonidan rad etilganda yoki Oʻzbekiston Respublikasi Fuqarolik kodeksining 384-moddasida belgilangan muddatda javob olinmaganda tuman (shahar) hokimi, qonun hujjatlarida belgilangan tartibda, xalq deputatlari tuman Kengashining qarorini, Komissiyaning xulosasini, tuman fermerlari kengashining xulosasini dalolatnomani va boshqa zarur hujjatlar va materiallarni ilova qilgan holda fermer xoʻjaligi bilan yer uchastkasini ijaraga berish shartnomasini bekor qilish yuzasidan xoʻjalik sudiga daʼvo arizasini yuboradi.

22. Ijara shartnomasini bekor qilish yuzasidan daʼvo arizasi qondirilishi xoʻjalik sudi tomonidan rad etilgan taqdirda tuman (shahar) hokimi ushbu Nizomning 14-bandida koʻrsatilgan organlar (tashkilotlar)ning taqdimnomasini rad etish toʻgʻrisida qaror qabul qiladi hamda xalq deputatlari tuman Kengashiga, tuman fermerlari kengashiga, Komissiyaga va tegishli organlarga (tashkilotlarga) bildirishnoma yuboradi va kiritilgan materiallarni qaytaradi”;

e) 1-ilovaning matni quyidagi tahrirda bayon qilinsin:

j) 2-ilovaning matni quyidagi tahrirda bayon qilinsin: